Latest News
నేటి క‌బుర్లు
  • జగన్..  పవన్  పార్టీలు  లేకుండానే తెలంగాణా ఎన్నికలు జరగబోతున్నాయి. ఈ నేతలు ఇద్దరూ ఆంధ్రాకే పరిమితం కావాలని భావిస్తున్నారు. తెలుగు దేశం మాత్రం కాంగ్రెస్ కూటమి లో చేరి కొన్ని సీట్లలో పోటీ చేయబోతోంది. సీపీఐ, సీపీఎంలు ఇప్పటికే చెరో దారి పట్టాయి. బీజేపీ మాదే అధికారం అంటున్నా ... ఆ పార్టీ బలం పై అనుమానాలున్నాయి.  లోపాయికారీగా అధికారపార్టీ సహకరిస్తే అంతోఇంతో బలం చాటుకుంటూ నాలుగైదు సీట్లలో గట్టెక్కవచ్చని అంటున్నారు. తెలంగాణ జనసమితి ఎన్ని సీట్లల్లో గెలుస్తుందో సందేహమే. కూటమి లో ఈ పార్టీ కూడా భాగస్వామే.  తెలంగాణా లో ఇప్పటికి వైఎస్ కి అభిమానులు ఉన్నారు.  2014 ఎన్నికల్లో తెలంగాణలోఒక ఎంపీ, నాలుగు ఎమ్మెల్యే స్థానాలను గెలుచుకుంది. కొన్ని సామాజిక వర్గాలు, మైనారిటీలు వైసీపీకి మద్దతుగా నిలిచారు. అయితే ఆ తర్వాత వైసీపీ తెలంగాణలో పార్టీ  కార్యకలాపాలను తగ్గించుకుంది. అధికారపార్టీలోకి ఎమ్మెల్యేలంతా చేరిపోయారు. నియోజకవర్గాల్లో ప్రభావం చూపగల నాయకులూ గులాబీ తీర్థం పుచ్చుకున్నారు.  టీఆర్ఎస్ అధినేత కేసీఆర్ తో జగన్ సన్నిహిత సంబంధాలనే కోరుకున్నారు.  గతంలో తెలంగాణ బాధ్యతలను జగన్ సోదరి షర్మిలకు అప్పగిస్తారనే ప్రచారం సాగింది.  ఆ ప్లాన్ అమలు లోకిరాలేదు.  వైఎస్ రాజశేఖరరెడ్డికి తెలంగాణలో చాలామంది అభిమానులున్నారు. జగన్ ప్రస్తుతం అధికారపార్టీతో సన్నిహితంగా  ఉండాలనే చూస్తున్నారు. ఇప్పటికి అక్కడక్కడా పార్టీ నేతలు ఉన్నారు. తెరాసతో పొత్తు పెట్టుకుని కొన్ని స్థానాల్లో పోటీ చేస్తే బాగుండేదని ఆ పార్టీ నేతలు అంటున్నారు. దానివల్ల పార్టీ మనుగడ లో ఉంటుందని చెబుతున్నారు.  ఇక తెలంగాణలో పవన్ కు వీరాభిమానులున్నారు. యూత్ లో కొంతమేరకు క్రేజ్ ఉంది. పార్టీ నిర్మాణం పూర్తి చేసుకుని ఎన్నికలకు వెళ్లాలనే ఆలోచన ఇదివరకు చేశారు. ఒక రౌండ్ యాత్ర కూడా చేశారు . సీపీఎం నేతలతో చర్చలు కూడా జరిగేయి. ఆ తర్వాత పవన్ సైలెంట్ అయిపోయారు. అభిమానులు కనీసం కొన్ని సీట్లలో అయినా పోటీ చేద్దాం అని ఒత్తిడి తెచ్చారు. అయితే పవన్ సుముఖత చూపలేదు. నిజానికి తెలంగాణ ఎన్నికల్లో పోటీచేయడం పవన్ కల్యాణ్ కు  ఇష్టంలేదని సమాచారం. ఇక్కడ కేసీఆర్ సర్కారుతో ఆయన చాలా సత్సంబంధాలు కొనసాగిస్తున్నారు. అలాంటి నేపథ్యంలో ఎన్నికల్లో దిగి వైరం పెట్టుకోవడం ఎందుకు అనే భావనతో సైలెంట్ అయ్యారు అని పరిశీలకులు అంటున్నారు.దీంతో పవన్ను నమ్ముకుని.. తెలంగాణ నుంచి రాజకీయాలు చేస్తున్న నాయకులకు ఇప్పుడు షాక్ తిన్నారు. ఇక తమ రాజకీయ భవిష్యత్తుకోసం వారు ఏం నిర్ణయాలు తీసుకుంటారో చూడాలి. ముందుగా ఇంట గెలవాలనే ఉద్దేశంతో పవన్ సొంత రాష్ట్రమైన ఆంధ్రప్రదేశ్ పై దృష్టి పెట్టారు. ఇప్పుడు తెలంగాణ ముందస్తు ఎన్నికలకు రంగం సిద్ధమైంది. పార్టీని సన్నద్ధం చేసి ఎన్నికల బరిలో దింపేంత సమయం కూడా లేదు. అర్బన్ ఏరియా లో తప్ప  ఇతర నియోజకవర్గాల్లో పెద్దగా ఓటింగు లభించకపోవచ్చు. ఆయా విషయాలను దృష్టిలో పెట్టుకొని ఈసారి తెలంగాణ ఎన్నికల్లో జనసేన దూరంగా ఉంటోంది. ...
  • ఏపీలోనూ కొత్తగా ఓ రాజకీయ కూటమి ఏర్పడే సూచనలు కనిపిస్తున్నాయి . టీడీపీ అధినేత చంద్రబాబు కాంగ్రెస్ తో కలసిన నేపథ్యంలో ఈ కూటమి ఏర్పడబోతోంది. నిన్న మొన్నటివరకు వామపక్షాలు జనసేనాని పవన్  వైపు చూశాయి.  ఆయన సొంతంగా పోటీ చేసే యోచనలో ఉన్నందున ఇక తప్పని సరిగా  కాంగ్రెస్ టీడీపీ కూటమి లోకి చేరాల్సిందే. పవన్ కూడా  వామపక్షాలతో సంబంధం లేకుండా సొంతంగా ఉద్యమాలు నిర్వహిస్తున్నారు.  ఈ విషయంలో గుర్రుగా ఉన్న కమ్యూనిస్టులు బాబు తో చివరి నిముషంలోనైనా చేతులు కలిపే అవకాశాలు లేకపోలేదు. ఇక జగన్ సంగతి తెల్సిందే. అయన మొదట్నుంచి పొత్తుల పట్ల ఆసక్తి గా లేరు. వామపక్షాలు గతంలో జగన్ పట్ల ఆసక్తి చూపాయి. తర్వాత మనసు మార్చుకున్నాయి.   వచ్చే ఎన్నికల్లో కాంగ్రెస్ పార్టీతో టిడిపి ఎన్నికల బరిలోకి దిగబోతున్న వార్తలతో  దేశం పార్టీ నేతలు మల్లగుల్లాలు పడుతున్నారు. కాంగ్రెస్ లో అయితే ఇప్పటికే రామచంద్రయ్య , వట్టి వసంత కుమార్ లాంటి నేతలు పార్టీకి  గుడ్ బై చెప్పేసారు.  వీరు పెద్ద నాయకులు  కాకపోయినా ముందు ముందు మరికొంతమంది బయటకు వెళ్లే అవకాశాలు ఉన్నాయి.  తెలుగుదేశం నేతలు , కార్యకర్తల్లో క్కూడా బాబు నిర్ణయం  సెగలు రేపుతోంది. కాంగ్రెస్‌తో పొత్తు పెట్టుకుంటే తాము రాజీనామాలు సిద్ధమని బహిరంగ ప్రకటన చేసిన కొందరు ఇప్పుడేమి చేయాలా అని యోచిస్తున్నారు. కాంగ్రెస్ పార్టీకి వ్యతిరేకంగా తెలుగువాడి ఆత్మాభిమానం పేరుతో ఎన్టీఆర్ స్థాపించిన పార్టీ తెలుగుదేశం కాంగ్రెస్  కి వ్యతిరేకంగానే వ్యవహరించింది.  ఎన్టీఆర్  కాంగ్రెస్ నేతలను కుక్కమూతి పిందెలంటూ తీవ్ర స్థాయిలో విమర్శలు చేసేవారు.  చంద్రబాబు కూడా అదే స్థాయిలో కాంగ్రెస్ నేతలను విమర్శించారు. ఇటలీ దెయ్యం ... తల్లి కాంగ్రెస్ పిల్ల కాంగ్రెస్ అంటూ  విమర్శించిన ఉదాహరణలు లేకపోలేదు . ఎన్టీఆర్  నుంచి ఇప్పటి దాకా పార్టీ నాయకత్వంలో మార్పు వచ్చినా కాంగ్రెస్ పార్టీతో వైరం మాత్రం అలాగే కొనసాగింది. అయితే  శత్రుత్వం మిత్రత్వంగా మారిన క్రమం లో  రెండు పార్టీల నేతలు ... కార్యకర్తలు సర్దుకుపోయి పని చేయగలరా ?అనేది కాలమే  నిర్ణయించాలి.  ఇక  రాజకీయ సమీకరణాలు వేగంగా మారవచ్చు.ఎన్నికలు కూడా సమీపిస్తున్న కారణంగా రాష్ట్రస్థాయిలో కొత్త పొత్తులకు తెర లేవవచ్చు.  కాంగ్రెస్ , బాబు, వామపక్షాలు కూటమిగా  ఓ వైపు, జగన్ , పవన్  మరో వైపు, బీజేపీ ఒంటరి గా ఇంకోవైపు ఎన్నికలపోరు జరగవచ్చు. బీజేపీ కూడా జగన్ కూటమిలో కలిసినా కలవచ్చు. ఆ మూడు పార్టీలు కలిసినా కలవవచ్చు. అందులో ఆశ్చర్యం లేదు ... తప్పు లేదు . అలాంటి  అవకాశాలను  కొట్టిపారేయలేం.ఏమి జరుగుతుందో చూద్దాం.  ...
  • (Sheik Sadiq Ali )   ఏ ధీమాతో  కేసీఆర్   ముందస్తు ఎన్నికలకు వెళ్ళారు? ఖచ్చితంగా అధికారంలోకి వస్తామని ఎందుకంత నమ్మకంతో ఉన్నారు?తెర వెనుక చేసుకున్న రాజకీయ ఒప్పందాలే గెలిపిస్తాయని నమ్ముకున్నారా?లేక మరేవైనా రహస్య అస్త్రశస్త్రాలు అయన అమ్ముల పొదిలో ఉన్నాయా?తన నీడనే తాను నమ్మని కేసీయార్ మోడీ ని నమ్ముకొని ముందస్తుకు వెళ్ళారంటే అంతగా నమ్మశక్యంగా లేదు.మరి గెలుపు పై ఆయన ధీమా ఏమిటి?నిద్రలోనూ రాజకీయాలనే శ్వాసించే  కేసీఆర్   లేక్కలేమిటి?వ్యూహాలేమిటి?నాకు అందుబాటులో ఉన్న సమాచారంతో ఒక విశ్లేషణ చేయటానికి ప్రయత్నిస్తున్నాను. భారీ బహిరంగ సభలు,ర్యాలీలు ఓట్లు రాల్చే కాలం ఎప్పుడో పోయింది.సభలు,ఊరేగింపులకు హాజరయ్యే వాళ్ళు ఓట్లు వేస్తారనే భ్రమలు ఎప్పుడో తొలగిపోయాయి.ఎవరు సభ పెట్టినా హాజరయ్యేది మాత్రం అదే జనం.పిండి కొద్దీ రొట్టే.ఖర్చు పెట్టె శక్తిని బట్టి హాజరయ్యే జనం ఉంటారు.కాబట్టి వాళ్ళను నమ్ముకొని ప్రయోజనం లేదు.ఇక ప్రెస్ మీట్లు,ఆరోపణలు,ప్రత్యారోపణలు జనం నమ్మే పరిస్థితి ఎప్పుడో పోయింది.ఎన్ని ఎక్కువ అవినీతి ఆరోపణలు వస్తే ఆ పార్టీ అంత గొప్పగా పనిచేస్తుంది అనే స్థాయికి జనం చేరుకున్నారు.ఇకపోతే,మిగిలిన తాజా అస్త్రం సోషల్ మీడియా. ఐదేళ్ళ క్రితం వరకూ ఒక వెలుగు వెలిగిన సోషల్ మీడియా కూడా ఇప్పుడు శక్తి విహీనం అయిపొయింది.అన్ని పార్టీలు దాన్నే నమ్ముకోవటం,దాన్ని హద్దూ అదుపూ లేకుండా వాడేయటంతో అది కాస్తా నిర్వీర్యమై పోయింది. సోషల్ మీడియా రాతలు చూసి దేన్నీ నమ్మాలో,దేన్నీ నమ్మకూడతో తేల్చుకోలేని అయోమయంలో పడిపోయారు.ఇకపోతే డబ్బుల పంపిణీ,దానికి కూడా ఎవరూ వెనక్కి తగ్గటం లేదు.తెలుగు రాష్ట్రాల్లో రెండు వేల నోట్లు అదృశ్యం అయిపోయాయి అంటే అందరూ ఏ రేంజ్ లో సిద్ధంగా ఉన్నారో అర్ధం చేసుకోవచ్చు. మరి మిగిలింది ఇంకేమిటి? మైండ్ గేమ్ .అవును ఇప్పుడు  కేసీఆర్   ప్రయోగిస్తున్న బ్రహ్మాస్త్రం అదే.ఇది కాకుండా ఆయన దగ్గర మరో పాశుపతాస్త్రం ఉంది .దాని గురించి చివరి పేరాల్లో వివరిస్తాను. అసెంబ్లీ రద్దుచేసి ,ముందస్తుకు వెళ్ళటం ప్రతిపక్షాలకు మొదటి దెబ్బ. ఒకేసారి 105 మంది అభ్యర్ధులను ప్రకటించటం,ఇద్దరు మినహా మిగిలిన సిట్టింగ్ లు అందరికీ సీట్లు కేటాయించటం మరో దెబ్బ.అసంతృప్తులను సామదాన బేధ దండోపాయాలతో దారిలోకి తెచ్చుకోవటం మరో వ్యూహాత్మక విజయం.అక్కడి అసంతృప్తులు అందరూ తమ పార్టీలో చేరుతారనీ,తాను ప్రత్యామ్నాయంగా ఎదుగుతాననీ,వలవేసి కాచుకొని కూర్చున్న కోదండ రామ్ సర్ ఆఖరికి పిత్త పరిగెలు కూడా పడకపోవటంతో చావుదెబ్బ తిన్నారు.మరో వైపు వంద సీట్లు మావే అని పదేపదే చెప్తూ మళ్ళీ టీయారెస్ పార్టీ యే అధికారంలోకి రానున్నదనే అభిప్రాయాన్ని అటు క్యాడర్ లోనూ,ఇటు ప్రజల్లోనూ కల్పించటంలో విజయం సాధించారు. చిల్లుపడ్డ నావలో ఎవరూ ప్రయాణించరు .విజయవంతంగా తీరం చేరుతుందనే నమ్మకం కుదిరాక ఆ నావను ఎవరూ విడిచి వెళ్ళరు.అందుకే పెద్దగా ఎవరూ ఆ పార్టీ ని వదిలి వెళ్ళలేదు.అది  కేసీఆర్   సాధించిన ముందస్తు విజయం. ఇకపోతే , భారీ సభలు,ర్యాలీలు అన్నీ కూడా ప్రతిపక్షాల దృష్టి మళ్లించటానికే. వాళ్ళు ఎంతసేపూ పోటీ సభల గురించే ఆలోచిస్తారు తప్ప ,కేసీయార్ అసలు వ్యూహం దరిదాపులకు కూడా వెళ్ళలేని పరిస్థితి కల్పించారు.మెజారిటీ ఓటర్లను ప్రభావితం చేసే అంశాలతో ముసాయిదా మ్యానిఫెస్టో ను కూటమి కన్నా ముందే ప్రకటించి ప్రత్యర్ధులను ఆత్మరక్షణ లోకి నెట్టేశారు.ఊహించని ఆ దెబ్బకు కోలుకోలేకపోతున్న కూటమి ఇప్పుడు దానికి ధీటైన జవాబివ్వటానికి పిల్లి మొగ్గలు వేయాల్సి వస్తోంది.పైన చెప్పిన అంశాలన్నీ కేసీయార్ రాజకీయ వ్యూహ చతురతకు అద్దం పట్టే అంశాలే. ఇక మిగిలిన చివరి పాశుపతాస్త్రం గురించి చర్చిద్దాం.ఎప్పటికైనా ఎన్నికల ఫలితాలను శాసించేది బడుగు,బలహీన వర్గాల ప్రజలే.పోలయ్యే ఓట్లలో 90 శాతం ఓట్లు ఆ వర్గాలకు చెందిన వారివే.తమను తాము మేధావులుగా,జ్ఞానులుగా భావించే వారు పోలింగ్ బూత్ లకు వెళ్లి క్యూల్లో నిల్చొని ఓట్లు వేయటం బహుతక్కువ.వ్యవస్థ మారాలి అని గొంతు చించుకుంటారు తప్ప దాన్ని మార్చటానికి ఒకటి ,రెండు గంటలు కేటాయించలేరు.ఈ విషయం కేసీయార్ కు బాగా తెలుసు.అందుకే ఆ వర్గాల్లోని వ్యతిరేకత తనను ఓడించ లేదనీ,గెలిపించేది బడుగు,బలహీన ప్రజలే అని అర్ధమై వాళ్ళనే నమ్ముకున్నారు.వాళ్ళనే లక్ష్యంగా చేసుకొని విజయ వ్యూహాన్ని రచించుకున్నారు. ఇక్కడ మీకు ఒక ఉదాహరణ ఇస్తున్నాను.నా దగ్గర ఉన్న లెక్కల ప్రకారం ఒక నియోజక వర్గంలో ఉన్న సంక్షేమ పధకాల లబ్దిదారుల వివరాలు ఇక్కడ ఇస్తున్నాను. ఆసరా పించన్లు-27,795,కళ్యాణ లక్ష్మి-2,422,షాదీ ముబారక్-885,కేసీయార్ కిట్స్-1,698,సీఎం రిలీఫ్ ఫండ్-636,ఆరోగ్యశ్రీ-23,579 మంది లబ్ది దారులు ఉన్నారు.ఇవి కాకుండా ఇతర పథకాల ద్వారా లబ్దిపొందిన వారి సంఖ్య మరో 20 వేల వరకూ ఉంది.ఇప్పటికే ప్రతీలబ్దిదారు వివరాలు అభ్యర్ధులకు అందాయి.వ్యక్తిగతంగా ప్రతీ లబ్దిదారు చిరునామా,ఫోన్ నెంబర్ తో సహా అభ్యర్ధుల దగ్గర ఉన్నాయి.ఈ ఓట్లన్నీ నూటికి నూరు శాతం పోల్ చేయించటానికి కసరత్తు జరుగుతుంది.కనీసం 90 శాతం పాలైనా 75 శాతం తమ పార్టీకి పడేలా కృషి చేస్తున్నారు.వారందరినీ తోలి రెండుగంటల్లోగా పోలింగ్ బూత్ కు తీసుకు రావటానికి చంద్రబాబు తరహా వ్యూహం రచిస్తున్నారు. కేసీయార్ మళ్ళీ అధికారంలోకి రావాల్సిన అవసరాన్ని అర్ధమయ్యేలా వివరించటానికి అరవింద్ కేజ్రివాల్ 'ఆప్'తరహా వ్యూహాన్ని రూపొందించారు.ఉదాహరణకు ఒక నియోజకవర్గంలో 200 పోలింగ్ బూత్ లు ఉన్నాయనుకుందాం.ఒక్కో బూత్ లో ఐదుగురు సభ్యులతో ఒక బృందం చొప్పున వెయ్యిమంది ని నియమిస్తున్నారు.ఎన్నికలు అయ్యేవరకు ప్రతీరోజు ఏదో ఒక బృందం లబ్దిదారులను కలుస్తూనే ఉంటుంది.ఈ బృంద సభ్యులకు ప్రత్యెక శిక్షణ కూడా ఇస్తున్నారు.వీళ్ళంతా చాపకింద నీరులా పని చేస్తూనే ఉంటారు.ఈ వ్యూహాన్ని పకడ్బందీగా అమలు చేయటం ద్వారా మెజారిటీ అభ్యర్ధులు గెలవటమే కాకుండా గతం కన్నా మెజారిటీ లు మరింత ఎక్కువ పెరిగేలా చూడాలన్నది కేసీయార్ వ్యూహంగా తెలుస్తుంది. ఇవన్నీ కాకుండా మరో రహస్య అస్త్రం కూడా ఉందని తెలుస్తోంది....
  • (Sheik Sadiq Ali ) ఇప్పటికే కాంగ్రెస్ పార్టీ లో నియోజక వర్గానికో ముఖ్యమంత్రి ఉన్నారు.రానున్న కాలంలో నెలకో ముఖ్యమంత్రిని మార్చినా కనీసం మరో డజను మంది మిగిలే ఉంటారు.అందుకే ముందు జాగ్రత్త చర్యగా పోటీకి వస్తారనుకున్న వారిని ఓడించటానికి వాళ్ళల్లో వాళ్ళే పోటీ పడి ప్రత్యర్ధులకు పెద్దగా శ్రమపడే అవకాశం ఇవ్వరు.ఇది ప్రతీ ఎన్నికల్లో ఉండే తంతే. ఇదిలా ఉంటే ఇప్పుడు రేసులోకి కొత్తగా కోదండ రామ్ సార్ వచ్చారు. ఎన్నికల ఫలితాలను తారుమారు చేయగల శక్తి తమకు ఉందని టీజేఎస్ బలంగా నమ్ము తోంది .7-10 శాతం ఓట్లు తమకు ఉన్నాయని బల్లగుద్ది చెప్తోంది.రాష్ట్రంలోని 17 పార్లమెంట్ నియోజక వర్గాల్లో ఒక్కో దాని పరిధిలో ఒకటి చొప్పున కనీసం ఒకటి చొప్పున మొత్తం 17 అసెంబ్లీ స్థానాలు కేటాయించాల్సిందే అని పట్టు పడుతోంది.సీట్ల కేటాయింపులో కాంగ్రెస్ అనుసరిస్తున్న నాన్చివేత వైఖరిపై అడుగడుగునా అసహనం వ్యక్తం చేస్తోంది. నిన్న జరిగిన పార్టీ కార్యవర్గ సమావేశంలో వాడీ వేడిగా చర్చలు జరిగాయి.అసలు పొత్తూ వద్దు ,గిత్తూ వద్దు సొంతంగా పోటీ చేసి మన సత్తా ఏమిటో చూపిద్దాం అనేంత వరకూ కూడా చర్చల వేడి కొనసాగిందీ అంటే ,అ పార్టీ లో కాంగ్రెస్ వైఖరి పట్ల యెంత అసహనం పెరుగుతోందో అర్ధం చేసుకోవచ్చు. ఇదిలా ఉంటే,కాంగ్రెస్ వైఖరి మరోలా ఉంది.అంతా తాము చెప్పినట్లే వినాలనీ,ఎన్ని సీట్లు ఇస్తే అన్ని నూరు మూసుకొని తీసుకోవాలనే పంధా లోనే నడుస్తోంది.మిత్రపక్షాలకు ఎక్కడ బలం ఉందొ అని కాకుండా ,తమ పార్టీ ఖచ్చితంగా ఎక్కడ ఓడిపోతుందో అంచనా వేసుకొని ఆ సీట్లను అంటగట్టే యోచనలో ఉంది.యెంత ఎక్కువ కాలం నానిస్తే మిత్రులు అంతగా డీలా పడిపోతారానీ,చివరికి కాళ్ళ బేరానికి వస్తారనీ ,బేరసారాలు చేసే శక్తిని కోల్పోతారానీ కాంగ్రెస్ నమ్ముతోంది.అయితే ఇదే వ్యూహాన్ని చత్తీస్ గడ్,మధ్య ప్రదేశ్ లలో అమలు చేయబోయి కాంగ్రెస్ ఎదురు దెబ్బ తిన్నది.అ పార్టీ  ఒంటెత్తు పోకడ  భరించలేక బీఎస్పీ ,ఎస్పీ లు బయటికి వెళ్లి పోయాయి.వేరే వాళ్ళతో జత కట్టాయి. దాంతో ఆ రెండు చోట్లా కాంగ్రెస్ విజయావకాశాలు సన్నగిల్లాయి.అయినప్పటికీ కాంగ్రెస్ వార్ రూమ్ మేధావుల ఆలోచనల్లో మార్పు రాలేదు.తెలంగాణాలోనూ అదే వైఖరి అనుసరిస్తూ మిత్రపక్షాల విశ్వాసాన్ని కోల్పోయేలా ఉంది. కాగా,ఏదో ఒక నాటికి ఏదోలా పొత్తు కుదిరినా కోదండం సార్ ని ముఖ్యమంత్రి అభ్యర్ధిగా ప్రకటిస్తారా?కనీసం ఆయనకు,వారి పార్టీకి ఆ ఆలోచన వచ్చిందని తెలిసాక మిగిలిన ముఖ్యమంత్రి అభ్యర్ధులు కూడబలుక్కొని ఆయనను ఓడించరనే గ్యారంటీ లేదు.అసలు ఆయనకు పోటీ చేసే అవకాశం ఇస్తారా?లేక మాయమాటలు చెప్పి ఆయనను పోటీకి దూరంగా పెట్టి రాష్ట్రం అంతా తిప్పుతారా? అనేది వేచి చూడాలి.పాపం ఈ వయసులో సార్ కు ఈ కష్టాలు ఏమిటో?...
  • తెలంగాణ రాజకీయాల్లో ఓటమెరగని నాయకుడు టీఆర్ ఎస్ నేత హరీష్ రావు . డైనమిక్ లీడర్ గా ఆయన పేరు గాంచారు. సిద్ధిపేట గడ్డ మీద మామను మించిన అల్లుడు అనిపించుకున్నారు హరీష్. తెలంగాణలోనే భారీ మెజార్టీ తో గెలిచిన నేతల్లో హరీష్ తొలి నాయకుడు. తెలంగాణ కోసం జరిగిన ఉప ఎన్నికల్లో హరీష్ రావు తెలంగాణ చరిత్రలోనే ఎవరు సాధించని రీతిలో ఓట్లు సాధించి రికార్డుల మోత మోగించారు. 2010 ఉప ఎన్నికల్లో 95,878 ఓట్ల తేడాతో ప్రత్యర్థిని చిత్తు చేసి సంచలన విజయం నమోదు చేశారు. ఆ తర్వాత 2014 లో జరిగిన సార్వత్రిక ఎన్నికల్లో సైతం 93,328 ఓట్లతో విజయం సాధించారు హరీష్. సిద్ధిపేటలో ఇప్పటి వరకు ఐదుసార్లు ఎమ్మెల్యేగా పోటీ చేసి ఘన విజయాలు నమోదు చేశారు హరీష్ రావు. ఆయనకు గట్టి పోటీ ఇచ్చే ధీరుడైన మంచి నాయకుడి కోసం మహాకూటమి  దుర్భిణి వేసి గాలిస్తోంది. ఆయనపై పోటీ చేసేదెవరో ఇంతవరకు ఖరారు కాలేదు.  సిద్ధిపేట నియోజకవర్గం టీఆర్ఎస్ కు కంచుకోట లాంటిది.  1985లో మొదటిసారి కేసీఆర్ సిద్ధిపేట నుంచి తెలుగుదేశం పార్టీ అభ్యర్థిగా విజయం సాధించారు. తర్వాత ఆయన 1989, 94, 99 ఎన్నికలతో పాటు 2001, 2004 ఉప ఎన్నికల్లోనూ వరుసగా ఆరుసార్లు విజయం సాధించి 20 ఏళ్ల పాటు ప్రాతినిధ్యం వహించారు. అనంతరం ఆయన మేనల్లుడు హరీష్ రావు సిద్ధిపేటలో కేసీఆర్ వారసత్వాన్ని కొనసాగిస్తున్నారు.  ఆయన 2004 ఉపఎన్నికల నుంచి వరుసగా ఐదుసార్లు ఇక్కడి నుంచి విజయపతాకం ఎగరవేశారు. వరుసగా ఇన్నిసార్లు విజయం సాధించాలంటే కేవలం ప్రజల అభిమానం ఉంటే సరిపోదు. అభివృద్ధి జరగాలి. ఈ విషయంలో మొదట కేసీఆర్, ఇప్పడు హరీష్ రావు ముందంజలో ఉన్నారు.  ఇప్పుడు హరీష్ రావు దృష్టి  అంతా ప్రాజెక్టులపైనే ఉంది. నిత్యం సాగునీటి ప్రాజెక్టుల చుట్టూ తిరుగుతూ యంత్రాంగాన్ని పరుగులు పెట్టిస్తున్నారు. రాత్రి లేదు.. పగలు లేదు ఎప్పటిపకప్పుడు పనులు వేగంగా పూర్తి చేసేందుకు శక్తివంచన లేకుండా పనిచేస్తున్నారు. గ్రామీణ ప్రాంతాల్లో... సామాన్య ప్రజలతో మమేకమవుతూ హరీష్ తనదైన శైలిలో పనిచేస్తున్నారు.  టీఆర్ ఎస్ లో  టాప్ నేతల్లో ఆపద్ధర్మ ముఖ్యమంత్రి  కేసిఆర్ తర్వాత కేటిఆర్, ఆ తర్వాత హరీష్ రావే ఉంటారని అందరూ అనుకునే మాట.  ముఖ్యంగా సిద్ధిపేట పట్టణం అభివృద్ధిలో మిగతా పట్టణాల కంటే ఎంతో ముందుంది. ప్రజలకు కావాల్సిన మౌళిక సదుపాయాలన్నీ ఏర్పాటు చేశారు. అభివృద్ధిలో మోడల్ గా నిలిపారు. జాతీయ స్థాయిలోనూ సిద్ధిపేట మున్సిపాలిటీ అభివృద్ధి, పచ్చదనం, పారిశుధ్యం వంటి విభాగాల్లో అవార్డులను అందుకుంటోంది .  ప్రభుత్వం ఏదైనా నిధులు సాధించడంలో హరీష్ రావు సఫలమయ్యారు. దీంతో టీఆర్ఎస్ కు, ముఖ్యంగా హరీష్ రావుకి  ఇక్కడ తిరుగులేకుండా పోయింది. అందుకే రాష్ట్రంలోనే అత్యధిక మెజారిటీతో ఇక్కడి ప్రజలు హరీష్ రావు కు పట్టం కడుతున్నారు. దీంతో ఇప్పుడు అందరు అభ్యర్థుల కన్ను సిద్ధిపేటపై పడింది. తమను గెలిపిస్తే వారి నియోజకవర్గాలను సైతం సిద్ధిపేటగా అభివృద్ధి చేస్తామంటున్నారు. సిద్ధిపేట నియోజకవర్గంలోని  గ్రామాల్లో, పట్టణంలో ఇప్పటికే ఏకగ్రీవ తీర్మానాలు చేస్తున్నారు. కుల సంఘాలన్నీ హరీష్‌రావుకే ఓటు వేస్తామని తీర్మానం చేస్తున్నాయి. మరో అడుగు ముందుకేసి తమ ఇళ్ల ముందు బోర్డులు పెట్టుకున్నారు. చేసిన అభివృద్ధి, సేవ కారణంగానే తాము ఈ నిర్ణయం తీసుకున్నట్లు ప్రజలు అంటున్నారు. ఇతర పార్టీల అభ్యర్థులు వచ్చి ఓట్లు అడగకుండా ఈ బోర్డులు పెట్టుకున్నట్లు చెబుతున్నారు. ఒకవేళ ఇతర పార్టీల నేతలు గెలుపొందినా హరీష్‌రావు చేసినంత అభివృద్ధి చేయలేరన్నది సిద్ధిపేట ప్రజల నమ్మకం. నిత్యం తమకు అందుబాటులో ఉంటూ కష్టసుఖాలు తెలుసుకునే నేతగా హరీష్‌రావుకు బ్రహ్మరథం పడుతున్నారు. కాళేశ్వరం నీళ్లొస్తే బీడు భూములు సాగుభూములుగా మారతాయని ప్రజలు అనుకుంటున్నారు.  ఈ నియోజకవర్గంలో 2014 లో  కాంగ్రెస్ తరపున  తాడూరి శ్రీనివాస్ గౌడ్ పోటీ చేసి 15371 ఓట్లు సాధించారు . బీజేపీ తరపున సొప్పదండి విద్యాసాగర్ బరిలోకి దిగగా  13303 ఓట్లు వచ్చాయి.  ఈ సారి బరిలోకి ఎవరు దిగుతారో ఇంకా ఖరారు కాలేదు . కాంగ్రెస్, బీజేపీ కూడా బలమైన నాయకుల కోసం గాలిస్తున్నాయి . అభ్యర్థులకు ఆర్ధికంగా మద్దతు ఇచ్చి గట్టి పోటీ ఇవ్వాలని యోచిస్తున్నాయి. హరీష్ రావును ఓడించలేకపోయినా గణనీయంగా మెజారిటీని తగ్గించే ప్రయత్నాలు చేస్తున్నారు.  అయితే ఎవరు దిగినా పోటీ నామ మాత్రమే టీఆర్ ఎస్ నాయకులు  చెబుతున్నారు. ...
  • ఏపీ సీఎం తనయుడు ... మంత్రి నారాలోకేష్ వచ్చే ఎన్నికల్లో ఎక్కడనుంచి పోటీ చేస్తారనే విషయం పార్టీ వర్గాల్లో చర్చనీయాంశంగా మారింది.  కొందరు కుప్పం నుంచి పోటీ చేస్తారని మరి కొందరు పెనమలూరు నుంచి పోటీ చేస్తారని అంటున్నారు .  ఇంతకూ లోకేష్ ఎక్కడ నుంచి పోటీ చేయబోతున్నారు అనేది ప్రస్తుతానికి సస్పెన్స్ గానే ఉంచారు. రాజకీయాల్లోకి  శాసన మండలి ద్వారా వచ్చారన్న ఆరోపణలకు చెక్ పెట్టాలని మంత్రి నారా లోకేష్ నిర్ణయించుకున్నట్లు సమాచారం. అందుకు వచ్చే ఎన్నికల్లో పోటీ చేయటమొకటే మార్గంగా నిర్ణయించుకున్నారని చెబుతున్నారు. వచ్చేఎన్నికల్లో పోటీ చేసే విషయంలో చంద్రబాబు, లోకేష్ మధ్య చర్చ జరిగిందని అంటున్నారు. ఆ చర్చల్లో మూడు నియోజకవర్గాలను ఎంచుకుని ఒకటి సెలెక్ట్ చేసుకోమని చంద్రబాబు చెప్పినట్టు సమాచారం. . కుప్పంతో పాటు మరో రెండు నియోజకవర్గాలను లోకేష్ పరిశీలిస్తున్నారు.  కొద్దీ రోజుల క్రితం వచ్చే ఎన్నికల్లో పోటీ చేస్తానని లోకేష్  ఓ మీడియాకిచ్చిన ఇంటర్వ్యూలో చెప్పారు.  లోకేష్ కోసం ఎంఎల్ఏ పదవిని త్యాగం చేయటానికి కొంతమంది ఎంఎల్ఏలు ముందుకొచ్చినా లోకేష్ మాత్రం పోటీ చేయటానికి సుముఖత చూపలేదు. తాజాగా వచ్చే ఎన్నికల్లో పోటీ చేస్తానని లోకేష్ చెప్పటమంటే తెర వెనుక ఏదో మంత్రాంగం నడిచే ఉంటుందని భావిస్తున్నారు. ప్రత్యక్ష ఎన్నికలకు లోకేష్ సిద్దపడ్డారంటే నియోజకవర్గాన్ని కూడా ఎంపిక చేసుకున్నట్లే అంటున్నారు. ఆ విషయాన్ని పార్టీ వర్గాలు కూడా ధృవీకరిస్తున్నాయి. పార్టీ వర్గాల సమాచారం ప్రకారం మూడు  నియోజకవర్గాలపై లోకేష్ దృష్టి ఉన్నట్లు తెలుస్తోంది. అనంతపురం జిల్లాలోని హిందుపురం మొదటిది. ఈ నియోజకర్గం టిడిపికి కంచుకోట లాంటిది. పార్టీ పెట్టినప్పటి నుండి ఇప్పటి వరకూ ఈ నియోజకవర్గంలో టిడిపి ఒక్కసారి కూడా ఓడిపోలేదు.  ప్రస్తుతం నందమూరి బాలకృష్ణ ప్రాతినిధ్యం వహిస్తున్నారు. వాళ్ళిద్దరూ ఎటూ మామా అల్లుళ్ళే కాబట్టి లోకేష్ పోటీకి బాలకృష్ణ అభ్యంతరం పెట్టకపోవచ్చుమొదట్లో అనుకున్నారు . అయితే వచ్చే ఎన్నికల్లో బాలయ్యే అక్కడ పోటీ చేస్తారట. కాబట్టి అక్కడ కుదరకపోవచ్చు.  ఇక, రెండోది కృష్ణా జిల్లాలోని పెనమలూరు నియోజకవర్గం. ప్రస్తుతం ఇక్కడ బోడెప్రసాద్ ప్రాతినిధ్యం వహిస్తున్నారు. మూడో నియోజకవర్గం చిత్తూరు జిల్లాలోని కుప్పం నియోజకవర్గం. కుప్పం నియోజకవర్గానికి  ప్రస్తుతం చంద్రబాబే ప్రాతినిధ్యం వహిస్తున్నారు. ఇక్కడ చంద్రబాబు గెలుపును అడ్డుకునే ప్రత్యర్ది లేరన్నది వాస్తవం. ఇక్కడి నుండి లోకేష్ ను పోటీ చేయించే ఉద్దేశ్యంతోనే చంద్రబాబు ఉన్నట్లు చెబుతున్నారు. కుప్పం బరిలోకి లోకేష్ దిగితే మరి చంద్రబాబు ఎక్కడనుంచి పోటీ చేస్తారనేది సస్పెన్స్ .  లోకేష్ తరచూ కుప్పంలో పర్యటించటంతో పాటు నేతలు, క్యాడర్ తో సమావేశమవుతున్నారు. నియోజకవర్గంలోని బూత్ లెవల్ కమిటీలతో కూడా లోకేష్ రెగ్యులర్ గా టచ్ లో ఉన్నారు..ఆ మధ్య గుడివాడ నియోజకవర్గంలో  లోకేష్ ఎక్కువగా పర్యటించడంతో అక్కడే పోటీ చేస్తారన్న ప్రచారం కూడా జరిగింది.  అయితే ఈ నియోజకవర్గం లోకేష్ కు అంతసేఫ్ కాదు అని పార్టీ వర్గాలు రిపోర్ట్ ఇచ్చాయట . దీంతో లోకేష్ పెనమలూరు నుంచే బరిలోకి దిగుతారన్న టాక్ పార్టీ వర్గాల్లో బలంగా విన్పిస్తోంది. ప్రస్తుతం  లోకేష్ కుప్పం లేదా పెనమలూరు నుంచి పోటీ చేసే యోచనలో ఉన్నారని అంటున్నారు . అయితే  మరో సేఫ్ ప్లేస్ దొరికితే అక్కడ నుంచి పోటీ చేయవచ్చు. మొత్తం మీద ఎక్కడ నుంచి పోటీ అనేది  ఖరారు కాలేదు. ...
  • జగన్ పవన్  కలుస్తారా?  ఈ యువనేతలు ఇద్దరూ కలసి  ఫార్టీ ఇయర్స్ ఇండస్ట్రీ చంద్రబాబుని  దెబ్బ తీస్తారా ? ఏపీ ఓటర్లలో ఇపుడు ఇదే అంశంపై పేద్ద చర్చ జరుగుతుంది. ఇంత చర్చ ఎందుకు జరుగుతుంది? అంటే జగన్ తనకి శత్రువు కాదని పవన్ స్వయంగా ప్రకటించారు కాబట్టి. ఇక ఆ ఇద్దరు నిజంగా కలుస్తారా అంటే రాజకీయాల్లో ఏదైనా సాధ్యమే ! వచ్చే ఎన్నికల్లో జగన్ పవన్ తో  పొత్తు పెట్టుకొని పోటి చేస్తారు అని ఎప్పటినుండో ప్రచారం జరుగుతోంది. ఆ మధ్య తిరుపతి ఎంపీ వరప్రసాద్ , మరొక నేత పవన్ ను కలిసినపుడు జగన్ కి అవసరమైతే మద్దతు ఇస్తాను అని అన్నారట . అదేమాట ఆ ఎంపీ మీడియాకు కూడా చెప్పారు. ఇక అప్పటినుంచి  ఇద్దరు కలుస్తారు అనే ప్రచారం ఊపందుకుంది.  అలాగే ఒక సందర్భంలో  ఏపీ ప్రత్యేక హోదాకోసం వైసీపీ నేతలు పోరాటం చేయడం స్పూర్తి దాయకం అని  పవన్ కల్యాణ్ ప్రశంసించారు. ఆ తర్వాత వైసీపీ పనితీరు బాగుందని మెచ్చుకున్నారు  ఈ మాటల్ని బట్టి చూస్తుంటే జగన్ తో కలిసి పనిచేసేందుకు పవన్ ఉత్సుకత చూపుతున్నారనే అభిప్రాయం రాజకీయ వర్గాల్లో కూడా వ్యక్తమైంది . ఆ తర్వాత జగన్ పై   పవన్ విమర్శలు కూడా చేశారు . ఇక కొద్దిరోజుల క్రితం పవన్ వ్యక్తి గత విషయాల గురించి జగన్ తూర్పు గోదావరి జిల్లాలో మాట్లాడటం పెద్ద దుమారమే లేపింది. అప్పటినుంచి ఇద్దరు కలుస్తారనే ప్రచారం ఆగిపోయింది. కొందరు నేతలు జగన్ పవన్ ను కలపాలని ప్రయత్నిస్తున్నమాట వాస్తవమే. చంద్రబాబును ఎదుర్కోవాలంటే ఆ ఇద్దరు కలిస్తే బాగుంటుందని భావిస్తున్నారు. జగన్ అభిమానులలో కూడా కొందరు పవన్ తో కలవడం మంచిదే అనే అభిప్రాయం లో ఉన్నారు. కొందరైతే తీవ్రంగా వ్యతిరేకిస్తున్నారు. సోషల్ మీడియా లో అయితే ఒకరిపై ఒకరు దుమ్మెత్తి పోసుకుంటున్నారు.    కొద్దీ రోజుల  క్రితం  జగన్ తనకి శత్రువు కాదని పవన్ ప్రకటించిన క్రమంలో మళ్ళీ ఈ ఇద్దరు కలుస్తారు అన్న ప్రచారం జోరందుకుంది.  ఆ ఇద్దరు కలుస్తారని ... అంబటి రాంబాబు , విజయసాయి రెడ్డి ఈ విషయమై జగన్ తో మాట్లాడారనే ప్రచారం కూడా జరుగుతోంది. బీజీపీ నేతలు ఈ ఇద్దరినీ కలుపుతారని పుకార్లు కూడా ఉన్నాయి . ఇక టీడీపీ నేతలు అయితే జగన్ పవన్ బీజేపీ తో కుమ్మక్కు అయ్యారని ఎప్పటినుంచో ఆరోపణలు చేస్తున్నారు. రాజకీయాల్లో రహస్యంగా చేతులు కలపడం ఒకరినొకరు దెబ్బతీసుకోవడం మామూలే.  నిజంగా రేపు వీరంతా కలసినా  ఆశ్చర్యపోనవసరంలేదు . అందులో తప్పేమి లేదు. తెలుగు దేశం కూడా ఇందుకు అతీతం కాదు. ఇక పవన్ , జగన్ పొత్తులు పెట్టుకుంటే చంద్ర  బాబు కి కొంత ఇబ్బందే అని చెప్పుకోవాలి . అయితే ఎన్నికల నాటికి  వాతావరణంలో తేడా ఉండొచ్చు , వ్యూహాలు మారిపోవచ్చు. పొత్తులకు ఇంకా చాల సమయముంది కాబట్టి అప్పటికి ఎవరు ఎవరితో ఉంటారో ఇపుడే చెప్పలేము.  బీజేపీ పవన్ జగన్ కలుస్తారా ? బీజేపీ పవన్ మాత్రమే కలుస్తారా ? తెలుగుదేశం కాంగ్రెస్ కలసి కూటమి ఏర్పాటు చేస్తాయా ? రాజకీయ సమీకరణాల్లో మార్పులు ఎలా ఉంటాయో ఇపుడే అంచనా కందని పరిస్థితి. ముందు ముందు ఏమైనా జరగవచ్చు. మొత్తానికి  ఈ సారి ఏపీలో అయితే ఎన్నికలు రసవత్తరం గా ఉంటాయనడంలో సందేహం లేదు.   ఇక జనసేన గురించి చెప్పుకోవాలంటే  పార్టీ నిర్మాణమే జరగలేదు…కేవలం అభిమానులు, కాపుల ఓట్ల పై  మాత్రమే పవన్ ఆధారపడినట్లు కనిపిస్తుంది. పెద్దగా నేతలు కూడా చేరలేదు.  జగన్ విషయానికొస్తే  పార్టీ కి కొన్ని చోట్ల మంచి పట్టు ఉంది. దానికి తోడు ఆ పార్టీలో గట్టి నేతలు ఉన్నారు..2014 లో జరిగిన శాసనసభ ఎన్నికల్లో తెలుగు దేశం పార్టీ కి  44.6% ఓట్లు రాగా జగన్ పార్టీకి 44. 4% ఓట్లు వచ్చాయి. కేవలం రెండు శాతం ఓట్ల తేడాతో జగన్  ప్రతిపక్షం లో కూర్చోవాల్సి వచ్చింది. ఇక వచ్చే ఎన్నికల్లో జగన్ గెలవడం ఖాయం అని  ప్రచారం జరుగుతోంది. ఈ క్రమంలో  ఏడాది నుంచి పాదయాత్ర  చేస్తూ ఓటర్లను ఆకట్టుకుంటున్న జగన్ పవన్ తో పొత్తు పెట్టుకోవాలిసిన అవసరం ఏంటి ఆనే వాదనలు కూడా  వినిపిస్తున్నాయి.  అయితే పవన్ ను కూడా తక్కువగా అంచనా వేయడానికి  వీల్లేదు.  గత ఎన్నికలో బాబు,పవన్, మోడీ పొత్తు పెట్టుకుంటే.. జగన్ కేవలం 2 శాతం ఓట్ల తేడాతో ఒడిపోయాడు కాబట్టి బాబు వ్యతిరేక ఓట్లు చీలకూడదు అంటే జగన్ పవన్ తో పొత్తు పెట్టుకుంటే మేలు అని కొందరు రాజకీయ నాయకులు చెబుతున్నారు . త్వరలో వీళ్లిద్దరి మధ్య పొత్తుల విషయం లో ఒక  క్లారిటీకి వస్తుంది అని కూడా అంటున్నారు.  పొత్తుల విషయంలో  జగన్ ప్రస్తుతానికి అంత సుముఖంగా లేరని తెలుస్తోంది. తనపై పరోక్షంగా వాడివేడి విమర్శలు,  ఆరోపణలు చేస్తోన్న 'జనసేనాధిపతి' 'పవన్‌కళ్యాణ్‌'తో పొత్తు పెట్టుకోనే యోచన లేదని జగన్ అంటున్నట్టు  సమాచారం . తనకు తెలీకుండా ఆ పార్టీతో చర్చించవద్దని జగన్ పార్టీ నాయకులకు చెప్పారట.  పవన్ టీడీపీ మనిషే అన్న అనుమానం జగన్ కి బలంగా ఉంది.  దానికి కారణం పవన్ గట్టిగా చంద్రబాబుపై విమర్శలు  చేయడం లేదు. ఆమధ్య క్లీన్ పాలిటిక్స్ తమ పార్టీ  లక్ష్యమని చెప్పిన పవన్  చంద్రబాబు వైసీపీ కి చెందిన ఎమ్మెల్యేలను పార్టీలో చేర్చుకుని వారిలో కొందరికి మంత్రి పదవులు కట్టబెట్టిన తీరుపై స్పందించలేదు. అలాగే ఇటీవల  తనకు పేపర్‌, టివి లేదని..ఇవన్నీ కావాలంటే 'జగన్‌'తో వెళ్లండి..అని పవన్ విమర్శలు చేయడం జగన్ కి నచ్చలేదట . అలాగే వైకాపా ఓటు బ్యాంక్‌ 'జనసేన'కు  బదిలీ కావచ్చు కానీ ... 'జనసేన' ఓటు బ్యాంక్‌ వైకాపాకు బదిలీ అయ్యే పరిస్థితి లేదనే అనుమానాలు కూడా ఉన్నాయి. టోటల్ గా ఇప్పటికైతే  జగన్ పవన్ తో కలిసే సీన్ లేదు. అయితే రాజకీయాల్లో  శాశ్వత మిత్రులు, శాశ్వత శత్రువులు ఉండరు కాబట్టి ఎన్నికల నాటికి  జగన్ పవన్ కలసి పోటీ చేసినా ఆశ్చర్యపోనక్కర్లేదు....
  • తెరాస అధినేత కేసీఆర్ మైండ్ గేమ్ లో  కోదండరాం చిక్కుకున్నారా ? చూస్తుంటే అదే నిజమనిపిస్తోంది.   పార్టీ పెడితే పెట్టారు, పోటీ చేస్తే చేశారు కానీ, తెలంగాణ ద్రోహులతో ఎలా చేతులు కలుపుతారంటూ కోదండరాంపై కేసీఆర్ చేసిన విమర్శలు బాగానే పనిచేసినట్టున్నాయి. మొదట్లో ఈ విమర్శలను పెద్దగా పట్టించుకోని కోదండరాం మెల్లమెల్లగా ఆలోచనలో పడినట్టు కనిపిస్తోంది. ఈ నేపథ్యంలోనే ఏదో ఒక నెపంతో కూటమి నుంచి బయటి కొచ్చే యోచన చేస్తున్నారా ?  ‘‘మహాకూటమి వైఖరిపై  కోదండరాం తీవ్ర అసంతృప్తి తో ఉన్నారు . అందుకే ఆయన "  చర్చలు సాగుతూనే ఉన్నాయి. ఉమ్మడిగా పని చేద్దామని అనుకుంటున్నాం. కలుస్తున్నాం. మాట్లాడుకుంటున్నాం. చాయ్‌ తాగి వెళ్లిపోతున్నాం. నిర్ణయాలు మాత్రం జరగడం లేదు ’’ అని తన అసంతృప్తిని వ్యక్తం చేశారు . ఇప్పటికే అసహనంగా ఉన్న కోదండరాం కాంగ్రెస్ కనీసం 15 సీట్లు ఇవ్వకపోతే   కూటమిలో ఉండే అవకాశాలు లేవు . కనీసం 20-25 సీట్లు  కోదండరాం డిమాండ్ చేస్తున్నారని సమాచారం  . అయితే కాంగ్రెస్ అన్ని సీట్లు ఇచ్చే యోచనలో లేదు . కోదండకు 8లేదా 9 సీట్లు యిచ్చే యోచనలో ఉంది. కాంగ్రెస్ నేతలు ఫైనల్ ఫిగర్ చెబితే కోదండరాం ప్రత్యామ్నాయాలపై దృష్టి సారిస్తారు. ఆయన తన అభ్యర్థుల జాబితా రెడీగా పెట్టుకున్నారు. సరిగ్గా కేసీఆర్ కి కావాల్సింది అదే . టీజేఎస్ ఒంటరిగా బరిలో దిగితే మాత్రం మహా కూటమి బాగా బలహీన పడుతుందని వేరే చెప్పక్కర్లేదు. ప్రభుత్వ వ్యతిరేక ఓటు మహాకూటమి, టీజేఎస్ మధ్య చీలిపోతుంది.  మిగిలిన వారంతా  సపోర్ట్ చేస్తే టీఆర్ఎస్ అభ్యర్థులకు అనుకోకుండా మెజార్టీ వస్తుంది . ఈ ఆలోచనతోటే కేసీఆర్ , టీఆర్ఎస్ నేతలు పరోక్షంగా కోదండరాంని రెచ్చగొడుతున్నారు. కోదండరాం టీఆర్ఎస్ ట్రాప్ లో పడి ఒంటరిపోరుకి సిద్ధమైతే.. కచ్చితంగా కేసీఆర్ మళ్లీ తెలంగాణలో చక్రం తిప్పడం ఖాయం. మహాకూటమిని మట్టికరిపించడం అంతకంటే ఖాయం అంటున్నారు . మరి కోదండరాం ఏం చేస్తారనేది  కొద్దీ రోజులు పోతే కానీ తెలీదు.  కోదండ రామ్ కి తన పార్టీ బలం ఏమిటో తెలుసు . ఒంటరి పోరాటం కష్టమని తెలుసు. అధికారపార్టీ తో పోరు సులభం కాదని తెలుసు. వ్యతిరేక ఓటు చీలిపోతే మళ్ళీ కేసీఆర్ అధికారంలోకి వస్తారని ఆయనకో అంచనా లేకపోలేదు.  అయితే దిగజారి సింగిల్ డిజిట్ సీట్లలోనే పోటీ చేస్తే పరువు పోతుందని భావిస్తున్నారు. అందుకే ఆయన కనీసం 20-25 సీట్లు అడుగుతున్నారు. అందులో 10 గెలిస్తే ఒక విపక్ష నేతగా పోరాటాలు చేయవచ్చని కోదండరామ్ భావన. ఒకవేళ కాంగ్రెస్ పవర్ లో కొస్తే ఒకటో రెండో పదవులు వస్తాయనే ఆశ . మహాకూటమి అధ్యక్షుడిగా తన ఇమేజ్ ని   ఫణంగా పెట్టినపుడు కనీసం ఆ మాత్రం సీట్లు ఇవ్వవకపోతే ఎలా అని  కోదండరామ్ భావిస్తున్నారు.  అందుకే  ప్రత్యామ్నాయం గురించి యోచిస్తున్నారు. 21మంది అభ్యర్థులతో  తొలిజాబితా సిద్ధంగా ఉన్నప్పటికీ తొందరపడి ఒంటరి పోరాటానికి వెళ్ళరని అంటున్నారు. ఈ క్రమంలోనే  బీజేపీ ఆఫర్ ను కూడా పరిశీలించవచ్చు అంటున్నారు. బీజేపీ అధికారపార్టీకి తెర వెనుక మద్దతు అందిస్తోందని కూడా కోదండ రామ్ అనుమానిస్తున్నారు. అందుకే షరతులతో కూడిన పొత్తు ప్రతిపాదన చేస్తున్నారని అంటున్నారు.  మహాకూటమి నుంచి కోదండరాంని బయటకు తీసుకు రావాలనే తెరవెనక అజెండాతోటే బీజేపీ అగ్ర నేతలు కూడా పని చేస్తున్నారు.  అందుకే పలు ప్రతిపాదనలు కోదండరాం కి పంపారని అంటున్నారు. ఉద్యమ సమయంలో ప్రాణాలర్పించిన వారి కుటుంబ సభ్యులు, ప్రాణాలకు తెగించి పోరాటం చేసిన వారు, యువకులు, విద్యార్థులు.. ఇలా ఓ వర్గం టీఆర్ఎస్ పై తీవ్ర అసంతృప్తితో  ఉంది.  ఆ అసంతృప్త వర్గం ఓట్లన్నీ  టీజేఎస్ కే పడతాయి.  సో.. ఈ ఓట్లను కొల్లగొట్టాలంటే కోదండరాం కావాల్సిందే. అంటే మహా కూటమి నుంచి ఆయన్ను బైటకు తేవాల్సిందే. తెలంగాణలో ఇప్పుడిదే జరుగుతోంది. సీట్ల కొట్లాటలో కోదండ బైటకు వస్తే, అతనికి రెడ్ కార్పెట్ పరచి బీజేపీతో కలసి పనిచేసేలా వ్యూహం రెడీ అయిందని అంటున్నారు. కాంగ్రెస్ బేరసారాలతో విసుగెత్తిపోయిన కోదండరాం, టీడీపీతో చేతులు కలిపి తెలంగాణ ద్రోహులతో కలిశాడన్న అపవాదుని తలకెత్తుకోవడం ఇష్టంలేని కోదండరాం.. ఎలాగోలా నెపం మహాకూటమిపైనే నెట్టి బయటకు వచ్చేయడానికి డెడ్ లైన్ కూడా పెట్టేశారని అంటున్నారు.  భావసారూప్య పార్టీలతో కలసి వెళ్తానని కోదండరాం ఇప్పటికే హింట్ కూడా ఇవ్వడంతో.. బీజేపీ - టీజేఎస్ కొత్త కూటమి తెలంగాణ ఎన్నికల్లో తెరపైకి రావడం దాదాపు ఖాయం. టీజేఎస్ ని కలుపుకొని వెళ్లడానికి బీజేపీ స్థానిక నాయకత్వం కూడా సుముఖంగానే ఉంది. ఇప్పటికే దీనిపై పలు దఫాలు చర్చలు జరిగాయని  సమాచారం. మొత్తం మీద ఏం జరగబోతోందనేది కొద్దీ రోజులు పోతే  కానీ తేలదు.  ...
  • వివాహ బంధం దంపతుల మధ్య ముళ్ల బంధంగా మారుతోంది . మూడు ముళ్ళు.... ఏడు అడుగులకు అర్ధాలే మారుతున్నాయి .   నూరేళ్ళు కలసి మెలసి పిల్లాపాపలతో జీవితాన్ని గడపాల్సిన దంపతులు కొంత కాలానికే పోలీసు స్టేషన్ల గుమ్మాలు తొక్కుతున్నారు. అనుమానంతో కొంతమంది, వివాహేతర సంబంధాలు, ఆర్థిక పరిస్థితులు సరిగ్గా లేక అదనపు కట్నాల వేధింపుల నేపథ్యంలో  భార్య భర్తలు రోడ్డెక్కుతున్నారు.  ప్రతీ చిన్నవిషయానికి ఘర్షణలు పడుతూ దూరమవుతున్నారు. తల్లిదండ్రులకు తీరని క్షోభను మిగులుస్తున్నారు. ఇటీవలి కాలంలో  పోలీసుస్టేషన్‌ల్లో భార్యాభర్తల మధ్య ఫిర్యాదులు పెరిగిపోతున్నాయి. భార్యాభర్తలతో పాటు ఇరువైపుల పెద్దలను పిలిపించి కౌన్సిలింగ్‌ ఇచ్చే పనిలో పోలీసులు నిమగ్నమయ్యారు.  ఏ పోలీస్టేషన్‌లో చూసినా భార్యాభర్తల మధ్య విభేదాలు , ఒకరిపై ఒకరు పెట్టుకుంటున్న కేసులే ఎక్కువయ్యాయి.  భార్య, భర్త లేదా అత్తమామలపై అనుమానిస్తున్నారని, కట్నం తేవాలని, మద్యం తాగి కొడుతున్నాడని ఇలా పలు రకాలుగా ఫిర్యాదులు చేస్తున్నారు .  పోలీసు స్టేషన్‌ల గుమ్మాలు ఎక్కిన కేసులు కొన్ని మాత్రమే. ఇవి కాక  గ్రామ పెద్దలు, కుటుంబ పెద్దల వద్ద నలిగే గొడవలు చాలా ఉంటాయి. భార్య, భర్తల మధ్య విభేదాలు, అనుమానాలతో కాపురాలు కూలిపోతున్నాయి.   అర్ధాంతరంగా ఎన్నో కుటుంబాలు రోడ్డున పడుతున్నాయి. ఇరువురు  పంతాలకు పోతుండటంతో  తల్లిదండ్రుల చాటున బతికిన వారి పిల్లల భవిష్యత్‌ ప్రశ్నార్థకంగా మారుతోంది. బాధిత భార్య,భర్తలు, ఇరు వర్గాల తల్లిదండ్రులు స్టేషన్‌ల చుట్టూ తిరగాల్సిన పరిస్థితి నెలకొంది. ఈ క్రమంలో చివరికి భార్యో, భర్తో ఎవరో ఒకరు అన్యాయం కాక తప్పడం లేదు.  ఇదివరలో  భర్త నుండి కానీ, భర్త వైపు వారినుండి కాని ఎటువంటి ఇబ్బందులు వచ్చినా భరిస్తూ కాపురం చేసేవారు, ఒకవేళ తల్లి తండ్రులకు చెప్పినా ఏదోవిధంగా సర్దుకుపొమ్మని సలహా ఇచ్చేవారు లేదా ఏదో రకంగా ఇరువురికి ఇబ్బంది కలుగ కుండా, పరువు రోడ్డున పడకుండా పరిష్కారం చేసేవారు. అప్పటి సామాజిక పరిస్థితుల్లో విడాకులు, భార్య భర్తలు విడి విడిగా ఉండటం అంటే ఎంతో అవమానకరంగా, పరువు తక్కువగా భావించేవారు. తల్లి తండ్రులు, మధ్యవర్తులు  ఏదో రకంగా సర్ది చెప్పి విడాకుల వరకు వెళ్ళకుండా   పరిష్కరించే వారు. స్త్రీ ఆర్ధికంగా బలహీనురాలు కావటం, సమాజంలో విడాకులు తీసుకున్న స్త్రీ పట్ల చిన్న చూపు ఉండటం వలన కూడా ఎన్ని కష్టాలు, ఇబ్బందులు పడినా ఒక రకంగా స్త్రీలే సర్దుకు పోయేవారు. అయితే కాలక్రమేణా సమాజంలో వచ్చిన మార్పులకు అనుగుణంగా స్త్రీలకు రాజ్యాంగంలో కొన్ని ప్రత్యెక హక్కులు, అధికారాలు కల్పించబడ్డాయి. తండ్రి ఆస్తిలో పురుషులతో సమానంగా స్త్రీలకు ఆస్తి హక్కు కల్పించారు, ఇదే సమయంలో 'ఉమ్మడి కుటుంబ' వ్యవస్థ విచ్చిన్నమై  వేరు కాపురాల వ్యవస్థ ఏర్పడింది. కొత్త పెళ్ళైన భార్యా భర్తలకు మంచి చెడు చెప్పే వారు, చిన్న చిన్న తగాదాలు తీర్చే వారే కరువయ్యారు. ఉద్యోగ రీత్యా తమ తల్లి తండ్రులకు దూరంగా ఉండే కుటుంబాలకు ఈ సమస్య మరీ ఎక్కువగా ఉంది.  ఈ మధ్య కాలంలో పురుషులలో 'పురుషాధిక్య' ధోరణి తగ్గి ఉద్యోగం, వ్యాపకాల మీద, కెరీర్ మీద ఎక్కువగా దృష్టి పెడ్తున్నారు, కానీ ఉద్యోగం చేసే కొంత మంది స్త్రీలలో 'స్త్రీవాద'ధోరణి ఎక్కువైంది. అలాగని ఉద్యోగం చేయని వాళ్ళేమీ తక్కువ తినలేదు, కొంతమంది స్త్రీలు తమ కోరికలు తీర్చుకోవటానికి భర్తలను రాచి రంపాన పెడుతున్నారు.  గతంలో కాపురాల్లో వచ్చే గొడవల్లో ఎక్కువగా స్త్రీలే భాదితులుగా ఉండేవారు,ఇపుడు  'భార్యా భాదితులే' కూడా ఉన్నారు.  దంపతుల మధ్య ఏర్పడిన చిన్న చిన్న కలహాలు కూడా విడాకుల వరకు దారి తీస్తున్నాయి. పురుషులు శారీరకంగా బలవంతులైనా కాని స్త్రీలు మానసికంగా పురుషుల కంటే ఎంతో బలవంతులు. చాలా సందర్భాల్లో భర్తలే సర్దుకుపోటానికి సిద్ధపడుతున్నా భార్యలు మాత్రం అందుకు ససేమిరా ఒప్పుకోవటం లేదు, వాళ్ళ కోరికలు నెరవేర్చుకొనే వరకు, పంతం తీర్చుకోటానికి ఎంతవరకైనా వెళ్తున్నారు.  దంపతులు  పంతం, పగ, ప్రతీకారం తీర్చుకోటానికి  ఎంతకైనా తెగిస్తున్నారు, కాపురాలను నాశనం చేసుకుంటున్నారు.  రెండు చేతులు కలిస్తేనే చప్పట్లు, కాపురంలో ఏర్పడే కలహాల్లో భార్య, భర్తల ఇద్దరి పాత్ర ఉంటుంది, కాకపొతే ఒకరిది ఎక్కువ, ఇంకొకరిది తక్కువ. తప్పెవరిదైనా భార్య, భర్తలిద్దరూ సర్దుకుపోతే చాలా మంచిది, లేదా ఒకరు సర్దుకున్నా కాని సమస్య జటిలం కాకుండా ఉంటుంది. భార్య, భర్తల మధ్య సమస్య పరిష్కారం కానప్పుడు మొదటగా ఇరువురి తల్లి తండ్రుల సమక్షంలో తీర్చుకోవటం మంచిది. అలా కాకుండా పోలీస్ స్టేషన్స్ కు వెళుతున్నారు. కేసులు పెట్టుకుని కోర్టులు చుట్టూ తిరుగుతున్నారు. ఇంకొందరు ఉన్మాదంలో హత్యలకు కూడా దిగుతున్నారు.  కుటుంబ న్యాయస్థానం, ఫ్యామిలీ కౌన్సిలర్స్ పరిశీలన ప్రకారం  అహం , పంతాలు, పట్టింపుల వంటి చిన్న చిన్న కారణాల వల్లనే ఎక్కువమంది విడాకులు తీసుకుంటున్నారు. పిల్లున్న వారి కేసుల్లో తప్పు ఎవరిదైనా చివరకు పిల్లల భవితవ్యం బలి అవుతోంది. ...
  • నాలుగు సార్లు పట్టు పట్టి ఒకే కుటుంబంపై వరుసగా పోటీ చేసిన వ్యక్తులు చాలా అరుదుగా ఉంటారు. పార్టీ కూడా అన్ని సార్లు టిక్కెట్ ఇవ్వదు. ఇంకెవరు దొరకని పరిస్థితుల్లోనే అది సాధ్యం. అలాంటి వ్యక్తుల్లో సతీష్ రెడ్డి ఒకరు. ఆయన వైఎస్ కుటుంబానికి ఆయన బద్ధ వ్యతిరేకి. అలాగే  ఎంపీ జేసీ దివాకరరెడ్డి కి దగ్గర బంధువు.  ఈ నేపథ్యంలో వైఎస్ వ్యతిరేకులంతా సతీష్ రెడ్డికి మద్దతు పలుకుతారు.  1999 నుంచి వైఎస్ కుటుంబంపై  పట్టు వదలని విక్రమార్కుడిలాగా సతీష్ రెడ్డి పోటీ చేస్తున్నారు. పులివెందుల పై పట్టు బిగించాలని తపన పడుతున్న ఈ తెలుగు దేశం నాయకుడి కల నెరవేరడం లేదు.  ఆ మధ్య సతీష్ రెడ్డి భీషణ ప్రతిజ్ఞ చేసాడు. 2019 ఎన్నికల్లో గెలవక పోతే రాజకీయ సన్యాసం చేస్తానని సవాల్ విసిరారు.  ఈ సారైనా ఆయన కల నెరవేరుతుందా ? అదంత సులభమేనా ? అక్కడి ఓటింగ్ తీరు ఎలా ఉందొ చూద్దాం .  పులివెందుల వైఎస్ కుటుంబానికి కంచుకోట. ఆ కంచుకోట ను ఛేదించడం కష్టమే. 1978 నుంచి అక్కడ వైఎస్ కుటుంబానిదే హవా ! ఒక సారి గతం లోకి వెళ్లి చూస్తే 1999 పులివెందుల ఎన్నికల్లో సతీష్ రెడ్డి  వైఎస్ తో తలపడ్డారు.నాటి ఎన్నికలో వైఎస్ 30 వేల పైచిలుకు ఓట్ల ఆధిక్యతతో  గెలుపొందారు. సతీష్ కి వచ్చిన ఓట్లు 32000 వేలు మాత్రమే. వైఎస్ కు 62 వేల ఓట్లు వచ్చాయి . మళ్ళీ 2004 లో వైఎస్ పైనే పోటీ చేశారు. అపుడు వైఎస్ 40,777 ఓట్ల మెజారిటీ తో గెలిచారు. వైఎస్ కు 74,432 ఓట్లు వచ్చాయి. సతీష్ రెడ్డి కి 33,655 ఓట్లు వచ్చాయి. 99 తో పోలిస్తే కొన్ని ఓట్లు పెరిగేయి. ఆతర్వాత వైఎస్ పైనే 2009 ఎన్నికల్లోనూ పోటీ చేశారు. అప్పట్లో వైఎస్ 68,681 ఓట్ల ఆధిక్యతతో విజయం సాధించారు. వైఎస్ కు పడిన ఓట్లు మొత్తం 103556. సతీష్ రెడ్డి కి వచ్చిన ఓట్లు 34,875 మాత్రమే. 2004 తో పోలిస్తే మరి కొన్ని ఓట్లు పెరిగేయి. ఇక ఆ తర్వాత 2014 లో సతీష్ రెడ్డి వైఎస్ జగన్ పై పోటీ చేశారు. జగన్ 95. 243 ఓట్ల ఆధిక్యతతో గెలిచారు. పులివెందుల లో అంతకు ముందు ఎవరికి రాని మెజారిటీ వచ్చింది. జగన్ కి వచ్చిన ఓట్లు 1,44,576 కాగా సతీష్ రెడ్డి కి 49,333 ఓట్లు  వచ్చాయి. అంతకు ముందు ఎన్నికతో పోలిస్తే సతీష్ రెడ్డికి  సుమారు15 వేల ఓట్లు పెరిగేయి.మొత్తం మీద  ఏ ఎన్నికలో అయినా సతీష్ కొచ్చిన ఓట్లు 50  వేలకు మించలేదు. వరుసగా నాలుగు ఎన్నికల్లోను పోటీ చేసి ఓడిపోయారు అనే సానుభూతి ప్రభావం పెద్దగా  కనిపించలేదు. ఈ సారి ఎన్నికల్లో  ఒక వేళ జగన్ పై అసంతృప్తి పెరిగినా ఒక పది వేలు ఓట్లు అదనంగా పడినా సతీష్ రెడ్డి  గెలవడం అంత సులభం కాదు. ఎందుకంటె దాదాపు 95 వేలకు పైగా ఆధిక్యతను తగ్గించడం అంటే మాటలు కాదు. కాబట్టి  మొత్తం సీన్ రివర్స్ అయితే కానీ సతీష్ రెడ్డి గెలుపు సాధ్యం కాదు.కాగా కేవలం ఎమ్మెల్సీ ఎన్నికల్లో గెలిచినంత మాత్రానా ప్రత్యక్ష ఎన్నికల్లో గెలవడం సులభంకాదు. అదేసమయంలో వైఎస్ ఫ్యామిలీకి ఓట్లు పెరిగాయి కానీ ఎక్కడ తగ్గిన దాఖలాలు లేవు. ఇందుకు కారణం వైఎస్ కుటుంబం పై ఓటర్లకున్న అభిమానం.. అక్కడ వైఎస్ చేపట్టిన అభివృద్ధి పనులు. ఇంకా ఇతర కారణాలు అయి ఉండవచ్చు.   ఇక పులివెందులకు నీళ్లు అందించిన ప్రాజెక్టు కు 90 శాతం నిధులు కేటాయించింది ఎవరో ? రాజకీయ కారణాలవల్ల ఆగిపోయిన ప్రాజెక్టు కు 10 శాతం నిధులు ఇచ్చి పనులు పూర్తి చేసింది ఎవరో బయట వారికంటే పులివెందుల ఓటర్లకు బాగా తెల్సు. అయినప్పటికీ జగన్ ఓటమికి టీడీపీ వ్యూహ రచన చేస్తోంది. కసరత్తులు చేస్తోంది.  ఇవన్నీ ఎన్నికల్లో మామూలే. ఏదైనా సతీష్ రెడ్డి  ఓర్పు ని అభినందించాలి. అంతిమంగా ప్రజలే తమకు ఏ నేత  కావాలో నిర్ణయించుకుంటారు. ఇక్కడ వైఎస్ కుటుంబం కూడా గ్రహించాల్సిన విషయం ఏమంటే వ్యతిరేకత చాప కింద నీరులా పెరుగుతుందని.. దాన్ని తగ్గించుకోవాల్సిన అవసరం ఉందని.  .....  KNMURTHY...
  • ఔను .  చంద్రబాబు కొన్నాళ్ళు ప్రత్యేక హోదా అని మళ్ళీ మాట మార్చి ప్యాకేజి కి రెడీ అన్నారు.  తర్వాత హోదా అనేది సెంటిమెంట్ గా మారిందని  బాబు తెలుసుకున్నారు.  జగన్ హోదా అంశాన్ని సజీవంగా  జనంలో ఉంచారని గ్రహించి  చంద్రబాబు మనసు మార్చుకుని హోదా కోసం పోరాటం మొదలెట్టారు. ఒక నాడు హోదా  సంజీవనా? అంటూ మండి పడిన బాబు మళ్ళీ అదే హోదా ను అస్త్రంగా మలుచుకునేందుకు  తపన పడుతున్నారు.  ఇక్కడ క్రెడిట్ జగన్ కివాల్సిందే .  హోదా అనేది  ప్రజలకోసం కావచ్చు తద్వారా  పార్టీని కాపాడుకునేందుకు కావచ్చు. ఏదైతేనేమి బాబు యు టర్న్ తీసుకున్నారు.  (అయినా ఆయనకు  ఇదేమి కొత్త కాదు)  ఆయన యు టర్న్ తీసుకుని  జగన్ ఉచ్చులో ఇరుక్కున్నారు. అవిశ్వాసం తో ఏమి సాధిస్తాం అని విమర్శలు చేసి కూడా తాజాగా కేంద్రం పై అవిశ్వాసం పెట్టారు. కేవలం మాట మార్చినందుకే చంద్రబాబు యు టర్న్ తీసుకున్నారని మోడీ తో సహా బీజేపీ నేతలు విమర్శిస్తున్నారు.అందులో తప్పేమి లేదు . అలాంటి విమర్శలను బాబు లెక్క చేయరు కూడా. ఇక  మోడీ కూడా  2014 ఎన్నికల ప్రచారంలో ప్రత్యేక హోదా ఇస్తామని బహిరంగ సభల్లో హామీలు ఇచ్చి  మాట మార్చారు. అంటే  ఆయన కూడా యు టర్న్ తీసుకున్నట్టే కదా ! అధికారం లోకి వచ్చేక ఒక మాట ... రాక ముందు ఒక మాట . మేనిఫెస్టో లో పెట్టిన అంశాన్ని కూడా తుంగలో తొక్కారంటే యూ టర్న్ తీసుకోవడం కాక మరేమిటి ?  యు టర్న్ తీసుకున్నా పర్వాలేదు.. కనీసం  అవిశ్వాసం పై జరిగిన చర్చలో కూడా హోదా సంగతి అలా ఉంచి  ప్రత్యేకించి ఏపీ కి ఏమి చేయాలనుకుంటున్నారో మోడీ స్పష్టం చేయలేక పోయారు.   ఆంధ్ర‌ప్ర‌దేశ్ రాష్ట్ర ప్ర‌జ‌ల సంక్షేమం విష‌యంలో తాము వెన‌క‌డుగు వేసే ప్ర‌శ్నే లేదని.....    రాష్ట్రానికి ఇచ్చిన అన్ని హామీలు అమ‌లుచేసి తీరుతామన్నారు బాగుంది. కానీ ఎప్పటిలోగా అనే అంశంలో స్పష్టత ఏదీ లేదు. చంద్రబాబు తో వైరం ఉంటే అది రాజకీయాల్లో తేల్చుకోవచ్చు . అంతే కానీ రాష్ట్ర ప్రజలు ఏమి చేశారు ??  బాబు వైసీపీ ఉచ్చులో ఇరుకున్నారని మోడీ అన్నారంటే  ఏపీలో హోదా అంశంపై ప్రజలు ఎన్ని ఆశలు పెట్టుకున్నారో గ్రహించనంతటి అమాయకుడు ఏమి కాదు.  నిన్న మొన్నటి దాకా కలసి ఉన్న పార్టీ  అవిశ్వాసం పెట్టేంతవరకు వచ్చిందంటే  ఏపీ ప్రజల మనో భావాలు ఏ రకంగా ఉన్నాయో తెలుసుకోలేని వాడు కాదు.  సో మొత్తం మీద చూస్తే హామీ ఇచ్చి  మొండి చేయి చూపిన  మోడీ కూడా యు టర్న్ తీసుకున్నారనే చెప్పుకోవాలి.  ఇక సీనియర్ నేత అని  గెలిపిస్తే నాలుగేళ్లు  ఏమి మాట్లాడకుండా  బీజేపీ మోసం చేసిందని  ప్రజలను నమ్మించేందుకు బాబు మహా కృషి చేస్తున్నారు. ఆయన యు టర్న్ తీసుకోకపోతే ఆశ్చర్యపోవాలి ..  తీసుకుంటే  ఆశ్చర్యం ఏమి లేదు. కాబట్టి ఇద్దరూ ......... ...
  • (Hazzu Reddy)    లోకసభలో అవిశ్వాసం పై జరిగిన చర్చ .. నిజం చెప్పుకోవాలంటే పెద్ద గొప్పగా లేదనే చెప్పుకోవాలి.  అయితే ఈ చర్చ ద్వారా కొన్ని నిజాలు వెల్లడైనాయి. అవేమిటో తెలుసుకుందాం.  1. అవిశ్వాస తీర్మానం పై చర్చ అనంతరం జరిగిన ఓటింగ్ లో అనుకూల ఓట్లు 130 వస్తాయని అనుకుంటే ... 126 మాత్రమే వచ్చాయి .  తగ్గిన ఆనాలుగు ఓట్లు  టీడీపీ ఎంపీలవే అంటున్నారు .  ఎవరా ఎంపీలు అని  టీడీపీ అధిష్ఠానం ఆరా తీస్తోంది.  2. మేము అధికారంలోకి వస్తే ప్రత్యేకహోదా ఇస్తామని చెబుతున్న రాహుల్  పార్లమెంట్ లో ప్రత్యేక హోదా గురించి ఒక్క నిమిషం కూడా మాట్లాడలేదు.. 3. విభజన సమయంలో ప్రత్యేక హోదాకు విభజన చట్టంలో చట్టబద్దత ఎందుకు కల్పించలేదు అన్న రాజ్ నాధ్ సింగ్ ప్రశ్నకు కాంగ్రెస్ నేత ఖర్గే నుంచి కాని కాంగ్రెస్ నుంచి కాని సమాధానం లేదు. 4. తలుపులు మూసి తల్లీ పిల్లను వేరు చేశారంటూ పాత కధను గుర్తుచేసిన ప్రధాని మోడీ ఏపీని అభివృద్ధి చేస్తామని చెప్పాడే కాని అందుకు ఎటువంటి సాయం అందిస్తారో చెప్పలేదు. 5. నాడు ఎన్టీఆర్ ఏ ఉద్దేశంతో,ఎవరికీ వ్యతిరేకంగా టీడీపీ పార్టీని పెట్టారో దాన్ని పార్లమెంట్ సాక్షిగా తుంగలో తొక్కిన విషయాన్ని కళ్ళారా చూశానని చెప్పిన విశాఖ ఎంపీ హరిబాబుకు టీడిపీ సమాధానం ఇవ్వలేదు. బాబు కాంగ్రెస్ తో కలసి అడుగులు వేస్తున్నారని బీజీపీ గ్రహించింది.  6. ఎన్డీఎ నుంచి బయటకొచ్చిన తరువాత చంద్రబాబుకి ఫోన్ చేసి వైసీపీ ఉచ్చులో పడ్డావని మోడీ  చెప్పడం జగన్ కి పరోక్షంగా బూస్ట్ ఇచ్చినట్టు అయింది . 40 ఇయర్స్ ఇండస్ట్రీ అని చెప్పుకునే బాబును యు టర్న్ తీసుకునేలా జగన్ ఎంత ప్రభావితం చేశారో మోడీ చెప్పారు.  7. రాజ్ నాథ్ చంద్రబాబు ఇంకా మా మిత్రుడే అనడం,  తెలంగాణా సీఎంను పొగడటం కొన్ని కొత్త  సందేహాలకు  తావిస్తున్నాయి. 8 ఓటుకు నోటు అంశాన్ని పరోక్షంగా ప్రస్థావించి  ఎవర్నీ వదిలిపెట్టబోమంటూ మోడీ  ఇచ్చిన స్టేట్ మెంట్ కూడా ఆలోచనలో పడేలా చేస్తోంది. 9. టీడీపీ ఎంపీలు గల్లా జయదేవ్,రామ్మోహన్ నాయుడు ఏపీ వాణిని పార్లమెంట్ లో గొప్పగా వినిపించారు..వారికి అభినందనలు చెప్పి తీరాల్సిందే.. 10. ఇదే విషయాల్ని 2015లో ప్రతిపక్షనేత అసెంబ్లీలో అడిగినందుకు సీఎం మీరు జీర్ణించుకోలేకపోతున్నారంటూ ప్రతిపక్ష పార్టీని చెడామడా తిట్టడం,ఇప్పుడు అదే విషయాలను ఆ పార్టీ ఎంపీలే  ప్రస్తావించడం అర్థం కాని విషయమే.. 11.ఆది నుంచి ప్రత్యేక హోదాకి రాంరాం చెప్పి ప్రత్యేక ప్యాకేజీని సీఎం కోరారని పార్లమెంట్ సాక్షిగా ప్రధాని చెప్పడం.. దీన్ని నిజం చేస్తూ బాబు చివరి క్షణాల్లో ప్యాకేజీని వదిలి హోదా ఊసు ఎత్తుకోవడం ఆయన రాజనీతి ఏంటో తెలుపుతోంది.. 12. రాఫెల్ ఒప్పందం కాంగ్రెస్ పాలనలో ఆంటోని రక్షణమంత్రిగా ఉన్నప్పుడు జరిగింది..దీనిని కాంగ్రెస్ ఎంతగా ముందుకు తీసుకెళితే అంతలా ఎదురుదెబ్బలు తగులుతాయని, బిజెపితో పాటు కాంగ్రెస్ దోషిగా నిలబడే అవకాశం ఉందని అంచనా వేశారేమో దాన్ని పెద్ద వివాదం చేయకుండానే వదిలేశారు. 13. రాహుల్ పార్టీ అధ్యక్షుడు అయ్యాక  పని తీరు మెరుగు పడినట్టు చెప్పుకోవచ్చు.  ఏదేమైనా మాటల మరాఠి ప్రధాని మోడీ మరొకసారి మాయచేశారు..కాంగ్రెస్, టీడీపీ పార్టీలను దోషులుగా నిలబెట్టే ప్రయత్నం చేశారు. దీనికి ప్రతిగా ఓ హగ్ తో రాహుల్  ప్రధాని మీద కక్షను తీర్చుకునే ప్రయత్నం చేశారు.....
  • మోడీ సర్కార్ పై  టీడీపీ ప్రవేశపెట్టిన అవిశ్వాసంపై చర్చ జరిగిన నేపథ్యంలో జనసేన అధ్యక్షుడు పవన్‌ కల్యాణ్‌ స్పందించారు. అవిశ్వాసంపై టీడీపీ వాదన బలహీనంగా కనిపించిందని పవన్ పేర్కొన్నారు. ప్రత్యేక హోదా అంశాన్ని సరైన రీతిలో ప్రస్తావించిలేకపోయారని అన్నారు. ‘పార్టీకోసం, వ్యక్తిగత ప్రయోజనాల కోసం ప్రత్యేక హోదా విషయంలో టీడీపీ రాజీ పడిందన్నారు. ప్రజల నమ్మకాన్ని టీడీపీ నాయకులు కోల్పోయారు. ఏపీ ప్రజల మనసును గెలిచే సువర్ణావకాశాన్ని తెలుగుదేశం పార్టీ చేజార్చుకుంది. గతంలో ప్రత్యేక ప్యాకేజీని ఒప్పుకోవడం వల్లే ఈ పరిస్థితి వచ్చింది. ప్రత్యేక హోదాను టీడీపీనే గతంలో వ్యతిరేకించింది. ఏపీ ప్రజలు టీడీపీ నాయకులకు ఎలా కనిపిస్తున్నారు. వ్యక్తి గత లాభాల కోసం ‘స్పెషల్‌ క్యాటగిరి స్టేటస్‌’కి మూడున్నర సంవత్సరాలుగా తూట్లు పొడిచి ఈ రోజు వ్యర్థమైన ప్రసంగాలు చేసి ప్రయోజనం ఏమిటి?  కేంద్రం చేత మోసగింపపడ్డాం ..అంటే,ప్రజలు నమ్ముతారు .. అని టీడీపీ నాయకులు ఎలా అనుకుంటారు?  సుదీర్ఘమైన రాజకీయ అనుభవం  ఉన్న నాయకులకి కేంద్రం వంచన తెలియటానికి ఇన్ని సంవత్సరాలు పట్టింది అంటే మేము నమ్మాలా ?’ అని పవన్ కల్యాణ్‌  ట్వీటర్‌ ద్వారా ప్రశ్నించారు. ...
  • పార్లమెంట్ వేదికగా ప్రధాని నరేంద్ర మోదీపై.. కాంగ్రెస్ జాతీయాధ్యక్షుడు, ఎంపీ రాహుల్ గాంధీ ప్రశ్నల వర్షం కురిపించారు. అవిశ్వాసం  పై జరిగిన చర్చ సందర్భంగా సుమారు 20 నిమిషాలకు పైగా ప్రసంగించిన రాహుల్ కేంద్ర ప్రభుత్వం వైఫల్యాలను ఎండగట్టారు. కాంగ్రెస్ నేతలు రాహుల్ ప్రసంగాన్ని విని మురిసిపోయారు. గతంలో కంటే రాహుల్ రాటు తేలారని సంబరపడుతున్నారు. ఇక సోనియా గాంధీ సంగతి చెప్పనక్కర్లేదు.   మోదీ విదేశీ పర్యటన గురించి రాహుల్ మాట్లాడుతూ.. ఫ్రాన్స్ ప్రభుత్వంతో ఒప్పందంపై మోదీ సర్కార్ అబద్ధాలాడిందన్నారు. ప్రధాని మోదీ మార్కెటింగ్ కోసం కోట్లు ఖర్చుపెడుతున్నదెవరో? చెప్పాలని డిమాండ్ చేశారు. బడా కంపెనీలతో ప్రధాని కుమ్మక్కు అందరికి తెల్సిందే  అని  వ్యాఖ్యానించారు. యూపీఏ హయాంలో రాఫెల్ విమానం ఖరీదు రూ. 520 కోట్లు కాగా  ఇప్పుడు విమానం ఖరీదు రూ. 1600 కోట్లు అయ్యింది. ప్రధాని ఫ్రాన్స్‌కు వెళ్లి ఎవరితో చర్చలు జరిపారు?. రక్షణమంత్రి దేశానికి అబద్ధం చెబుతున్నారు. భారత్-ఫ్రాన్స్ మధ్య ఒప్పందం గురించి మాట్లాడటానికి.. నేనే స్వయంగా ఫ్రాన్స్ అధ్యక్షుడితో మాట్లాడాను. రహస్యంగా ఉంచాల్సిందేమీ లేదని ఫ్రాన్స్ అధ్యక్షుడు నాకు స్పష్టంగా చెప్పారు. కొన్ని పారిశ్రామిక సంస్థలకు మేలు చేయడం కోసమే రాఫెల్ డీల్..?. దీనికి ప్రధాని మోదీ సమాధానం చెప్పాలి" అని రాహుల్ డిమాండ్ చేశారు.  ఫ్రాన్స్‌ దేశంతో ఇండియా రహస్య ఒప్పందం కుదుర్చుకుందని రాహుల్ గాంధీ ఆరోపించారు.  రాఫెల్‌ కొనుగోళ్లలో వంద శాతం అక్రమాలు జరిగాయని ధైర్యంగా చెప్పగలరని, అక్రమాలు జరగలేదని నిరూపించగలరా? అని రాహుల్  మోదీకి సవాల్ విసిరారు.   రాహుల్ ప్రసంగపై కేంద్ర మంత్రి నిర్మలా సీతారామన్ తీవ్ర అభ్యంతరం వ్యక్తం చేశారు.   దేశానికి ప్రధానిని కాదు.. సేవకుడినని నరేంద్రమోదీ చెబుతారని, మరి బీజేపీ జాతీయ అధ్యక్షుడు అమిత్‌షా కొడుకు జైషా అక్రమాలకు పాల్పడితే ఈ సేవకుడు ఏమైపోయారని  రాహుల్ ఎద్దేవా చేశారు. అమిత్ షా పుత్రుడు 11 రెట్లు ఆస్తులు పెంచుకున్నారని ఆయన ఆరోపించారు .  ప్రధాని ఇచ్చిన మాటకు విలువ ఉండాలన్నారు. ప్రతి ఖాతాలో 15 లక్షలు జమచేస్తామని అధికారంలోకి వచ్చారని, ఏం సాధించారని.. దేశం అడుగుతోందని రాహుల్‌ కేంద్రాన్ని నిలదీశారు. ఏడాదికి 2 కోట్ల మందికి ఉద్యోగాలు ఇస్తామన్నారని.. ఆ హామీ ఏమైందని రాహుల్‌ ప్రశ్నించారు.  నన్ను పప్పు అన్నా భరిస్తాను దేశం కోసం అని కూడా స్పష్టం చేశారు.    కాగా ప్రధాని నరేంద్ర మోదీ దగ్గరకు వెళ్లి కోపాన్ని తగ్గిస్తానంటూ రాహుల్ గాంధీ ఆలింగనం చేసుకున్నారు. ఊహించని ఈ చర్యతో మోదీ తొలుత తత్తరపాటుకు గురైనారు.  ఆ తర్వాత తేరుకుని రాహుల్ భుజం తట్టి నవ్వారు. అనంతరం రాహుల్ తన సీటులోకి వెళ్లి కూర్చున్నారు. అయితే ఆ తర్వాత రాహుల్ కన్ను గీటారు. ఎవరిని చూసి, ఎందుకు కన్నుగీటారో తెలియదు గానీ ‘అధికార పార్టీకి భలే ఝలక్ ఇచ్చాను కదా’! అన్నట్టుగా ఎవరినో చూసి రాహుల్ కన్ను గీటడం సమావేశాలను వీక్షిస్తున్న ప్రజలను ఆశ్చర్యానికి గురి చేసింది. ఇపుడు ఆ ఫోటోలు సోషల్ మీడియాలో హల్ చల్ చేస్తున్నాయి. ...
  • ఆంధ్రప్రదేశ్ రాష్ట్రానికి కేంద్రం చేసిన అన్యాయంపై కొద్దీ నెలల క్రితం పార్లమెంటులో తన గళాన్ని గట్టిగా వినిపించిన తెలుగుదేశం ఎంపీ గల్లా జయదేవ్ కు అలాంటి మరో అవకాశం లభించబోతోంది.  అవిశ్వాసం పై జరిగే చర్చలో ప్రధాన వక్తగా జయదేవ్ బీజేపీ దుమ్ము దులిపేందుకు సిద్ధమౌతున్నారు.  ఎంపీ కేశినేని నాని చర్చ ప్రారంభించి జయదేవ్ కి అప్పగిస్తారు. సమయం తక్కువ ఇస్తారు కాబట్టి మరింత ఎఫెక్టీవ్ గా మాట్లాడాలని జయదేవ్ కి  సీఎం చంద్రబాబు కొన్ని సూచనలు చేశారు. చట్టప్రకారం ఏపీకి ఇవ్వాల్సినవి ఎప్పుడిచ్చారు..? ఎంతిచ్చారు.. ఏమిచ్చారు..? ఇలా ప్రతి దానిపైనా పక్కాగా లెక్కలతో సహా సభలో ప్రస్తావించాలని బాబు చెప్పారు. అవిశ్వాసంపై చర్చలో తొలి అవకాశం టీడీపీకే వస్తుంది. ప్రధాని జవాబు తరువాత మళ్లీ ‘రైట్ టు రిప్లై’ ఉంటుంది. చర్చలో ముగ్గురు సభ్యులు మాట్లాడే అవకాశం రావచ్చు. దీన్ని సమర్థంగా ఉపయోగించుకోవాలన్నారు చంద్రబాబు. 18అంశాలలో ఏవిధంగా అన్యాయం జరిగిందో అంశాలవారీగా వివరించాలని సూచించారు. విభజన చట్టం అమలుపై ఇంతవరకూ ఒక్క సమావేశం కూడా ఎందుకు పెట్టలేదో నిలదీయాలన్నారు. కేంద్ర హోంశాఖా పరంగా కానీ, పీఎంవో పరంగా కాని సమావేశాలు జరపలేదన్న విషయం అందరికీ తెలిసేలా చేయాలన్నారు. అలాగే ఢిల్లీ-ముంబై ఇండస్ట్రియల్ కారిడార్‌కు ఎంత ఇచ్చారు? విశాఖ-చెన్నై ఇండస్ట్రియల్ కారిడార్‌కు ఎంత ఇచ్చారు..? దేశం మొత్తానికి వచ్చిన జైకా నిధులు ఒక్క రాష్ట్రానికే ఎందుకు ఇచ్చారు లాంటి ప్రశ్నల్ని కూడా సంధించాలని బాబు చెప్పారు. తిరుపతి ఎన్నికల ప్రచారంలో, అమరావతి శంకుస్థాపనలో ప్రధాని చెప్పిన మాటలు గుర్తు చేయాలని సీఎం సూచించారు చంద్రబాబు. వివిధ సంస్థల శంకుస్థాపనల్లో కేంద్రమంత్రుల ప్రసంగాల్ని కూడా లోక్‌సభ వేదికగా ప్రస్తావించబోతున్నారు.  అలాగే.. సుప్రీంకోర్టులో కేంద్రం దాఖలు చేసిన అఫిడవిట్‌లను ప్రత్యేకంగా పేర్కొనడం ద్వారా.. ఏపీకి కేంద్రం  ఎలా అన్యాయం చేస్తుందో వివరించాలన్నారు. అవిశ్వాసంపై చర్చలో కేంద్రం అఫిడవిట్ అంశాలను ఎండగట్టాలన్నారు.  2018 ఫిబ్రవరి 7వ తేదీన  ప్రధాని మోడీ లోక్‌సభలో చేసిన ప్రసంగాన్ని కూడా ప్రస్తావించాలని చెప్పారు . తలుపులు మూసి విభజన బిల్లు ఆమోదించి ఏపికి అన్యాయం చేశారని నాడు మోడీయే చెప్పారని..  ఈ నాలుగేళ్లలో కేంద్రం ఏపీకి ఏం చేసిందో చెప్పాలని గట్టిగా అడగాలన్నారు .బాబు సూచనలమేరకు  జయదేవ్ స్పీచ్ ప్రిపేర్ చేసుకుంటున్నారు.  ఇచ్చే సమయాన్ని బట్టి  మరికొంత సమయం అడిగి తీసుకుని తెలుదేశం వాదన ను జయదేవ్ సభ ముందు ఉంచనున్నారు. ...
  • ఎంపీ జేసీ దివాకర్ రెడ్డి  తీరే వేరు.  ఎప్పుడు ఏమి మాట్లాడతారో ఆయనకే తెలీదు. సభా మర్యాదలు కూడా పాటించరు. ఎవరిని ఎంత మాటలైనా అంటారు. తిట్టి ... తిట్టించుకోవడంలో  జేసీ కి  మరెవరు సాటి  రారు.  సాగినంత కాలం నా అంత వారు లేరందరు అనే సామెత జేసీ కి బాగా వర్తిస్తుంది.  తాజాగా ఆయన చంద్రబాబును ఇరుకున బెట్టేలా వ్యవహరిస్తున్నారు. టీడీపీ కేంద్రం పై అవిశ్వాసం ప్రవేశపెట్టిన క్రమంలో జేసీ పార్లమెంటుకి హాజరు కానని బీష్మించుక్కూర్చున్నారు.జేసీ వ్యవహార శైలి ఇపుడు బాబుకి తలనొప్పిగా మారింది. ఈ పరిస్థితుల్లో ఏం చేయాలో పాలుపోక తెలుగుదేశం అధిష్టానం మల్లగుల్లాలు పడుతోంది.  మోడీ తో యుద్ధం చేస్తున్నామని అందులో భాగంగా అవిశ్వాస తీర్మానం నొటీస్ ఇచ్చామని చెప్పుకుంటున్న నేపథ్యంలో  జేసీ  అసలు పార్లమెంటుకే రానని ప్రకటించారు. విప్ జారీ చేసినా వెళ్ళేది లేదు అంటున్నారు.  అవిశ్వాసం పెట్టిన పార్టీ కి చెందిన సభ్యులే సభకు హాజరు కాకపోతే సీఎం చంద్రబాబు పరువు పోతుందని మిగతా ఎంపీలు టెన్షన్ పడుతున్నారు. కీలక సమయం లో జేసీ ఇలా చేయడం సబబు కాదని వారు మండి పడుతున్నారు. ప్రతిపక్షం ఈ అంశంపై విమర్శలు చేసే అవకాశాన్ని చేజేతులా కల్పించినట్లు అవుతోందని టీడీపీ నేతలు భావిస్తున్నారు.   మొత్తం మీద తెలుగుదేశం పార్టీలో జేసీ కలకలం రేపారు. కాగా  జేసీ అలక వెనుక  వెనుక రాజకీయ కారణాలు ఉన్నట్టు సమాచారం.  అనంతపురంలోని పాతూరులో రోడ్ల విస్తరణకు సంబంధించిన వివాదంలో జేసీ ఒత్తిడి చేసినా అధికారులు పట్టించుకోలేదు. ఎమ్మెల్యే వెనుక సీఎం ఉన్నారని జేసీ భావిస్తున్నారు. ఇటీవల మాజీ ఎమ్మెల్యే గురునాథరెడ్డిని జేసీనే టీడీపీలో చేర్పించారు. ఆయన పార్టీలో చేరి  నెలలు గడచినా ఎలాంటి పదవి ఇవ్వలేదు. అలాగే మాజీ ఎమ్మెల్యే మధుసూదన్‌ గుప్తా చేరిక వాయిదా అంశాల్లో తన మాట చెల్లుబాటు కాకపోవడంతో జేసీ ఈ నెల 12న సీఎంను కలిసినప్పటికీ  వీటిపై స్పష్టత రాకపోవడంతో అలక పూనారని  ప్రచారం జరుగుతోంది.  ఈ నెల 25 లోగా తన డిమాండ్లపై అధిష్టానం స్పందించాలని లేని పక్షంలో పార్టీకి రాజీనామా చేస్తానని కూడా జేసీ అల్టిమేటం జారీ చేసినట్టు  చెబుతున్నారు.  ఆయన్ను బుజ్జగించేందుకు టీడీపీ వర్గాలు  గట్టి ప్రయత్నాలే చేస్తున్నాయి . అయితే తనతో ఎవరూ మాట్లాడలేదని ... బాబు మాట్లాడారో లేదో ఆయనకే తెలియాలని జేసీ అంటున్నారు. ...
  • ఏపీ సీఎం  చంద్రబాబు   మాజీ ఎంపీ  ఉండవల్లి అరుణకుమార్ డైరెక్షన్లో నడవబోతున్నారు. ఇవాళ బాబుతో ఉండవల్లి వెలగపూడి సచివాలయంలో సమావేశమైనారు. ఈ సందర్భంగా  రాష్ట్ర విభజన రాజ్యాంగ విరుద్ధంగా జరిగిందంటూ గత పార్లమెంట్ సమావేశాల్లో  ప్రధాని నరేంద్ర మోదీ చేసిన వ్యాఖ్యలనే ఆయుధంగా మలచుకొని ఈ వర్షాకాల సమావేశాల్లో పోరాటం చేయాలని సీఎం కు ఉండవల్లి  సూచించారు.  బుదవారం నుంచి పార్లమెంటు వర్షాకాల సమావేశాలు మొదలవుతున్నాయి. ఈ సమావేశాల్లో అనుసరించాల్సిన వ్యూహాలపై వారిద్దరి మధ్య చర్చ జరిగింది. ఏపీ విభజన రాజ్యాంగ విరుద్ధంగా జరిగిందని ప్రధాని చేసిన వ్యాఖ్యలను సీఎం దృష్టికి ఉండవల్లి తీసుకెళ్లారు. రాష్ట్ర విభజన రాజ్యాంగ విరుద్ధంగా జరిగిందంటూ సుప్రీంకోర్టులో తాను వేసిన వ్యాజ్యం, రాష్ట్రపతి, ప్రధానికి గత ఏడాది తాను రాసిన లేఖల ప్రతులనూ బాబుకు అందజేశారు. రాష్ట్ర విభజన అంశంపైనా, దాని పై మోదీ చేసిన వ్యాఖ్యలపైనా పార్లమెంటు సమావేశాల్లో నిలదీయాలని సీఎంకు సూచించారు. ‘అసలు రాష్ట్ర విభజనే జరగలేదు. నాడు పార్లమెంటు తలుపు లు మూసిన దగ్గరినుంచి జరిగిందంతా చట్టబద్ధం కా దు. అసలు విభజనకు ఎంతమంది అనుకూలం, ఎంతమంది వ్యతిరేకం అన్న ఓట్ల లెక్కింపూ జరగలేదు. నాడు సభలో జరిగిన పరిణామాలపై చర్చ కోసం ఈ పార్లమెంటు సమావేశాల్లో లోక్‌సభ స్పీకర్‌కు నోటీసు లు ఇవ్వాలి’ అని సీఎంకు సూచించారు. ఒకవేళ ఆ నోటీసును స్పీకర్‌ తీసుకోకుంటే.. మోదీ చేసిన వ్యాఖ్యల ను గుర్తుచేయాలన్నారు. స్పీకర్‌కు నోటీసులు ఇచ్చే విషయాన్ని పార్టీలో చర్చించి నిర్ణయిస్తామని ముఖ్యమంత్రి అన్నట్లు సమాచారం.  ఇదిలా  ఉంటే  స్పీకర్ కి నోటీసు ఇచ్చినా ఆమె స్వీకరిస్తుందా ? అనేది ప్రస్తుతానికి సస్పెన్స్.  అసలు సమావేశాలు సజావుగా సాగుతాయా ? అనే సందేహాలు కూడా వ్యక్తమౌతున్నాయి. మొత్తానికి ప్రధాని మాట్లా ఆధారంగా టీడీపీ పోరాటం చేసేందుకు రంగంలోకి దిగుతోంది. చూద్దాం ఏమి జరుగుతుందో ???  ఇంకా ఉండవల్లి ఏమి చెప్పారోతెలుసుకునేందుకు  వీడియో చూడండి. ...
  • మహాసంప్రోక్షణ సందర్భంగా శ్రీవారి ఆలయం మూసివేత అంశంపై  ఏపీ సర్కారు దిగివచ్చింది.  సోషల్ మీడియాలో పెద్ద ఎత్తున నిరసన వ్యక్తం కావడం తో సర్కార్ ఉక్కిరి బిక్కిరి అయింది . ఈ అంశంపై  సీఎం చంద్రబాబు స్పందించారు. శ్రీవారి ఆలయాన్ని మూసివేయవద్దని, భక్తులకు దర్శనం కల్పించాలని సీఎం  టీటీడీని ఆదేశించారు. మహా సంప్రోక్షణ నేపథ్యంలో భక్తుల మనోభావాలు దెబ్బతీసేలా వ్యవహరించవద్దని టీటీడీ అధికారులకు సీఎం సూచించారు. ఆగమ శాస్త్రానుసారం పూజా కార్యక్రమాలు నిర్వహించాలని, గతంలో ఏ సంప్రదాయాలు పాటించారో.. ఇప్పుడు కూడా అవే సంప్రదాయాలు పాటించాలని ఆదేశించారు.  శ్రీవారి ఆలయంలో పూజలకు ఇబ్బంది కలుగకుండా చూడాలన్నారు. పరిమిత సంఖ్యలో భక్తులు శ్రీవారిని దర్శించుకునేందుకు ఏర్పాట్లు చేయాలని సూచించారు. రోజులు తరబడి దర్శనం భక్తులు ఎదురూచూసేలా చేయరాదని చెప్పారు. దీంతో  టీ టీ డీ అధికారులు వెనక్కి తగ్గారు. కాగా   భక్తులకు ఇబ్బంది కలుగుతుందనే దర్శనాలు రద్దు చేశామని, దీనిపై సోషల్ మీడియాలో దుష్ప్రచారం చేసారని ఈ వో అన్నారు. దర్శనం రద్దుపై నిర్ణయాలను పున:సమీక్షించాలని సీఎం ఆదేశించారని ఈవో తెలిపారు. మహాసంప్రోక్షణ సమయంలో దర్శనం కల్పించే విషయంపై 24న జరిగే పాలకమండలి సమావేశంలో నిర్ణయం తీసుకుంటామని అన్నారు. ఆగస్టు 11న 9 గంటలు, 12న 4 గంటలు, 13న 4 గంటలు, 14న 5గంటలు, ఆగస్టు 15న 5గంటలు, 16న 4గంటలు మాత్రమే దర్శనం కల్పించవచ్చని ఈవో సింఘాల్ అన్నారు .  12 ఏళ్లకు ఒకసారి నిర్వహించే ఆలయ మహాసంప్రోక్షణ సందర్భంగా ఆగస్టు 9 సాయంత్రం నుంచి 17వ తేదీ ఉదయం 6 గంటల వరకు శ్రీవారి ఆలయాన్ని మూసివేయాలని టీటీడీ తొలుత నిర్ణయం  తీసుకుంది.   సుమారు తొమ్మిది రోజుల పాటు శ్రీవారి ఆలయాన్ని మూసివేస్తుండటంపై తీవ్ర ఆగ్రహం వ్యక్తమైన సంగతి తెలిసిందే. ...
  • (Mohan Ravipati )   తితిదే తీసుకున్న నిర్ణయం చాలా పొరపాటు. తొమ్మిది రోజుల పాటు భక్తులకు దర్శనం నిలిపివేత ఖచ్చితంగా భక్తుల మనోభావాలను  దెబ్బతీస్తుంది. మహాసంప్రోక్షణం ఇప్పుడు కొత్తగా వచ్చిందేమీ కాదే, ప్రతి పన్నెండేళ్ళకొకసారొ వస్తూనే ఉంది కదా ! అప్పుడెప్పుడూ లేని ఈ దర్శనాల నిలిపివేత ఇప్పుడు ఎందుకు ? నిజమే ! మీరన్నట్లు మహాసంప్రోక్షణ సమయంలో రోజుకి కేవలం 20 వేల మందికే దర్శనం కల్పించగలం అనుకుంటే అదే ప్రచారమ్ చేయండి. అప్పుడు కొండమీదకు వచ్చెవాళ్ళు తగ్గుతారు, ఆ వచ్చిన కొద్దిమందికే దర్శనం చేయింఛండి, అంతే కానీ, గుండుగుత్తగా అసలే కొండమీదకు భక్తులనే రానీయకపోతే ఎలా ! మహాసంప్రోక్షణ సమయంలో మూలమూర్తిలో దివ్యతేజస్సు ఉండదు, దర్శనం చేసుకున్నా ఫలితం ఉండదు అని చెప్పటం కూడా సరైనది కాదు. తిరుమలలో గాలి పవిత్రం, నీరు పవిత్రం, మొక్క పవిత్రం, రాయి పవిత్రం, తిరుమలలో ప్రతిదీ పవిత్రమైనదే. అందుకే భక్తులు అలిపిరి నుండి తిరుమల వరకు కన్పించే ప్రతి రాతికి, చెట్టుకు కూడా పూజలు చేస్తారు. అక్కడ ప్రతి వస్తువులో దివ్యశక్తి ఉంటుంది. మూలమూర్తి మాత్రమే కాదు, అలయశిఖరాన్ని చూసిన భక్తుడు తన్మయత్వంలో మునిగిపోతాడు. మరి మూలమూర్తికి దివ్యతేజస్సు ఉండదు అనటం భక్తుల విశ్వాసాన్నిదెబ్బతీయటమే అవుతుంది., అందుకే ఆ సమయంలో మూలమూర్తి దగ్గరకు వెళ్ళటానికి ఇబ్బంది అయితే , లఘు దర్శనమో, మహలఘు దర్శనమో, ఇంకా అవసరమైతే మహా మహా మహా లఘుదర్శనమో ఏర్పాటు చేయండి. అంతగా అవసరమైతే ఆ ఒక్కరోజు ఆలయం మూసివేయండి, కానీ భక్తులను అసలు కొండమీదకే రానీయకపోవటం అనే నిర్ణయం అసమంజసం. అసలే రమణదీక్షితులు  తిరుమల గురించి తీవ్ర ఆరోపణలు చేస్తున్న సమయంలో తొమ్మిది రోజుల పాటు భక్తులను కొండమీదకి రానివ్వకపోవటం మరిన్ని అపోహలకు దారి తీస్తుంది. అయన ఆరోపణలన్నీ పసలేని ఆరోపణలు అని నిరూపించాల్సిన సమయంలో చరిత్రలో ఎప్పుడూ లేనివిధంగా ఇలా దర్శనాలే ఆపు చేయటం, భక్తులను కొండమీదకు రానివ్వకపోవటం ఎలాంటి సంకేతాలు పంపిస్తుందో తితిదే అర్దం చేసుకోలేదా ! తితిదే చైర్మన్ గా పుట్టా సుధాకర యాదవ్ భక్తుల మనోభావాలు నిజంగా అర్ధం చేసుకోలేకపోయాడా లేక ఎవరైనా అతన్ని తప్పుదోవ పట్టిస్తున్నారా !! మహా సంప్రోక్షణ సమయంలో దర్శనాలు నిలిపివేయటం అర్ధం చేసుకోవచ్చు కానీ, కొండమీదకు భక్తులే రావద్దు అనే నిర్ణయాన్ని వెనక్కి తీసుకోవాలి. కాకపోతే,ఈ సమయంలో దర్శనాలు ఉండవు కాబట్టి దయచేసి కొండకు రాకండి,ఇబ్బందులు పడకండి అని ప్రచారం వీలైనంత ఎక్కువగా చేయండి. అంతే కానీ భక్తులను కొండమీదకు రాకుండా ఆపకండి.  ఏమైనా ముఖ్యమంత్రి చంద్ర బాబు ఇందులో వెంటనే జోక్యం చేసుకోవాలి. ఇలాంటి అసంబద్దమైన, నిర్ణయాన్ని పునఃసమీక్షించాలి. భక్తుల మనోభావాలు దెబ్బతినకుండా, తిరుమల పవిత్రత దెబ్బతినకుండా, మహాసంప్రోక్షణ కార్యక్రమం పూర్తి ఆగమ నియమాలతో సాగేలా , ఈ మూడింటిని బ్యాలెన్స్ చేసేలా సరైన విధానం రూపొందించాలి....