Latest News
  • హిందూ సముద్ర జలాలకు సమీపంలోరెండు నెలలుగా చైనా యుద్ధనౌకలు, జలాంతర్గామిలు సంచరిస్తున్నట్టు భారత నావికాదళం పసిగట్టిన నేపధ్యం లోఈనెల 10 నుంచి  భారత్-అమెరికా-జపాన్ దేశాల ఉమ్మడి సైనిక విన్యాసాలు జరుగనున్నాయి. ఈ త్రిముఖ విన్యాసాల్లో సుమారు 15 యుద్ధనౌకలు, రెండు సబ్‌మెరైన్లు, లెక్కకు మిక్కిలిగా ఫైటర్ జెట్‌లు, నిఘా విమానాలు, హెలికాప్టర్లు పాలుపంచుకోనున్నాయి. 44,570 టన్నుల బరువైన అతిపెద్ద యుద్ధనౌక ఐఎన్ఎస్ విక్రమాదిత్య తన సత్తా చాటుకోనుంది. మిగ్-29కేలూ విన్యాసాల్లో పాల్గొంటాయి. అమెరికా నుంచి లక్ష టన్నుల బరువైన, ప్రపంచంలోని అగ్రశేణి యుద్ధనౌకల్లో ఒకటైన యూఎస్ఎస్ నిమిట్జ్ ప్రత్యేక ఆకర్షణగా నిలువనుంది. జపాన్ 27,000 టన్నుల హెలికాప్టర్ కేరియర్ ఐజుమో, ఇతర యుద్ధనౌకలను విన్యాసాల్లో దింపుతోంది. ప్రపంచంలోనే కీలకమైన ఈ మూడు దేశాల సైనిక విన్యాసాలతో  'కయ్యానికి కాలుదువ్వుతున్న' ఇరుగుపొరుగు దేశాలకు గుండె జల్లు మనడం ఖాయం అంటున్నారు.   ఇదిలా ఉంటే ఇండో-చైనా సరిహద్దు వెంట చైనా కవ్వింపు చర్యలకు పాల్పడుతున్నది. ఆ దేశ ఆర్మీకి చెందిన యుద్ధ హెలికాప్టర్లు అనుమతి లేకుండా తరుచూ భారత గగనతలంలోకి చొచ్చుకొస్తున్నాయి. ఉత్తరాఖండ్‌లోని సరిహద్దు వెంట చైనా ఆర్మీ ఇటీవల  రెండుసార్లు నిబంధనలు ఉల్లంఘించడం ఆందోళన కలిగిస్తున్నది. చమోలీ జిల్లాలోని బారాహోతి ప్రాంతంలో నాలుగురోజుల క్రితం ఓ చైనా యుద్ధ హెలికాప్టర్ చక్కర్లు కొట్టిందని భారత వైమానిక దళ(ఐఏఎఫ్) అధికారులు అధికారులు గుర్తించారు .  ఇవి చైనా ఆర్మీకి చెందిన జిబా సిరీస్ హెలికాప్టర్లు అని అంటున్నారు.  వీటిలో నిఘా కెమెరాలు ఉంటాయని, సరిహద్దులో భారత రక్షణ ఏర్పాట్లను చిత్రీకరించి ఉంటారని అనుమానిస్తున్నారు. ఇటీవల చైనా దూకుడుగా వ్యవహరిస్తుండటంతో చైనాతోపాటు, టిబెట్ వెంట ఉన్న 350 కిలోమీటర్ల సరిహద్దు భద్రతను భారత్ సమీక్షిస్తున్నది. ఈ నేపథ్యంలో చైనా హెలికాప్టర్లు తరుచూ భారత గగనతలంలోకి చొచ్చుకు రావడం ఆందోళన కలిగిస్తున్నది. చైనా ఆర్మీ ఇలా నిబంధనలు ఉల్లంఘించడం గత మూడు నెలల్లో ఇది నాలుగోసారని ఐఏఎఫ్ వర్గాలు చెబుతున్నాయి. ...
  • రాష్ట్ర పతి ఎన్నిక రసకందాయంలో పడింది . ఏకాభిప్రాయ సాధన మృగ్యమై ఎవరికి వారే యమునాతీరే అన్న రీతిలో ఎన్డీయే, విపక్ష కూటమి తమ తమ రాష్ట్రపతి అభ్యర్థులను బరిలోకి దించడంతో ఈసారి కూడా దేశ అత్యున్నత పదవికి పోటీ అనివార్యమైంది. ఎవరూ ఊహించని విధంగా దళిత అభ్యర్థి రామ్‌నాథ్ కోవింద్‌ను బరిలోకి దించడం ద్వారా ఎన్డీయే.. విపక్షాలకు గట్టి సవాలే విసిరింది. దీంతో ఎన్డీయేపై దళిత కార్డునే ఉపయోగించి మీరాకుమార్‌ను కాంగ్రెస్ ఆధ్వర్యంలోని విపక్ష కూటమి బరిలోకి దింపింది.  ఈ ఇద్దరూ దళిత నేతలే కాకుండా వృత్తిరీత్యా కూడా లాయర్లు. ఇద్దరూ 1945లోనే పుట్టారు. ఈ సారూప్యాల మాటెలా ఉన్నా ప్రస్తుతానికి మాత్రం ఓట్ల శాతం, గెలుపు విషయంలో మీరాకుమార్ కంటే రామ్‌నాథ్ కోవింద్‌కే మెరుగైన ఆవకాశాలు ఉన్నాయి. జూలై 17న ఎన్నిక జరగనుంది. 2017 జులై 24న ప్రస్తుత రాష్ట్రపతి ప్రణబ్‌ ముఖర్జీ పదవీ కాలం ముగుస్తుంది గనక ఆలోగా మరొకరిని ఎన్నుకోవలసి వుంది. ప్రణబ్‌ స్థానంలో ఎవరు ఎన్నికవుతారు? అనే అంశం పై జోరుగా చర్చలు జరుగుతున్నాయి.  ఇక గతంలోకి వెళ్లి చూస్తే రాష్ట్రపతి ఎన్నిక విషయంలో ఏకాభి ప్రాయం ఎపుడూ కుదరలేదు.  కాంగ్రెస్‌ హయాంలో ఆ పార్టీ అధినేతలు కోరుకున్న వారే రాష్ట్రపతులు అయ్యేవారు. 1969లో రాష్ట్రపతి జాకీర్‌ హుస్సేన్‌ మరణంతో ఉపరాష్ట్రపతి వివిగిరి తాత్కాలికంగా ఆ పదవి చేపట్టారు. అప్పుడే కొత్త...  పాత కాంగ్రెస్‌ల రాజకీయ ఘర్షణ మొదలైంది. నాటి ప్రధాని ఇందిరాగాంధీని వ్యతిరేకించే పాతకాపులంతా కలసి నీలం సంజీవరెడ్డిని రాష్ట్రపతిగా నిర్ణయించారు.ఆయనకు వ్యతిరేకంగా వామపక్షాలు మరికొన్ని పార్టీల మద్దతుతో వివిగిరి పోటీ చేశారు.  ఇందిరాగాంధీ అండదండలు వుండటంతో నీలంను ఓడించి గిరి విజయం సాధించారు. కాంగ్రెస్‌ రెండు ముక్కలు కావడానికి ఆ ఎన్నిక దారి తీసింది. అప్పట్లో ప్రగతిశీల నినాదాలతో మురిపించిన ఇందిర 1974 రాష్ట్రపతి ఎన్నిక నాటికి  ఫకృద్దీన్‌ అలీ అహ్మద్‌ను ఎంపిక చేస్తే వామపక్షాలు ఆయనపై ఆర్‌ఎస్‌పి నేత త్రిదిబ్‌ చౌదరిని నిలబెట్టాయి.  ఫకృద్దీన్‌ విజయం సాధించి కుర్చీ ఎక్కాక  ఏడాదిలోనే వచ్చిన ఎమర్జన్సీకి ఆమోద ముద్ర వేశారనే విమర్శలు వచ్చాయి. 1977లో  ఫక్రుద్దీన్‌ అలీ అహ్మద్‌ హఠాన్మరణంతో ఎన్నిక అనివార్యమైంది. 37 మంది అభ్యర్థులు నామినేషన్లు దాఖలు చేశారు. అనూహ్యంగా, వాటిలో 36 తిరస్కరణకు గురయ్యాయి. దాంతో, ఊహించని విధంగా నీలం సంజీవ రెడ్డి రాష్ట్రపతి అయ్యారు. ఇందిరాగాంధీ 1980లో తిరిగి గెలిచాక రాష్ట్ర ప్రభుత్వాలను రద్దు చేయడం వంటి నిర్ణయాలు తీసుకున్నప్పుడు సంజీవరెడ్డి భిన్నాభిప్రాయాలు వ్యక్తం చేస్తూ వచ్చారు. ఇందిర 1982లో మరోసారి తనకు వీర విధేయుడైన జ్ఞానీ జైల్‌సింగ్‌ను ఎంపిక చేస్తే 'ఆమె ఆజ్ఞాపిస్తే పార్లమెంటును చీపురుతో వూడ్చడానికి కూడా సిద్ధమే'నని ప్రకటించారు.. ఆయనపై ప్రతిపక్షాలు ఉమ్మడి అభ్యర్థిగా మాజీ ప్రధాన న్యాయమూర్తి హెచ్‌ ఆర్‌ ఖన్నాను నిలబెట్టాయి. పంజాబ్‌ ముఖ్యమంత్రిగా పని చేసిన జైల్‌ సింగ్‌ అక్కడ ముఠా తగాదాలతో సిక్కు ఉగ్రవాదానికి పరోక్ష తోడ్పాటు నిచ్చారనే ఆరోపణలు ఎదుర్కొన్నారు.  జైల్‌సింగ్‌ అనంతరం ఆర్‌ వెంకట్రామన్‌ను రాజీవ్‌గాంధీ ఎంపిక చేశారు.1989 ఎన్నికల తర్వాత ముగ్గురు ప్రధానమంత్రులు విపిసింగ్‌, చంద్రశేఖర్‌, పివి నరసింహారావుతో ప్రమాణ స్వీకారం చేయించిన వ్యక్తి వెంకట్రామన్ . 1992లో పివి హయాంలో రాష్ట్రపతి ఎన్నిక వచ్చినపుడు శంకర్‌ దయాళ్‌ శర్మ అయితే బావుంటుందని అత్యధికులు భావించారు. బిజెపి టిడిపిలు గిల్బర్ట్‌ స్వెల్‌ ను పోటీ పెట్టినా వామపక్షాలు శర్మకు మద్దతునిచ్చి గెలిపించాయి. అయోధ్యలో బాబ్రీ మసీదు విధ్వంసం విషయంలో పివి ఉదాసీనంగా వుంటే తానే ముందు ఖండించి ప్రధానిని పిలిపించి శర్మ కొత్త చరిత్ర సృష్టించారు. శర్మ హయాంలోనూ వాజ్‌పేయి, దేవగౌడ, ఐకె గుజ్రాల్‌ మళ్లీ వాజ్‌పేయి ఇలా నాలుగు సార్లు ప్రధాని ప్రమాణ స్వీకారాలు జరిగాయి. ఆయన 1996లో మెజార్టీ లేకున్నా వాజ్‌పేయికి అవకాశం ఇవ్వడం విమర్శకు గురైనా 13 రోజుల్లోనే దిగిపోయారు. అనుకున్న ప్రకారమే తర్వాత నారాయణన్‌ను ఒక్క శివసేన తప్ప అన్ని పార్టీలు ఏకగ్రీవంగా బలపర్చాయి. 95 శాతం ఓట్లతో నారాయణన్‌ ఎన్నికయ్యారు.   వాజ్‌పేయి హయం లో అయన వ్యూహాత్మకంగా క్షిపణి శాస్త్రజ్ఞుడైన అబ్దుల్‌ కలాం పేరును తీసుకొచ్చినప్పుడు ప్రతిపక్ష కాంగ్రెస్‌ కూడా బలపర్చింది. కాని వామపక్షాలు, కొన్ని ఇతర పార్టీలు నేతాజీ సైన్యంలో పని చేసిన కెప్టెన్‌ లక్ష్మీ సెహగల్‌ను పోటీకి నిలిపాయి.  కలాం తర్వాత మహిళను ఏకగ్రీవంగా ఎంపిక చేయాలని అది వరకు కుదిరి న అవగాహనను కొనసాగించి ప్రతిభా పాటిల్‌ పేరు ప్రతిపాదించారు. అయితే బిజెపి కూటమి తమ పార్టీ మాజీ ముఖ్యమంత్రి, ఉపరాష్ట్రపతి బైరాన్‌ సింగ్‌ షెకావత్‌ను పోటీకి పెట్టింది. వ్యక్తిగతంగా ప్రతిభా పాటిల్‌ పని తీరు ఆశించిన రీతిలో లేదని విమర్శకు గురైనారు.  ఆమె తర్వాత యుపిఎ హయాంలో 2007లో ప్రణబ్‌ ముఖర్జీ ఎన్నికైనారు. బిజెపి కూటమి ఆయనపై పిఎ సంగ్మాను పోటీ పెట్టినా 70 శాతం ఓట్లతో గెలుపొందారు. ఆయన హయాంలోనే మోడీ అధికారంలోకి వచ్చినా సంబంధాలు కొనసాగించారు. భావ ప్రకటనా స్వేచ్ఛపై దాడి, విశ్వ విద్యాలయాల్లో ప్రజాస్వామ్య పరిరక్షణ వంటి విషయాలు ఆయన మాట్లాడితే పాలక పార్టీకి నచ్చలేదు.  ఇక ఇప్పటి ఎన్నికలో  మీరాకుమార్ కంటే రామ్‌నాథ్ కోవింద్‌కే మెరుగైన ఆవకాశాలు ఉన్నాయి. ఆత్మ ప్రబోధానుసారం ఓటు వేయాలని మీరాకుమార్  విజ్ఞప్తి చేసినప్పటికీ క్రాస్ వోటింగ్ జరిగే అవకాశాలు తక్కువే.  బీజేపీ బలపరిచిన కోవింద్‌కు, ఆ పార్టీ భాగస్వామ్య పక్షాలతో పాటు, జేడీయూ, బీజేపీ, టీఆర్ఎస్, అన్నాడీఎంకే, వైఎస్ఆర్ కాంగ్రెస్ వంటి చిన్న పార్టీల బలం ఉంది. ఈ పార్టీల బలం అంతా కలిస్తే ఓటింగ్ పరంగా 60 శాతానికి పైనే. అంటే కోవింద్ గెలుపునకు అవసరమైన కనీస ఓట్ల శాతం కంటే ఎక్కువే. ఇక మీరాకుమర్‌ వెంట కాంగ్రెస్, బీఎస్‌పీ, ఎస్పీ వంటి 17 పెద్దా చిన్నా పార్టీలున్నాయి. ఇవన్నీ కలిస్తే ఓటింగ్ బలం 40 శాతం వరకూ ఉంటుంది. ఈ శాతాల లెక్కల ప్రకారం చూస్తే మీరాకుమార్ ఓటమి తప్పదు. అయితే పరిస్థితి తిరగబడితే?రెండు వారాల గడువు ఎలాగూ ఉంది. రాజకీయాల పార్టీలు చెప్పేదొకటి, చేసేదొకటిగా వ్యవహరించడం షరామామూలే. కోవింద్‌కు సపోర్ట్ చేస్తామని ప్రకటించిన ఎన్డీయేతర పార్టీలు తమ ఆలోచన మార్చుకుంటే జూలై 17 ఎన్నికల్లో మీరాకుమార్ జాతకం మారిపోవచ్చు. ఇలాగే జరగాలని లేకున్నా...రాజకీయాల్లో ఏదైనా సంభవం అనే విషయాన్ని కొట్టిపారేయలేం. దేశానికి స్వాతంత్య్రం వచ్చినప్పటి నుంచి ఇప్పటి వరకూ 13 మంది రాష్ట్రపతులుగా పని చేశారు.   14 వ రాష్ట్రపతి ఎవరో  వేచి చూద్దాం . ...
  • అధికారంలో ఉన్నప్పుడు ఒక రీతిలో, ప్రతిపక్షంలో ఉన్నప్పుడు మరో రీతిలో వ్యవహరించడంలో బీజేపీ కానీ, మోడీ  కానీ మిగిలిన పార్టీలకు ఏ మాత్రం తీసిపోరనేందుకు జీఎస్టీ ప్రత్యక్ష నిదర్శనం! వాజపేయి ప్రధానిగా ఉన్నప్పుడు 2000లో జీఎస్టీకి నాంది జరిగింది. మళ్లీ బీజేపీ ప్రభుత్వంలో మోదీ హయాంలో ఇది అమల్లోకి వచ్చింది. అయితే జీఎస్టీకి నాంది పలికిన బీజేపీనే ఈ బిల్లును తీవ్రంగా వ్యతిరేకించడం, ఇప్పుడు ఎంతో శ్రమించి, రాష్ట్రాలను ఒప్పించిన మోడీ  గుజరాత్‌ ముఖ్యమంత్రిగా ఉన్నప్పుడు జీఎస్టీ బిల్లుకు ససేమిరా అనడం విచిత్రం. 2011లో ప్రణబ్‌ ముఖర్జీ ఆర్థిక మంత్రిగా ఉన్నప్పుడు జీఎస్టీ కోసం రాజ్యాంగ సవరణ చేపట్టారు. జీఎస్టీ రాష్ట్రాల హక్కుల్ని హరించేదిగా ఉన్నదంటూ అప్పుడు ప్రతిపక్షంలో ఉన్న బీజేపీ దానిని వ్యతిరేకించింది. ఇక దేశంలో పరోక్ష పన్నుల విధానంలో కొత్త అధ్యాయానికి నాంది పలకనున్న వస్తు, సేవల పన్ను అమలులోకి రావడానికి 17 ఏళ్ల సుదీర్ఘ సమయం పట్టింది. రాజీవ్‌ గాంధీ నుంచి నరేంద్ర మోదీ వరకు పలువురు ప్రధానులు జీఎస్టీ రూపకల్పనలో కీలకపాత్ర పోషించారు. దేశం గర్వించదగిన ఆర్థికవేత్త అసిమ్‌దాస్‌ గుప్తా మొదలు కె.ఎం.మణి, అమిత్‌ మిత్రాల చేతిలో జీఎస్టీ పదునుదేలింది. దేశమంతా ఒకే పన్ను ఉండాలనే ఆలోచనకు 1986-87లో అప్పటి ప్రధాని రాజీవ్‌గాంధీ హయాంలో ఆర్థిక మంత్రి వి.పి.సింగ్‌ కార్యరూపం ఇచ్చారు. ...
  • సౌత్ ఇండియా సూపర్ స్టార్ రజనీ కాంత్ పొలిటికల్ ఎంట్రీ కి ముహూర్తం ఖరారైనట్టే . జూలై లోరజనీ తన కొత్తపార్టీని అధికారికంగా ప్రకటిస్తారని  ఆయన సోదరుడు సత్యనారాయణరావు గైక్వాడ్ వెల్లడించారు.  ‘‘రజనీకాంత్ రాజకీయాల్లోకి రావాలని ప్రజలు కోరుకుంటున్నారు. తాను రాజకీయాల్లోకి రావడంపై అభిప్రాయం తెలుసుకునేందుకే అభిమానులు, శ్రేయోభిలాషులతో రజనీ సమావేశమయ్యారు. ఇప్పటికే తొలిరౌండ్ పూర్తయింది. జూన్ లో మరోవిడత సమావేశాలు జరిగే అవకాశం ఉందని  గైక్వాడ్ చెప్పారు.  రజనీ తన రాజకీయ ప్రవేశంపై అధికారికంగా ప్రకటన చేయక పోయినప్పటికీ.. ఇప్పటికే తమిళరాజకీయాల్లో రజనీ పొలిటికల్ ఎంట్రీ విషయం ప్రకంపనలు సృష్టిస్తోంది. తమిళనాడులో మంచి రాజకీయ నేతలు ఉన్నప్పటికీ వ్యవస్థ మాత్రం కుళ్లిపోయిందని  రజనీ  ఇటీవల వ్యాఖ్యానించిన సంగతి తెలిసిందే. వ్యవస్థను బాగుచేయాల్సిన సమయం ఆసన్నమైందనీ.. అందుకు ప్రజలంతా ‘‘యుద్ధానికి’’ సిద్ధంగా ఉండాలని ఆయన ప్రకటించి తెర వెనక్కి వెళ్లారు.  కొత్త సినిమా ‘కాలా కరికాలన్’  షూటింగ్ శరవేగం తో ముగించుకుని అయన మళ్ళీ తెర ముందుకు వస్తారు. అయితే పార్టీ పనులు మాత్రం సన్నిహితులు అత్యంత గోప్యంగా చేస్తున్నారట . ...
  •  (Siva Racharla) ........       మనిషిలో లోతుగా కూరుకు పోయిన ధర్మం ఒక్కటే "అహం".ప్రతి పురుగును కదిలించే నిజం ఒక్కటే ఆకలి.తపించే ఆత్మనల్లా శాసించే శక్తి ఒక్కటే "ఆశ".ఆశ ముసిరినప్పుడు "ఆలోచన" మసక బారుతుంది.నీతి నిజాయితీలు కొలిమిలో కొవ్వొత్తుల్లా కాలిపోతాయి -- ప్రస్తానం సినిమాలో సాయికుమార్ శర్వానందుతో చెప్పే confession statement. శవాల పుట్టుమచ్చలు చూసి హతుడిని గుర్తుపెట్టొచ్చు కాని కత్తిగాటును చూసి హంతకుడిని గుర్తించలేము! 45 సంవత్సరాల క్రిందట 1972లో మొదలై 1991 వరకు జరిగిన విజయవాడ హత్యా రాజకీయల్లొ హీరోలు విలన్ల గురించి కాదు ఈపోస్టు. దేవినేని నెహ్రు మరణం తరువాత విజయవాడ రాజకీయల మీద పెద్దగా ప్రచారంలేని ముఖ్యమైన రాజకీయ శక్తుల గురించి రాయటానికే ఈ పోస్టు. ఈమధ్య రాంగోపాల్ వర్మా "వంగవీటి" సినిమా తరువాత "చలసాని వెంకటరత్నం" అనే CPI నాయకుడి గురించి ఎక్కువ మందికి తెలిసింది. విజయవాడ రాజకీయాలు 1964 వరకు ప్రశాంతంగా జరిగాయి. కమ్యునిష్ట్ పెద్దనాయకులు పుచ్చల పల్లి సుందరయ్యగారు (నెల్లూరు జిల్లా వారైనా గన్నవరం MLAగా పనిచేశారు,చనిపోయిన తరువాత అంత్యక్రియలు కూడ విజయవాడలోనే జరిగాయి) , చండ్ర రాజేశ్వర రావుగారు ఇద్దరు విజయవాడ కేంద్రంగా పనిచేసేవారు.1964లో CPI నుంచి CPM విడిపోయిన తరువాత సుందరయ్యగారు CPM జాతీయ కార్యదర్శిగా,చండ్రా రాజేశ్వర రావుగారు CPI జాతీయ కార్యదర్శిగా ఎన్నికయ్యారు. పీపుల్స్ వార్ వ్యవస్థాపకులు "కొండపల్లి సీతారమయ్య"గారు కూడ కృష్ణా జిల్లా పామర్రు ప్రాంతం వారు. కమ్యునిష్ట్ పార్టీ చీలిక తరువాత విజయవాడ సిటీలో CPI,జిల్లాలో మిగిలిన ప్రాంతాలలో CPM బలపడ్డాయి. 1966లో విజయవాడ "industrial estate/ఆటోనగర్" ఏర్పడిన తరువాత కార్మిక సంఘాల నిర్మాణం,బలం పెరిగాయి. విజయవాడలొ CPI నాయకుడు చలసాని వెంకటరత్నం పట్టు ఎక్కువ వుండేది. ఆటోనగర్ అభివృద్ది చెందుతుండటంతో పాటు చుట్టు పక్కల గ్రామాల నుంచి విజయవాడకు వలసలు జరిగాయి.ఈక్రమంలో వంగవీటి రాధ కృష్ణా రావు(పెద్ద రాధ) కుటుంబం విజయవాడకు వలస వచ్చారు. వంగవీటి సోదరులు కోటేశ్వర రావ్,నారాయణ రావ్,రాధ,శోభనా చలపతిరావు, మోహన రంగా రావు(రంగా) సోదరులు వివిధ పనులు చేసుకుంటు జీవించే క్రమంలో రాధ బస్టాండ్ సెంటర్లో నాయకుడిగా ఎదిగారు.చలసాని వెంకటరత్నంకు వంగవీటి రాధ దగ్గర కావటంతో రాధ సిటి లెవల్ నాయకుడయ్యాడు. సినిమాల్లొ చూపించినవి వాస్తవంలో జరిగిన సంఘటనల మధ్య చాలా తేడా వుంది.రాధా స్వయంగా నాయకుడిగా ఎదిగే క్రమంలో చలసాని వర్గంతొ గొడవలు మొదలయ్యాయి. 1971లొ ఈగోడవల్లొ రాధ వర్గం చలసాని వర్గానికి చెందిన "దత్తి కనకారావ్" అనే అతన్ని చంపేశారు.విజయవాడ హత్యా రాజకీయాల్లొ ఇది మొదటి హత్య,వర్మా వంగవీటి సినిమాలో ఈ సీన్ లేదు. దత్తి కనకారావ్ హత్యకు ప్రతీకారంగా చలసాని వర్గం రాధా వర్గానికి చెందిన దుర్గా రావ్,హనుమంతారావు అనే ఇద్దరిని చంపారు. చలసాని వర్గం ప్రతీకార హత్యలతో రాధా వర్గం భయపడింది. వీరి అస్తిత్వతం చిక్కుల్లో పడింది.చలసాని చంపకుంటే మేము బతకలేము అని 1972లో చలసాని వెంకటరత్నాన్ని రాధా వర్గం చంపింది.చలసాని వంటి మీద 72 కత్తి పోట్లు వున్నట్లు పోస్టుమార్టం రిపోర్టులో వుంది. చలసాని హత్యతో విజయవాడలోని కార్మిక సంఘాల మీద రాధ ఆదిపత్యం పెరిగిపోయింది. 1969లో మొదలైన "తెలంగాణ" ఉద్యమం,తరువాత మొదలైన "జై ఆంధ్రా" ఉద్యమం 1972 వరకు సాగింది.CPI & CPM జై ఆంధ్రా ఉద్యమాన్ని వ్యతిరేకించి "విశాలంద్ర" ఉద్యమాన్ని మద్దతు ఇచ్చాయి. విధ్యార్ధిగా వున్న దేవినేని నెహ్రు జై ఆంధ్రా ఉద్యమంలొ పాల్గొనేవారు. ఈక్రమంలో కమ్యునిష్ట్ విధ్యార్ధి సంఘాలకు ఇతర సంఘాలకు గొడవలు జరిగాయి,దేవినేని నెహ్రు కూడ చాలాసార్లు దాడికి గురయ్యాడు. ఈక్రమంలో నెహ్రు రాధా మద్దతు కోసం ఆయన వర్గంలో చేరి రాధాకు అనుకూలంగా విధ్యార్ధి సంఘం United Organization of Independents (UI)ని ప్రారంభించారు. చలసాని హత్యకు ప్రతీకారంగా 1974లో రాధా హత్య జరిగింది.ఈ హత్య వెనుక CPI హస్తం వుందని ఆరోపణ.హత్య చేసింది కిరాయి హంతకులు.హత్య జరిగింది రాధా వర్గంలోని "నాగెళ్ళ శివరామప్రసాద్" షాపులో.ఆషాపు ప్రారంభోత్సవానికి వచ్చిన వంగవీటి రాధాను షట్టర్లు వేసి కత్తులతో పొడిచి చంపారు. ఊహించని పరిణామం,అందరు రాధా వర్గీయులే కావటంతో గందరగోళం మధ్య ఎవరిని ఎవరు పొడుస్తున్నారో తెలియని స్థితిలో మొత్తం ఆరుగురు మరణించారు. ఆ హత్యకు దేవినేని నెహ్రు ప్రత్యక్ష సాక్షి.నెహ్రు సాక్ష్యంతో రాధా హంతకులకు యావజ్జీవ శిక్ష పడింది.తరువాత High Courtలో కేసు కొట్టేశారు. రాధా హత్య కేసులో నిందితులు అడుసుమల్లి జయప్రకాష్ 1983లో TDP తరుపున విజయవాడ నుంచి MLAగా గెలిచారు. మొన్న సమైఖ్యాంద్ర ఉద్యమం సమయంలో సుప్రిం కోర్టులో కేసులు వేశారు.ఇదే 1983లో దేవినేని నెహ్రు కూడ MLAగా (TDP) తరుపున కంకిపాడు నుంచి గెలిచా రు. రాధా హత్య కేసులొ మరో నిందితుడు,హత్య జరిగిన షాప్ యజమాని "నాగెళ్ళ శివరామప్రసాద్" 1989లో వంగవీటి రత్నకుమారి మీద TDP తరుపున పోటిచేసి ఓడిపోయారు. రాధా హత్య కేసును నిందితుల తరుపున "నాదెండ్ల భాస్కర రావు"గారు వాదించారు.1978లో తెనాలి ప్రాంతం వారైన నాదెండ్లగారు విజయవాడ నుంచే ఇందిరా కాంగ్రేసు తరుపున గెలవటం యాదృచ్చికం కాదు.1983లో TDP తరుపున వేమూరు నుంచి పోటిచేశారు. రాధా హత్య కేసులో నిందితుడైన "వజ్జా సుబ్బారవు" TDP పుట్టక ముందు NTRతో ఒక సినిమా నిర్మించారని దేవినేని నెహ్రు ఒక ఇంటర్యూలో చెప్పారు. రాధా హత్య తరువాత రంగాగారు కొంత కాలం తరువాత విజయవాడకు దూరంగా మచిలీపట్నం,వైజాగ్లలో వున్నారు. కొన్ని నెలల తరువాత రాధా వర్గంలోని కొందరు రంగాను కలిసి చర్చించి విజయవాడకు వెనక్కి తీసుకొచ్చారు.రంగా రాకతో విజయవాడలో మళ్ళి ఘర్షణలు మొదలయ్యాయి.మరో వైపు దేవినేని నెహ్రు విధ్యార్ధి సంఘాల మద్దతుతో బలపడ్డారు. నెహ్రు బలం పెరగటం కొత్త అనుచరులు తయారు కావటం రంగా వర్గంలోని కొందరిని కొట్టటంతో రంగా నెహ్రూల మధ్య మనస్పర్ధలు మొదలయ్యాయి. 1978లో ప్రవేట్ బస్సుల జాతీయకరణ ఉద్యమం నెహ్రు,CPI సుబ్బరాజు (1994లో MLAగా గెలిచారు),CPM ఉమామహేశ్వర రావ్(విజయవాడ డిప్యూటి మేయర్గా పనిచేశారు) జాయింట్ కమిటీగా ఉద్యమం చేశారు. ఈ ఉద్యమం చివరి దశలో అప్పటి మంత్రి భవనం వెంకటరాం గారు రంగాను కలిసి ఉద్యమం ఆపవల్సిందిగా కోరారు.రంగా నెహ్రూను ఉద్యమం ఆపమని చెప్పటం,ఇంత కాలం పోరాడి చివరి దశలో ఉద్యమం ఆపలేమని చెప్పటంతో రంగా నెహ్రూల మధ్య స్పష్టమైన చీలిక వచ్చింది. ఈ గొడవలు చిలికి చిలికి నెహ్రు సొంతంగా కొత్త విధ్యార్ధి సంఘం United Students Organizationను 1979లో మొదలు పెట్టటంతో రంగా నెహ్రూల మధ్య ప్రత్యక్ష గొడవలు మొదలయ్యాయి. రంగా,నెహ్రూల మధ్య గొడవలు పెరిగి చివరికి 1979లొ జరిగిన ITI కాలేజి ఎన్నికల్లో దేవినేని నెహ్రు అన్న "గాంధి"ని రంగా వర్గం చంపింధి. గాంధి హత్యతో రంగా నెహ్రుల మధ్య హత్యా రాజకీయాలు మొదలయ్యాయి. గాంధి హత్యకు ప్రతీకారం కోసం నెహ్రు తమ్ముడు మురళి రగిలిపోయాడు.గాంధి హత్య కేసులో నిందితులను చాలా మంధిని మురళి చంపేశాడు. 1981లో జరిగిన విజయవాడ మున్సిపల్ ఎన్నికల్లొ రంగా కాంగ్రేస్ టికెట్టు కోసం ప్రయత్నించినా కాంగ్రేసు "శ్రీనివాస్ రావు" అనే నాయకుడికి టికెట్టు ఇచ్చింది.రంగా ఇండిపెండెంటుగా పొటికి దిగారు.పోలింగుకు ముందు కాంగ్రేస్ తమ అభ్యర్ధిని పక్కనపెట్టి రంగాకు మద్దతు ప్రకటించింది.రంగా గెలిచారు, ఆఎన్నికల్లో రంగా గుర్తు "సైకిల్"! కౌన్సిలరుగా గెలిచిన తరువాత రంగా కాంగ్రేసులొ చేరారు. ఇంతలో తెలుగుదేశం ఏర్పడటం,విజయవాడ MLAగా వున్న నాదెండ్ల భాస్కర రావ్ దేవినేని నెహ్రూను NTRకు పరిచయం చెయ్యటం ,నెహ్రు 1983లో MLAగా గెలవటం చక చకా జరిగిపోయాయి. నెహ్రు MLAగా గెలవటంతో రంగా వర్గం మీద దాడులు పెరిగాయి. మురళి దూకుడు ఎక్కువైంది.చివరికి రంగా ఇంటికి ఫోన్ చేసి రంగా భార్యను దూషించే స్థాయికి మురళి వెళ్ళాడు. 1985లొ జరిగిన ఎన్నికల్లో రంగాకు విజయవాడ తూర్పు స్థానం నుంచి కాంగ్రేసు తరుపున తొలిసారి MLA అయ్యారు.ఈ ఎన్నికల్లో TDP తరుపున లయోలా కాలేజి లెక్చరర్ యార్లగడ్డ రాజగోపాల్ గారికి సీట్ ఇచ్చారు. రంగా MLAగా గెలవటంతో విజయవాడ సిటీలో ఉదృతంగా పనిచేయటం మొదలుపెట్టారు.రంగా నాయకత్వ లక్షణాలతో ప్రజల్లొ విపరీతమైన following వచ్చింది.అధికార పార్టీలో వుండటంతో నెహ్రు ప్రజాల సమయల మీద స్పందించే పరిస్థితిలేకుండా పోయింది.ఏనాయకుడైనా ప్రతిపక్షంలోనే ఉన్నప్పుడే ప్రజా నాయకుడిగా ఎదుగుతారన్నది రంగా ,YSR విషయంలో నిజమైంది. 1987లో రంగా తన అన్న రాధా కథతో దవళ సత్యంగారి దర్శకత్వంలో "చైతన్య రధం" అనే సినిమాను తీశారు.ఈ సినిమాలో రాధా హత్య సీన్ చూసి చాలా మంది ఎమోషనలుగా స్పందించారు. దళపతి సినిమాలో మమ్మూటి మర్డర్ సీన్ వాస్తవంలో రాధ హత్య సీన్. ఈ చైతన్యరధం కథ నుంచి శివ,గాయం,దళపతి వచ్చాయి. చైతన్యరధం తమిళంలో కూడ dub చేశారు. ఈ చైతన్య రధం సినిమా నెగటీవ్ కాని ప్రింట్లు కాని ఇప్పుడు లేవంట.అప్పటి ప్రభుత్వమే ప్రింటలన్ని కొని కాల్చివేసిందని దవళ సత్యం గారు ఒక ఇంటర్యూలో చెప్పారు. దాదాపు ఇదే సమయంలో మిరియాల వెంకటరావుగారి నాయకత్వంలో "కాపునాడు" మొదలైంది. చైతన్యరధం సినిమా విజయోత్సవం యాత్ర విజయవాడ నుంచు రాజమండ్రి వరకు గోదావరి జిల్లాలో విస్త్రుతంగా జరిగింది.రంగా ప్రతి ఊర్లో ర్యాలీలు,సభలు పెట్టారు. విజయవాడలో జరిగిన సభలూ సుమారు 5 లక్షల మంది హాజరయ్యారు.అంతకు ముందు విజయవాడలో జరిగిన మహనాడు కన్నా రంగా సభా భారి విజయవంతం అయ్యింది. రంగా హవా కోస్తా దాటి తెలంగాణాకు కూడ పాకింది.ఖమ్మంలో జరిగిన సభ అంతకు ముందు అక్కడ జరిగిన పార్టీల సభల కన్నా ఎక్కువ విజయవంతం అయ్యింది. రంగా ఊపు చూస్తే 1989 ఎన్నికల్లో తెలుగుదేశం ఓటమి ఖాయం అనే అభిప్రాయం వచ్చింది.రంగా మీద ప్రభుత్వం పోలీసుల ద్వార అనేక కేసులు పెట్టింది.పదుల కొద్ది కేసులు బేయిల్లతో రంగా పరిస్థితి వుండేది.అప్పటి విజయవాడ సిటి కమీషనర్ "వ్యాస్" కక్షగట్టి రంగాను వేధించారని ఆరోపణలు వున్నాయి. దళపతిలో అరవింద్ స్వామి క్యారెక్టర్ సూర్తి వ్యాసుదే! మరో వైపు దేవినేని మురళి రంగ వర్గం మీద దాడులు ఎక్కువయ్యాయి. రంగాను చంపుతారని పుకార్లు వచ్చాయి.రంగా వర్గం ముందు స్టెప్ తీసుకోని 1988 మార్చిలో నెల్లూరులొ LAW పరిక్షలు రాసి వ్యానులో విజయవాడకు వస్తున్న మురళిని NH5 మీద చిలకలూరిపేట-గుంటూరు మధ్య "యడ్లపాడు" వద్ద చంపారు.శివా సినిమాలోని శుభలేఖ సుధాకర్ హత్య వాస్త జీవితంలో దేవినేని మురళి హత్యే! మురళి హత్య జరిగినప్పుడు రంగా డిల్లీలోని రాం మనోహర్ లోహియా హాస్పటల్లొ tretment తీసుకుంటున్నారు.పోలీసులు మురళి హత్య కేసులొ రంగా మీద కేసు పెట్టారు.రంగా మరో సోదరుడు శోభాన చలపతిరావు,రంగా బావ మరిది చెన్నుపాటి శ్రీను మీద కూడ కేసు నమోదు అయ్యింది. మురళి హత్య జరిగిన తరువాత రంగా హత్య ఖాయం అని అందరిలో అభిప్రాయం వుంది.కాని ఎప్పుడు ఎలా అన్నది ప్రశ్నార్ధకం. 1988 చివరిలో గిరిపురం కాలనీలో ప్రజలకు పట్టాలు ఇవ్వాలని రంగా ఆమరణ నిరహార దీక్ష మొదలుపెట్టారు,ఈ దీక్షలోనే 26-Dec-1988 అంటే క్రిస్ మస్ తరువాత రోజు తెల్లవారు జామున బస్సుల్లొ అయ్యప్పమాలలో వచ్చిన 100 అందికి పైగా రంగాను చంపేశారు. రంగా హత్యను ఎవరు చేపించారో రాంగోపాల్ వర్మకు తెలియదని సినిమాలో చెప్పారు.కనీసం కేసులో నిందితుల పేర్లు కూడ చెప్పలేదు. రంగాకు ప్రధాన ప్రత్యర్ధి అయిన దేవినేని నెహ్రు రంగాను హత్యచేపించారని పత్రికల్లొ రాశారు.ప్రత్యర్ధి హత్యలో పోలీసులు మొదట చేసే పని హతుడి ప్రత్యర్ధి మీద FIR నమోదు చేస్తారు. రంగా హత్య కేసులో విచిత్రంగా నెహ్రు 21వ నిందితుడు,అది కూడ హత్య చేసినట్లు కాదు "కుట్రదారుడి"గా. రంగా హత్య తరువాత భారి హింస జరిగి 45 మంది చనిపోయారు ,వందల కోట్ల ఆస్తులు ద్వంసం అయ్యాయి.ఆస్తులన్ని నెహ్రు కులస్తులైన కమ్మవారివి. రంగా-నెహ్రుల గొడవ రంగా హత్య తరువాత కమ్మ-కాపు కులగొడవలుగా మారాయి.కాని రంగా హత్య నిందితుల్లో కాపులు వున్నారు.రంగా చనిపోయే వారకు ఆయనకు సలహాదారుడు "కాట్రగడ్డ రాజాగోపాల్"(CPI మాజి కార్యదర్శి).రంగా భార్య రత్నకుమారిగారు కమ్మ. విజయవాడ గొడవలు కచ్చితంగా కుల గొడవలు కాదు,ఆధిపత్య రాజకీయాలు మాత్రమే! రంగాను చివరి దశలో అంటే కాపునాడు మొదలైన తరువాతనే కాపునాయకుడు అన్న పేరు వచ్చింది.వాస్తంలో రంగాకు కాపుల కంటే దళితుల్లొ అనుచరులు ఎక్కువ.BCలైన "నగరా"ల్లొ రంగాకు ఎక్కువ ఆదరణ. రంగా హత్య జరిగిన్ డిసెంబర్ 26 కూడ streatgicalగా జరిగిందే!క్రిస్మస్ జరుపు కోవటంలో ఎక్కువ మంది అనుచరులు వుండరనే డిసెంబర్ 26ను రంగా హత్య చెయ్యటానికి ఎంచుకున్నారు. రంగా హత్య తరువాత హోం మంత్రి కోడెల శివప్రసాద్ రాజినామ చేయగా కాపు నాయకుడు కళావెంకటరావు హోం మంత్రి అయ్యారు.అప్పటి DGP P.S.రామ్మోహన్ రావు గారు రాజినామ చేసినా ప్రభుత్వం అంగీకరించలేదు.ఈ రామ్మోహన్ రావుగారు 2002-2004 మధ్య తమిలనాడు గవర్నర్గుగా పనిచేశారు. రాధా హత్యా నిందితుల్లో కొందరు MLAలు అయింట్లే,రంగా హత్య కేసుకోని నిందితులు కూడ MLAలు అయ్యారు. విశాఖపట్టణం నుంచి 2009,2014లో TDP తరుపున గెలిచిన వెలగపూడి రామకృష్ణ రంగా హత్య కేసులో నిందితుడు. మరో నిందితుడు "చలసాని పండు" 1999 లో ఉయ్యూరు నుంచి ఇండిపెండెంటుగా 1020 ఓట్లతొ ఓడిపోయాడు,2004లో కూడ TDP తరుపున ఓడిపోయరు.2009లో 150 ఓట్లతో TDP తరుపున పెనమలూరు నుంచి ఓడిపోయారు.2010లొ ఆయనకు మసాజ్ చేసే అతని చేతిలో హత్యకు గురయ్యాడు. ఈ చలసాని పండు స్వయంగా రంగాను పొడిచారని అంటారు, "నువ్వు నన్ను చంపుతున్నావా" అని రంగా అన్నారని కూడ ప్రచారంలో వుంది."సై" సినిమాలో సీన్ గుర్తురావటం సాధారణం. రాజకీయం ముందు కులం వర్గం ఏమి వుండవని కూడ విజయవాడ చరిత్ర నిరూపించింది. NTR మరణించిన తరువాత దేవినేను నెహ్రు 1996లో కాంగ్రేసులొ చేరారు.నెహ్రు రాకను వ్యతిరేకించి రత్నకుమారిగారు TDPలో చేరారు.రంగా హత్య కేసులో నిందితుడు అయిన చలసాని పండుకు కాంగ్రేస్ రంగా సోదరుడు అయిన శొభనా చలపతిరావును కాదని ఉయ్యూరు నుంచి టికెట్ట్ ప్రకటించింది.చివరిలొ దాసరి నారాయణరావు గారు కలగచేసుకోని శొభనా చలపతిరావు గారికి టికెట్టు ఇప్పించారు. దేవినేని నెహ్రు 2016 ఆగష్టులో కాంగ్రేసును & బాబుగారితో విభేదాలు వీడి తెలుగుదేశంలో చేరారు.2000 సంవత్సరంలో kidney transplantation చేయించుకున్న నెహ్రు మొన్న 17-Apr-2017న చనిపోయారు. గత ఆగస్టులో నెహ్రు తమ్ముడు "బాజిప్రసాద్" మరణించారు. దేవినేని నలుగురు సోదరులు గాంధి,నెహ్రు,మురళి,బాజి ప్రసాద్ అకాల మరణం చెందారు. ఏపార్టీలో వున్న కమిట్మెంటుతో పనిచేసే నాయకుడిగా పేరున్న నెహ్రు కేవలం కొడుకు అవినాష్ భవిషత్తు కోసమే TDPలోకి వెళ్ళారనిపిస్తుంది.నెహ్రు బాబుగారి మీద చేసిన విమర్శలు చాలా తీవ్ర మైనవి.నెహ్రు కూతురిని రాయపాటి శ్రీనివాస్ కొడుకు పెళ్ళి చేసుకున్నాడు కాని వారి మధ విభేదాలు వచ్చి విడాకుల వరకు వెళ్ళారు,విడిపోయారో లేదో తెలియదు. రాధా,రంగా హంతకులు MLAలు అయినట్టే రంగా అనుచరులు, ఇతర కాపు యువ నాయకులు రంగ అమరనం తరువాత 1989లో కాంగ్రేస్ తరుపున MLAలు అయ్యారు,వీరిలో కన్నా లక్ష్మినారయణ, జక్కంపూడి రామ్మోహనరావ్,అంబటి రాంబాబు ముఖ్యులు.మాజి కేంద్ర మంత్రి శివశంకర్ వీరికి టికెట్లు రావటానికి ప్రధాన కారణం. శివ శంకర్ గారు కూడ మొన్న మార్చిలో చనిపోయారు. రంగా అనుచరుడు(రంగా తుపాకిని carry చేసే) మల్లది విష్ణు 2009లో కాంగ్రేసు తరుపున పోటిచేసి PRP తరుపున పోటిచేసిన రంగా కొడుకు రాధా మీద గెలిచారు. అటు మురళి హత్యకేసు ఇటు రంగా హత్య కేసులో ఎవరికి శిక్షలు పడలేదు. ఇరు కేసుల్లో సాక్షులు నిందితులను గుర్తుపట్ట లేదు.కారణం బర్మా సీతారమయ్య అనే పెద్దమనిషి నెహ్రు-రంగా వర్గాల రాజి కుదిర్చారు ఎవరికి శిక్షలు పడకుండ చేశారు. కర్నాటి రామ్మోహన్ రావు అనే లాయర్ గారు(ఇప్పుడు కూడ వున్నారు) రంగా-నెహ్రుల మధ్య గొడవలు పెరగకుండ అనేక సార్లు రాజి కుదిర్చారు కాని ఆ రాజీలు ఎక్కువ కాలం నిలబడలేదు. ఇది విజయవాడ రాజకీయాల్లొ ఒక కోణం-ముఖ్య కోణం,ఈకథను సినిమా తీస్తే ఎవరు చూస్తారు?మసాల కావాలి,జనాల్లొ పాత గాయలు రేపే ఏ చర్య అయినా సమర్ధనీయం కాదు! అవును విజయవాడ కథలో హీరోలు విలన్లు లేరు అందరు పాత్రధారులే!     అందరు బాధితులు,పీడితులే...నలిగి పోయింది విజయవాడ నగరం,ప్రజలు. ...
  • (Sheik Sadiq Ali ) .......................  మీడియాను మేనేజ్ చెయ్యడంలో,తిమ్మిని బమ్మిని చేయడంలో చంద్రబాబును మించిన వారు లేరని అందరికీ తెలిసిన విషయమే. అయితే ,ఆయనకు ఆ కళ కొత్తగా అబ్బింది ఏమీ కాదు. 30 ఏళ్ళ క్రితమే ఆయన తన కళను తెలుగు ప్రజల ముందు ప్రదర్శించారు. ఆయనకు అంతకు ముందు నుంచే ఆ కళలో ప్రవేశం ఉందనీ ఆయనను సన్నిహితంగా ఎరిగిన మిత్రులు చెప్పేవారు. అసలింతకీ ఆయన ప్రదర్శించిన కళ ఏమిటో తెలుసుకోవాలని ఉందా? అయితే ఇది చదవండి. అది స్వర్గీయ ఎన్టీయార్ ముఖ్యమంత్రిగా సూపర్ ఫాం లో ఉన్న కాలం. చంద్రబాబు చిన్నల్లుడిగా అప్పుడప్పుడే చక్రం తిప్పుతున్న కాలం. చిత్తూరు జిల్లా మదనపల్లె లో భారీ బహిరంగ సభ జరిగింది. జనం తండోప తండాలుగా తరలి వచ్చారు. ఎన్టీయార్ ప్రసంగాన్ని మైమరచి వింటున్నారు. అప్పుడే ఎన్టీయార్ బాంబు పేల్చారు."నా రాజకీయ వారసుడు బాలయ్య బాబే " అని నిండు సభలో ప్రకటించారు. ఒక్కసారిగా సభలో జయజయ ధ్వానాలు మిన్నంటాయి.వింటున్న మీడియా ప్రతినిధులు సంభ్రమాశ్చర్యాలకు గురయ్యారు.బ్యానర్ ఐటెం దొరికిందని సంబర పడిపోయారు. మదన పల్లె నుంచి తిరుపతికి రావటం ఆలస్యమవుతుందని ఫోన్ లోనే తమ కార్యాలయాలకు వార్త చెప్పేశారు. ఇక్కడ ఎడిటోరియల్ డెస్క్ కూడా ఐటెం రాయించి కంపోజ్ చేయించి పేజ్ మేకప్ కూడా పూర్తి చేశారు. ఈ లోగా రిపోర్టర్లు తమ ఆఫీసులకు చేరారు. నేను నైట్ షిఫ్ట్ లో ఉన్నాను.ఒకపక్క సిటీ స్పెషల్, మెయిన్ ఎడిషన్ రెండూ చూస్తున్నాను. లే అవుట్ చేసిన పేజ్ కెమెరా సెక్షన్ కు వేల్తుందీ అనుకుంటూ ఉండగా ,ఒక్కసారి అలజడి మొదలైంది. మా బ్యూరో చీఫ్ సి.ఆర్ .నాయుడు పరుగెత్తుకు వచ్చారు.' చంద్రబాబు ఫోన్ చేశారు. బ్యానర్ లీడ్ మార్చాలి అన్నారు. ఎన్టీయార్ ఉద్దేశ్యం బాలయ్య బాబు రాజకీయ వారసుడు కాదనీ,కేవలం నట వారసుడు మాత్రమే అని అర్ధం చేసుకోవాలని చెప్పారు. కాబట్టి బాలయ్య బాబే నా నట వారసుడు అని లీడ్ మార్చి రాసి ,తగిన విధంగా హెడ్డింగ్ కూడా మార్చాలి ' అన్నారు. ఆ మేరకు ఆయనే లీడ్ మార్చి రాసిచ్చారు. తగిన విధంగా హెడ్డింగ్ కూడా మారింది.తద్వారా ఒక రాజకీయ తుఫాను ఆగిపోయింది. దటీజ్ చంద్రబాబు. ఆరోజుల్లో ఎలెక్ట్రానిక్ మీడియా లేకపోయింది కాబట్టి సరిపోయింది. లేకపోతే ఏమి జరిగి ఉండేదో ఊహించలేం.ఇది బాబు కళకు సంబంధించిన ఒక నమూనా మాత్రమె. ఇలాంటివి ఇంకా చాలా ఉన్నాయి....
  • మహిళలు ఇష్ట పడే  నేత, జరీ చీరలకూ జిఎస్‌టి దెబ్బ తగిలింది . జిఎస్‌టికి తోడు చైనా పట్టు, పవర్‌లూమ్‌లు కలిసి చేనేత రంగంపై ముప్పేట దాడి చేస్తున్నాయి. చేనేత రంగాన్ని ఆదుకోవాల్సిన కేంద్ర ప్రభుత్వం ఇందుకు అవసరమైన ముడిసరకుపై జిఎస్‌టిని విధించడంతో చేనేత రంగం సంక్షోభంలో పడింది. పన్ను పోటు నుంచి మినహాయింపు ఇవ్వాలని ఈ రంగంపై ఆధారపడిన కుటుంబాలు కోరుతున్నాయి. ఆంధ్రప్రదేశ్ లో   5 లక్షల మగ్గాలు గతంలో ఉండగా, ప్రభుత్వ విధానాల కారణంగా ప్రస్తుతం వాటి సంఖ్య 3 లక్షలకు పడిపోయింది. డిమాండ్ ఉన్నప్పటికీ, చేనేత రంగం లాభసాటిగా లేకపోవడంతో మగ్గాలు చాలా వరకూ మూతపడుతున్నాయి. మంగళగిరిలో ఒకప్పుడు 11వేల మగ్గాలు ఉండగా, ప్రస్తుతం వాటి సంఖ్య 1000కు తగ్గడం పరిస్థితి తీవ్రతను తెలియచేస్తోంది.ఈ నెల 1 నుంచి  అమల్లోకి వచ్చిన జిఎస్‌టి ప్రభావం చేనేత రంగంపై తీవ్రంగా పడింది. చిలపలు పై 5 శాతం మేర పన్ను విధించారు. జరీ చీరల్లో వాడే జరీపై 12 శాతం పన్నును కొత్తగా విధించారు. చీర ఖరీదు 1000 రూపాయలకు మించితే 18 శాతం మేర పన్ను చెల్లించాల్సి ఉంటుంది. దీంతో 1000 రూపాయల కంటే ఎక్కువ ఖరీదు ఉన్న నేత చీర ధర 23 శాతం మేర పెరిగింది. జరీ చీరకు 35 శాతం మేర ధర పెరగింది. దీంతో 1000 రూపాయలు ఉన్న నేత చీర 1230 రూపాయలకు, జరీ చీర 1350 రూపాయలకు పెరిగింది. దీంతో పెరిగిన ధరలతో చీరల కొనుగోళ్లు తగ్గే అవకాశం ఉందని చేనేత వర్గాలు ఆందోళన వ్యక్తం చేస్తున్నాయి.  ఇప్పటికే చేనేత రంగం లాభసాటిగా లేని నేపథ్యంలో ఈ రంగానికీ చైనా పోటీ తప్పడం లేదు. పట్టు చీరల తయారీని ప్రభుత్వం ప్రోత్సహించడంతో ధర్మవరంలో కోట్ల రూపాయల పెట్టుబడులతో కొన్ని యూనిట్లను నెలకొల్పారు. అక్కడ భారీ పెట్టుబడులతో చైనా కంపెనీలు పట్టు చీరల తయారీ పరిశ్రమలను పెట్టేందుకు వీలుగా ప్రభుత్వం అనుమతి మంజూరు చేసింది. దీంతో యంత్రాలపై పట్టుచీరలు తయారు చేస్తున్నారు. ఇవి మగ్గాలపై నేసిన చీరల కన్నా తక్కువ ధరకే లభిస్తాయి. 11 రకాల వస్త్రాలను కేవలం మగ్గాలపై తయారు చేసి విక్రయించాలని...  పవర్‌లూమ్‌లపై తయారు చేయటంపై నిషేధం విధించినప్పటికీ, చిన్న మార్పులతో పవర్‌లూమ్‌లపై ఆయా వస్త్రాలను తయారు చేస్తున్నారు. దీంతో మగ్గాలపై నేసిన చీరలు, ఇతర వస్త్రాల కంటే పవర్‌లూమ్‌పై చేసిన వాటి ధర తక్కువగా ఉంటోంది. ముడి నూలుతో పవర్‌లూమ్‌లపై చేసిన వస్త్రాల నాణ్యత కంటే మగ్గాలపై చేసి వస్త్రాలు మన్నిక ఎక్కువగా ఉంటుంది. అయితే మగ్గాలపై నేసిన చీరల ధర ఎక్కువగా ఉంటుంది. దీంతో మగ్గాలపై నేసిన చీరల కొనుగోళ్లు తగ్గుతున్నాయి.  కొనుగోళ్లు తగ్గుతున్న క్రమంలో  ఈ రంగంపై ఆధారపడిన వారి పరిస్థితి మరింత దిగజార నుంది. ఇప్పటికే శానిటరీ నాప్కిన్స్‌పై భారీగా పన్ను విధించి మహిళల ఆగ్రహాన్ని చవి చూస్తున్న కేంద్ర ప్రభుత్వం, చీరల ధరలను ప్రభావితం చేసేలా పన్ను విధించడం కూడా విమర్శలకు గురి అవుతున్నది. కేంద్రం దీనిపై పునరాలోచించాల్సిన అవసరం ఉంది.  పవర్‌లూమ్‌ల ద్వారా వచ్చే వస్త్రాల ధర తక్కువగా ఉండటంతో మగ్గాలపై నేసిన చీరలకు డిమాండ్ తగ్గే ప్రమాదం ఉంది . 
  • అప్పుల్లో కూరుకుపోయిన ప్రభుత్వరంగ విమానయాన సంస్థ  ఎయిర్ ఇండియా పునరుజ్జీవానికి ప్రైవేటీకరణతో పాటు పలు అవకాశాలను ప్రభుత్వం పరిశీలిస్తోంది. దీనిపై కేబినెట్‌ తుది నిర్ణయం తీసుకోనున్న క్రమంలో ఎయిరిండియాను దాని మాతృసంస్థ  టాటా గ్రూప్‌ సింగపూర్  ఎయిర్‌లైన్స్‌తో కలిసి కొనుగోలు చేసేందుకు ఆసక్తి  చూపుతోంది .  ఎయిరిండియా జాతీయం కాకముందు టాటాగ్రూప్‌లోనే  ఉండేది. దేశంలో పౌర విమానయాన పరిశ్రమకు నాంది పలికింది టాటాలే. వారు నిర్వహించిన సంస్థనే ప్రభుత్వం సొంతం చేసుకుని కొన్ని దశాబ్దాలపాటు నడిపి, తప్పుడు నిర్ణయాలతో నష్టాలపాలు చేసింది. ఇప్పుడు అమ్మకానికి పెట్టింది. కాగా  ఇప్పటికే టాటా గ్రూప్‌ ఛైర్మన్‌ ఎన్‌.చంద్రశేఖరన్‌ దీనిపై అనధికారికంగా ప్రభుత్వంతో చర్చలు జరుపుతున్నట్లు సమాచారం. 2007 నుంచి ఎయిరిండియా నష్టాల బాటలోనే నడుస్తోంది. ఇక గతంలోకి వెళితే  టాటా ఎయిర్‌లైన్స్‌ 1932లో ప్రారంభమైంది. లెజండరీ పారిశ్రామికవేత్త జెఆర్‌డి టాటా తొలి విమానాన్ని తానే స్వయంగా కరాచి, ముంబై మధ్య నడిపారు. 1946లో టాటా ఎయిర్‌లైన్స్‌ను ఎయిర్‌ ఇండియా పేరుతో పబ్లిక్‌ కంపెనీగా మార్చారు. జెఆర్‌డి కలల పుత్రికగా చెప్పే ఎయిర్‌ ఇండియా.. టాటాల నిర్వహణలో ప్రపంచంలోని అత్యుత్తమ ఎయిర్‌లైన్స్‌లో ఒకటిగా పేరుతెచ్చుకుంది. నిర్వహణలో ప్రతి చిన్న అంశంలోనూ, ప్రయాణికులకు అందించే ఆహార పదార్ధాల నుంచి కర్టెన్ల ఎంపిక వరకు జెఆర్‌డి కలుగజేసుకునేవారని చెబుతారు.   1953లో ప్రభుత్వం దీనిని జాతీయం చేయడంతో జెఆర్‌డి కలలు కుప్పకూలాయి. కనీసం తమతో మాట కూడా చెప్పకుండా ప్రభుత్వం ఎయిర్‌ ఇండియాను జాతీయం చేయడంపై తీవ్ర అభ్యంతరం వ్యక్తం చేస్తూ జెఆర్‌డి లేఖ కూడా రాశారు. నిర్ణయం కంటే కూడా నిర్ణయం తీసుకున్న పద్ధతి తనను బాధించిందని ఆయన నిరసన వ్యక్తం చేశారు.  సంస్థను జాతీయం చేసినా చైర్మన్‌గా మాత్రం జెఆర్‌డినే కొనసాగాలని నెహ్రూ నిర్ణయించడంతో 1977 వరకు ఆయనే చైర్మన్‌గా ఉన్నారు. 1977లో మొరార్జీ ప్రభుత్వం ఆయన్ను చైర్మన్‌ పదవి నుంచి తప్పించింది. అప్పటి  నుంచి టాటాలు ఆ సంస్థ గురించి పట్టించుకోవడం మానేశారు. ఇన్నేళ్లకి  అవకాశం రావడం తో సొంతం చేసుకునే యత్నాలకు శ్రీకారం చుట్టారు. 
  • నగదు ఉపసంహరణ, చెల్లింపులపై స్టేట్‌ బ్యాంకు ఆఫ్‌ ఇండియా జూన్  1 నుంచి  అదనపు చార్జీలు వసూలు  చేయడం మొదలెట్టింది. బ్యాంకులో నెలకు నాలుగు లావాదేవీలు మాత్రమే ఖాతాదారులకు ఉచితం. ఆపై జరిపే ప్రతి లావాదేవీపై 50 రూపాయల సేవా పన్నును ఎస్బీఐ వసూలు చేస్తుంది . ఇక ఎస్బీఐ ఏటీఎంల్లో కార్డు ద్వారా నగదు విత్ డ్రా చేస్తే రూ.10, ఇతర బ్యాంకు ఎటీఎం నుంచి విత్ డ్రా చేస్తే రూ.20 వడ్డించనుంది. ఆన్‌లైన్‌ ట్రాన్సాక్షన్లపై కూడా అదనపు చార్జీలను వసూలు చేస్తుంది. ఎస్బీఐ అదనపు చార్జీల వసూలు పై ముందే ప్రకటించింది.  ఖాతాల్లో ఎక్కువ డబ్బులుండేవారికి మినహాయింపు ఉంటుంది. కనీస బ్యాలెన్స్‌ రూ. 25వేలు దాటితే ఎన్ని లావాదేవీలైనా ఫ్రీగా చేసుకోవచ్చు. అంతకన్నా తక్కువుంటే మాత్రం పరిమితులు.. భారీగా చార్జీల వడ్డన తప్పదు. ఆన్‌లైన్‌ లావాదేవీలు కూడా నెలకు 40 మాత్రమే ఉచితం. చిరిగిన నోట్లు మార్చాలన్నా డబ్బు కట్టాల్సిందే.  ఖాతాదారులనుంచి పెద్ద ఎత్తున నిరసన  వ్యక్తం  అయినప్పటికీ  బ్యాంకు దిగిరాలేదు. ఖాతాదారులు అన్నివిషయాలు తెలుసుకుని లావాదేవీలు నిర్వహించడం మంచిది.  
  • వన్నా క్రై'    దెబ్బతో బ్యాంకింగ్ రంగం అతలాకుతలం కానుంది. ముందు జాగ్రత్తగా దేశంలోని ఏటీఎం లను మూసివేయాలని రిజర్వు బ్యాంక్ నిర్ణయం తీసుకుంది.  "వన్నా క్రై"   ప్రభావం బ్యాంకింగ్  నెట్‌వర్క్‌పై పడకుండా  ఉండేందుకు చర్యలు చేపట్టింది. విండోస్ అప్‌డేషన్ వచ్చేంతవరకూ బ్యాంకులన్నీ తమ ఏటీఎంలను మూసివేయాలని ఆదేశాలు జారీ చేసింది. వాన్నా క్రై  రాన్సమ్‌వేర్ ప్రపంచవ్యాప్తంగా బ్యాంకింగ్ సహా వివిధ రంగాల కంప్యూటర్ నెట్‌వర్క్‌లను  దెబ్బ తీసిన విషయం తెల్సిందే.  కీలకమైన డాటా మూసుకుపోయేలా చేసి పెద్దమొత్తంలో డబ్బులు డిమాండ్ చేస్తున్నట్టు వార్తల వస్తోన్న  నేపథ్యంలో ఆర్బీఐ ఈ చర్యలు చేపట్టింది. మనదేశంలోని దాదాపు అన్ని ఏటీఎంలు విండోస్ ఆధారిత సాఫ్ట్‌వేర్‌తోనే పనిచేస్తున్నాయి. అదీగాక దేశంలోని 2.25 లక్షల ఏటీఎంలలో 60 శాతం ఏటీఎంలు ఔట్‌డేటెడ్ విండోస్ ఎక్స్‌పీపైనే ఆధారపడుతున్నాయి. దీంతో ఈ నెట్‌వర్క్‌పై మాల్‌వేర్ సులభంగా దాడి చేసే అవకాశం ఉందని భావిస్తున్నారు .మాల్‌వేర్ దాడుల క్రమంలో మైక్రోసాఫ్ట్ విండోస్ ఎక్స్‌పీ కి  కూడా ప్రత్యేక అప్‌డేట్ ఇస్తామని ప్రకటించింది. దీంతో విండోస్ ప్యాచ్‌లను అప్‌డేట్ చేసుకోవాల్సిందిగా ఆర్బీఐ తాజాగా బ్యాంకులకు సూచించింది. అంతవరకూ ఎటీఎం మెషీన్లను ఆపరేట్ చేయవద్దని సూచించింది.   అయితే, తమ డబ్బు విషయంలో కస్టమర్లు భయపడాల్సిన పని లేదని ఏటీఎం ఆపరేటర్లు అంటున్నారు. ఏటీఎం యంత్రాల్లో డాటా స్టోరేజి ఉండదని, ఏటీఎంలు 'వాన్నా క్రై' బారిన పడే అవకాశాలు లేవని చెబుతున్నారు. ఒకవేళ ఏటీఎంలు మాల్‌వేర్ బారిన పడినా వెంటనే రీఫార్మెట్ చేసే అవకాశం ఉంటుదని ఎలక్ట్రానిక్ పేమెంట్స్ అండ్ సర్వీసెస్ నిపుణులు అంటున్నారు. మొత్తం మీద కొద్దీ రోజులు ఈ సంక్షోభం తప్పేలా లేదు. 
  • (Vasireddy Venugopal) ............   బ్యాంకులు కొత్త బ్రాంచీ తెరవాలన్నా, కొత్త ఏటీఎం పెట్టాలన్నా రిజర్వ్ బ్యాంక్ అనుమతి అవసరం. వాటిని ఏ ప్రాంతంలో నెలకొల్పదలుచుకున్నదీ తెలియజేసి అనుమతి పొందవలసి వుంటుంది. అయితే Onsite ATM పెట్టుకోవడానికి ఆర్.బి.ఐ అనుమతి అవసరం లేదు. అంటే.. బ్యాంక్ బ్రాంచ్ ఆవరణలో పెట్టుకునే ఏటీఎంకి ఆర్.బి.ఐ అనుమతి అవసరం లేదు. ఆ ఏటీఎంను బ్రాంచిలో అంతర్భాగంగా పరిగణిస్తారు. ఆ ఏటీఎంను ఆ బ్రాంచి స్వయంగా నిర్వహించుకునే అవకాశం వుంది. ఏటీఎంలో ఎప్పుడు డబ్బులు ఖాళీ అయినా.. బ్రాంచి సిబ్బందే తమ స్ట్రాంగ్ రూమ్ నుంచి నగదు తీసుకువచ్చి ఏటీఎంలో నింపి, ఖాతాదారులకు అసౌకర్యం కలగకుండా చూసే అవకాశం వుంది. అయితే మార్చి 1 నుంచి కూడా ఆంధ్రప్రదేశ్, తెలంగాణ రాష్ట్రాలలో Offsite ATMలలోనే కాకుండా.. Onsite ATMలలో కూడా నో క్యాష్. ఇరవై రోజులనుంచి ఈ తంతు నడుస్తోంది. కారణాలు తెలియదు. బ్యాంకులకు, నగదు సప్లయిచేసే ప్రెవేటు ఏజెన్సీలకు కమిషన్ విషయంలో పేచీ వచ్చిందని, అందుకనే ఏటీఎంలలో నగదు కొరత ఏర్పడిందని తెలుస్తున్నట్టు.. మెయిన్ స్ట్రీమ్ మీడియాలో ముక్కుచీదే వార్త ఒకటి వచ్చింది. ఇక అంతే. ఇరవై రోజులుగా ఈ సమస్య ఎందుకు కొనసాగుతోంది.. దీనికి ఏమిటి పరిష్కారం అనే తదుపరి అజాపజా వార్తలు లేవు. నాకు అర్ధమైన దాని ప్రకారం.. బ్యాంకులు.. తాము స్వయంగా నిర్వహించుకోవడానికి అవకాశం వున్న Onsite ATMలలో నగదు నింపే బాధ్యతను కూడా ప్రైవేటు ఏజెన్సీలకు అప్పగించి, చేతులు దులుపుకున్నట్టున్నాయి.  ఫలానా పరిమితిలోపు నగదు లావాదేవీలను ఏటీఎం ద్వారా నిర్వహించుకోవాలని బ్రాంచిలో బోర్డులు పెట్టిన బ్యాంకులు.. ఏటీఎంలో స్వయంగా నగదు వుంచగలిగిన బాధ్యతను దులిపేసుకుని కస్టమర్లతో చెలగాటమాడడం Financial Terrorism కిందే లెక్క.
  • ఎక్కువ కాలం మన్నిక కలిగి ఉండే 10 రూపాయల ప్లాస్టిక్ నోట్ల ను  రిజర్వ్ బ్యాంక్ ముద్రించబోతోంది .   వాటిని క్షేత్రస్థాయిలో ప్రయోగాత్మకం గా  పరీక్షించేందుకు రిజర్వు బ్యాంకుకు కేంద్ర ప్రభుత్వం అనుమతి ఇచ్చింది.  ఈ విషయాన్ని కేంద్ర ఆర్థిక శాఖ సహాయ మంత్రి అర్జున్ రామ్ మేఘ్వాల్ లోక్‌సభలో ఇచ్చిన లిఖితపూర్వక సమాధానంలో తెలిపారు.  దేశంలోని  ఐదు ప్రాంతాల్లో ప్లాస్టిక్ నోట్లతో క్షేత్రస్థాయిలో ప్రయోగాలు చేయాలని నిర్ణయించినట్లు ఆయన ఆ సమాధానంలో చెప్పారు. ప్లాస్టిక్ మిశ్రమాల సేకరణ, వాటిపై రూ. 10 నోట్ల ముద్రణ లాంటి విషయంలో అన్ని అనుమతులను రిజర్వు బ్యాంకుకు ఇచ్చినట్లు వివరించారు. ప్రస్తుతం వాడుతున్న కాగితపు నోట్ల కంటే ప్లాస్టిక్ నోట్లు ఎక్కువ కాలం మన్నిక కలిగి ఉంటాయని ప్రభుత్వం భావిస్తున్నది. ప్రపంచవ్యాప్తంగా చాలా వరకు రిజర్వు బ్యాంకులు కాగితపు నోట్లకు ప్రత్యామ్నాయంగా ప్లాస్టిక్, ఇతర పదార్థాలతో చేసిన నోట్ల గురించి చలామణి లోకి తెచ్చే ప్రయత్నాలు చేస్తున్నాయి. 2014 నుంచి ప్లాస్టిక్ నోట్లు తెచ్చే ప్రతిపాదన పరిశీలన లో ఉంది. గత డిసెంబర్ లోనే ముద్రణకు వెళ్లాల్సి ఉండగా ఆలస్యమైంది. కొచ్చి , మైసూర్ , సిమ్లా ,భువనేశ్వర్ వంటి నగరాల్లో తొలుత ప్రయోగాత్మకంగా  ప్రవేశ పెడతారు . 
  •  ( Priyadarshini Krishna ) ....... ప్లాట్ , కథాంశం అనుకున్నప్పుడే డైరెక్టర్ కి ( తానె రైటర్ కూడా ఐతే ) ఆ కథ ఎక్కడ జరుగుతుందనే అంశం కూడా నిర్ణయించుకుంటాడు. పాత్రలు ఏస్థాయివి అనేది కూడా కథని బట్టి నిర్ణయం అయిపోతాయి. అంటే , పాత్రలు మాట్లాడే భాష లేదా యాస కూడా కథాంశం నిర్ణయమైనప్పుడు అయిపోతుంది. ఎటొచ్చి సంభాషణలే కథ లోని నడకని బట్టి, సందర్భలను బట్టి మారుతుంటాయి. ఇది అందరికీ , అంటే సామాన్య ప్రేక్షకునికి కూడా తెలిసిన విషయం. ఇక ...కథకుడు చెప్పదల్చుకున్న విషయాలు ఆయా పాత్రలద్వారా ఆయా పాత్రల ఉద్వేగాలనుబట్టి చెప్పిస్తూవుంటాడు.  అంటే, ఒకే పాత్ర సినిమా అంతటా ఒకే తీరుగా ఉండకుండా పరిస్తితిబట్టి మాట్లాడే విధానం కూడా మారుతూ ఉంటుంది. హీరో పాత్రే తీసుకుందాం - హీరోయిన్ తో ఒకలాగా, తల్లిదండ్రులతో ఒకలాగా, ఫ్రెండ్స్ తో ఒకలాగా, విల్లన్ తో ఒకలాగా మాట్లాడుతూ ఉంటాడు.  ఇది మనం కూడా సహజంగా మన జీవితాల్లో చేసేదే.  ఐతే, ఒక కథానాయకునికి : ప్రేక్షకుని తేడా ఏంటి ..? భావోద్వేగాలకు లోనైనా కూడా తన స్థాయిని మర్చిపోకుండా పాత్ర నిజజీవితంలో కంటే కాస్త ఉన్నతంగా వ్యవహరించడమే హీరొయిజం... విలన్ తో కూడా పాత్రవుచిత్యాన్ని బట్టి మాట్లాడటం హీరోని మనకంటే పైస్థాయిలో నిలబెట్టే అంశం... ప్రాసకోసం ప్రాకులాడుతూ కొందరు దర్శకుల పాత్రలు మాట్లాడుతుంటాయి. అవి కృతకంగా ఉంటాయి. అసలా దర్శకుని ముఖ్య ఉద్దేశం తానో గొప్ప కవిని అని పదే పదే గుర్తుచేయడం. ఇలా కాకుండా పాత్ర స్థితిని స్థాయిని బట్టి సంభాషణలుంటే పది కాలాలపాటు నిలిచిపోతాయి ఇక్కడో ఉదాహరణ చెప్పుకుందాం.. అడవిరాముడు ( NTR, KRR,జంధ్యాల ) సినిమాలో విలన్ నాగభూషణం ప్రతి డైలాగుల్లో ఒక గన్నయ్యమీద పెట్టి తానుచెప్పాలనుకున్నది చెప్పి ' చెప్పింది చెయ్యి చరిత్ర అడక్కు' అంటాడు.  ఇది ఉన్నతస్థాయి సంభాషణ.  అలాగే, సాగర సంగమం (Kamal Hasan, Vishwanath, జంధ్యాల ) లో పొట్టి ప్రసాద్ ' అమ్మగారు చెప్పారయ్య ...' అని అంటూవుంటాడు. ఇది కూడా పాత్రకు సంభందించి ఉన్నతమైన సంభాషణ. 'ఉన్నతమైన'Doesn't mean in quality of words, it only means quality of the reaction of the character. అంటే ఆయా పాత్రలు కథలో ఆసాంతం ప్రవర్తిచే తీరు కాదు, పాత్రలు ఒక ఉద్దేశం కలిగి ఒక గోల్ కోసం ప్రవర్తించే తీరు- ఇప్పటి మన సినిమాల్లో ఈ అంశం మైక్రోస్కోప్ తో వెతకాలేమో..  మునుపటి సినిమాల్లో విరివిగా వుండే అంశం. సిట్యుయేషన్స్ ని బట్టి కలిగే సంఘర్షణలు, వాటిని అనుసరించి పాత్రల బిహేవియర్.  మళ్ళీ అవే examples తీసుకుందాం. అడవిరాముడు లో ఎన్టీఆర్ గుమ్మడి నాగభూషణం మొదలు సత్యనారాయణ వరకు అందరు సిట్యుయేషన్ కి తగినట్లు ప్రవర్తన సంభాషణలు ఉంటాయి. అలాగే సాగరసంగమం లో కమలాసన్ జయప్రద శరథబాబు శైలజ కూడా సిట్యుయేషన్స్ కి తగినట్లు ప్రవర్తన dialogues ఉంటాయి. ఇది, ఆక్షన్ అండ్ dialogue డెలివరీ కదా అంటారు మీరు. అవును అదే పోకడ కంటిన్యూయస్ గా ఉండటం పాత్రవుంచిత్యం తో కూడిన character psychology... డబ్బులు పెట్టినందుకు ప్రొడ్యూసర్ల పైత్యాలు చొప్పించడం ప్రస్తుతం ఆనవాయితీ అయిపోయింది. కథ సన్నివేశాలు పాత్రల తీరుతెన్నులు మంటకలిసిపోయాయి.       ...
  • జీవితంలోని అన్ని పార్శ్వాలు అనుభవించినవారికే తెలుస్తుంది జీవితం ఏమిటో. ఆ అనుభవాల అంతులేని ఆనందమో, మరణ మృదంగపు కాఠిన్యమో .. అదంతా ముఖాముఖి ఎదుర్కొన్నవాళ్లకే తెలుస్తుంది. ఆ తర్వాత - వారి జీవితాలే చాలామందికి పాఠాలవుతాయి. ఏం చేయకూడదో చెప్తాయి. సిల్క్ స్మిత జీవితం అలాంటిదే.  ఏలూరులో ఒక అతి బీద కుటుంబంలో పుట్టిన విజయలక్ష్మి ముందు బ్రతుకుదెరువు కోసమే సినిమారంగాన్ని ఆశ్రయించింది. తర్వాత ఆ రంగంలోని తళుకుబెళుకులకు పడిపోయింది.  దాదాపు సినిమా రంగంలోని ప్రతి చీకటి కోణాన్ని చూసింది. "సిల్క్ స్మిత"గా తనే ఊహించని స్థాయికి ఎదిగింది. తను అస్సలు ఊహించని స్థితిలో బలవంతంగా తనువు చాలించింది.  అదీ సిల్క్ స్మిత జీవితం. తను ఫీల్డులో ఉన్న 17 సంవత్సరాల్లో సుమారు 450 సినిమాల్లో నటించింది స్మిత. ఒక దశలో - అసలు సిల్క్ స్మిత పాట లేకుండా సినిమాను ప్లాన్ చేయడానికి దాదాపు ఏ నిర్మాతా, దర్శకుడూ సాహసించలేకపోయారంటే అతిశయోక్తికాదు. మణిరత్నం 'గీతాంజలి' కూడా అందుకు మినహాయింపు కాదు!  అంతే కాదు. "కోట్లు కుమ్మరించి - వివిధ కారణాలవల్ల ల్యాబ్‌ల్లో పడి మూల్గుతున్న ఎన్నో సినిమాల కేన్‌లకు - ఒకే ఒక్క సిల్క్ స్మిత పాటని జోడించడం ద్వారా బయటికి తెచ్చి, హాట్ కేకులుగా అమ్ముకున్న సందర్భాలు అనేకం" అని ప్రముఖ తమిళ సినిమా చరిత్రకారుడు రాండార్ గై అన్నారంటే, దీన్నిబట్టే అర్థం చేసుకోవచ్చు - ప్రేక్షకుల్లో, ఇండస్ట్రీలో సిల్క్ స్మిత సొంతం చేసుకున్న పాప్యులారిటీ రేంజ్ ఏ శిఖరాగ్రం చేరుకుందో!    సినీ రంగంలో కొంతమంది హీరోయిన్లు, ఇతర నటీమణుల వ్యక్తిగత జీవితాల్లో కొంత అలజడి ఉంటుంది. క్రమంగా అది అభద్రతకి దారి తీస్తుంది. బలహీన మనస్కులు, ఇంకొకరిని బాధపెట్టొద్దు అనుకొనే సున్నిత హృదయులు, తమ జీవితంలోని బాధకు కారణమైనవారిని లేశమాత్రంగానైనా బాధపేట్టడానికి ఇష్టపడరు. పరిస్థితులు మారడానికి చేతనయినంత ప్రయత్నిస్తారు. చేతకాకపోతే తమ జీవితాన్నే అంతం చేసుకుంటారు. సిల్క్ స్మిత చేసిన పని కూడా అదే.  1996 లో తన జీవితాన్ని బలవంతంగా తనే అంతం చేసుకుంది. ఈ పరిస్థితి, ఇలాంటి అనుభవాలు.. ఒక్క సినీ నేపథ్యం ఉన్న అమ్మాయిలు, స్త్రీల విషయంలోనే కాదు - ఇతర అన్ని రంగాల్లో ఉన్న అమ్మాయిలు, స్త్రీల విషయంలో కూడా ఉంటాయి. గ్లామర్ ఫీల్డు కాబట్టి - సినీ ఫీల్డులోని వారి విషయాలు "బ్రేకింగ్ న్యూస్"లవుతాయి. ఇతర రంగాల్లోని వారివి అంతగా బయటకు రావు. అంతే తేడా.  కట్ టూ "ది దర్టీ పిక్చర్" - సిల్క్ స్మిత జీవితం ఆధారంగా నిర్మించిన హిందీ సినిమా "ది డర్టీ పిక్చర్" మొదటి వారంలోనే 52 కోట్లు సంపాదించింది. ఆ సినిమాలో సిల్క్ స్మిత పాత్రను ప్రముఖ హిందీ హీరోయిన్ విద్యా బాలన్ అద్భుతంగా పోషించింది.  అంతకు ముందు విద్యా బాలన్ "పరిణీత", "లగే రహో మున్నాభాయ్", "పా", "నో వన్ కిల్డ్ జెస్సికా" వంటి చిత్రాల్లో ఎంతో బాగా నటించింది. ఎన్నో అవార్డులు సాధించింది. కానీ, వాటన్నింటి ద్వారా రాని గుర్తింపు, పేరు, క్రేజ్.. విద్యా బాలన్‌కు కేవలం ఒకే ఒక్క "డర్టీ పిక్చర్" సినిమాతో వచ్చింది. అంతే .. ఒక్కసారిగా టాప్ రేంజ్‌కు వెళ్లిపోయింది విద్యా బాలన్. విద్యా బాలన్ ఈ చిత్రం తర్వాత ఎంత శిఖరాగ్రం చేరుకోగలిగిందంటే, ఏకంగా 66 వ కేన్స్ అంతర్జాతీయ ఫిలిం ఫెస్టివల్‌కు జ్యూరీ మెంబర్‌గా కూడా ఎన్నికయింది! చివరికి, దేశంలోనే అత్యున్నతమయిన యూటీవీ మోషన్ పిక్చర్స్ 'సీ ఈ వో' సిధ్ధార్థ రాయ్ కపూర్ హృదయాన్ని కొల్లగొట్టి, ఆయన్ని పెళ్లికూడా చేసుకుంది విద్యా బాలన్. దటీజ్ డర్టీ పిక్చర్! దటీజ్ సిల్క్ స్మిత!! స్మిత వ్యక్తిగత జీవితంలోని మంచీ చెడులు మనకు పూర్తిగా తెలియవు. తెలియని వాటి గురించి జడ్జ్‌మెంట్లు ఇచ్చే హక్కు మనకు లేదు. ఒక  పాజిటివ్ కోణంలో అలోచిస్తే మాత్రం - తను  మరణించి కూడా సినీ ఫీల్డులోనూ, బయటా చాలా మంది హీరోయిన్లు, ఇతర నటీమణులకు ఒక మార్గదర్శి అయింది సిల్క్ స్మిత. హిపోక్రాట్లు ఈ నిజాన్ని ఒప్పుకోవటం కష్టం. అది వేరే విషయం. ఇప్పటి తారలెవరూ తమ జీవితాల్లో ఎలాంటి జటిల సమస్యలొచ్చినా భయపడటంలేదు. ఎంత సున్నిత మనస్కులైనా దేనికీ బెదరటంలేదు. అభద్రత అనే పదాన్ని వారి డిక్షనరీల్లోంచి తీసి అవతల పడేశారు.  వ్యక్తిగత జీవితంలో, ఒక మజిలీ నుంచి ఇంకో మజిలీకి చాలా ఈజీగా మూవ్ అవుతూ ముందుకెళ్తున్నారు. ఆత్మహత్యలు మాత్రం చేసుకోవడం లేదు. అసలు అలా చేసుకోవాల్సిన అవసరం లేదన్న నిజాన్ని అర్థం చేసుకున్నారు. అవసరమయితే తమ జీవితాన్ని డిస్టర్బ్ చేస్తున్న ప్రియుడో, భర్తో, బంధువులో, ఆఖరికి అమ్మానాన్నలో.. ఎవరైనా సరే.. ఒక ప్రెస్ మీట్ పెట్టి బాహాటంగా బయటపడుతున్నారు తప్ప, తమ జీవితాల్ని అంతం చేసుకొనే పిరికి ఆలోచన మాత్రం ఇప్పటి సినీ తారలెవ్వరూ చేయటం లేదు. (ఇటీవలి కాలంలో జియాఖాన్ ఉదంతం ఒక్కటే ఇందుకు మినహాయింపు.)   ఇది కేవలం కాలంతోపాటు వచ్చిన మార్పు మాత్రమే కాదు. సిల్క్ స్మిత లాంటివాళ్ల జీవితాలను చదివిన నేర్పుతో వచ్చిన మార్పు కూడా. సిల్క్ స్మిత సాధించింది అదీ.  ---  Manohar Chimmani  FILM DIRECTOR, 'Nandi Award' Winning Writer and Blogger...
  • (Sheik Sadiq Ali )    .......  ........       రేఖ ...మన కళ్ళముందు కదలాడుతున్న ఒక అద్భుతం. గుండెల్లో దాచుకునేంత అపురూపం. ఒక ధీరోదాత్త నిజ జీవిత కథానాయిక. ఒక విప్లవం.ఒక తిరుగుబాటు. తిరుగులేని విజేత.ఆమె జీవితం ఒక పాఠం. ఒక ఎగురుతున్న కెరటం. గత రెండు రోజులుగా అన్ని ప్రసార మాధ్యమాల్లో విస్తృతంగా ప్రచారం అవుతున్న రేఖ ఫోటో ని చూసిన తర్వాత తన గురించి రాయాలనిపించింది. రేఖ జీవితంలో ఒక అత్యంత ముఖ్యమైన ఘటనకు ( ముకేష్ అగర్వాల్ తో పెళ్లి) ప్రత్యక్ష సాక్షిగా ఉన్న నేను రేఖ జీవన యానం గురించి ,ఆమె జీవన పోరాటాలు, విజయాల గురించి రాయటం సముచితంగా ఉంటుంది అని భావించి ఇది రాస్తున్నాను. 63 ఏళ్ళ వయసులోనూ ఇంత సౌందర్యంతో ,ఆత్మ విశ్వాసంతో విజేతగా జీవిస్తున్న రేఖ జీవితం పూలపాన్పు కాదు ....ఒక ముళ్ళబాటలో నడిచి వచ్చిన నందన వనం. 1954 అక్టోబర్ పదో తేదీన చెన్నైలో పుట్టింది. తల్లి మన తెలుగు నటి పుష్పవల్లి. తండ్రి సుప్రసిద్ధ తమిళ హీరో జెమినీ గణేషన్. అయితే అతను ఏనాడూ తన బిడ్డగా అంగీకరించలేదు. దాంతో ఆమె మీద అక్రమ సంతానం అనే ముద్ర పడింది.అలాగే పెరిగింది కూడాను. తన పన్నెండో ఏట ,అంటే 1966 లో తెలుగు సినిమా రంగులరాట్నం తో బాలనటిగా రంగప్రవేశం చేసింది. తన పదిహేనో ఏట(69 లో) కన్నడ సినిమా 'ఆపరేషన్ జాకపాట్ నెల్లి సీఐడీ 999' తో హీరోయిన్ గా మారింది. అదే సంవత్సరం హిందీసీమ లోనూ ప్రవేశించింది. 5 అడుగుల 6 అంగుళాల ఎత్తులో ఉండే రేఖ నల్లగా ఉండటం తో అడుగడుగునా ఆమెను 'నల్లపిల్ల ' (కాలీ) అని అవమానించేవారు. తోలి సినిమా బిశ్వజిత్ హీరోగా 'అంజానా సఫర్'. దక్షినాది నుంచి రావటం,హిందీ రాకపోవటం తో బాలీవుడ్ ఆమె పట్ల అత్యంత దుర్మార్గంగా ప్రవర్తించింది. ఆ సినిమా హీరో,దర్శకుడు,కెమెరామన్ అందరూ కలిసి ఆమె పట్ల అమానుషంగా ప్రవర్తించారు. షూటింగ్ తొలిరోజే తోలి షాట్ లోనే,కెమెరా స్టార్ట్ అనగానే బిశ్వజిత్ ఆమెను గట్టిగా ఒడిసి పట్టుకొని పెదాలపై ముద్దు పెట్టుకోవటం మొదలెట్టాడు. నిజానికి ఆ దృశ్యం గురించి ఆమెకు ముందుగా చెప్పలేదు.ఆమెకు తెలియదు. ఆమె షాకయ్యింది.భయంతో,బాధతో కళ్ళు మూసుకుంది. మూసిన కనురెప్పల మాటు నుంచి కన్నీరు ధారాపాతంగా కారుతూనే ఉంది. అయినా అతను వదల్లేదు.కెమెరా ఆగలేదు.దర్శకుడు కట్ చెప్పలేదు. ఆ పరాభవమే ఆమెలో కసి పెంచింది.పోరాటం నేర్పింది. నల్లగా,మొరటుగా ,భాష తెలియని అమ్మాయిగా బాలివుడ్ లో అడుగుపెట్టిన రేఖ ఈనాడు పార్లమెంటును కలవర పరిచే సౌందర్య రాశిగా ఎదగడం వెనుక సుదీర్ఘ ప్రయాణం ఉంది.కఠోర జీవన విధానం ఉంది. ఆమె సిగరెట్,మద్యం జోలికి పోదు. శుద్ధ శాఖాహారి. ప్రతీరోజు క్రమం తప్పక యోగా చేస్తుంది. అవకాశం దొరికినప్పుడల్లా ధ్యానం చేస్తుంది.పంక్చ్యువాలిటీ కి మారుపేరు. చెప్పిన సమయానికి నిమిషం ముందే ఉంటుంది తప్ప ఆలస్యంగా రాదు. వృత్తిపట్ల పూర్తిస్థాయి కమిట్ మెంట్ ఉన్న వ్యక్తిగా పరిశ్రమలో అందరూ చెప్పుకుంటారు. ఆమెకు ప్రత్యేకించి డ్రెస్ డిజైనర్లు ,హెయిర్ డ్రెస్సర్లు లేరు. అవి ఆమె స్వయంగానే చూసుకుంటుంది. బిశ్వజిత్ తో చెడు అనుభవం తర్వాత నవీన్ నిశ్చల్ తో జత కట్టింది. 1970 లో ఆమె హీరొయిన్ గా నటించిన తెలుగు సినిమా అమ్మకోసం,హిందీ సినిమా సావన్ భాదో విడుదలయ్యాయి.హిందీ సినిమా హిట్ అవడంతో అక్కడే సెటిల్ అయ్యింది.విజయాలు వరిస్తున్నా,ఆమెకు అడుగడుగునా అవమానాలు ఎదురయ్యాయి.వాటిని ధైర్యంగా ఎదుర్కుంది.హిందీ అనర్గళంగా మాట్లాడటం నేర్చుకుంది. అది ఏ స్థాయిలో అంటే,తర్వాతి కాలంలో ప్రముఖ హిందీ హీరోయిన్లు నీతూ సింగ్,స్మితా పాటిల్ కు కూడా డబ్బింగ్ చెప్పెంతగా స్పష్టంగా ,సాధికారిక హిందీ నేర్చుకుంది. రెండు హిందీ పాటలు కూడా పాడింది. తర్వాతి కాలంలో సాజిద్ ఖాన్,జితేంద్ర,శత్రుఘ్న సిన్హా,అక్షయ్ కుమార్ వంటి వారితో ఆమెకు సంబంధాలు ఉన్నాయని రూమర్లు వచ్చాయి .కానీ, వాటి నిజానిజాలు నిర్ధారించా లేము. అమితాబ్ బచన్ ఆమె జీవితంలోకి రావటం ఆమె జీవితాన్ని పూర్తిగా మార్చివేసింది.అప్పటికీ,ఇప్పటికీ ఆయనను దైవంగానే భావిస్తుంది. నా జీవితాన్ని మార్చి,పోరాటం నేర్పించి,బతకటం ఎలాగో నేర్పించింది 'ఆయనే' అని చాలాసార్లు చెప్పుకుంది. వృత్తిరీత్యా పలుమార్లు ఆమెను సన్నిహితంగా కలిసే అవకాశం వచ్చింది. ఆమెలో ఒక గ్రేస్ కన్పిస్తుంది. హుందాతనం,పోరాడి గెలిచిన ఒక విజేత ముఖంలో కన్పించే వెలుగు ఆమెలో కన్పిస్తాయి. మరో హిందీ హీరో వినోద్ మెహ్రా ను పెళ్లి చేసుకోవటం, అదేరోజు విడిపోవటం ఒక మిస్టరీనే. ఎందుకంటే ..వినోద్ అమితాబ్ కు అత్యంత సన్నిహితుడు,అనుచరుడు. రేఖ అమితాబ్ ప్రియురాలు. ఈ విషయాలు ఆ ముగ్గురికీ తెలుసు. అయినా రేఖ,వినోద్ పెళ్లి చేసుకున్నారంటే అందులో ఉన్న మర్మం ఏమిటో రేఖ కానీ,అమితాబ్ కానీ చెప్పాల్సిందే.(వినోద్ మెహ్రా కొన్నేళ్ళ క్రితం మరణించాడు). ఆ తర్వాత డిల్లీ పారిశ్రామిక వేత్త ముకేష్ అగర్వాల్ ని తిరుపతిలో పెళ్లి చేసుకుంది.( దీనికి నేను ప్రత్యక్ష సాక్షిని). కొంతకాలానికి అతను ఆత్మహత్య చేసుకున్నాడు. అది ఇప్పటికీ ముడివీడని రహస్యమే. అమితాబ్-జయభాదురి-రేఖ ల ముక్కోణపు ప్రేమ జగద్విదితమే. దాని ఆదారంగా యశ్ చోప్రా 'సిల్ సిలా' అనే సినిమా కూడా తీశాడు. జయతో ఉన్న వివాదమే రేఖను రాజ్యసభ సభ్యురాలిని చేసింది అంటారు. అలాంటి రేఖ 63 ఏళ్ళ వయసులో కూడా అద్భుత సౌందర్య రాశిగా వెలిగిపోవటం, పార్లమెంటులో ఓటు వేయటానికి వచ్చినప్పుడు ఎంపీలు కన్నార్పకుండా చూడటం, ఆ ఫోటోలు మీడియాలో సంచలనం సృష్టించటం జరిగింది. అన్నట్లు రేఖ పూర్తీ పేరు చెప్పలేదు కదూ ........భానురేఖ గణేశన్....
  • "రమ్యకృష్ణ నాకంటే పెద్ద స్టార్‌.  బహు భాషా చిత్రాల్లో చేస్తోంది . అలాంటప్పుడు నన్ను  రమ్యకృష్ణ మొగుడు అంటే తప్పేంటి? . ఆ విషయంలో నేనేం బాధపడను. ఆవిడ ముందు వెళ్తుంటే నేను వెనక వెళ్లడానికి కూడా నాకెలాంటి ఇబ్బందీ లేదు". అన్నారు క్రియేటివ్ డైరెక్టర్ కృష్ణవంశీ ఒక ఇంటర్వ్యూలో. "‘బాహుబలి’ చూసి రాజమౌళి, విజయేంద్రప్రసాద్‌ల గ్రేటెస్ట్‌ క్రియేషన్‌ అనుకున్నా. రమ్య గొప్ప నటి దానిని కాదనలేం. దొరక్కదొరక్క ‘శివగామి’లాంటి  గట్టి  పాత్ర దొరికింది. తన నటనతో తినేసిందంతే. ఆ క్రెడిట్‌ మొత్తం రాజమౌళి, ఆయన తండ్రికే చెందుతుంది. శివగామి పాత్రలో ఎక్కడేం చెయ్యాలో పర్ఫెక్ట్‌గా చేసింది. తను కూడా చాలా ఎగ్జైటింగ్‌గా చెప్పింది. మంచి పాత్రలు చేసినప్పుడు తప్పకుండా షేర్‌ చేసుకుంటుంది. ఈ మధ్యనే కమల్‌హాసన్‌ ‘శభాష్‌ నాయుడు’ సినిమాకు సంబంధించిన ఫోటోలు పంపి చాలా మంచి క్యారెక్టర్‌ అని చెప్పింది. ఏ విషయంలోనైనా ఆమె నాకు సలహాలిస్తుంది. నేనైతే ఏమీ చెప్పను. మా ఇద్దరికీ సంబంధించిన డెసిషన్‌ ఆవిడే తీసుకుంటుంది. నాకు సంబంధించిన డెసిషన్‌ కూడా ఆవిడ పరిధిలో ఉంటే తనే తీసుకుంటుంది. నేనేమో నాకు నచ్చిన బట్టలేసుకుని లేదంటే షార్ట్‌ వేసుకుని సినిమాలు చూసుకుంటూ లేదా ఏదో పని చేసుకుంటూ ఉంటా. తనేమో ప్రాక్టికల్‌గా ప్రొటోకాల్‌ పాటిస్తుంది. నా బాస్‌ ఆవిడే." అంటూ  చెప్పుకొచ్చారు  ఏమాత్రం మొహమాట పడకుండా.   దట్ఈజ్  కృష్ణ వంశీ . ...
  • డ్రగ్స్ కేసు విచారణ తీరును మొదటి నుంచి తప్పుబడుతున్న ప్రముఖ దర్శకుడు రాంగోపాల్‌వర్మ సోషల్ మీడియా వేదికగా మరోసారి విరుచుకుపడ్డారు. ఫేస్‌బుక్‌లో ఆయన  వరుస పోస్టులు చేశారు. డ్రగ్స్ కేసు వల్ల హైదరాబాద్ ప్రతిష్ఠకు భంగం వాటిల్లే అవకాశం ఉన్నదన్నారు. సిట్ చేస్తున్న విచారణ వల్ల పెద్దగా ఫలితం ఉండకపోవచ్చని అభిప్రాయపడ్డారు. ఎక్సైజ్ ఎన్‌ఫోర్స్‌మెంట్ డైరెక్టర్ అకున్ సబర్వాల్‌పై తనదైన శైలిలో విమర్శలు చేశారు. తెలంగాణ సిఎం కేసీఆర్ పై ముంబై ప్రజలకు అపార నమ్మకం ఉన్నదని, టీఆర్‌ఎస్ ప్రభుత్వాన్ని చాలా మెచ్చుకుంటారని, ఇలాంటి ఘటనలు నగరంలో వెలుగులోకి రావటం పట్ల షాక్ అవుతున్నారని తెలిపారు.  సిట్ పనితీరును మరింత మెరుగుపరుచుకోవాలని వర్మ సూచించారు. కాగా  ఎక్సైజ్‌శాఖపై రామ్‌గోపాల్‌వర్మ చేసిన వ్యాఖ్యలపై రంగారెడ్డి జిల్లా న్యాయస్థానంలో పిటిషన్ దాఖలైంది. వర్మపై చర్యలు తీసుకోవాలని పిటీషన్ లో కోరారు. ...
  • 'సిట్ అధికారులు పూరి జగన్నాథ్, సుబ్బరాజు మిగిలిన సినీ ప్రముఖులు విచారించినట్టుగానే స్కూల్ విద్యార్థులను కూడా విచారిస్తారా..? ప్రస్తుతం మీడియా అకున్ సబర్వాల్ ను అమరేంద్ర బాహుబలి లా చూపిస్తుంది. రాజమౌళి ఆయనతో బాహుబలి 3 తీయాలేమో. అకున్ సబర్వాల్ గారి సమగ్రతను ఎవరు అనుమానించటం లేదు. కానీ ఎలాంటి ఆరోపణలు, ఆధారాలు లేకుండా మీడియాకు లీకులివ్వటం, ప్రముఖులకు కీర్తికి భంగం కలిగించే విధంగా, వారి కుటుంబాలకు బాధ కలిగించే విధంగా ప్రవర్తించటం దురదృష్టకరం.' అంటూ తన ఫేస్ బుక్ పేజ్ లో పోస్ట్ చేశారు.   అయితే ఈ వ్యాఖ్యలు  అభ్యంతరకరం అని  రిటైర్డ్ ఎక్సయిజ్ శాఖ అధికారులు అంటున్నారు . ఇది విచారణ ను అడ్డుకోవడమే ... ఆయనపై కేసు వేస్తాం అని కూడా చెప్పారు.  ఈ నేపథ్యంలోనే వర్మ చేసిన వ్యాఖ్యలపై మూవీ ఆర్ట్స్ అసోసియేషన్ (మా) అధ్యక్షుడు శివాజీరాజా మండిపడ్డారు. ఇండస్ట్రీకి వర్మ చేసిందేం లేదని, వర్మ చేసిన వ్యాఖ్యలు పట్టించుకోవాల్సిన అవసరం లేదన్నారు.  అలాగే  వర్మ కూడా మళ్ళీ స్పందించారు ... వీడియో లో  వర్మ స్పందన చూడండి. ...
  • (సుశ్రీ)  .......    మౌనం నీకు ఆనందదాయకమైతే హాయిగా మౌనంలో ఆనందించు. పరుగెత్తడం సంతోషకరమైతే నిక్షేపంగా ఆ పని చెయ్యి.రెండూ ఇష్టమైతే రెండూ చెయ్యవచ్చు.  అయితే రెండింటి మధ్య సరైన నిష్పత్తి పాటించు.  మాట్లాడటం అవసరమైన చోట మౌనం వహించడం నేరం.  మౌనంగా ఉండాల్సిన సమయంలో మాట్లాడటం అంతకంటె నేరం. పాత్రనెరిగి సందర్భోచితంగా ప్రవర్తించాలి. నా కర్తవ్యమేమిటో నాకెలా తెలుస్తుంది.  నేను నిర్వహించే పాత్రనెలా గుర్తించాలి అనే అనుమానం రావచ్చు.  మన కడుపు నిండిన విషయం మనకెలా తెలుస్తుంది?  ఏవైనా పరికరాలు, కొలబద్దలు కావాలా?  నడిచి - నడిచి నొప్పులతో అలసిన కాళ్లకు విశ్రాంతి పొందాలని ఎలా తెలుస్తుంది? విశ్వంలో ప్రతి ఒక్కటీ క్రమపద్ధతిలో ఉంది.  సమతుల్యంగా ఉంది. ప్రతి జీవికీ, ప్రతి వస్తువుకీ, ప్రతి సంఘటనకూ ప్రత్యేక ప్రాధాన్యత ఉంది. నిర్వహించవలసిన ప్రత్యేక పాత్ర ఉంది. మంచం మీద నుండి దొర్లిపడి మన చేతికి నొప్పి కలిగిందనుకోండి.  ఇక్కడ మనకు కారణం తెలుస్తోంది. కాని ఒక్కోసారి కారణం తెలియకపోవచ్చు.  దొర్లిపడినందువల్ల కలిగిన నొప్పికి కచ్చితంగా కార్యకారణ సంబంధముంది.  పడిన సమయంలో గాఢనిద్రలో ఉన్నామనుకుందాం.  మనకు పడినట్లు తెలియనే తెలియదు. కానీ చేతికి నొప్పి ఉంటుంది.  ఆ నొప్పికి కారణమున్నా మనకు తెలియదు. అలాగే మన జీవితాల్లో జరిగే సుఖాలకు, దుఃఖాలకు కారణమున్నా మనకు తెలియకపోవచ్చు.. ఎవరికెంత ఉంటే అదే వారికి సరిపోతుంది. పసిపాప ఒక్కపైసా సంపాదించదు. కానీ తల్లి పాలిస్తుంది. పోషిస్తుంది. ప్రకృతి మేధస్సు గురించి మళ్లీ మళ్లీ అనుమానం వ్యక్తం చేయనవసరం లేదు.  ఆ మహా మేధాశక్తికి అబ్బురపడి తబ్బిబ్బు కావలసినదే!  ప్రకృతి నియమాలు సరిగా అర్థం కానంతవరకూ దుఃఖం వీడదు.  ఒక్కసారి అవగాహన అయితే హృదయం తేలికవుతుంది. ‘నీవు ఏది కావాలనుకుంటున్నావో, ఎప్పుడో అది అయి ఉన్నావనే సత్యాన్ని’ గ్రహించడమే ముక్తి, మోక్షం, నిర్వాణం! ముందుగా, కనిపించే దైవాన్ని దర్శించి తరించి, ఆపై కనిపించని దైవం వైపు దృష్టి సారిద్దాం. కొందరు కళ్లు తెరచి జగత్తును పరికిస్తూ, పరిశీలిస్తూ, పరిశోధిస్తూ, జగన్మోహనుని తిలకించి, పులకించి జన్మ ధన్యం చేసుకుంటారు. మరి కొందరు కళ్లు మూసుకొని, అంతర్నేత్రంతో అంతర్యామిని కనుగొని అనంత సుఖ సాగరంలో మునిగిపోతారు. ఓ చిన్నిపాప ముద్దులన్నీ మూటగట్టుకొని మన ముందు నిల్చుంది. అందమైన జడతో, ముచ్చట గొలిపే దుస్తులతో కళకళలాడుతున్న ఆ బంగారు తల్లిని చూసుకొని ఎంతగా మురిసిపోతామో! మహాలక్ష్మిలా వెలుగుతున్న పాపాయి ఎదురుగానే ఉండగా, చూసి సంతోషించడం మాని, పాప ఫొటోలు చూస్తూ కూర్చుంటే ఎలా ఉంటుంది? పాపను ప్రత్యక్షంగా చూసినప్పుడు కలిగినంత ఆనందం, ఫొటో చూసినప్పుడు కలుగుతుందా? నదులు, పూలతోటలు, లోయలు, వాటి హొయలు స్వయంగా చూడకుండా పుస్తకాలలో వర్ణచిత్రాలుగా చూస్తే ‘వర్ణనాతీత స్థితి’కి చేరుకుంటామా? సృష్టి సౌందర్యాన్ని తనివితీరా చూస్తూ, తన్మయత్వంతో ప్రకృతితో మమేకం కావడమే అర్చన, అదే అర్పణ! ఈ అద్భుత సౌందర్యం వెనుక దాగిన ‘అతని’ అనంత నైపుణ్యాన్ని ఆరాధించడమే ‘తపస్సు’. ఒక పూవు పూయడం సామాన్య విషయమా? చిన్న మొగ్గ వనె్నల కుసుమంగా వికసించడం ఎంత కష్టమైన కార్యం? ఒక గులాబీ పువ్వు సర్వాంగ సుందరంగా రూపుదాల్చడం ఎంత అపురూప విషయం?  నోబెల్ బహుమతి గెల్చుకున్న వందల మంది శాస్తవ్రేత్తలకు కాస్త మట్టి, కాస్త నీళ్లు ఇచ్చి వంద సంవత్సరాల గడువివ్వండి. ఒక్క మల్లెపువ్వును, కనీసం ఒక్క గడ్డిపువ్వును తయారుచేయమనండి. చేస్తారేమో చూద్దాం! పూలమొక్క చిన్న ప్రయోగశాల. చిన్నకాండం, రెండు కొమ్మలు, నాలుగు ఆకులు, ఇంత మట్టి, ఇన్ని నీళ్లు.. అంతే! సన్నసన్నని వేర్ల నుండి నీరు కొమ్మల్లోకి ప్రవహించి మొగ్గ తొడిగి అద్భుత పుష్పంగా పరిణామం చెందుతుంది. చూసేందుకు తేలికగా కనపడుతున్నా, లోతుగా పరికిస్తే ఎంత క్లిష్టమైన ప్రక్రియ ఇందులో ఇమిడి ఉన్నది! ఈ అపూర్వ చాతుర్యానికి హారతి పట్టాలి. మొట్టమొదటగా నిన్ను చూచి నువ్వే అబ్బురపడటం అలవరచుకో.  ఒకసారి అద్దంలో చూసుకో. నిన్ను చూస్తే ఆశ్చర్యం కలగడం లేదూ!  మనమేమో అది లేదు. ఇది లేదు. ఏమీ లేదు అని నిట్టూర్చుతాం.  మనకు అందమైన రెండు కళ్లున్నాయి. ఇంకేం కావాలి?  ఒక అంధుణ్ణి చూస్తే కళ్ల విలువ తెలుస్తుంది. కళ్లు లేవని అతడు బాధపడుతున్నాడు. కళ్లున్న మనం సంతోషించలేకపోతున్నాం. ఉన్న దాని యొక్క ‘ఉన్నతి’ని గ్రహించాలి. ఉన్నంతలో ఆనందించే నేర్పును పెంచుకోవాలి....
  • " టవల్..."బాత్రూమ్ లోంచి కేక కు చేతిలోని చీపురు పడేసి ఒక పరుగుతో స్టవ్ మీద పులుసును సిమ్ లో పెట్టి దండెం పైన టవల్ లాక్కొని మరో క్షణం లో బాత్రూమ్ లో దూరాను.శ్రీవారికి నాచేత్తో వీపు రుద్దితే కానీ ఆయనకు స్నానం చేసినట్లు వుండదు. అక్కడ మాయం అయ్యి దేవుడి ముందు ప్రత్యక్షం అయ్యాను. సాధారణంగా దేవుడు మన ముందు ప్రత్యేక్షం అవుతాడని చదివాము కానీ ఇక్కడ అంతే. పటాలన్నీ శుభ్రంగా తుడిచేసి బొట్టు పెట్టి పూలు పెట్టి దీపాలకు నూనె...అంతలో స్టవ్ పైన పులుసు దేవుడా ... అక్కడ మాయం అయ్యి స్టవ్ ముందు ప్రత్యక్ష మయ్యాను. క్యారియర్ కోసం పులుసు ఆరబెట్టి మళ్ళీ దేవుడి ముందు ప్రత్యక్షమయ్యాను. నూనె పోసిన దీపాలలో వత్తి తడిపి అగరబత్తులు వెలిగించి హారతి పళ్ళెంలో కర్పూరం బిళ్ళ వుంచి తిరిగిబయట కు వచ్చి క్యారియర్ సర్దడం మొదులు పెట్టాను. మీకు అనుమానం రావచ్చు ఇదేమి పూజని. హాహా..అది మావారి పూజకు ఏర్పాట్లు. ఆరబెట్టిన అన్నం పులుసు తాళింపు రసం పెరుగు అమ్మయ్య అన్నీ సర్దేశాను. దేవుడిగదిలో గణగణ మని గంట చప్పుడు. అవి దేవుడికి ఏమని వినిపిస్తాయో నాకు తెలీదు కాని నాకు మాత్రం "టిఫిన్ రెడీనా..క్యారియర్ రెడీ నా " అన్నట్లు వుంటుంది.  డైనింగ్ టేబుల్ పైన టిఫిన్ దానిపైన మూత,నీళ్ల గ్లాస్ వుంచి టైం చూసి అదిరిపోయాను. తొమ్మిది కావొస్తుంది.పాపెక్కడ.? అరగంటలో ఆటోడైవర్ హారన్ వినిపిస్తుంది.మైగాడ్. ఇంటి ముందు ఇసకలోహాయిగా ఆడుకొంటున్న పాపకు వేడి నీటితో స్నానం చేయించి యూనిఫాం వేసి బ్యాగ్ సర్ది అతికష్టం మీద ఇడ్లీ నోట్లో పెట్టి షూ వేసేలోపు..."టిఫిన్ తిన్నాక కాసిన్ని టీనీళ్ళు పోయమని అడుక్కోవాలా.." అన్న కేక కు స్టవ్ పైన సిద్ధంగా వుంచిన టీని వేడి చేసి టీ గ్లాస్ తో శ్రీవారిముందు ప్రత్యక్షం అయ్యాను. టైం చూస్తూ అసహనంగా " చక్కెర వుందా చూసావా " అంటూ నావైపుచూస్తూ ఆఫీసు కు పదినిముషాలు లేటవ్వడం నేనే కారణం అయినట్లు ఆయన చికాగ్గా చూస్తూ తాగిన టీ గ్లాస్ నాచేతిలోవుంచి వెళ్ళి పోతూవుంటారు. నేను వెనకనే హడావిడిగా వెళ్ళి క్యారియర్ చేతికి అందిస్తే తనపట్ల నేను బాధ్యతగా ప్రవర్తిస్తున్నట్లు.లేకపోతే లేనట్లు. సింపుల్ కెమికల్ టెస్టు. ఆయన అన్ని విషయాల్లో అలాంటి ఫీలింగ్స్ నే  ప్రత్యక్షగానో పరోక్షంగానో వ్యక్తపరుస్తుంటాడు. ఉదయం ఆలస్యంగా లేసి చేతిలో మొదటి టీ రౌండ్ మొదలయ్యి నాలుగయిదు రౌండ్ లతో ఉదయం ముగుస్తుంది.పొయ్యి పైన కూరో అన్నం వుడుకు తున్న పాత్రలు కనీసం రెండు సార్లన్న వాటిని దించి టీపాత్ర పెట్టాల్సిందే. నాకు లాగే మా పాత్రలూ సహనంగా భరిస్తాయి...పాపం అరవడానికి మా యిద్దరికీ నోరు లేదు.పేపరు టీవి న్యూసు మధ్య లో చిరాకు మోముతో నవ్వితే నా డిసిప్లైన్ చెడి పోతుందని అటు ఇటు హడావుడి చేస్తూ ఆయన ఉదయం చేసే పని. అందమైన స్వచ్ఛమైన ఉదయాన్ని అలా ఖర్చు పెట్టేసి నేను ఆఫీసు కు పరిగెడతాను. ఏరోజు నడిచిన పాపాన పోలేదు. " అసలు మీకెందుకండీ ఉద్యోగాలు. ఇంటి దగ్గర హాయిగా సంసారాలు చేసుకోక. భర్త పిల్లలన్నా సరిగా చూసుకోవచ్చు కదా.(అంటే ఇప్పుడు చూసుకోవడం లేదా )ఇక్కడ ఇలా రోజూ లేటుగా వచ్చి మా ప్రాణాలు విసిగించక. కౌంటర్ లో క్యూ చూడు." అలా అరుస్తూ వున్నది నా రెండో మొగుడు! ఆశ్చర్యపోకండి. ఆఫీసులో బాసు. మా సునీత ఒక మాట అనేది ' ఆడదానికి ఇంట్లోనే ఒక మొగుడు బయటకెలితే అందరూ మొగుళ్ళే' అని అంటే మగవాళ్ళ డామినేషన్ అలా వుంటుందని సాయంత్రం ఏ ఆరింటికో గూడు చేరుకొంటా రకరకాల యుద్దాలు చేసి. సాయంత్రం పూట కాఫీతాగుతూ మంచి పాటలు వింటూనో మంచి పుస్తకం చదువుతూ గడపాలనుకొనేదాన్ని కదా. కాని ఇప్పుడు అలా కుదరదు. స్కూలు నుంచి చింపిరిజుట్టు తో మాసిన బట్టలతో వచ్చిన పాపను...ఇంటిని సంస్కరించడం మొదలు పెడతాను ఆ తరువాత ఆయన జిహ్వ చాపల్యానికి సరిపోయేలా నా మేధస్సు తో కనిపెట్టి వండాలి. అర్దంకాలేదా...అంటే వాతావరణం చల్లగా వాన పడ్డా చపాతీ పూరీ లాంటివి.వాటికి మ్యాచ్ అయ్యే కర్రీలతో తయారుచేయవలసి వుంటుంది. అలాకానీ సమయాల్లో పెసరట్లు అట్లు పలావులు.అలా సమయానికి తగు పాటలా వండాలి. రొటీనుగా అవే కాకుండా బోర్ కొట్టకుండా నిన్న ఏమి వండానో మొన్న ఏమి వండానో గుర్తు పెట్టుకొని జాగ్రత్త గా వండాల్సి వుంటుంది.అలా రాత్రి పనులు పూర్తయ్యేసరికి టైం తొమ్మిదో పదో అవుతుంది. పెళ్ళవ్వగానే 'జీవితం నూరేళ్ళ పంట ' అని ఎందుకు ఆశ్వీర్వాదం చేస్తారో తెలీదు.స్పెల్లింగ్ మిస్టేక్ అనుకొంటా.పంట కాదది వంట. ఏం చేద్దాం ఙ్ఞానోదయాలన్నీ ఆలస్యంగానే జరుగుతాయి.  నాకిష్టమైన శోభారాణి లత పాటలు, పుస్తకాలు కథలు కవిత్వం ఎప్పుడో మరిచిపోయాను. ఆయన ఇల్లు చేరేలోపు పాపను నిద్రపెడుతూ కాసింత కునుకు ఎక్కడో లీలగా 'చాలు మాకు తండ్రీ కొంచెం పుణ్యం కించిత్తు పాపం కాస్త కన్నీరు మరికాస్త సంతోషపుతేనీరు చాలు తండ్రీ సరదాగా నిజాయితీ గా జాలి జాలిగా హాయి హాయిగా బతుకుతాం.' తిలక్ వాక్యాలు అమృతం కురిసిన రాత్రి ఏమయ్యిందో పుస్తకం. వెతుక్కొనే ఓపిక లేదు.పదిదాటాక పెద్ద నిట్టూర్పుతో ఇంటికి వస్తారు.రోజూ ఆలస్యంగా వస్తారే లాంటి ప్రశ్నలకు ముందుగానే జాగ్రత్త ఈ నిట్టూర్పు. ఇక పదునైన ప్రశ్నలు ఇంకేమి అడుగుతాం. అలిసి వచ్చాడని బోలెడంత జాలి కరుణతో వేడి వేడిగా పక్కన కూర్చుని కొసరి కొసరి వడ్డించేస్తా. నా అంత అమాయక ప్రాణి ఆయనంత సుఖపురుషుడు ఇక పుట్టరేమో.టీవిలో ఇష్టమైన డైరెక్టర్ సినిమా పోతూవున్నా సరే మనస్సు నే కాదు కళ్ళనూ కట్టేసి ఉదయం ఐదింటి కి అలారం పెట్టుకొని కళ్ళు మూసుకొంటా. ఆయన హాల్  లో చూస్తూన్న సినిమా చప్పుడుతో నిద్ర పట్టక ఉదయానికి లేవలేనేమో స్విచ్ వేస్తే స్టవ్ వెలిగినట్లు స్విచ్ వేస్తే పిండిరుబ్బినట్లు స్విచ్ వేస్తే నిద్రవస్తే బావున్ను అనిపిస్తుంది. చివరికి ఇలా మరమనిషిలా మారిపోతున్నా. నవ్వడం తినడం నిద్రపోవడం కూడా జీవం లేకుండా జరిగిపోతున్నాయి. నా జీవితం నా చేతులు దాటిపోయింది. చాలా క్రమశిక్షణతో ఆర్మీసోల్జర్ లా అది చెప్పినట్లు నేను వింటున్నా. నాలో చదవాలనే కోరిక చచ్చిపోయింది.రాయాలనే ఆశ ఆగిపోయింది. నేను ఏమో నాకే తెలీయడం లేదు. ప్రతిరోజూ ఒకే చక్రం లో ఇరుక్కు పోయాను. చివరికి మనస్సు విప్పి ఉత్తరం రాసి ఎంత కాలమయ్యిందో. నాలుగు అక్షరాలు రాయగలనా అనే భయం నన్ను చంపేస్తుంది. ర్యాక్ లో పుస్తకాలు గోడపైన గిటార్ గుండెగది దాటని అక్షరాలు ఆకాశంలో వెన్నెల అన్నీ అసంపూర్ణంగా మిగిలిపోయాయి. నాకలలన్నీ ఏమయిపోయాయి..అసలు నేను ' జీవిస్తున్నానా ' ?! ఏదో ఒకటి చేయాలి. నేనిలా వుండలేను.రొటీన్ గా 'నా జీవితం ' ఇలా అయిపోవడాన్ని నేను ఒప్పకోను. ఏదో చేయాలి మార్పు కోసం. జీవం వుంటే కదా జీవితం.  ఉత్తరం పూర్తయింది.రాయడానికి ముందుగా ఇన్నాళ్లూ ఉత్తరాలు రాయలేక పోతున్నందుకు కారణాలు రాసాను. నన్ను అర్దం చేసుకుని మంచి ఉత్తరాలు రాయవెందుకు నీవు బాధపడి నన్ను బాధ పెట్టకు ప్లీజ్ ....
  • ముద్గలుడు  ఎవరో ? ఏమిటో ?  ఈ తరం వారికి   తెలియదు .. ఇతగాడు  సత్యాన్నే నమ్ముకున్న నీతి పరుడు.. కటిక పేదవాడు .    పొలంలో మిగిలిన వడ్ల గింజలను ఏరుకుంటూ, ఎవరన్నా దాతలు ధాన్యాన్ని దానం చేస్తే స్వీకరిస్తూ అతను కాలం గడిపేవాడు. ముద్గలుడు పేదవాడే కావచ్చు.  లేనివాడే కావచ్చు, కానీ తనకి ఉన్నదాన్ని అతిథులతో పంచుకునే ఉదారహృదయుడు. పైగా ముద్గలుడు పక్షపవాసం అనే వ్రతాన్ని చేసేవాడు. అంటే పాడ్యమి నుంచి చతుర్దశి వరకూ ఉపవాసం ఉండి అమావాస్య లేదా పౌర్ణమి రోజులలో మాత్రమే ఆహారాన్ని భుజించేవాడు. ముద్గలుని సత్యనిష్ట నానాటికీ ముల్లోకాలలోనూ వ్యాపించసాగింది. సాక్షాత్తు దుర్వాసమహర్షే, ముద్గలుని సంకల్పం ఎంత దృఢమైనదో తెలుసుకోవాలనుకున్నాడు. అందుకని ఒక యాచకుని వేషంలో ముద్గలుని ఇంటికి చేరుకున్నాడు. ఆ రోజు ముద్గలుడు ఉపవాస దీక్షని విరమించి భోజనం చేసే సమయం. ముద్గలుడు ఆహారాన్ని ఇలా చేతిలోకి తీసుకున్నాడో లేదో... ఇంటి ముందర యాచకుడు కనిపించాడు. ఒంటి మీద సరిగా గుడ్డయినా లేకుండా, జడలు కట్టేసి, క్రోధమే ఆయుధంగా ఉన్న ఆ యాచకుని చూసి ముద్గలుడు సాదరంగా ఆహ్వానించాడు. తన ఇంట్లో ఉన్న ఆహారాన్ని అతని ముందు ఉంచాడు. దుర్వాసుడు ఆ ఆహారాన్ని తిన్నంత తిన్నాడు, మిగిలిందంతా ఒంటికి పూసుకున్నాడు. ఆపై తన దారిన తను చక్కా పోయాడు. ముద్గలుడు ఆ పదిహేనవ రోజున కూడా నిరాహారంగా మిగిలిపోయాడు. ముద్గలుడు ప్రతి పక్షానికీ తన ఉపవాసాన్ని విరమించేందుకు సిద్ధపడటం. అదే సమయంలో ఆ ఉన్మత్తుడు వచ్చి తిన్నంత తిని, మిగతాది నేలపాలు చేసి పోవడం! ఇలా ఒకసారి కాదు, రెండుసార్లు కాదు.... ఆరు సార్లు జరిగింది. చివరికి దుర్వాసుడు, ముద్గలునికి తన నిజరూపంలో దర్శనిమిచ్చాడు. 'ముద్గలా నీ ఆతిథ్యం, ఉపవాసవ్రతం అసాధారణమైనవి. నీ వ్యక్తిత్వం ఇంత ఉన్నతమైనది కాబట్టే నువ్వు ఇన్నాళ్లుగా ఆకలిని కూడా తట్టుకుని జీవించగలిగావు. నీ దీక్షకు మెచ్చాను. నీకు స్వర్గలోకప్రాప్తిని అనుగ్రహిస్తున్నాను,' అంటూ వరాన్నిఇచ్చి వెళ్లిపోయాడు. దుర్వాసుడు వరం ఇచ్చినట్లుగానే కొన్నాళ్లకి దేవదూతలు ముద్గలుని స్వర్గానికి తీసుకువెళ్లేందుకు వచ్చారు. ముద్గలుని దేవవిమానంలో కూర్చోమంటూ ఆహ్వానించారు. 'స్వర్గానికి వెళ్తాం బాగానే ఉంది. అక్కడి మంచిచెడులు ఏమిటో నాకు ఒక్కసారి  చెప్పండి ' అని దేవదూతలను అడిగాడు ముద్గలుడు. ముద్గలుడు అడిగిందే తరువాయి దేవదూతలు స్వర్గం  అందచందాల గురించీ, సౌకర్యాల గురించీ తెగ వర్ణించారు. అక్కడ అందాలే తప్ప ఆకలిదప్పులు ఉండవనీ, సుఖాలే తప్ప రోగాలు ఉండవనీ ఊరించారు. ఇదంతా విన్న ముద్గలుడు సాలోచనగా- 'మీరు స్వర్గంలో కనిపించే సానుకూలతల గురించి చెప్పారు. మరి అక్కడ ఏమన్నా దోషాలు ఉన్నాయా?' అని అడిగాడు. ముద్గలుని ప్రశ్నకు దేవతూతలు కాస్త ఇబ్బందిపడుతూ- 'భూమి మీద ఉన్నప్పుడు చేసిన పుణ్యాల వల్ల స్వర్గ ప్రాప్తి లభించింది కదా! అయితే అక్కడ మళ్లీ పుణ్యం చేసే అవకాశం ఉండదు. పైగా మీరు స్వర్గంలో సుఖాన్ని అనుభవిస్తున్న కొద్దీ ఆ పుణ్యం తరిగిపోతుంది. ఎప్పుడైతే ఆ పుణ్యం పూర్తిగా తరిగిపోతుందో... తిరిగి ఈ భూలోకం మీద జన్మించాల్సి ఉంటుంది. అలా స్వర్గాన్ని వీడే సమయంలో మనసు వేదన చెందక మానదు. పైగా భూలోకంలో తిరిగి జన్మించకా తప్పదు!' అని చెప్పుకొచ్చారు. దేవదూతల మాటలు విన్న ముద్గలుడు ఆశ్చర్యపోయాడు. ఆపై కాసేపు ఆలోచించి... 'అయ్యా! ఈ స్వర్గమేదో మళ్లీ సంసారబంధాన్ని కలిగించేదిగానే ఉందికదా! పుట్టుక , చావుల చక్రంలోకి మళ్లీ దించేదిగానే ఉందికదా! అబ్బే నాకు అలాంటి స్వర్గం వద్దుగాక వద్దు. ఎప్పటికీ సంసారంలోకి రాని జన్మరాహిత్యమే నాకు కావాలి. ఇక మీదట అలాంటి మోక్షం కోసమే నేను సాధన చేస్తాను. దయచేసి మీరు వెళ్లిరండి,' అంటూ ఆ దేవదూతలను పంపి వేశాడు. అటుపై సన్యాసాన్ని స్వీకరించి తపస్సాధనలు చేసి మోక్షాన్ని సాధించాడు. తన సాధనలో తెలుసుకున్న విషయాలతో గణేశుని మహత్యాన్ని వివరించే ముద్గల పురాణాన్ని, విష్ణుమూర్తిని ఆదిపురుషునిగా పేర్కొంటూ ముద్గల ఉపనిషత్తునీ రచించాడు....
  •  “హలో.. మేడమ్”  “హలో .. ఎవరు?”  “సుగుణ మేడమ్ గారేనా?? ‘అమెజాన్’ నుండి మీకో పార్సిల్ వచ్చింది. పెద్ద అట్టపెట్టె".   “తీసుకు వస్తున్నారా?”  “ క్యాష్ ఆన్ డెలివరీ మేడమ్... రెండువేల చిల్లర ఉంది.”  “పర్లేదు తీసుకురండి. పే చేస్తాను”  “ఇక్కడ కస్తూరి బా గర్ల్స్ స్కూల్ అని ఉంది. వెలుగొండ రూట్ లో ఉన్న స్కూల్ .. ఆదేగా?”  “అవును. అక్కడే ఉన్నాను. తీసుకురండి”  “సారి మాం కనీసం 18 కి మీ పైగా రావాల్సి ఉంటుంది. సర్వీస్ గిట్టదు. మీరు సాయంత్రం. టౌన్ లోకి వచ్చినప్పుడు తీసుకుంటారా?”  “నేనయినా ఆ పార్సిల్ ఇక్కడికి తీసుకు రావాల్సిందే. మీరే పంపండి. అడిషనల్ గా పెట్రోల్ ఖర్చు నేను ఇస్తాను” .  డెలివరీ బాయ్ స్కూల్ కి వెళ్ళేసరికి గంట పైన పట్టింది.  పార్సిల్ పెట్టె పెద్దది కానీ బరువు పెద్దగా లేదు.  స్కూల్ కి వెళ్ళే సరికి సుగుణ మేడమ్ గారు క్లాస్ లో ఉన్నారు.  ఆఫీసు లో  డెలివరీ ఇచ్చేసి వస్తుంటే . దూరపు బంధువు కూతురు అక్కడే చదువు తున్న విషయం అతనికి గుర్తొచ్చింది. గ్రౌండ్ లో తోటి పిల్లలతో కలిసి చెట్ల కింద కూర్చుని చదువుకుంటున్న ఆ అమ్మాయిని కలుసుకుని పలకరించాడతను. “అన్నా .. సుగుణ టీచర్ కోసమా? పార్సిల్ తెచ్చావా?” 9 వ క్లాసు చదువుతున్న ఆ అమ్మాయి అడిగింది.  “పార్సిల్ . విషయం నీ కెలా తెలుసు?”  “స్కూల్ లో పిల్లలందరికోసం తెప్పిస్తారు టీచర్ గారు. ఆమె స్వంత డబ్బు తో.. మాకు ఇక్కడ ‘అమ్మ’ ఆమే"   ఆ అమ్మాయి చెప్పింది. ..  “హలో.. బాబూ “  “మేడమ్ చెప్పండి”  “ఇందాక కార్టన్ పెట్టె డెలివరీ ఇచ్చావు.  చిల్లర ఇచ్చేటప్పుడు. పొరపాటున రెండొందలు ఎక్కువ ఇచ్చావు”  “లేదు మేడమ్ కరెక్ట్ గానే ఇచ్చాను. మా చెల్లెలు ఆ స్కూల్ లోనే ఉంది. అంత మంది ఆడపిల్లలకి మీరు నాప్కిన్స్ కొనిస్తున్నప్పుడు. ఒకరిద్దరికి నేను ఇవ్వలేనా? పార్సిల్ డెలివరికి నాకు వచ్చే డబ్బు మేడమ్ అది. మిమ్మల్ని మర్చిపోను మేడమ్. మీరు నాకు గుర్తుంటారు . నమస్తే”...
  • ఆరో అంతస్తులో ఉన్న ఆఫీసుకి రాగానే అతను కిటికీ ఉన్న వెనిషింగ్ బ్లిండ్స్ పక్కకి తొలగించి చూశాడు.  కింద లాన్ లో ఆమె అదే బెంచీ మీద కూర్చుని ఉంది.  అరగంట తర్వాత, మెల్లిగా తన ఆఫీసుకు, తర్వాత తన ఛాంబర్ కి వస్తుంది.  తిరిగి అదే ప్రశ్న వేస్తుంది. “వినయ్ ఎక్కడ?” తను సమాదానానికి పదాలు వెతుక్కుంటాడు. గొంతు సవరించుకుంటాడు.  ఏదో చెబుతాడు. అందులో నిజం లేదని అతనికి, ఆమెకి కూడా తెలుసు.  పది రోజుల నుండి ఇదే జరుగుతుంది.  పది రోజుల క్రితం ఆమె మొదటి సారి తనని కలిసి ఇదే అడిగింది “వినయ్ ఎక్కడ?” “కూర్చుని వివరంగా అడుగుతారా ?” ఆమె మొహం లోని గ్లో ని గమనిస్తూ చెప్పాడు.  “నేను ఆమని. ఎంబీయే చేస్తున్నాను. వినయ్ నాకు గత కొన్నేళ్లుగా తెలుసు. రెండు నెలల క్రితం వివాహం చేసుకోవాలని అనుకున్నాం. తనకి ఎవరు లేరు. మా ఇంట్లో ఒప్పుకోలేదు. ఇంట్లో అన్నీ తెంచుకుని వచ్చేశాను. వినయ్ ఇక్కడే ఐ‌బి‌ఎం లో పని చేస్తాడు. మూడు రోజుల నుండి అతని జాడ లేదు. కంప్లైంట్ ఇచ్చాను. మిమ్మల్ని కలవమన్నారు.” ఆమె కళ్ళు దాచుకుంటూ చెప్పింది. ఆమె మెడలో నల్ల పూసల గొలుసు ఉండటం గమనించాడు అతను.  అతను ఆమెను బయట కూర్చోమని చెప్పి ఇంటర్ కం లో మాట్లాడాడు. తర్వాత ఆమెని పిలిచి “వి విల్ ఫైండ్ ఔట్. వై డోంట్ యు గో హోం ఐ మీన్ టు యువర్ పేరెంట్స్” ఆమె బేలగా చూసింది. “వినయ్ తోనే నా జీవితం. అతను ఎక్కడున్నాడో అర్ధం కావటం లేదు. ఫ్రెండ్స్ కాంటాక్ట్ లో లేడు. అతని వద్ద నుండి’ సీ యు సూన్’ అనే వాట్స్ అప్ మెసేజ్ తప్ప. ఫోన్ కూడా స్విచ్ ఆఫ్ అయింది. ఆఫీస్ కి లీవ్ అప్లై చేసి ఉన్నాడు. అతనికి ఏమయినా అయితే నా జీవితం ముగిసినట్టే ”  “డూ నాట్ వర్రీ. వి విల్ ఫైండ్ హిమ్. గివ్ అస్ సం టైమ్. మీన్ వైల్ యు బెటర్ గో హోం ”  **  తలుపు చప్పుడయింది.  ఆ మే .. అదే ప్రశ్న. “వినయ్ ఎక్కడ?”  అతనికి ఏం చెప్పాలో అర్ధమవలేదు.  మొదటి భార్యని చంపిన కేసులో అరెస్టయి రిమాండు లో ఉన్నాడని ఎలా చెప్పాలో అసలు అర్ధం కాలేదు....
  • అతనికి మెలుకువ వచ్చింది. నిజానికి మెలుకువ అనే పదమే కరెక్ట్ కాదు.  అసలు నిద్రపట్టలేదు అనటం సబబు.  గత కొన్నాళ్లుగా తల పోటుగా ఆలోచనలు కానీ  ఇప్పుడు లేదు.  ఎందుకంటే తను నిర్ణయించుకున్నాడు.  తన నిర్ణయం లో ఎలాటి మార్పు ఉండదు.  ** తలగడ కింద చేత్తో తడిమాడు. తను తెచ్చుకున్నది అక్కడే ఉంది.  లోహం తో చేసిన చిన్న డబ్బా.. అది.  మెడలో వేసుకునే తాయత్తు సైజు లో ఉంది.  ఎక్కడ ఉండే వాడు ? ఎంత సౌకర్యంగా ?  అసలు ‘రేపు’ అనే పదానికి భయపడకుండా ?  ** ఎందుకు? అసలు ఎందుకు తన కి పరిస్థితి వచ్చింది. ఆశ .. ఆశేనా ?  అవును ఆశే, ఆశ కూడా కాదు అత్యాశ ,  జూదం మిగులు డబ్బుతో ఆడితే పర్లేదు కానీ ఎక్కడ ఆపాలో తెలీలేదు ??  నిలువుగా మునిగిపోయాడు. ఉన్న డబ్బు అంతా కుమ్మరించేశాడు. ఎంత డబ్బు? లక్షలు, కాదు కాదు రెండున్నర కోటి ?  ఆరేళ్లుగా భార్యా పిల్లలని పట్టించు కోకుండా?  పగలు రాత్రి తేడా లేకుండా, సరయిన తిండి తినకుండా, విశ్రాంతి లేకుండా సంపాదించిన డబ్బు? ఒక్క సారి గా రాష్ట్రం కా ని రాష్ట్రం లో మహాబలిపురం లో ఆరు ఎకరాలు ఎగబడి కొనేశాడు. రెండేళ్లలో రెండు రె ట్లు పెరుగుతాయని ఆశ పడ్డాడు. తన జీవితం మారి పోతుందని కలలు కన్నాడు.  ** ఇప్పుడు ఏమయింది.? లాండ్ మీద సివిల్ వాజ్యం నడుస్తుంది. కోర్టు నోటీసు వచ్చింది. స్టేటస్ కొ ఇచ్చారు.  అమ్మటానికి లేదు. కొనేవాడు లేడు. ** ఎంత డబ్బు ?? ఎంత డబ్బు? మూడు నాలుగు రూపాయల వడ్డీకి కూడా తెసుకెళ్లి ఇన్వెస్ట్ చేశాడు. ఎండా వాన తో సంబంధం లేకుండా వడ్డీలు పెరుగుతున్నాయి. మొత్తం వ్యవస్థ అంతా స్థం భించింది.  ఉన్నవన్నీ అమ్మి కట్టు బట్టల్తో మిగిల్తే  చాలు అనే పరిస్తితి.  తాను ఒట్టి కుండ. గాలిలో దీపం.  ** ఇప్పుడు తనను కాపాడేది. తలగడ కింద ఉన్న తాయెత్తే ..  ఆందులో ఉన్న ‘పొటాషియం సైనేడ్’ ఒక్కటే  నాలుక మీద రుచి తెలిసే లోపు ప్రాణం పోతుంది  అంతా ప్రశాంతం ఏ సమస్యలు ఉండవు.  హాయిగా ఉంటుంది .. హా యి గా .. ** అతను తలతిప్పి మంచం పక్కనే చాప మీద బొంత వేసుకుని పడుకున్నభార్య  రాజ్యాన్ని , పాలు తాగుతూ నిద్రపోతున్న తమ గారాల పట్టి ని గాజు కళ్ళతో చూశాడు.  ఖరీదయినా జీవనం గడిపేటప్పుడు ఎలా ఉందో,  రెండు గదుల ఈ ఇంట్లో కి మారాక కూడా అలానే ఉంది రాజ్యం .  అదే అమాయకత్వం అదే చిరునవ్వు.  తనంటే అదే ప్రేమ అదే నమ్మకం. ** అతడు చెదిరిన రాజ్యం పమిటని తల్లిని హత్తుకు పడుకున్న ‘నైమీ' ని చూస్తుండి పోయాడు. తన కుమార్తె చిన్ని కాలికి ఉన్న వెండి పట్టాల వద్ద అతని చూపులు ఆగి పోయాయి.  బహుశా రాజ్యానికి ఆమాత్రం ‘నగ’ కూడా మిగల్చలేదు. వెచ్చటి కన్నీళ్లు అతని చెంపల నుండి తలగడ మీదకి జారాయి.  అతను తలగడ కింద తడిమి తాను తెచ్చుకున్న డబ్బా అందుకుని లేచి కూర్చున్నాడు. .. హఠాత్తుగా  అతనికి ఒక ఆలోచన వచ్చింది . రేపు ఎలా ఉంటుంది ? రాజ్యం లేసే సరికి తను మంచం మీద నిస్తేజంగా పడి ఉంటాడు.  రాజ్యం ఏం చేస్తుంది? గుండెలు పగిలేలా ఏడుస్తుందా? నైమీ ?? మా నైమీ ?? రాజ్యం ఏడవటం అనే ఆలోచన అతని గాయాన్ని మరింత నలిపింది.  'ఇంటి యజమాని' తన శవాన్ని ఇంట్లో ఉండనిస్తాడా? .. శవం తో పాటు రాజ్యాన్ని .. నైమి ని బయటకి గెంటి ?? అతనికి దుఃఖం  ఆగలేదు  చేతుల్లో ముఖం దాచుకుని వెక్కి వెక్కి ఏడవ సాగాడు. *** ఎప్పుడు లేచి వచ్చిందో రాజ్యం అతని పక్కన కూర్చుని ఉంది.  “ఏమయింది బావా ? “ అంది. అతను దుఃఖం  ఆపుకోలేక పోయాడు . . “రాజీ నీకు అన్యాయం చేశాను అంతా కాజేశాను . నేను వెళ్ళి పోతాను”  భార్యని  కరుచుకుని ఏడ్చేశాడు. ** ఆమె అతన్ని పొదివి పట్టుకుంది.  ఎద లోపలి భారం తగ్గేదాకా ఏడవనిచ్చింది. ..  “బావా .. నువ్వు .. చాలు నాకు. .. మనం మళ్ళీ జీవితం మొదలెడదాం. ఎక్కడి కయినా వెళ్ళి పోదాం.  ఇక్కడ అన్నీ అప్పగించేసెద్దాం.  ‘పోలిక’ ఎవర్ని అయినా చంపేస్తుంది.  మనలాటి వారిని ఇంకా త్వరగా చంపేస్తుంది.  మనకి వయసు ఉంది. ఆరోగ్యం ఉంది. దేవుడిచ్చిన కాళ్ళు చేతులు ఉన్నాయి.  ఎంతో కొంత చదువుంది. మనం మళ్ళీ మొదలెడదాం. మనకిప్పుడు మన తప్పులు తెలుసు.కాబట్టి నిలదొక్కుకోవటానికి ఎక్కువ కాలం పట్టదు. మన దగ్గర విలువయిన అనుభవం ఉంది. నిలకడ లేని ఆరాటం పెద్ద జూదం. జూదం ఆడేవాళ్లు ఓటమికి భయపడ కూడదు. ఏ డబ్బయితే ఆరేళ్ళ నుండి నిన్ను మానుండి పరిగెత్తిచ్చిందో అదే డబ్బు మనని ఒకటిగా కలిపింది. బావా .. నన్ను .. మన నైమి ని వదిలి, నువ్వు ఎలా ? “ రాజ్యం అతన్ని చుట్టుకు పోయింది. ఆ సాంగత్యం వాళ్ళిద్దరికి బలాన్ని, భరోసా ని ఇచ్చింది.  ** పక్క మీద 'నైమి' కదిలింది. తండ్రి లేచి పిల్లని ఎత్తుకున్నాడు.  ఆ గదికి ఉన్న చిన్న కిటికీ వద్దకి వెళ్ళి చేతి లో ఇమిడి ఉన్న డబ్బాని బయట కాలవలో పడెట్టు విసిరేశాడు.  .. దూరంగా కొత్త సూర్యుడు చీకటిని ఊచ కోత కోస్తున్నాడు. ......SUSRI ...
  • (సుశ్రీ ) ......  ఈ ఫొటోలో కనిపించే ఆమె గురించి  ఈ  తరం లో కొద్దిమందికే  తెలిసి ఉండొచ్చు అంటే ఆశ్చర్య పోనవసరం లేదు.  క్లుప్తంగా  ఆమె ఫ్లాష్ బ్యాక్ గురించి తెలుసుకుని తర్వాత అసలు కథలోకి వెళ్దాం. అతను సాంప్రదాయ కన్నడ భ్రాహ్మణ కుటుంబం లో జన్మించాడు. కుటుంబ ఆచారం ప్రకారం గుడిలో పూజారి గా స్థిరపడటాన్ని వ్యతిరేకించాడు.  మెజీషియన్ గా అవతరించాడు.  భుక్తి కోసం ఒక సర్కస్ కంపెనీ లో జంతువుల ట్రైనర్ గా, మెజీషియన్ గా వివిద పనులు చేసేవాడు. ఉయ్యాల నుండి గాలిలో పల్టీలు కొట్టి మరో ఉయ్యాల పట్టుకునే విన్యాసాలు చేసేవాడు. (Trapeze) 1929 నంవంబరు 4 వ తేదీ ఒక చక్కటి ఆడపిల్లకి తండ్రి అయ్యాడు.  తనతో పాటే సర్కస్ లో తిరుగుతుండే చిన్నారికి మూడేళ్ళ వయసులో ప్లేయింగ్ కార్డ్స్ తో ఒక చిన్న మాజిక్ నేర్పే టానికి ప్రయత్నించినప్పుడు తన కూతురికి అంకెలని అద్భుతంగా జ్నాపకం పెట్టుకునే శక్తి ఉందని గ్రహించాడు. అతను సర్కస్ లో పని మానేశాడు. అనేక చోట్ల కుమార్తె తో కలిసి మేజిక్ లెక్కలతో కలిపి ప్రదర్శనలు ఇచ్చేవాడు. కుమార్తె కి ఉన్న శక్తి ని పరిపూర్ణంగా ప్రోత్చహించాడు.  ఆమె తన గణన శక్తి ని యూనివర్శిటీ ఆఫ్ మైసూర్ లో ప్రదర్శించింది. అప్పటికి ఆ బుడ్డ దాని వయసు నిండా ఆరేళ్లు!!.  తన పేరు శకుంతలా దేవి. అది ప్రారంభం. 1944 లో ఆమెకి పదిహేనేళ్ళ వయసప్పుడు తండ్రి తో కలిసి లండన్ చేరింది.  ఆమె తన అర్ధమేటిక్ జ్ణానాన్ని అనేక చోట్ల ప్రదర్శనలు ఇస్తూ యూరప్, న్యూ యార్క్ లు పర్యటిస్తూ ఉండేది.  Arthur Jensen, అనే సైకాలజీ ప్రోఫ్ఫెసర్ (University of California, Berkeley ) ఆమెను అనేక సమస్యలకి సమాధానాలు రాబట్టాడు. అతని అసిస్టెంట్స్ ఆయన ఆడిగిన సమస్యని వ్రాసేలోగా ఆమె సమాదానం తో సిద్దం గా ఉండేది.  61,629,875 కి క్యూబ్ రూట్, 170,859,375 కి సెవెన్త్ రూట్ ఆయన నోట్ బుక్ లో వ్రాసేలోగా 395, 15 అని సమాదానం చెప్పింది. 1990 లో Intelligence అనే పత్రిక లో వీటిని ప్రొఫెసర్ పొందుపరిచారు.  1977 లో Southern Methodist University, లో జరిగిన ఒక ప్రదర్శనలో 201 అంకెల సంఖ్యకి 23వ క్యూబ్ రూట్ ఆమె 50 సెకండ్ల లో చెప్పేసింది. అప్పట్లో అత్యంత వేగమయిన UNIVAC 1101 కంప్యూటర్ లో ప్రత్యేక ప్రోగ్రాం వ్రాసి , సమాదానాన్ని నిర్ధారించుకోవలసి వచ్చింది.  1980 లో Imperial College London. వారు నిర్వహించిన ఒక కార్యక్రమం లో రెండు పదమూడు అంకెల లబ్దాన్ని 28 సెకండ్ల లో చెప్పి ఆందరి ని ఆశ్చర్యపరిచింది. 1982 గిన్నీస్ బుక్ ఆఫ్ వరల్డ్ రికార్డ్స్ లో ఇది నమోదయ్యింది.  (7,686,369,774,870 × 2,465,099,745,779=18,947,668,177,995,426,462,773,730) ఫిగరింగ్, ది జాయ్ ఒఫ్ కౌంటింగ్ అనే ఆమె వ్రాసిన పుస్తకాలలో అనేకి కీలక విషయాలు ప్రపంచానికి తెలియపరిచింది.  1960 ప్రాంతాలలో ఇండియా తిరిగి వచ్చిన ఆవిడ ఒక ఇండియన్ అడ్మిస్ట్రేటివ్ ఆఫీసర్ ని వివాహం చేసుకుని. 1979 లో 50 ఏళ్ల వయసులో విడాకులు తీసుకుంది.  తమాషా ఏమిటంటే 1977 లో ‘హోమో సెక్సువాలిటీ’ మీద ఆమె తన తొలి రచన చేసింది. దీనికి కారణం ఒక చీకటి కోణం.  1980 లో ఇండిపెండెంట్ అబ్యర్ధిగా ఇందిరా గాంధీ మీద పోటీ చేసింది. (ఇందిర నుండి మెదక్ ప్రజలని ని కాపాడటానికి అని ఇంటర్వ్యూ లలో చెప్పింది. :p  చివరి రోజుల్లో ఆమె ఆస్ట్రాలజీ లో కూడా ప్రావీణ్యం ఉందని నిరూపించుకున్నారు.  21-04-2013 న బెంగుళూరు లో కుమార్తె అనుపమ కేర్ టేకింగ్ లో శ్వాసకోశ ఇబ్బందులతో 83 ఏండ్ల గణిత మేధావి తన జ్ణాపకం గా అనేక గ్రంధాలు మిగిల్చి బౌతికంగా ‘సైపర్’ (cypher) ఆయిపోయారు.  4, నవంబర్ 2013 న గూగుల్ ఆమె 84 పుట్టిన రోజు సందర్భంగా ఒక చిత్రాన్ని ప్రదర్శించింది.  ఆమె వ్రాసిన కొన్న పుస్తకాలు: • Astrology for You (New Delhi: Orient, 2005). ISBN 978-81-222-0067-6 • Book of Numbers (New Delhi: Orient, 2006). ISBN 978-81-222-0006-5 • Figuring: The Joy of Numbers (New York: Harper & Row, 1977), ISBN 978-0-06-011069-7, OCLC 4228589 • In the Wonderland of Numbers (New Delhi: Orient, 2006). ISBN 978-81-222-0399-8 • Mathability: Awaken the Math Genius in Your Child (New Delhi: Orient, 2005). ISBN 978-81-222-0316-5 • More Puzzles to Puzzle You (New Delhi: Orient, 2006). ISBN 978-81-222-0048-5 • Perfect Murder (New Delhi: Orient, 1976), OCLC 3432320 • Puzzles to Puzzle You (New Delhi: Orient, 2005). ISBN 978-81-222-0014-0 • Super Memory: It Can Be Yours (New Delhi: Orient, 2011). ISBN 978-81-222-0507-7; (Sydney: New Holland, 2012). ISBN 978-1-74257-240-6, OCLC 781171515 • The World of Homosexuals (Vikas Publishing House, 1977), ISBN 978-0706904789[11][21]...
  • ( సుశ్రీ ) .................................. నా పేరు అమృత. ఆ రోజు నాకింకా గుర్తుంది. 1919 ఏప్రిల్ 13 వ తేదీ మర్నాడు. రోజు లాగే అన్న స్కూల్ కి ఉదయాన్నే వెళ్ళాడు. అతను స్కూల్ కి వెళ్లలేదని మర్నాడు తెల్సింది.  అతడు ఇంటికి వచ్చేసరికి బాగా ఆలస్యం అయింది. ఇంట్లో అందరూ దిగాలు పడి ఉన్నారు. అన్న ముఖం వేలాడేసుని వచ్చాడు. బోలెడు దుఖం తో అతను నిలువునా మునిగి ఉన్నాడు.  అన్న కి చిన్న చెల్లెలు ని నేను. నేనంటే అన్న ఎంతో ప్రేమగా ఉండేవాడు.  “అన్నా ఎందుకింత ఆలస్యం అయింది.? ఎక్కడికెల్లావు ?” అని నేను ఆందోళనగా అడిగాను.  “ఏమి తెచ్చానో చూడు” చేతి లో జేబులోంచి తీసిన ఎర్ర సీసాని చూపించాడు.  అందులో మట్టి ఉంది. మట్టి రంగు ఎరుపుగా ఉంది. తడిగా ఉంది. “ఏమిటిది?” నేను భయంగా అడిగాను.  “ఇందులో ఉన్నది 360 మంది భారతీయుల రక్తం తో తడిచిన మట్టి ఉంది. రోలర్ చట్టానికి శాంతియుత నిరసన తెలపటం కోసం సమావేశమయిన వేలాది ప్రజలమీద కి, నిన్న జనరల్ డయ్యర్ మరఫిరంగులతో కాల్పులు జరిపాడు. ఎందరో చనిపోయారు. ఆ వీరుల రక్తం తో తడిచిన జలియన్ వాలా బాగ్ మట్టి ఈ సీసా లో ఉంది.” అన్న దుఖం తో ఒక్కో మాట చెప్పాడు.  అక్కడ ఏమి చూశాడో, ఏమి విన్నాడో తడబడుతు చెప్పాడు.  ఈ రోజు అన్న ఆహారం ముట్టలేదు. తోటలో నుండి చాలా పూలు తెచ్చి ఆ సీసాని అలంకరించాడు. దానికి మోకరిల్లాడు. తనలో తానే ఏవేవే మాట్లాడుకున్నాడు. బహుశా మనసులోనే ఏవో స్థిరంగా నిశ్చయించుకుని ఉంటాడు.  ఆ మహావీరుల రక్తం తో ఆయనకి సన్నిహిత సంభందం ఏర్పడింది. అందుకే తను గూడా విప్లవ కారులకు నాయకుడై ఆత్మ బలిదానం చేశాడు.  మీ కింతకి మా అన్న పేరు చెప్పలేదు కదూ... ఆయన్ని మీరు ఎరుగుదురు . ఆయన పేరు భగత్ సింగ్....
  • (Sheik Sadiq Ali)...........       రాస్తున్నది కాకతీయుల చరిత్రే అయినా .....దాని మూలాల్లోకి వెళ్ళటం అవసరం అని భావించి ఈ వ్యాసాన్నివ్యాస విరచిత మహాభారతం తో ప్రారంభిస్తున్నాను. మహాభారతంలో చర్చించిన పలు గిరిజన తెగలలో ప్రధానమైనవి రెండు . ఒకటి అపరాంతకులు....వీళ్ళు రాజస్తాన్ లోని పర్వత ప్రాంతాల్లో నివసించేవారు. వీరి ప్రస్తావన వాత్సాయన కామ సూత్రాలలోనూ ఉంది.(వీరి గురించి మరో వ్యాసం రాస్తాను) మరొకటి నిశాదులు. ఏకలవ్యుడి సంతతిగా ప్రఖ్యాతి గాంచిన వారు. వీరు ప్రస్తుత ఉత్తరాఖండ్ ప్రాంతానికి చెందిన వారు. ఈ వ్యాసం వారి గురించే కాబట్టి కాస్త విపులంగా చర్చిద్దాం. మహాభారత సంగ్రామం,కృష్ణ నిర్యాణం తదనంతర కాలంలో ఈ రెండు తెగలూ నర్మదా నదిని దాటి దండకారణ్యంలోకి ప్రవేశించాయి. అయితే ,అపరాంతకుల కన్నా చాలా ముందుగానే నిషాదులు వలస వచ్చారు. ఈ నిశాదులనే కిరాతులు కూడా అంటారు. వీరి జీవన విధానం గురించి వ్యాస మహాభారతంలో వివరించారు. వీళ్ళు ఉభయ చరులు. అంటే ,అటు అడవులలోనూ ,ఇటు వాటికి ఆనుకొని ఉన్న మైదాన ప్రాంతాల్లోనూ జీవించగలరు. విలు విద్య,బాణాలు,ఇనుము,ఉక్కుతో ఆయుధాలు,ఇతర సామాగ్రి తయారు చేయటంలో వీరు నేర్పరులు. ఉత్తరాఖండ్ లోని పలు క్షేత్రాలలో దర్శనం ఇచ్చే భారీ త్రిశూలాల తయారీలో ఈ నిషాదుల పాత్రే కీలకం . శారీరకంగా బలంగా ఉండటం, ఉక్కు మీద పట్టు ఉన్న వీరు దక్షిణ భారత దేశపు అడవుల్లోకి ప్రవేశించిన తర్వాత నుంచి అసలు కథ మొదలయ్యింది.  ప్రస్థానం..(కాకతీయులు పార్ట్ - 1) ఏకలవ్యుడు మహాభారతం లోని ఒక పాత్రే అయినప్పటికీ అతను ఒక జాతికి ప్రతీక. ఆ జాతి వీరత్వం ,ధీరత్వం,వ్యక్తిత్వం , డీ ఎన్ ఏ లకు చిరునామా. ఆ జాతి వారైన నిషాదులు దక్షిణ భారత దేశం లోకి ప్రవేశించిన తర్వాత అంచెలంచెలుగా తెలంగాణా,ఆంధ్రప్రదేశ్,కర్నాటక,తమిళనాడు,చివరిగా శ్రీలంక వరకూ చేరుకున్నారు. ఏడాదిలో కేవలం నాలుగైదు నెలలు మాత్రమే ఉపాధి అవకాశాలు ఉన్న ఉత్తరాఖండ్ నుంచి ఏడాది పొడవునా ఉపాధి లభించే దక్షిణాపధం నే తమ కర్మ భూమిగా చేసుకున్నారు. ఉక్కు తమ ప్రధాన జీవనాధారం అవటంతో ఉక్కు ఖనిజం పుష్కలంగా లభించే ప్రాంతాల చేరువలో తమ నివాసాలనుఎర్పర్చుకున్నారు. ఆ క్రమంలో తెలంగాణా లోని ఆదిలాబాద్,కరీంనగర్ వరంగల్, ఆంధ్రప్రదేశ్ లోని విశాఖ ,ఒరిస్సా సరిహద్దు ప్రాంతాలు,కర్నాటక లోని బెల్గాం,బళ్ళారి ప్రాంతాలు,తమిళనాడులోని కొడుమనాల్, కేరళ లోని మలబార్ ,శ్రీలంకలోని సమనల వేవ,తిప్పమహారామ ,అనురాదాపురం ప్రాంతాల్లో స్థిరపడ్డారు.(వీరిలో మరో వర్గం నల్లమల అటవీ ప్రాంతపు సరిహద్దుల్లో ఉన్న మహబూబ్ నగర్,కర్నూలు,గుంటూరు,ఒంగోలు,కడప ప్రాంతాల్లో స్థిరపడ్డారు. వీటి వివరాలు మున్ముందు అధ్యాయాల్లో చర్చిద్దాం.) ఉక్కు,ఆయుధాల తయారీ ప్రధాన ఆదాయ వనరుగా ఉన్న వీరు సహజంగానే అక్కడ రాజ్యాలు ఏలుతున్న రాజులకు,రాజ వంశీయులకు సన్నిహితులు అయ్యారు.ఆయుధాల సరఫరాతో పాటు, దేహ దారుడ్యం,ఆయుధాల ప్రయోగంలో నైపుణ్యం ఉండటంతో రాజుల సైనిక బలగాల్లో వివిధ హోదాల్లో కొలువులు కూడా చేసేవారు. ఇదంతా క్రీస్తుపూర్వం ఐదో శతాబ్దం నుంచీ జరుగుతూ వచ్చింది.అలాగే అరేబియా సముద్ర తీరం నుంచీ ,హిందూ మహాసముద్రం నుంచీ కూడా విదేశాలకు ఖడ్గాలు,సముద్రంలో ప్రయాణించే ఓడలకు అవసరమైన లంగర్లు,శుద్ధి చేసి,పోతపోసిన ఉక్కు దిమ్మెలు కూడా ఎగుమతి చేసేవారు.అరబ్బుల మధ్యవర్తిత్వంతో సిరియా,లెబనాన్,అక్కడి నుంచి ఐరోపా దేశాలకు ఎగుమతులు జరిగేవి. ఈ ఉక్కు దిమ్మెలతోనే తదనంతర కాలంలో డమాస్కస్ లో ఖడ్గాల తయారీ పరిశ్రమలు నెలకొని ప్రపంచ ప్రసిద్ధి చెందాయి. ఇంతకు ముందు చెప్పుకున్నట్లుగా ఈ నిషాదులు ఆయా రాజ వంశీకులకు చేరువైన క్రమంలో తమిళనాడులో ఆరో శతాబ్దానికి చెందిన చేర రాజ వంశీయులకు ,ఇక్కడ రాష్ట్ర కూటులకు తదనంతరం కళ్యాణీ చాళుక్యులకు సన్నిహితులు అయ్యారు.ఇక్కడి నుంచి నేరుగా మన కాకతీయుల చారిత్రిక నేపధ్యంలోకి వెళ్దాం.  (తరువాయి  రెండో భాగం లో) ...
  • ఈ ఫొటోలో కనిపించే అరుణ్ కృష్ణన్ వయసు 67 సంవత్సరాలు . ఈ వయసులోనూ సాహాసాలు చేస్తుంటారు.  మలి వయసులోనూ అథ్లెటిక్ పోటీల్లో పాల్గొని విజయాన్ని సొంతం చేసుకుని యువ అథ్లెట్స్‌కు సవాల్ విసిరిన ఖ్యాతి  ఆయనది.  ఇండియన్ ఓల్డెస్ట్ ఐరన్‌మ్యాన్‌గా తన పేరు నమోదు చేసుకున్న అరుణ్ కృష్ణన్ ఆ మధ్య  ఆస్ట్రేలియాలో జరిగిన ట్రియథ్లాన్ (స్విమ్మింగ్, సైక్లింగ్, రన్నింగ్‌లో విజేతగా నిలిచారు.ఈ తరం ఆటగాళ్లు అరుణ్ కృష్ణన్ ను నేర్చుకోవాల్సింది చాలా ఉంది. బలమైన సంకల్పం ... పరిశ్రమ అరుణ్ ను ముందుకు నడిపిస్తున్నాయి. తనకు వయసు వచ్చేసిందని ఆలోచన ఆయనకేమాత్రం లేదు. దూసుకుపోవడమే కృష్ణన్ కి తెలిసింది.   చెన్నైకి చెందిన అరుణ్ కృష్ణన్‌ ఇంజనీర్. బిజినెస్ కూడా చేశారు.  కాలేజీలో చదువుకునే రోజుల్లో స్విమ్మింగ్ టీమ్‌కు కెప్టెన్‌గా వ్యవహరించారు. పరుగు ఆయనకు ప్రాణం. 1987 నుంచి ఎన్నో మారథాన్‌లో పాల్గొన్నారు. దేశ, విదేశాలలో జరిగే మారథాన్ పోటీల్లో పాల్గొంటారు. సింగపూర్, పారిస్, చికాగో, బెర్లిన్, టోక్యో మారథాన్‌లలో పాల్గొన్నారు. ఆసియా ఫిసిఫిక్ చాంపియన్ షిప్ సాధించి  హీరోగా నిలిచారంటే అతిశయోక్తి కాదు. వ్యాపార బాధ్యతలు వేరొకరికి అప్పగించి  ఇపుడు తన కలలను సాకారం చేసుకోవటానికి  బీచ్‌లో పరుగుపెడుతూ ప్రాక్టీస్ చేస్తూంటారు దీక్షగా.  ఆస్ట్రేలియాలో నిర్వహించిన పోటీల్లో పాల్గొన్న అరుణ్  అలలు అంతెత్తున ఎగిసిపడుతున్నా ఏమాత్రం భయం లేకుండా 3.8 కిలోమీటర్లు ఈదారు. 180 కిలోమీటర్లు సైక్లింగ్ చేశారు. 42 కిలోమీటర్లు పరుగు పెట్టి యువ అథ్లెటిక్స్ సవాల్ విసిరారు. ఇవన్నీ కూడా నిర్ణీత సమయాని కంటే రెండు నిమిషాల 25 సెకెండ్ల ముందే పూర్తిచేయటం విశేషం. ఈయన  ప్రతిభ చూసి వచ్చినవారంతా చప్పట్లతో  ఆయనను హుషారెత్తించారు. కృష్ణన్ గురించి  ఆ దేశ ఛానళ్లలో కథనాలు ప్రసారమయ్యాయి. అరుణ్ కృష్ణన్ ఎన్నో మారథాన్‌లలో పాల్గొనగా.. ఈ పోటీని ఆయన సవాల్‌గా తీసుకున్నారు. ‘ఈ 67 ఏళ్ల వయసులో ఈ విజయం సాధిస్తానని నమ్మలేదు. కాని మనసు శరీరం మీద ప్రభావం చూపిస్తుందనుకుంటా. మానసిక బలంతో పాటు 24 వారాల శిక్షణ ఈ విజయానికి దోహదం చేసింది’ అని  చెప్పుకొచ్చారు.  ‘ఇండియన్ ఒల్డెస్ట్ ఐరన్ మ్యాన్‌గా జీవితాంతం ఉండాలని భావిస్తున్నాను. ప్రపంచ మారథానర్‌గా పేరొందిన ఫౌజాసింగ్, 70 ఏళ్ల వయసులో మారథాన్‌లలో పాల్గొన్న వైట్లాక్ నాకు స్ఫూర్తినిస్తారు" అంటారు అరుణ్ కృష్ణన్. ...
  • (SIVA RACHARLA)  .............  ఆయన ఒక "నిర్వచనం",ఆయనొక "నిర్మాత",ఆయనొక "ఉదాహరణ",ఆయన భారత రాజకీయ వ్యవస్థకు నిలువుటద్దం... ఆయన "Marxist in practice"... అందరు ప్రధానుల ...  మన రాష్ట్ర ముఖ్యమంత్రుల పేర్లు తడుముకోకుండ ఎంత మంది చెప్పగలరు? జీవితాంతం ప్రతిపక్షంలో వున్నా "ఆ"నాయకుడి" పేరు అధికారంలో ఏపార్టి వున్నా స్మరించటానికి కారణం ఏమిటి? అసెంబ్లీల్లో అధికార...  ప్రతిపక్షాలు గొడవపడ్డ ప్రతిసారి "ఆ"నాయకుడు" ప్రాతినిధ్యం వహించిన సభలో ఇలా గొడవ జరగటం బాధాకరం అనటం వింటుంటాము. ఆమనిషి,ఆనాయకుడు "పుచ్చలపల్లి సుందరయ్య" aka కామ్రేడ్ "P.S" నిన్న మొన్న గోరంట్ల బుచ్చయ్య చౌదరిగారికి మంత్రి పదవి రాని సందర్భంలో కూడ నాకు సుందరయ్య స్పూర్తి, రాజకీయల్లో ఎప్పుడు అక్రమపద్దతులు పాటించలేదు అని చెప్పుకున్నారు. కమ్యునిస్ట్ పార్టీలతొ పరిచయం వున్న వారికి పార్టి "నిర్మాణం" అన్నమాట పరిచయం వుంటుంది. రాజకీయ పార్టీల బాషలో "నిర్మాణం" అంటే సిద్దాంతము, రాజకీయ కార్యక్రమము ఒకేలాగ వుండటం.ఇప్పటిలా అధికారం కోసం కప్పలతక్కెడలు,గోడదూకటాలు నిర్మాణాత్మక రాజకీయాలు కాదు. సుందరయ్య స్వతంత్ర భారత పార్లమెంటులో తొలి ప్రతిపక్ష నేత. ప్రధాని నెహ్రు.. మంత్రులకు అనేక అంశాలలో సుందరయ్య ప్రసంగాలు దారిచూపాయి.సుందరయ్య మాట్లాడుతున్నప్పుడు నెహ్రు స్వయంగా నోట్సు రాసుకునేవారు. ప్రతిపక్ష నేతకు "మంత్రి" హోదా వుంటుంది(ఇప్పటికి కూడ). పార్లమెంటు ప్రతిపక్షనేతగా వుండి కూడ అన్ని సదుపాయాలను వదులుకోని బస్సులొ లేదా స్వయంగా సైకిల్ తొక్కుకుంటునో పార్లమెంటుకు వెళ్లేవారు. సైకిల్ మీద వెళ్ళటం గొప్పతనానికి సంబంధించిన లక్షణం కాదు, వ్యక్తిత్వం. సుందరయ్యగారి ఈవ్యక్తిత్వమే ప్రజలకు దగ్గర చేసింది. ఈవ్యక్తిత్వమే ఎదుటివారు చెప్పే విషయన్ని ఓపిగ్గా వినే లక్షణం తద్వారా వాటి పరిష్కారం కోసం పనిచేసే పద్దతి సుందరయ్య గారి సొంతం అయ్యింది. సుందరయ్య ఓకసారి MPగా, మూడుసార్లు MLAగా పనిచేశారు. అయితే సుందరయ్య చేపట్టిన ఈపదవుల కన్నా ఆయన చేసిన  ప్రతిపాదనలు,చేపట్టిన పనులవలనే చనిపోయిన 32 సంవత్సరాల తరువాత కూడ ప్రజలు స్మరించుకుంటున్నారు. దేశానికి స్వతంత్రం వచ్చిన తరువాత చేపట్టవలసిన పనుల గురించి అనేక రచనలు చేశారు. ఇప్పుడు చెప్పుకుంటున్న నదుల అనుసంధానం గురించి 50వ దశకంలోనే సుందరయ్యగారు ప్రతిపాదించారు. "ఆంధ్రప్రదేశులొ సమగ్ర నీటిపారుదల" అన్న పుస్తకంతో అనేక ప్రాజెక్టులు, నదుల అనుసంధానం గురించి రాశారు. సాయుద తెలంగాణా రైతాంగ పోరాట నిర్మాత సుందరయ్య.4,5 సంవత్సరాల పాటు అజ్ఞాతంలో ఉండి  దళాలకు మార్గదర్శకత్వం చేశాడు. తెలంగాణా సాయుధపోరాటం తరువాత ఆఉద్యమ అనుభవాలను "వీర తెలంగాణ విప్లవ పోరా టం గుణపాఠాల" పేరుతో పుస్తకం  రాశారు. సుందరయ్యగారి ఎంత వాస్తవికమో ఇలాంటి పుస్తకాలు తెలియచేస్తాయి. తెలంగాణ సాయుధపోరాటంలో కాని,ఎమర్జెన్సి రోజుల్లో కాని కామ్రేడ్స్, వారి కుటుంబల పట్ల సుందరయ్య చాల జాగర్తలు తీసుకునేవారు. కొండపల్లి కోటేశ్వరమ్మగారు(సీతారామయ్యగారి భార్య) రాసిన "నిర్జన వారధి" పుస్తకంలొ సుందరయ్యది ఎంత ఉన్నతమైన వ్యక్తిత్వమో తెలియచేసే సంఘటనలు వివరించారు. అజ్ఞాతంలో వున్న దళాలను,వారి కుటుంబ సభ్యులను సుందరయ్య గారు కలిసినప్పుడు...తను ముందుగా భోజనం చెయ్యకుండ గర్భిణిలు,పిల్లలకు భోజనం పెట్టి చివరలొ తను తినేవారు.కారణం నేను వచ్చానని ఈరోజు మంచి భోజనం వండివుంటారు,మీకు రోజు ఇలాంటి భోజనం దొరకదు కదా?ముందు మీరు తినండి అని వారికి భోజనం పెట్టేవారంట సుందరయ్యగారు.దళాలన్ని  ఒకచోట వుండటం వలన ఎదో ఒక భోజనం దొరికేది,నిత్య సంచారి అయిన సుందరయ్యలాంటి నాయకులకు గ్యారెంటి భోజనాలు తక్కువ.అది కామ్రేడ్స్ పట్ల సుందరయ్యగారి ప్రేమ,నాయకుడే త్యాగం చెయ్యాలనే  లక్షణం. 60,70 దశకాలలో  కమ్యునిస్ట్ పార్టీలలోకి డాక్టర్లు,లాయర్లు ప్రవాహంలాగ చేరారు.సుందరయ్యగారు డాక్టర్లను పార్టి full timersగా కాకుండ గ్రామాల్లో వైద్య సేవలు చెయ్యాలని ప్రోత్సహించారు. 1964లొ CPI నుంచి CPM విడిపొయినప్పుడు సుందరయ్యగారు CPM జాతీయ ప్రధానకార్యదర్శిగా ఎన్నికయ్యారు. సుందరయ్యగారి నాయకత్వంలొ CPM "Party Program" documentలొ పార్టి కార్యక్రమాన్ని వివరించారు,ఆ డాక్యుమెంట్ CPM రాజ్యాంగం. భారత దేశంలొ party programను రాసుకున్న ఏకైక పార్టి CPM.. దాన్ని ప్రారంభించి  సుందరయ్యగారు  నేతృత్వం  వహించారు.. సుందరయ్యగారి పోరాటం  ఆయన సొంత ఊరు నెల్లూరు జిల్లా "అలగానిపాడు" నుంచే మొదలయ్యాయి. సుందరయ్య గారి వ్యక్తిగత జీవితం త్యాగాల నిలయం.చిన్న వయసులోనే కులాన్ని వదులుకున్నారు.తన చెల్లెళ్లను  ,ఇతర పిల్లలను హరిజనవాడలో వున్న స్కూల్లొ చదివించారు. అలగానిపాడులొని అంటరానితనాన్ని నిర్మూలించటానికి హరిజనవాడ బావిలోని నీటిని ఊర్లోని అన్ని బావులలో కలిపాడు. ఆయన హాబిల్లొ చదవటం రాయటం ముఖ్యమైనవి. అలగానిపాడులో మొదటి గ్రంధాలయన్ని ఏర్పాటు చేశారు. ఇప్పుడు వారి ఇల్లు కూడ స్మారక చిహ్నం అయ్యింది. ఆస్తి పంపకాల్లొ వచ్చిన తన వాటా మొత్తాన్ని పార్టికి ఇచ్చేసి,పార్టి ఇచ్చిన అలవెన్సుతో బతికారు.   మాజీ ఎంపీ ,ఎమ్మెల్యేలకు  ఇచ్చే పెన్షన్ కూడ పార్టికి ఇచ్చారు. తన జీవితం మొత్తం ప్రజలకోసం,పార్టీ కోసం పనిచేయా లన్న లక్ష్యంతొ పెళ్ళి చేసుకోకూడదనుకున్నారు.అయితే కామ్రేడ్. లీలాగారు పట్టుదలతో ఆమెను వివాహం చేసుకోవటానికి అంగీకరించారు. సుందరయ్యగారు & లీలాగారు మాట్లాడుకోని పిల్లలు పుట్టకుండ సుందరయ్యగారు ఆపరేషన్ చేయించు కున్నారు. సుందరయ్య & లీలమ్మ ఇద్దరు త్యాగజీవులు. సుందరయ్య ,లీల గార్లకు పిల్లలు లేకుంటే ఏమి?నాలాంటి అనేక మంది వారసులు ... సుందరయ్య త్యాగం,సుందరయ్య దార్శనికత మనకు తెలియకుండనే ఎదో ఒకరూపంలొ మన జీవితం మీద ప్రభావం చూపుతుంది. సుందరయ్యగారి తమ్ముడు డాక్టర్.రామచంద్రారెడ్డి గారు కూడ జీవితాన్ని ప్రజల కోసం అంకితం చేశారు. డాక్టర్.రాం గారు నేతాజితో పనిచేశారు.నేతాజి డాక్టర్.రాముకు రాసిన ఉత్తరాలు నెల్లూరు జిల్లా ఆఫీసులొ 2001లో చదివాను. CPM డాక్టర్.రాం పేరుతో "రామచంద్రారెడ్డి ప్రజావైద్యశాల"ను నెల్లూరులో నడుపుతున్నారు. సుందరయ్యగారు 19-May-1985న విజయవాడలొ చనిపోయారు. సుందరయ్యగారు మేడే రోజున అంటే 01-May-1913న పుట్టారు. సుందరయ్య "Marxist in practice"...Marxism is not a dogma but a theory to be applied in practice,a guide to action సుందరయ్యను "కమ్యునిస్ట్ గాంధి" అనటం సమంజసం కాదు,అది కొందరు అత్యుత్సాహంతో రాసిన వాడుక.సుందరయ్య,గాంధి రెండు విభిన్న మార్గాలు.ఎవరి మార్గాల్లో వారు గొప్పవారు. సుందరయ్య కమ్యునిష్ట్ కాకుంటే ఏమి అయ్యుండేవారని అడిగిన ప్రశ్నకు "ఈరోజు కాకుంటే రేపో,మరో రోజో సుందరయ్య కమ్యునిష్ట్ అయ్యి వుండేవాడు" అంతేకాని కొందరు  రాసినట్లు కాంగ్రేస్ పార్టి ప్రధానకార్యదర్శో ,మంత్రో అయ్యేవాడు కాదు అని సుందరయ్యగారు సమాధానం ఇచ్చారు. అనేక సినిమల్లో ఉదా త్త రాజకీయనాయకుడి పాత్రకు "సుందరయ్య" అని వుండటం గమనించివుంటారు.నాకు ముఠామేస్త్రిలోని సోమయాజుల పాత్ర గుర్తుంది ,ఈమధ్య కూడ ఎదో సినిమాలో కూడ సుందరయ్య పేరు వాడారు. మాఇంట్లో వుండే ఏకైక రాజకీయ నాయకుడి ఫోటో "సుందరయ్య" గారిది.నాకు తొలి పాఠాలు చెప్పిన పుల్లయ్యగారు,Dr.శాస్త్రిగారు నాకు గురువులు.అందుకే నేను మిత్రులకు చెప్తుంటాను I am from Dr.Sastry school....
  •  (Sheik Sadiq Ali )......................   అదే స్వరం ముప్ఫై ఎనిమిది ఏళ్ళుగా వెంటాడుతోంది. విరహమైనా ,విషాదమైనా, ముంచెత్తే మొహమైనా అది వెంటే ఉంటూ వస్తోంది. ఆరుబయట వెన్నెల్లో నులకమంచం మీద పడుకున్నా, ఏసీ కార్ లో లాంగ్ డ్రైవ్ కి వెళ్ళినా అదే స్వరం .ఇంతకూ ఆ స్వరం ఎవరిది? ఎవర్ గ్రీన్ ..ఆల్ టైం గ్రేట్ లెజెండ్రీ వాయిస్ కిషోర్ కుమార్ ది. దశాబ్దాలుగా దేశ ప్రజల్ని ఉర్రూత లూగిస్తున్న స్వరం. మనిషి మరణించినా అజరామరమైన స్వరం. అతని గొంతులో అంతటి శక్తి ఎలా వచ్చింది? ఎంత ప్రేమను,ఎంత విషాదాన్ని, విరహాన్ని అనుభవిస్తే ఆ శక్తి వస్తుంది? నాలుగు పెళ్ళిళ్ళు చేసుకున్న కిషోర్ ప్రేమికుడా?ప్లేబాయా ?పురుష అహంకారా?మదోన్మత్తుడా?విలాస పురుషుడా? అతన్ని ఎలా చూడాలి? యావత్ దేశం మోహించి పలవరించిన అద్భుత అందగత్తె మధుబాల , కళ్ళముందు తటాలున మెరిసే విద్యుల్లత లీనా చందావర్కర్ , మత్తు కళ్ళ యోగితాబాలి, అలనాటి బెంగాలీ సుందరి రూమా ఘోష్ ఆ నలుగురూ అతని భార్యలే.వివిధ దశల్లో అతని జీవితాన్ని ప్రభావితం చేసిన వాళ్ళే. అతని స్వరంలోని విషాదానికీ,విరహానికీ,మోహానికీ కారకులు వాళ్ళే. నాలుగు పెళ్ళిళ్ళు చేసుకున్న వాడి గురించి ఇంత గొప్పగా రాయాలా సాదిక్? అని అడిగితె నా దగ్గర సమాధానం లేదు. కానీ, సౌందర్యాన్ని ఆరాధించి,అందిన అందాన్ని అర్ధం చేసుకోలేక వ్యర్ధం చేసుకున్న ఒక అద్భుత గాయకుడి జీవితపు చీకటి కోణాలను స్పృశించాలనే ప్రయత్నమే ఈ వ్యాసం. గాయకుడు,నటుడు,దర్శకుడు,నిర్మాత,రచయిత,సంగీత దర్శకుడు,హీరో,కమెడియన్ ఇలా బహుముఖ ప్రజ్ఞాశాలి అయిన కిషోర్ కు అసంఖ్యాకమైన అభిమానులు ఉన్నారు.మహమ్మద్ రఫీ,ముఖేష్ ల కన్నా కిషోర్ ని అభిమానించే వాళ్ళ సంఖ్య చాలా ఎక్కువ.హిందీ మాత్రమె కాకుండా మరాఠి,గుజరాతి,కన్నడ ,బెంగాలి భాషల్లో అతను అసంఖ్యాక పాటలు పాడాడు.బాలీవుడ్ లో తన సమకాలీకులందరూ ఈర్ష్య పడేంత రొమాంటిక్ జీవితాన్ని అతను అనుభవించాడు. చూడ్డానికి ప్లే బాయ్ లా కన్పించినా,నిత్యం చిరునవ్వుతో ,సినిమాల్లో నవ్వుతూ ,నవ్విస్తూ ఉన్నా లోలోపల దహించి వేసే బాదే అతనితో విషాద గీతాలు పాడించింది.సౌందర్యం పట్ల ఆరాధన గొప్ప రొమాంటిక్ పాటలని పాడించింది.విషాదాన్ని దాచుకునే ప్రయత్నంలో కామెడీ పాటలు పాడాడు. కిషోర్ కుమార్ మొదటి భార్య రూమా ఘోష్. అందం,చలాకీతనం,అభినయం కలగలిసిన అమ్మాయి.విఖ్యాత దర్శకుడు సత్యజిత్ రే మేనకోడలు. నటి,గాయకురాలు. 1951 లో వాళ్లకు పెళ్ళయ్యింది. ఏడాదికే కొడుకు అమిత్ కుమార్ (సింగర్) పుట్టాడు. అతనికి ఆరేళ్ళ వయసులో దంపతులిద్దరికీ గొడవలయ్యాయి.గృహిణిగా ఉండి ఇంటినీ, కొడుకునీ చూసుకోమంటాడు అతను. నా ప్రతిభను,సామర్ధ్యాన్ని నాలుగు గోడలకు పరిమితం చేయలేను అంటుంది ఆమె. ఫలితంగా ఇద్దరూ విడిపోయారు. ఆ తర్వాత ఆమె ఆరూప్ గుహా ను పెళ్ళాడి రూమా గుహ అయ్యింది. ఓపిక ఉన్నంత వరకూ నటిస్తూనే ఉంది. 2006 లో విడుదలైన బాలీవుడ్ చిత్రం నేమ్ సేక్ ఆవిడ నటించిన ఆఖరి చిత్రం. రెండో భార్య మధుబాల. ఇండియన్ మార్లిన్ మన్రో గా ప్రసిద్ధి చెందిన నటి.అపురూప సౌందర్య రాశి. ఇప్పటికీ అందానికి ప్రతిరూపంగా కవులు,రచయితలూ ఆమె నే ఉదహరిస్తారు. దిలీప్ కుమార్ తో గాఢమైన ప్రేమలో మునిగి,తేలి విఫలమైన మధుబాల కిషోర్ రెండో భార్య అయ్యింది. ఒక పేద ముస్లిం కుటుంబంలో 11 మంది సంతానంలో ఒకరిగా జన్మించిన ముంతాజ్ తన అందం,అభినయంతో సూపర్ స్టార్ మధుబాల అయ్యింది. ఆమె కంటి చూపు కోసం మహామహులు వెంపర్లాడే వారు. అలాంటి అమ్మాయి దిలీప్ తో ప్రేమ విఫలమై కిషోర్ కి రెండో భార్యగా మారింది. ఆమెను పెళ్ళాడటానికి కిషోర్ అష్ట కష్టాలు పడ్డాడు. ఆఖరికి మతం మార్చుకొని కరీం అబ్దుల్ కూడా అయ్యాడు. వారి వైవాహిక జీవితం తొమ్మిది ఏళ్ళపాటు సాగింది. వారికి సంతానం కూడా కలుగ లేదు. హృదయంలో చిల్లుపడి అనారోగ్యంతో మంచం పాలై విషాదకర పరిస్థితుల్లో మధుబాల మరణించింది. ఆ తొమ్మిదేళ్ళ కాలంలో ఆమె నటించలేదు. వైద్యం కోసం లండన్ వెళ్లాలని అనుకున్న ఆమెను కిషోర్ అందుకు అనుమతించ లేదనీ ,వైద్యం అందకే ఆమె మరణించింది అనీ అతనిపై ఆరోపణలు కూడా ఉన్నాయి. మూడో భార్య పేరు యోగితాబాలి. షమ్మి కపూర్ మొదటి భార్య,అలనాటి హీరోయిన్ గీతాబాలి మేనకోడలు ఈ అమ్మాయి. అప్పట్లో పలు సినిమాల్లో హీరోయిన్ గా నటించింది. వీళ్ళ బంధం రెండేళ్ళ కన్నా ఎక్కువ కాలం కొనసాగలేదు. వివాహం తర్వాత కూడా నటన కొనసాగించిన యోగితా అప్పుడప్పుడే స్టార్ డం సంపాదించుకుంటున్న మిథున్ చక్రవర్తితో ప్రేమలో పడింది. కిషోర్ కి విడాకులు ఇచ్చి మిథున్ ను పెళ్లి చేసుకొని వెళ్ళిపోయింది. ఆ తర్వాత మిథున్ మన శ్రీదేవి తో ప్రేమలో పడి పెళ్లి కూడా చేసుకోవాలని అనుకున్నాడు కానీ ,అది కుదరలేదు. అది వేరే కథ. నాలుగో ,ఆఖరి భార్య లీనా చందావర్కర్ . మెరుపు తీగలాంటి సౌందర్యం. ఒక ఆర్మీ అధికారి కూతురు. ప్రముఖ హీరోయిన్ .అపురూపమైన అందం ఆమె సొంతం. ప్రముఖ రాజకీయ కుటుంబానికి చెందిన సిద్ధార్ధ అనే యువకుడు ఆమెను ఇష్టపడి పెళ్లి చేసుకున్నాడు. పెళ్లి అయిన కొద్దికాలానికే ప్రమాదవశాత్తూ తుపాకీ పేలి మరణించాడు. 25 ఏళ్ళ వయసుకే ఆమెకు వైధవ్యం వచ్చింది. ఆమె సౌందర్యానికి ముగ్దుడై ఆమెతో ప్రేమలో పడ్డాడు కిషోర్. ఇద్దరి మధ్య వయసు తేడా 21 సంవత్సరాలు.ఇద్దరూ ప్రేమలో పడ్డారు.పెళ్లి కూడా చేసుకోవాలనుకున్నారు. దానికి లీనా తండ్రి ఒప్పుకోలేదు. ఇప్పటికె మూడు పెళ్ళిళ్ళు పెటాకులయ్యాయి. దాదాపు నీ అంత వయసు ఉన్న కొడుకు ఉన్నాడు. చచ్చినా కోశోర్ కి ఇచి పెళ్లి చేసే ప్రసక్తి లేదు అన్నాడాయన. ఎలాగైనా పెళ్లి చేసుకోవాలనుకున్న కిషోర్ నానా ప్రయత్నాలు చేశాడు. ఆఖరికి ఆమె ఇంటి ముందు ధర్నా కు దిగాడు. అప్పట్లో కిషోర్ తను పాడగా పాపులర్ అయిన 'నఫ్రత్ కరనే వాలో కె దిల్ మే ప్యార్ భర్ దూ' పాటను ఆ ఇంటి ముందు పాడుతూ కూర్చున్నాడు. చివరికి లీనా తండ్రి పెళ్ళికి అంగీకరించాడు. అదే కిషోర్ ఆఖరి పెళ్లి. 1980 లో వాళ్లకు పెళ్లి అయ్యింది. 1987 లో మరణించే వరకు కిషోర్ ఆమెతోనే కలిసి జీవించాడు.37 ఏళ్ళ వయసులో ఆమెకు మరోసారి వైధవ్యం ప్రాప్తించింది. ఆ తర్వాత ఆమె వేరేవ్వరినీ పెళ్లాడ లేదు. స్వతహాగా గాయని కూడా అయిన లీనా భర్త మరణం తర్వాత అతని సంగీతాన్ని,పాటల్ని,జ్ఞాపకాలను సజీవంగా ఉంచటానికే కృషి చేస్తోంది. ఆమెతో కిషోర్ కు సుమిత్ అనే కొడుకు కూడా ఉన్నాడు. ఇప్పుడు,లీనా,సుమిత్,అమిత్,అతని భార్య, కిషోర్ మొదటి భార్య,అమిత్ తల్లి రూమ గుహ అందరూ కలిసి ఒకే ఇంట్లో ఉంటున్నారు. అందరికీ కిషోర్ అంటే అమితమైన ప్రేమ,భక్తీ. ఇదీ కిషోర్ వైవాహిక,ప్రేమ జీవితం. అతను తప్పో,ఒప్పో నిర్ణయించే శక్తి నాకు లేదు. కానీ, ప్రేమలో,జేవితంలో అతను ఎదుర్కొన్న అనేకానేక సంఘటనలే అతని స్వరానికి అంతటి మహత్తర శక్తిని ఇచ్చాయని విశ్వసిస్తాను....
  • నిద్ర లేవగానే కాఫీ లేదా టీ తాగే అలవాటు ఉన్న వారికి  ఇది మంచి వార్త. పొద్దునే  పాల ప్యాకెట్ల కోసం బయటికి వెళ్లకుండా ..  పాలవాడి కోసం  ఎదురుచూడాల్సిన అవసరం ఎంతమాత్రం లేకుండా కొత్త రకం క్యాప్సూల్స్ మార్కెట్లోకి రాబోతున్నాయి.  టీ, కాఫీ డికాక్షన్లలో కరిగిపోయి  వాటి అనుభూతిని అందించే పాల క్యాప్సుల్స్ ను  శాస్త్రవేత్తలు  కనుగొన్నారు.  పంచదార గుళికలను ఏ విధంగా మనం టీ, కాఫీల్లో కలుపుతామో అలాగే ఈ పాల క్యాప్సుల్స్‌ను కూడా వాటిలో కలుపుకోవచ్చు.   ఈ క్యాప్సుల్స్‌వల్ల పాల ప్యాకెట్ల వినియోగం తగ్గిపోతుందని చాల తేలిగ్గానే క్షణాల్లో ఈ పానీయాలను అందుబాటులోకి తెచ్చుకోవచ్చని అంటున్నారు . ఈ క్యాప్సుల్స్‌లో ఘనీభవింపచేసిన పాలు ఉంటాయి.  షుగర్ క్యాప్సుల్ మాదిరిగానే ఇవి పనిచేస్తాయని అంటున్నారు. కొంచెం వేడిగా ఉండే ఏ ద్రవరూపంలోనే ఈ క్యాప్సుల్స్ కరిగిపోతాయని జర్మనీలోని మార్టిన్ లూథర్ యూనివర్శిటీకి చెందిన శాస్తవ్రేత్త మార్తవెర్నల్ అంటున్నారు . ఈ పాల క్యాప్సుల్స్‌ను తయారు చేయడం కూడా చాలా తేలికని ముందుగా పాలు దానికి అవసరమైన చక్కెర పరిమాణాన్ని నిర్ధారించుకోవాలని వాటినొక పరికరంలో ఉంచాలని చెప్పారు . ఈ వేడి చేసిన పాలు ఘనీభవించిన తరువాత, స్పటికాల రూపంలో ఏర్పడుతుందని, పంచదార, పాల ద్రావకం అందులో నిక్షిప్తమై ఉంటుందని తెలిపారు. మరి కొద్దీ రోజుల్లో ఈ క్యాప్సూల్స్ అందుబాటులోకి వస్తాయి. మరి వీటికి ఆదరణ ఎలా ఉంటుందో చూడాలి. గతం లో పాలపొడి అందుబాటులో కొచ్చింది. చిన్నపిల్లల పాల  కోసం  ఈ పొడిని ఎక్కువగా వినియోగిస్తున్నారు. కాఫీ లేదా టీ తయారీకి అంతగా ఉపయోగించరు.
  • పులస పేరు వినగానే ఎవరికైనా నోరూరుతుంది. ఆ పులస చేపలు  ప్రపంచంల్లో ఎక్కడా లేని విధంగా గోదావరి ఆనకట్ట దిగున ప్రాంతంలో మాత్రమే దొరుకుతాయి వీటికి ఉన్న డిమాండ్ అంతా ఇంతా కాదు. గోదావరిలో ఎర్ర నీరు ఉన్నడు మాత్రమే లభించే ఈ పలసల్ని వేటాడేందుకు మత్స్యకారులు పడే శ్రమ అంతాఇంతా కాదు. దూర ప్రాంతాలలోను, దేశవిదేశాల్లో ఉంటున్న బంధుమిత్రులకు, ఈ పులసకూరలోని  రుచి చూపించి అనంద పడుతుంటారు.  పులస శాస్త్రీయ నామం హిల్సా.  సముద్రంలో ఉన్నప్పుడు దీనిని ఇలస (విలస) అంటారు. గోదావరి ఎర్రనీరుకు ఎదురీదుతూ వచ్చినప్పుడు పులసగా మారుతుంది. దీని జన్మస్థానం గోదావరే. ఇక్కడ పుట్టిన పులస పిల్లలు ఆహారం కోసం బంగాళాఖాతంలోకి చేరి సముద్రంలోనే జీవిస్తాయి. బంగాళాఖాతం నుంచి హిందూ మహా సముద్రంలోకి చేరిన విలస ఎక్కువగా ఆస్ట్రేలియా, న్యూజిలాండ్‌ టాంజినాయా వంటి ప్రాంతాల్లో నివసిస్తుంది. వర్షాల సీజన్‌లో సంతానోత్పత్తి కోసం తిరిగి బంగాళాఖాతంలోకి వస్తుంది. నదీ, సముద్ర సంగమ ప్రాంతాల్లో సంతానోత్పత్తి కోసం ఎక్కువగా సంచరిస్తాయి. గోదావరికి వరద తాకగానే ఎర్రనీరుకు పులస ఎదురీదుతుంది. అలా ఎదురీదుతూ వచ్చే విలస... పులసగా మారుతోంది.   పశ్చిమగోదావరిజిల్లా నరసాపురం నుండి విశ్లేశ్వరం వరకు సంప్రదాయ వేట బొట్లు  తెల్లవారుజాము నుండి సందడి చేస్తుంటాయి. ఆ సందడుల్లో గాలిలో విచ్చుకుంటున్న వల కళ్ళు మూసి తెరిచేలోపే నీటిలోకి సర్రున దూసుకెళ్లి.. జలపుష్పాలల్లో రాజైన పులసల్ని బంధిస్తూ..మనకు చక్కటి పులసల్ని అందిస్తాయి.…అంతేకాక పులస పై సామెతలు కూడా బాగా వాడుకలో ఉన్నాయి.. పుస్తెలైనా అమ్మి పులసకూర తినాలన్న సామెత ఒకటి బాగా  ప్రాచుర్యంలో  ఉండటాన్ని గమనిస్తే..పులస కూర పై మనకున్న ఎనలేని అభిమానమనే చెప్పాలి.  ఇతర చేపల మాదిరిగా పులసకూర వండడం అంత సులువు కాదు..దీన్ని ప్రత్యేకమైన పొయ్యిలపై… వెన్న రాసిన మట్టి  కుండలో వండటం ఓ ప్రత్యేకత..ఇలా వండటం  వల్ల పులస ముక్కలో ఉన్న ముళ్లు కరిగి పోతాయి. తద్వారా పులస ముక్కను ఇట్టే తినేయచ్చు.. అయితే ఈ పులస కూరను ఈ రోజు వండి తిన్నదాని కంటే మరుసటి రోజు తింటే..చాలా రుచిగా ఉంటుంది.  అయితే..  దీనికి ఇంత రుచి ఉండటానికి కారణం…ఇలసగా పిలవబడే ఓ రకమైన చేప సముద్రంలో పెరుగుతుంది. ఈ చేప జూన్ మాసంలో కురిసే వర్షాల వల్ల.. గోదావరిలోకి ఎర్రనీరు చేరగానే..ఈ ఇలస.. గుడ్లు పెట్టడానికి ఉప్పనీటిలోంచి గోదావరి చప్పనీటికి ఎదురు ఈదుకుంటూ వచ్చే సందర్భంలో ఇలస శరీరంలో మార్పులు చోటుచేసుకొని..పులసగా మారుతుంది.. పశ్చిమ గోదావరి జిల్లాలోని నరసాపురం, చించినాడ, సిద్ధాంతం, విశ్లేశ్వరం , తూర్పుగోదావరిజిల్లాలోని అంతర్వేది, రావులపాలెం ధవళేశ్వరం ప్రాంతాలలో మాత్రమే పులసల అమ్మకాలు ఎక్కువగా సాగుతాయి. ఈ  పులసలు సైజును బట్టి ఒక్కో చేప ధర రెండు వేల నుండి ఆరు వేలరూపాయల వరకు పలుకుతుంటాయి.  అయితే సముద్ర జలాల్లో కాలుష్యం పెరుగుతున్న కారణంగా  పులస చేపలు గతం లో మాదిరిగా దొరకడం లేదు. భవిష్యత్తులో పులస మరీ అరుదుగా దొరికే చేప గా మారే ప్రమాదం ఉంది. 
  • నీటి వినియోగం శరీరానికి చాలామంచిది . అయితే  నీరు అసలు ఏసమయం లో ఎక్కువ తాగాలి ? ఎప్పుడు తాగకూడడో తెలుసుకోవాలి.  కొన్ని అధ్యయనాల ప్రకారం  మంచినీళ్లను ఖాళీ క‌డుపుతో ఉన్న‌ప్పుడు ఎక్కువ‌గా తాగాల‌ట‌. అయితే.. ఖాళీ క‌డుపు ఎప్పుడుంటుంది? అంటే ఉదయాన్నే నిద్ర లేచినపుడు  క‌డుపు ఖాళీ గా ఉంటుంది. అప్పుడు ఎక్కువ‌గా నీళ్లు తాగ‌డం వ‌ల్ల అనేక ఫ‌లితాలు ఉంటాయట‌. క‌డుపు ఖాళీగా ఉన్న‌ప్పుడు జీర్ణాశ‌యానికి రెస్ట్ దొరుకుతుంది. ఆ స‌మ‌యంలో జీర్ణాశ‌యంలో ఎటువంటి ర‌సాలు విడుద‌ల కావు. ఆ స‌మ‌యంలో నీళ్లు ఎక్కువ మోతాదులో తాగ‌డం వ‌ల్ల జీర్ణాశ‌యం మొత్తం శుభ్ర‌మ‌వ‌డ‌మే కాకుండా... ఆ నీళ్లు పేగుల‌ను కూడా క్లీన్ చేస్తాయ‌ట‌.  శరీర మెటబాలిక్ రేటు 24 శాతం పెరుగుతుంది. దీంతో క్యాలరీలు ఖర్చయ్యే రేటు పెరుగుతుంది. తద్వారా కొవ్వు కరిగి అధిక బరువు తగ్గుతారు.  శరీరంలో పేరుకుపోయిన వ్యర్థాలు బయటికి వెళ్లిపోతాయి. శరీరం అంతర్గతంగా శుభ్రంగా మారుతుంది.   జీర్ణ సమస్యలు పోతాయి. గ్యాస్, అసిడిటీ, అజీర్ణం బాధించవు. ప్రధానంగా మలబద్దకం సమస్య నుంచి బయట పడవచ్చు. విరేచనం సులభంగా అవుతుంది. ఆకలి పెరుగుతుంది. తలనొప్పి సమస్య నుంచి బయట పడవచ్చు.  ఇంకా  శరీరానికి అందే శక్తి పెరుగుతుంది. ఎర్ర రక్త కణాలు పెరిగి ఎక్కువ ఆక్సిజన్‌ను తీసుకుంటాయి. కనుక శరీరానికి ఎక్కువగా శక్తి అందుతుంది.  చర్మం కాంతివంతంగా మారుతుంది. చర్మ సమస్యలు పోతాయి.  జీర్ణాశయం, పేగుల్లో ఉండే చెడు బాక్టీరియా నశిస్తుంది. మంచి బాక్టీరియా పెరుగుతుంది. అందుకే  పెద్దలు నిద్ర లేవగానే మంచి నీళ్లు తాగమంటారు.  ఇక‌... చాలా మంది అన్నం తినేట‌ప్పుడు, తినే ముందు కూడా నీళ్లు తాగుతారు. అయితే... ఏదైనా ఆహారం తీసుకోవ‌డానికి ఒక అర్ధ‌గంట‌ ముందు నీళ్లు అస్స‌లు తాగ‌కూడ‌ద‌ట‌. ఎందుకంటే ఆక‌లేసే స‌మ‌యంలో జీర్ణాశ‌యంలో జ‌ఠ‌ర‌ర‌సాలు విడుదల  అవుతాయి. అప్పుడు నీళ్లు తాగితే ఆ ర‌సాలు నీళ్ల‌తో క‌లిసి పోతాయి. దాంతో  అల్స‌ర్, గ్యాస్ సంబంధిత స‌మ‌స్య‌లు వ‌చ్చే అవ‌కాశం ఉంటుంది. అందుకే.. అన్నం తిన‌డానికి అర్ధ‌గంట ముందు, అర్ధ‌గంట త‌ర్వాత, తినేట‌ప్పుడు కూడా నీళ్లు తాగ‌కూడ‌దంటారు పెద్ద‌లు.
  • ఇంతవరకు మనం సోలార్‌ లైట్లు, సోలార్‌ పంపుసెట్లు, సోలార్‌ వాహనాల గురించే విన్నాం. ఇపుడు    కొత్తగా  సోలార్‌ చికెన్‌ వెలుగులోకి వచ్చింది. థాయిలాండ్‌ లో సోలార్ పాపులర్ ఫుడ్ ఐటెం గా మారుతోంది .   ఎవరైనా చికెన్‌ను అగ్గి మీద కాలుస్తారు లేదా స్టవ్‌ మీద రెడీ చేస్తారు కానీ థాయిలాండ్‌లోని సిలా సుతారట్‌ అనే దుకాణాదారుడు మాత్రం  ఓవెన్‌ లేదా చార్‌కోల్‌ బార్బెక్యూ వాడేందుకు బదులుగా 1000 మొబైల్‌ మిర్రర్లను ఉపయోగించి  సూర్యుని నుంచి వచ్చే బలమైన కాంతిని ఆ అద్దాలపై పడేలా చేసి తద్వారా వచ్చే వేడితో చికెన్‌ను తయారు చేస్తున్నాడు. ఒకటిన్నర కేజీ  చికెన్‌ను 10–15 నిమిషాల్లో వండేస్తున్నాడు.  ఆ వేడిని తట్టుకునేందుకు ముఖానికి వెల్డింగ్‌ మాస్క్‌ను ధరిస్తాడు. మెల్లగా మెల్లగా ఇతగాడి బిజినెస్ పుంజుకుంటోంది. 
  • రాగులు తినండి …...వయసు తగ్గించుకోండి..రాగాలు తీయండి రుచులు మార్చుకున్నారు..డాలర్ల రేటు విపరీతంగా పెరిగింది అభిరుచులు మార్చుకున్నారు.అనారోగ్యానికి దగ్గరయ్యారు ఆఫీసులో కావచ్చు…వ్యాపార సంస్థల్లో కావచ్చు….లేదా టీవీ ముందు కావచ్చు. రోజుకు 14 గంటలపాటు కూర్చుని లేదా పడుకుని ఉంటున్నారు చాలామంది. అలాంటివారు గుండె జబ్బులు, ఇతర వ్యాధుల బారిన కూడా పడతారు. రాగులను రోజువారీ డైట్ లో చేర్చుకోవడం ద్వారా వృద్ధాప్య ఛాయలను దూరం చేసుకోవచ్చునని న్యూట్రీషియన్లు అంటున్నారు. మిల్లెట్ అనే  యాంటీ ఆక్సిడెంట్లు  రాగుల్లోపుష్కలంగా ఉంటాయి. అందువల్ల యాంటీ  ఏజింగ్ కు చెక్ పెడుతుంది. వయసు మీద పడినట్లు కనిపించనివ్వదని వారు సూచిస్తున్నారు. రాగుల్లో అమినోయాసిడ్స్ ఆకలిని తగ్గిస్తాయి. ఇంకా బరువును నియంత్రిస్తాయి. రాగిపిండితో తయారుచేసిన ఆహారాలు తీసుకోవడం వల్ల జీర్ణక్రియను నిదానం చేస్తుంది. అందుకే అదనపు క్యాలరీలను గ్రహించకుండా దూరంగా ఉంచుతుంది. రాగుల్లో ఉన్న ఫైబర్ వల్ల కడుపు నిండిన అనుభూతిని కలిగిస్తుంది. దాంతో అధికంగా ఆహారం తీసుకోవడాన్ని నియంత్రించుకోవచ్చు. ఇంకా రాగుల్లో క్యాల్షియం పుష్కలంగా ఉండటం వల్ల ఎముకలు బలంగా ఉండేందుకు సహాయపడుతుంది. రాగులు బలకర్ధకమైన ధాన్యం. దానిలోని కాల్షియం పిల్లల సక్రమ ఎదుగుదలకు తోడ్పడుతుంది. అమితపుష్టిని కలిగిస్తుంది.  రాగిపిండితో ఆరోగ్యానికి ఎంతో మేలు జరుగుతుంది.  జుట్టు ఎత్తుగానూ, పొడుగ్గానూ పెరుగుతుంది. రాగులలో అయోడిన్‌ పుష్కలంగా లభిస్తుంది. ఎదిగే పిల్లలకు పాలల్లో రాగులను వేయించి పొడిచేసిన పిండిని కలిపి త్రాగించినట్లయితే వారి ఎదుగుదల బాగుంటుంది.నడి వయసు మహిళ్లో ఎముకల పటుత్వం తగ్గుతూ ఉంటుంది. అందుకని మహిళలు ఎముకల పటుత్వానికి రాగులతో తయారుచేసిన రాగిమాల్ట్ ను తాగడం మంచిది. సాధారణంగా రాగులతో తయారుచేసిన ఆహారాలను తీసుకోవడం ద్వారా శరీరాన్ని నేచురల్ గానే సడలించడంలో సహాయపడుతుంది. ఇది ఆందోళన,వ్యాకులత,నిద్రలేమి పరిస్థితులను దూరంచేస్తుంది. రాగి మైగ్రేన్  సమస్యను నివారించడం కోసం కూడా ఉపయోగపడుతుందని ఆరోగ్యనిపుణులు అంటున్నారు. మధుమేహవ్యాధికి రాగులతో చేసిన ఆహారపదార్థాలు, రాగుల గంజి, పాలల్లో కలిపిన రాగుల పానీయం చక్కని ఔషధంగా పనిచేస్తుంది. రాగుల పిండితో తయారు చేసిన పదార్థాలను తరచుగా తిన్నట్లైతే వారికి నూతన శక్తి లభిస్తుంది. కడుపులో మంటను తగ్గించి, చలువ చేస్తుంది.  రాగుల పానీయం దప్పికను అరికడుతుంది. మహిళలు ఎముకల పటుత్వానికి రాగులతో తయారుచేసిన రాగి మాల్టును తాగడం మంచిది.  పాశం జగన్నాధం 
  • టెస్ట్ ట్యూబ్ బేబీ గురించి విన్నాం..కానీ టెస్ట్ ట్యూబ్ చికెన్ ఏంటీ అనుకుంటున్నారా ?  మీరు చదివింది నిజమే.త్వరలో టెస్ట్ ట్యూబ్ చికెన్ .. ఫుడ్ మెనూలోకి చేరబోతోంది. పరిశోధకులు ఆ దిశగా ప్రయత్నాలు చేస్తున్నారు. చికెన్ రెసిపీ నుంచి కణాలు తయారుచేసి టెస్ట్ ట్యూబ్ చికెన్ తయారుచేసేందుకు ప్లాన్ చేస్తున్నారు. టెల్ అవివ్ యూనివర్సిటీకి చెందిన ప్రొఫెసర్ అమిత్ గెఫెన్ ఇప్పటికే లాబొరేటరీలో చికెన్ కణాలతో ఈ ప్రయోగం చేస్తున్నాడు. మోడ్రన్ అగ్రికల్చర్ ద్వారా ఈ చికెన్ సెల్స్‌తో దీన్ని తయారుచేసేందు కూడా ప్లాన్ చేస్తున్నారట. రాబోయే నాలుగు సంవత్సరాలలో ఈ తరహా చికెన్ సూపర్ మార్కెట్లలోకి వస్తుంది. మొత్తం మీద లెక్కకు మించి జనాభా  పెరిగిపోతున్ననేపథ్యంలో  నాన్ వెజ్  రుచుల అవసరాలు తీర్చాలంటే ఇక  టెస్ట్ ట్యూబ్  ఫుడ్డే దిక్కు. టెస్ట్  ట్యూబ్ హాంబర్గర్స్  వరల్డ్ మార్కెట్లో ఆదరణ పొందిన క్రమంలో చికెన్ కు కూడా ఆదరణ లభిస్తుందని అంచనా వేస్తున్నారు.  ఒకసారి  టెస్ట్ ట్యూబ్ చికెన్ మార్కెట్లోకి  వచ్చిందంటే పౌల్ర్టీల దగ్గర,  చికెన్ షాపుల దగ్గర వెయిట్ చేసే  అవసరం ఉండబోదు. 
  • వెనక్కి తిరిగి చూడాలంటే మనిషి పూర్తిగా వెనక్కి తిరగాల్సిందే. అలా మనిషి కాకుండా తలను మాత్రమే తిప్పి చూడాలంటే 90 డిగ్రీల వరకు తలను తిప్పి చూడ వచ్చు. అంతకుమించి తిప్పడం ఎవరికి సాధ్యపడదు. కానీ కరాచీ నగరానికి చెందిన 14 ఏళ్ల ముహమ్మద్‌ సమీర్‌ తన తలను 180 డిగ్రీలు వెనక్కి తిప్పి చూస్తాడు . వెనక్కి తిరక్కుండానే తన తలను భుజాల  మీదుగా పూర్తిగా వెనక్కి తిప్పగలడు . ఈ అరుదైన విద్యను సమీర్‌ చాలా కష్టపడే నేర్చుకున్నారు. తండ్రి జబ్బున  పడడంతో సమీర్‌ తన అరుదైన విద్యను ఆసరాగా చేసుకొని జీవనోపాధి వెతుక్కున్నారు. డ్యాన్స్‌ కూడా నేర్చుకున్న సమీర్‌ 8 మంది సభ్యులుగల ‘డేంజరస్‌ బాయ్స్‌’ డ్యాన్స్‌ బృందంలో చేరారు. డ్యాన్స్‌కు తన తల తిప్పుడును జోడించడంతో ఈ బృందంలో అతడు ప్రత్యేక ఆకర్షణగా నిలుస్తున్నాడు .  వీడియో  చూడండి. ...
  • సరిగ్గా 70  ఏళ్ళ క్రితం మెక్సికోలోని రోస్‌వెల్‌ ప్రాంతంలో ఓ భారీ పేలుడు సంభవించింది. భారీ బెలూన్‌ వల్ల ఆ ప్రమాదం చోటు చేసుకుందని అప్పట్లో అమెరికా బలగాలు చెప్పాయి. అయితే  అది ఒక ప్లైయింగ్‌ సాసర్‌ అని ... అది పేలిపోయి నేలపై పడిందని  కొందరు అన్నారు . మరో వైపు  అది ఏలియన్‌ల అంతరిక్ష నౌక  అని    అప్పట్లోనే ప్రచారం జరిగింది. అలాగే  రష్యా అణుబాంబు పరీక్ష వివరాలు తెలుసుకునేందుకు సీక్రెట్‌గా ఏర్పాటుచేసిన ప్రయోగంలో ఆ బెలూన్‌ పేలిపోయిందంటూ మరికొన్ని  కథనాలు వినిపించాయి. కాల క్రమంలో అవి తెర మరుగున పడ్డాయి. వాటి గురించి అందరూ మర్చిపోయారు.   అయితే   అదే అంశం గురించి  ఓ సంచలనాత్మక వీడియో తాజాగా వెలుగులోకి వచ్చింది. ఆ పేలుడు సంభవించిన సమయంలో అక్కడికి చేరుకున్న యూఎస్‌ బలగాలు ఓ స్ట్రెచర్‌పై ఏలియన్‌ బాడీని తీసుకెళుతున్నట్లుగా  అందులో ఉంది. యూఎఫ్‌ఓ స్పేస్‌ షిప్‌ అక్కడే కూలిపోయిందని దాంతో అందులోని ఏలియన్‌ గాయపడిందని, దానిని స్ట్రెచర్‌పై స్వయంగా తరలించారని ఆ వీడియో చూస్తే తెలుస్తోంది. తాజాగా యూట్యూబ్‌లో దీనికి సంబంధించిన వీడియోను పోస్ట్‌ చేశారు. రోస్ వెల్ ఘటనపై పలు కథనాలు పుట్టుకొచ్చినప్పటికీ ఇప్పటికీ చాలా మంది  ఆరోజు ప్లైయింగ్‌ సాసర్‌ పేలిపోయిందని నమ్ముతున్నారు. ఈ వీడియో  మరెన్ని కథనాలను వెలుగులోకి తెస్తుందో చూడాలి.  మీరు కూడా వీడియో చూడండి. ...
  • ( Aravind Arya Pakide) .... తెలంగాణలోని అతి పురాతన ఆలయాల్లో ఏకవీర  ఎల్లమ్మ దేవాలయం ఒకటి. కాకతీయుల కులదైవంగా భావించే  ఏకవీర ఎల్లమ్మకు  అప్పట్లో  నిత్యం పూజలు జరిగేవి.  చరిత్రకారుల లెక్కల ప్రకారం ఈ ఆలయాన్ని దాదాపు 1,100 ఏళ్ల కిందట నిర్మించారు. రాణీ రుద్రమ దేవి తన నివాసం నుంచి ఖిల్లా వరంగల్ సొరంగ మార్గం ద్వారా  ఈ ఆలయానికి  చేరుకునేదట. ఇక్కడ  ఎల్లమ్మకు మొగిలి పూలతో పూజలు చేసేదట. కాకతీయుల పతనం తర్వాత ఈ ఆలయం నిర్లక్ష్యానికి గురైంది. అందులోని మూలవిరాట్టును ఎవరో ఎత్తుకుపోయారు. మూల విరాట్టు లేక, పూజలు నిలిచిపోవటంతో భక్తుల రాక ఆగిపోయింది. చివరికి ఆలయం శిథిలావస్థకు చేరింది.  అద్భుత శిల్పసంపదతో కూడిన స్థంభాలు పక్కకు ఒరిగిపోయాయి.  ఇందులో మూలవిరాట్టు లేకపోవటంతో  ఈ ఆలయాన్ని పట్టించుకునే వారు కరువయ్యారు.   ఇక ఈ ఆలయ సమీపంలోని రాళ్లలో తొలిచిన జైన గుహలు చూపరులను ఆకట్టుకుంటాయి. పెద్ద రాతి గుండ్లను తొలిచి గుహలుగా మలిచారు. అప్పట్లో ఈ ప్రాంతంలో జైనమత ప్రాబల్యం ఉండటంతో వరంగల్‌ పద్మాక్షి గుట్ట, అగ్గలయ్య గుట్ట, చుట్టుపక్కల ప్రాంతాల్లో జైనుల ఆవాసాలు ఏర్పడ్డాయి. వారి విద్యాలయాలు కొనసాగాయి. ఆ క్రమంలోనే జైన మునులు ధ్యానం చేసుకునేందుకు ఇలాంటి గుహలు ఏర్పాటు చేశారని  అంటారు.  ఏకవీర ఆలయం సమీపంలో ఇలాంటి మూడు గుహలు ఇప్పటికీ ఉన్నాయి. ఈ ప్రాంతమంతా ప్రస్తుతం  చెట్లు, పొదల మధ్య చిక్కుకుపోయింది.  ప్రస్తుతం ఈ ఆలయానికి వెళ్లేందుకు దారి కూడా లేదు. కాగా  కాకతీయులు  ఏకవీర ఎల్లమ్మను కొలిచినట్లు పూర్వీకుల ద్వారా  తెలుస్తున్నప్పటికీ  దానికి సంబంధించి శాసనాలు, ఆధారాలేమీ లభించలేదు. ఇక మొగిలిచెర్ల ఊరు అసలు పేరు మొగిలి చెరువుల అని.. అక్కడి చెరువుల్లో విస్తృతంగా మొగిలిపూల వనం ఉండటంతో ఆ పేరొచ్చిందని చెప్పే శాసనాలు మాత్రం లభించినట్టు పురావస్తుశాఖ అధికారులు చెబుతున్నారు. వాటిల్లో ఈ దేవాలయం ప్రస్తావన కొద్దిగానే ఉందని, ఏకవీర ఎల్లమ్మ ప్రస్తావనేదీ లేదని పేర్కొంటున్నారు. ఇదిలా ఉంటే .. మరో కథనం ప్రకారం  ఎల్లమ్మ దేవత రేణుక దేవి ప్రతిరూపం. అందుకే ఆమెను జానపదులు రేణుక ఎల్లమ్మ అని వ్యవహరిస్తారు. కాకతీయ సామ్రాజ్య కాలం నాటి ఓరుగల్లు పట్టణంలో ఎల్లమ్మకు మౌఖిక సంప్రదాయంలో ఎక్కువ ప్రాచుర్యం ఉంది. వరంగల్‌ జిల్లాలో కొందరు  ఏకవీర దేవతను తమ కులదైవంగా కొలుస్తారు. ఎల్లమ్మ దేవాలయం ఆదిలాబాద్‌ జిల్లాలోని మాహురంలో ఉంది. అక్కడ ఈమెను మాహురమ్మ అని పిలుస్తారు. రాయలసీమలో నంగమ్మ దేవత అని, తమిళనాడులో మేమలమ్మ అని అంటారు. తెలంగాణలోని అతి పురాతన ఆలయాల్లో ఈ ఏకవీర  ఎల్లమ్మ ఆలయం  ఒకటి కావడంతో దీనిని పునరుద్ధరించాలని రాష్ట్ర ప్రభుత్వం నిర్ణయించింది. వరంగల్‌ శివార్లలోని మొగిలిచెర్ల గ్రామంలో ఉన్న ఈ ఏకవీర ఆలయాన్ని పునరుద్ధరించాలని రాష్ట్ర పర్యాటకాభివృద్ధి సంస్థ చైర్మన్‌ పేర్వారం రాములు ఇటీవలే ముఖ్యమంత్రి చంద్రశేఖర్‌రావుకు ప్రతిపాదించగా.. సీఎం సానుకూలంగా స్పందించారు. పర్యాటకాభివృద్ధి సంస్థ, పురావస్తు శాఖల ఆధ్వర్యంలో పునరుద్ధరణ పనులు చేపట్టాలని నిర్ణయించారు. దీంతో ఈ ఆలయానికి మహర్దశ పట్టనుంది....
  • హైపర్ లూప్ రైళ్లు  ఏపీ లో వచ్చే అవకాశాలు ఉన్నాయి.   హైస్పీడ్‌ రైళ్లు, బుల్లెట్‌ ట్రైన్ల కంటే వేగవంతమైన, కాలుష్యరహిత, చౌక ప్రయాణం హైపర్‌ లూప్‌తో సాధ్యమవుతుంది. ఈ కారణంతోనే ఇపుడు అన్ని దేశాలు ఈ ప్రాజెక్టుపై ఆసక్తి చూపుతున్నాయి.  దుబాయ్‌ ఏకంగా 100 కిలోమీటర్ల మేర హైపర్‌ లూప్‌ను ఏర్పాటు చేసుకోవటానికి హైపర్‌ లూప్‌ సంస్థతో ఒప్పందం కుదుర్చుకుంది. ఈ క్రమంలోఏపీ సర్కార్ కూడా   ఈ ప్రాజెక్టుపై ఆసక్తి చూపించటంతోపాటు ప్రాజెక్టు సాధ్యాసాధ్యాలను పరిశీలించే బాధ్యతను అమరావతి మెట్రో రైల్‌ కార్పొరేషన్‌కి అప్పగించింది.ఈ ప్రాజెక్ట్ పై ఇపుడు చర్చలు జరుగుతున్నాయి. అమెరికాలోని లాస్‌ ఏంజిల్స్‌ కేంద్రంగా 2014 నుంచి హైపర్‌లూప్‌ సంస్థ పనిచేస్తోంది. హైపర్‌లూప్‌లు విద్యుత్‌ చోదక శక్తితో పనిచేస్తాయి. హైపర్‌ లూప్‌ కోచ్‌లు ప్రయాణించేందుకు భూగర్భంలో కానీ.. భూమిపై పిల్లర్ల మీద కానీ ప్రత్యేక మార్గాన్ని ఏర్పాటు చేస్తారు. అందులో భాగంగా ఆరు మీటర్ల వెడల్పుతో కూడిన భారీ ట్యూబును హైపర్‌ లూప్  కారిడార్‌ పొడవునా నిర్మిస్తారు. ఈ ట్యూబ్‌లో హైపర్‌లూప్‌ కోచ్‌లు నడుస్తాయి. విద్యుత్‌ శక్తితోపాటు ట్యూబ్‌ లోపల ఏర్పాటు చేసే మాగ్నటిక్‌ లెవిటేషన్‌, ఏరో డైనమిక్‌ ట్రాక్‌ వ్యవస్థ వల్ల ఈ కోచ్‌ ఎటూ పడిపోకుండా గంటకు 300 కిలోమీటర్ల నుంచి 1200 కిలోమీటర్ల వేగంతో దూసుకుపోతుంది. ఒక్కో కోచ్‌లో 50 మంది వరకు ప్రయాణించవచ్చు. పాసింజర్‌ కోచ్‌లతోపాటు సరుకు రవాణా కోచ్‌లు కూడా ఉంటాయి.   అన్ని ఒకే అయితే  విజయవాడ నుంచి అమరావతికి అక్కడి నుంచి హైదరాబాద్‌కు, అమరావతి నుంచి విజయవాడ మీదుగా విశాఖపట్నంకు, విజయవాడ నుంచి అమరావతి మీదుగా బెంగళూరుకు, విజయవాడ నుంచి అమరావతి మీదుగా చెన్నైకు నాలుగు మెగా కారిడార్లు   ఏర్పాటు కావచ్చు. అలా  ఏర్పాటు చేసే అవకాశాలపై  చర్చలు జరుగుతున్నాయి. వీటితోపాటు విజయవాడ - అమరావతి - గుంటూరు - తెనాలి నడుమ ఇంతకు ముందు ప్రతిపాదించిన హైస్పీడ్‌ ట్రైన్‌ స్థానంలో హైపర్‌లూప్‌ ఏర్పాటుకు ఉన్న సాధ్యాసాధ్యాలనూ కూడా పరిశీలిస్తున్నారు. ఇక కేంద్ర ప్రభుత్వం కూడా భారత్ లో హైపర్ లూప్ రైళ్లను ప్రవేశపెట్టే యోచనలో ఉంది. వీడియో చూడండి. ...
  • టెక్నాలజీ ని  ఉపయోగించి  దేశాల నడుమ , ఖండాల మధ్య దూరాన్ని తగ్గించే ప్రయోగాలు జరుగుతున్నాయి. ఈ ప్రయోగాలు ఫలించి   రాకెట్ ఆధారిత  రవాణా వ్యవస్థ అందుబాటులో కొస్తే దేశాలమధ్య సరుకు రవాణాతో పాటు ...మనుష్యుల  ప్రయాణం కూడా సులభతరమవుతుంది.  పొద్దునే బ్రేక్ ఫాస్ట్ ఒక దేశంలో లంచ్ మరో ఖండం లో రాత్రి నిద్ర మరో దేశం లో చేయ వచ్చు. అలాంటి రోజులు రాబోతున్నాయి. వచ్చే ఐదేండ్లలో ఏ దేశానికైనా అరగంటలో చేరుకునే విధంగా రాకెట్ల ద్వారా ప్రయాణ సదుపాయం కల్పిస్తామని గ్రహాంతర, భవిష్యత్ రవాణాసంస్థ స్పేస్ ఎక్స్ వ్యవస్థాపకుడు ఎలాన్ మస్క్ వెల్లడించారు. అడిలైడ్‌లో జరిగిన అంతర్జాతీయ అంతరిక్ష వార్షిక మహాసభల ప్రారంభసభలో తమ సంస్థ భవిష్యత్ ప్రణాళికల గురించి ఆయన వివరించారు. గ్రహాంతర ప్రయాణాలకు అనువైన బీఎఫ్‌ఆర్‌ అనే రాకెట్ నిర్మాణాన్ని ప్రారంభించామని, ఆరు నుంచి తొమ్మిది నెలల్లో దీనిని పూర్తి చేస్తామని పేర్కొన్నారు. 2022 నాటికి తాము కనీసం రెండు అంతరిక్ష సరుకు రవాణానౌకలను అరుణ గ్రహానికి పంపిస్తామని చెప్పారు. భవిష్యత్ ప్రయోగాలకు అవసరమయ్యే విధంగా 2024 నాటికి ఆ గ్రహంపై తగిన వ్యవస్థలను ఏర్పాటు చేస్తామని, మానవులను, వారికి అవసరమైన నీరు, పరికరాలు ఇతర సామాగ్రి తీసుకెళ్లడానికి 2024 నాటికి నాలుగు అంతరిక్షనౌకలను పంపిస్తామని వెల్తడించారు. భూగ్రహంపై ప్రజల రవాణా కోసం కూడా రాకెట్లను వినియోగిస్తామని, ప్రధాన నగరాల్లో ఉన్నవారిని ఇతర దేశాలకు అరగంటలోగానే చేరుస్తామని మస్క్ తెలిపారు. ఉదాహరణకు తమ రాకెట్ షిప్‌ల ద్వారా జపాన్‌లోని టోక్యో నుంచి ఇండియాలోని ఢిల్లీకి 30 నిమిషాల్లో వెళ్లవచ్చునన్నారు. ఎలాన్ మస్క్ చెబుతున్నట్టు రాకెట్ నిర్మాణం పూర్తి ... రవాణా వ్యవస్థ మొదలు అయితే ఇక పర్యాటక రంగానికి మహర్దశ పడుతుందని అని చెప్పుకోవచ్చు. ...
  • (Vasireddy Venugopal)  ఆది దేవత, అనాది దేవత, ప్రపంచ ప్రజల ఆరాధ్య దేవత... లజ్జ గౌరి .... ప్రపంచంలో అన్ని సమాజాల్లోనూ ప్రజల ఆరాధనలు అందుకున్న ఈ దేవత విగ్రహాన్ని మొన్నీ మధ్య కర్నాటకలోని చాళుక్య రాజధాని నగరం బాదామిలో, పురావస్తు శాఖ మ్యూజియంలో దర్శించి తరించాను. ఈ విగ్రహాన్ని బీజాపూర్ జిల్లా నాగనాథకోలా లోని నాగనాధ ఆలయం నుంచి సేకరించారు. చాళుక్యులు పరిపాలించిన మహబూబ్ నగర్ జిల్లా ఆలంపూర్ లోనూ ఈ విగ్రహం కనిపిస్తుంది. కర్నూలు జిల్లా కూడలి సంగమేశ్వర ఆలయం నుంచి సేకరించినది. ప్రపంచంలో ప్రతి సమాజంలోనూ ఇలాంటి దేవతా విగ్రహం వుండడం, ఇదే భంగిమలో వుండడం చాలా అరుదైన, ఆశ్చర్యం కలిగించే అంశం. క్రీస్తు పూర్వం చాలా శతాబ్దాలనుంచి కూడా లజ్జ గౌరిని ప్రజలు ఆరాధిస్తూ వచ్చారు. సంతానాన్ని ఇచ్చే దేవతగా లజ్జ గౌరిని కొలుస్తారు. హరప్పా, మొహంజదారో నాగరికతల్లో ఈ విగ్రహారాధన వుంది. అంతకు ముందూ వుంది. ఆస్ట్రేలియా, ఇజ్రాయెల్, ఉక్రెయిన్, మొరాకో.. ఇలా అనేక చోట్ల ఇలాంటి విగ్రహాలు బయటపడ్డాయి. గుహల్లో చిత్రించిన బొమ్మల్లోనూ ఈ విగ్రహాలు వున్నాయి. భారతదేశంలో ప్రతి రాష్ట్రంలోనూ లజ్జ గౌరి ఆరాధన ఆచారం వుంది. భారతదేశంలో క్రీస్తు శకం ఆరునుంచి పన్నెండో శతాబ్దం వరకూ లజ్జ గౌరి ఆరాధన పతాక స్థాయిలో వున్నట్టు చారిత్రక ఆధారాలు చెబుతున్నాయి. ముస్లిం దండయాత్రల తర్వాత.. విగ్రహారాధనను.. ముఖ్యంగా స్త్రీ విగ్రహారాధనను, అందునా నగ్నంగా వున్న స్త్రీ విగ్రహారాధనను నాటి పాలకులు నిరుత్సాహ పరిచారని తెలుస్తోంది. తర్వాత బ్రిటిష్ హయాంలో... నగ్న దేవతను ఆరాధించడం అనాగరిక, అశ్లీల చర్యగా పరిగణించారు. కాలక్రమంలో లజ్జ గౌరి ఆరాధన, ఆరాధకుల సంఖ్య తగ్గిపోయి వుండవచ్చు కానీ... పూర్తిగా ఏమీ మాసిపోలేదు.  లజ్జ గౌరికి సంబంధించిన ప్రస్తావన తొలుత మనకు కనిపించేది రుగ్వేదంలో... అదితి పేరిట. అదితి అంటే ఆదిశక్తి. In the first age of the gods, existence was born from non-existence. The quarters of the sky were born from Her who crouched with legs spread. The earth was born from Her who crouched with legs spread, And from the earth the quarters of the sky were born. Rig Veda, 10.72.3-4 .... .... Aditi is the sky Aditi is the air Aditi is all gods ... Aditi is the Mother, the Father, and Son Aditi is whatever shall be born. Rig Veda, I.89.10 విగ్రహ భంగిమను ప్రసవిస్తున్న స్త్రీ గా పరిగణిస్తారు. ఈ భంగిమను పలువురు చరిత్రకారులు పలు విధాలుగా నిర్వచించారు. ఎన్ని నిర్వచనాలు వున్నా... స్థూలంగా వాటి సారం ఒకటే. సంతానాన్ని, సంపదను, ధనధాన్యాదులను ప్రసాదించే శుభకర దేవత అని. ఈ దేవతను భారతదేశంలో రేణుక, మాతంగి, యల్లమ్మ అని కూడా పిలుచుకుంటారు. ఏ పేరుతో పిలుచుకున్నా... పార్వతీదేవి ప్రతిరూపంగానే కొలుచుకుంటారు. లజ్జ గౌరికి సంబంధించి మరో ఆసక్తికర కథ కూడా ప్రచారంలో వుంది. నిమ్న కులానికి చెందిన రేణుక తలను అగ్రకులస్థుడొకడు నరికివేశాడు. అయితే రేణుక చనిపోలేదు. తల స్థానంలో కమలాన్ని మొలిపించుకొని జీవించింది, దేవత అయింది. లజ్జ గౌరి విగ్రహానికి తల వుండదు. తల స్థానంలో.. పరిపూర్ణంగా వికసించిన కమలం వుంటుంది. చేతిలో కమలం/తామర తూడులు వుంటాయి. ఆభరణాలు ధరించి వుంటుంది. వికసిత కమలం శక్తికి సంకేతం. మనిషి శరీరంలోని ఏడు శక్తి కేంద్రాలు.. సహస్రార చక్రం ఉద్దీపనకు వికసిత కమలం సంకేతం....
  • హిందువుల పవిత్ర దేవాలయం వైష్ణో దేవి ఆలయం  కాట్రా  లోని త్రికూట పర్వతాల పై సుమారు 1700 అడుగుల ఎత్తున ఉంది.  కాట్రా  పట్టణానికి జమ్మూ సుమారు 46 కి.మీ. ల దూరం లో వుంటుంది.  ఈ ఆలయం ఒక గుహలో ఉంటుంది . త్రికూట పర్వత గుహలో ఉన్న  వైష్ణో దేవి   ఆలయం ఎన్ని ఏళ్ళు క్రితందో ఆధారాలు లేవు. భూగర్భ శాస్త్రవేత్తల పరిశోధనలో ఈ ఆలయం వున్న గుహ ఒక మిలియన్ సంవత్సరాల పూర్వంనుంచి వున్నదని కనుగొన్నారు. ప్రప్రధమంగా పాండవులకాలంలోనే ఇక్కడ శక్తి పూజలు ప్రారంభం అయ్యాయని అంటారు.  ఈ గుహ సుమారు 30 మీ. ల పొడవు, 1.5 మీ. ల ఎత్తు వుంటుంది. స్థానికుల కధనం మేరకు ఈ గుహలో అమ్మవారు కొంత కాలం  దాగి  ఒక రాక్షసుడిని ఆ తర్వాత వధించిందని  చెబుతారు.  ఈ క్షేత్ర ప్రధాన ఆకర్షణ  వైష్ణో దేవి మూడు రూపాలు. అవి జనన మరణాలు ప్రసాదించే మహాకాళి, జ్ఞానాన్ని ఇచ్చే మహాసరస్వతి, ఐశ్వర్యాన్ని, అదృష్టాన్ని ఇచ్చే మహాలక్ష్మి . ఈ గుడి ని శ్రీ మాతా వైష్ణో దేవి దేవాలయ బోర్డు నిర్వహిస్తుంటూ వుంటుంది. ప్రతి సంవత్సరం, సుమారు 8 మిలియన్ల భక్తులు దేశ వ్యాప్తంగా వైష్ణో దేవి ని సందర్శిస్తారు.  వైష్ణోదేవిని చూడాలనుకునేవారు ఈ ప్రదేశానికి కొంత కాలినడక ప్రయాణం చేయాల్సివుంటుంది. సంవత్సరం పొడుగునా అశేష సంఖ్యలో వస్తుంటారు.  ఆ దేవిని దర్శించినవరెవరూ తమ కోరికలు తీరకుండా రిక్త హస్తాలతో వెను తిరగరని భక్తుల ప్రగాఢ విశ్వాసం. పర్యాటకుల సంఖ్య ఎక్కువగా ఉండటం తో  వైష్ణోదేవి క్షేత్రానికి రోజుకు 50 వేల మందికి మాత్రమే అనుమతించాలని జాతీయ హరిత ట్రైబ్యునల్‌(ఎన్‌జీటీ)  ఆదేశాలిచ్చింది. ఈనెల 24 నుంచి కొత్త మార్గం ప్రారంభమవుతుండగా..  అందులో పాదచారులకు, బ్యాటరీ కార్లకు మాత్రమే అనుమతించాలని స్పష్టం చేసింది.రహదారులపై చెత్తను పడవేసేవారికి రూ. 2 వేల జరిమానా విధించాలని - ఛైర్‌పర్సన్‌ జస్టిస్‌ స్వతంతర్‌ కుమార్‌ నేతృత్వంలో ఎన్‌జీటీ ధర్మాసనం నిర్దేశించింది.  ప్రభుత్వం ఈ ఆదేశాలను పాటిస్తే ప్రమాదాలు తగ్గుతాయి. పర్యావరణం కూడా భేషుగ్గా ఉంటుంది.  వీడియో చూడండి. 
  • నాగార్జున సాగర్  నుంచి   శ్రీశైలం వరకు బోట్ షికారు చేయాలని ఉందా ? పచ్చని ప్రకృతి సోయగాలు.. కనుచూపు మేర అందమైన కొండలు.. జాలువారే జలపాతాలు.. సుందరమైన, అహ్లాదకర ప్రదేశాలు.. చిక్కని చెట్ల మధ్య సూర్యాస్తమయం... సంగీతాన్ని మైమరిపించే నీటి గలగలలు  మధ్య కృష్ణమ్మ ప్రవాహం.. అందునా లాంచీ ప్రయాణం.. వింటేనే మనసు పులకరించిపోతుంది కదూ.. పాపికొండలను తలదన్నే రీతిలో సాగర్‌ నుంచి శ్రీశైలం లాంచీ ప్రయాణాన్ని పర్యాటకులకు అందించడానికి తెలంగాణ పర్యాటక శాఖ శ్రీకారం చుట్టింది.  ఈ లాంచీ ప్రయాణం 110 కిలోమీటర్ల దూరం. నల్లమల అటవీ ప్రాంతంలో ఎత్తైన కొండల నడుమ, నిర్మలమైన కృష్ణమ్మ ఒడిలో, దాదాపు 20మలుపులు తిరుగుతూ పక్షుల కిలకిలలు, జలపాతాల గలగలలు, వందలాది మీటర్ల ఎత్తెన పచ్చటి గట్ల నడుమ, కృష్ణమ్మ ఒడిలో తమ జీవనాన్ని వెళ్లదీసుకునే మత్స్యకారుల వేట మధ్య నుంచి 5 గంటల పాటు  లాంచీ ప్రయాణం సాగుతుంది. యాత్రలోభాగంగా శ్రీశైల మల్లికార్జునస్వామి, భ్రమరాంబాదేవి దర్శన భాగ్యాన్ని కల్పించనున్నారు. సాధారణంగా నీటిపై ప్రయాణం అనగానే ప్రతి ఒక్కరికి గుర్తుకు వచ్చేది పాపికొండల పర్యటన. కానీ, ఆ టూర్‌ని మైమరిపించే రీతిలో తెలంగాణ లాంచీ ప్రయాణం సాగర్‌ నుంచి శ్రీశైలానికి ఐదు గంటలపాటు నడుస్తుంది. నాగార్జునసాగర్‌ లాంచీస్టేషన్‌ నుంచి నాగార్జునకొండ, దిండి ప్రాజెక్టు, జెండాపెంట, నక్కంటివాగు, పావురాలప్లేట్‌, ఎస్‌ టర్నింగ్‌, ఖయ్యాం, ఆలాటం, ఇనుపరాయకొండ, వజ్రాలమడుగు, సపోర్ట్‌డ్యాం మీదుగా లాంచి లింగాలగట్టుకు చేరుకుంటుంది.  నవంబర్ 1 నుంచి  లాంచీ సర్వీసులు మొదలవుతాయి. నాగార్జునసాగర్‌ నుంచి శ్రీశైలానికి లాంచీ ప్రయాణం 3000  మాత్రమే ... అదే హైదరాబాద్ నుంచి అయితే  3800 ఉంటుంది. వివరాలకు తెలంగాణా పర్యాటక శాఖను సంప్రదించండి.   phone no....    9848540371... 9848126947
  • సాంకేతికపరంగా ఎంతో అభివృద్ధిని సాధించామని గొప్పలు చెప్పుకుంటున్న  మనకు ఈనాటికి జవాబులు దొరకని చిక్కు ప్రశ్నలు, మిస్టరీలు  ఎన్నో ఉన్నాయి .  ఎన్నో వేల ఏళ్ళ క్రితం  నిర్మించిన ఆలయాలు  ఈ నాటికి  సైంటిఫిక్ గా తేల్చలేని ఎన్నో రహస్యాలను కలిగి ఉన్నాయి.   వాటిలో ఒకటి...  బుద్ధ నీలకంఠ ఆలయం....  ఈ పేరు విని ఇదేదో బుద్ధుని ఆలయం అనుకుంటే పొరపాటే. అది సాక్షాత్తూ శ్రీ మహా విష్ణు ఆలయం. మరి బుద్ధ నీలకంఠ అనగా పురాతన నీలపు రంగు కలిగిన విగ్రహమూర్తి అని అర్ధం. ఇది నేపాల్ లో వుంది.ఈ ఆలయంలోని శ్రీ మహా విష్ణువు ఆదిశేషునిపైన శయనించివున్న మూర్తిగా మనకు దర్శనం ఇస్తాడు.ఇక ఈ విగ్రహ మూర్తి 5మీటర్ల పొడవు వుంటుంది.  సహజంగా విష్ణుమూర్తి మనకు శయన మూర్తిగా దర్శనం ఇస్తాడు. కానీ ఇక్కడ మాత్రం వెల్లకిలాపడుకుని యోగ నిద్రలో ఉన్నట్టు దర్శనమిస్తాడు.  స్వామి. మరో ప్రత్యేకత ఏమిటంటే  ఈ  భారీవిగ్రహం నీటిలో తే లుతూ వుంటుంది.  భక్తులతోపాటు వైజ్ఞానిక వేత్తలు, పరిశోధకులకు  విశేషంగా ఆకట్టుకున్న ఈ విగ్రహం దాదాపు 1300 సం ల ముందునుండే  నీటిలో తేలియాడుతూ  ఉందట.   ఈ విశేషాలు గురించి మరింత తెలుసుకోవాలంటే  ఈ వీడియో  చూడండి. 
  • ( Aravind Arya Pakide )  చుట్టూ పచ్చని చెట్లు.. ఎత్తైన కొండలు.. ప్రకృతి ఒడిలో కొండల మీద సహజసిద్ధంగా పుట్టిన జలపాతాలు. అవే రాయికల్ గ్రామ సరిహద్దులోని జలపాతాలు .  మన పక్కనే ఉన్నా , మనం గుర్తించని అద్భుత అందాలు. కన్ను ఆర్పకుండా చూసే ఆ నీటిసిరుల అందం ఈ జలపాతాల సొంతం.  కరీంనగర్ జిల్లా సైదాపురం మండలంలోని రాయికల్ అనే గ్రామానికి సుమారు 3 కిలోమీటర్ల దూరంలో ఉన్న జలపాతాలు ఇవి.  వరంగల్ జిల్లా కేంద్రానికి 43 కిలోమీటర్ల దూరంలో వరంగల్ అర్బన్ కరీంనగర్ జిల్లాల సరిహద్దుల్లో సైదాపురం అటవీ ప్రాంతంలో ఈ జలపాతం ఉంది . ఇంతకాలం బాహ్య ప్రపంచానికి తెలియకుండా ఉంది ఈ అత్యద్భుత జలపాతం. జలపాతాన్ని చేరుకోగానే చుట్టుప్రక్కల ఆవరించి ఉన్న దట్టమైన అడవులను , చెరువు ను , ప్రకృతి సౌందర్యాన్ని చూసి పరవశించవచ్చు, ఆస్వాదించొచ్చు. ఆనందాన్ని సొంతం చేసుకోవచ్చు. దట్టమైన పచ్చని అడవుల మధ్య కొండకోనల నుంచి హోరెత్తే నీటి హొయల నిండైన జలపాతం ఇది. ప్రకృతి సృష్టించిన అద్భుతమైన అందాల్లో ఇది ఒకటి. ప్రచారానికి దూరంగా, కేవలం స్థానికులే సేదతీరే ప్రాంతంగా ఈ జలపాతం ఇన్ని రోజులు మిగిలిపోయింది.  చుట్టూ పచ్చని చెట్లు, ప్రకృతి రమణీయత మధ్య ఎత్తైన కొండల నుంచి జాలువారే జలపాతాలు ముఖ్యంగా వర్షాకాలంలో పర్యాటకుల్ని విశేషంగా ఆకట్టుకుంటున్నాయి. చుట్టూ కొండలు.. జలపాత సవ్వళ్లు. ఇవి తప్ప మరో శబ్దం వినిపించే అవకాశం లేదక్కడ. 170 అడుగుల ఎత్తు నుండి స్వచ్ఛమైన నీటి ప్రవాహంతో.. పరవళ్లు తొక్కుతూ జలపాతం కిందికి దూకుతుంటుంది  5 అంచెలలో సహజ సిద్ధమైన జలపాతాలను కలిగిన ఈ సుందర ప్రదేశం,  పర్యాటకులకు , ప్రకృతి ప్రేమికులకు మధురానుభూతిని పంచుతూ.. ఎనలేని ప్రకృతి సౌందర్యాన్ని తనలో నిక్షిప్తం చేసుకుని మళ్లీ మళ్లీ రారమ్మని ఆహ్వానిస్తున్నట్లుగా ఉంటుంది. ఇటీవల కురిసిన భారీ వర్షాలకు ఉదృతంగా జలపాతం ప్రవహిస్తూ ఉంది . సాగిపోతున్న కొండకోనల మధ్య పచ్చని ప్రకృతి ప్రాంతమే ఇది. ప్రకృతి రమణీయతకు అద్దంపట్టే ఈ అందమైన దీనికి ఎగువన, దిగువన జలపాతాల హోరు నిరంతరాయంగా వినిపిస్తుంటుంది. ఈ జలపాతాల నీరు తూర్పు దిక్కుగా ప్రవహిస్తుంటుంది. ఎత్తైన పర్వతశ్రేణిలో ఉండే ఈ జలపాతాన్ని చేరాలంటే కాలినడకన కొంత దూరం గుట్టలమీదుగా వెళ్లాల్సి ఉంటుంది. చుట్టూ అల్లుకున్న పచ్చటి అడవి, పైన జలపాతం నుంచి పారే సెలయేటి గలగల సవ్వడులు, పక్షుల కిలకిలా రావాలు, పట్టణ కాలుష్యానికి దూరంగా ప్రశాంతమైన ప్రకృతిమాత ఒడిలో హాయిగా సేద తీరేందుకు ఇంతకు మించిన చక్కటి ప్రదేశం వరంగల్ కి సమీపంలో లేనే లేదని చెప్పవచ్చు. ఈ ప్రాంతంలోకి అడుగు పెట్టగానే ముందుగా ఓ చిన్న చెరువు దర్శనమిస్తుంది. దీని నుంచే దట్టమైన అటవీ ప్రాంతం మొదలవుతుంది.  ఇది పూర్తిగా అటవీ ప్రాంతం కాబట్టి ఎలాంటి సౌకర్యాలు ఉండవు.  పర్యాటకులకు ఏమి కావాలన్నా తీసుకుని వెళ్ళాల్సి ఉంటుంది. Telangana Tourism శాఖ ఇక్కడ కొన్ని  సౌకర్యాలు సమకూరిస్తే  పర్యాటకం అభివృద్ధి చెందుతుంది.  రాయికల్ గ్రామంలో నిజాం కాలం నాటి పోలీస్ స్టేషన్ భవనం ఉంది . ఆసక్తి గలవారు చూడవచ్చు తీసుకోవాల్సిన జాగ్రత్తలు: ఈ జలపాతాల వద్ద సరైన రక్షణ ఏర్పాట్లు లేవు ...  సందర్శకులు  జాగ్రత్తగా వ్యవహరించాలి.  లేకుంటే ఆహ్లాదంగా, ఆనందంగా సాగాల్సిన పర్యటన చివరికి విషాదాంతమవుతుంది. *కొండల పై భాగంలో ఎలుగుబంట్లు ఉన్నాయి. కాబట్టి పైకి వెళ్లే ప్రయత్నం చేయకుండా ఉంటే మేలు .  * మద్యం తాగివెళ్లొద్దు. * ఫొటోల కోసం లోతు ప్రాంతాల దగ్గరకు వెళ్లొద్దు. * జలపాతాలు ఎక్కే ప్రయత్నం చేయకూడదు.  *శరీరాన్ని పూర్తిగా కప్పే దుస్తులు వేసుకోవడం మంచిది . కాళ్లకు పాదరక్షలు వీలైతే shoes మరీ మంచిది . ఆహార పానీయాలను పర్యాటకులు  తీసుకెళ్లడం బెటర్ .. అక్కడ ఏమీ  లభించవు . చేపట్టాల్సిన భద్రత చర్యలు: * నీళ్లలో ప్రమాదవశాత్తు పడితే బయటపడేందుకు ఇరువైపులా తాళ్లతో ఏర్పాటు చేయాలి. * జలపాతాల వద్ద తగిన సంఖ్యలో భద్రత సిబ్బంది నియామకం. * నిఘా కోసం సీసీ కెమెరాల ఏర్పాటు. * నీళ్లలోకి వెళ్లకుండా ఇరువైపులా జాలీ ఏర్పాట్లు. Route details : హుస్నాబాద్ - సిద్దిపేట రోడ్ లో ములుకనూరు వద్ద కుడి వైపు వెళ్లాలి. మాజీ ప్రధానమంత్రి పీవీ . నరసింహారావు స్వగ్రామం అయిన వంగర మీదుగా రాయికల్ గ్రామానికి వెళ్ళాలి.  గ్రామం నుండి దక్షిణ దిశలో 3 కిలోమీటర్లు ప్రయాణం చేస్తే గ్రామ చెరువు వస్తుంది. అక్కడ వాహనాలను నిలిపి , జలపాతాల వైపు సుమారు 1 1/2 కిలోమీటర్ల దూరం ట్రెక్కింగ్ చేస్తూ జలపాతాలను చేరుకోవాలి. pictures courtesy : Anudeep Ceremilla . Aravind Arya Pakide .
  • కరిఘట్ట వేంకటేశ్వరుడు. ఈ పేరు చాలామంది విని  ఉండరు.   కర్ణాటకలోని శ్రీరంగపట్నం శివారు ప్రాంతంలో మైసూరు హైవే పక్కన ఓ కొండ ను కరిఘట్ట అంటారు.  రెండువేల అడుగులకు పైగా ఎత్తులో ఉండే  ఈ కొండ మీద కరిఘట్ట వేంకటేశ్వరుడు కి ఒక ఆలయం ఉంది. ఇది చాలా పురాతనమైనది. ఈ కొండని ‘కరిఘట్ట’ అని పిలుస్తారు. కరి అంటే నలుపు అన్న అర్థం ఉంది కాబట్టి నల్లటి కొండ అని ఆ పేరు పెట్టి ఉండవచ్చు. కరి అంటే ఏనుగు అన్న అర్థం కూడా ఉంది.  ఈ కొండ మీద ఏనుగులు తినే గడ్డి బాగా పెరిగి ఉంటుంది . అందుకనే ఏనుగుకొండ అని  ఆ పేరు పెట్టి ఉండవచ్చు.ఈ కరిఘట్ట మీద ఉన్న ఆలయం గురించి  వరాహపురాణంలో ప్రస్తావించారు . ఇక్కడి కొండ మీద కనిపించే దర్భలు సాక్షాత్తు ఆ వరాహస్వామి శరీరం నుంచి ఉద్భవించాయని పురాణ కథనం. అప్పట్లో ఈ కొండను నీలాచలం అని పిలిచేవారట.  తిరుపతిలో కనిపించే ఏడుకొండలలో ఒకటైన నీలాద్రిలోని కొంతభాగమే ఈ నీలాచలం అని చెబుతారు. ఇక్కడి మూలవిరాట్టుని వైకుంఠ శ్రీనివాసుడు లేదా కరిగిరివాసుడు అని పిలుస్తారు. ఆరడుగుల నల్లని రాతిలో కనిపించే ఈ మూలవిరాట్టుని సాక్షాత్తు ఆ భృగు మహర్షి ప్రతిష్టించాడని చెబుతారు. ఈ స్వామికి అలంకారం చేసినప్పుడు, బైరాగిలా కనిపిస్తాడట.  ‘బైరాగి వెంకటరమణుడు’ అని కూడా పిలుచుకుంటారు. పేరుకి బైరాగే కానీ ఈ స్వామిని కొలిస్తే ఎలాంటి కష్టమైనా తీరిపోతుందని భక్తుల విశ్వాసం. కరిఘట్ట ఆలయానికి చేరుకునేందుకు నాలుగు వందలకు పైగా మెట్లు ఎక్కాల్సి ఉంటుంది.  వాహనాల్లోకూడా పైకి వెళ్లేందుకు  రహదారి ఉంది. కొండ పక్కనే కావేరి ఉపనది  లోకపావని ప్రవహిస్తూ ఉంటుంది. ఈ కొండ మీదకు ఎక్కినవారికి కరిగిరివాసుని దర్శనం ఎలాగూ దక్కుతుంది. దానికి తోడుగా లోకపావనికి ఆవలి ఒడ్డున ఉండే నిమిషాంబ ఆలయం, శ్రీరంగపట్నంలోని రంగనాథస్వామి ఆలయాలు కూడా కనిపిస్తాయి. వీటితో పాటు మైసూరు, శ్రీరంగపట్నం, చాముండి హిల్స్ కూడా కనిపిస్తాయి.  శ్రీరంగపట్నానికి వెళ్లే యాత్రికులు ఈ కరిఘట్ట ఆలయాన్ని కూడా సందర్శించవచ్చు. ఏటా ఫిబ్రవరి ..మార్చి నెలల్లో వైభవంగా స్వామి ఉత్సవాలు జరుగుతాయి. రధోత్సవం కూడా నిర్వహిస్తారు. భక్తులు పెద్ద ఎత్తున హాజరవుతారు. 
  • దుర్గమ్మ స్వయంభువు గా వెలసిన ఇంద్ర కీలాద్రికి ఆ పేరు రావడానికి  కొన్ని కథలు ప్రచారం లో ఉన్నాయి.  పూర్వం పర్వత రూపుడైన కీలుడు అనే యక్షుడు దుర్గమ్మ కృప కోసం ఘోరమైన తపస్సు చేశాడు. అతడి భక్తికి మెచ్చిన దుర్గమ్మ  ప్రత్యక్షమై ఏ వరం కావాలో కోరుకొమ్మంది. జగదంబను ఎప్పుడూ తన హృదయ కుహరంలో కొలువుండమని కోరాడు కీలుడు. ఆ తర్వాత  కాలంలో దుర్గమాసురుడిని సంహరించిన అనంతరం ఉగ్రరూపంలో ఉన్న అమ్మవారు కీలుడికి ఇచ్చిన మాట ప్రకారం కీలాద్రిపై స్వయంభూగా వెలసింది. అప్పుడు ఇంద్రాది దేవతలు శ్రీ కృష్ణ రూపిణి అయిన కృష్ణవేణీ నదిలో స్నానమాచరించి, స్వర్ణమణిమయ కాంతులతో ప్రకాశిస్తున్న అమ్మవారిని శాంతించమని ప్రార్ధించారు. అపుడు దుర్గమ్మ శాంతించి  ప్రశాంత చిత్తంతో  కనకవర్ణ శోభితురాలై  కనకదుర్గమ్మగా దర్శనమిచ్చింది . నాటి నుంచి కీలాద్రి ఇంద్ర కీలాద్రిగా ప్రసిద్ధి చెందింది.  ఇక అమ్మవారి ఆలయం పక్కనే పరమేశ్వరుడిని కూడా కొలువుంచాలని భావించిన బ్రహ్మాది దేవతలు శతాశ్వమేధయాగం చేసి శివుడిని మెప్పించారు. వారి కోరిక మేరకు శివుడు జ్యోతిర్లింగ స్వరూపంలో స్వయంభూగా ఇంద్రకీలాద్రిపై వెలిశాడు. బ్రహ్మాదిదేవతలు పరమేశ్వరుడిని మల్లి, కదంబ పుష్పాలతో పూజించడంతో అప్పట్నుంచి మల్లేశ్వరుడిగా వెలుగొందుతున్నాడు. అందుకే ఈ ఆలయానికి దుర్గామల్లేశ్వర ఆలయం అనే పేరు వచ్చింది.  అలాగే మరో కథ కూడా ప్రచారం లో ఉంది.   ఈ క్షేత్రాన్ని దర్శించిన జగద్గురు ఆది శంకరాచార్యులు ఉగ్రరూపంలో ఉన్న అమ్మవారిని శాంతింపజేసేందుకు మహోగ్ర శక్తులను శ్రీ చక్రంలో నిక్షిప్తం చేసి, అమ్మవారి పాదాల చెంత స్థాపన చేశారు. అప్పట్నుంచి దుర్గమ్మ శాంతి స్వరూపిణిగా మారి భక్తులకు దర్శనమిస్తోంది. పరమేశ్వరుని జ్యోతిర్లింగం అదృశ్యంగా ఉండడాన్ని గుర్తించిన ఆదిశంకరాచార్యులు అమ్మవారి ఆలయానికి ఉత్తరభాగంలో పునఃప్రతిష్ఠించారు. అప్పట్నుంచి ఇంద్ర కీలాద్రి శ్రీ దుర్గామల్లేశ్వర స్వామి దేవస్థానంగా మారింది . ఇంద్రకీలాద్రిపై ఉన్న నవ దుర్గల విగ్రహాలు ఈ క్షేత్రానికి మరింత విశిష్టతను చేకూరుస్తాయి. కొండమీద ఉన్న అనేక రకాల వృక్షాలను కూడా దేవతా స్వరూపాలుగా కొలుస్తారు. శ్రీ శక్తి పీఠంగా పేరుగాంచిన కనకదుర్గమ్మ గుడి దేశంలోని మహిమాన్విత ఆలయాల్లో ఒకటిగా ప్రసిద్ధి గాంచింది.  కృష్ణానదీ తీరంలో కొలువై ఉన్న ఆ తల్లిని దర్శించినంతనే దుర్గతులన్నీ దూరమవుతాయని నమ్ముతారు భక్తులు.  ఈ ఇంద్ర కీలాద్రి పర్వతం  పైనే  అర్జునుడు శివుని కోసం  తపస్సు చేసి పాశుపతాస్త్రాన్ని సంపదించాడని ప్రతీతి. ఇక్కడే అర్జునుడు శివపార్వతులతో యుధ్దం చేసాడని అంటారు. ఆ స్థలం లొనే  కనకదుర్గ ఆలయం వెలసిందని నమ్మకం.  అసలు ఆలయం కొండ మీద ఉందని, సామాన్య మానవులకు కనిపించదని, ఇప్పుడు వున్న ఆలయం మానవుల కోసం నిర్మించబడిందని  అనే కథనం కూడా ప్రచారం లో ఉంది.