Latest News
ప‌ర్యాట‌కం
  • నరసింహస్వామి దేవాలయము ఖమ్మం జిల్లా ప్రధానకేంద్రం ఖమ్మం పట్టణం నడిబొడ్డున ఒక ఎత్తయిన గుట్టపై ఉన్న ఆలయం . ఇది తెలంగాణ లోని ప్రముఖ ఆలయాలలో ఒకటి. శ్రీమహావిష్ణువు నరసింహావతారంలో హిరణ్యకశిపుడనే రాక్షసుడిని సంహరించి ఆయన కుమారుడు ప్రహ్లాదుడిని కాపాడిన కథ అందరికి తెల్సిందే. ఆనాడు  స్థంభం  నుండి ఉద్భవించిన స్వామియే ఈ కొండపై ఉన్న గుహలో వెలిసాడని అందుచేతనే కొండకు స్థంభాద్రి  అనే పేరు వచ్చిందని చెబుతారు. అటువంటి స్థంభాన్నికలిగివున్న ప్రాంతం కాబట్టి స్థంభాద్రి, స్థంభశిఖరి, కంభంమెట్టు అనే పేర్లనుంచి కాలక్రమంలో ఖమ్మం అనే పేరు ఏర్పడింది అంటారు. సాధారణంగా దేవాలయాలు తూర్పులేదా ఉత్తరదిశలకు తిరిగి వుంటాయి కానీ ఇక్కడి నరసింహస్వామి మాత్రం దక్షిణాభిముఖుడుగా వుంటాడు. ఎత్తైన కొండలపై వెలసిన స్వయంభువుగా వెలసిన నారసింహ స్వామి శిల్పం సహజంగానే వెలసిందని, శతాబ్ధాల కాలం నుంచి అది అక్కడే వున్నట్లు భావిస్తారు. ఈ ఆలయ స్థంభాలపై కనిపించే  శిల్పనిర్మాణ శైలి కాకతీయుల స్థంభాలను పోలి వున్నప్పటికి అంతటి పూర్తి స్థాయి నగిషీలు లేక చాలా ప్రాదమిక దశలోనే వున్నట్లు కనిపిస్తుంది. అంతేకాక గర్భగుడికి ముందున్న నిర్మాణంలో ముందస్తుగా ఏర్పరచిన స్థంభాలకూ ఆ తర్వాత విస్తరణలో అభివృద్ధి పరచిన స్థంభాలకూ మధ్య బేధాన్ని గమనించ వచ్చు. ఇక్కడి ధ్వజ స్థంభం  పూర్తిగా శిలతో నిర్మించినదే, మరి అత్యంత ఎత్తుగా కాక గుడికంటే కొంత ఎత్తుగా మాత్రం వుంటుంది. అంతే కాకుండా ధ్వజస్తంభం గుండ్రని నిర్మాణంతో స్తూపం ఆకారంలో కాక ఇది నలుపలుకలుగా దీర్ఘఘనం ఆకారంలో వుంటుంది. సాధారణంగా దేవాలయాలలో గర్భగుడిలోని మూలవిరాట్టుకు ఖచ్చితంగా ఎదురుగా వుండేలా ధ్వజస్తంభ నిర్మాణం చేస్తారు.కానీ ఇక్కడ మూల విగ్రహానికి ఎడమ వైపు మూలగా కొంత కోణంలో ధ్వజస్థంభం వుంటుంది. ఇలా వుండటానికి కారణం మూలవిరాట్టు పక్కకు చూస్తున్నట్లుగా వుండటమే అని వంశపారంపర్యంగా ఇక్కడి పూజాదికాలు నిర్వహిస్తున్న అర్చకులు వివరించారు. రాతి ధ్వజస్తంభంపై అత్యంత ప్రాదమిక రూపంలో గీసిన ఒక పక్షివంటి రూపం వుంది. అంటే దానిని నరసింహావతారం ప్రాధమిక రూపమైన విష్ణుమూర్తికి వాహనం అయిన గరుత్మంతునిగా భావించి గీచి వుండవచ్చు. అలాగే మరోపక్క ధ్వజస్తంభంపై చేపవంటి ఆకారం కనిపిస్తోంది. బహుశా స్థంభం తొడుగు లోపల పరిశీలిస్తే దశావతారాలు పూర్తిగా వుంటాయేమో. ఈ చేప మత్స్యావతారానికి  ప్రతీకగా గీచి వుండవచ్చు. ఇంత ఎత్తుగా వున్న కొండపై సంవత్సరం పొడవునా నీటినిల్వలు వుంటాయి. కొండను రెండుగా చీల్చినట్లున్న ప్రాంతంలో అంతమైన కొలను కనిపిస్తుంది. ఉగ్రరూపుడైన నరసింహుని శాంతిపజేయటానికా అన్నట్లు కొలను నిండుగా వున్నప్పుడు అక్కడినుండి వున్న నాభివంటి అంతర్గత మార్గాల ద్వారా స్వామివారిని చల్లబరిచే అభిషేకం జరుగుతుందట. కొన్నిసార్లు కేవలం చెమ్మవంటి తడిమాత్రమే కాక ఏకంగా ప్రవాహంలాగా నీరు కొండమీది కొలనునుంచి గర్భగుడిలోని స్వామివారి విగ్రహాన్ని తడుపుతూ నీళ్ళు చేరటాన్ని ఈ అర్చకులు చాలా సార్లు గమనించారట. దీనిని దేవాలయ మహత్మ్యానికి విశేష ఉదాహరణగా పేర్కొంటారు. మూలవిరాట్టుకు కొంత కోణంలో రాతి ధ్వజ స్థంభం  నిర్మిస్తే సరాసరి ఎదురుగా ఒక నిలువెత్తు రాతి స్థంభం భూమిలో పాతి నిలబెట్టి వుంటుంది.దానికి మధ్యలో ఒక గంటుకూడా వుంది. దీనిని మొక్కుబడులు తీర్చుకునే కోడె స్తంభంగా ఆలయ అర్చకులు పేర్కొన్నారు. మొక్కుబడులను అనుసరించి ఈ స్థంభానికి వారు దారంతో కొంత సమయం మేర కట్టేసుకోవడం ద్వారా మొక్కుబడిని చెల్లించుకుంటారని తెలియజేసారు. బహుశా జంతుబలులకు కట్టుస్థంభంగా కానీ వధ్యశిలగా కానీ ఇది వాడుకుని వుండొచ్చని కూడా అంటారు. ఈ నారసింహ క్షేత్రానికి క్షేత్రపాలకుడు హనుమంతుడు, దక్షిణదిశగా తిరిగి వున్న ఈ ఆలయంలో ఆగ్నేయ దిశలో క్షేత్రపాలకుని మందిరం వుంటుంది. చాలా నరసింహ క్షేత్రాలలో స్వామివారికి నైవేద్యపానీయంగా పానకాన్ని సమర్పిస్తారు. మంగళగిరి నరసింహస్వామి కి ఎన్నిబిందెలు పానకం పోసినా స్వీకరిస్తాడని అయినప్పటికి భక్తులకు ప్రసాదంగా కొంత మిగుల్చుతాడని కథనంగా చెప్పుకుంటారు. ఆవిధంగా మిగిల్చే పద్దతిలో శిల్పాన్ని నిర్మిస్తూ శిల్పులు తమ నైపుణ్యాన్ని ప్రదర్శించారు. ఇక్కడి ఖమ్మం నరసింహస్వామికి పానకంతో అభిషేకం చేయడం ప్రత్యేకత. అత్యంత ఉగ్రరూపుడైన స్వామివారిని శాంతింపజేసేందుకు పానకంతో అభిషేకం చేయడం అనే పద్దతి పూర్వకాలం నుంచి వస్తోంది.  సర్పదోష మొక్కుబడులకూ దోష నివారణకూ సర్పశిల లేదా ఇప్పటి రోజుల్లోలాగా లోహసర్పాలనూ పూజలో వుంచి దేవాలయాల వద్ద వదిలేసే ఆనవాయితీ వుంది. దానిని సూచిస్తున్నట్లు ఇక్కడ అనేక రకాలైన అనేక సర్పశిలలు కనిపిస్తాయి. వివిధ ప్రాంతాలనుంచి ఖమ్మం పట్టణానికి రైలు లేదా బస్సుద్వారా సులభంగా చేరుకోవచ్చు. హైదరాబాదు నుంచి కేవలం 195 కిలోమీటర్ల దూరంలోనూ, ఆంధ్రప్రదేశ్ రాజధాని విజయవాడనుంచి కేవలం 125 కిలోమీటర్ల దూరం లోనూ వుంది....
  • రామాయణం నాటి హనుమంతుని  పాదముద్రలు  శ్రీలంక , థాయిలాండ్ , మలేషియా , ఆంధ్రప్రదేశ్ లోని  లేపాక్షి వద్ద వెలుగు చూశాయి .అలాగే  ప్రకృతి సౌందర్యానికి నెలవైన  'సిమ్లా' లోని  'జాకూ' కొండపై హనుమంతుడి పాదముద్రలు కనిపిస్తాయి. త్రేతాయుగంలో హనుమంతుడు ఈ కొండపైకి రావడం వలన ఆయన పాదముద్రలు పడ్డాయని స్థలపురాణం చెబుతోంది. రామరావణ యుద్ధంలో మేఘనాథుడితో తలపడిన లక్ష్మణుడు, ఆయన ధాటికి తట్టుకోలేక కుప్పకూలిపోతాడు. లక్ష్మణుడిని తిరిగి ఈ లోకంలోకి తీసుకురావడం కోసం హనుమంతుడు 'సంజీవని' పర్వతం తీసుకువస్తాడు. లక్ష్మణుడు తేరుకున్నాక రాముడి ఆదేశం మేరకు ఆ సంజీవని పర్వతాన్ని తిరిగి యథా స్థానంలో వుంచడం కోసం హనుమంతుడు గగన మార్గంలో బయలుదేరుతాడు. బాగా అలసిపోయిన ఆయన, మార్గమధ్యంలో కాసేపు విశ్రాంతి తీసుకోవడం కోసం ఇక్కడి కొండపై దిగినట్టు చెబుతారు. హనుమంతుడు మహా బలవంతుడు కావడం వలన ... ఆయన చేతిలో సంజీవని పర్వతం ఉండటం వలన, ఈ కొండపై ఆగగానే ఆ బరువుకి అది కొంచెం కుంగిపోయిందట. అంతే కాకుండా ఆయన పాదముద్రలు బలంగా ... స్పష్టంగా ఈ కొండపై పడ్డాయట. అందువలన ఆనాటి నుంచి ఈనాటి వరకూ ఈ కొండపై హనుమంతుడు పూజించబడుతూ వస్తున్నాడు. ఇక్కడి గుడి కూడా పురాతనమైనదే .  స్థల మహాత్మ్యానికి తగినట్టుగానే అత్యధిక సంఖ్యలో కోతులు కనిపిస్తూ వుంటాయి. ఇక ఇక్కడ ఏర్పాటు చేయబడిన 108 అడుగుల హనుమంతుడి విగ్రహం, సిందూర వర్ణాన్ని కలిగి ఈ క్షేత్రానికి విశిష్టతను తెచ్చిపెట్టింది. దసరా పండుగ సందర్భంగా స్వామివారికి ప్రత్యేక పూజలు ... సేవలు నిర్వహిస్తూ వుంటారు. ఈ సందర్భంగా ఈ క్షేత్రానికి భక్తులు భారీ సంఖ్యలో తరలి వస్తుంటారు. స్వామివారి ఉత్సవాల్లో ఉత్సాహంగా పాల్గొంటూ వుంటారు....
  • కోల్హాపూర్  పట్టణం  మహారాష్ట్ర లోనే కాక భారత దేశములోనే పురాతన పట్టణాలలో ఒకటి . ఇక్కడ సతి దేవి మూడవ కన్ను పడిందని పురాణ కథనం. ఈ క్షేత్రానికి పూర్వకాలలో కరవీర అనే పేరు ఉండేది. కోల్హాపూర్ అష్టాదశ శక్తి పీఠములలో ఒకటి గా ప్రసిద్ది చెందినది .ఇక్కడ వున్న మహాలక్ష్మిదేవిని భవానీ అంటారు . ఈ అమ్మవారిని కరవీరవాసిని,అమలాదేవి అని కూడా పిలుస్తారు.ఇక్కడే సరస్వతి,మహా కాళి విగ్రహాలు వున్నాయి.   ఒకప్పుడు మహా లక్ష్మి ఆలయము చుట్టూ ప్రక్కల సుమారు 200 పైన చిన్న , పెద్ద ఆలయములు ఉండేవట. భూకంపము కారణంగా నేలమట్టం అయి పయాయి . క్రీ.శ 13 ,14 శతాబ్దాల కాలములో ఇక్కడకి దండెత్తి వచ్చిన మహమ్మదీయు రాజులు,, మిగిలి ఉన్న వాటిలో కొన్నింటిని ధ్వస౦ చేశారు . ఎలాగో ఈ మహాలక్ష్మి అమ్మవారి ఆలయము మాత్రం వారి బారినపడకుండా యథాతధం గా నిలిచి ఉంది. 17 వ శతాబ్దములో ఛత్రపతి శివాజీ ఇక్కడ అమ్మవారిని తరచూ పూజించేవాడు . భవానీ మండపాన్ని శివాజీ చక్రవర్తి నిర్మించాడు . ఈ మండపములో తుల్జాభవాని దేవాలయము వున్నది . ఈ తుల్జాభవాని ని శివాజీ ఆరాధించేవాడు . ఈ మండపము మహాలక్ష్మి అమ్మవారి మందిరము ప్రక్కనే వుంది . దేవాలయం ప్రాంగణములో ఏడు దీపపు స్తంభములు వున్నాయి . ఈ దీప స్తంభాలు , ఈ దేవాలయానికి ముఖ్య ఆకర్షణ . ఈ దీప స్తంభాల లో వున్న దీపపు ప్రమిదలు వెలిగించినపుడు దేవాలయ ప్రాంగణము మొత్తము వెలుతురు తో నిండి వుంటుంది . అమ్మవారి గర్భ గుడి చుట్టూ సన్నని ఇరుకైన ప్రదక్షిణ మార్గము వున్నది . గర్భగుడిలో ఆరు అడుగుల చదర౦గా వున్న ఎత్తైన వేదిక మీద రెండు అడుగుల ఎత్తు ఉన్న పీఠము పై అమ్మవారి విగ్రహం కూర్చొని ఉన్న భంగిమలో ఉంటుంది. ఇక్కడ అమ్మవారికి బంగారు పాదాలు వున్నాయి. ఈ ఆలయములో జరిగే ప్రధానమైన ఉత్సవము నవరాత్రి ఉత్సవం .ఆ రోజున అమ్మవారి ఉత్సవ మూర్తిని నగరానికి తూర్పున 5 కి.మీ దూరములో వున్న ఈ మహాలక్ష్మి అమ్మవారి చెల్లెలు గా భావించే “ తెంబ్లాయి “ అనే అమ్మ వారి ఆలయము దగ్గరకి ఊరేగింపుగా తీసుకువెళ్తారు . ఒక రోజున ఏదో విషయములో ఇద్దరకి మాట పట్టింపు రాగా , తెంబ్లాయి అలిగి అక్క గారి నుండి దూరము గా వెళ్లిందట. నవరాత్రి రోజులలో పంచమి నాడు మహా లక్ష్మి అమ్మవారు తనే స్వయము గా వెళ్ళి చెల్లిని చూసి వస్తుంది. ఇది గాక చైత్ర పూర్ణిమ రోజున మహాలక్ష్మి అమ్మవారి ఉత్సవ మూర్తిని నగరమంతా ఊరేగిస్తారు . “ ప్రతి సంవత్సరము మార్చి 21 నుండి 3 రోజులు , సెప్టెంబర్ 21 నుండి 3 రోజుల గర్భగుడి కిటికీ నుంచి సూర్యకిరణాలు మహా లక్ష్మి అమ్మవారి పాదాలను తాకుతాయి . ఈ సూర్యకిరణాలు సాయంకాలం పడడం తో ఈ సందర్బాన్ని “ బంగారు స్నానము” అని పిలుస్తారు . ఇక్కడికి దగ్గరలోనే “ పంచగంగా” తీర్థము ఉంది . ఇక్కడ ఐదు నదులు కలుస్తాయి అని అంధుకే దీనిని పంచ గంగా అంటారు . ఈ తీర్థానికి ప్రయాగ అనే పేరు కూడా ఉంది. ఈ పంచగంగా తీర్థములో స్నానము చేస్తే పాపాలన్నీ పటాపంచలు అవుతాయి అని భక్తుల నమ్మకము . కోల్హాపూర్ లో అనేక గణపతి దేవాలయాలు వున్నాయి . అందులో స్థంభాలు లేని గణపతి మందిరము ముఖ్యమైనది. మహాలక్ష్మి దేవి ఆలయము ప్రాంగణములో సాక్షి గణపతి వున్నాడు . మహాలక్ష్మి దేవిని సందర్శించడానికి వొచ్చిన వారి అందరకి ఈ సాక్షి గణపతి సాక్షి గా వున్నాడు . ఈ సాక్షి గణపతిని దర్శించిన తరువాతే మహాలక్ష్మి దేవిని భక్తులు దర్శిస్తారు . మహా లక్ష్మి దేవాలయానికి సమీపముగా రంకా భైరవ దేవాలయము వుంది . రంకా భైరవుడు మహాలక్ష్మి దేవికి రక్షకుడిగా వుండేవాడు . ఆతని జ్ఞాపకార్థం ఈ దేవాలయము వెలసింది . ఈ భైరవ దేవాలయము లో రెండు జైన మందిరములు వున్నాయి . మహాలక్ష్మి దేవాలయానికి ఉత్తరము గా కాశీ విశ్వేశ్వర దేవాలయము వుంది . ఇది అతి ప్రాచీన మైన దేవాలయము ఈ దేవాలయము కి దగ్గరలో రెండు తీర్థములు వున్నాయి అవి కాశీ తీర్థం , మనికర్ణిక తీర్థం , ఇప్పుడు వీటిలో నీరు లేదు . కోల్హాపూర్ చుట్టూ ప్రక్కల వున్న దర్శనీయ స్థలాలను చూడడానికి మహారాష్ట్ర పర్యాటక శాఖవారు కోల్హాపూర్ లో ప్రతి రోజు “ కరవిర దర్సన్ “ అనే పేరు తో బస్ నడుపుతున్నారు . ఈ బస్సు ఉదయము 9 గంటలకి బయలు దేరి సాయంత్రము 5 గంటలకి తిరిగి వొస్తుంది . యాత్రికులకి కోల్హాపూర్ లో ఉండటానికి మంచి వసతులున్నాయి . మహాలక్ష్మి దేవాలయానికి దగ్గరగా , దూరములో మంచి హోటళ్లు , ధర్మ సత్రాలు  వున్నాయి. ...
  • ఈ వీరభద్ర ఆలయం  చాలా పురాతనమైనది. అనంతపురం జిల్లాలో ఉన్న ఈ వీరభద్ర ఆలయాన్ని లేపాక్షి టెంపుల్‌ అని కూడా పిలుస్తారు. ఈ ఆలయానికి మిస్టీరియస్‌ టెంపుల్‌గా కూడా గుర్తింపు ఉంది. 16వ శతాబ్దం లో నిర్మించిన ఈ ఆలయం లో అతి సుందరమైన శిల్పాలు, నాట్యకారుల ప్రతిమలతో ఆకట్టుకునే విధంగా ఉంటుంది. విజయనగర రాజుల కాలంలో ఈ ఆలయాన్ని నిర్మించారు. 70 స్తంభాలతో ఆకట్టుకునే ఆకృతిలో నిర్మించిన ఈ ఆలయంలో ఒక స్తంభం మాత్రం నేలకు ఆనుకుని ఉండదు. గాలిలో వేలాడుతున్నట్లుగా ఉంటుంది. ఈ ఆలయాన్ని సందర్శించే వారు  పల్చని వస్త్రాన్ని పిల్లర్‌ కింది నుంచి తీయడం చేస్తుంటారు. ఎంతో మంది ఇంజనీర్లు ఈ మిస్టరీని చేధించడానికి ప్రయత్నించి విఫలమయ్యారు. ఆలయం మొత్తం దేవతా ప్రతిమలు, నాట్యకారులు, సంగీతకారుల విగ్రహాలతో చెక్కబడి ఉంటుంది. ఈ ఆలయంలో అతి పెద్ద వీరభద్రుని విగ్రహం ఉంటుంది. 1583లో విరూపన్న, వీరన్న అనే సోదరులు నిర్మించారని చరిత్ర చెబుతోంది. ఈ ఆలయంకు మరో చరిత్ర కూడా ఉంది. రావణుని చేతిలో గాయపడిన జటాయువు అనే పక్షి ఈ ప్రాంతంలోనే పడిందట. రాముడు ఆ పక్షిని చూసి ‘లే పక్షి’ అని పిలిచాడట. అందుకే ఈ ప్రాంతానికి లేపాక్షి అని పేరు స్థిరపడిందని కథనం. మీరు అనంతపురం జిల్లాకు వెళుతున్నట్లయితే ఈ ఆలయాన్నిచూసి రండి. ఇతర విశేషాల కోసం  వీడియో చూడండి. ...
  • సంతానం కోసం, జన్మ జన్మల దోష నివారణకు భక్తులు దర్శించుకునే క్షేత్రం కుక్కె సుబ్రహ్మణ్య క్షేత్రం.  కుక్కి పురం, కుక్కి లింగం అని  కూడా ఈ క్షేత్రాన్ని పిలుస్తారు .తమిళనాడులో ఆరు సుబ్రహ్మణ్య క్షేత్రాలుండగా, కర్ణాటకలో మూడు ప్రసిద్ధ సుబ్రహ్యణ్య క్షేత్రాలు ఉన్నాయి. కర్ణాటకలో ఉన్న ఈ మూడు క్షేత్రాలు స్వామిని సర్ప రూపంలో చూపి ఆది మధ్యాంతాలుగా చెబుతాయి. కుక్కె నాగదోష పూజలకు ప్రసిద్ధి. దీనికి ఒక కథ కూడా చెబుతారు. గరుడుని వలన ప్రాణభయం ఏర్పడటంతో సర్పరాజైన వాసుకి ఇక్కడ దాక్కొని సర్వేశ్వరుని గురించి తపస్సు చేశాడట. కుమారస్వామి వివాహ సందర్భంగా తండ్రి ఆదేశం మేరకు నాగరాజుకి అభయమిచ్చారు. అందువల్లే వాసుకి పీఠంగా, ఆదిశేషుడు నీడగా ఉండి ఆ పైన స్వామి సేవలో తరిస్తూ భక్తులకు దర్శనమిస్తూ ఉంటాడు . ఇక్కడ సుబ్రహ్మణ్య స్వామిని సేవిస్తే నాగదోషం తొలగిపోతుందని చెబుతారు. కుక్కెలో స్వామి మొదట ఒక పుట్టగా వెలిశాడట. దానినే ఆది సుబ్రహ్మణ్య అని పిలుస్తారు. ఈ స్వామిని ముందుగా దర్శించుకొని, తర్వాత ప్రధాన ఆలయానికి చేరుకుంటారు. ఇక్కడ ఇచ్చే మూల ప్రసాదం (పుట్టమన్ను) చాలా శక్తివంతమైనదని చెబుతారు.  ఈ క్షేత్రంలో మరొక ప్రధానమైనది కుమారధార నది. కుమారస్వామి వివాహ వేళకు మంగళస్నానం చేయించడానికి దేవతలు అనేక పవిత్ర నదీజలాలను తెచ్చారట. ఆ జలాల ప్రవాహమే నేటి కుమారధార నది అని పురాణాలు చెబుతున్నాయి.  కుక్కె క్షేత్రం లోపలికి వెళ్లేటప్పుడు ఈ కుమారధారను దాటి  వెడతాం. చాలా ప్రశాంతంగా, అత్యంత స్వచ్ఛంగా ఉంటుంది ఈ తీర్థం. భక్తులు ఈ తీర్థంలో స్నానం చేసి తరిస్తారు. కుమారధార దాటిన తర్వాత మొదట దర్శనమయ్యేది అభయ గణపతి. ఈయనే ఇక్కడ  క్షేత్రపాలకుడు.  ఆది శంకరాచార్యులు  కుక్కె సుబ్రహ్మణ్యస్వామిని దర్శించినట్లు కథనాలు వ్యాప్తిలో ఉన్నాయి.  ప్రకృతి సోయగాలతో ... కుక్కె వెళ్లే రైలు మార్గం అంతా పచ్చదనంతో నిండి కనుల విందు చేస్తుంది . అందుకే రైలుమార్గ ప్రయాణాన్ని పర్యాటకులు  ఆనందిస్తారు. కనుమల పై భాగానికి చేరుకునే దారిలో వందకు పైగా వంతెనలు, యాభైకి పైగా టన్నెల్స్ ఉంటాయి. రైలు పర్వత శిఖరాలను చుట్టబెడుతూ వెళ్తుంటే చూడ్డానికి రెండు కళ్లు సరిపోవు.  మరోవైపు శిఖరాల నుండి జాలువారే జలపాతాలు, లోయలు, సెలయేళ్లు, వందల అడుగుల ఎత్తున్న చెట్లు, మేఘాలను చుంబించే శిఖరాలను స్వయంగా చూసి ఆనందించాల్సిందే తప్ప మాటల్లో వర్ణించలేము.    ఈ క్షేత్రం బెంగళూరు నుండి 300 కిలోమీటర్లు, మంగళూరు నుంచి 100 కిలోమీటర్ల దూరంలో ఉంది. కర్ణాటక రాష్ట్రంలో ఉన్న ఈ క్షేత్రానికి చుట్టూ కుమార పర్వతశ్రేణులు ఉన్నాయి. ఈ క్షేత్రానికి బస్సు, రైలు మార్గాల ద్వారా చేరుకోవచ్చు.  కుక్కెలో హోటల్ వసతి సదుపాయాలే కాదు దేవస్థానం సత్రాలూ ఉన్నాయి . మరిన్ని వివరాలు తెలుసుకోవాలంటే .... www.kukketemple.com లో  చూడవచ్చు. ...
  • చిదంబర రహస్యం అంటే  చాలామందికి తెలియదు. చిదంబరం వెళ్లి వస్తుంటారు.  కానీ అక్కడి విశేషమేమిటో చెప్పలేరు. కొద్దీ మంది మాత్రమే ఈ చిదంబర రహస్యం లోని అసలు విషయం ఏమిటో గ్రహించగలుగుతారు.  పృధ్వి, అగ్ని, వాయువు, తేజస్సు , ఆకాశ లింగాలను పంచభూత లింగాలు అని అంటాము. వీటిలో ఆకాశలింగం తమిళనాడు లోని చిదంబరం ఆలయంలో ఉంది.  ఈ ఆలయంలో స్వామి నటరాజ రూపం, ఇదీ అని చెప్పలేని చంద్రమౌళీశ్వర స్ఫటికలింగ రూపం, ఏ రూపమూలేని దైవసాన్నిధ్యం అనే మూడు స్వరూపాల్లో దర్శనమిస్తాడు. మూడో రూపమే చిదంబర రహస్యం.. గర్భ గుడిలో నటరాజస్వామికి కుడి వైపు  ఒక చిన్న ద్వారం వుంది. దానికి తెర వేసి వుంటుంది. ఇక్కడ గోడలో ఒక విశిష్ట యంత్రం ఉంది .అది ఏ యంత్రమో ఎవరికీ తెలియదు. దాని పైన  దట్టమైన చందనం పూసి ఉంటుంది.  దానిని ఎవరూ తాకరాదు. ప్రధాన అర్చకుడు మాత్రం రాత్రి వేళ తలుపులు వేసి ఆ యంత్రానికి పూజ చేస్తారు. ఇంకెవరికీ పూజ చెయ్యటానికే కాదు పూజా సమయంలో చూడటానికి కూడా అనుమతి లేదు. అయితే ఆసక్తిగల భక్తులు అక్కడి వూజారిని అడిగి రూ. 50 టికెటు తీసుకుంటే కిటికీగుండా కొద్ది దూరంనుంచి ఆ యంత్ర దర్శనానికి అవకాశం వుంటుంది. ఆ సమయంలో ద్వారానికి వున్న తెర తొలగించి హారతి వెలుగులో కొద్ది క్షణాలు మాత్రం ఆ యంత్ర దర్శనానికి అవకాశం కల్పిస్తారు. ఆ యంత్రంపై బంగారు బిల్వ పత్రాల మాలలు కనబడుతాయి.. ఆ కొద్ది క్షణాల దర్శనంలో ఎవరి అనుభూతులు వారివి.. ఎవరి భక్తి పారవశ్యం వారిది. ఇంతకీ ఆ స్ధలంలో ఏమి వున్నట్లు? చూసిన భక్తులకు ఏమి కనిపించినట్లు? అదే ఎవరికీ అంతుబట్టని రహస్యం. ఇదే చిదంబర రహస్యం. అయితే విజ్ఞులుమాత్రం ఈ రహస్యం నిరాకారుడైన దేవ దేవుని ఉనికిని సూచిస్తుందనీ, చిత్ + అంబరం అంటే జ్ఞానాకాశాన్ని, అనంతాన్ని వెల్లడిస్తుందని, ఎవరి అంతరంగ భావాలను బట్టి  వారికి ఆ రూపంలో నిరాకారుడైన స్వామి దర్శనమిస్తారని చెబుతారు. అది అసలు రహస్యం. ఇతర విశేషాలకు చూడండి వీడియో. vedeo courtesy...am tv  ...
  •  ఎలుకలకు ఒక ఆలయం ఉంది తెలుసా ? అవును ... రాజస్థాన్‌లోని దేష్నోక్ గ్రామం లొమూషికాలయం ఉంది . దీన్నే కర్ణిమాత ఆలయం అంటారు.  ఇది రాజస్థాన్‌లోని బికనీర్ జిల్లాకు సుమారు 30 కిలోమీటర్ల దూరంలో పాకిస్థాన్ సరిహద్దులో ఉంది.  దేష్నోక్ గ్రామాన్ని గతంలో ‘దస్‌నోక్’ అని పిలిచేవారు. ఈ గ్రామం పది చిన్నగ్రామాల మూలల భాగాల నుంచి ఏర్పడింది కాబట్టి ఆ పేరు వచ్చిందని చెబుతారు. ఈ గ్రామమే కర్ణిమాత దేవాలయానికి ప్రసిద్ధి. హిందువుల దేవతైన దుర్గామాత మరో అవతారమే కర్ణిమాత అని  కొలుస్తారు. సిందూరం రాసిన ఏకశిల మీద అమ్మవారు చతుర్భుజాలతో దర్శనమిస్తుంది. ఒక చేత త్రిశూలం, మరో చేత రాక్షసుని  తల పట్టుకొని సింహవాహినిగా భక్తుల చేత పూజలందుకుంటుంది. జోధ్‌పూర్, బికనీర్ రాజవంశీయులకు కర్ణిమాత కులదైవం. ఈ ఆలయాన్ని 15వ శతాబ్దంలో గంగాసింగ్ అనే రాజు నిర్మించినట్టుగా చారిత్రక ఆధారాలు ఉన్నాయి.  20వ శతాబ్దపు మొదట్లో పునర్నిర్మించారు. మొఘలుల అద్భుత శిల్పకళానైపుణ్యం ఇక్కడ గోచరిస్తుంది .   ఈ ఆలయంలోనే దాదాపు 20 వేలకు పైగా ఎలుకలు ఉన్నాయి. భక్తుల రాకపోకలకు ఏమాత్రం జంకకుండా అవి స్వేచ్ఛగా తిరుగుతుంటాయి. భక్తుల పాదాల మీదుగా పరుగులు తీస్తుంటాయి. భక్తులు పెట్టిన నైవేద్యాలను, పాలు, పెరుగు, పండ్లు, స్వీట్లు తింటూ తిరుగుతుంటాయి.  ఇక కర్ణిమాత  దుర్గాదేవి ఉపాసకురాలు. ఈమె 150 సంవత్సరాలు జీవించిందని అంటారు .  పుట్టుకతోనే ఈమెకు అతీంద్రియ శక్తులు ఉండేవని ప్రచారం. తనకున్న శక్తులతో పేదల సమస్యలు పరిష్కరించేదని  స్థానికులు చెబుతారు . అందుకే ప్రజలు ఆమెను దేవతలా కొలవడం ప్రారంభించారు. ఒకరోజు ఆమె ఆకస్మాత్తుగా తన ఇంట్లోనే అదృశ్యమైంది. ఎవరికీ కనిపించలేదు. ఆమెకు అక్కడే ఆలయం నిర్మించి, నాటి నుంచి పూజలు జరుపుతున్నారు.  కర్ణిమాత  స్థానికులకు కొంతమందికి కలలో కనపడి  తమ వంశస్థులంతా త్వరలోనే చనిపోతారని, వారంతా ఎలుకలుగా జన్మించి ఇక్కడే ఉంటారని, వారికి అన్నపానీయాలు సమర్పించి ధన్యులు కమ్మని చెప్పిందనే  కథనం కూడా ప్రచారం లో ఉంది.  కర్ణిమాత వంశంలో దాదాపు 600 కుటుంబాలు ఉండేవట. మాత చెప్పిన విధంగానే కొన్ని రోజులకు ఆ కుటుంబాల వారంతా మరణించడం, ఆ తర్వాతే ఈ ఆలయంలోకి  ఎలుకలు గుంపులు గుంపులుగా రావడం చూసిన వారంతా కర్ణిమాత వంశీయులే ఎలుకలుగా మారారని భావించారు. నాటినుంచే ఈ ఎలుకలను కర్ణిమాతతో సమానంగా పూజించడం మొదలుపెట్టారట. ఆలయం వద్ద దాదాపు 20 వేల ఎలుకలు తిరుగాడుతుండటం వెనక మరో జానపద కథ కూడా ప్రచారంలో ఉంది . 20 వేల మంది సైనికులు  ఒకానొక యుద్ధంలో ఓడిపోయి, పారిపోయి దేష్నోక్ గ్రామానికి చేరుకున్నారట.   ఆ ప్రాంతానికి వచ్చాక యుద్ధం నుంచి పారిపోవటం మహాపాపమని, దానికన్నా మరణమే మేలు అని తెలుసుకున్న వారు తమకు తామే మరణశిక్ష విధించుకున్నారు. కర్ణిమాత వారి ఆత్మహత్య దోషం పోవడానికి ఈ ఆలయంలో ఎలుకలుగా ఉండిపొమ్మని చెప్పిందట. సైనికులంతా కర్ణిమాతకు తమ కృతజ్ఞతలు తెలియజేస్తూ అక్కడే ఉండిపోయారట. అలా మానవులే ఎలుకలుగా పునర్జన్మ ఎత్తినట్టుగా కూడా చెబుతారు.   వేల కొలది నల్లని ఎలుకల మధ్య నాలుగు  తెల్లని ఎలుకలు కూడా కనిపిస్తాయి . ఇవి కనిపించడానికి మరో కథ కూడా ప్రచారంలో ఉంది. కర్ణిమాతకు ముగ్గురు పిల్లలు పుట్టి పురిట్లోనే కన్నుమూశారు. దీంతో ఆమె తన భర్తకు సొంత చెల్లెలినే ఇచ్చి వివాహం చేసింది. వారి కుమారుడు ఒకసారి ఆడుకుంటూ కపిల్ సరోవర్‌లో పడి చనిపోయాడు. కర్ణిమాత ఆ బిడ్డ ప్రాణాలను ఇవ్వమని యముడిని వేడుకుంది. యముడు ఆమె ప్రార్థనలకు కరగలేదు. కర్ణిమాత దుర్గాదేవి అనుగ్రహంతో ఆ కుమారుడిని బతికించుకుంది. అంతేకాదు ఆ కుమారుడితో పాటు ఆమె మిగతా ముగ్గురు బిడ్డలూ తిరిగి బతికారట. ఈ ఆలయంలో కనిపించే నాలుగు తెల్లని ఎలుకలు కర్ణిమాత బిడ్డలేనని, ఆ నాలుగు ఎలుకలు కనిపించిన వారికి కర్ణిమాత పూర్తి ఆశీస్సులు లభించినట్టే అని భక్తుల నమ్మిక. అందుకే ఆ నాలుగు తెల్లని ఎలుకలు కనిపించేదాక భక్తులు అక్కడే కూర్చొని ఓపికగా ఎదురుచూస్తుంటారు. అయితే, ఈ తెల్ల ఎలుకలు ముఖ్యమైన వేడుకలలో మాత్రమే  కనిపిస్తాయి.  ఇక్కడ ఎలుకలకు ఆహారం ఇవ్వడం గొప్ప వరంగా భక్తులు భావిస్తారు. అయితే, ఈ ఆలయంలో పొరపాటున ఎవరి వల్లనైనా ఎలుక చనిపోతే వారు అంతే బరువు గల వెండి ఎలుకను ఆలయానికి ఇచ్చి దోషాన్ని పోగొట్టుకోవాలి. అమ్మవారి ఎదుట ఎలుకలు తిన్న  నైవేద్యాన్నే భక్తులకు ప్రసాదంగా పంచుతారు.  కర్ణిమాత ఆలయంలో ఉదయం 4 గంటలకు తొలి పూజ మొదలు పెడతారు. పూజారులు అమ్మవారికి నైవేద్యాలు, మంగళహారతి సమర్పించి, మృదంగ ధ్వనులను వినిపిస్తారు. అప్పటి వరకు ఎక్కడెక్కడ ఉన్నాయో తెలియని ఎలుకలన్నీ గర్భాలయం నుంచి బిరబిరా బయటకు వస్తాయి.  పళ్లాలలో పెట్టిన నైవేద్యాన్ని  ఆరగిస్తాయి. ఆ తర్వాత భక్తులు సమర్పించే నైవేద్యాలను తింటూ, ఆలయంలో తిరుగుతూ రోజంతా గడిపేస్తాయి. తిరిగి రాత్రి సమయంలో గర్భాలయంలోకి వెళ్లిపోతాయి....
  • ఆమె మనసు నిండా భయం, భర్త  కోసం దిగులు . యుద్ధానికి వెళ్లిన భర్త క్షేమసమాచారం లేదు. ఏమయ్యాడో తెలియదు. పది రోజుల క్రింద ఉత్తరం వచ్చింది.  ఆ తరువాత నుంచి ఎటువంటి సమాచారము లేదు.... గుర్రంపై స్వారీ చేస్తూ తెలియకుండానే కొండపైకి ఎక్కుతోంది ఆమె. "మార్టిన్.... ఐ మిస్ యూ మార్టిన్.... ఐ మిస్ యూ సో మచ్ డియర్"  కళ్లల్లో నీళ్లు తిరిగాయి....కడిగేసినంత స్పష్టంగా కల్నల్ మార్టిన్ బొమ్మ ఆమె కళ్లముందు కట్టింది.... సాయంత్రం.... సూర్యుడు పడమర ఒడిలో పడుకుండి పోతున్నాడు... కొండమీద కాషాయ కాంతి విరజిమ్ముతోంది.... వింత నిశ్శబ్దం అంతా పరుచు కుంటూ ఉంది. ఉన్నట్టుండి...... గణ గణ గణ గణ ..... గణ గణ గణ గణ...... గంటల శబ్దం నిశ్శబ్దాన్ని చీల్చుకుంటూ వచ్చింది. ఆ శబ్దం వచ్చిన వైపు చూపింది ఆమె. దూరంగా ఒక శిధిల దేవాలయం.... అందులోనుంచి హారతి దీపాల వెలుగు....ధూపాల పొగ....ఘంటారావం....  అప్రయత్నంగానే ఆమె ఆ గుడిపైపు వెళ్లింది. గుడిముందు గుర్రం దిగి చెప్పులు విప్పి లోపలికి వెళ్లింది.... లోపల ‘వైద్యనాథ మహాదేవ శివుడు’....లింగాకారంలో విచిత్ర కాంతులు వెదజల్లుతూ..... అర్థనిమీలిత నేత్రాలతో పూజారి అర్చన చేస్తున్నాడు.... ఆయన నోటి నుంచి మంత్రాలు అలవోకగా వెలువడుతున్నాయి.... ఆమె తనకు తెలియకుండానే అక్కడే నిలబడిపోయింది.....కళ్లనుండి ధారగా నీరు కారుతూనే ఉంది.... పూజ పూర్తికాగానే పూజారి ఆమె వైపు చూశాడు..."మేమ్ సాబ్....తీర్థం తీసుకొండి...." "ఏమిటమ్మా ఏదో దుఃఖంలో ఉన్నట్టున్నారు" ఆమె తన భర్త కల్నల్ మార్టిన్ అఫ్గన్ యుద్ధానికి వెళ్లిన సంగతి, ఆయన క్షేమ సమాచారం లేని విషయమూ చెప్పింది. చెప్పిందన్న మాటే కానీ కన్నీళ్ల వర్షం కురుస్తూనే ఉంది... "మేమ్ సాబ్... కంగారు పడకండి... ‘బైద్యనాథ్ మహాదేవుడు’ అందరినీ కాపాడతాడు...  ఆయన దయ ఉంటే మృత్యువేమీ చేయదు. అంతఃకరణ శుద్ధిగా బైద్యనాధుడిని అర్చించండి.  ‘ఓం నమశ్శివాయ’ అన్న మంత్రాన్ని పదకొండు రోజుల పాటు జపించండి. అంతా మంచే జరుగుతుంది." అన్నాడు.. ఆమెకి ఏమనిపించిందో తెలియదు కానీ ఆ మరుసటి రోజు నుంచే అన్నపానాలు మానేసింది. అన్ని పనులూ మానేసింది. తన గదిలోనే కూచుంది...."ఓం నమశ్శివాయ.... ఓం నమశ్శివాయ..." మంత్రం జపించసాగింది.  మరొక ధ్యాస లేదు... ఇంకో ధ్యానం లేదు.... ఓం నమశ్శివాయ... ఓం నమశ్శివాయ.... ఒకటి ... రెండు .... మూడు ..... నాలుగు .... అయిదు .....  రోజులు గడిచిపోతున్నాయి...  "ఓం నమశ్శివాయ.... ఓం నమశ్శివాయ..." పదకొండో రోజు.... రోజు రోజంతా పంచాక్షరిని జపించింది... ... సాయంత్రం అవుతూ ఉండగా సేవకుడొకరు....  "మేమ్ సాబ్ ... మేమ్ సాబ్... సాహిబ్ కీ చిట్ఠీ ఆయీ హై... సాహిబ్ కీ చిట్ఠీ ఆయీ హై..." అని పరు గెత్తుకుంటూ వచ్చాడు....ఉద్వేగాన్ని ఆపుకుంటూ ఆమె ఆ లేఖను తెరిచి చూసింది.... తన ప్రియాతిప్రియమైన మార్టిన్ సంతకం చూసింది.... కట్టలు తెంచుకుంటున్న భావోద్వేగాన్ని ఎలాగోలా ఆపుకుంటూ లేఖను చదవసాగింది.... "డియర్....  గతంలో నీకు లేఖ వ్రాసిన మరుసటి రోజు నుంచే అఫ్గన్లు మా పటాలాన్ని చుట్టుముట్టారు. నలు వైపుల నుంచి భీకరమైన దాడి చేశారు. మేమెవరమూ బతికి బట్టకట్టి బయటపడే పరిస్థితి లేదు. మా దగ్గర ఆయుధాలూ తక్కువే... ఆహారమూ తక్కువే.... వాళ్లు వందల సంఖ్యలో ఉన్నారు.... ఇక మా పని అయిపోయిందనుకున్నాను.... ఒక అఫ్గన్ పొడవాటి ఖడ్గంతో నాపై దూకాడు... నేను భయంతో కళ్లు మూసుకున్నాను... ఆ క్షణంలో నువ్వు తప్ప నాకింకెవరూ గుర్తుకురాలేదు... అంతలో అద్భుతం జరిగిపోయింది....  ఎవరో ఒక మనిషి అఫ్గన్లపైకి దూకాడు... ఆయన్ని నేను అంతకుముందు ఎప్పుడూ చూడలేదు....ఒళ్లంతా తెల్లగా ఏదో రాసుకున్నాడు. సింహం చర్మం మొలకి కట్టుకున్నాడు... చేతుల్లో పొడవాటి శూలం లాంటి ఆయుధం ఉంది.. ఆ శూలం కొన మూడుగా చీలి ఉంది.... ఆయన ధాటికి అఫ్గన్లు కకావికలమైపోయారు. కాలికి బుద్ధిచెప్పి పారిపోయారు....వాళ్లు పారిపోగానే ఆయన కూడా ఏమైపోయాడో తెలియదు.... ఎక్కడికి వెళ్లిపోయాడో తెలియదు...  ఆయన ఆ క్షణాన వచ్చి ఉండకపోతే నేను నీకు దక్కేవాడికి కాదు డియర్..." * * * 1880 అఫ్గన్ యుద్ధం నుంచి తిరిగి వచ్చాక కల్నల్ మార్టిన్, ఆయన భార్య కొండమీద కొలువున్న బైద్యనాథ్ మహాదేవుడిని దర్శించుకున్నారు. శిథిలావస్థలో ఉన్న ఆ దేవాలయం జీర్ణోద్ధరణకు పదిహేనువేల రూపాయలు సమర్పించుకున్నారు. మహాదేవ్ మందిరానికి కొత్త శోభ వచ్చింది.  కొన్నాళ్లకి కల్నల్ మార్టిన్ సతీ సమేతంగా ఇంగ్లండుకు తిరిగి వెళ్లిపోయారు. అక్కడ కూడా వారి ఇంట్లో ఒక శివుడి విగ్రహం పెట్టుకున్నారు. కడవరకూ ఆయన్నే అర్చించారు.. మందిరం ముందు ఉన్న శిలాఫలకంపై తమ కథను కల్నల్ మార్టిన్, ఆయన భార్య వ్రాయించారు. ఆ మందిరం మధ్యప్రదేశ్ లోని షాజాపూర్ జిల్లాలోని అగర్ మాల్వాలో ఉంది. భారత దేశంలో బ్రిటిషర్ కట్టించిన ఏకైక దేవాలయం అది. ........susri...
  • ధృవ బేరం ...ఈ పదం చాలామందికి తెలియని పదం . కొందరైతే అసలు విని ఉండరు . అసలు ఆ పదమే చిత్రం గా ఉంది కదా. అంతగా వాడుకలో లేని పదం అది . మామూలుగా మనం మూల విరాట్టు అంటుంటాం .అదే ధృవ బేరం .  ధృవ అంటే స్థిరంగా ఉండేది అని అర్ధం. ధృవబేరం అంటే నేలలో స్థంభం పాతుకున్నట్లు స్థిరంగా ఉండే విగ్రహమూర్తి. ఇపుడు మనము తెలుసుకోబోయేది. తిరుమల ప్రధానాలయంలో నిత్యం లక్షలాదిమంది భక్తిప్రపత్తులతో దర్శించుకునే మూలవిరాట్టు గురించి . ఇక్కడి వేంకటేశ్వరుని విగ్రహం స్వయంభూమూర్తి (అనగా స్వయంగా వెలసినది, ఎవరూ చెక్కి ప్రతిష్ఠించలేదు) అని భక్తుల విశ్వాసం. మూలవిరాట్టు అయిన ధృవ బేరానికి తెల్లవారుజామున సుప్రభాతసేవ మొదలు, అర్ధరాత్రి ఏకాంతసేవ వరకూ రోజంతా ఆరాధనలు జరుగుతాయి. ఈ మూలవిరాట్టు సాలగ్రామమూర్తి. మూలమూర్తి శిరస్సు నుండి పాదం వరకూ ఎనిమిది అడుగుల ఎత్తులో ఉంటుంది. వీరస్థానక పద్ధతిలో నిలబడి ఉన్న మూలవిరాట్టు పక్కన శ్రీదేవి, భూదేవి విగ్రహాలు ఉండవు. నిత్యం లక్షలాదిమంది భక్తులు తిరుమలేశుని దివ్య మంగళ దర్శనం కోసం ఎదురుచూస్తారు కనుక ఈ మూలవిరాట్టును దర్శించుకోడానికి రెండు క్షణాల కంటే సమయాన్ని కేటాయించలేరు. ధృవబేరం చక్కని ముఖకవళికలతో ఉంటుంది. ముక్కు మరీ ఎత్తూ కాదు, చప్పిడీ కాదు. కన్నులు స్పష్టంగా అమరి ఉంటాయి. నుదుటిపై రేఖారూపంగా ఏర్పడిన నామం ఉంది. నిత్యం పచ్చకర్పూరంతో పెట్టిన నామం కన్నులను కొంతభాగం కప్పివేస్తుంది. నామం రూపం, సైజూ వంటి వివరాలు వైఖానస ఆగమంలో చెప్పినవిధంగా కచ్చితంగా పాటిస్తారు. స్వామివారి శిరస్సుపై (నుదుటిపైభాగం వరకు) కిరీటం ఉంది. ఆయన జటాజూటము భుజాలపై పడుతూ ఉంటుంది. కచ్చితమైన కొలతలు తీసికొనబడనప్పటికీ స్వామివారి ఛాతీ వెడల్పు సుమారు 36-40 అంగుళాల మధ్య సైజులోనూ, నడుము భాగం వెడల్పు 24-27 అంగుళాలు సైజులోనూ ఉంటుంది. స్వామివారి నడుము పైభాగం ఆచ్ఛాదనారహితంగా ఉంటుంది. ఆయన వక్షస్థలం కుడిభాగాన శ్రీలక్ష్మీదేవి రూపం ఉంది. స్వామివారు చతుర్భుజములను కలిగియున్నారు. పై కెత్తిన కుడిచేతిలోనున్న సుదర్శన చక్రము, ఎడమచేతిలోనున్న పాంచజన్య శంఖము విగ్రహంలో భాగాలు కావు. అదనంగా స్వామివారి చేతులలో ఉంచిన అలంకారాయుధాలు. దిగువనున్న రెండుచేతులలోను కుడిచేయి వరదహస్తము (అరచేయి భక్తులకు కనిపిస్తూ, వరములను ప్రసాదిస్తున్నట్లుగా ఉంటుంది). ఎడమచేయి కట్యావలంబిత ముద్రలో (నడుమువద్ద మడచినచేయి. అరచేయి స్వామివారివైపు ఉంటుంది) ఉంది. నడుము క్రిందభాగంలో స్వామివారు ధోవతి ధరించి ఉంటారు. రెండు మోకాళ్ళూ కొంచెంగా వంగినట్లు కనిపిస్తాయి. ఇక ఈ విగ్రహానికి రక రకాల అలంకరణలు చేస్తుంటారు.  శ్రీవేంకటేశ్వరుని ఏయే ఆభరణాలు అలంకరిస్తారో.. ఇప్పడు చూద్దాం... 1. శ్రీవారి పాదాల క్రింది పద్మపీఠం - బంగారు రేకుల పద్మపీఠం 2. బంగారు పాద కవచాలు రెండు 1.కుడిపాదం, 2.ఎడమ పాదం  3. స్వర్ణపీతాంబరం (బంగారు రేకు) 4. బంగారు ఖడ్గం అనబడే సూర్యకఠారి 5. వైకుంఠ హస్తమునకు అలంకరింపబడే బంగారు కవచం రేకు 6. వైకుంఠ హస్తమునకు అలంకరింపబడే పొడవైన బంగారు సాదారేకు 7. వైకుంఠ హస్తమునకు సాతుబడి అయ్యే బంగారు కుడి నాగాభరణం 8. వైకుంఠ హస్తనాగాభరణం క్రింద ఉండే కడియం 9. కటి హస్తమునకు అలంకరించే బంగారు సాదారేకు 10. కటి హస్తమునకు అలంకరింపబడే బంగారు కడియం 11. కటి హస్తమునకు అలంకరింపబడే పొడవైన బంగారు కవచం రేకు 12. బంగారు కటిహస్త కవచం బంగారు రేకు 13. కటి హస్తమునకు అలంకరింపబడే రత్నాలదస్తుబందు 14. ఎడమచేయి నాగాభరణం 15. బంగారు నాగాభరణం అనే వడ్డాణం 16. వక్షస్థలం అమ్మవార్ల బంగారు కంటె, రత్నాలతో 17. బంగారు సహస్రనామ సాలిగ్రామాలు 18. బంగారు తులసీహారం 19. కమ్మరపట్టె అనే బంగారు వడ్డాణం 20. ఆరుపోర్వల బంగారు యజ్ఞోపవీతం 21. బంగారు కాసుల దండ 22. నాలుగు పేటల బంగారు మొహరీల గొలుసు 23. భుజకీర్తులు రెండు 24. రత్నాలు పొదిగిన బంగారు శంఖం రేకు 25. రత్నాలు చెక్కిన బంగారు చక్రం రేకు 26. రత్నాలు చెక్కిన బంగారు ఎడమ కర్ణపత్రం 27. రత్నాలు చెక్కిన బంగారు కుడికర్ణపత్రం 28. రత్నాలు చెక్కిన బంగారు బావలీలు, కుడి, ఎడమ, 29. చంద్రవంక తరహా బంగారు కంటె 30. బంగారు గళహారం 31. బంగారు గంటల మొలతాడు 32. బంగారు రేకు కర్ణ పత్రముల జంట 33. బంగారు రెండు పేటల గొలుసు 34. బంగారు సాదాకంటెలు 35. బంగారు కిరీటం 36. కొత్తగా చేయించిన బంగారు శంఖ చక్రముల కవచరేకులు 37. బంగారు ఐదుపేటల గొలుసు 38. శ్రీ స్వామివారి మకరతోరణం 39. వక్షస్థలంలో తగిలించి ఉన్న భూదేవి ప్రతిమ ఈ ఆభరణాలన్నీ అర్చకుల ఆధీనంలో ఉంటాయి. వీటి విలువ కోట్ల రూపాయలన్న విషయం తెలిసిందే. వీటిలో కొన్ని స్వామివారికి అలంకరింపబడగా, మిగిలినవి శ్రీవారి ఆలయం లోనే భద్రపరచడం జరుగుతుంది.   కాగా  ధృవ బేరం  వేంకటేశ్వరుని ది  కాదనే  వాదనలు  ఉన్నాయి.   మరోసారి దాని గురించి తెలుసుకుందాం .  ....   సత్య అయ్యదేవర ...
  • కొన్ని విషయాలను అంత త్వరగా నమ్మలేము .  అలా అని పూర్తిగా కొట్టి పారేయలేము . మనదేశంలో ఉన్న  గుళ్ళు గోపురాలు  ఎన్నో అద్భుతాలకు  నెలవులు .  అలాగే  కొన్ని  గుళ్ళలో తెలియని  మిస్టరీలు ఎన్నో ఉన్నాయి . అలాంటి వింతే ఈ   కిరాడు  దేవాలయనిది కూడా. ఆ గుడిలో దాగున్న ఒక మిస్టరీ గురించి వింటే మాత్రం ఆశ్చరం  కలుగుతుంది .  చీకటి పడిన తరువాత ఆ గుడిలోనికి గనక వెళితే మరిక తిరిగి రారట...! శిలలు గా మారిపోతారట.ఇంతకీ ఎక్కడుందా గుడి? రాజస్థాన్ బర్మార్ జిల్లా కేంద్రానికి సుమారు 35 కిలోమీటర్ల దూరంలో, జైసల్మేర్ కి 157 కిలోమీటర్ల దూరంలో ఉన్న హాత్మ గ్రామంలో ఉంది కిరాడు గుడి.నిజానికి ఇది ఒక గుడి కాదు అయిదు ఆలయాల సమూహమైన సోమేశ్వరగుడి. ఈ ఐదింటిలో ప్రస్తుతం విష్ణుమూర్తికి అంకితమిచ్చిన గుడిని మాత్రం చూడడానికి వీలవుతుంది. మిగిలినవి శివదేవునికి అంకితం చేయబడినవి. వేల సంవత్సరాల పురాతన ఆలయం. నిజానికి ఒక మరుగునపడిన దేవాలయం ఇది. కాని దీనికున్న అసాధారణమైన మిస్టరీ కారణంగ ప్రస్తుతం ఒక పర్యాటకస్థలంగా ప్రసిద్ధి చెందింది. ఆ ఆలయంలో సూర్యాస్తమయం  అయిన తరువాత ఉంటే మనుషులు రాళ్లుగా మారిపోతారట.   ఆ విషయాలు తెలుకోవడానికి  వీడియో  చూడండి. vedeo courtesy... vijaya mavuru ...
  • ఇది చాలా పెద్ద చర్చే....  ఈ విషయంపై టీవీల్లో గంటలు గంటల పాటూ చర్చలు జరుగుతాయి. కెమెరాల ముందు దాదాపు మీదపడి రక్కుకున్నంత పని చేస్తారు మన మేథావులు. నాస్తికులకు ఈ విషయం చూయింగ్ గమ్ లాంటి నిత్య నాష్టా .  ఎంత నమిలితే అంత సాగుతుంది.  ఎంత వాగితే అంత కొనసాగుతుంది. ఇంతకీ భారత ప్రభుత్వం ఏమంటుంది? ప్రభుత్వం లెక్కల ప్రకారం అధికారికంగా దయ్యాలూ, భూతాలూ, శాపాలూ ఉన్నాయా? ఉన్నాయి!!! భారత ప్రభుత్వం దయ్యాలున్నాయని డిక్లేర్ చేసిందా?  చేసింది!!! ఎప్పుడు? ఎక్కడ? ఆ సంగతి తెలుసుకోవాలంటే మీరు ‘భాన్ గఢ్’ కి వెళ్లాలి. ఢిల్లీ నుంచి జైపూర్ కి వెళ్లే మార్గంలో (300 km from Delhi) సరిస్కా టైగర్ రిజర్వ్ ప్రారంభం కావడానికి ముందు వచ్చే ఒక చిన్న గ్రామమే భాన్ గఢ్.  ఆ గ్రామంలో ఒక బోర్డు ఉంటుంది. ఆర్కియాలజికల్ సర్వే ఆఫ్ ఇండియా ఆ బోర్డును పెట్టింది.  ఆ బోర్డులో  "ఈ భాన్ గఢ్ గ్రామంలోని భగ్నావశేషాల దగ్గర రాత్రి ఉండటానికి వీల్లేదు. ఎవరైనా రాత్రి ఈ ప్రదేశంలో ఉంటే వారిపై కఠిన చర్యలు తీసుకోవడం జరుగుతుంది.." భాన్ గఢ్ లో ఒక కోట ఉంది. కోటలో వీధులు, బజార్లు, నర్తన శాలలు, విశ్రాంతి గృహాలు ఉన్నాయి.. అద్భుత శిల్పకళ ఉన్న గోపీనాథ మందిరం, సోమేశ్వరాలయం, మంగళాదేవి గుడి, కేశవరాయ్ కోవెల ఉన్నాయి. ఇళ్లూ, వాకిళ్లు ఉన్నాయి.  కానీ చీకటి కమ్ముకొచ్చే సరికి కోట మొత్తం ఖాళీ అయిపోతుంది.  నరప్రాణి ఉండదు. రాత్రిపూట భగ్నావశేషాల దగ్గర ఎవరూ ఉండరు.  మొత్తానికి మొత్తం ఖాళీ అయిపోతుంది. రాత్రి వేళ కోటలో గజ్జెల సవ్వడి వినిపిస్తుంది.  కోట లోపలి నుంచి అస్పష్ట సంగీత రాగాలు అలలు అలలుగా దొర్లుకొస్తూంటాయి.  సందర్శకులు తీసిన గ్రూప్ ఫోటోల్లో టూరిస్టులతో పాటూ ఏవేవో వింత నీడలు కూడా అప్పుడప్పుడూ పడుతూంటాయిట.  అంతే కాదు.... కోటలోని ఇళ్లకి పై కప్పులుండవు. ఎవరైనా పొరబాటున కప్పు వేయడానికి ప్రయత్నిస్తే అవి తెల్లారేసరికి కూలిపోతాయి. భాన్ గఢ్ 1573 లో మహారాజా భగనాన్ దాస్ నిర్మించాడు. ఆయన దాన్ని తన కొడుకు మాధవ్ సింగ్ కోసం కట్టించాడు. మాధవసింగ్ అక్బర్ సేనాని మాన్ సింగ్ కి తమ్ముడు. మాధవసింగ్ తరువాత ఆయన కొడుకు ఛత్రసింగ్ రాజయ్యాడు. ఛత్రసింగ్ 1630 లో చనిపోయాడు. ఆ తరువాత నుంచే భాన్ గఢ్ కళ తప్పింది. 1720 లో రాజా జయసింగ్ ఈ గ్రామాన్ని గెలుచుకున్నాడు. ఆ తరువాత 1783 భయంకరమైన కరువు వచ్చింది. అప్పట్నుంచీ ఊరు నిర్మానుష్యం అయిపోయింది. మరి భాన్ గఢ్ లోకి భూతాలు ఎప్పుడు వచ్చాయి? ఖచ్చితంగా తెలియదు కానీ స్థానికుల కథనాల ప్రకారం బాబా భోలేనాథ్ అనే బాబాజీ ఆ ప్రాంతంలో తపస్సు చేసుకునేవాడు.  ఆయన దగ్గరకి వచ్చి అప్పటి రాజుగారు కోట నిర్మించుకునేందుకు అనుమతి కోరాడట. "రాజా నాకు డబ్బూ దర్పం అంటే అసహ్యం.. నువ్వు కోట కట్టుకో. రాజసౌధం కట్టుకో... కానీ దాని నీడ నా పై పడటానికి వీల్లేదు. పడ్డ మరుక్షణం ఊరు పాడుబడిపోతుంది. ఇది దయ్యాల కోట గా మారిపోతుంది. " అంటూ కండిషనల్ పర్మిషన్ ఇచ్చాడు బాబాజీ. రాజుగార్లు కోటలు కట్టుకున్నారు. రాజసౌధాలను కట్టుకున్నారు. క్రమేపీ భోలేనాథ్ మాట మరిచిపోయారు. అతని కంటె ఘనుడు ఆచంట మల్లన్న అన్నట్టు "బాబా కంటే ఘనుడు భాన్ గఢ్ బాలయ్యలు" వచ్చేశారు. భవనాల ఎత్తు పెంచేశారు. ఒక రోజు భాన్ గఢ్ రాజసౌధం నీడ బాబాజీ సమాధిని తాకింది. ఆయన బాబా గారు. తృణమో పణమో పుచ్చుకుని అక్రమ కట్టడాలను క్రమబద్ధీకరించే మునిసిపల్ అధికారి కాడు మరి. అంతే.... శాపం తన పనిని తాను చేసుకుపోయింది. ఊరు పాడుబడిపోయింది. ఇంకో కథ ప్రకారం భాన్ గఢ్ రాకుమారి రత్నావతి 'మంత్ర' విద్యలో మహాదిట్ట. ఆమెని ' సింఘియా' అనే ఇంకో మాత్రికుడు మోహించాడు.  రత్నావతికి మంత్రించిన నూనె పంపించాడు. ఆమె దాన్ని తాకగానే అతని వశమౌతుంది. కానీ రత్నావతి ఆ నూనెను పారబోయించి, తన మంత్రశక్తితో బండరాయిగా మార్చింది.  ఆ బండరాయి దొర్లి దొర్లి వెళ్లి 'సింఘియా'ని పచ్చడి పచ్చడి చేసేసింది.  చనిపోతూ చనిపోతూ "ఒసేయ్ అరుంధతీ... నన్నీ బండ కింద కుళ్లబెట్టావా? వదల బొమ్మాళీ వదల " స్టయిల్లో తెల్లారే సరికి ఊరు పాడుబడిపోతుందని, అక్కడ రాత్రి ఉండేవాళ్లు చనిపోతారని శపించాడు.  ఆ రాత్రికి రాత్రి ఊరు నాశనమైపోయిందట. అప్పట్నుంచీ అది దయ్యాల కోట అయిపోయింది. ఆర్కియాలజికల్ సర్వే ఆఫ్ ఇండియా భారత ప్రభుత్వ విభాగం. ఆ విభాగం భాన్ గఢ్ లో "దయ్యాలున్నాయి జాగ్రత్త" అని అధికారికంగా బోర్డు పెట్టించింది.  కాబట్టి భారతప్రభుత్వం దయ్యాలు, భూతాలు ఉన్నాయని అంగీకరించినట్టే కదా? ఇట్స్ అఫీషియల్ నౌ..... దయ్యాలు,.... భూతాలు ఉన్నాయి.... ఇప్పుడు భాన్ గఢ్ టూరిస్టు స్పాట్. (పగటి పూట మాత్రమే సుమా! ) ఆర్కియాలజికల్ సర్వే ఆఫ్ ఇండియా దయ్యాలున్నాయని నమ్ముతుందా? ఏమో తెలియదు కానీ.... ప్రాచీన కట్టడాలు ఉన్న ప్రతి చోటా ఆర్కియాలజికల్ సర్వే ఆఫ్ ఇండియా కార్యాలయం ఉంటుంది. కానీ భాన్ గఢ్ లో మాత్రం వాళ్ల ఆఫీసు లేదు.  దయ్యాలు ఆత్మలు ఉన్నాయి కాని భాన్ గఢ్  కొటలొ లేవని అక్కడ పరిశోధన  చేసిన  ఫారనార్మల్ సొసైటి ఆఫ్ ఇండియ స్థాపకుడు, పరిశోధకుడు  గౌరవ్ తివారి  చెప్పారు . ఆయన  ఈమధ్యనే  విచిత్ర పరిస్థితుల్లో మరణించారు.   ...........  susri...
  • అద్భుత క్షేత్రం  సలేశ్వరం !! అది నల్లమల  అటవీ   ప్రాంతం ..  ఎటు  చూసినా ఎత్తైన చెట్లు.. పక్షుల కిలకిలలారావాలు...వన్యప్రాణులు.. ప్రకృతి అందాలతో  అలరారే ఆ క్షేత్రంలో.. సాక్షాత్తూ శివుడు కైలాసం విడిచి  కొలువైనాడు .  లోతైన లోయలో కొలువుదీరిన శివుడిని  చేరుకోవడానికి కాలినడకన ఆరు కిలోమీటర్లు ప్రయాణించాల్సిందే!  ఆ ఆద్భుత స్థలమే సలేశ్వరం!! సామాన్యులు సలేశ్వరమని పిలుచుకునే  ఈ శివ  క్షేత్రం మహాబూబ్‌నగర్ జిల్లా నల్లమల అడవిలో ఉంది. మన్ననూరుకు సుమారు 30 కిలోమీటర్ల దూరంలో... దట్టమైన అడవిలోని ఒక లోతైన లోయలో ఉంది. ప్రతీ సంవత్సరం చైత్ర పున్నమినాడు ఈ క్షేత్రానికి భక్తులు వేలసంఖ్యలో తరలివస్తారు. పున్నమి నాటి రాత్రి అడవిలో వేలాది భక్తులు లోయలోకి దిగి స్వామిని దర్శించుకుంటారు. ఈ శివాలయం ఎదురుగా దాదాపు మూడువందల అడుగుల ఎత్తు రాతికొండ పై నుంచి జలపాతం పరవళ్లు తొక్కుతూ దూకుతుంది .  ఈ దృశ్యం భక్తులను  విశేషంగా ఆకట్టు కుంటుంది.  అచ్చంపేట, కల్వకుర్తి ఆర్టీసీ డిపోలు ఈ యాత్ర సందర్భంగా స్పెషల్ బస్సులు నడుపుతాయి. మన్ననూరు నుంచి శ్రీశైలం ప్రధాన రహదారిలో సుమారు 20 కిలోమీటర్ల దూరం ప్రయాణించాల్సి ఉంటుంది. అక్కడి వరకు వాహనాలు వెళతాయి. వాహనాలు ఆగిన స్థలం నుంచి క్షేత్రం సుమారు ఆరుకిలోమీటర్ల దూరంలో ఉంటుంది. ఇందులో నాలుగు కిలోమీటర్లు లోయలోకి దిగాలి. ఒకే ఒక మనిషి నడిచేంత బాటతో కూడిన లోయ అడుగుభాగానికి చేరుకోవడం నిజంగా సాహసమే! చిన్నా పెద్దా అనే  తేడా  లేకుండా ప్రతీఒక్కరూ జంగమయ్య సేవలో తరించిపోతారు. కర్రనే ఊతంగా చేసుకుని పండు ముదుసలివారు జంగమయ్య దర్శనం కోసం బారులు తీరడం ఆశ్చర్యానికి గురిచేస్తుంది.  ఈ యాత్రలో ఇప్పటి వరకు ఎలాంటి ప్రమాదాలు జరగలేదు. దీన్ని స్వామి మహిమగా కొందరు  చెబుతుంటారు . చుట్టుపక్కల జిల్లాల నుంచే కాక మహారాష్ట్ర, కర్ణాటక తదితర రాష్ర్టాల నుంచి కూడా ఈ క్షేత్రానికి భక్తులు వస్తుంటారు.  ఈ క్షేత్రాన్ని చేరుకోవడానికి మూడుదారులున్నాయి. మన్ననూరు నుంచి, కొండనాగుల నుంచి, లింగాల నుంచి ఈ క్షేత్రానికి చేరుకోవచ్చు. అయితే కొండనాగుల, లింగాల గ్రామాల నుంచి అటవీ మార్గం ద్వారా సుమారు 40 కిలోమీటర్ల దూరం నడవాల్సి ఉంటుంది. అయినా ఈ దారి గుండా వందలాది భక్తులు ఈ క్షేత్రానికి వస్తూంటారు. నల్లమల అడవిలో మొత్తం  పంచ లింగాలున్నాయి అంటారు .  శ్రీశైల మల్లికార్జునస్వామి (జ్యోతిర్లింగం), సలేశ్వరంలింగమయ్యస్వామి, లొద్దిమల్లన్న, ఉమామహేశ్వరం ఈ నాలుగు లింగాలే అందరికీ తెలిసినవి. తెలియని ఐదో లింగాన్ని దర్శించుకుంటే  పునర్జన్మ ఉండదని కొందరు భక్తులు అంటారు. ఆ ఐదో లింగం నల్లమల అడవిలో ఎక్కడుందో ఇప్పటికీ రహస్యమే!  vedeo courtesy... mirror ...
  • భీముడి పేరిట ప్రసిద్ధి గాంచిన ఆ గుహల్లో ఏమి జరిగింది ? పాండవులు అరణ్య , అజ్ఞాత వాస కాలంలో ఈ గుహల్లోనే ఉన్నారట . అందుకు తగిన ఆధారాలు కూడా లభించాయి . అయితే వారి తర్వాత ఎవరు ఆ గుహలను ఆవాసం గా మలుచుకున్నారు ? అవన్నీ ఇప్పటికి మిస్టరీయే . ఈ గుహలకు భీమ్ బెట్కా  అనే పేరు మహా భారతంలోని భీముడు వలన వచ్చింది. భీముడు అక్కడ రెండు పెద్ద రాళ్లపై కూర్చునే వాడట. భీమ్‌బేట్కా శిలా గుహలు ప్రాచీన శిలా యుగం నాటి పురావస్తు గుహలు. ఈ గుహలు భారతదేశంలో ఆదిమానవుడి ఉనికి తెలియజేస్తున్నాయి అలాగే దక్షిణ ఆసియా రాతి యుగం ఆరంభాన్ని కూడా చాటుతున్నాయి. ఈ గుహలు భారతదేశం లోని మధ్యప్రదేశ్ రాష్ట్రం భోపాల్ కి దగ్గరలోని రైసేన్ జిల్లా అబ్దుల్లా గంజ్ పట్టణ సమీపంలోని రతపాని వన్యప్రాణి అభయారణ్యంలో ఉన్నాయి.ఇందులో కొన్ని గుహల్లో లక్ష సంవత్సరాలకు పూర్వం హోమో ఎరక్టస్ అనే ఆది మానవ జాతి నివసించారు. ఈ గుహలలోని కొన్ని రాతి గుహ చిత్రాలు 30,000 సంవత్సరాలకు పై బడినవని అంటారు.  ఈ గుహలు ఆనాటి నాట్య రీతుల ఉనికి కూడా తెలియ చేస్తున్నాయి . 2003 లో ఈ గుహలను ప్రపంచ వారసత్వ ప్రదేశాలుగా యునెస్కో గుర్తింపుకు నోచుకున్నాయి .  కొంత కాలం ఈ గుహలు బౌద్దా రామాలు గా విలసిల్లాయని చరిత్రకారులు చెబుతున్నారు . ఆ తర్వాత ఏలియన్స్ కూడా అక్కడ కొచ్చారని పరిశోధకులు అంటున్నారు ... వివరాలకు వీడియో చూడండి .  భీమ్ బెట్కా గుహలు భోపాల్ కు 50 కిలోమీటర్ల దూరంలో ఉన్నాయి కనుక ముందు భోపాల్ చేరుకొని అక్కడి నుంచి లోకల్  ట్రాన్స్పోర్ట్  ద్వారా భీమ్ బెట్కా చేరుకోవచ్చు. vedeo  courtesy...tv 5...
  • అఖండ భారత దేశానికే తలమానికం గా నిలిచిన.. అన్నపూర్ణ గ పేరు గాంచిన.. ఆంధ్ర దేశాన్ని ఎందఱో రాజులు పరిపాలించగా తెలుగు బాషా మాట్లాడే ప్రాంతాల ను ఏకచత్రాధిపత్యం కింద చేర్చింది కాకతీయులు. అనన్యసామాన్యమైన పోరాట పటిమ,అపూర్వ పరిపాలనా దక్షత, అద్వితీయ కళా పిపాస కలిగిన కాకతీయుల చరిత్రకు సాక్ష్యాలు  ఈ కళారూపాలు. ఒకప్పటి ఓరుగల్లును.. ఇప్పటి వరంగల్లుని  రాజధానిగా చేసుకొని పరిపాలించిన కాకతీయయుల పాలనలో జీవంపోసుకొని శిల్పంగా అవతరించిన ప్రతి శిలా మనకు వరం. భారతీయ సంస్కృతికే ఒక కృతిని... ఆకృతిని కల్పించిన కళల్లో 'శిల్పకళ' ప్రముఖమైనది. తమలో దాగిన ఆగమజ్ఞాననిధిని, తత్వార్థఖని ని రాళ్ళల్లో ఇముడ్చిన కాకతీయుల ప్రతిభ... అనన్యం..... అపూర్వం ... ఆశ్చర్యం . స్పందిచే మనసుంటే ఇక్కడి ప్రతి రాయి సుమదురమే.. వీక్షించే కనులుంటే ప్రతి శిల్పం మనోహరమే. అద్భుతమైనకాకతీయుల కళామణిహారం లోంచి జాలు వారిన ఆణి ముత్యాలుగా అనేక ఆలయాలు నేటికి నిలిచి ఉన్నాయి. ప్రతి వ్యక్తి అంతరంగం లో సుమధుర తరంగాలను మీట గలిగిన ఈ శిల్పసంపద కొన్ని వందల సంవత్సరాల చరిత్రను తనలో ఇముడ్చుకొందంటే అతిశయోక్తి కాదు. ఖిల్లా  వరంగల్ లోని మట్టి కోట ఉత్తర భాగంలో భూగర్భంలో కాకతీయుల కాలం నాటి ఆలయం ఇటీవల బయట పడింది .  కేంద్ర ప్రభుత్వం ప్రకటించిన హృదయ్ కార్యక్రమంలో భాగంగా చేపట్టిన అభివృద్ధి పనుల్లో భాగంగా ఉత్తర కోట మట్టి కోట భాగంలో తవ్వుతుండగా బయట పడిన ఈ ఆలయం త్రికుటాలయం . చారిత్రక అన్వేషణలో వరంగల్ మట్టికోటలో లంజపాతర గండి వద్ద భూ గర్భంలోనుండి సగం బయటపడినదొకటి, నేలలోనే వున్న మరొకటి, రెండు త్రికూటాలయాలు ఇవి.. కాని వాటిని పూర్తిస్థాయిలో త్రవ్వి బయటపెట్టలేదు. ధూప, దీప, నైవేద్యాలు కరువు శిథిలమైపోతున్న ఆలయం కనుమరుగవుతున్న శిల్ప సంపద నాడు వైభోగం.. నేడు వెలవెల- కాకతీయుల కాలంలో నిర్మించిన ఇలాంటి చారిత్రాత్మక ఆలయాలు కాలగర్భంలోకలిసిపోయే ప్రమాదం నెలకొన్నది. అయితే కొందరు ముఠాగా ఏర్పడి గుప్త నిధుల కోసం ఆలయంలో, పరిసరాల్లో భారీగా తవ్వకాలు జరిపారు. దీంతో ఆ ప్రాంతమంతా శిథిలావస్థకు చేరింది. ఆలయ ఆనవాళ్లు లేకుండాపోయే దుస్థితి నెలకొంది. ప్రస్తుతం ఆలయంలో శివలింగం లేకపోవటంతో ఇది ఆ ఆలయంలోని దే అని భావిస్తున్నారు... ఆలయం , శివలింగం , బయటపడటంతో ఇంకా ఆ ప్రాంతంలో భూగర్భంలో ఆపురూపమయిన శిల్పసంపద ఉండే అవకాశం ఉందని కాబట్టి కేంద్ర పురావస్తు శాఖ అధికారులు ఆ దిశగా చర్యలు తీసుకోవాలని స్థానికులు కోరుతున్నారు.. చరిత్ర కారుల అభిప్రాయం మేరకు నాటి ఓరుగళ్ళు కోట మొత్తం 7 కోటలతో శ్రీ రామారణ్య పాదుల ఆదేశానుసారం శ్రీ చక్రం ఆకారంలో నిర్మించబడిందని ఈ 7 కోట ల పరిధిలో దాదాపు 100 పైన ఆలయాలు ఉండేవని ఏకామ్రనాధుని ప్రతాపరుద్రీయం ఆధారంగా చెప్తున్నారు. వారి అభిప్రాయం ప్రకారం కాకతీయులు తమ ముందు చూపు తో నే ఈ విధంగా మట్టి కోటలో శ్రీచక్రం మూలలు వచ్చే విధముగా నిర్మించారు. ఇలా నిర్మించడం వలన భవిష్యత్ లో దండయాత్ర లనుండి ఆలయాలను రక్షించే అవకాశం కూడా ఉందని వారు భావించి ఉంటారు. దానికి ఆధారంగా ఆలయం పై భాగంలో ఒక గోడ లాగా నిర్మించిన తేలిక పాటి ఇటుకల నిర్మాణం మనకు నేటికి కనిపిస్తుంది. ......   Aravind Arya Pakide...
  •  (Sheik Sadiq Ali  )  ...................  ......      వరంగల్ అనగానే మనకు కాకతీయులు, వారి పరిపాలనా దక్షత, వీరత్వం గుర్తుకొస్తాయి.అంతకన్నా కొంచెం వెనక్కిపోతే రాష్ట్రకూటులు ,చాళుక్యులు గుర్తుకొస్తారు. కానీ,వరంగల్ కు అంతకన్నా గొప్ప నేపధ్యం ఉంది.రాజకీయాల కన్నా ముందు వరంగల్ గొప్ప ఆధ్యాత్మిక కేంద్రం. మోక్ష సాధన కోసం జైనులు ధ్యానం చేసిన కేంద్రం. సత్యం, అహింస వంటి ధర్మాలను బోధించిన, అనుసరించిన కర్మభూమి. జ్ఞాన భూమి. జైన మతానికి కీలక స్థావరం.నేనూ,దక్కన్ క్రానికల్ రిపోర్టర్ అనుదీప్,చరిత్ర పరిశోధకుడు అరవింద్ ఆర్య,ఎజాజ్ లతో కూడిన మా బృందం తొలిరోజున హనుమకొండ నడిబొడ్డున ఉన్న అగ్గులయ్య గుట్ట,పద్మాక్షి గుట్టల మీద చేసిన పరిశోధనలో అనేక ఆశ్చర్యకరమైన అంశాలు వెలుగు చూశాయి. మరుసటి రోజున హైదరాబాద్ నుంచి రామోజు హరగోపాల్ గారు వచ్చారు. వారితో కలిసి రెండోసారి ఈ ప్రాంతాలన్నీ తిరిగాం.ఈ పరిశోధనలో వరంగల్ నగరాన్ని ఆధ్యాత్మిక రంగంలో సమున్నత స్థానంలో నిలబెట్టే తిరుగులేని రుజువులు దొరికాయి. వాటిని మీతో పంచుకుంటున్నాను. శ్రమ అనుకోకుండా కొంచెం ఓపికతో చదవండి. రెండువేల సంవత్సరాలకు పూర్వమే వరంగల్ లో జైనం విలసిల్లింది. దానికి సంబంధించిన వివరాలు ఇవి. హనుమకొండ చౌరస్తాలోని బస్టాప్ వెనుక భాగంలో ఎత్తైన కొండ కన్పిస్తుంది. దాన్ని స్థానికులు అగ్గులయ్య గుట్ట అని పిలుస్తారు. దూరం నుంచి చూస్తే ఆ గుట్ట మీద ఒక పె....ద్ద బండరాయి, దాని మీద చెక్కిన దాదాపు 35-40 అడుగుల దిగంబర తీర్దంకరుడి విగ్రహం కన్పిస్తుంది. కొండ ఎక్కి దగ్గరికి వెళ్లి చూస్తే , ఆ విగ్రహం పక్కన చెట్ల చాటున అదే బండమీద మరో 13 అడుగుల మరో తీర్దంకరుడి విగ్రహం కన్పిస్తుంది. రెండూ చూడ్డానికి ఒకేలా ఉన్నా, రెండింటికీ వ్యత్యాసాలు ఉన్నాయి. ఆ విగ్రహాలూ, వాటి చుట్టూ ఉన్న ఆనవాళ్లను బట్టి పెద్ద విగ్రహాన్ని మూడో తీర్దంకరుడైన సంభవ నాదుడిగానూ, చిన్న విగ్రహాన్ని 23 వ తీర్దంకరుడైన పార్శ్వనాదుడి గానూ భావించాల్సి ఉంటుంది. అదెలా అంటే, మొత్తం జైన తీర్దంకరులు 24 మంది. మొదటివాడు రిషభనాధుడు,అతడినే ఆదినాధుడు అని కూడా వ్యవహరిస్తారు. చివరి వాడు మహావీరుడు. అందరి విగ్రహాలు ఒకేలా ఉన్నా ఒక్కొక్కరికి ఒక్కో చిహ్నం ఉంటుంది. వాటిని బట్టి ఆ తీర్ధంకరులను గుర్తించవచ్చు. మూడో వాడైన సంభవనాదుడి చిహ్నం గుర్రం. ఈ గుట్ట మీద ఉన్న పెద్ద విగ్రహం పాదాల చెంత ఉన్నది గుర్రం చిహ్నం . దాంతో ఆ విగ్రహం ఎవరిదో యిట్టె తెలిసిపోతుంది. అలాగే. దేశంలోని వివిధ జైన ఆలయాల్లో ఉన్న సంభవనాదుడి విగ్రహాల పాదాల చెంత ఈ గుర్రం చిహ్నం కన్పిస్తూ ఉంటుంది. అలాగే, ఈ తీర్దంకరుడు కాయోత్సర్గ భంగిమలో ధ్యానం చేసి మోక్షం పొందాడు అని ఆ మత గ్రంధాలు రాశాయి. ఈ విగ్రహం కూడా అదే భంగిమలో ఉంది. ఇకపోతే చిన్న విగ్రహం పార్శ్వనాదుడి దే అని చెప్పటానికి చాలా స్పష్టమైన ఆధారాలు కన్పిస్తున్నాయి. విగ్రహం తలపైన ఏడు పడగల సర్పం ఉంది. అతని చిహ్నం కూడా సర్పమే. అంతేకాక ప్రపంచంలోని ఏ జైన దేవాలయంలో నైనా అతని విగ్రహం అలాగే ఉంది. అలాగే, అది కూడా కాయత్సర్గ భంగిమలోనే ఉంది. తిరకొయిల్ ఆలయంలో ఉన్న 8 వ శతాబ్దపు విగ్రహం కూడా అచ్చం ఇలానే ఉంది. కొన్ని చోట్ల ఇదే తీర్దంకరుడి విగ్రహం పద్మాసన భంగిమలో కూడా కన్పిస్తుంది. కానీ ,రెండు భంగిమల్లోనూ కామన్ గా కన్పించే అంశం తలపై కన్పించే ఏడు పడగల సర్పం కావటం విశేషం. ఆ రకంగా ఈ విగ్రహాన్ని 23 వ తీర్దంకరుడిగా నిర్ధారించ వచ్చు అగ్గులయ్య గుట్టమీద మరో విశేషం మా బృందం కంటపడింది. ఎత్తైన ఆ గుట్ట ఎక్కడానికి కిందకానీ, పైనకానీ మెట్లు లేవు. చిత్రంగా మధ్యలో ఒక పెద్ద బండరాయి మీద రెండు అంచెల్లో 55 మెట్లు రాతిలో తొలిచి ఉన్నాయి.(ఇలాంటివే మెట్లు మనం శ్రావణ బెలగోళ లో చూడొచ్చు. అదీ గొప్ప జైన క్షేత్రం). వీటిలో ఐదు మెట్లకు ఒక ప్రత్యేకత కన్పించింది. ఆ మెట్ల మీద ఏనుగు, వరాహం,తాబేలు చిహ్నాలు చెక్కి ఉన్నాయి. ఇందులో ఏనుగు తీర్దంకరుల్లో రెండో వాడైన అజితనాధుడి చిహ్నం. పంది(వరాహం) 13 వ వాడైన విమల నాధుడి చిహ్నం.తాబేలు 20 వ వాడైన మునిసువ్రతుడిది. ఇవన్నీ చూసిన తర్వాత ఆ కొండల మీద జైనుల ప్రాభవం ఎలా ఉండి ఉండేదో అర్ధం చేసుకోవచ్చు. ఇక్కడ ఇంకో విషయం చెప్పాలి. జైనులు తోలి నుంచీ గుహలనే తమ సాధనా కేంద్రాలుగా, బసదులుగా చేసుకునేవారు. ఆ విషయం మనకు పద్మాక్షి గుట్టను చూస్తే అర్ధం అవుతుంది. అక్కడ పార్స్వనాధుడు, మహావీరుడి విగ్రహాలు,ఇతర జైన విగ్రహాలు చెక్కి ఉన్నాయి. గుహాలయం ఉంది,బసది ఉంది. వాటిని నిర్ధారిస్తూ కాకతీయులు వేసిన శాసనం ఉంది. వరంగల్ కు 55కిలోమీటర్ల దూరంలో జైనగాం (జనగామ) ఉంది. అక్కడ జైన ఆనవాళ్ళు చాలా ఉన్నాయి. అలాగే వరంగల్ కు 85 కిలోమీటర్ల దూరంలో ఉన్న కొలనుపాకలో 2 వేల సంవత్సరాలకు పూర్వం నాటి జైన ఆలయం ఉంది.అందులో రిషభనాధుడు,నేమీనాధుడు,మహావీరుడి విగ్రహాలు ఉన్నాయి. ఈ రెండింటి కన్నా ముందే వరంగల్ లో జైనం బలంగా ఉండింది. దాని గురించి తెలుసుకోవాలంటే ముందు పార్స్వనాదుడి గురించి తెలుసు కోవాలి. పార్స్వనాధుడు జైనంలో మొత్తం 24 మంది తీర్దంకరులు ఉంటారు.అందులో 23 వ వాడు పార్శ్వనాధుడు. 24 వ తీర్దంకరుడు మహావీరుడు.22 వ తీర్దంకరుడు నేమినాధుడు.తీర్ధంకర పరంపరలో మొదటి 22 మందికి సంబంధించిన చారిత్రిక ఆధారాలు లేవు. కేవలం జైన గ్రంధాల్లో వారికి సంబంధించిన గాధలు ఉంటాయి. అవి హిందూ పురాణ గాధలను పోలి వుంటాయి. కానీ, పార్శ్వనాధుడు,మహావీరులకు మాత్రమే సంబంధించిన చారిత్రిక ఆధారాలు శాసనాల రూపంలో లభించాయి. నేమి నాధుడి తర్వాత 84 వేల సంవత్సరాల అనంతరం వచ్చిన తీర్దంకరుడు పార్శ్వనాధుడు అని క్రీస్తుపూర్వం 4 వ శతాబ్దంలో భద్రబాహు రాసిన సుప్రసిద్ధ జైన గ్రంధం ‘కల్పసూత్రం’ లో వివరించి వుంది పార్శ్వనాధుడు క్రీస్తుపూర్వం 872 వ సంవత్సరం పుష్యమాసం బహుళ పక్షం దశమి నాడు జన్మించాడు. ఇక్ష్వాకు వంశీయుడైన కాశీరాజు అశ్వసేనుడు,వామాదేవి దంపతులు అతని తలిదండ్రులు.30 ఏళ్ళ ప్రాయం వరకు రాజరిక జీవితమే గడిపాడు.30 వ ఏట సన్యాసాన్ని స్వీకరించాడు. కాయత్సర్గ యోగ భంగిమలో 84 రోజులపాటు ధ్యానం చేసి ‘కేవల జ్ఞానం’ సంపాదించాడు.ప్రస్తుత జార్ఖండ్ రాష్ట్రం గిరిద్ జిల్లా ప్రశాంత్ పర్వత శిఖరంపై ధ్యానం చేస్తూ తన నూరవ ఏట క్రీస్తు పూర్వం 772 వ సంవత్సరంలో మోక్షం పొందాడు. ఆయన స్మృతి చిహ్నంగా ఆ ప్రదేశంలో ‘శిఖర్ జీ జైన్ మందిర్’ ఉంది. అదిప్పుడు జైనులకు అత్యంత ముఖ్యమైన తీర్ధ యాత్రా స్థలం అయ్యింది. కల్పసూత్రలో చెప్పిన దాని ప్రకారం అప్పట్లో పార్శ్వనాదుడికి లక్షా 64 వేలమంది శ్రావకులు (పురుష అనుచరులు),మూడు లక్షల 27 వేలమంది శ్రావికలు (స్త్రీ అనుచరులు),16 వేలమంది సాధులు (భిక్షులు),38 వేలమంది సాధ్వీలు (సన్యాసినులు) వుండేవారు.ఎనిమిది మంది గణదారులు (ముఖ్య భిక్షువులు) శుభదత్త,ఆర్యఘోష,వశిష్ట,బ్రహ్మచారి,సోమ,శ్రీధర,వీరభద్ర,యశస్ వుండేవారు. పార్శ్వనాదుడి తదనంతరం శుభదత్తుడు ,అతని తర్వాత హరిదత్త,ఆర్యసముద్ర,కేసి జైనాన్ని ముందుకు తీసుకు వెళ్ళారు. పార్శ్వనాదుడి శిష్యులు ప్రపంచ వ్యాప్తంగా విస్తరించి జైనమతానికి విస్తృత ప్రచారం కల్పించారు.అలా ఒక బృందం దక్షినాదిలోకి ప్రవేశించింది. ఆ ప్రకారంగా తెలంగాణా లోని కొలనుపాక,జనగాం,వరంగల్ ప్రాంతాలకు చేరిన జైనం వందల ఏళ్ళపాటు ఈ నేల మీద విలసిల్లింది.రాష్ట్రకూటులు,చాళుక్యులు,తొలితరం కాకతీయులు జైనాన్ని ఆదరించి,అనుసరించారు.హనుమకొండలోని అగ్గులయ్య గుట్ట,పద్మాక్షి గుట్ట,సిద్ధుల గుట్ట తో పాటు వరంగల్ కోట,కాజీపేట గుహల్లో కూడా ఈనాటికీ అనేక జైన ఆనవాళ్ళు సజీవంగా ఉన్నాయి. ప్రభుత్వం శ్రద్ధ తీసుకుంటే ఈ ప్రాంతాన్ని దేశంలోని ప్రముఖ జైన క్షేత్రాలలో ఒకటిగా అభివృద్ధి చేయొచ్చు. తద్వారా ఆధ్యాత్మిక టూరిజం అభివృద్ధి చెయ్యొచ్చు. with Aravind Arya Pakide, Anudeep Ceremilla,Sriramoju Haragopal...
  • అవును. రెండేళ్ళ క్రితం వరకు ఆధునిక ప్రపంచానికి తెలియని మైలారం గుహలు , వాస్తవానికి భూమి పుట్టినప్పుడే సహజ సిద్ధంగా పుట్టాయి. తరతరాల, యుగయుగాల చరిత్రను తమలో దాచుకొని చీకటిలో మన రాక కోసం ఎదురు చూస్తున్నాయి. అద్భుతమైన ఈ గుహల గురించి చెప్పాలంటే హిమాలయాల నుంచి మొదలు పెట్టాలి. ప్రపంచ ప్రసిద్ధి చెందిన వైష్ణో దేవి ఆలయం గురించి మనం విన్నాం. మనలో కొందరం చూసే ఉంటాం. జమ్మూ నుంచి 40 కిలోమీటర్ల దూరంలోని కాట్రా లో ఈ ఆలయం ఉంది. ఆ ఆలయానికి వెళ్ళీ ముందు కొండల మధ్య ఒక గుహ ఉంటుంది. అదే పార్వతీ మాత గుహ. దీని అంతర్భాగం తల్లి గర్భంలో ముడుచుకొని పడుకున్న శిశువులా ఉంటుంది. ఈ గుహలోకి వెళ్ళాలంటే టోకెన్ తీసుకొని గంటల తరబడి ఎదురు చూడాల్సి ఉంటుంది. అయినా వేలాది మంది ప్రజలు గడ్డకట్టే చలిలో వేచి ఉంటారు. ఇది మొదటి ప్రస్థావన.  ఇక రెండో ప్రస్తావనకు వద్దాం. మహాభారతంలో పాండవుల గురువు ద్రోణాచార్యుడు తెలుసు కదా. ఆయనకు ఒక ఆశ్రమం ఉండేది. పాండవులకు విలువిద్యను బోధించిన గురువు ఆశ్రమం ఒక నదీతీరంలో ఉండేది.తను, తన శిష్యులు సురక్షితంగా ఉండటానికి ఆయన హిమాలయ గుహలనే తన ఆశ్రమంగా మార్చుకున్నాడు. అనేక గుహల సముదాయమే ఈ ద్రోణుడి ఆశ్రమం. ఇప్పుడు మనమంతా డెహ్రాడూన్ గా పిల్చుకుంటున్న నగరమే అప్పటి ద్రోణుడి స్థావరం. ఆ నగరాన్ని సందర్శించిన వారు ,నగర శివార్లలో ఉన్న ద్రోణుడి గుహలను సందర్శిస్తారు. అలాగే రిషికేశ్ 25 కిలోమీటర్ల దూరంలో గంగానదీ తీరంలో వశిష్ట, అరుంధతి గుహలు ఉన్నాయి. హిమాలయాలలోని ఘర్వాల్ పర్వత శ్రేణులలోని శ్రీనగర్ పట్టణానికి ఆనుకొని ఉన్న కొండల్లో అతిపెద్ద గుహలు ఉన్నాయి. అక్కడి గుహల్లో దాదాపు 500 మంది ఒకేసారి నివాసం ఉండొచ్చు. ఇవన్నీ ఎందుకు చెప్పాల్సి వచ్చిందీ అంటే, వీటన్నింటినీ కలిపితే ఎంత పెద్దగా ఉంటాయో, అంతకన్నాఅనేకరెట్లు పెద్దగా ఉన్నాయి మైలారం గుహలు. నా యాత్రల్లో పైన పేర్కొన్న గుహలన్నీ చూశాను కాబట్టి ఇప్పుడు మైలారం గుహల గురించి సాధికారికంగా చెప్పగలుగు తున్నాను. హనుమకొండ నుంచి 50 కిలోమీటర్ల దూరంలో పరకాల, ఘనపురం పట్టణాల మధ్యలో, పాండవుల గుట్టకు మూడు కిలోమీటర్ల దూరంలో ఈ మైలారం గుహలు ఉన్నాయి. ఆదిమ మానవుల నుంచి అడవిలో అన్నల వరకు ఈ గుహల్లో నివశించారని చెప్పటానికి అనేక ఆనవాళ్ళు అక్కడ కన్పిస్తాయి. ప్రకృతిలో దేవుడిని వెతుక్కునే మనకు అలాంటి అపురూపమైన ఆకృతులు సహజ సిద్ధంగా ఏర్పడి మన మనసును ఉద్వేగానికి గురిచేస్తాయి. తేనెటీగలు శ్రద్ధగా కట్టుకునే తేనెపట్టు లాగా, ఇక్కడి గుహలన్నీ చిక్కగా అల్లుకొని ఉంటాయి. ఒక్కో గుహ ఒక్కో అద్భుతం. ఒకదాన్ని మించి మరొకటి. కొన్నిసార్లు, గుహామార్గాలు చూస్తే దేహం రోమాంచితం అవుతుంది. కళ్ళు పొడుచుకున్నా కానరాని చీకట్లలో టార్చ్ లైట్ విలిగించిన ప్రతిసారీ ఒక అద్భుత సౌందర్యం ఆవిష్కృతమవుతుంది. కొన్ని పొట్టి గుహలు, కొన్ని పొడవాటి గుహలు. హాలీవుడ్ దర్శకులు ఊహించటానికి కూడా సాహసించని అతి పెద్ద గుహల సముదాయం. ఎనిమిది గంటల పాటు గుహల్లో సంచరించినా అంతూ దరీ తెలియని గుహలు. ఎన్ని కిలోమీటర్లు ఉన్నాయో అర్ధం కాదు. గుహ..గుహలో గుహ..ఆ గుహలో ఇంకో గుహ. గొలుసుకట్టు గుహలు. ఆ గుహల్లో తిరగాలంటే......కొన్ని సార్లు పాములా పాకాలి, కొన్నిసార్లు అంబాడాలి. కొన్నిసార్లు బోర్లా, మరికొన్నిసార్లు వెల్లికిలా పడుకోవాలి. యోగా సాధన చేసేవారైతే సూర్య నమస్కారాల్లోని భంగిమలు అన్నీ వేయాలి. మోకాళ్ళు, మోచేతులు బలంగా ఉండాలి. ఒకజత బట్టలు మనవి కావు అనుకోవాలి. తర్వాత అవి పనికి రావు. చినిగిపోతాయి. అనేకానేక సాహసాలు, విన్యాసాలు చేసే అవకాశం ఈ గుహల సందర్శనలో లభిస్తుంది.  ఈ గుహల గురించి ఇంకా బోలెడు విశేషాలు ఉన్నాయి. వాటి గురించి మరోసారి రాస్తాను. ...  తోపుడుబండి సాదిక్ ..... చరిత్ర పరిశోధకుడు అరవింద్ తో కలసి  ...
  • ఒకే ఊరిలో 54 ఆలయాలు  అదీ ఒకే చోట  ఉండటం  నిజంగా చెప్పుకోదగిన విషయమే ... దేశంలోని ప్రధాన వైష్ణవ క్షేత్రాలూ శైవ ఆలయాలూ శక్తి పీఠాల నమూనాలూ  ఆ వూరిలో చూడవచ్చు.మూలవిరాట్టుల పూజలూ నైవేద్యాలూ నిజ క్షేత్రాల్ని తలపించేలా ఉంటాయి. ఆ ఊరి పేరు గాదరాడ . రాజమండ్రికి దగ్గర్లోని  ఆ గ్రామం ఉంది. భారతదేశంలో యాభై లక్షలకుపైగా ఆలయాలున్నాయని అంచనా. స్వయంభూ ఆలయాలూ, పురాణ ప్రాధాన్యమున్న శక్తిపీఠాలూ, శంకరభగవత్పాదులు-రామానుజులు- మధ్వాచార్యులూ తదితర దివ్యపురుషులు ప్రతిష్ఠించిన మహిమాన్విత మూర్తులూ, చోళులు-పల్లవులు- కాకతీయులు-విజయనగర ప్రభువులూ...పాలకులు ప్రాణంపోసిన క్షేత్రాలూ - ఒకటారెండా ఎన్నో ఆధ్యాత్మిక కేంద్రాలు. అందులో ప్రధాన క్షేత్రాల నమూనాలన్నీ ఓ చోట కొలువైతే. అక్కడ జరిగే పూజాదికాలన్నీ ఇక్కడా జరిగితే... నైవేద్యాలూ అచ్చంగా అలానే ఉంటే...ఇంకేముంది, సంపూర్ణ యాత్రా ఫలమే, సర్వదేవతా కటాక్షమే!  బత్తుల బలరామకృష్ణ, వెంకటలక్ష్మి దంపతులు  కోట్లాది రూపాయల వ్యయంతో... 'ఓం శివశక్తి పీఠం' పేరుతో సకల దేవతామూర్తుల సమాహారంగా ఈ ఆలయ సముదాయాన్ని నిర్మించారు.  ఎక్కడెక్కడి  నుంచో శిల్పులను  పిలిపించారు. ఇంజినీర్లతో మాట్లాడారు. రేయింబవళ్లు శ్రమించినా, ఆలయ సముదాయానికి ఓ రూపం రావడానికి నాలుగేళ్లు పట్టింది. పీఠం ఆవరణలో మొత్తం యాభై నాలుగు దేవాలయాలున్నాయి. ఎనభై నాలుగు దేవతామూర్తుల్ని ప్రతిష్ఠించారు. కైలాస మహాక్షేత్రాలుగా (21), వైకుంఠ క్షేత్రాలుగా (15), శక్తిపీఠాలుగా (18) వాటిని విభజించారు. కైలాసక్షేత్రాల్లో...ద్వాదశ జ్యోతిర్లింగాలైన సౌరాష్ట్రలోని సోమనాథ లింగం, శ్రీశైలంలోని మల్లికార్జున లింగం, ఉజ్జయినిలోని మహాకాళేశ్వరలింగం...ఇలా పన్నెండు లింగాలూ కొలువయ్యాయి. ఇక్కడే ఆనందనిలయ వాసుడిని అర్చించుకోవచ్చు - భూదేవి, శ్రీదేవి సమేత కల్యాణ వేంకటేశ్వరస్వామి ఆలయం ఉంది. ఇక్కడే షిర్డీనాథుడిని ప్రార్థించుకోవచ్చు - సద్గురు సాయిబాబా మందిరం ఉంది. ఇదే భద్రాది, ఇదే అన్నవరం, ఇదే యాదాద్రి, ఇదే అరసవల్లి...కోదండ రామస్వామి, రమాసత్యనారాయణ స్వామి, లక్ష్మీనరసింహస్వామి, సూర్యనారాయణమూర్తి ఆలయాలు ఇక్కడున్నాయి.  చూడండి వీడియో...  vedeo courtesy... eyecon facts ...
  •  మద్యం సేవించే కాలభైరవుడు ... ఆశ్చర్యంగా ఉంది కదా .. మనకు తెలిసింది పానకాల స్వామి గురించే. ఆయన నైవేద్యంగా పానకం ఎలా స్వీకరిస్తాడో ... ఈ కాలభైరవుడు మద్యాన్ని అలా  నైవేద్యంగా స్వీకరిస్తాడు. ఇంతకూ ఆ కాలభైరవుడు ఎక్కడున్నాడో తెలుసు కోవాలంటే మధ్యప్రదేశ్ లో ఉజ్జయిని కి వెళ్ళవలసిందే. అక్కడున్న కాలభైరవ్‌నాథ్ దేవాలయంలో కాలభైరవుడికి నైవేద్యంగా మద్యం పడతారు. దేవుడికోసం మద్యాన్ని ఒక పాత్రలో పోసి దాన్ని విగ్రహం నోటికి అందిస్తుంటారు. ఇలా పెట్టిన మద్యం సంవత్సరం పొడవునా దేవుడి దర్శనానికి వచ్చే భక్తులకు ప్రసాదంగా ఇస్తారు. ఇక్కడకు ప్రతిరోజు వేలాది మంది భక్తులు వచ్చి తమ భక్తిని చాటుకుంటారు. ఈ కాలభైరవ నాథుడిని తమ నగరాన్ని సంరక్షించే దేవుడిగా అక్కడి స్థానికులు చెపుతారు. కాకపోతే, మద్యం సేవించడమే ఈ దేవుడి ప్రత్యేకత. మన దేశంలో కాలభైరవ ఆలయాలు ఎక్కువగా లేకున్నా కాలభైరవ క్షేత్రాలు చాలా ఉన్నాయి. ఈ క్షేత్రాలలో ఉండే కాలభైరవుని క్షేత్రపాలకుడు అంటారు. నేపాల్‌, ఇండోనేసియా, థాయ్‌లాండ్‌ దేశాలలో కాలభైరవ పూజ విశేషంగా జరుగుతుంది. ఇక్కడ ఆలయాలలో కాలభైరవుడు ప్రధాన దైవంగా ఉంటాడు. నేపాల్‌ దేశానికి జాతీయ దైవంగా కాలభైరవుడు పూజలందుకుంటున్నాడు.కాలభైరవుని 'క్షేత్రపాలక' అని కూడా అంటారు. క్షేత్రపాలకుడంటే ఆలయాన్ని రక్షించే కాపలాదారు. ఈ సూత్రాన్ని పురస్కరించుకుని గుడి తలుపులు మూసే సమయంలో తాళంచెవులను కాలభైరవుని వద్ద వుంచుతారు. తిరిగి ఆలయాన్ని తెరిచేటప్పుడు అక్కణ్ణించే తాళంచెవులు తీసుకుని గుడిని తెరుస్తారు. కాలభైరవుని వాహనం శునకం. కనుక కుక్కలకు ఆహారం పెట్టి, వాటి యోగక్షేమాలు పట్టించుకుంటూ, అనురక్తితో సాకినట్లయితే, పరోక్షంగా కాలభైరవుని పూజించినట్టే. న్యూఢిల్లి పురానా ఖిల్లా దగ్గరున్న భైరవాలయం అతి ప్రాచీనమైంది. నాటి పాండవుల రాజధాని ఇంద్ర ప్రస్త నగరంలో ప్రశస్తమైన కాలభైరవ ఆలయం ఉంది. తమిళనాడు, అరగలూరులోని శ్రీకామనాథ ఈశ్వరాలయంలో అష్ట భైరవుడున్నాడు. అలాగే కరైకుడి, చోళపురం, అధియమాన్‌ కొట్టయ్‌, కుంభకోణాల్లో భైరవ దేవాలయాలు ఉన్నాయి. మధ్యప్రదేశ్‌ ఉజ్జయినీలో కాల భైరవాలయం వుంది. కర్ణాటకలోని అడిచున్‌చనగిరి, మంగళూరు కద్రి ప్రాంతాల్లో కాలభైరవ దేవాలయాలు ఉన్నాయి. ఇక శ్రీకాళహస్తిలో కాలభైరవుడు, బట్టల భైరవుడు దర్శనమిస్తారు. నిజామాబాద్‌లోని సదాశివనగర్ ఇస్సన్నపల్లిలో కాలభైరవ స్వామి దేవాలయం వుంది.ప్రకాశం జిల్లాలో ఒంగోలు కు సమీపం లోని మాచవరం లో కాలభైరవుని దేవాలయం ఉంది....
  • అది వేయి సంవత్సరాల నాటి  దేవాలయం . అంతే కాదు భారత దేశంలోనే అతి పెద్ద శివలింగం ఉన్న గుడి.  అదే తంజావూరులోని బృహదీశ్వరాలయం. అక్కడ కనిపించే ప్రతి అంశం ఓ మిస్టరీతో పాటు ఆశ్చర్యానికి గురిచేస్తుంది. ఎక్కడా సిమెంట్ అన్నమాటకు తావు లేకుండా ఉక్కు అన్నపదం లేకుండా కట్టిన ఈ గుడిని చూస్తే ఆనాటి టెక్నాలజీ ఇంత అద్భుతంగా ఉందా అనిపిస్తుంది.  ఆశ్చర్యంతో పాటు ఆసక్తి రేపుతున్న ఆ గుడి గురించిన కొన్ని నమ్మలేని నిజాలు  ఎన్నో ఉన్నాయి.  13 అంతస్థులు కలిగిన ఏకైక పురాతన క్షేత్రం దాదాపు వేయి సంవత్సరాల క్రితం కట్టిన గుడి.  13 అంతస్థులు కలిగిన ఏకైక పురాతన క్షేత్రం. భారతదేశంలో అతి పెద్ద శివలింగం ఉన్న క్షేత్రం. దక్షిణ కాశీగా పేరొందిన ఈ గుడిలో   ఈ శివలింగం 3.7 మీటర్ల ఎత్తు కలిగి ఉంటుంది పెద్ద నంది విగ్రహాన్ని అక్కడ నిర్మించారు. ఈ విగ్రహం దాదాపు 20 టన్నులు కలిగి ఉంటుంది.  ఇంకా ఆశ్చర్యకరం ఏంటంటే ఇది ఏకశిలా విగ్రహం. 2 మీటర్ల ఎత్తు ,2.6 మీటర్ల పొడవు, 2.5 మీటర్ల వెడల్పు కలిగి ఉంటుంది. ఈ ఆలయానికి ఎటువంటి ఉక్కు గాని సిమెంట్ కాని వాడలేదు. పూర్తిగా గ్రానైట్ రాయితో కట్టబడింది.  13 అంతస్థులు గ్రానెట్ రాయితోనే కట్టారు. 80 టన్నుల ఏకశిలతో చేసిన గోపుర కలశం ఈ గుడికే హైలెట్. 13 అంతస్థుల పైన ఎటువంటి వాలు లేకుండా నిలబడటమనేది ఇప్పటికీ అందర్నీ ఆశ్చర్యంలో ముంచెత్తుతోంది. ఇక మిట్ట మధ్యాహ్న సమయంలో ఆ గోపురం నీడ ఎక్కడా పడదు. గుడి నీడ కనపడినా గోపురం నీడ మాత్రం చూడలేము.  80 టన్నుల బరువున్న ఆ కలశాన్ని అక్కడికీ తీసుకెళ్లటమనేది ఆనాటి ఇంజనీర్ల  నైపుణ్యానికి ప్రతీక. ఈ ఆలయ ప్రాంగణం దాదాపు పర్లాంగు దూరం ఉంటుంది.అంటే చాలా సువిశాలంగా ఉంటుంది.  మనం మాట్లాడుకునే శబ్దాలు మళ్లీ ప్రతిధ్వనించవు. అంతటి శబ్ద పరిజ్ఙానంతో ఈ గుడిని కట్టారు. ఇక ఆలయం లోపల అనేక సొరంగ మార్గాలున్నాయి. ఇవి కొన్ని తంజావూరులో ఉన్న కొన్ని ఆలయాలకు దారితీస్తే కొన్ని మాత్రం మరణానికి దారి తీసే గోతులు కలిగి ఉన్నాయని అన్ని దారులు మూసేశారు. అయితే ఇప్పటికీ టెక్నాలజీకి అంతుపట్టని విషయం ఏంటంటే. ఈ గుడికి చుట్టూ ఉన్న రాతి తోరణాలలో ఆరు మి. మి కన్నా తక్కువ సైజులో వంపుతో కూడిన రంధ్రాలు కనిపించడం. అవి అలా ఎందుకు పెట్టారు ఇప్పటికీ మిస్టరీనే. ఈ ఆలయం ప్రపంచ వారసత్వ జాబితాలో చేరింది. వేయి సంవత్సరాల గుడులు దాదాపు పాడుబడిన స్థితిలో ఉంటాయి. అయితే ఈ గుడి మాత్రం అత్యధ్భుతంగా కొత్తగా నిర్మించినట్లు ఇప్పటికీ కనిపిస్తుంది. vedeo courtesy... rahasyavani ...
Site Logo