Latest News
రాజ‌కీయం
  • ఈ ఫొటోలో కనిపించే వ్యక్తి శివసేన ఎంపీ రవీంద్ర గైక్వాడ్.  గురువారం ఎయిర్ ఇండియా ఉద్యోగి సుకుమార్ ను చెప్పుతో కొట్టి వార్తల్లో కెక్కారు.    ఈయన మహారాష్ట్ర లోని ఉస్మానాబాద్ కి  ఎంపీ గా ప్రాతినిధ్యం వహిస్తున్నాడు.  అంతకుముందు రెండు మార్లు ఒమేర్గా  స్థానం నుంచి ఎమ్మెల్యే గా కూడా ఎన్నికైనారు.   పూణే నుంచి ఆయన ఢిల్లీకి పయనమయ్యారు.  తనది  బిజినెస్ క్లాస్ టికెట్ కాగా ఎకానమీ  క్లాస్ లో సీటు ఇచ్చారని  సహనం కోల్పోయి.. ప్రజాప్రతినిధిని అన్న జ్ఞానం కూడా లేకుండా వీరంగం  వేసాడు.  విమానం ఉదయం 11 గంటలకు ల్యాండ్  కాగానే  ఎయిరిండియా ఉద్యోగిపై  రవీంద్ర గైక్వాడ్ దాడి చేశారు.  పైగా  తన చర్యను సమర్థించుకున్నాడు. ‘అవును ఒకసారి కాదు 25సార్లు అతడిని చెప్పుతో కొట్టాను’ అని చెప్పుకొచ్చారు కూడా. ఎయిరిండియా సిబ్బందికి చాలా సార్లు ఫిర్యాదు చేసినా పట్టించుకోలేదని, అందుకే సహనాన్ని కోల్పోయానని గైక్వాడ్ చెప్పాడు. కాగా  రవీంద్ర గైక్వాడ్ తన పట్ల దారుణంగా ప్రవర్తించడంతో పాటు చెప్పుతో కొట్టినట్లు ఎయిర్ ఇండియా ఉద్యోగి సుకుమార్ పోలీసులకు ఫిర్యాదు చేశారు. తనను అవమానించడంతో పాటు చేయి చేసుకున్నారని, తన కళ్ళద్దాలు పగులగొట్టారని సుకుమార్  ఆరోపించారు. దీంతో పోలీసులు కేసు నమోదు చేశారు. మరోవైపు ఎయిర్ ఇండియా కూడా ఈ ఘటనపై విడిగా ఫిర్యాదు చేసింది. ఎంపీ రవీంద్ర గైక్వాడ్ విమానాన్ని బలవంతంగా 40 నిమిషాలపాటు నిలుపుదల చేసినట్లు ఆరోపించడంతో ఆమేరకు మరో కేసు కూడా నమోదైంది. కాగా కేంద్ర పౌర విమానయాన శాఖ మంత్రి అశోక్ గజపతి రాజు ఈ ఘటనను ఖండించారు. ఎయిర్ ఇండియా సిబ్బందిపై భౌతిక దాడులను ఏ పార్టీ సమర్థించకూడదని అన్నారు. తమ ఎంపీ రవీంద్ర గైక్వాడ్ అలా ప్రవర్తించి ఉండకూడదని  శివసేన అభిప్రాయపడింది. ఆయన అంతగా ఆగ్రహం చెందడానికి దారి తీసిన కారణాలపై దర్యాప్తు చేస్తున్నట్లు  ప్రకటించింది. ...
  • ఉత్తరప్రదేశ్, ఉత్తరాఖండ్‌లలో ఘనవిజయం నేపథ్యంలో గుజరాత్‌లో ముందస్తు అసెంబ్లీ ఎన్నికలకు వెళ్లాలని బిజెపి యోచిస్తున్నట్టు  తెలుస్తోంది.  అయితే గుజరాత్ బిజెపి వర్గాలు అధికారికంగా ముందస్తు ఎన్నికల అంశాన్ని కొట్టి పారేస్తున్నాయి. కానీ అధికార పార్టీ, ప్రతిపక్షం లోనూ  ఈ విషయమై  అంతర్గతం గా చర్చలు జరుగుతున్నాయి.   నిర్ణీత వ్యవధి ప్రకారం చూస్తే గుజరాత్ అసెంబ్లీ ఎన్నికలు డిసెంబర్‌లో జరగాల్సి ఉంది. ప్రధాని మోడీ స్వరాష్ట్రం గుజరాత్‌ అన్నసంగతి  తెలిసిందే . మోడీ గాలి వీస్తున్న తరుణంలోనే ఎన్నికలు నిర్వహించడం ప్రయోజనకరమనే ఆలోచన  అమిత్ షా మదిలో ఉందని అంటున్నారు .జులైలో కానీ సెప్టెంబర్‌లో కానీ ముందస్తుకు  వెళ్లే అవకాశం ఉందని  బీజేపీ వర్గాలు చెబుతున్నాయి. ఈ అంశంపై  ముఖ్యమంత్రి విజయ్ రూపాని స్పంది స్తూ తమ ప్రభుత్వానికి ఐదేళ్ల ప్రజాతీర్పు ఉందని , ప్రభుత్వం పూర్తి కాలం వరకూ ఉంటుందని తెలిపారు. ముందు అనుకున్నట్లే డిసెంబర్‌లోనే ఎన్నికలు ఉంటాయని స్పష్టం చేశారు. అయితే రెండు ఘన విజయాల ప్రభావం ఉన్న తరుణం లోనే గుజరాత్  ఎన్నిక లు జరిగితే సత్ఫలితాలు ఉంటాయని  అమిత్ యోచన గా ఉందని అంటున్నారు.  మోడీ స్వస్థ లంలో జరిగే అసెంబ్లీ ఎన్నికలు కావడం, 2019 లోక్‌సభ ఎన్నికలకు ముందు మోడీకి ప్రతిష్టాత్మకం కావడంతో వీటిలో సునాయాస విజయానికి వీలు కల్పించుకోవాలని బిజెపి వర్గాలు భావిస్తున్నాయి. . ఇప్పటికే బిజెపి తమ ఎన్నికల నినాదం గా యుపిలో 325, గుజరాత్‌లో 150 నినాదాన్ని ప్రచారంలోకి తెచ్చింది. గుజరాత్ రాష్ట్ర అసెంబ్లీలో 182 స్థానాలు ఉన్నాయి. పలు నగరాలలో మోడీ, అమిత్ షా ఫోటోలతో పోస్టర్లు వెలిశాయి. కరపత్రాల పంపిణీ జరుగుతోంది .  కాగా ఇతర రాష్ట్రాలతో పోలిస్తే గుజరాత్‌లో బిజెపికి పలు సవాళ్లు  ఎదురు కానున్నాయి.  పటేల్ వర్గం ఒబిసి కోటా ఉద్యమంతో మోడీ ప్రభుత్వంపై  ఆగ్రహంతో ఉన్నారు. ఇక గోవధ అంశంలో దళితులపై హింసాకాండ వంటి పరిణామాలు , మోడీ జాతీయ స్థాయిలోకి వెళ్లిన తరువాత బిజెపికి ఆ స్థాయిలో తగు రీతిలో రాష్ట్రంలో నాయకత్వం వహించే వ్యక్తి లేకపోవడం, అన్నింటికీ మించి అధికార పార్టీ పై వ్యతిరేకత వంటి అంశాలు కీలకంగా మారుతున్నాయి. ఈ దశలో ప్రతికూలత ప్రబలక ముందే  ఎన్నికలు జరిపి  మెరుగైన ఫలితాలు అందుకోవాలని  మోడీ  మనసులో కూడా ఉందని అంటున్నారు .  ప్రధాన ప్రతిపక్షం కాంగ్రెస్ కూడా ముందస్తు ఎన్నికలు ఉంటాయనే భావిస్తోంది . ఇందుకు అనుగుణంగా సన్నాహాలు  చేసుకుంటోంది . రాష్ట్రంలో పాగా వేసేందుకు  ఆమ్ ఆద్మీపార్టీ  ప్రయత్నాలు చేస్తోంది. కాగా 2002 ,2007,2012 ఎన్నికల్లో గెలిచి నరేంద్ర మోడీ సీఎంగా  చేశారు . 2014 లో ప్రధాని అయ్యారు . కాగా అంతకుముందు1995,1998 లలో కూడా బీజేపీ నేత కేశూభాయి పటేల్ అధికార పగ్గాలు చేపట్టారు. కాంగ్రెస్1980, 1985 ఎన్నికలలో గెలిచి అధికారం లో కొచ్చింది. మాధవ్ సింగ్ సోలంకీ  సీఎం గా చేసారు....
  • అన్నా డీఎంకే పార్టీ పగ్గాలు, రెండాకుల గుర్తు ఎవరికి  దక్కుతాయో అన్న అంశంపై  ఉత్కంఠ నెలకొంది.   బుధవారం ఎన్నికల సంఘం  ఈ అంశాలపై స్పష్టత  ఇవ్వబోతోంది.  శశికళ, పన్నీర్ వర్గాలు పార్టీపై పట్టుకోసం  గట్టి  ప్రయత్నాలే  చేస్తున్నాయి . జయ మరణం అన్నాడిఏంకె పార్టీని తీవ్రంగా దెబ్బ తీసింది.  జయ మరణించిన నాటి నుంచి పార్టీలో పన్నీర్, శశికళల  మధ్య పెద్ద యుద్ధమే జరుగుతోంది. ముఖ్యమంత్రి పదవినే లక్ష్యంగా చేసుకుని నడిపిన శశి నడిపిన రాజకీయం చివరకు ఆమెను  జైలు కు పంపింది . క్యాంపు రాజకీయాలతో ప్రభుత్వం ఏర్పాటు చేసుకున్నప్పటికీ   చివరకు అక్రమాస్తుల కేసు లో జైలుకి వెళ్లక  తప్పలేదు .  రాష్ట్రం కాని రాష్ట్రంలో నాలుగు గోడల మధ్య బందీ గా ఉన్న చిన్నమ్మను  ఇప్పుడు  ఎవరూ పలకరించే వారే  లేరట . దీంతో  శశి ఆగ్రహంతో చిందులు తొక్కుతున్నట్లు సమాచారం.. విశ్వాస తీర్మానం గట్టెక్కే వరకూ  కనుసన్నల్లోఉన్న పార్టీ నేతలు ఈ నెల రోజుల కాలంలో  ఒక్క సారి కూడా పరామర్శకు వెళ్లలేదట.  విశ్వాస పరీక్ష నెగ్గాక సీఎం పళని స్వామి సైతం ఇప్పటి వరకూ చిన్నమ్మను కలవలేదు. ఇక వీర విధేయుడైన దినకరన్, సెంగొట్టయ్యన్ లాంటి వారు ఒకటి రెండు సార్లు వెళ్లి చిన్నమ్మను చూసి వచ్చారు. అదలావుంటే  కీలకమైన వాదనలతో పన్నీర్  ఎన్నికల సంఘాన్ని కలవడం శశికళ వర్గాన్ని ఇరకాటంలోకి నెట్టేసింది. పార్టీ ప్రధాన కార్యదర్శిగా శశికళ ఎన్నిక చెల్లదని.. కాబట్టి.. పార్టీ గుర్తు తమకే చెందాలంటూ పన్నీర్ సెల్వం వర్గం ఈసి ముందు వాదించింది. చిన్నమ్మ రాజ్యాంగేతర శక్తేనని పార్టీలో ఆమెకు శాశ్వత సభ్యత్వం లేదని వాదించింది.అన్నా డిఎంకెలో ఎలాంటి పదవులు చేపట్టకుండా నేరుగా ప్రధాన కార్యదర్శి పదవి చేపట్టేందుకు పార్టీ నియమావళి అంగీకరించదని తేల్చి చెప్పింది.. కాబట్టి పార్టీ గుర్తు తమకే దక్కాలన్నది పన్నీర్ వర్గం వాదన.. ఈ వివరణతో ఈసి మళ్లీ శశికళకు  నోటీసులు జారీ చేసింది. దీనికి శశికళ అక్క కొడుకైన దినకరన్ బదులిచ్చారు. కానీ ఆ జవాబును ఈసి నిరాకరించింది. దాంతో నేరుగా చిన్నమ్మే వివరణ ఇచ్చారు. ఈ వివరణపై పన్నీర్ వర్గం మళ్లీ ఈసికి లేఖ రాసింది. ఇలా నెల్లాళ్లుగా పార్టీ పెత్తనం ఎవరికి దక్కాలన్న అంశంపై తర్జన భర్జనలు జరుగుతూనే ఉన్నాయి. ఈ క్రమంలోనే  ఆర్కే నగర్ ఉపఎన్నిక జరగనుంది .అభ్యర్ధులకు ఈనెల24 లోగా బిఫామ్ ఇవ్వాల్సి ఉంది.. బీఫాం అంద చేసిన వారికి ఈసి ఎన్నికల గుర్తును కేటాయిస్తుంది.. కాబట్టి మరో రెండు రోజుల్లో ఈసి గుర్తు కేటాయింపుపై ఒక క్లారిటీ వస్తుంది. ఇంతకీ రెండాకుల గుర్తు ఎవరికి దక్కుతుంది? తమకే ఖాయంగా దక్కుతుందని పన్నీర్ వర్గం వాదిస్తోంది. అన్నాడిఎంకె పార్టీ పగ్గాలు ఎవరికి దక్కుతాయన్న దానిపై సస్పెన్స్ రెండు రోజుల్లోనే తేలిపోతుంది. శశికళకు పదవి ఉంటుందా.. ఊడుతుందా అన్నది తేలిపోతుంది. ఒక వేళ  శశి పదవి  ఊడితే పార్టీ ప్రధాన కార్యదర్శి పదవికి మళ్ళీ ఎన్నికలు జరగాల్సిఉంటుంది.   ...
  • (Mallareddy Desireddy  )..................   దేశ రాజకీయాలని శాసించే శక్తి నేటి భారతీయ దేవుళ్ళకి ఎక్కువేనేమో, అందులోనూ శ్రీరామడుకి మరీ  శక్తి ఎక్కువేమో అనిపిస్తుంది. ఉత్తర్‌ ప్రదేశ్‌ విధాన సభ ఎన్నికలను తమ జీవన్మరణ సమస్యగా భాజపా భావించినట్లుంది, అందుకేనేమో ప్రధాని  మోడీ గత  సంవత్సరంలో కనీసం పదిసార్లు ఆయన యూపీని సందర్శించారు. ఎన్డీయే ప్రభుత్వపు ప్రథమ వార్షికోత్సవాన్ని యూపీలోని మధురలో జరుపుకొన్నారు,ఇక గత ఏడాదిలో ద్వితీయ వార్షికోత్సవాన్నిసహారన్‌పూర్‌లో నిర్వహించారు. ఆ సందర్భంగా తాము దేశాభివృద్ధికే అగ్ర ప్రాధాన్యం ఇస్తామని మోడీ విస్పష్టంగా ప్రకటించి ఉత్తర ప్రదేశ్‌ విధానసభ ఎన్నికలకు రణ భేరిని మోగించారు. అప్పుడే నరేంద్రమోడీ యూపీలోని  ముఖ్యమైన రెండు సంక్షేమకార్యక్రమాలను  ప్రారంభించారు. వాటిలో నిరుపేద మహిళలకి ఉచితంగా వంటగ్యాస్‌ సిలిండర్ల పంపిణీ ఒకటి ఓటర్లను బాగా ప్రభావితం చేయగా,రెండోది  జాతీయ అధ్యక్షుడైన అమిత్ షా,మోడీ, యూపీ రాష్ట్ర భాజపా శాఖ అధ్యక్షుడైన కేశవ్‌ ప్రసాద్‌ మౌర్యల వరకు ఒకటే మాట రాముడు మా అంతరంగంలో ఉన్నాడనే నినాదం, ఇక యూపీ, బిహార్‌ల పేర్లు చెబితేనే చాలు కులాల కుంపట్లు,మతాలు మట్టి మశానాలు మతభేదాలన్నీను గుర్తుకొస్తాయి. ఇక  బిహార్‌  అసెంబ్లీ ఎన్నికల్లో నితీశ్‌ పార్టీ,లాలు యాదవ్‌ పార్టీ, కాంగ్రెస్‌పార్టీ కూటమి కులపరమైనటువంటి కొన్ని సమీకరణలతో  ఘనవిజయం సాధించడం చూసిన భాజపా పార్టీ తానూ సామాజిక ఇంజనీరింగ్‌ పని చేపట్టింది. ఎన్నికల వాతావరణాన్నితనకు అనుకూలంగా భాజపా పార్టీ  మార్చుకునేందుకై షెడ్యూల్డ్‌కులాలకి చెందిన 5 గురిని  షెడ్యూల్డ్‌ తెగల నుంచి 3 గురి ని వెనకబడినకులాల నుంచి ఒకఇద్దరిని ఇటీవల కాలంలో కేంద్ర మంత్రివర్గంలో చేర్చుకొన్నారు. జాతవేతర దళితులు, యాదవేతర బీసీల్లో పట్టు పెంచుకొనేందుకుగాను  ఆయా వర్గాలను  మంత్రివర్గంలోనికి తీసుకొన్నారు.  కులాలు ,మతాలు ,  దేవుడిని బాగా ఆరాధించే   మనుష్యుల బలహీనతలని చక్కగా ఎన్నికలలో ఉపయోగించవచ్చుననే  మాట మరొకసారి ఋజువైనది.   బిజెపి  ఘన విజయం అయోధ్యలో రామమందిర నిర్మాణానికి అనుకూలంగా ప్రజలు ఇచ్చిన తీర్పు అని  రాష్ట్రీయ స్వయం సేవక్ సంఘ్ (ఆర్‌ఎస్‌ఎస్) సిద్ధాంతకర్త ఎంజి వైద్య అభివర్ణించారు. బిజెపి మేనిఫెస్టోలో అయోధ్యలో రామమందిర నిర్మాణం ప్రస్తావన ఉందని, రాష్ట్ర ప్రజలు ఇచ్చిన తీర్పు దానికి ఆమోద్రముద్రగా భావించవచ్చని తేల్చి చెప్పారు.  మొత్తం మీద  కులాల, మతాల సరసన భారతదేశ రాజకీయాలలో దేవుళ్ళు దేవతలు  కూడా చేరిపోయారు. ఇక అచ్చె దిన్ ఆయా !! రామా కనవేమిరా శ్రీ రఘు రామ కనవేమిరా....   రామా కనవేమి రా. ...
  • కర్నూలు జిల్లాలోని ఆళ్లగడ్డ పై  భూమా కుటుంబానికే మొదటినుంచి పట్టు ఉండేది. భూమా కుటుంబం ఏ పార్టీ లో ఉన్నా విజయం వరించేది . అంటే అక్కడి ప్రజలతో  భూమా కుటుంబం అంతగా కనెక్ట్ అయిందని చెప్పుకోవాలి.  ఆళ్లగడ్డ అసెంబ్లీ స్థానానికి జరిగిన ఉప ఎన్నికల్లోభూమా నాగిరెడ్డి పై చేయి సాధించడం  చెప్పుకోదగిన విశేషం . 1991 నుంచి ఇప్పటి వరకు  నాలుగు సార్లు ఉప ఎన్నికలు జరిగితే భూమా కుటుంబమే విజయం సాధించింది.  1991లో భూమా నాగిరెడ్డి అన్న భూమా వీరశేఖర్‌రెడ్డి మృతితో తొలి ఉప ఎన్నిక జరిగింది. ఈ ఎన్నికల్లో భూమా నాగిరెడ్డి  మొదటిసారిగా  తెదేపా తరఫున ఎమ్మెల్యేగా పోటీ చేసి గెలుపొందారు.  1996లో నంద్యాల లోక్‌సభ స్థానానికి  ఉప ఎన్నికలు జరిగాయి. ఈ ఎన్నికల్లో పీవీ రంగయ్యనాయుడుపై అత్యధిక మెజార్టీతో భూమా విజయం సాధించారు.  ఆ ఆతర్వాత కూడా భూమా వరుసగా లోక సభ కు రెండు సార్లు ఎన్నికయ్యారు.  భూమా లోక్‌సభకు ఎన్నికవడంతో ఆళ్లగడ్డ అసెంబ్లీ స్థానానికి మళ్ళీ ఉప ఎన్నిక అనివార్యం అయింది.  అపుడు భూమా సతీమణి శోభా నాగిరెడ్డి తెదేపా తరఫున పోటీ చేసి గెలుపొందారు. 2009లో ప్రజారాజ్యం పార్టీ తరఫున ఆళ్లగడ్డ ఎమ్మెల్యేగా శోభానాగిరెడ్డి  విజయం సాధించారు. తర్వాత జగన్ పార్టీ లో  చేరారు. 2012లో  ఆళ్లగడ్డలో ఉప ఎన్నిక జరిగింది.   ఈ ఎన్నికల్లో శోభా నాగిరెడ్డి వైసీపీ  అభ్యర్థిగా పోటీ చేసి  విజయం సాధించారు. తర్వాత 2014లో జరిగిన సాదారణ ఎన్నికల సమయంలో నంద్యాల నుంచి ఆళ్లగడ్డ వస్తూ రోడ్డు ప్రమాదంలో శోభానాగిరెడ్డి మృతి చెందారు. తర్వాత ఆమె పేరును బ్యాలెట్‌ పేపర్లోనే ఉంచి ఎన్నికలు నిర్వహించారు. ఈ ఎన్నికల్లోనూ శోభా నాగిరెడ్డి దాదాపు 17వేల ఓట్ల మెజార్టీతో గెలిచారు.  ఆమె మృతితో ఆళ్లగడ్డలో ఉప ఎన్నిక నిర్వహించారు . అయితే శోభా నాగిరెడ్డి పట్ల గౌరవం తో  ఆ ఉప ఎన్నికలో టీడీపీ పోటీ చేయలేదు.   దీంతో ఆమె కుమార్తె ప్రస్తుత ఎమ్మెల్యే భూమా అఖిలప్రియ ఏకగీవ్రంగా ఎన్నికయ్యారు. ఇలా ఆళ్లగడ్డ నియోజకవర్గానికి ఉప ఎన్నిక వచ్చిన ప్రతిసారీ విజయాలు   భూమా కుటుంబాన్నే వరిస్తూ వచ్చాయి. 1989,94,99,2009,2014 లలో వరుసగా భూమా కుటుంబమే  ఈ స్థానం నుంచి  ఎన్నికైంది . 2004 లో మాత్రం గంగుల ప్రతాపరెడ్డి  చేతిలో భూమా నాగిరెడ్డి ఓడి పోయారు.  భూమా ప్రస్తుతం నంద్యాల  అసెంబ్లీ స్థానానికి ప్రాతినిధ్యం వహిస్తున్నారు.  కాగా  మూడేళ్ళ క్రితం శోభా రోడ్డు ప్రమాదం లో మరణించగా , ఆదివారం  నాగిరెడ్డి  గుండె పోటుతో మృతి చెందారు....
  • ఉక్కుమహిళ ఇరోం షర్మిల  మణిపూర్ అసెంబ్లీ ఎన్నికల ఫలితాల్లో ఘోర పరాజయం చవి చూసారు. ఈ పరిణామం తో షర్మిల రాజకీయాలకు గుడ్ బై చెప్పనున్నట్టు వార్తలు వస్తున్నాయి.  ఈశాన్య రాష్ట్రమైన మణిపూర్ లో ఆర్మీకి ఉన్న ప్రత్యేక హక్కుల చట్టాన్ని నిరసిస్తూ ఆమె 16 ఏళ్లుగా నిరహార దీక్ష చేశారు.  గత ఏడాది  ఆ దీక్షకు స్వస్తి చెప్పి, రాజకీయాల్లోకి వచ్చారు. ఏఎఫ్ఎస్పీఏను రద్దుచేయడమే లక్ష్యంగా  ఆమె పోటీ చేశారు. అయితే ఎన్నికలో  కేవలం 90 ఓట్లే ఆమెకు అనుకూలంగా వచ్చాయి.   రాష్ట్ర సీఎం ఓంకార్ ఇబోబీ సింగ్ కు వ్యతిరేకంగా తోబల్ నియోజక వర్గం నుంచి పోటీ చేశారు. అయితే సీఎం అభ్యర్థి ఇబోబీ సింగే  విజయం సాధించారు. 18,649 ఓట్లు  ఆయనకు వచ్చాయి. ద్వితీయ స్థానంలో బీజేపీ అభ్యర్థి బసంత సింగ్ 8000 ఓట్లు సాధించారు . తృణమూల్  అభ్యర్థి సురేష్ సింగ్ కి 144 ఓట్లు మాత్రమే వచ్చాయి.  నోటాకు వేసిన 143 ఓట్లు కూడా కనీసం ఇరోం షర్మిలకు రాలేదు. ఈ ఫలితాలతో షర్మిల షాక్ తిన్నారు కాబోలు రాజకీయాలనుంచి వైదొలగాలని మరో తొందర బాటు నిర్ణయం తీసుకున్నారు. నిజంగా ఇది విచారకరమే.  షర్మిల  నిరసన దీక్షకు మద్దతిచ్చిన పలువురు మహిళా కార్యకర్తలు కూడా ఆమె రాజకీయాలలోకి  దిగడాన్ని అప్పట్లోనే తీవ్రంగా వ్యతిరేకించారు.  ఇరోం షర్మిల ఒక్కతే సైకిళ్లపై తిరుగుతూ తన  ప్రజా పార్టీ తరపున ప్రచారం చేసుకున్నారు.  ప్రజలు తనకు మద్దతు ఇవ్వలేదని  ఆమె  సన్నిహితుల వద్ద ఆవేదన వ్యక్తంచేసినట్టు సమాచారం . హక్కుల ఉద్యమ కారిణి గా  ఆమెను ప్రేమించిన ప్రజలు రాజకీయ నేతగా ఆదరించలేదు. దీనికి కారణాలు ఏమిటో సమీక్షించుకోవాల్సిన షర్మిల రాజకీయాల నుంచి నిష్క్రమించాలని అనుకోవడం తొందరపాటు అవుతుంది . అసలు ప్రజా పార్టీ నుంచి పోటీ చేసింది ముగ్గురు మాత్రమే . ముగ్గురు గెలిచినా ప్రత్యేక హక్కుల చట్టాన్ని రద్దు చేయడం సాధ్యమా ? కాక పోతే గట్టి  పోరాటం చేసే వారు.  ఇక ఉద్యమం వేరు .. రాజకేయాలు వేరు .  ఉద్యమం చేసినంత మాత్రాన  ప్రజలు రాజకీయాల్లో ఆదరించాలని లేదు. దానికి ఎన్నో ఉదాహరణలున్నాయి.  షర్మిల తన పార్టీ ని పూర్తిగా ప్రజల్లోకి తీసుకెళ్ల లేక పోయారు. ఒక పార్టీ ని నిర్మించాలంటే చాలా సమయం పడుతుంది.  రాజకీయాలన్నాక  గెలుపు ఓటములు  సహజం . అన్నిటికి సిద్ధ పడే రాజకీయాల్లోకి రావాలి....
  • మంత్రివ‌ర్గంలో మార్పులు, చేర్పుల కోస‌మే కేసీఆర్  స‌ర్వే అంశాన్ని తెర‌మీద‌కు తెచ్చార‌ని  పార్టీ వర్గాల్లో చెప్పుకుంటున్నారు. కొత్త‌గా మంత్రి ప‌ద‌వులు ఆశించే  నేత‌ల‌కు చెక్ పెట్ట‌డంతో పాటు ప్రస్తుతం ఉన్న మంత్రుల‌ను మార్చేందుకు స‌ర్వే అస్త్రాన్ని ప్ర‌యోగించార‌ని అనుకుంటున్నారు.  ప్ర‌స్తుతం క్యాబినెట్ లో ఉన్న న‌లుగురు మంత్రుల‌కు ఉద్వాస‌న పల‌క‌డంతో పాటు మండ‌లిలోను మార్పులు తీసుకువ‌చ్చే దిశ‌గా కేసీఆర్ పావులు కదుపుతున్నారని అంటున్నారు.  కేసీఆర్  ఎమ్మెల్యేలు, మంత్రుల ప‌నితీరుపై చేయించిన స‌ర్వే పై అటు పార్టీ వర్గాల్లోనూ అసెంబ్లీ లాబీల్లోనూ చర్చ జరుగుతోంది.  కేసీఆర్  తన పార్టీ ఎమ్మెల్యేలు మంత్రుల‌తో పాటు కాంగ్రెస్‌, టిడిపి, ఎంఐఎం ఎమ్మెల్యేల ప‌నితీరుపై కూడా స‌ర్వే చేయించ‌డం కొత్తగా ఉందని చెప్పుకుంటున్నారు. ప్ర‌స్తుతం మంత్రి వ‌ర్గంలో ఉన్న చందులాల్‌, మ‌హేంద‌ర్ రెడ్డి, జోగు రామ‌న్న‌తో పాటు ఉప ముఖ్యమంత్రి క‌డియం శ్రీ‌హ‌రిలను  క్యాబినెట్ నుంచి త‌ప్పిస్తార‌ని, అందులో భాగంగానే కొంద‌రు మంత్రుల‌కు స‌ర్వేలో త‌క్కువ ర్యాంకులు ఇచ్చార‌ని చెబుతున్నారు. అదే స‌మ‌యంలో మంత్రి వ‌ర్గంలో చోటు క‌ల్పించే వారికి గ‌తంలో కంటే ఎక్కువ ర్యాంకులు ఇచ్చార‌ని విశ్లేషిస్తున్నారు. ఆదిలాబాద్ జిల్లా నుంచి ప్రాతినిధ్యం వ‌హిస్తున్న జోగు రామ‌న్న స్ధానంలో అదే సామాజికవ‌ర్గానికి చెందిన వ‌రంగ‌ల్ ప‌శ్చిమ ఎమ్మెల్యే  విన‌య్ భాస్క‌ర్‌కు, వ‌రంగ‌ల్ జిల్లాకు చెందిన గిరిజ‌న మంత్రి చందులాల్ స్ధానంలో అదే సామాజిక‌వ‌ర్గానికి చెందిన కోవ‌ల‌క్ష్మీకి , రంగారెడ్డి జిల్లా నుంచి ప్రాతినిధ్యం వ‌హిస్తున్న మ‌హేంద‌ర్‌రెడ్డి స్ధానంలో బిసి సామాజికవ‌ర్గానికి చెందిన మండ‌లి చైర్మ‌న్ స్వామిగౌడ్ ను, వ‌రంగ‌ల్ జిల్లాకు చెందిన ఉప ముఖ్య‌మంత్రి క‌డియం శ్రీ‌హ‌రిని మండ‌లి చైర్మ‌న్‌గా, ప్ర‌భుత్వ చీఫ్ విప్‌గా ఉన్న కొప్పుల ఈశ్వ‌ర్‌ను ఉప ముఖ్య‌మంత్రిగా నియ‌మించ‌నున్న‌ట్లు చెబుతున్నారు. కాగా  మంత్రివ‌ర్గ విస్త‌ర‌ణ జ‌రిగితే ప‌ద‌వులు ఖాయ‌మంటూ చాలామంది నేత‌లు ఆశ‌లు పెట్టుకున్నారు. మ‌హిళా కోటాలో త‌న‌కు ఖ‌చ్చితంగా మంత్రిప‌ద‌వి ఖాయ‌మ‌నుకున్న కొండా సురేఖ‌కు, ఉద్యోగ సంఘాల మాజీనేత, ఎమ్మెల్యే శ్రీ‌నివాస్ గౌడ్ త‌న‌కు క్యాబినెట్‌లో చోటుద‌క్కుతుంద‌ని ఆశించారు. అయితే ఈ ఇద్ద‌రికి కేసీఆర్ సర్వే లో  త‌క్కువ ర్యాంకులు వచ్చాయి. మంత్రివ‌ర్గంలో చోటు కోసం పోటిప‌డే బ‌ల‌మైన నేత‌ల‌కు త‌క్కువ ర్యాంకులు ఇవ్వ‌డం ద్వారా వారిని డైలామాలో ఉంచే వ్యూహం అనుసరిస్తున్నారని అంటున్నారు. నయిం కేసు విష‌యంలో ఆరోపణలు ఉన్నా దృష్ట్యా మండ‌లి డిప్యూటీ చైర్మ‌న్ నేతి విద్యాసాగ‌ర్ రావును కూడా ప‌ద‌విని త‌ప్పించి ఆయ‌న స్ధానంలో మైనార్టీ వ‌ర్గానికి చందిన ఎమ్మెల్సీని డిప్యూటీ చైర్మ‌న్ చేస్తార‌ని అనుకుంటున్నారు.   అలాగే శాఖల మార్పు కూడా ఉండవచ్చని  భావిస్తున్నారు. మొత్తంమీద కేసీఆర్  స‌ర్వేపై సొంత పార్టీ నేత‌ల‌తో పాటు ప్ర‌తిప‌క్షాలు కూడా ఎవ‌రికి తోచిన విధంగా వారు విశ్లేష‌ణ చేసుకుంటున్నారు....
  •  ప్రధాని నరేంద్రమోడీ  మాటల మనిషే కానీ చేతల మనిషి కాదు అని మరో మారు తేట తెల్లమైంది.  ఆంధ్రప్రదేశ్ కి ప్రత్యేక హోదా ఇస్తామని ఎన్నికల ప్రచారం లో ప్రకటించి దాన్ని తుంగలో తొక్కారు. తర్వాత ప్రత్యేక ప్యాకేజి అన్నారు. దానికి చట్టబద్ధత లేదు . మొన్నటి బడ్జెట్లో ఎంత కేటాయించారో క్లారిటీ లేదు . ఏపీ సీఎం చంద్రబాబు ఏ కారణం చేతనో గట్టిగా అడగలేక పోతున్నారు. కేంద్ర క్యాబినెట్లో ఉన్న ఆంధ్రా మంత్రులు మీడియా ముందు హడావుడి చేయడం మినహా సాధించింది ఏమిలేదు ,   అదలా  ఉంటే   ఆగస్టు 18, 2015న   బీహార్ ఎన్నికల ప్రచారం లో  ప్రకటించిన ప్యాకేజీని కూడా అటక ఎక్కించారు.  బీహార్ అభివృద్ధి కోసం ప్రకటించిన భారీ మొత్తం లక్షా25వేల కోట్ల రూపాయల లో ఇంత వరకు పైసా కూడా ఇవ్వలేదట .ఈ ప్రకటన చేసి దాదాపు ఏడాదిన్నర అవుతున్నప్పటికీ దాని పట్టించుకున్న నాయకులు  లేరు . ఈ విషయం సమాచార హక్కు చట్టం ద్వారా బయటకొచ్చింది. ముంబయికి చెందిన సమాచార హక్కు చట్టం ఉద్యమ కారుడు అనిల్‌ గల్గాలి కేంద్ర ఆర్థిక మంత్రిత్వశాఖకు ఆర్టీఐ దరఖాస్తు చేశారు. అందులో ప్రధాని మోడీ  చేసిన అతిపెద్ద హామీ ఏది అని అడిగేరు .ఇప్పుడు దాని పరిస్థితి ఏమిటీ అని ఆ దరఖాస్తులో ప్రశ్నించారు. దీనికి ఆర్థిక శాఖ డిప్యూటీ డైరెక్టర్‌ ఆనంద్‌ పర్మార్‌ నేరుగా సమాధానం ఇచ్చారు. ‘బిహార్‌ ఎన్నికల ప్రచారం సమయంలో ఆ రాష్ట్రాన్ని వెనుకబడిన రాష్ట్రంగా గుర్తించి దాని పురోభివృద్ధికై మోదీ ఆగస్టు 18, 2015న రూ.1,25,003 కోట్ల ఆర్థిక ప్యాకేజీని ప్రకటించారు. దశల వారిగా నిధులు అందజేయడం జరుగుతుందని తెలిపారు. అయితే, ఇప్పటి వరకు ఒక పైసా కూడా విడుదల చేయలేదని చెప్పారు’ అని అనిల్‌ గల్గాలి వివరించారు. అది సంగతి.  ఇలాంటి హామీలు ఇంకా ఎన్ని ఉన్నాయో ? ...
  • గాయత్రి ప్రజాపతి! పేరు భలే ఉంది కదా.  కానీ మనిషి తీరు ... చెప్పనక్కర్లేదు.  గత కొద్దీ రోజులుగా ఈ పేరు వార్తల్లో పదే పదే కనిపిస్తోంది. అత్యాచారం ఆరోపణలు ఎదుర్కొంటున్న ఇతగాడు ఉత్తరప్రదేశ్‌ సమాజ్‌వాది పార్టీ నేత, అఖిలేష్ క్యాబినెట్లో మంత్రి. ప్రస్తుతం పరారీలో ఉన్నాడు.  ఇపుడు జరుగుతున్న ఎన్నికల్లో గాయత్రీ అమేధీ అసెంబ్లీ నియోజకవర్గం నుంచి పోటీ చేస్తున్నాడు.  ఓ మహిళపై రెండేళ్లపాటు లైంగిక దాడికి పాల్పడటంతోపాటు ఆమె కూతురుని కూడా చెరబట్టే ప్రయత్నం చేసాడనే ఆరోపణలున్నాయి. పోలీసులకు దొరకకుండా పరారీలో ఉన్నాడు. ఇప్పటికే అతడిపై నాన్‌బెయిలబుల్‌ వారెంట్‌ ఇష్యూ కావడంతో దానిపై స్టే తీసుకునేందుకు అతడి తరపు న్యాయవాదులు ఉన్నత న్యాయస్థానంలో పిటిషన్‌ దాఖలు చేశారు .అయితే బెయిల్ ఇచ్చేందుకు సుప్రీం కోర్టు తిరస్కరించింది. తొలుత ఆయనపై కేసు నమోదుచేసేందుకు పోలీసులు నిరాకరించడంతో బాధితులు సుప్రీంకోర్టుకు వెళ్లారు. దీంతో ఆయనపై ఎఫ్‌ఐఆర్‌ నమోదు చేయాలంటూ సుప్రీంకోర్టు ఆదేశించింది. కాగా యూపీ సీఎం అఖిలేష్ ఇతనితో కలసి ప్రచారం చేయకుండా పడ్డాడు.   ఈ గాయత్రి ప్రజాపతి కి చాలా చరిత్రే ఉంది.  2012 వరకు ఇతగాడు బీపీఎల్‌ కార్డు హోల్డర్‌. నాలుగుసార్లు విఫల యత్నాలు చేసి  2012లో తొలిసారి విజయం సాధించాడు. కాంగ్రెస్‌ పార్టీకి చెందిన అమిత్  సింగ్‌ను ఓడించాక అతడికి పేరొచ్చింది. దాంతో నేరుగా అతడికి సమాజ్‌వాది పార్టీ అధినేత ములాయం, శివపాల్‌ యాదవ్‌తో మంచి సంబంధాలు ఏర్పడ్డాయి. తొలుత అఖిలేశ్‌ మంత్రి వర్గంలోకి స్వతంత్ర శాఖ నిర్వహిస్తూ స్వల్ప కాలంలోనే మైనింగ్‌ మంత్రిగా మారాడు.  గాయత్రి నేరాలకు పాల్పడుతున్నాడని, తన శాఖలో అక్రమాలు చేసాడని సామాజిక ఉద్యమకారిణి నూతన్‌ ఠాకుర్‌ 2015 జనవరిలో లోకాయుక్తను ఆశ్రయించారు. ఆ తర్వాత అతడికి వ్యతిరేకంగా డాక్యుమెంటరీ ప్రూప్స్‌ కూడా బయటపడ్డాయి. అమితాబ్‌ ఠాకూర్‌ అనే ఐపీఎస్‌ అధికారి కూడా గాయత్రి ప్రజాపతిపై ఉన్నతాధికారులకు ఫిర్యాదులు చేశారు . ఈ విషయంలో ములాయం జోక్యం చేసుకొని ఆ ఐపీఎస్‌ను నిలదీసి వార్నింగ్‌ కూడా ఇచ్చాడట.  లోకాయుక్త అతడికి అక్రమాస్తుల కేసులో క్లీన్‌ చిట్‌ ఇవ్వగా అలహాబాద్‌ హైకోర్టు మాత్రం మైనింగ్‌ అక్రమాలపై విచారణ చేయాలని సీబీఐని ఆదేశించింది. గాయత్రి తన భార్య మహారాజి, కుమార్తెలు సుధా ,అంకిత కుమారులు అనురాగ్ ,అనిల్ పేర్లపై పెద్ద ఎత్తున ఆస్తులు కొనుగోలు చేసారనే అభియోగాలు ఉన్నాయి. ఆదాయపు పన్ను కూడా కట్టలేదట. నాలుగేళ్లలో మిలియనీర్ అయ్యాడని అంటారు. కాగా తాజా గా  ఉత్తరప్రదేశ్‌ ఎన్నికల ప్రచారంలో బిజిబిజీగా ఉండగా గాయత్రి ప్రజాపతిపై ఓ అత్యాచారం ఘటనకు సంబంధించి ఎఫ్‌ఐఆర్‌ నమోదైంది. బాధితురాలి ఫిర్యాదు మేరకు 2014 అక్టోబర్‌ నెలలో తొలిసారి లైంగికదాడి చేయడం ప్రారంభించిన ప్రజాపతి జూలై 2016వరకు పలుమార్లు బెదిరిస్తూ  అత్యాచారానికి పాల్పడుతూనే ఉన్నాడు . ఆ తర్వాత ఆమె కూతురుపై కూడా అలాంటి దుర్మార్గం చేసే ప్రయత్నం చేశాడు. దీనిపైనే గత నెల(ఫిబ్రవరి) 18న కేసు నమోదు కాగా ప్రస్తుతం ఆయన పరారీలో ఉన్నాడు. ఇదే సమయంలో  సీఎం అఖిలేష్  కు  గవర్నర్‌ రామ్‌నాయక్‌  తాఖీదు కూడా పంపారు.  గాయత్రి ప్రజాపతిని క్యాబినెట్‌లో ఇంకా ఎందుకు కొనసాగిస్తున్నారో చెప్పాలంటూ గవర్నర్‌ ప్రశ్నించారు . ‘‘ఒక కళంకిత మంత్రి ని కొనసాగించడమే సబబని అనుకొంటున్నారా? అలాగయితే ఎందుకనేది వివరణ ఇవ్వండి’’ అని సీఎంని కోరారు. అలాగే ప్రధాని మోడీ కూడా ఎన్నికల ప్రచారం లో ఇదే విషయమై అఖిలేష్ పై దుమ్మెత్తి పోశారు. దీంతో పరువు పోయి , ఇరుకున పడ్డ అఖిలేష్ నేడో రేపో గాయత్రీ ని క్యాబినెట్ నుంచి తొలగించవచ్చని అంటున్నారు. ... Bharadwaja ...
  • ఏపీ సీఎం  చంద్రబాబు తనయుడు  లోకేష్  ఎమ్మెల్సీ గా ఎన్నికయ్యే వ్యూహం ఖరారు కావడం తో ఇక ఆయనకు ఏమంత్రి పదవి ఇస్తారా ? అనే అంశంపై పార్టీ వర్గాలలో చర్చ జరుగుతోంది. బడ్జెట్ సమావేశాల  పిదప  మంత్రివర్గాన్ని విస్తరించాలన్న ఆలోచనతో చంద్రబాబు ఉన్నారని సమాచారం. మరో ఏడాదిలో ఎన్నికలకు సిద్ధం కావలసిన క్రమంలో మంచి టీమ్ ను ఏర్పాటు చేసుకోవాలని బాబు భావిస్తున్నారు. అయితే అందుకు కొంతమందిని కేబినేట్ నుంచి తప్పించాలి కొత్తగా కొందరిని చేర్చుకోవాలి. కొంతమంది మంత్రుల పనితీరుపై చాలా కాలంగా బాబు అసంతృప్తితో ఉన్నట్టు ప్రచారం జరుగుతోంది. ఈ విస్తరణ సందర్భంగానే ఆ కొందరిని తప్పించడం ఖాయం అంటున్నారు. అదలా ఉంటే లోకేష్ క్యాబినెట్ లోకి  వస్తున్న దృష్ట్యా  తమ శాఖల్లో కోతలు పడతాయని కొందరు మంత్రులు  ఆందోళన పడుతున్నారు.  మౌలిక సదుపాయాకల్పన, పరిశ్రమలు-వాణిజ్యం, సినిమాటోగ్రఫీ, న్యాయశాఖ, టూరిజం వంటి శాఖలన్నీ ప్రస్తుతం సీఎం  చంద్రబాబు వద్దే ఉన్నాయి. పెట్టుబడులు, మౌలిక సదుపాయాల కల్పన, పరిశ్రమల శాఖలను  లోకేష్  కోరుతున్నట్టు తెలుస్తోంది . ఒకవేళ ఆ శాఖలను  లోకేష్ కు కేటాయిస్తే మంత్రివర్గ విస్తరణలో భారీ మార్పులేమీ ఉండకపోవచ్చు.  తెలంగాణలో కేసీఆర్ కుమారుడు కేటీఆర్ తరహాలోనే మున్సిపల్ వ్యవహారాల శాఖ కావాలనుకుంటే మంత్రి నారాయణ శాఖలో కోతలు పెట్టడం ఖాయం. అలా కాని పక్షంలో మరో కీలకమైన మానవ వనరుల శాఖ కావాలనుకుంటే గంటా శ్రీనివాసరావు శాఖల్లో కోతలు పెట్టాలి. పరిశ్రమల శాఖతో పాటు ఇన్ఫర్ మేషన్ టెక్నాలజీ, ఎన్ఆర్ఐ వ్యవహారాల శాఖలు మాత్రం తప్పనిసరిగా తనకు ఉండాలని లోకేష్  కోరుతున్నారని అంటున్నారు. ఐటీ శాఖ కారణంగానే తెలంగాణలో కేటీఆర్ ఇమేజీ పెంచుకుంటున్నారని, ఆ కారణంగానే లోకేష్  పరిశ్రమలతో పాటు ఐటీ శాఖను అడుగుతున్నట్టు చెబుతున్నారు.  ప్రస్తుతం ఐటీ శాఖ పల్లె రఘునాధరెడ్డి నిర్వహిస్తున్నారు. మంత్రుల్లో  కొందరి శాఖలను మార్చడం, మరికొందరికి ఉద్వాసన పలకడానికి సంబంధించి బాబు ఇప్పటికే ఒక నిర్ణయానికి వచ్చినట్టు తెలుస్తోంది. ఇక కేసీఆర్ తనయుడిగా కంటే కేటీఆర్ పాలనా దక్షుడిగా, వ్యవహారాలు చక్కబెట్టే నేర్పరిగా తన సమర్థతను ఇప్పటికే నిరూపించుకున్నారు. ఫలితంగా కేటీఆర్ ఒక  గుర్తింపు పొందారు . ప్రపంచ ఐటీ దిగ్గజాలతో సంప్రదింపులు జరిపి తెలంగాణకు లబ్ధి చేకూరే పనులను చేపట్టడంలో కేటీఆర్ ముందంజలో ఉన్నారు.  లోకేష్ ఇపుడు అతనితో పోటీ పడాలనుకోవడం  మంచిదే. అయితే శాఖలు తీసుకోగానే సరిపోదు . అందుకు అవసరమైన కృషి  చేస్తూ దూసుకుపోయే తత్వాన్ని అలవర్చుకోవాలి. ముందు ముందు కూడా ఆయనతోనే పోటీ పడాలి కాబట్టి  సత్తా చాటు కోవడానికి సమాయత్తం కావాలి.  ......  Bharadwaja...
  • శశి శపథం వెనుక అసలు కథ ఏమిటి ?? శశికళ జైలుకెళ్లే ముందు అమ్మ సమాధి పై ఆవేశంతో మూడు సార్లు ఎందుకు చేత్తో చరిచారు.  ఎవరి మీద ఆమె ఆగ్రహం ?  మోడీ పైన ? గవర్నర్ పైన ? సెల్వం మీద ? జయ మీద ?  అలా చరచడానికి కారణం ఏమై ఉంటుంది ?  అలా చరచడాన్ని శపథం అంటారా ? అదే శపథం అయితే అది ఎవరి మీద ? తరతరాలుగా ఇలా శపథం చేయడం తమిళనాడు లో ఆచారమా ?  దాన్నే  "ఉంజనం ఉరైతల్"  అంటారా ? దాని వెనుక కథ ఏమిటి ?   ఆసక్తికరమైన కథనం కోసం చూడండి వీడియో. vedeo courtesy... tv5...
  • నటుడు పవన్ కళ్యాణ్ ఆంధ్రప్రదేశ్‌కు ప్రత్యేక హోదా కావాలంటున్నారా లేక హోదా గురించి స్పష్టత కావాలనుకుంటున్నారో తనవంటి వారికి అర్ధం కావడం లేదని   నిర్మాత దర్శకుడు  తమ్మారెడ్డి భరద్వాజ  అన్నారు.   పవన్‌కల్యాణ్‌ తీరుపై ‘నా ఆలోచన’ శీర్షికతో ఓ వీడియోను ఆయన సోషల్‌ మీడియాలో విడుదల చేశారు. ‘ప్రశ్నకు సమాధానం అడుగుతున్నారా స్పష్టత కోరుతున్నారా అనే క్లారిటీ కావాలి. ప్రశ్నకు సమాధానం అయితే ప్రభుత్వం నుంచి ఎప్పుడో వచ్చేసింది. ఇకపై దాని గురించి కల్యాణ్‌ మాట్లాడకపోతే మంచిది. స్టేటస్‌ గురించి ఇటు పవన్‌, అటు వైసీపీ, కాంగ్రెస్‌ ఎప్పటికప్పుడు స్టేట్‌మెంట్లు ఇస్తూనే ఉన్నాయి. అధికార పార్టీ కూడా స్టేటస్‌ వస్తే మంచిదేకానీ.. అది లేదంటున్నారు కదా... అంతకుమించి ప్యాకేజీ రూపంలో తెచ్చుకుందాం అంటూ గోడ మీద పిల్లిలా వ్యవహరిస్తోంది’ అని అన్నారు.  పవన్‌కల్యాణ్‌ని నమ్మి జనవరి 26న ప్రత్యేక హోదా కోసం వైజాగ్‌లో నిరసనకు తనతోపాటు చాలామంది హాజరయ్యారని, పవన్‌ మాత్రం వైజాగ్‌లో అడుగుపెట్టకపోవడం బాధాకరమని దర్శక నిర్మాత తమ్మారెడ్డి భరద్వాజ వ్యాఖ్యానించారు. ‘డబ్బు కోసం కాదు... ప్రజల కోసమే పోరాటం చేస్తానంటున్న పవన్‌ మాటలను నమ్ముతున్నా. స్టేట్‌మెంట్లతో సరిపెట్టకుండా క్లారిటీతో ప్రజల కోసం పోరాటం చేస్తానంటే పవన్‌తో కలసి ముందడుగు వేయడానికి యువకులు వేలల్లో సిద్ధంగా ఉన్నారు. అందులో నేను కూడా ఉంటా’ అని తమ్మారెడ్డి వివరించారు.  ఇంకా  భరద్వాజ  ఏమి చెప్పారో  చూడండి  వీడియో ...  ...
  • తమిళనాడు సీఎం  పళని స్వామి ఎమ్మెల్యేల మద్దతుతో బలనిరూపణ పరీక్షలో గట్టెక్కినప్పటికీ  ప్రభుత్వ స్థిరత్వంపై పలు అనుమానాలు వ్యక్తమవుతున్నాయి. పళని స్వామి సర్కార్  నిలబడుతుందా లేదా అనేది  సందేహమేనని  తమిళ మీడియాలో కథనాలు వస్తున్నాయి . బల పరీక్ష  స్పీకర్ లెక్క ప్రకారం చెల్లినా, ప్రజాస్వామ్యయుతంగా చూస్తే ఆ ఎన్నిక ఎంత మాత్రం చెల్లదని చాలామంది భావిస్తున్నారు. ఓటింగ్ ప్రక్రియ  రెండు సార్లు జరగడం  న్యాయ సూత్రాలకు విరుద్ధమని అంటున్నారు . 234 మంది ఉన్న అసెంబ్లీలో 122 మంది ఎమ్మెల్యేలు పళనికి మద్దతు తెలిపారు. అయితే విశ్వాస తీర్మానానికి సంబంధించి జరిగే ఓటింగ్ ప్రక్రియలో ప్రతిపక్షానికి అవకాశం ఇవ్వకపోవడం ఎంత మాత్రం సమంజసం కాదంటున్నారు. ప్రతి పక్షాన్ని బయటకు పంపి  వోటింగ్ జరపడం  ఖచ్చితంగా ప్రజాస్వామ్య విలువలను కాలరాయడమే  అనే అభిప్రాయం వ్యక్తమౌతోంది . ఇప్పటికే దీని పైన చర్చ జరుగుతోంది. విపక్షాలు గవర్నర్  కి ఫిర్యాదు కూడా చేశాయి. డీఎంకే  మరో అడుగు ముందుకేసి కోర్టును ఆశ్రయించింది.  ఈ అంశంపై విచారించిన మద్రాస్ హైకోర్ట్ బల నిరూపణ పరీక్ష సందర్భంగా అసెంబ్లీలో చోటుచేసుకున్న పరిణామాలకు సంబంధించిన వీడియో దృశ్యాలను ఆధారాలుగా సమర్పించాలని  ఆదేశించింది. దీంతో మరల రాజకీయ వేడి రగులుకుంది. డీఎంకే నేత స్టాలిన్ ఈ అంశాన్ని వదిలేలా కనిపించడం లేదు. రాష్ట్రవ్యాప్తంగా నిరాహార దీక్షలు చేస్తున్నారు. మరోసారిఅసెంబ్లీ వేదికగా బల నిరూపణ  పరీక్ష నిర్వహించాలని డిమాండ్‌ చేస్తూ డీఎంకే అధినేత స్టాలిన్‌ సైతం నిరాహార దీక్షలో కూర్చున్నారు.  ఇదిలా ఉంటే  చట్టప్రకారమే అసెంబ్లీ బలనిరూపణ పరీక్ష జరిగిందని, డీఎంకే కావాలనే పళనిస్వామిపై దుష్ప్రచారం చేస్తున్నదని అన్నాడీఎంకే విమర్శలు చేస్తోంది .  కాగా గోల్డెన్ బే రిసార్ట్‌లో అన్నాడీఎంకే ఎమ్మెల్యేలను పదకొండు రోజుల పాటు నిర్బంధించినట్టు తమ వద్ద ఆధారాలున్నాయని చెన్నై న్యాయవాది బాలు అంటున్నారు .తమను నిర్బంధించినట్టు చాలామందిఎమ్మెల్యేలు  ఫిర్యాదు కూడా చేశారన్నారు. ఈ ఆధారాలను కూడా  కోర్టులో ప్రవేశ పెడతామని ఆయన చెబుతున్నారు .  మొత్తం  ప్రభుత్వ మనుగడ  విషయంలో ఉత్కంఠ నెలకొంది. ...
  • లగడపాటి రాజగోపాల్  పొలిటికల్  రీ ఎంట్రీ  దాదాపుగా ఖరారు  అయింది . అటు టీడీపీ ఇటు బీజేపీలలో చేరడానికి ఇష్ట పడని  లగడపాటి  వైసీపీ వైపు మొగ్గు చూపారని  తెలుస్తోంది.  కొద్దీ రోజుల క్రితం బెంగళూరులో వైసీపీ అధినేత జగన్ ను  కలసి  మాట్లాడినట్టు సమాచారం.  జగన్  కూడా  రాజగోపాల్ పార్టీలో చేరిక పట్ల  సుముఖత  చూపారట .  తెలుగు రాష్ట్రాల్లో లగడపాటి  పేరు తెలియని వారు దాదాపుగా ఉండరు. ప్రత్యేక తెలంగాణ ఉద్యమం సందర్భంగా లగడపాటి చేసిన హడావుడి అంతా ఇంతా కాదు. రాష్ట్ర పునర్విభజన బిల్లు సందర్భంగా పార్లమెంట్ హాలులోనికి పెప్పర్ స్ర్పేను తీసుకెళ్లి దేశవ్యాప్తంగా సంచలనం సృష్టించారు. అలాంటి సంచలనాలు ఆయన ఖాతాలో ఎన్నో ఉన్నాయి. అటు పారిశ్రామికరంగంలోను ఇటు రాజకీయాల్లోనూ రాజగోపాల్ తనదైన ముద్ర వేశారు. రాష్ట్ర విభజనను వ్యతిరేకిస్తూ ఆయన కాంగ్రెస్ పార్టీకి రాజీనామా చేయడంతో పాటు రాజకీయాల నుంచే వైదొలగారు. 2014లో జరిగిన సార్వత్రిక ఎన్నికల్లో కూడా ఆయన పోటీ చేయలేదు. గత కొన్నాళ్ళుగా కుటుంబానికే ఎక్కువ టైం కేటాయించారు.. నాడు పార్ల‌మెంట్ సాక్షిగా ఏపీకి ప్ర‌త్యేక హోదా ఇస్తామ‌ని హామీ ఇచ్చిన నేత‌లు దాన్ని విస్మరించడం, తెస్తామ‌ని చెప్పిన వ్యక్తులు మాటలు మార్చడం వంటి పరిణామాల క్రమంలో రాజ‌గోపాల్ ప్రజల తరపున పోరాడాల‌ని యోచనలో పడ్డట్టు చెబుతున్నారు. లగడపాటి తో పాటు ఎంపీలు గా చేసిన వారిలో కావూరి సాంబశివరావు, పురందేశ్వరి బీజేపీ లో చేరగా రాయపాటి, దివాకరరెడ్డి టీడీపీలో చేరారు. మరికొందరు ఏం చేస్తున్నారో ఎవరికి తెలీదు. కాంగ్రెస్ కి రాజీనామా చేసిన ఉండవల్లి అరుణ కుమార్ ఇటీవలే తెర ముందుకు వచ్చారు. ఉండవల్లి ఏపార్టీ లో చేరేది తేలకపోయినప్పటికీ రోజు మీడియా ముందుకు రావడం పలు అంశాలపై మాట్లాడటం జరుగుతోంది. అదే రీతిలో త్వరలో లగడపాటి కూడా తెర పైకి రావచ్చు అంటున్నారు. లగడపాటి రాజకీయాల్లోకి వస్తే మళ్ళీ సందడి సందడే. ...
  • శశికళను పరప్పన అగ్రహార జైలు నుంచి చెన్నై లేదా వేలూరు జైలుకు రప్పించేందుకు ప్రయత్నాలు జరుగుతున్నాయి. అధికారం చేతికి చిక్కడంతో శశికళ వర్గం తొలుత ఆపనిలో పడింది . ఈమేరకు కర్ణాటక హైకోర్టులో పిటిషన్‌ దాఖలు చేయబోతున్నారు. అక్రమాస్తుల కేసులో శిక్ష పడడంతో అన్నాడీఎంకే తాత్కాలిక ప్రధానకార్యదర్శి శశికళ, బంధువులు ఇలవరసి, సుధాకరన్‌ బెంగళూరు పరప్పన అగ్రహార జైలులో ఉన్న విషయం తెలిసిందే. ఇప్పటికే కర్ణాటక న్యాయవాదులతో చర్చించిన శశి భర్త నటరాజన్ ఆ దిశగా పావులు కదుపుతున్నారు. వయోభారం, మధుమేహం, మోకాలినొప్పి, ప్రత్యేక వసతుల లేమి కారణాలుగా చూపి జైలును మార్చాలని హైకోర్ట్ ను అభ్యర్ధించనున్నారు.  కాగా బల నిరూపణలో విజయం సాధించిన సీఎం పళని స్వామి శశికళ ఆశీస్సులు కోసం మద్దతు దారులతో చెన్నై నుంచి అగ్రహార జైలుకు నేడో రేపో బయలు దేర నున్నారు.  చెన్నై జైలుకి శశికళ వస్తే సొంత ఇంట్లో ఉన్నట్టే లెక్క. జైలు నుంచే ఆమె రిమోట్ పాలన సాగుతుంది. పళని స్వామి అందుబాటులో ఉంటాడు. సొంత ప్రభుత్వం కాబట్టి జైలులో సకల సౌకర్యాలు అనుభవించవచ్చు. ఇదంతా పకడ్బందీగా ప్లాన్ చేసి హైకోర్టు ను ఆశ్రయిస్తున్నారు. అయితే హైకోర్టు ఎలా స్పందిస్తుందో చూడాలి.  డీఎంకే వర్గాలు కూడా ఈ విషయాన్నీ పసి గట్టి శశి జైలు మార్పిడిని ఎలా ఆపాలా అని యోచిస్తున్నట్టు సమాచారం....
  • తమిళనాడు రాజకీయ చరిత్రలో 30ఏళ్ల తర్వాత  బలపరీక్ష జరగబోతోంది.  తమిళ రాజకీయాల్లో బలపరీక్షలు, అవిశ్వాస తీర్మానాలూ కొత్తేమీ కాదు.  1952లో రాజాజీపై అవిశ్వాస తీర్మానం పెట్టగా, 200 మంది ఎమ్మెల్యేలు ఆయనకు అనుకూలంగా ఓటేసి తిరిగి సీఎంగా ఎన్నుకున్నారు.  ఆ తరువాత 1972 డిసెంబర్‌ 11న డీఎంకే నేత కరుణానిధి ముఖ్యమంత్రిగా ఉన్న సమయంలో అదే పార్టీలో ఉన్న ఎంజీ రామచంద్రన్‌ను పార్టీ నుంచి తొలగించారు. ఆ సమయంలో సీఎం కరుణానిధిపై అవిశ్వాస తీర్మానం పెట్టారు. ఆ బలపరీక్షలో కరుణానిధికి అనుకూలంగా 172 మంది ఎమ్మెల్యేలు మద్దతు తెలుపడంతో ఆయనే సీఎంగా ఎన్నికయ్యారు. 1988లో ఎంజీ రామచంద్రన్‌ మరణించాక అన్నాడీఎంకే పార్టీ రెండుగా చీలిపోయింది. అన్నాడీఎంకే (జా) జానకీ రామచంద్రన్, అన్నాడీఎంకే (జే) జయలలిత సీఎం పీఠం కోసం పోటీపడ్డారు. జనవరి 28న బలపరీక్ష నిర్వహించారు. ఆనాటి  బలపరీక్షలో జానకీ రామచంద్రన్‌ సీఎం అభ్యర్థిగా ఎన్నికయ్యారు. జానకీ రామచంద్రన్‌కు అనుకూలంగా 99 మంది, జయలలితకు అనుకూలంగా 33 మంది ఎమ్మెల్యేలు నిలిచారు. జయలలిత మరణంతో  తమిళనాడు అసెంబ్లీ  ఇపుడు మరోసారి బలపరీక్షకు సిద్ధమవుతోంది.  ఈ బలపరీక్ష ఎవరికి  అనుకూలం కానుందో కొన్ని గంటల్లో తేలిపోనుంది. 234 సీట్లున్న తమిళనాడు అసెంబ్లీలో జయలలిత మరణించడంతో ప్రస్తుత సభ్యుల సంఖ్య 233 మాత్రమే. ఇందులో సీఎం పళనిస్వామి వర్గంలో 123మంది ఎమ్మెల్యేలు, పన్నీర్‌సెల్వం వర్గంలో 11మంది ఎమ్మెల్యేలు ఉన్నారు. డీఎంకేకు 89, కాంగ్రెస్‌కు 8, ఐయూఎంఎల్ 1 సభ్యులు ఉన్నారు. 117 మంది సభ్యులు అనుకూలంగా ఉంటే బలపరీక్షలో పాస్ అయినట్లే. అయితే  రెండు శిబిరాల్లోనూ ఉత్కంఠ రాజ్యమేలుతోంది. పళనిస్వామి వర్గానికి ఎమ్మెల్యేలు మెజార్టీ  ఉన్నప్పటికీ  అది చాలా తక్కువ.. ఏడుగురు ఎమ్మెల్యేలు చేయిజారితే పళనిస్వామి బలపరీక్షలో ఓడిపోతారు.  పళనిస్వామి వర్గంలోని  40 మంది ఎమ్మెల్యేలు తీవ్ర అసంతృప్తితో ఉన్నారని ప్రచారం జరుగుతోంది. వారిలో కొందరైనా వ్యతిరేకంగా మారితే పళనీ కి ఇబ్బందే. అందుకే కాంగ్రెస్ సభ్యుల మద్దతు కోసం పళనీ ప్రయత్నిస్తున్నారు.  పన్నీర్ ఆశలు కూడా అసంతృప్త ఎమ్మెల్యేల మీదే . ఇప్పటివరకైతే పళనీ కే  మొగ్గు కనబడుతోంది. చివరిలో ఏదైనా జరిగితే  మ్యాజిక్ ఫిగర్ లో  తేడా రావచ్చు . మొత్తం మీద మరికొద్ది గంటల్లో  ఎవరు విజేతలో తెలుస్తుంది . ...
  • పళనిస్వామి అన్నాడీఎంకే లో  సీనియర్  నాయకుడు . 'జయ' విధేయుడుగా తమిళ రాజకీయాల్లో తనకంటూ ఓ గుర్తింపు తెచ్చుకున్న నేత .పన్నీర్‌ సెల్వం కేబినెట్‌లో రహదారులు, ఓడరేవుల శాఖ మంత్రిగా ఉన్న పళనిస్వామి సేలం జిల్లా ఎడప్పడి అసెంబ్లీ నియోజకవర్గానికి ప్రాతినిధ్యం వహిస్తున్నారు. నాలుగుసార్లు అసెంబ్లీకి ఎన్నికయ్యారు. వ్యవసాయం కుటుంబంలో పుట్టిన పళనిస్వామి సైన్స్ గ్రాడ్యుయెట్. 1974లో అన్నాడీఎంకే సాధారణ కార్యకర్తగా రాజకీయాల్లో వచ్చారు.  అంచెలంచెలుగా ఎదిగారు. ఎమ్జీఆర్ మరణానంతరం అన్నా డీఎంకే పార్టీ రెండు వర్గాలుగా చీలింది. ఎమ్జీఆర్ సతీమణి జానకి ఒక వర్గం కాగా, జయలలితది మరో వర్గం. అయితే పళనిస్వామి జయలలిత వర్గం పట్లే తన విధేయత  చూపారు .  ఆ తర్వాత అన్నాడీఎంకే అభ్యర్థిగా 1989, 1991, 2011, 2016లో ఆయన ఎమ్మెల్యేగా గెలుపొందారు. 1998లో  లోక్‌సభ  ఎంపీగా గెలుపొందారు. 2016 ఎన్నికల్లో అన్నాడీఎంకే అధికారంలోకి రావడానికి పళనిస్వామి సామాజిక వర్గమే (గౌండర్‌) ప్రధాన కారణం.జయలలితకు వ్యతిరేకత ఉన్న కొన్ని నియోజకవర్గాల్లో కూడా పళనిస్వామి ప్రచారం పార్టీకి ఎంతగానో ఉపయోగపడింది. పళనిస్వామి సొంత జిల్లా అయిన సేలంలో మొత్తం 11 నియోజవర్గాలుంటే అందులో 10 నియోజవర్గాల్లో అన్నాడీఎంకేనే 2016 ఎన్నికల్లో విజయం సాధించింది. తమిళనాడులో జనాభా, రాజకీయ ప్రాతినిధ్యం రీత్యా గౌండర్లు, తేవర్లు, వన్నియార్లు బలమైన సామాజిక వర్గాలు .  ఆపద్ధర్మ ముఖ్యమంత్రి పన్నీర్‌సెల్వం, శశికళ ఇద్దరూ తేవర్లే. 234 మంది సభ్యులున్న ఆ రాష్ట్ర అసెంబ్లీలో తేవర్‌ ఎమ్మెల్యేలే ఎక్కువ. అన్నా డీఎంకేలో మాత్రం గౌండర్లు 28 మంది , తేవర్లు 20 మంది ఎమ్మెల్యేలున్నారు.  జయలలిత తన మంత్రివర్గంలో పన్నీర్ తర్వాత పళని స్వామినే ఎక్కువగా నమ్మేవారు.జయలలిత ఆసుపత్రిలో తీవ్ర అనారోగ్యంతో ఉన్నప్పుడు ఆపద్ధర్మ ముఖ్యమంత్రిగా ఓ.పన్నీర్‌సెల్వంతో పాటు పళనిస్వామి  పేరు కూడా పరిశీలనకు వచ్చిందని  అంటారు . అప్పుడు పళనిస్వామి పట్ల శశికళ మొగ్గు  చూపినట్టు చెబుతారు. అయితే అమ్మకు అత్యంత విధేయుడు, గతంలోనూ అమ్మ పరోక్షంలో ముఖ్యమంత్రిగా వ్యవహరించిన అనుభవం పన్నీర్  కలిసొచ్చింది.  ఊహించని విధంగా సుప్రీంకోర్టు శశికళను ఆదాయానికి మించిన ఆస్తుల కేసులో దోషిగా నిర్దారించడంతో పళనిస్వామి పేరు తెర పైకి వచ్చింది . తీర్పువచ్చిన క్షణాల్లోనే సీఎల్‌పీ నేతగా  ఎన్నుకోవడంతో పళని  సీఎం  అవడానికి  రూట్ క్లియర్ అయింది. ...
  • అనేక సూట్ కేసు కంపెనీలతో,  బంధువుల సాయంతో రాష్ట్రాన్ని దోచుకున్న శశికళకు... ముప్పైమూడు ఏళ్ళు ఆదరించిన జయలలిత అనుమానాస్పద రీతి లో మరణించినపుడు కళ్ళు కనీసం చెమ్మగిల్ల లేదు. ఇపుడు ముఖ్యమంత్రి పదవి ఎక్కడ దూరం అవుతుందో అని ఆమెకు కళ్ళు కావేరీ జలాలు అవుతున్నాయి. వందలాది మంది రౌడీలను ఎమ్మెల్యేలకు కాపలాగా పెట్టి నాకే మెజారిటీ ఉన్నది అని తోడ కొడుతున్నది. శశికళ ను మన్నారు గుడి మాఫియా గా వర్ణించి ఆమెను జైల్లో తోయిoచిన బీజేపీ ఎంపీ సుబ్రమణ్య స్వామి ఆమెను ముఖ్యమంత్రిని చెయ్యాలని డిమాండ్ చేస్తున్నాడు. లేకపోతే కోర్ట్ లో కేసు వేస్తానని గవర్నర్ ను హెచ్చరిస్తున్నారు. విద్యాసాగర్రావు వ్యక్తిత్వం, నీతి నిజాయతీ ఎంత స్వచ్ఛమైనవో ముప్ఫయ్యేళ్ళ ఆయన రాజకీయ జీవితాన్ని గమనిస్తున్న అందరికి  తెలుసు.  స్వామి తాటాకు చప్పుళ్ళకు బెదిరి పోయే రకం కాదు ఆయన. రాజ్యాంగం ప్రకారం ముఖ్యమంత్రి తన రాజీనామా లేఖను గవర్నర్ కు స్వయాన అందజేసి ఆమోదం పొందాలిట. కానీ ఇక్కడ అలా జరగలేదు. రాజీనామాను ఫాక్స్ ద్వారా పంపించారట. పన్నీర్ సెల్వం  సంతకం కూడా ఫోర్జరీ కావచ్చు అనో మరో వివాదం తెర మీదికి  వచ్చింది  ఇప్పుడు. అది పన్నీర్ సహజంగా పెట్టే సంతకం లా లేదు అంటున్నారు. తనని బలవంతాన రాజీనామా చేయించారు అనే పన్నీర్ ఫిర్యాదు కు ఇప్పుడు బలం చేకూరుతున్నది. సుబ్రమణ్య స్వామి కేసు వేస్తే మరీ మంచిది. ఆ కేసు తేలే వరకూ గవర్నర్ ఎదురు చూడవచ్చు. ఈ స్వామి వ్యవహరం చూస్తుంటే దీన్ని మరింత జాప్యం చెయ్యడానికి కేంద్రమే నాటకం ఆడిస్తున్నడెమో అన్న అనుమానం కలుగుతున్నది. ఒకప్పుడు జయ ను శశికళను అభియోగాలు మోపి జైల్లో వేయించిన స్వామి ఇపుడు శశికళ పక్షాన ఎందుకు మాట్లాడుతున్నారు ? మధ్యలో ఆయన ఇంట్రెస్ట్ ఏమిటో మిస్టరీ . ఈ మాఫియా రాణి ని ముఖ్యమంత్రి చేసేముందు ఒకటికి పదిసార్లు ఆలోచించడం మంచిది. .....  ఇలపావులూరి మురళీ మోహన రావు...
  • తమిళనాట రాజకీయాలు ఊహించని మలుపు తిరుగుతున్నాయి. పన్నీర్ సెల్వం రిసార్ట్ లో ఉన్న ఎమ్మెల్యేలను కలిసేందుకు వెళ్లాలని యోచిస్తున్నారు . అదే సమయం లో శశికళ నిరసన దీక్ష కు కూర్చోవాలని  ప్లాన్   చేస్తున్నట్టు తెలుస్తోంది. ఏ నిమిషానికి ఏమి జరుగుతుందో అర్ధం కాని పరిస్థితులు నెలకొంటున్నాయి. శశికళ అనుకూల వర్గంలోని ఎమ్మెల్యేలు ఒక్కొక్కరుగా పన్నీరు వైపు వెళుతున్నారు . ఫలితంగా సమీకరణాలు పూర్తిగా మారిపోతున్నాయి. ఇప్పటికే ఆరుగురు ఎంపీలు పన్నీరుకు మద్దతు పలికారు. ఏడుగురు ఎమ్మెల్యేలు పన్నీరు శిబిరంలో చేరారు.మరి కొందరు రావచ్చు అంటున్నారు . దీంతో శశికళ శిబిరం లో కలవరం మొదలైంది. ప్రజల్లో వ్యతిరేకత పెరుగుతున్న క్రమంలో శశి వెంట ఉంటే భవిష్యత్ ఉండదనే ఆందోళన వారిలో నెలకొంది. దీంతో రిసార్ట్‌లో ఉన్న చాలామంది ఎమ్మెల్యేలు పన్నీరు వైపు వెళ్లాలని అనుకుంటున్నారట . సరిగ్గా ఈ సమయం లోనే పన్నీరు ఎమ్మెల్యేలుంటున్న రిసార్ట్‌కు వెళ్లాలని భావిస్తున్నారు. స్వయంగా వెళితే మరి కొంతమంది ఎమ్మెల్యేలు తన వర్గం లోకి లాక్కోవచ్చని పన్నీర్ అంచనా వేస్తున్నారు . సెల్వం సాయంత్రం లోపు శశికళ వర్గంలోని ఎమ్మెల్యేలను రిసార్ట్‌లోకలిసే అవకాశాలు ఉన్నాయి. ఇక శశికళ తన వ్యూహాలకు పదును పెడుతున్నారు.  నిన్న సెంగొట్టియన్  పేరు ను  సీఎం అభ్యర్థిగా ప్రతిపాదించాలని యోచన చేసిన శశి మళ్ళీ మనసు మార్చుకున్నట్టు  సమాచారం. ఇన్నాళ్లు కేంద్రంపై ఆచితూచి మాట్లాడిన శశి  మెల్లగా స్వరం పెంచుతున్నారు .   అన్నాడీఎంకేను చీల్చేందుకే.. ముఖ్యమంత్రిగా తన ప్రమాణస్వీకారాన్ని గవర్నర్‌ వ్యూహాత్మకంగా వాయిదా వేస్తున్నారని ఆమె ఆరోపించారు. ఇప్పటికే గవర్నర్‌ విద్యాసాగర్‌రావుకు హెచ్చరికతో కూడిన లేఖను పంపిన శశికళ దీక్ష చేయవచ్చని అంటున్నారు.  ఇది చేసే ముందు గవర్నర్ ను  మరో మారు కలిసే ప్రయత్నం చేస్తున్నారు . గవర్నర్‌ అపాయింట్‌మెంట్‌ ఇవ్వకపోతే ప్రత్యక్ష ఆందోళనకు దిగాలని శశికళ యోచిస్తున్నట్టు  చెబుతున్నారు ....
Site Logo