Latest News
సినిమా
  •  ( Priyadarshini Krishna ) ....... ప్లాట్ , కథాంశం అనుకున్నప్పుడే డైరెక్టర్ కి ( తానె రైటర్ కూడా ఐతే ) ఆ కథ ఎక్కడ జరుగుతుందనే అంశం కూడా నిర్ణయించుకుంటాడు. పాత్రలు ఏస్థాయివి అనేది కూడా కథని బట్టి నిర్ణయం అయిపోతాయి. అంటే , పాత్రలు మాట్లాడే భాష లేదా యాస కూడా కథాంశం నిర్ణయమైనప్పుడు అయిపోతుంది. ఎటొచ్చి సంభాషణలే కథ లోని నడకని బట్టి, సందర్భలను బట్టి మారుతుంటాయి. ఇది అందరికీ , అంటే సామాన్య ప్రేక్షకునికి కూడా తెలిసిన విషయం. ఇక ...కథకుడు చెప్పదల్చుకున్న విషయాలు ఆయా పాత్రలద్వారా ఆయా పాత్రల ఉద్వేగాలనుబట్టి చెప్పిస్తూవుంటాడు.  అంటే, ఒకే పాత్ర సినిమా అంతటా ఒకే తీరుగా ఉండకుండా పరిస్తితిబట్టి మాట్లాడే విధానం కూడా మారుతూ ఉంటుంది. హీరో పాత్రే తీసుకుందాం - హీరోయిన్ తో ఒకలాగా, తల్లిదండ్రులతో ఒకలాగా, ఫ్రెండ్స్ తో ఒకలాగా, విల్లన్ తో ఒకలాగా మాట్లాడుతూ ఉంటాడు.  ఇది మనం కూడా సహజంగా మన జీవితాల్లో చేసేదే.  ఐతే, ఒక కథానాయకునికి : ప్రేక్షకుని తేడా ఏంటి ..? భావోద్వేగాలకు లోనైనా కూడా తన స్థాయిని మర్చిపోకుండా పాత్ర నిజజీవితంలో కంటే కాస్త ఉన్నతంగా వ్యవహరించడమే హీరొయిజం... విలన్ తో కూడా పాత్రవుచిత్యాన్ని బట్టి మాట్లాడటం హీరోని మనకంటే పైస్థాయిలో నిలబెట్టే అంశం... ప్రాసకోసం ప్రాకులాడుతూ కొందరు దర్శకుల పాత్రలు మాట్లాడుతుంటాయి. అవి కృతకంగా ఉంటాయి. అసలా దర్శకుని ముఖ్య ఉద్దేశం తానో గొప్ప కవిని అని పదే పదే గుర్తుచేయడం. ఇలా కాకుండా పాత్ర స్థితిని స్థాయిని బట్టి సంభాషణలుంటే పది కాలాలపాటు నిలిచిపోతాయి ఇక్కడో ఉదాహరణ చెప్పుకుందాం.. అడవిరాముడు ( NTR, KRR,జంధ్యాల ) సినిమాలో విలన్ నాగభూషణం ప్రతి డైలాగుల్లో ఒక గన్నయ్యమీద పెట్టి తానుచెప్పాలనుకున్నది చెప్పి ' చెప్పింది చెయ్యి చరిత్ర అడక్కు' అంటాడు.  ఇది ఉన్నతస్థాయి సంభాషణ.  అలాగే, సాగర సంగమం (Kamal Hasan, Vishwanath, జంధ్యాల ) లో పొట్టి ప్రసాద్ ' అమ్మగారు చెప్పారయ్య ...' అని అంటూవుంటాడు. ఇది కూడా పాత్రకు సంభందించి ఉన్నతమైన సంభాషణ. 'ఉన్నతమైన'Doesn't mean in quality of words, it only means quality of the reaction of the character. అంటే ఆయా పాత్రలు కథలో ఆసాంతం ప్రవర్తిచే తీరు కాదు, పాత్రలు ఒక ఉద్దేశం కలిగి ఒక గోల్ కోసం ప్రవర్తించే తీరు- ఇప్పటి మన సినిమాల్లో ఈ అంశం మైక్రోస్కోప్ తో వెతకాలేమో..  మునుపటి సినిమాల్లో విరివిగా వుండే అంశం. సిట్యుయేషన్స్ ని బట్టి కలిగే సంఘర్షణలు, వాటిని అనుసరించి పాత్రల బిహేవియర్.  మళ్ళీ అవే examples తీసుకుందాం. అడవిరాముడు లో ఎన్టీఆర్ గుమ్మడి నాగభూషణం మొదలు సత్యనారాయణ వరకు అందరు సిట్యుయేషన్ కి తగినట్లు ప్రవర్తన సంభాషణలు ఉంటాయి. అలాగే సాగరసంగమం లో కమలాసన్ జయప్రద శరథబాబు శైలజ కూడా సిట్యుయేషన్స్ కి తగినట్లు ప్రవర్తన dialogues ఉంటాయి. ఇది, ఆక్షన్ అండ్ dialogue డెలివరీ కదా అంటారు మీరు. అవును అదే పోకడ కంటిన్యూయస్ గా ఉండటం పాత్రవుంచిత్యం తో కూడిన character psychology... డబ్బులు పెట్టినందుకు ప్రొడ్యూసర్ల పైత్యాలు చొప్పించడం ప్రస్తుతం ఆనవాయితీ అయిపోయింది. కథ సన్నివేశాలు పాత్రల తీరుతెన్నులు మంటకలిసిపోయాయి.       
  • జీవితంలోని అన్ని పార్శ్వాలు అనుభవించినవారికే తెలుస్తుంది జీవితం ఏమిటో. ఆ అనుభవాల అంతులేని ఆనందమో, మరణ మృదంగపు కాఠిన్యమో .. అదంతా ముఖాముఖి ఎదుర్కొన్నవాళ్లకే తెలుస్తుంది. ఆ తర్వాత - వారి జీవితాలే చాలామందికి పాఠాలవుతాయి. ఏం చేయకూడదో చెప్తాయి. సిల్క్ స్మిత జీవితం అలాంటిదే.  ఏలూరులో ఒక అతి బీద కుటుంబంలో పుట్టిన విజయలక్ష్మి ముందు బ్రతుకుదెరువు కోసమే సినిమారంగాన్ని ఆశ్రయించింది. తర్వాత ఆ రంగంలోని తళుకుబెళుకులకు పడిపోయింది.  దాదాపు సినిమా రంగంలోని ప్రతి చీకటి కోణాన్ని చూసింది. "సిల్క్ స్మిత"గా తనే ఊహించని స్థాయికి ఎదిగింది. తను అస్సలు ఊహించని స్థితిలో బలవంతంగా తనువు చాలించింది.  అదీ సిల్క్ స్మిత జీవితం. తను ఫీల్డులో ఉన్న 17 సంవత్సరాల్లో సుమారు 450 సినిమాల్లో నటించింది స్మిత. ఒక దశలో - అసలు సిల్క్ స్మిత పాట లేకుండా సినిమాను ప్లాన్ చేయడానికి దాదాపు ఏ నిర్మాతా, దర్శకుడూ సాహసించలేకపోయారంటే అతిశయోక్తికాదు. మణిరత్నం 'గీతాంజలి' కూడా అందుకు మినహాయింపు కాదు!  అంతే కాదు. "కోట్లు కుమ్మరించి - వివిధ కారణాలవల్ల ల్యాబ్‌ల్లో పడి మూల్గుతున్న ఎన్నో సినిమాల కేన్‌లకు - ఒకే ఒక్క సిల్క్ స్మిత పాటని జోడించడం ద్వారా బయటికి తెచ్చి, హాట్ కేకులుగా అమ్ముకున్న సందర్భాలు అనేకం" అని ప్రముఖ తమిళ సినిమా చరిత్రకారుడు రాండార్ గై అన్నారంటే, దీన్నిబట్టే అర్థం చేసుకోవచ్చు - ప్రేక్షకుల్లో, ఇండస్ట్రీలో సిల్క్ స్మిత సొంతం చేసుకున్న పాప్యులారిటీ రేంజ్ ఏ శిఖరాగ్రం చేరుకుందో!    సినీ రంగంలో కొంతమంది హీరోయిన్లు, ఇతర నటీమణుల వ్యక్తిగత జీవితాల్లో కొంత అలజడి ఉంటుంది. క్రమంగా అది అభద్రతకి దారి తీస్తుంది. బలహీన మనస్కులు, ఇంకొకరిని బాధపెట్టొద్దు అనుకొనే సున్నిత హృదయులు, తమ జీవితంలోని బాధకు కారణమైనవారిని లేశమాత్రంగానైనా బాధపేట్టడానికి ఇష్టపడరు. పరిస్థితులు మారడానికి చేతనయినంత ప్రయత్నిస్తారు. చేతకాకపోతే తమ జీవితాన్నే అంతం చేసుకుంటారు. సిల్క్ స్మిత చేసిన పని కూడా అదే.  1996 లో తన జీవితాన్ని బలవంతంగా తనే అంతం చేసుకుంది. ఈ పరిస్థితి, ఇలాంటి అనుభవాలు.. ఒక్క సినీ నేపథ్యం ఉన్న అమ్మాయిలు, స్త్రీల విషయంలోనే కాదు - ఇతర అన్ని రంగాల్లో ఉన్న అమ్మాయిలు, స్త్రీల విషయంలో కూడా ఉంటాయి. గ్లామర్ ఫీల్డు కాబట్టి - సినీ ఫీల్డులోని వారి విషయాలు "బ్రేకింగ్ న్యూస్"లవుతాయి. ఇతర రంగాల్లోని వారివి అంతగా బయటకు రావు. అంతే తేడా.  కట్ టూ "ది దర్టీ పిక్చర్" - సిల్క్ స్మిత జీవితం ఆధారంగా నిర్మించిన హిందీ సినిమా "ది డర్టీ పిక్చర్" మొదటి వారంలోనే 52 కోట్లు సంపాదించింది. ఆ సినిమాలో సిల్క్ స్మిత పాత్రను ప్రముఖ హిందీ హీరోయిన్ విద్యా బాలన్ అద్భుతంగా పోషించింది.  అంతకు ముందు విద్యా బాలన్ "పరిణీత", "లగే రహో మున్నాభాయ్", "పా", "నో వన్ కిల్డ్ జెస్సికా" వంటి చిత్రాల్లో ఎంతో బాగా నటించింది. ఎన్నో అవార్డులు సాధించింది. కానీ, వాటన్నింటి ద్వారా రాని గుర్తింపు, పేరు, క్రేజ్.. విద్యా బాలన్‌కు కేవలం ఒకే ఒక్క "డర్టీ పిక్చర్" సినిమాతో వచ్చింది. అంతే .. ఒక్కసారిగా టాప్ రేంజ్‌కు వెళ్లిపోయింది విద్యా బాలన్. విద్యా బాలన్ ఈ చిత్రం తర్వాత ఎంత శిఖరాగ్రం చేరుకోగలిగిందంటే, ఏకంగా 66 వ కేన్స్ అంతర్జాతీయ ఫిలిం ఫెస్టివల్‌కు జ్యూరీ మెంబర్‌గా కూడా ఎన్నికయింది! చివరికి, దేశంలోనే అత్యున్నతమయిన యూటీవీ మోషన్ పిక్చర్స్ 'సీ ఈ వో' సిధ్ధార్థ రాయ్ కపూర్ హృదయాన్ని కొల్లగొట్టి, ఆయన్ని పెళ్లికూడా చేసుకుంది విద్యా బాలన్. దటీజ్ డర్టీ పిక్చర్! దటీజ్ సిల్క్ స్మిత!! స్మిత వ్యక్తిగత జీవితంలోని మంచీ చెడులు మనకు పూర్తిగా తెలియవు. తెలియని వాటి గురించి జడ్జ్‌మెంట్లు ఇచ్చే హక్కు మనకు లేదు. ఒక  పాజిటివ్ కోణంలో అలోచిస్తే మాత్రం - తను  మరణించి కూడా సినీ ఫీల్డులోనూ, బయటా చాలా మంది హీరోయిన్లు, ఇతర నటీమణులకు ఒక మార్గదర్శి అయింది సిల్క్ స్మిత. హిపోక్రాట్లు ఈ నిజాన్ని ఒప్పుకోవటం కష్టం. అది వేరే విషయం. ఇప్పటి తారలెవరూ తమ జీవితాల్లో ఎలాంటి జటిల సమస్యలొచ్చినా భయపడటంలేదు. ఎంత సున్నిత మనస్కులైనా దేనికీ బెదరటంలేదు. అభద్రత అనే పదాన్ని వారి డిక్షనరీల్లోంచి తీసి అవతల పడేశారు.  వ్యక్తిగత జీవితంలో, ఒక మజిలీ నుంచి ఇంకో మజిలీకి చాలా ఈజీగా మూవ్ అవుతూ ముందుకెళ్తున్నారు. ఆత్మహత్యలు మాత్రం చేసుకోవడం లేదు. అసలు అలా చేసుకోవాల్సిన అవసరం లేదన్న నిజాన్ని అర్థం చేసుకున్నారు. అవసరమయితే తమ జీవితాన్ని డిస్టర్బ్ చేస్తున్న ప్రియుడో, భర్తో, బంధువులో, ఆఖరికి అమ్మానాన్నలో.. ఎవరైనా సరే.. ఒక ప్రెస్ మీట్ పెట్టి బాహాటంగా బయటపడుతున్నారు తప్ప, తమ జీవితాల్ని అంతం చేసుకొనే పిరికి ఆలోచన మాత్రం ఇప్పటి సినీ తారలెవ్వరూ చేయటం లేదు. (ఇటీవలి కాలంలో జియాఖాన్ ఉదంతం ఒక్కటే ఇందుకు మినహాయింపు.)   ఇది కేవలం కాలంతోపాటు వచ్చిన మార్పు మాత్రమే కాదు. సిల్క్ స్మిత లాంటివాళ్ల జీవితాలను చదివిన నేర్పుతో వచ్చిన మార్పు కూడా. సిల్క్ స్మిత సాధించింది అదీ.  ---  Manohar Chimmani  FILM DIRECTOR, 'Nandi Award' Winning Writer and Blogger
  • (Sheik Sadiq Ali )    .......  ........       రేఖ ...మన కళ్ళముందు కదలాడుతున్న ఒక అద్భుతం. గుండెల్లో దాచుకునేంత అపురూపం. ఒక ధీరోదాత్త నిజ జీవిత కథానాయిక. ఒక విప్లవం.ఒక తిరుగుబాటు. తిరుగులేని విజేత.ఆమె జీవితం ఒక పాఠం. ఒక ఎగురుతున్న కెరటం. గత రెండు రోజులుగా అన్ని ప్రసార మాధ్యమాల్లో విస్తృతంగా ప్రచారం అవుతున్న రేఖ ఫోటో ని చూసిన తర్వాత తన గురించి రాయాలనిపించింది. రేఖ జీవితంలో ఒక అత్యంత ముఖ్యమైన ఘటనకు ( ముకేష్ అగర్వాల్ తో పెళ్లి) ప్రత్యక్ష సాక్షిగా ఉన్న నేను రేఖ జీవన యానం గురించి ,ఆమె జీవన పోరాటాలు, విజయాల గురించి రాయటం సముచితంగా ఉంటుంది అని భావించి ఇది రాస్తున్నాను. 63 ఏళ్ళ వయసులోనూ ఇంత సౌందర్యంతో ,ఆత్మ విశ్వాసంతో విజేతగా జీవిస్తున్న రేఖ జీవితం పూలపాన్పు కాదు ....ఒక ముళ్ళబాటలో నడిచి వచ్చిన నందన వనం. 1954 అక్టోబర్ పదో తేదీన చెన్నైలో పుట్టింది. తల్లి మన తెలుగు నటి పుష్పవల్లి. తండ్రి సుప్రసిద్ధ తమిళ హీరో జెమినీ గణేషన్. అయితే అతను ఏనాడూ తన బిడ్డగా అంగీకరించలేదు. దాంతో ఆమె మీద అక్రమ సంతానం అనే ముద్ర పడింది.అలాగే పెరిగింది కూడాను. తన పన్నెండో ఏట ,అంటే 1966 లో తెలుగు సినిమా రంగులరాట్నం తో బాలనటిగా రంగప్రవేశం చేసింది. తన పదిహేనో ఏట(69 లో) కన్నడ సినిమా 'ఆపరేషన్ జాకపాట్ నెల్లి సీఐడీ 999' తో హీరోయిన్ గా మారింది. అదే సంవత్సరం హిందీసీమ లోనూ ప్రవేశించింది. 5 అడుగుల 6 అంగుళాల ఎత్తులో ఉండే రేఖ నల్లగా ఉండటం తో అడుగడుగునా ఆమెను 'నల్లపిల్ల ' (కాలీ) అని అవమానించేవారు. తోలి సినిమా బిశ్వజిత్ హీరోగా 'అంజానా సఫర్'. దక్షినాది నుంచి రావటం,హిందీ రాకపోవటం తో బాలీవుడ్ ఆమె పట్ల అత్యంత దుర్మార్గంగా ప్రవర్తించింది. ఆ సినిమా హీరో,దర్శకుడు,కెమెరామన్ అందరూ కలిసి ఆమె పట్ల అమానుషంగా ప్రవర్తించారు. షూటింగ్ తొలిరోజే తోలి షాట్ లోనే,కెమెరా స్టార్ట్ అనగానే బిశ్వజిత్ ఆమెను గట్టిగా ఒడిసి పట్టుకొని పెదాలపై ముద్దు పెట్టుకోవటం మొదలెట్టాడు. నిజానికి ఆ దృశ్యం గురించి ఆమెకు ముందుగా చెప్పలేదు.ఆమెకు తెలియదు. ఆమె షాకయ్యింది.భయంతో,బాధతో కళ్ళు మూసుకుంది. మూసిన కనురెప్పల మాటు నుంచి కన్నీరు ధారాపాతంగా కారుతూనే ఉంది. అయినా అతను వదల్లేదు.కెమెరా ఆగలేదు.దర్శకుడు కట్ చెప్పలేదు. ఆ పరాభవమే ఆమెలో కసి పెంచింది.పోరాటం నేర్పింది. నల్లగా,మొరటుగా ,భాష తెలియని అమ్మాయిగా బాలివుడ్ లో అడుగుపెట్టిన రేఖ ఈనాడు పార్లమెంటును కలవర పరిచే సౌందర్య రాశిగా ఎదగడం వెనుక సుదీర్ఘ ప్రయాణం ఉంది.కఠోర జీవన విధానం ఉంది. ఆమె సిగరెట్,మద్యం జోలికి పోదు. శుద్ధ శాఖాహారి. ప్రతీరోజు క్రమం తప్పక యోగా చేస్తుంది. అవకాశం దొరికినప్పుడల్లా ధ్యానం చేస్తుంది.పంక్చ్యువాలిటీ కి మారుపేరు. చెప్పిన సమయానికి నిమిషం ముందే ఉంటుంది తప్ప ఆలస్యంగా రాదు. వృత్తిపట్ల పూర్తిస్థాయి కమిట్ మెంట్ ఉన్న వ్యక్తిగా పరిశ్రమలో అందరూ చెప్పుకుంటారు. ఆమెకు ప్రత్యేకించి డ్రెస్ డిజైనర్లు ,హెయిర్ డ్రెస్సర్లు లేరు. అవి ఆమె స్వయంగానే చూసుకుంటుంది. బిశ్వజిత్ తో చెడు అనుభవం తర్వాత నవీన్ నిశ్చల్ తో జత కట్టింది. 1970 లో ఆమె హీరొయిన్ గా నటించిన తెలుగు సినిమా అమ్మకోసం,హిందీ సినిమా సావన్ భాదో విడుదలయ్యాయి.హిందీ సినిమా హిట్ అవడంతో అక్కడే సెటిల్ అయ్యింది.విజయాలు వరిస్తున్నా,ఆమెకు అడుగడుగునా అవమానాలు ఎదురయ్యాయి.వాటిని ధైర్యంగా ఎదుర్కుంది.హిందీ అనర్గళంగా మాట్లాడటం నేర్చుకుంది. అది ఏ స్థాయిలో అంటే,తర్వాతి కాలంలో ప్రముఖ హిందీ హీరోయిన్లు నీతూ సింగ్,స్మితా పాటిల్ కు కూడా డబ్బింగ్ చెప్పెంతగా స్పష్టంగా ,సాధికారిక హిందీ నేర్చుకుంది. రెండు హిందీ పాటలు కూడా పాడింది. తర్వాతి కాలంలో సాజిద్ ఖాన్,జితేంద్ర,శత్రుఘ్న సిన్హా,అక్షయ్ కుమార్ వంటి వారితో ఆమెకు సంబంధాలు ఉన్నాయని రూమర్లు వచ్చాయి .కానీ, వాటి నిజానిజాలు నిర్ధారించా లేము. అమితాబ్ బచన్ ఆమె జీవితంలోకి రావటం ఆమె జీవితాన్ని పూర్తిగా మార్చివేసింది.అప్పటికీ,ఇప్పటికీ ఆయనను దైవంగానే భావిస్తుంది. నా జీవితాన్ని మార్చి,పోరాటం నేర్పించి,బతకటం ఎలాగో నేర్పించింది 'ఆయనే' అని చాలాసార్లు చెప్పుకుంది. వృత్తిరీత్యా పలుమార్లు ఆమెను సన్నిహితంగా కలిసే అవకాశం వచ్చింది. ఆమెలో ఒక గ్రేస్ కన్పిస్తుంది. హుందాతనం,పోరాడి గెలిచిన ఒక విజేత ముఖంలో కన్పించే వెలుగు ఆమెలో కన్పిస్తాయి. మరో హిందీ హీరో వినోద్ మెహ్రా ను పెళ్లి చేసుకోవటం, అదేరోజు విడిపోవటం ఒక మిస్టరీనే. ఎందుకంటే ..వినోద్ అమితాబ్ కు అత్యంత సన్నిహితుడు,అనుచరుడు. రేఖ అమితాబ్ ప్రియురాలు. ఈ విషయాలు ఆ ముగ్గురికీ తెలుసు. అయినా రేఖ,వినోద్ పెళ్లి చేసుకున్నారంటే అందులో ఉన్న మర్మం ఏమిటో రేఖ కానీ,అమితాబ్ కానీ చెప్పాల్సిందే.(వినోద్ మెహ్రా కొన్నేళ్ళ క్రితం మరణించాడు). ఆ తర్వాత డిల్లీ పారిశ్రామిక వేత్త ముకేష్ అగర్వాల్ ని తిరుపతిలో పెళ్లి చేసుకుంది.( దీనికి నేను ప్రత్యక్ష సాక్షిని). కొంతకాలానికి అతను ఆత్మహత్య చేసుకున్నాడు. అది ఇప్పటికీ ముడివీడని రహస్యమే. అమితాబ్-జయభాదురి-రేఖ ల ముక్కోణపు ప్రేమ జగద్విదితమే. దాని ఆదారంగా యశ్ చోప్రా 'సిల్ సిలా' అనే సినిమా కూడా తీశాడు. జయతో ఉన్న వివాదమే రేఖను రాజ్యసభ సభ్యురాలిని చేసింది అంటారు. అలాంటి రేఖ 63 ఏళ్ళ వయసులో కూడా అద్భుత సౌందర్య రాశిగా వెలిగిపోవటం, పార్లమెంటులో ఓటు వేయటానికి వచ్చినప్పుడు ఎంపీలు కన్నార్పకుండా చూడటం, ఆ ఫోటోలు మీడియాలో సంచలనం సృష్టించటం జరిగింది. అన్నట్లు రేఖ పూర్తీ పేరు చెప్పలేదు కదూ ........భానురేఖ గణేశన్.
  • "రమ్యకృష్ణ నాకంటే పెద్ద స్టార్‌.  బహు భాషా చిత్రాల్లో చేస్తోంది . అలాంటప్పుడు నన్ను  రమ్యకృష్ణ మొగుడు అంటే తప్పేంటి? . ఆ విషయంలో నేనేం బాధపడను. ఆవిడ ముందు వెళ్తుంటే నేను వెనక వెళ్లడానికి కూడా నాకెలాంటి ఇబ్బందీ లేదు". అన్నారు క్రియేటివ్ డైరెక్టర్ కృష్ణవంశీ ఒక ఇంటర్వ్యూలో. "‘బాహుబలి’ చూసి రాజమౌళి, విజయేంద్రప్రసాద్‌ల గ్రేటెస్ట్‌ క్రియేషన్‌ అనుకున్నా. రమ్య గొప్ప నటి దానిని కాదనలేం. దొరక్కదొరక్క ‘శివగామి’లాంటి  గట్టి  పాత్ర దొరికింది. తన నటనతో తినేసిందంతే. ఆ క్రెడిట్‌ మొత్తం రాజమౌళి, ఆయన తండ్రికే చెందుతుంది. శివగామి పాత్రలో ఎక్కడేం చెయ్యాలో పర్ఫెక్ట్‌గా చేసింది. తను కూడా చాలా ఎగ్జైటింగ్‌గా చెప్పింది. మంచి పాత్రలు చేసినప్పుడు తప్పకుండా షేర్‌ చేసుకుంటుంది. ఈ మధ్యనే కమల్‌హాసన్‌ ‘శభాష్‌ నాయుడు’ సినిమాకు సంబంధించిన ఫోటోలు పంపి చాలా మంచి క్యారెక్టర్‌ అని చెప్పింది. ఏ విషయంలోనైనా ఆమె నాకు సలహాలిస్తుంది. నేనైతే ఏమీ చెప్పను. మా ఇద్దరికీ సంబంధించిన డెసిషన్‌ ఆవిడే తీసుకుంటుంది. నాకు సంబంధించిన డెసిషన్‌ కూడా ఆవిడ పరిధిలో ఉంటే తనే తీసుకుంటుంది. నేనేమో నాకు నచ్చిన బట్టలేసుకుని లేదంటే షార్ట్‌ వేసుకుని సినిమాలు చూసుకుంటూ లేదా ఏదో పని చేసుకుంటూ ఉంటా. తనేమో ప్రాక్టికల్‌గా ప్రొటోకాల్‌ పాటిస్తుంది. నా బాస్‌ ఆవిడే." అంటూ  చెప్పుకొచ్చారు  ఏమాత్రం మొహమాట పడకుండా.   దట్ఈజ్  కృష్ణ వంశీ . 
  • డ్రగ్స్ కేసు విచారణ తీరును మొదటి నుంచి తప్పుబడుతున్న ప్రముఖ దర్శకుడు రాంగోపాల్‌వర్మ సోషల్ మీడియా వేదికగా మరోసారి విరుచుకుపడ్డారు. ఫేస్‌బుక్‌లో ఆయన  వరుస పోస్టులు చేశారు. డ్రగ్స్ కేసు వల్ల హైదరాబాద్ ప్రతిష్ఠకు భంగం వాటిల్లే అవకాశం ఉన్నదన్నారు. సిట్ చేస్తున్న విచారణ వల్ల పెద్దగా ఫలితం ఉండకపోవచ్చని అభిప్రాయపడ్డారు. ఎక్సైజ్ ఎన్‌ఫోర్స్‌మెంట్ డైరెక్టర్ అకున్ సబర్వాల్‌పై తనదైన శైలిలో విమర్శలు చేశారు. తెలంగాణ సిఎం కేసీఆర్ పై ముంబై ప్రజలకు అపార నమ్మకం ఉన్నదని, టీఆర్‌ఎస్ ప్రభుత్వాన్ని చాలా మెచ్చుకుంటారని, ఇలాంటి ఘటనలు నగరంలో వెలుగులోకి రావటం పట్ల షాక్ అవుతున్నారని తెలిపారు.  సిట్ పనితీరును మరింత మెరుగుపరుచుకోవాలని వర్మ సూచించారు. కాగా  ఎక్సైజ్‌శాఖపై రామ్‌గోపాల్‌వర్మ చేసిన వ్యాఖ్యలపై రంగారెడ్డి జిల్లా న్యాయస్థానంలో పిటిషన్ దాఖలైంది. వర్మపై చర్యలు తీసుకోవాలని పిటీషన్ లో కోరారు. 
  • 'సిట్ అధికారులు పూరి జగన్నాథ్, సుబ్బరాజు మిగిలిన సినీ ప్రముఖులు విచారించినట్టుగానే స్కూల్ విద్యార్థులను కూడా విచారిస్తారా..? ప్రస్తుతం మీడియా అకున్ సబర్వాల్ ను అమరేంద్ర బాహుబలి లా చూపిస్తుంది. రాజమౌళి ఆయనతో బాహుబలి 3 తీయాలేమో. అకున్ సబర్వాల్ గారి సమగ్రతను ఎవరు అనుమానించటం లేదు. కానీ ఎలాంటి ఆరోపణలు, ఆధారాలు లేకుండా మీడియాకు లీకులివ్వటం, ప్రముఖులకు కీర్తికి భంగం కలిగించే విధంగా, వారి కుటుంబాలకు బాధ కలిగించే విధంగా ప్రవర్తించటం దురదృష్టకరం.' అంటూ తన ఫేస్ బుక్ పేజ్ లో పోస్ట్ చేశారు.   అయితే ఈ వ్యాఖ్యలు  అభ్యంతరకరం అని  రిటైర్డ్ ఎక్సయిజ్ శాఖ అధికారులు అంటున్నారు . ఇది విచారణ ను అడ్డుకోవడమే ... ఆయనపై కేసు వేస్తాం అని కూడా చెప్పారు.  ఈ నేపథ్యంలోనే వర్మ చేసిన వ్యాఖ్యలపై మూవీ ఆర్ట్స్ అసోసియేషన్ (మా) అధ్యక్షుడు శివాజీరాజా మండిపడ్డారు. ఇండస్ట్రీకి వర్మ చేసిందేం లేదని, వర్మ చేసిన వ్యాఖ్యలు పట్టించుకోవాల్సిన అవసరం లేదన్నారు.  అలాగే  వర్మ కూడా మళ్ళీ స్పందించారు ... వీడియో లో  వర్మ స్పందన చూడండి. 
  • మరో మూడేళ్ళలో  అతి  పె.......  .......  ద్ద సినిమా విడుదల  కాబోతుంది ....ఏకంగా 30 రోజులపాటు ఏకధాటిగా చూడాల్సిన సినిమా వెండితెరపైకి  రానుంది. నిజమా ? అని ఆశ్చర్య పోకండి.  అక్షరాలా నిజమే.  థియేటర్ లోనే భోజనాలు టిఫిన్లు  గట్రా కూడా  చేస్తూ  ఈ  సినిమా చూస్తారేమో ?  ఇంత భారీగా తీస్తోన్న ఆ సినిమా  ఆ దర్శకుడి  పేరు  అండర్స్ వెబర్గ్ ... స్వీడిష్ డైరెక్టర్...   20 ఏళ్ల పాటు విజువల్ ఆర్ట్స్ రంగంలో అనుభవం ఉన్న అండర్స్, 2020లో రీటైర్మెంట్ తీసుకోవాలని నిర్ణయించుకున్నాడు. అయితే ఇన్నేళ్ల కెరీర్ లో అందరూ మాట్లాడుకునేలా ఏది చేయలేకపోయానని భావిస్తున్న అండర్స్ కి  ఈ వెరైటీ ఆలోచన వచ్చింది .   వెంటనే సుదీర్ఘ మైన సినిమాను  తీయడం మొదలెట్టాడు.  'ఆంబియన్స్', పేరుతో తెరకెక్కుతున్న ఈ చిత్రాన్ని మూకీ సినిమాగా తీస్తున్నాడు . డైలాగులు లేకుండా తెరకెక్కుతున్న ఈసినిమాను తన చివరి చిత్రంగా 2020లో రిలీజ్ చేసేందుకు ప్లాన్ చేస్తున్నాడు. ఈ సినిమా నిడివి  720 గంటలు, అంటే సరిగ్గా 30 రోజులు. ఇప్పటికే 400 గంటల షూటింగ్‌ను పూర్తి చేశారు. 2015 లో  ఈ సినిమా కి సంబంధించిన ట్రైలర్ ను రిలీజ్ చేశారు.  దాని  నిడివి 7 గంటల 20 నిమిషాలు.   2018లో 72 నిమిషాల  నిడివి కలిగిన మరో  ట్రైలర్‌ను విడుదల చేయనున్నారు. 100 మంది నటులతో తీసే ఈ సినిమాను 2020లో ప్రపంచవ్యాప్తంగా ఒకేసారి విడుదల చేసి, కేవలం ఒక షో మాత్రమే వేస్తారట. ఆ తరువాత మరెవరు  ప్రదర్శించడానికి వీలు లేకుండా సినిమా కాపీలను తగులబెట్టాలని భావిస్తున్నాడు అండర్స్ వెబర్గ్. ఆయనే నిర్మాత కూడా కావటంతో ఈ నిర్ణయం తీసుకున్నారు. కానీ కాపీలను తగులపెట్టాలన్న ఆలోచనపై పెద్ద ఎత్తు విమర్శలు వినిపిస్తున్నాయి.  ఇన్ని విశేషాలు ఉన్న ఈ సినిమా సబ్జెక్టు ఏమిటో కానీ  ట్రైలర్ వినూత్నంగా ఉంది. మీరూ ట్రైలర్ చూడండి. 
  • జీవిత చరిత్రల్ని సినిమాలుగా తీసే  ట్రెండ్   క్రమంగా  ఊపందుకుంటోంది. తెలుగులోనూ అల్లూరి సీతారామరాజు, ప్రకాశం పంతులు జీవితగాథలతో సినిమాలు వచ్చాయి . ఆ తర్వాత  పరిటాల రవి లైఫ్ రక్తచరిత్ర, వంగవీటి సినిమాల దాకా వచ్చాయి. ఇప్పుడు సావిత్రి, సీనియర్ ఎన్టీఆర్ జీవిత చరిత్రలను తెరపైన ఆవిష్కరించే ప్రయత్నాలు జరుగుతున్నాయి. తాజాగా మెగాస్టార్ చిరంజీవి బయోపిక్‌ను తీసేందుకు సన్నాహాలు జరుగుతున్నాయి.  బాలీవుడ్ లో  ఈ ట్రెండ్ మరీ ఎక్కువగా ఉంది. హిందీలో ఇటీవలి ఎంఎస్ ధోనీ అన్‌టోల్డ్ స్టోరీతో బయోపిక్ మేకింగ్ స్పీడ్ అందుకుంది. అంతకుముందు సిల్క్ స్మిత లైఫ్‌ను డర్టీ పిక్చర్ ద్వారా తెరపై మలచిన సంగతి తెలిసిందే. ఆ తర్వాత ధోని జీవిత గాథకు ఎంత మంచి రెస్పాన్స్ వచ్చిందో చూశాం. అలాగే సచిన్ ప్రధాన పాత్ర‌లో రియలిస్టిక్‌గా సచిన్ బయోపిక్‌ను ప్రెజెంట్ చేశారు. అంతకు ముందు మిల్కాసింగ్   జీవిత కథ ను కూడా తీశారు. ఇందిరా గాంధీ బయో పిక్ కూడా రాబోతుంది.  ఇక చిరు బయోపిక్  తీయాలనుకుంటున్నట్టు నటుడు బెనర్జీ  చెప్పారు.. నటులు కావాలనుకునే ఎంతో మందికి చిరంజీవి జీవితం ఆదర్శం. సినిమా ఇండస్ట్రీలో చిన్న అలగా ప్రారంభమైన ఆయన ప్రస్థానం మహాసముద్రంలా ఉప్పొంగింది. ఆయన జీవితంలో జరిగిన అనేక సంఘటనలు ప్రజలకు తెలియాల్సిన అవసరం ఉంది. మెగాస్టార్ చిరంజీవి ఒప్పుకొంటే ఆ సినిమాను నేనే డైరెక్ట్ చేస్తా అని కూడా బెనర్జీ అన్నారు. . తను నటుడిగా తెరమీద కనిపించక ముందు అసిస్టెంట్ డైరెక్టర్‌గా పనిచేశాన‌ని, కాబట్టి ఆ సినిమాను బాగానే తీయగలనన్న నమ్మకం ఉందని చెబుతున్నారు. అయితే బయో పిక్ కి చిరు అంగీకరిస్తారో ? లేదో ? చూడాలి. 
  •  ‘శ్రీరామరాజ్యం’లో సీతగా నటించి ప్రేక్షకుల మెప్పు పొందిన నయనతార   ద్రౌపది పాత్రలో నటించబోతున్నారు.  కన్నడలో ‘కురుక్షేత్ర’ పేరిట భారీ చారిత్రాత్మక చిత్రాన్ని కొంతమంది నిర్మాతలు తెరకెక్కించనున్నారు. నాగన్న దర్శకత్వం వహించనున్న ఈ సినిమాలో దుర్యోదనుడిగా దర్శన్‌, కర్ణుడిగా రవిచంద్రన్‌, భీష్ముడిగా సీనియర్‌ నటుడు అంబరీష్‌  నటిస్తున్నారు. అత్యంత భారీ బడ్జెట్‌తో ఈ సినిమాను రూపొందిస్తున్నారు. ఈ చిత్రంలో అత్యంత కీలకమైన ద్రౌపది పాత్ర కోసం పలువురు కథానాయికలను పరిశీలించిన నిర్మాతలు  చివరకు నయనతార అయితే బాగుంటుందని అభిప్రాయపడి ఆమెను సంప్రదించినట్లు తెలుస్తోంది .అయితే నయన తార  ఇంతవరకు  నిర్మాతలకు గ్రీన్ సిగ్నల్ ఇవ్వలేదు. ప్రస్తుతం నయన తార  దక్షిణాదిలోని అన్ని భాషా చిత్రాల్లో నటిస్తున్నారు . ప్రస్తుతం ఆమె పదికి పైగా చిత్రాల్లో నటిస్తున్నారు.సాధారణంగా వయస్సు పెరిగే కొద్దీ అవకాశాలు తగ్గుతాయి. కానీ నయనతారకు వయస్సు పెరిగేకొద్దీ సినిమాల అవకాశాలు ఎక్కువగా వస్తున్నాయి. ఇప్పటికే సూపర్‌ అనే చిత్రం ద్వారా కన్నడ సినీప్రేక్షకులకు పరిచయం అయ్యారు. మరి కురుక్షేత్రకు  నయన ఎస్‌ అంటారా లేదా అన్నది కొద్ది రోజుల్లోనే తేలిపోతుంది.
  • హార్రర్‌, మాఫియా కాదంటే  బయోపిక్‌లను తీస్తున్న  వివాదాస్పద దర్శకుడు రాంగోపాల్ వర్మ  తాజా గా ఎన్టీఆర్ బయోపిక్  తీస్తున్నట్టు ప్రకటించారు. ఈ ప్రకటన కలకలం రేపుతోంది.  వర్మ పరిటాల రవి లైఫ్ స్టోరీ పై రెండు భాగాల ‘రక్తచరిత్ర’, స్మగ్లర్‌ వీరప్పన్‌పై ‘కిల్లింగ్‌ వీరప్పన్‌’, వంగవీటి రంగాపై ‘వంగవీటి’ లాంటి చిత్రాలు తీసి, వివాదాలు, వాటికి తగ్గట్లే వసూళ్ళు తెచ్చుకున్నారు.  ఇప్పుడు ఎన్టీయార్‌పై దృష్టి పెట్టారు.   గతంలో ‘రక్తచరిత్ర’లో కానీ ‘వంగవీటి’లో కానీ ఎన్టీయార్‌ పాత్రను సవ్యమైన రీతిలో చూపిన చరిత్ర వర్మకు లేదు. ‘రక్తచరిత్ర’లో శత్రుఘ్నసిన్హాతో ఎన్టీయార్‌ పాత్రను పోషింపజేసిన వర్మ, రాజకీయ హత్యలను ఎన్టీయార్‌ ప్రోత్సహించారన్న రీతిలో చిత్రీకరించడంపై వివాదాలు రేగాయి. అభిమానుల ఆగ్రహానికి గురైన వర్మ చివరకు ఆ సీన్లు తొలగిస్తానంటూ ఒప్పుకోవాల్సి వచ్చింది. కానీ, ఆ సీన్లతోనే థియేటర్లలో సినిమా విడుదల అయింది.  మరి ఇప్పుడు ఈ ఎన్టీయార్‌ బయోపిక్‌లో ఇంకెన్ని వివాదాలు రేపుతారన్నది చర్చనీయాంశమైంది. ఎన్టీయార్‌ అభిమానులు ఇప్పటికే వర్మ ప్రకటనపై భగ్గు మంటున్నారు. ప్రజల మనిషి  ఎన్టీయార్‌ జీవితంతో కాంట్రవర్సీలు ఏమిటని అంటున్నారు. కాగా, ఎన్టీయార్‌ జీవిత చరమాంకంలో ఆయన బాగోగులు చూసిన సతీమణి లక్ష్మీపార్వతి అయితే... వర్మ ప్రకటనపై బాహాటంగానే విమర్శ చేశారు. ‘ఎన్టీయార్‌ జీవిత చరిత్రను వర్మ సమర్థంగా సినిమాగా తీస్తాడనే నమ్మకం నాకు లేదు’ అన్నారు. ఎన్టీఆర్ పాత్రలో బాలయ్య కంటే కమల్ బాగుంటారు అన్నారు. ఇక ఎన్టీఆర్ జీవితం లో జరిగింది జరిగినట్టు తీయడం అంత సులభం కాదు. అది చాలా వివాదాలకు దారి తీస్తుంది. నిజాలు చెబితే పలువురుకి ఆగ్రహమొస్తుంది.  నిజానికి, ఎన్టీయార్‌పై సినిమా తీసేందుకు  ఆయన  తనయుడు హీరో బాలకృష్ణ గత ఏడాది నుంచే సన్నాహాలు చేస్తున్నారు. దానికి దర్శక, నిర్మాతలు ఎవరన్నది ఆయనా ఇప్పటి దాకా ప్రకటించలేదు. దర్శకుడెవరన్నది ఖరారు చేయాల్సి ఉందని చెబుతూ వచ్చారు. కాకపోతే, ‘నాన్న గారి పాత్రను నేనే పోషిస్తాను’ అని ప్రకటించారు. వివరాలతో బాలకృష్ణ పెదవి విప్పక ముందే ఎన్టీయార్‌ బయోపిక్‌ చేస్తున్నానంటూ వర్మ ప్రకటించేశారు. ఇంతకీ వర్మ తీస్తున్న సినిమా .... బాలకృష్ణ చేస్తానన్న సినిమా ఒకటేనా వేరా అన్న అంశంపై కూడా సందేహాలు వ్యక్తమౌతున్నాయి. బాలకృష్ణ స్వయంగా ప్రకటించే వరకు ఈ అంశంపై క్లారిటీ రాదు.  అపుడపుడు సంచలనం కోసం వర్మ కొన్ని ప్రకటనలు చేస్తుంటాడు..  ఆ మధ్య జగన్ తో ఒక సినిమా అన్నాడు ...తర్వాత  నయీమ్ తో అన్నాడు ... మరల  శశికళ తో ఒక సినిమా అన్నాడు ..   ఇవేవి తెర కెక్కలేదు.  కొద్దీ రోజులు ఆగితే కానీ  ఎన్టీఆర్ బయోపిక్ పై వాస్తవమేమిటో తేలదు. 
  • "చెన్నై వెళ్లినా, ముంబయ్‌ వెళ్లినా, ఢిల్లీ వెళ్లినా... ‘బాహుబలి’ గురించే  అడుగుతున్నారు.  ‘బాహుబలి’ గురించి మాట్లాడటానికి రాజమౌళిగారు నా దగ్గరకు వచ్చారు. ఆయన తీసిన ‘ఈగ’ చూశాను. నాకు బాగా నచ్చింది. అఫ్‌కోర్స్‌.. ఐ లవ్‌ ద స్టోరీ (బాహుబలి). కానీ, కొన్ని కారణాల వల్ల నేనా సినిమా చేయలేకపోయాను". అంది అందాల తార శ్రీదేవి ఒక పత్రిక ఇంటర్వ్యూలో   "అయితే, నేనేదో అన్‌రీజనబుల్‌గా డబ్బులు అడిగాననీ, తర్వాత హోటల్‌ మొత్తం బుక్‌ చేయాలన్నాననీ, పది టికెట్స్‌ (ఫ్లైట్‌) కావాలన్నాననీ... దారుణంగా, అన్యాయంగా నిర్మాతను దోచేసుకోవాలను కున్నాననే మాటలు వినిపించాయి. నేను ఆలా అడిగాను అన్నమాట నిజం కాదు.  రాజమౌళిగారి మాటలను మొదట్లో నేను నమ్మలేదు. ఇలా ఎవరు మాట్లాడతారులే అనుకున్నా. కానీ, ఒకరు యూట్యూబ్‌ లింక్‌ పంపిస్తే రాజమౌళిగారి ఇంటర్వ్యూ చూశా. అందులో ఆయన మాట్లాడిన మాటలు నాకు చాలా బాధ అనిపించాయి. నేనేదో 8 కోట్లు అడిగానట. మొత్తం హోటల్‌ బుక్‌ చేయమన్నానట. నేనంత దారుణంగా అడిగి ఉంటే... 300 సినిమాలు చేసేదాన్ని కాదు. 50 ఏళ్లు ఇండస్ట్రీలో ఉండేదాన్ని కాదు. ఓ ఆర్టిస్ట్‌గా నిర్మాత కష్టాన్ని నేను అర్థం చేసుకోగలను."