Latest News
banner News

తలా వందకోట్లు ఇవ్వు సామి !!

1st Image

భక్తుడి తపస్సుకు మెచ్చి దేవుడు ప్రత్యక్షమయ్యాడు ....
ఏమి వరం కావాలి భక్తా ?????
భక్తుడు* = ఈ ప్రపంచం లో ఉన్న వాళ్ళందరకు ఒక్కొక్కరికి 100 కోట్లు ఇవ్వండి! 
దేవుడు ఒకే ఇస్తాను ..... అలా వచ్చిన డబ్బుతో ఏమి చేస్తావు ???
భక్తుడు* = డబ్బు వుంటే ఏదైనా చెయ్యొచ్చు .... ముందుగా ఒక ఇల్లు కట్టుకొంటాను
దేవుడు = ఎవరు కడతారు ????
భక్తుడు* = ఎవరేమిటి డబ్బు పారేస్తే ఈ వూళ్ళో ఎవరినా కడతారు 
దేవుడు* = ఎవరికీ పారేస్తావు ??? వాళ్ళ దగ్గర కుడా 100 కోట్లు డబ్బు ఉంటుంది కదా .... వాళ్ళే నీకు పారేస్తారు ఇల్లు కట్టివ్విమని......
భక్తుడు* = ఈ ఊళ్ళో ఎవరు కట్టకపోతే ప్రక్క ఊరినుంచి కూలిలను తెప్పిస్తాను ఎక్కువ డబ్బు ఇచ్చి .....
దేవుడు* = ఆ పక్క ఊరిలో వాళ్ళందరి దగ్గర కుడా 100 కోట్లు వుంటాయి కదా 
భక్తుడు* = ఎవరు కట్టటానికి ముందుకు రాకపోతే మంచి కట్టిన ఇంటినే కొంటాను నాకు డబ్బుకు లోటు లేదు కదా.......
దేవుడు* = ఎవరు అమ్ముతారు ???? ఎవరికీ డబ్బు అవసరం ఉంటుంది ????? అందరి దగ్గర 100 కోట్లు వుంటాయి కదా 
భక్తుడు* = సరే ఇదే పాకలో ఉంటాను ..... రోజు మంచి తిండి తింటాను
దేవుడు* = ఎక్కడా ????
భక్తుడు* = ఈ వూళ్ళో అనేక హోటల్ వున్నాయి తిండికి లోటేమిటి ??
దేవుడు* = ఎవరు వండుతారు ????? 
భక్తుడు* = హోటల్ కాకపొతే మంచి బియ్యం కొనుక్కొంటాం!
దేవుడు* = ఎవరు పండిస్తారు ??? అందరి దగ్గరా డబ్బులు వుంటాయి కదా ...
భక్తుడు* = అసలు నీ ఉదేశ్యం ఏమిటి స్వామి ??????
దేవుడు* = అందరి దగ్గరా అవసరానికి మించి డబ్బులు వున్నప్పుడు ఎవరు మాత్రం కష్టపడతారు ????? అందరు కూర్చొని తిన్దామనుకొంటారు కదా ....
భక్తుడు* = నిజమే సామి నాకు అర్ధం అయ్యింది ......
దేవుడు* = అందుకే కష్టే ఫలి అన్నారు ..... కష్టానికి తగ్గ ఫలితమే రావాలి కాని అంతకు మించి వస్తే అనర్ధమే ...... 
భక్తుడు* = సామీ నా కళ్ళు తెరిపించావు ...
నాకు ఒక్కడికే 100 కోట్లు ఇవ్వు సామి! ఇంకెవరికి ఇవ్వకు! ...
..
దేవుడు* = మీరు మారరురా! మారరు గాక మారరు.....!  ----------------- Satya Ayyadevara
  • సోషల్ మీడియా వాక్ స్వాతంత్రానికి వేదిక . లోకేష్ సెలబ్రెటీ కావడం వల్లే ఆయనపై పోస్ట్ లు పెడతారు . అవసరం లేని అంశాలు వదిలి బాబు ప్రభుత్వం పోలవరం ప్రాజెక్ట్ వంటి వాటిమీద దృష్టి పెట్టాలి . లోకేష్ మామ బాలకృష్ణ మీద వున్నన్ని పోస్ట్ లు ఎవరిమీద వుండవు . జగన్ ఆసియా మొత్తం దోచేశాడని పోస్ట్ లు పెట్టినప్పుడు తప్పులు కనపడలేదా . గతంలో రామోజీ వ్యవహారం చూడండి . జస్టిస్ చలమేశ్వర్ నారీమాన్ బృందం ఇచ్చిన తీర్పు ప్రకారం సెక్షన్ 66 ను కోర్ట్ కొట్టేసింది .సోషల్ మీడియా లో ఏదైనా పోస్ట్ చేసే హక్కు ప్రతి వారికి వుంది . రవి కిరణ్ ను అర్ధరాత్రి అరెస్ట్ చేసి ఎందుకు హడావిడి చేశారు . అతన్ని కౌన్సిల్ కి పిలిపించి ప్రశ్నిస్తే సరిపోయేదానికి పెద్ద హంగామా అవసరమా .. రాహుల్ గాంధీ పై సాక్షాత్తు ప్రధాని చేసిన కామెంట్స్ మొన్నటి ఎన్నికల్లో ఏమిటి ? రాహుల్ ను పప్పు అనే పిలిచేవారు ఇక్కడ లోకేష్ సెలబ్రెటీ కావడం వల్లే అతను ఏ చిన్న తప్పు చేసినా ప్రచారం అయిపోతుంది . అనుభవం అనుభవం అంటూ జగన్ ను దెప్పి పొడిచిన చంద్రబాబు కొడుకును ఏ అనుభవంతో మంత్రిని చేశారు . అన్ని ప్రజలు గమనిస్తున్నారు .అన్నారు మాజీ ఎంపీ ఉండవల్లి అరుణకుమార్ .  ఇంకా ఆయన ఏమన్నారో చూడండి. 
  •  (Siva Racharla) ........       మనిషిలో లోతుగా కూరుకు పోయిన ధర్మం ఒక్కటే "అహం".ప్రతి పురుగును కదిలించే నిజం ఒక్కటే ఆకలి.తపించే ఆత్మనల్లా శాసించే శక్తి ఒక్కటే "ఆశ".ఆశ ముసిరినప్పుడు "ఆలోచన" మసక బారుతుంది.నీతి నిజాయితీలు కొలిమిలో కొవ్వొత్తుల్లా కాలిపోతాయి -- ప్రస్తానం సినిమాలో సాయికుమార్ శర్వానందుతో చెప్పే confession statement. శవాల పుట్టుమచ్చలు చూసి హతుడిని గుర్తుపెట్టొచ్చు కాని కత్తిగాటును చూసి హంతకుడిని గుర్తించలేము! 45 సంవత్సరాల క్రిందట 1972లో మొదలై 1991 వరకు జరిగిన విజయవాడ హత్యా రాజకీయల్లొ హీరోలు విలన్ల గురించి కాదు ఈపోస్టు. దేవినేని నెహ్రు మరణం తరువాత విజయవాడ రాజకీయల మీద పెద్దగా ప్రచారంలేని ముఖ్యమైన రాజకీయ శక్తుల గురించి రాయటానికే ఈ పోస్టు. ఈమధ్య రాంగోపాల్ వర్మా "వంగవీటి" సినిమా తరువాత "చలసాని వెంకటరత్నం" అనే CPI నాయకుడి గురించి ఎక్కువ మందికి తెలిసింది. విజయవాడ రాజకీయాలు 1964 వరకు ప్రశాంతంగా జరిగాయి. కమ్యునిష్ట్ పెద్దనాయకులు పుచ్చల పల్లి సుందరయ్యగారు (నెల్లూరు జిల్లా వారైనా గన్నవరం MLAగా పనిచేశారు,చనిపోయిన తరువాత అంత్యక్రియలు కూడ విజయవాడలోనే జరిగాయి) , చండ్ర రాజేశ్వర రావుగారు ఇద్దరు విజయవాడ కేంద్రంగా పనిచేసేవారు.1964లో CPI నుంచి CPM విడిపోయిన తరువాత సుందరయ్యగారు CPM జాతీయ కార్యదర్శిగా,చండ్రా రాజేశ్వర రావుగారు CPI జాతీయ కార్యదర్శిగా ఎన్నికయ్యారు. పీపుల్స్ వార్ వ్యవస్థాపకులు "కొండపల్లి సీతారమయ్య"గారు కూడ కృష్ణా జిల్లా పామర్రు ప్రాంతం వారు. కమ్యునిష్ట్ పార్టీ చీలిక తరువాత విజయవాడ సిటీలో CPI,జిల్లాలో మిగిలిన ప్రాంతాలలో CPM బలపడ్డాయి. 1966లో విజయవాడ "industrial estate/ఆటోనగర్" ఏర్పడిన తరువాత కార్మిక సంఘాల నిర్మాణం,బలం పెరిగాయి. విజయవాడలొ CPI నాయకుడు చలసాని వెంకటరత్నం పట్టు ఎక్కువ వుండేది. ఆటోనగర్ అభివృద్ది చెందుతుండటంతో పాటు చుట్టు పక్కల గ్రామాల నుంచి విజయవాడకు వలసలు జరిగాయి.ఈక్రమంలో వంగవీటి రాధ కృష్ణా రావు(పెద్ద రాధ) కుటుంబం విజయవాడకు వలస వచ్చారు. వంగవీటి సోదరులు కోటేశ్వర రావ్,నారాయణ రావ్,రాధ,శోభనా చలపతిరావు, మోహన రంగా రావు(రంగా) సోదరులు వివిధ పనులు చేసుకుంటు జీవించే క్రమంలో రాధ బస్టాండ్ సెంటర్లో నాయకుడిగా ఎదిగారు.చలసాని వెంకటరత్నంకు వంగవీటి రాధ దగ్గర కావటంతో రాధ సిటి లెవల్ నాయకుడయ్యాడు. సినిమాల్లొ చూపించినవి వాస్తవంలో జరిగిన సంఘటనల మధ్య చాలా తేడా వుంది.రాధా స్వయంగా నాయకుడిగా ఎదిగే క్రమంలో చలసాని వర్గంతొ గొడవలు మొదలయ్యాయి. 1971లొ ఈగోడవల్లొ రాధ వర్గం చలసాని వర్గానికి చెందిన "దత్తి కనకారావ్" అనే అతన్ని చంపేశారు.విజయవాడ హత్యా రాజకీయాల్లొ ఇది మొదటి హత్య,వర్మా వంగవీటి సినిమాలో ఈ సీన్ లేదు. దత్తి కనకారావ్ హత్యకు ప్రతీకారంగా చలసాని వర్గం రాధా వర్గానికి చెందిన దుర్గా రావ్,హనుమంతారావు అనే ఇద్దరిని చంపారు. చలసాని వర్గం ప్రతీకార హత్యలతో రాధా వర్గం భయపడింది. వీరి అస్తిత్వతం చిక్కుల్లో పడింది.చలసాని చంపకుంటే మేము బతకలేము అని 1972లో చలసాని వెంకటరత్నాన్ని రాధా వర్గం చంపింది.చలసాని వంటి మీద 72 కత్తి పోట్లు వున్నట్లు పోస్టుమార్టం రిపోర్టులో వుంది. చలసాని హత్యతో విజయవాడలోని కార్మిక సంఘాల మీద రాధ ఆదిపత్యం పెరిగిపోయింది. 1969లో మొదలైన "తెలంగాణ" ఉద్యమం,తరువాత మొదలైన "జై ఆంధ్రా" ఉద్యమం 1972 వరకు సాగింది.CPI & CPM జై ఆంధ్రా ఉద్యమాన్ని వ్యతిరేకించి "విశాలంద్ర" ఉద్యమాన్ని మద్దతు ఇచ్చాయి. విధ్యార్ధిగా వున్న దేవినేని నెహ్రు జై ఆంధ్రా ఉద్యమంలొ పాల్గొనేవారు. ఈక్రమంలో కమ్యునిష్ట్ విధ్యార్ధి సంఘాలకు ఇతర సంఘాలకు గొడవలు జరిగాయి,దేవినేని నెహ్రు కూడ చాలాసార్లు దాడికి గురయ్యాడు. ఈక్రమంలో నెహ్రు రాధా మద్దతు కోసం ఆయన వర్గంలో చేరి రాధాకు అనుకూలంగా విధ్యార్ధి సంఘం United Organization of Independents (UI)ని ప్రారంభించారు. చలసాని హత్యకు ప్రతీకారంగా 1974లో రాధా హత్య జరిగింది.ఈ హత్య వెనుక CPI హస్తం వుందని ఆరోపణ.హత్య చేసింది కిరాయి హంతకులు.హత్య జరిగింది రాధా వర్గంలోని "నాగెళ్ళ శివరామప్రసాద్" షాపులో.ఆషాపు ప్రారంభోత్సవానికి వచ్చిన వంగవీటి రాధాను షట్టర్లు వేసి కత్తులతో పొడిచి చంపారు. ఊహించని పరిణామం,అందరు రాధా వర్గీయులే కావటంతో గందరగోళం మధ్య ఎవరిని ఎవరు పొడుస్తున్నారో తెలియని స్థితిలో మొత్తం ఆరుగురు మరణించారు. ఆ హత్యకు దేవినేని నెహ్రు ప్రత్యక్ష సాక్షి.నెహ్రు సాక్ష్యంతో రాధా హంతకులకు యావజ్జీవ శిక్ష పడింది.తరువాత High Courtలో కేసు కొట్టేశారు. రాధా హత్య కేసులో నిందితులు అడుసుమల్లి జయప్రకాష్ 1983లో TDP తరుపున విజయవాడ నుంచి MLAగా గెలిచారు. మొన్న సమైఖ్యాంద్ర ఉద్యమం సమయంలో సుప్రిం కోర్టులో కేసులు వేశారు.ఇదే 1983లో దేవినేని నెహ్రు కూడ MLAగా (TDP) తరుపున కంకిపాడు నుంచి గెలిచా రు. రాధా హత్య కేసులొ మరో నిందితుడు,హత్య జరిగిన షాప్ యజమాని "నాగెళ్ళ శివరామప్రసాద్" 1989లో వంగవీటి రత్నకుమారి మీద TDP తరుపున పోటిచేసి ఓడిపోయారు. రాధా హత్య కేసును నిందితుల తరుపున "నాదెండ్ల భాస్కర రావు"గారు వాదించారు.1978లో తెనాలి ప్రాంతం వారైన నాదెండ్లగారు విజయవాడ నుంచే ఇందిరా కాంగ్రేసు తరుపున గెలవటం యాదృచ్చికం కాదు.1983లో TDP తరుపున వేమూరు నుంచి పోటిచేశారు. రాధా హత్య కేసులో నిందితుడైన "వజ్జా సుబ్బారవు" TDP పుట్టక ముందు NTRతో ఒక సినిమా నిర్మించారని దేవినేని నెహ్రు ఒక ఇంటర్యూలో చెప్పారు. రాధా హత్య తరువాత రంగాగారు కొంత కాలం తరువాత విజయవాడకు దూరంగా మచిలీపట్నం,వైజాగ్లలో వున్నారు. కొన్ని నెలల తరువాత రాధా వర్గంలోని కొందరు రంగాను కలిసి చర్చించి విజయవాడకు వెనక్కి తీసుకొచ్చారు.రంగా రాకతో విజయవాడలో మళ్ళి ఘర్షణలు మొదలయ్యాయి.మరో వైపు దేవినేని నెహ్రు విధ్యార్ధి సంఘాల మద్దతుతో బలపడ్డారు. నెహ్రు బలం పెరగటం కొత్త అనుచరులు తయారు కావటం రంగా వర్గంలోని కొందరిని కొట్టటంతో రంగా నెహ్రూల మధ్య మనస్పర్ధలు మొదలయ్యాయి. 1978లో ప్రవేట్ బస్సుల జాతీయకరణ ఉద్యమం నెహ్రు,CPI సుబ్బరాజు (1994లో MLAగా గెలిచారు),CPM ఉమామహేశ్వర రావ్(విజయవాడ డిప్యూటి మేయర్గా పనిచేశారు) జాయింట్ కమిటీగా ఉద్యమం చేశారు. ఈ ఉద్యమం చివరి దశలో అప్పటి మంత్రి భవనం వెంకటరాం గారు రంగాను కలిసి ఉద్యమం ఆపవల్సిందిగా కోరారు.రంగా నెహ్రూను ఉద్యమం ఆపమని చెప్పటం,ఇంత కాలం పోరాడి చివరి దశలో ఉద్యమం ఆపలేమని చెప్పటంతో రంగా నెహ్రూల మధ్య స్పష్టమైన చీలిక వచ్చింది. ఈ గొడవలు చిలికి చిలికి నెహ్రు సొంతంగా కొత్త విధ్యార్ధి సంఘం United Students Organizationను 1979లో మొదలు పెట్టటంతో రంగా నెహ్రూల మధ్య ప్రత్యక్ష గొడవలు మొదలయ్యాయి. రంగా,నెహ్రూల మధ్య గొడవలు పెరిగి చివరికి 1979లొ జరిగిన ITI కాలేజి ఎన్నికల్లో దేవినేని నెహ్రు అన్న "గాంధి"ని రంగా వర్గం చంపింధి. గాంధి హత్యతో రంగా నెహ్రుల మధ్య హత్యా రాజకీయాలు మొదలయ్యాయి. గాంధి హత్యకు ప్రతీకారం కోసం నెహ్రు తమ్ముడు మురళి రగిలిపోయాడు.గాంధి హత్య కేసులో నిందితులను చాలా మంధిని మురళి చంపేశాడు. 1981లో జరిగిన విజయవాడ మున్సిపల్ ఎన్నికల్లొ రంగా కాంగ్రేస్ టికెట్టు కోసం ప్రయత్నించినా కాంగ్రేసు "శ్రీనివాస్ రావు" అనే నాయకుడికి టికెట్టు ఇచ్చింది.రంగా ఇండిపెండెంటుగా పొటికి దిగారు.పోలింగుకు ముందు కాంగ్రేస్ తమ అభ్యర్ధిని పక్కనపెట్టి రంగాకు మద్దతు ప్రకటించింది.రంగా గెలిచారు, ఆఎన్నికల్లో రంగా గుర్తు "సైకిల్"! కౌన్సిలరుగా గెలిచిన తరువాత రంగా కాంగ్రేసులొ చేరారు. ఇంతలో తెలుగుదేశం ఏర్పడటం,విజయవాడ MLAగా వున్న నాదెండ్ల భాస్కర రావ్ దేవినేని నెహ్రూను NTRకు పరిచయం చెయ్యటం ,నెహ్రు 1983లో MLAగా గెలవటం చక చకా జరిగిపోయాయి. నెహ్రు MLAగా గెలవటంతో రంగా వర్గం మీద దాడులు పెరిగాయి. మురళి దూకుడు ఎక్కువైంది.చివరికి రంగా ఇంటికి ఫోన్ చేసి రంగా భార్యను దూషించే స్థాయికి మురళి వెళ్ళాడు. 1985లొ జరిగిన ఎన్నికల్లో రంగాకు విజయవాడ తూర్పు స్థానం నుంచి కాంగ్రేసు తరుపున తొలిసారి MLA అయ్యారు.ఈ ఎన్నికల్లో TDP తరుపున లయోలా కాలేజి లెక్చరర్ యార్లగడ్డ రాజగోపాల్ గారికి సీట్ ఇచ్చారు. రంగా MLAగా గెలవటంతో విజయవాడ సిటీలో ఉదృతంగా పనిచేయటం మొదలుపెట్టారు.రంగా నాయకత్వ లక్షణాలతో ప్రజల్లొ విపరీతమైన following వచ్చింది.అధికార పార్టీలో వుండటంతో నెహ్రు ప్రజాల సమయల మీద స్పందించే పరిస్థితిలేకుండా పోయింది.ఏనాయకుడైనా ప్రతిపక్షంలోనే ఉన్నప్పుడే ప్రజా నాయకుడిగా ఎదుగుతారన్నది రంగా ,YSR విషయంలో నిజమైంది. 1987లో రంగా తన అన్న రాధా కథతో దవళ సత్యంగారి దర్శకత్వంలో "చైతన్య రధం" అనే సినిమాను తీశారు.ఈ సినిమాలో రాధా హత్య సీన్ చూసి చాలా మంది ఎమోషనలుగా స్పందించారు. దళపతి సినిమాలో మమ్మూటి మర్డర్ సీన్ వాస్తవంలో రాధ హత్య సీన్. ఈ చైతన్యరధం కథ నుంచి శివ,గాయం,దళపతి వచ్చాయి. చైతన్యరధం తమిళంలో కూడ dub చేశారు. ఈ చైతన్య రధం సినిమా నెగటీవ్ కాని ప్రింట్లు కాని ఇప్పుడు లేవంట.అప్పటి ప్రభుత్వమే ప్రింటలన్ని కొని కాల్చివేసిందని దవళ సత్యం గారు ఒక ఇంటర్యూలో చెప్పారు. దాదాపు ఇదే సమయంలో మిరియాల వెంకటరావుగారి నాయకత్వంలో "కాపునాడు" మొదలైంది. చైతన్యరధం సినిమా విజయోత్సవం యాత్ర విజయవాడ నుంచు రాజమండ్రి వరకు గోదావరి జిల్లాలో విస్త్రుతంగా జరిగింది.రంగా ప్రతి ఊర్లో ర్యాలీలు,సభలు పెట్టారు. విజయవాడలో జరిగిన సభలూ సుమారు 5 లక్షల మంది హాజరయ్యారు.అంతకు ముందు విజయవాడలో జరిగిన మహనాడు కన్నా రంగా సభా భారి విజయవంతం అయ్యింది. రంగా హవా కోస్తా దాటి తెలంగాణాకు కూడ పాకింది.ఖమ్మంలో జరిగిన సభ అంతకు ముందు అక్కడ జరిగిన పార్టీల సభల కన్నా ఎక్కువ విజయవంతం అయ్యింది. రంగా ఊపు చూస్తే 1989 ఎన్నికల్లో తెలుగుదేశం ఓటమి ఖాయం అనే అభిప్రాయం వచ్చింది.రంగా మీద ప్రభుత్వం పోలీసుల ద్వార అనేక కేసులు పెట్టింది.పదుల కొద్ది కేసులు బేయిల్లతో రంగా పరిస్థితి వుండేది.అప్పటి విజయవాడ సిటి కమీషనర్ "వ్యాస్" కక్షగట్టి రంగాను వేధించారని ఆరోపణలు వున్నాయి. దళపతిలో అరవింద్ స్వామి క్యారెక్టర్ సూర్తి వ్యాసుదే! మరో వైపు దేవినేని మురళి రంగ వర్గం మీద దాడులు ఎక్కువయ్యాయి. రంగాను చంపుతారని పుకార్లు వచ్చాయి.రంగా వర్గం ముందు స్టెప్ తీసుకోని 1988 మార్చిలో నెల్లూరులొ LAW పరిక్షలు రాసి వ్యానులో విజయవాడకు వస్తున్న మురళిని NH5 మీద చిలకలూరిపేట-గుంటూరు మధ్య "యడ్లపాడు" వద్ద చంపారు.శివా సినిమాలోని శుభలేఖ సుధాకర్ హత్య వాస్త జీవితంలో దేవినేని మురళి హత్యే! మురళి హత్య జరిగినప్పుడు రంగా డిల్లీలోని రాం మనోహర్ లోహియా హాస్పటల్లొ tretment తీసుకుంటున్నారు.పోలీసులు మురళి హత్య కేసులొ రంగా మీద కేసు పెట్టారు.రంగా మరో సోదరుడు శోభాన చలపతిరావు,రంగా బావ మరిది చెన్నుపాటి శ్రీను మీద కూడ కేసు నమోదు అయ్యింది. మురళి హత్య జరిగిన తరువాత రంగా హత్య ఖాయం అని అందరిలో అభిప్రాయం వుంది.కాని ఎప్పుడు ఎలా అన్నది ప్రశ్నార్ధకం. 1988 చివరిలో గిరిపురం కాలనీలో ప్రజలకు పట్టాలు ఇవ్వాలని రంగా ఆమరణ నిరహార దీక్ష మొదలుపెట్టారు,ఈ దీక్షలోనే 26-Dec-1988 అంటే క్రిస్ మస్ తరువాత రోజు తెల్లవారు జామున బస్సుల్లొ అయ్యప్పమాలలో వచ్చిన 100 అందికి పైగా రంగాను చంపేశారు. రంగా హత్యను ఎవరు చేపించారో రాంగోపాల్ వర్మకు తెలియదని సినిమాలో చెప్పారు.కనీసం కేసులో నిందితుల పేర్లు కూడ చెప్పలేదు. రంగాకు ప్రధాన ప్రత్యర్ధి అయిన దేవినేని నెహ్రు రంగాను హత్యచేపించారని పత్రికల్లొ రాశారు.ప్రత్యర్ధి హత్యలో పోలీసులు మొదట చేసే పని హతుడి ప్రత్యర్ధి మీద FIR నమోదు చేస్తారు. రంగా హత్య కేసులో విచిత్రంగా నెహ్రు 21వ నిందితుడు,అది కూడ హత్య చేసినట్లు కాదు "కుట్రదారుడి"గా. రంగా హత్య తరువాత భారి హింస జరిగి 45 మంది చనిపోయారు ,వందల కోట్ల ఆస్తులు ద్వంసం అయ్యాయి.ఆస్తులన్ని నెహ్రు కులస్తులైన కమ్మవారివి. రంగా-నెహ్రుల గొడవ రంగా హత్య తరువాత కమ్మ-కాపు కులగొడవలుగా మారాయి.కాని రంగా హత్య నిందితుల్లో కాపులు వున్నారు.రంగా చనిపోయే వారకు ఆయనకు సలహాదారుడు "కాట్రగడ్డ రాజాగోపాల్"(CPI మాజి కార్యదర్శి).రంగా భార్య రత్నకుమారిగారు కమ్మ. విజయవాడ గొడవలు కచ్చితంగా కుల గొడవలు కాదు,ఆధిపత్య రాజకీయాలు మాత్రమే! రంగాను చివరి దశలో అంటే కాపునాడు మొదలైన తరువాతనే కాపునాయకుడు అన్న పేరు వచ్చింది.వాస్తంలో రంగాకు కాపుల కంటే దళితుల్లొ అనుచరులు ఎక్కువ.BCలైన "నగరా"ల్లొ రంగాకు ఎక్కువ ఆదరణ. రంగా హత్య జరిగిన్ డిసెంబర్ 26 కూడ streatgicalగా జరిగిందే!క్రిస్మస్ జరుపు కోవటంలో ఎక్కువ మంది అనుచరులు వుండరనే డిసెంబర్ 26ను రంగా హత్య చెయ్యటానికి ఎంచుకున్నారు. రంగా హత్య తరువాత హోం మంత్రి కోడెల శివప్రసాద్ రాజినామ చేయగా కాపు నాయకుడు కళావెంకటరావు హోం మంత్రి అయ్యారు.అప్పటి DGP P.S.రామ్మోహన్ రావు గారు రాజినామ చేసినా ప్రభుత్వం అంగీకరించలేదు.ఈ రామ్మోహన్ రావుగారు 2002-2004 మధ్య తమిలనాడు గవర్నర్గుగా పనిచేశారు. రాధా హత్యా నిందితుల్లో కొందరు MLAలు అయింట్లే,రంగా హత్య కేసుకోని నిందితులు కూడ MLAలు అయ్యారు. విశాఖపట్టణం నుంచి 2009,2014లో TDP తరుపున గెలిచిన వెలగపూడి రామకృష్ణ రంగా హత్య కేసులో నిందితుడు. మరో నిందితుడు "చలసాని పండు" 1999 లో ఉయ్యూరు నుంచి ఇండిపెండెంటుగా 1020 ఓట్లతొ ఓడిపోయాడు,2004లో కూడ TDP తరుపున ఓడిపోయరు.2009లో 150 ఓట్లతో TDP తరుపున పెనమలూరు నుంచి ఓడిపోయారు.2010లొ ఆయనకు మసాజ్ చేసే అతని చేతిలో హత్యకు గురయ్యాడు. ఈ చలసాని పండు స్వయంగా రంగాను పొడిచారని అంటారు, "నువ్వు నన్ను చంపుతున్నావా" అని రంగా అన్నారని కూడ ప్రచారంలో వుంది."సై" సినిమాలో సీన్ గుర్తురావటం సాధారణం. రాజకీయం ముందు కులం వర్గం ఏమి వుండవని కూడ విజయవాడ చరిత్ర నిరూపించింది. NTR మరణించిన తరువాత దేవినేను నెహ్రు 1996లో కాంగ్రేసులొ చేరారు.నెహ్రు రాకను వ్యతిరేకించి రత్నకుమారిగారు TDPలో చేరారు.రంగా హత్య కేసులో నిందితుడు అయిన చలసాని పండుకు కాంగ్రేస్ రంగా సోదరుడు అయిన శొభనా చలపతిరావును కాదని ఉయ్యూరు నుంచి టికెట్ట్ ప్రకటించింది.చివరిలొ దాసరి నారాయణరావు గారు కలగచేసుకోని శొభనా చలపతిరావు గారికి టికెట్టు ఇప్పించారు. దేవినేని నెహ్రు 2016 ఆగష్టులో కాంగ్రేసును & బాబుగారితో విభేదాలు వీడి తెలుగుదేశంలో చేరారు.2000 సంవత్సరంలో kidney transplantation చేయించుకున్న నెహ్రు మొన్న 17-Apr-2017న చనిపోయారు. గత ఆగస్టులో నెహ్రు తమ్ముడు "బాజిప్రసాద్" మరణించారు. దేవినేని నలుగురు సోదరులు గాంధి,నెహ్రు,మురళి,బాజి ప్రసాద్ అకాల మరణం చెందారు. ఏపార్టీలో వున్న కమిట్మెంటుతో పనిచేసే నాయకుడిగా పేరున్న నెహ్రు కేవలం కొడుకు అవినాష్ భవిషత్తు కోసమే TDPలోకి వెళ్ళారనిపిస్తుంది.నెహ్రు బాబుగారి మీద చేసిన విమర్శలు చాలా తీవ్ర మైనవి.నెహ్రు కూతురిని రాయపాటి శ్రీనివాస్ కొడుకు పెళ్ళి చేసుకున్నాడు కాని వారి మధ విభేదాలు వచ్చి విడాకుల వరకు వెళ్ళారు,విడిపోయారో లేదో తెలియదు. రాధా,రంగా హంతకులు MLAలు అయినట్టే రంగా అనుచరులు, ఇతర కాపు యువ నాయకులు రంగ అమరనం తరువాత 1989లో కాంగ్రేస్ తరుపున MLAలు అయ్యారు,వీరిలో కన్నా లక్ష్మినారయణ, జక్కంపూడి రామ్మోహనరావ్,అంబటి రాంబాబు ముఖ్యులు.మాజి కేంద్ర మంత్రి శివశంకర్ వీరికి టికెట్లు రావటానికి ప్రధాన కారణం. శివ శంకర్ గారు కూడ మొన్న మార్చిలో చనిపోయారు. రంగా అనుచరుడు(రంగా తుపాకిని carry చేసే) మల్లది విష్ణు 2009లో కాంగ్రేసు తరుపున పోటిచేసి PRP తరుపున పోటిచేసిన రంగా కొడుకు రాధా మీద గెలిచారు. అటు మురళి హత్యకేసు ఇటు రంగా హత్య కేసులో ఎవరికి శిక్షలు పడలేదు. ఇరు కేసుల్లో సాక్షులు నిందితులను గుర్తుపట్ట లేదు.కారణం బర్మా సీతారమయ్య అనే పెద్దమనిషి నెహ్రు-రంగా వర్గాల రాజి కుదిర్చారు ఎవరికి శిక్షలు పడకుండ చేశారు. కర్నాటి రామ్మోహన్ రావు అనే లాయర్ గారు(ఇప్పుడు కూడ వున్నారు) రంగా-నెహ్రుల మధ్య గొడవలు పెరగకుండ అనేక సార్లు రాజి కుదిర్చారు కాని ఆ రాజీలు ఎక్కువ కాలం నిలబడలేదు. ఇది విజయవాడ రాజకీయాల్లొ ఒక కోణం-ముఖ్య కోణం,ఈకథను సినిమా తీస్తే ఎవరు చూస్తారు?మసాల కావాలి,జనాల్లొ పాత గాయలు రేపే ఏ చర్య అయినా సమర్ధనీయం కాదు! అవును విజయవాడ కథలో హీరోలు విలన్లు లేరు అందరు పాత్రధారులే!     అందరు బాధితులు,పీడితులే...నలిగి పోయింది విజయవాడ నగరం,ప్రజలు. 
  • ప్రధాని నరేంద్ర మోడీని అనకొండ గా  చూపిస్తూ కార్ట్టూన్ వేసి  కథనాన్ని రాసిన ఆంధ్రజ్యోతి పై ఏ చర్యలు తీసుకోవాలని  బీజేపీ ఎమ్మెల్సీ సోము వీర్రాజు ప్రశ్నించారు.  సోషల్ మీడియాలో వ్యంగ చిత్రాలతో పోస్ట్లు పెట్టె నెటిజనులపై చర్యలు తీసుకోవాలన్న మంత్రి సోమిరెడ్డి వ్యాఖ్యలను ఆయన తప్పు బట్టారు.  ఇసుక మాఫియా ఆగడాలు చూస్తుంటే ప్రభుత్వం ఉన్నట్టు అనిపించడం లేదని వీర్రాజు అభిప్రాయ పడ్డారు. ఇంకా  ఆయన ఏమన్నారో వీడియో చూడండి.   vedeo courtesy... telugu global tv
  • వ్యభిచారం ఎక్కడన్నా జరుగుతుంటే అడ్డుకోవాల్సింది బోయి అతగాడే వ్యభిచారం చేయిస్తున్నాడు. పేరుకి మళ్ళీ పోలీస్‌ హెడ్‌ కానిస్టేబుల్‌. అది కూడా క్రైం బ్రాంచ్‌లో విధులు నిర్వర్తిస్తున్నాడు. పొలిసు డిపార్ట్మెంట్ కదా ఎవరేం చేస్తారులే అనుకున్నాడు కాబోలు ఏకంగా హైటెక్ వ్యభిచారాన్ని నడిపించాడు. బెంగళూరుకు ఒక పోలీస్ కానిస్టేబుల్ ఇలా డబ్బు కోసం కక్కుర్తి పడి పోలీస్ వ్యవస్థకే మచ్చ తెచ్చాడు. అమ్మాయిలను సప్లై చేసేందుకు  అందుబాటులో ఉన్న కమ్యూనికేషన్ వ్యవస్థను పూర్తిగా ఉపయోగించుకున్నాడు.ఆన్లైన్ బుకింగ్ , డిజిటల్ లావాదేవీల సహాయంతో సెక్స్ రాకెట్ నిర్వహించాడు. ఆన్లైన్ ద్వారా కస్టమర్లకు ఏర వేసి గుట్టుగా అమ్మాయిలను సరఫరా చేయడం, రహస్యంగా అపార్ట్మెంట్స్ లో కార్యకలాపాలు నడిపేవాడు. ఇద్దరు బ్రోకర్లను కూడా పెట్టుకున్నాడు. అమ్మాయిలను తీసుకురావడం ... అవసరమైన చోటకి తీసుకెళ్లడం అంతా వాళ్ళు చేసేవారు.  ఎలా లీక్ అయిందో మొత్తం మీద ఈ కానిస్టేబుల్ వ్యవహారాలు ఉన్నతాధికార్లకు చేరాయి.  నిఘా పెట్టి నిర్ధారించుకున్నారు.ఓ రోజు రైడ్ చేసి పట్టుకున్నారు.  సెక్స్ రాకెట్‌ గుట్టును   పోలీసులు రట్టు చేశారు. కానిస్టేబుల్ కి సంబంధం ఉన్న ఓ ఇంటి నుంచి ముగ్గురు మహిళలను అదుపులోకి తీసుకోవడంతోపాటు స్వైపింగ్‌ మిషన్లు, పెద్ద మొత్తంలో డబ్బు కూడా స్వాధీనం చేసుకున్నారు. అయితే, ఈ వ్యవహారానికి తనకు ఎలాంటి సంబంధం లేదని హెడ్‌ కానిస్టబుల్‌ అంటున్నాడు. ప్రస్తుతం అతడిని జ్యూడిషియల్‌ కస్టడీకి పంపించారు. అతగాడిని ఉద్యోగం నుంచి సస్పెండ్ చేయబోతున్నారు. 
  • ట్విట్టర్ లో ఏది పడితే  అది మాట్లాడి  అవతల వాళ్ళతో తిట్టించుకునే అలవాటున్న వివాదాస్పద దర్శకుడు  ఈ సారి మంచి మాట మాట్లాడేడు. నిజంగా ఇది ఆశ్చర్యమే.  అందుకే ఆయనను అందరూ పొగుడుతున్నారు. కొంప దీసి వర్మ స్టైల్ మార్చేసేడా ఏంటి ?  చాలామంది అభిమానులు  నమ్మడం లేదు ఈ విషయాన్ని ఇక అసలు విషయాన్ని కొస్తే ...  రాంగోపాల్ వర్మ ఈ సారి కళాతపస్వి కే విశ్వనాథ్‌ గురించి ట్వీట్లు చేశాడు. ‘దాదా సాహేబ్‌ ఫాల్కే’ అవార్డు సాధించిన విశ్వనాథ్‌ను ఆకాశానికెత్తేసిన వర్మ, ఆ క్రమంలో దాదా సాహేబ్‌ స్థాయిని తగ్గించినట్టుగా మాట్లాడేడు . విశ్వనాథ్‌కి దాదా సాహెబ్‌ ఫాల్కే అవార్డు రావడం పట్ల తాను సంతోషంగా లేనని అన్నాడు. ఎందుకంటే ఆయన‌ దాదా సాహేబ్‌ ఫాల్కే కంటే చాలా విశ్వనాధ్ గొప్ప దర్శకులని వ‌ర్మ పొగిడాడు. ‘విశ్వనాథ్‌గారూ.. నేను దాదాసాహేబ్‌ సినిమాలూ చూశాను, మీ సినిమాలూ చూశాను. నా ఉద్దేశంలో దాదా సాహేబ్‌కే మీ పేరు మీద అవార్డు ఇవ్వాలి’ అని మరో ట్వీట్‌ చేశాడు. విశ్వనాధ్ అభిమానులు వర్మ ట్వీట్ పట్ల సంతోషం వ్యక్తం చేస్తున్నారు. నెటిజనులు కూడా ఇన్నాళ్లకు మీ నోట ఒక నిజం పలికేరు అంటు న్నారు. అదీ సంగతి. ఇకపై కూడా వివాదాస్పద అంశాల జోలికి వెళ్లకుండా వర్మ ఇలాగే ట్వీట్లు చేస్తారా ?  ఏమో చూద్దాం.
  • (Sheik Sadiq Ali ) .......................  మీడియాను మేనేజ్ చెయ్యడంలో,తిమ్మిని బమ్మిని చేయడంలో చంద్రబాబును మించిన వారు లేరని అందరికీ తెలిసిన విషయమే. అయితే ,ఆయనకు ఆ కళ కొత్తగా అబ్బింది ఏమీ కాదు. 30 ఏళ్ళ క్రితమే ఆయన తన కళను తెలుగు ప్రజల ముందు ప్రదర్శించారు. ఆయనకు అంతకు ముందు నుంచే ఆ కళలో ప్రవేశం ఉందనీ ఆయనను సన్నిహితంగా ఎరిగిన మిత్రులు చెప్పేవారు. అసలింతకీ ఆయన ప్రదర్శించిన కళ ఏమిటో తెలుసుకోవాలని ఉందా? అయితే ఇది చదవండి. అది స్వర్గీయ ఎన్టీయార్ ముఖ్యమంత్రిగా సూపర్ ఫాం లో ఉన్న కాలం. చంద్రబాబు చిన్నల్లుడిగా అప్పుడప్పుడే చక్రం తిప్పుతున్న కాలం. చిత్తూరు జిల్లా మదనపల్లె లో భారీ బహిరంగ సభ జరిగింది. జనం తండోప తండాలుగా తరలి వచ్చారు. ఎన్టీయార్ ప్రసంగాన్ని మైమరచి వింటున్నారు. అప్పుడే ఎన్టీయార్ బాంబు పేల్చారు."నా రాజకీయ వారసుడు బాలయ్య బాబే " అని నిండు సభలో ప్రకటించారు. ఒక్కసారిగా సభలో జయజయ ధ్వానాలు మిన్నంటాయి.వింటున్న మీడియా ప్రతినిధులు సంభ్రమాశ్చర్యాలకు గురయ్యారు.బ్యానర్ ఐటెం దొరికిందని సంబర పడిపోయారు. మదన పల్లె నుంచి తిరుపతికి రావటం ఆలస్యమవుతుందని ఫోన్ లోనే తమ కార్యాలయాలకు వార్త చెప్పేశారు. ఇక్కడ ఎడిటోరియల్ డెస్క్ కూడా ఐటెం రాయించి కంపోజ్ చేయించి పేజ్ మేకప్ కూడా పూర్తి చేశారు. ఈ లోగా రిపోర్టర్లు తమ ఆఫీసులకు చేరారు. నేను నైట్ షిఫ్ట్ లో ఉన్నాను.ఒకపక్క సిటీ స్పెషల్, మెయిన్ ఎడిషన్ రెండూ చూస్తున్నాను. లే అవుట్ చేసిన పేజ్ కెమెరా సెక్షన్ కు వేల్తుందీ అనుకుంటూ ఉండగా ,ఒక్కసారి అలజడి మొదలైంది. మా బ్యూరో చీఫ్ సి.ఆర్ .నాయుడు పరుగెత్తుకు వచ్చారు.' చంద్రబాబు ఫోన్ చేశారు. బ్యానర్ లీడ్ మార్చాలి అన్నారు. ఎన్టీయార్ ఉద్దేశ్యం బాలయ్య బాబు రాజకీయ వారసుడు కాదనీ,కేవలం నట వారసుడు మాత్రమే అని అర్ధం చేసుకోవాలని చెప్పారు. కాబట్టి బాలయ్య బాబే నా నట వారసుడు అని లీడ్ మార్చి రాసి ,తగిన విధంగా హెడ్డింగ్ కూడా మార్చాలి ' అన్నారు. ఆ మేరకు ఆయనే లీడ్ మార్చి రాసిచ్చారు. తగిన విధంగా హెడ్డింగ్ కూడా మారింది.తద్వారా ఒక రాజకీయ తుఫాను ఆగిపోయింది. దటీజ్ చంద్రబాబు. ఆరోజుల్లో ఎలెక్ట్రానిక్ మీడియా లేకపోయింది కాబట్టి సరిపోయింది. లేకపోతే ఏమి జరిగి ఉండేదో ఊహించలేం.ఇది బాబు కళకు సంబంధించిన ఒక నమూనా మాత్రమె. ఇలాంటివి ఇంకా చాలా ఉన్నాయి.
  • (Vasireddy Venugopal) ............. మెట్టుగుట్ట రామలింగేశ్వర క్షేత్రం.... ఈ దేవాలయం చాలా పురాతనమైనది.    వేంగీ చాళుక్యులు దీనిని నిర్మించినట్టు చెబుతారు. తర్వాత శివుడు, రాముడి ఆలయాలను కాకతీయులు నిర్మించినట్టు చెబుతారు. అరణ్యవాసంలో వున్న కాలంలో సీతారామచంద్రులు ఈ క్షేత్రాన్ని సందర్శించినట్టుగా కూడా కథనాలు ప్రచారంలో ఉన్నాయి.. ఈ క్షేత్రాన్ని మెట్టు రామలింగేశ్వర ఆలయంగా పిలుస్తుంటారు.ఈ క్షేత్రం దక్షిణ కాశీ గా పేరొందింది.   1198-1261 మధ్యకాలంలో కాకతీయ రాజులు మెట్టుగుట్ట మీద ఆలయాలు నిర్మించినట్టు శాసనాలు చెబుతున్నాయి. ఈ కొండమీద తొమ్మిది గుండాలు వుంటాయి. మండు వేసవిలోనూ కొన్ని గుండాలలో నీళ్లు వున్నాయి. నవసిద్ధులు తపస్సు చేసిన ప్రాంతాలుగా ఈ గుండాలకు ప్రతీతి. ఒక్కో గుండానికి ఒక్కో ప్రత్యేకత ఉంది. పాలగుండంలో స్నానాన్ని సర్వరోగ నివారిణిగా పేర్కొంటారు. జీడిగుండం, కన్నుగుండం, కత్తిగుండం, రామగుండం, గిన్నెగుండం.. ఇలా తొమ్మది గుండాలు. ప్రముఖ సాహితీవేత్త వానమామలై వరదాచార్యులు మండలం రోజులు గుట్టపై వాగీశ్వరీ ఉపాసన చేసినట్టు చెబుతారు. సరస్వతీదేవి ప్రత్యక్షమై భాగవతాన్ని తెలుగులో రాసి అభినవ పోతనగా ప్రసిద్ధి చెందమని ఆశీర్వదించినట్టు ఓ కథనం. మెట్టుగుట్ట మీద మరో పెద్ద ఎట్రాక్షన్.. దొంతులమ్మ గుండ్లు. 165 అడుగుల ఎత్తులో రెండు చూడముచ్చటైన శిఖరాల జంట. ఒక శిఖరంలో ఆరు(ఐదు), మరో శిఖరంలో నాలుగు చొప్పున పెద్ద శిలలు ఒకదానిపైన ఒకటి పేర్చినట్టుగా ఉంటాయి. భీముని భార్య హిడింబి గచ్చకాయలు ఆడుకుని, వాటిని ఒకదానిపై ఒకటి పేర్చిందనీ, అవే ఈ శిలలనీ ఓ కథ ప్రచారంలో ఉంది. అది నిజమైనా కాకపోయినా.. భీముడికి, భీముడి భార్య హిడింబి శరీర సౌష్టవ హోదాకు తగిన కథనం. శివరాత్రి నాడు లక్షల మంది భక్తులు ఇక్కడి కొచ్చి స్వామి దర్శనమ్ చేసుకుంటారు.   మెట్టుగుట్ట  ఖాజీపేట రైల్వే స్టేషన్ కి దగ్గరలో వుంటుంది. దాదాపు ఏకశిల లాగా వుండే ఈ కొండపైకి కార్లు, బైకులపై వెళ్లడానికి చక్కటి రహదారి వుంది.
  • హైదరాబాద్‌ మహానగరంలో ఉన్న వీధిబాలల పరిస్థితి దుర్భరంగా ఉంది. వీధి బాలల దురవస్థపై ‘సేవ్‌ ది చిల్డ్రన్‌’ అనే స్వచ్ఛంద సంస్థ ఆ మధ్య నిర్వహించిన సర్వే లో గ్రేటర్‌లో 28వేల మంది వీధి బాలలున్నారని తేలింది.  చదువుకోవాల్సిన వయసులో వీరంతా  రహదారులపై బిచ్చమెత్తుకోవడం, వస్తువులు విక్రయించుకుంటూ రైల్వేస్టేషన్లు, బస్టాండ్లు, ఫుట్‌పాత్‌లపై జీవనం సాగిస్తున్నారని సర్వే చెబుతోంది. సుమారు 11వేల మంది బాలలు నకిలీ బిచ్చగాళ్ల చేతిలో చిక్కుకున్నారని బాలల హక్కుల సంఘం నేతలు అంటున్నారు. బిచ్చగాళ్ల మాఫియాలోని చిన్నారులంతా ఎల్‌బీనగర్‌, ఖైరతాబాద్‌, సికింద్రాబాద్‌ రైల్వేస్టేషన్‌, ఇతర శివారు ప్రాంతాల్లో కనిపిస్తారు. నెలల వయసున్న చిన్నారులనూ దీనంగా తయారుచేసి బిచ్చమెత్తుకునేందుకు ఉపయోగిస్తున్నారు. మెజార్టీ పిల్లలను వెట్టిచాకిరికి ఉపయోగిస్తూ లైంగికదాడులు చేస్తున్నారు. కొందర్ని అక్రమరవాణా చేస్తున్నారు. ఇక బెగ్గర్ ఫ్రీ సిటీ గురించి  తరచుగా చెబుతుంటారు కానీ పట్టించుకునే వారే లేరు. చట్టప్రకారం స్త్రీ, శిశు సంక్షేమ శాఖకు చెందిన జిల్లా బాలల పరిరక్షణ అధికారులు వీధిబాలల్ని గుర్తించి వాళ్లను సురక్షిత ప్రదేశంలో  ఉంచాలి. అక్కడి తీసుకెళ్లాక ఆరోగ్యం, మానసిక ప్రవర్తన లను పరీక్షించి అవసరమైన మేర చికిత్స చేయించాలి. అనంతరం పిల్లల తల్లిదండ్రుల సమాచారాన్ని సేకరించాలి. వాళ్లు అనాథలైనా, తల్లిదండ్రుల ఆచూకీ లభించకపోయినా చిన్నారులు పెద్ద అయ్యేంత వరకు విద్యాబుద్ధులు నేర్పించాల్సి ఉంటుంది.  వీధుల్లో అనుమానాస్పదంగా సంచరించే పిల్లలు కనిపిస్తే వాళ్లను సంక్షేమశాఖ అధికారులకు అప్పగించాల్సిన బాధ్యత పోలీసుశాఖ తీసుకోవాలి. చట్టప్రకారం.. ఏ ఆదరణ లేని చిన్నారులు వీధుల్లో తిరగకూడదు. అసాంఘిక శక్తులు, నేరగాళ్లు వాళ్లను అపహరించే అవకాశముంది. శారీరకంగా, మానసికంగా, లైంగికంగా పిల్లల్ని వేధిస్తారు.  నిబంధనల ప్రకారం.. ‘ఫిట్‌’ సర్టిఫికెట్‌ ఉన్నప్పుడే స్వచ్ఛంద సంస్థల్ని నిర్వహించాలి. కానీ పుట్టగొడుగుల్లా పుట్టుకొస్తున్న కొన్ని స్వచ్ఛంద సంస్థలు చిన్నారులను చేరదీసి వాళ్లతో బిచ్చమెత్తిస్తున్న ఘటనలు అక్కడక్కడ కనిపిస్తూనే ఉన్నాయి. ఇటీవలే అలాంటి రెండు సంస్థలపై పోలీసులు కేసు నమోదు చేశారు.  నకిలీ బిచ్చగాళ్లకు కౌన్సెలింగ్‌ నిర్వహించి వారిని ఇళ్లకు  పంపాలి. సామాజిక పరిస్థితుల దృష్ట్యా బిచ్చగాళ్లుగా మారిన వారికి ప్రత్యేక శిక్షణ ఇచ్చి ఉపాధి కార్యక్రమాల్లో నిమగ్నం చేయాలి. చిన్నారులకు ఆరోగ్య పరీక్షలు నిర్వహించి అనారోగ్యం, వ్యాధులతో ఉన్న వాళ్లకు వైద్యం చేయించాలి. తల్లిదండ్రుల ఆచూకీ కనుక్కొని ఇంటికి పంపాలి. ఆచూకీ లభించకపోతే విద్య, వసతి సమకూర్చి సంరక్షణ బాధ్యత తీసుకోవాల్సి ఉంటుంది. ఇదే జరిగితే నెలల వయసు నుంచి 17ఏళ్ల మధ్య వయసున్న సుమారు 11వేల మంది బాలలకు విముక్తి లభిస్తుంది.
  • ప్ర‌ముఖ ద‌ర్శ‌కుడు కె. విశ్వ‌నాథ్‌కు దాదాసాహెబ్ ఫాల్కే పురస్కారం లభించింది.  ఈ అవార్డును  మే నెల 3న రాష్ట్రప‌తి ప్ర‌ణ‌బ్ ముఖ‌ర్జీ చేతుల మీద‌గా అందుకోనున్నారు .  గతంలో తెలుగు సినీ పరిశ్రమ దిగ్గజాలు రామానాయుడు, అక్కినేని నాగేశ్వరరావులను ఈ అవార్డు వరించిన సంగతి తెలిసిందే. 2016 సంవత్సరానికి గాను విశ్వనాథ్‌కు అవార్డు ప్రకటించిన విషయాన్ని కేంద్ర మంత్రి వెంకయ్యనాయుడు వెల్లడించారు.  శంకాభ‌ర‌ణం, సాగ‌ర సంగ‌మం, స్వాతి ముత్యం , శ్రుతిల‌య‌లు, సిరిసిరి మువ్వ‌, సిరివెన్నెల‌, స్వ‌యం కృషి,స్వాతి కిర‌ణం, స్వ‌ర్ణ‌క‌మ‌లం, ఆప‌ద్భాంద‌వుడు, శుభ‌సంక‌ల్పం, జీవ‌న జ్యోతి వంటి ఉత్త‌మ చిత్రాల‌కు కె. విశ్వ‌నాథ్ ద‌ర్శ‌క‌త్వం  వ‌హించారు. కె.విశ్వనాథ్ సౌండ్ రికార్డిస్ట్‌గా కెరీర్‌ను ప్రారంభించారు. కొన్ని సంవత్సరాల తర్వాత అక్కినేని నాగేశ్వరరావు ప్రోత్సాహంతో దర్శకత్వ శాఖలోకి వచ్చారు. నాటి ప్రముఖ దర్శకుడు ఆదుర్తి సుబ్బారావు దగ్గర కొన్ని చిత్రాలకు పనిచేశారు. అలా ‘మూగమనసులు’ చిత్రానికీ పనిచేశారు. ఆయన తొలి సారిగా దర్శకత్వం వహించిన చిత్రం ఆత్మ గౌరవం. విశ్వనాథ్‌ దర్శకత్వం వహించిన చిత్రాల్లో శంకరాభరణం వెండితెర మీద అద్భుతంగా ఆవిష్కృతమైంది. ఆ చిత్రం జాతీయ అవార్డును కూడా అందుకుంది . అక్కడ నుంచి అయన విభిన్న చిత్రాలకు దర్శకత్వం వహించారు. ఇటీవల కాలంలో ఆయన చాలా చిత్రాల్లో వయసుకి తగ్గ పాత్రలు పోషించారు. 
  • ముందస్తు ఎన్నికల సంకేతాల నేపథ్యంలో వైసీపీ ఈ సారి ప్రముఖ ఎన్నికల వ్యూహకర్త ప్రశాంత్ కిషోర్ డైరెక్షన్ లో టీడీపీ తో తాడో పేడో తేల్చుకోవడానికి సిద్ధం అవుతోంది. రెండు రోజుల క్రితం వైసీపీ అధినేత జగన్ తో ప్రశాంత్ కిషోర్ సమావేశమైనారు. ఏపీ పాలిటిక్స్ పై సుదీర్ఘంగా చర్చించారు. తర్వాత పార్టీ నేతలు ప్రశాంత్ కి పార్టీ బలాబలాలు .. ప్రత్యర్థుల బలహీనతలు .. ఏపీ లో నెలకొన్న పరిస్థితులు ... ముఖ్యంగా 2014 నుంచి అధికార పార్టీ వైఫల్యాల గురించి వివరించారట. ప్రశాంత్ కిషోర్ కొద్దీ రోజులపాటు హైద్రాబాద్, విజయవాడలలోనే ఉండి ఎన్నికల వ్యూహాన్ని దశల వారీగా ఎలా చేపట్టాలో ఖరారు చేస్తారు. అలాగే  ఆయన  కొద్దీ రోజులు ఏపీ లో పర్యటిస్తారు. శిక్షణ పొందిన ప్రశాంత్ టీమ్ సభ్యులు జనంలోకి వెళ్లి వైసీపీకి అనుకూల పరిస్థితులు ఏమిటి ? వ్యతిరేక పరిస్థితులేమిటి ? అన్న సమాచారం రాబడతారు. ఈ సర్వే జరుగుతున్న క్రమంలోనే అధికారపార్టీ వైఫల్యాలపై పెద్ద ఎత్తున ప్రచారం చేపడతారు. సోషల్ మీడియాను కూడా విస్తృత స్థాయిలో  వినియోగించుకుంటారు. కొత్త రాజకీయ ఎత్తుగడలతో, వ్యూహాత్మకంగా జగన్ జనం లోకి దూసుకు పోయేలా ప్రశాంత్ ప్లానింగ్ ఇస్తారట.  గతంలో గుజరాత్ లో నరేంద్ర మోడీ , బీహార్ లో నితీష్ గెలవడానికి ప్రశాంత్ కిషోర్ వ్యూహాలే కారణం అని అంటారు. ఎన్నికల వ్యూహ రచనల్లో ఎత్తుగడల నిపుణుడుగా పేరున్న ప్రశాంత్ కిషోర్ వచ్చాక పార్టీ వ్యవహార శైలి లో మార్పు రావచ్చు అంటున్నారు. ప్రత్యేకంగా జగన్ హావభావాలు, సమాధానాలు ఇచ్చే తీరు, సభల్లో ఆకర్షణీయ ప్రసంగం ఎలావుండాలి ? అసెంబ్లీలో ఎలా ఉండాలి ?  అధికారపార్టీని దుయ్యబట్టే తీరు ఏవిధంగా ఉండాలి ? తదితర అంశాలపై టిప్స్ కూడా ఇస్తారట. అలాగే ఒకే అంశంపై వివిధ స్థాయిల్లో నాయకులు ఎలా మాట్లాడాలి ? జిల్లా స్థాయిలో నాయకులు ఏ అంశాలపై మాట్లాడాలి ? వంటి విషయాల్లో కూడా సలహాలు సూచనలు  ప్రశాంత్ ఇస్తారని సమాచారం. 2014 సార్వత్రిక ఎన్నికల్లోమోడీ  కోసం చాయ్ పే చర్చ సహా పలు సృజనాత్మక ప్రచార వ్యూహాలను రూపొందించిన  ప్రశాంత్  జగన్ కోసం వినూత్న ప్రచార వ్యూహాలను  రెడీ చేస్తారని అంటున్నారు. గత ఎన్నికలలో కేవలం 5 లక్షల ఓట్ల తేడాతో అధికారాన్ని కోల్పోయిన  వైసీపీ ఈ సారి మరింత బలోపేతమై దూసుకు పోవడానికి అవసరమైన సూచనలు .. ప్రణాళికలు రాబోయే కాలంలో సిద్ధమౌతాయి.