Latest News
ప్ర‌ముఖులు
  • గొప్ప తాత్వికునిగా, సౌందర్యోపాసకునిగా, సంస్కృతీ సాంప్రదాయాలను అమితంగా ప్రేమించే వ్యక్తిగా, మానవ జీవిత లక్ష్యాన్ని తెలియజెప్పే ప్రబోధకునిగా, సామాజిక న్యాయాన్ని, మతసామరస్యాన్ని కోరుకునే మనిషిగా తన కవిత్వంలో వాజపేయి దర్శనమిస్తారు. ఆయన కవితలు శిల్ప సౌందర్యానికి ప్రతీకలుగా నిలుస్తాయి.   ‘‘చెదిరిన స్వప్నాల రోదనను వినేదెవరు?/ గుండెలను చీల్చి వెల్లుబికిన వేదన కన్నీటి రూపు దాల్చినా/ నేను ఓటమిని అంగీకరించను/ పోరుబాట పట్టడం నాకిష్టం./ కాల-కపాలంపై రాస్తూనే ఒరిగిపోతాను./ కొత్త గీతాన్ని ఆలపించి నవశకానికి నాంది పలుకుతాను.’’  "బాధలు రానీ, వ్యధలే కమ్మనీ/ నిప్పులు చిమ్మనీ జ్వాలలు రేగనీ/ ఆగదు నా ప్రయాణం, అడుగు ముందుకుపడనీ/ కష్టాలొచ్చినా, నష్టాలొచ్చినా/ మెడవంచను, తలదించను. "పుష్యపున్నమిలో మంచి ముత్యం లాంటి ఒక మంచు బిందువు ప్రభవిస్తుంది. జగత్‌ను కనువిందు చేస్తుంది. బాలభానుని లేలేత కిరణాలకే తను కనుమరుగవుతానని తెలిసినా అది అంటుంది. "     స్వతంత్ర భారత రాజకీయాలపై తనదైన ముద్రవేసిన రాజకీయవేత్త, భారత మాజీ ప్రధాన మంత్రి అటల్‌ బిహారీ వాజపేయి బహుముఖ ప్రజ్ఞాశాలి. విలువలతో కూడిన రాజకీయాలకు, దేశప్రజల సంక్షేమానికి ప్రాధాన్యతనిచ్చిన వాజపేయి ఒక ఉదాత్తమైన కవి, ఉపన్యాసకుడు, సిద్ధాంతాలనే ప్రాణంగా భావించిన వ్యక్తి. సాధారణంగా రెండు కత్తులు ఒకే ఒరలో ఇమడవు. రాజకీయాలు, సాహిత్య సాధన కూడా అటువంటివే. రాజకీయాల్లో ప్రవేశించిన తర్వాత ‘కవితల మాట అటుంచి వచనంలో రాయడం కూడా కష్టతరం’ అయిందని ఆయన చమత్కరించారు. 1957లో తొలిసారి లోక్‌సభకు ఎన్నికయిన తర్వాత ఉపన్యాసమే తన అభివ్యక్తీకరణకు ప్రధాన సాధనమయిందని తెలిపారు.  వాజపేయి తాతగారు సంస్కృత భాషా పండితులు. తండ్రి కృష్ణ బిహారీ గ్వాలియర్‌, ఆ చుట్టు పక్కల ప్రాంతాల్లో గొప్ప కవిగా ప్రసిద్ధులైనారు. ‘జయంతి ప్రతాప్‌’లో ఆయన కవితలు తరచు ముద్రితమై పాఠకులను అలరించేవి. గణేశ ఉత్సవాల సందర్భంగా ఏర్పాటుచేసే కార్యక్రమాలలో వారి ప్రసంగాలు అందరినీ అమితంగా ఆకట్టుకొనేవి. ఈ విధంగా వారసత్వంగా సాహిత్య సాధన వాజపేయికి ఒక గొప్పవరంగా లభించింది. నిరాలా, పంత్‌, మహాదేవీవర్మ వంటి ఆ తరం కవులను ఆయన అమితంగా ఆరాధించారు. ఎంతో సున్నిత మనస్కుడైన వాజపేయి అన్యాయాన్ని ఎదిరించేందుకు కవిత్వాన్ని ఒక సాధనంగా చేసుకున్నారు. ఒక రాజకీయవేత్తగా రాణించాలనిగానీ, పెద్ద–పెద్ద పదవులు అధిష్ఠించాలనిగానీ ఆయన ఆ రోజుల్లో ఆకాంక్షించలేదు. భారతీయ జనసంఘ్‌ పట్ల ప్రవృత్తిపరంగా ఆకర్షితులు గావటం, ఆర్‌ఎస్‌ఎస్‌ పత్రికల్లో కొన్నేళ్ళు పనిచేయటం, కాంగ్రెసేతర నాయకులతో పరిచయాలు ఆయనను రాజకీయాల్లోకి నెట్టాయి.  రాజకీయ జీవితంలో తలమునకలుగా ఉన్నప్పటికీ వాజపేయి తన సాహిత్య సాధనను విడిచిపెట్టలేదు. కవిగా, సంపాదకునిగా వారి పది రచనలు గ్రంథస్థం చేయబడ్డాయి. వాజపేయి కవితలు ‘మేరీ ఇక్యావన్‌ కవితాయేష’ శీర్షికతో ప్రచురణకు నోచుకున్నాయి. మనసున్న కవిగా వాజపేయి తన చుట్టూ ఉన్న సమాజాన్ని నిశితంగా పరిశీలించి, పలు వర్గాల ప్రజల వెతలను అర్థం చేసుకొని శ్రామిక, పీడిత జనశ్రేయస్సే లక్ష్యంగా కవితా సాధన చేయటం గమనార్హం. ‘తాజ్‌మహల్‌’ ఈయన ప్రథమ కవిత. ఈ కవితలో తాజ్‌మహల్‌ సౌందర్యాన్ని వర్ణిస్తూనే, తాజ్‌మహల్‌ నిర్మాణానికి రాళ్ళెత్తిన కూలీల కన్నీటివెతలను కళ్ళకు కట్టినట్లుగా చిత్రించిన ఈ కవి తన ఆశయం శ్రామిక జన సంక్షేమమే అని చాటిచెప్పారు. తన కవితా వస్తువు గురించి చెబుతూ నా కవితలు సామాజిక న్యాయం కోసం జాగృతినొందించే మాతృకలు. పరాజయానికి తావేలేదు. అక్షర సైన్యానికి ఓటమి భయం లేదు, గెలవాలన్న కోరిక తప్ప. కాన్పూర్‌లోని విక్టోరియా కళాశాలలో చదువుతున్న రోజుల్లో ఆయన దేశభక్తి గీతాలు రాసి, శ్రావ్యంగా ఆలపించి శ్రోతల్లో జాతీయ భావనలను రగుల్కొల్పారు.  వాజపేయి కవితల్లో ‘‘శ్రమయేవ జయతే’’ సందేశం వినిపిస్తుంది. కష్టపడి పనిచేస్తే భవిష్యత్తు బంగారుమయం అవుతుందని కవి నమ్మకం. ఎండుటాకులు రాలిన చోట కొత్త చివురు చిగురిస్తుందన్న సత్యాన్ని అందించే యీ కవితల్లో తూర్పు దిక్కున పొడిచిన తొలిపొద్దు కిరణం, ఆశకు సంకేతంగా నిలుస్తుందని కవి భావించారు. తన జీవితంలో ఓటమికి తావులేదని, ఆశల సౌధంపై విజయకేతనం ఎగురువేస్తానంటూ ఆయన  వ్రాశారు. వాజపేయితో రచయితగా సాహచర్యం సన్నిహితత్వం నా అదృష్టం. జ్ఞానపీఠ పురస్కార గ్రహీత ఆచార్య సి.నారాయణరెడ్డి గారితో కలిసి పార్లమెంటు లాబీలలో, వరండాలో ప్రధానమంత్రి నివాసంలోని ‘‘పంచవటి’’ సమావేశ మందిరంలో కలవటం, సి.నా.రె. తన గజల్స్‌ వినిపిస్తుంటే వాజపేయి ఆనందించటం, నేను వాజపేయి గారి కవితలు ఆయనకు వినిపిస్తుంటే ఆయన చిరునవ్వుతో ఆస్వాదించటం నా పురాకృత పుణ్యంగా, నా జీవితం ధన్యంగా నేను భావిస్తాను. ఆచార్య యార్లగడ్డ లక్ష్మీప్రసాద్‌    ఆంధ్రజ్యోతి సౌజన్యంతో ...
  • మరణాన్ని ముందే ఊహించిన కొనకంచి త్వరలో విడుదల కానున్న పుస్తకానికి రాసుకున్న ముందుమాట ఇది. అసంపూర్తిగా వదిలేసి ,అభిమానుల గుండెల్ని బరువెక్కించి అలా వెళ్ళిపోయాడు. నేను..నా కవిత్వం... :ధ్వంసధ్వని..:పునర్ముఖం.. :మీరొకప్పుడు బ్రతికుండేవారు..; నా అజ్ఞానమే నా జ్ఞానం..నా జ్ఞానమే నా అజ్ఞానం One day…I will leave everything and everyone behind and never come back ఎక్కడయితేనేం?  అదో స్మశానం... ఒకళ్ల తరువాత వొకళ్ళు అందరూ వచ్చి నా చెవులో నా పేరుతో అఖరిసారిగా పిలవటం అయిపోయిందా.? ఎవరికేమౌతానో... మీ చుట్టపు వరసలతో.. అఖరిసారిగా నా చెవులో పిలవటం అయిపోయిందా.? చచ్చిపోయిన మనిషిగా పాడె మీద పడివున్న నాకు.. మీకు.. ఉన్న ఆఖరి లంకె..బ్రతుకుతానేమో అని ఉండే ఆశ.. ఈ ఆఖరి " దింపుడు కల్లం ఆశ"తో పూర్తి అవుతుంది..అని నాకు తెలుసు. నేను లేవలేదా?నాప్రాణం పోయినట్టేనా? నేను పూర్తిగా చనిపోయినట్టు నిర్ధాకరించుకున్నారా?  అయితే ఈ దేశపు జాతీయగీతం ఆఖరిసారిగా నాకోసం అందరూ ఓసారి పాడి చూడండి. ఖచ్చితంగా నేను బ్రతుకుతాను.ఖచ్చితంగా నేను వెనక్కి వస్తాను.ఖచ్చితంగా నాకు ప్రాణం వస్తుంది. జాతీయగీతాన్ని విన్నాక ..జాతీయ గీతాన్ని వినిపించినాక కూడా నా వొళ్ళు పులకరించ లేదా? నా శరీరంలో ఎలాంటి మార్పులేదా? కళ్ళల్లో..ఎలాంటి భావోద్వేగపు..కన్నీళ్ళు రావటల్లేదా.. చల‌నరహితమయిన .. నా గాజుకళ్ళు అలాగే నిస్తేజంగా నిర్వేదంగా ఉన్నాయా... శరీరంలో ఎలాంటి గగుర్పాటు లేదా..? అకస్మాత్తుగా చలనం వచ్చి నా చెయ్యి పైకి లేచి సెల్యూట్ చెయ్యటల్లేదా..? ఆయితే ..అప్పుడు ..అప్పుడు..అప్పుడు మాత్రమే ...నేను పూర్తిగా... ఖచ్చితంగా.. చనిపోయినట్టుగా  నిర్ధారించుకోండి.  ................................. Behind The Senses..  Behind this Poetry.. ....................................... పెద్ద కేక పెట్టాను "ఝాన్సీ"... తలలో ఎవరో కొరడాతో చెళ్ళున కొట్టినట్టు వింత చప్పుడు..వింతధ్వని..వింత మోత. నిద్రలోంచి కళ్ళు తెరిచాను. కళ్ళ ముందు ఏవో మెరుపులు గుర్రాల మీద మెరుస్తూ అతి వేగంగా తిరుగుతున్నాయి.తలలో అంతకు ముందెప్పుడూ వినని విపరీతమైన వత్తిడి.చెవులల్లో వింత ధ్వని. పక్కమీదనించి లేవబోయాను.సాధ్యం కాలేదు.శరీరాన్ని మొత్తం నీళ్ళల్లో ముంచి తీసినట్టు విపరీతంగా చెమటతో తడిసిపోతున్నది.. అలా చెమట పోయటం అసాధరణమైన శారీరక మార్పు.నేను ఎప్పుడూ చూడనిది మెడకింద ఏ భాగమూ పని చెయ్యటల్లేదు.. నావైపు ఆదుర్దాగా..కంగారుగా చూస్తూ అడుగుతోంది ఝాన్సీ" ఏమయ్యిందండీ అట్లా అరిచారు".. ఆమె.నా శ్రీమతి. "ఎమెర్జెన్సీ..నన్ను హస్పిటల్ కితీసుకెళ్ళండి. సీరియస్..నా మెడ కింద ఏభాగం పని చెయ్యటం లేదు... డేంజరస్ కండిషన్ .."పెద్దగా అరిచాను. అదృష్టం .మాటలు వస్తున్నాయి.మాట్లాడ గలుగుతున్నాను. కొద్దిసేపట్లో పదిమందీ పోగయ్యారు. అరగంటలో నా భార్య,పిల్లలు నన్ను..స్ట్రెచ్చర్ మీద మోస్తూ 108 వైపు పరుగెత్తుతున్నారు.నేను చచ్చిపోతున్నాను అని నాకు అర్ధమయ్యింది.చావుకి చాలా దెగ్గిరగా ఉన్నానని నాకు నా శరీరం రకరకాల స్పస్టమైన సందేశాలని ఇస్తున్నది.. నన్ను 108 లోకి ఎక్కించారు. విపరీతమైన నిద్ర వస్తున్నది.నల్లటి ముసుగు కప్పేస్తున్నట్టు విపరీతమైన నలుపు.. నల్లటి తెరలు నాకళ్ల చుట్టూ..నేను కోమాలోకి వెళ్లే దశలో ఉన్నానని అర్ధమయ్యింది.రాబిన్ కుక్ మెడిక నవలలన్నీ చదివిన నాలడ్జ్ ఇక్కడ నాకు పనికొచ్చింది. అదీ గాక నేను నవలా రచయితగా నేను చదివిన మెడికల్ బుక్స్..మెడికల్ నాలడ్జ్..పాత్రికేయునిగా డాక్టర్లతో నాకు ఉన్న పరిచయాల డిస్కషన్స్ అన్నీ ఇప్పుడు ఇక్కడ నాకు పనికొస్తున్నాయి .  కను రెప్పలు వాల్చానంటే ..కళ్ళు మూశానంటే..నేను కోమాలోకి వెళ్తాను.. నాన్సెన్స్..నేను చచ్చిపోవటమేంటి? అప్పుడే నేను చచ్చిపోదల్చుకోలేదు.శరీరంలో ఉన్న యావచ్చక్తినీ.. యావత్తు మానసికమైన స్థిరత్వాన్ని ...మానసిక బలాలని ....ఆలోచనలన్నీటినీ కూడ తీసుకున్నాను. ఒక్క వొక్కటి ఒక్కటి... ఒక్క రెండు రెండు ... ఒక్క మూడు మూడు.. ఎక్కాలు గుర్తుకు తెచ్చుకుంటూ కనుగుడ్లను ఉరిమి ఉరిమి నిద్రపోకుండా చూస్తూ.. ఎక్కాలు చదవటం ప్రారంభించాను.. నాలో నేను ఏదో గొణుక్కుంటున్నాననుకుంటున్నాను.  చచ్చిపోయేముందు అందరూ అలాగే ఏదో గొణుక్కుంటారట కదా..దాన్నే సన్నిపాత గుణం అంటారు కదా అలాంటి స్థితి నాది అనుకుంటూ మా ఆవిడ, పిల్లలు. కళ్లనీళ్ళతో నావైపే చూస్తున్నారు.నా ఆఖరి పోరాటం నాకు మాత్రమే తెలుసు.. నాకు ఓటమి అంటే అసహ్యం. ఇక్కడ నేను గెలవటమంటే ..మరికొన్నాళ్ళు బ్రతికుండటం..మరికొంత  రాయటం..నాపాదముద్రలని కొన్ని అక్షరాల రూపంలో ..పుస్తకాల రూపంలో ఇక్కడ వదిలి వెళ్ళటం.అందుకే నేను ఓడిపోదల్చుకోలేదు..  ఒకటి.. నేను చచ్చిపోదల్చుకోలేదు.. రెండు.. నేను చచ్చిపోదల్చుకోలేదు.. వంద..నేను చచ్చిపోదల్చుకోలేదు...  రెండువందలు ..నేను చచ్చిపోదల్చుకోలేదు.. మూదు వందలు..నేను చచ్చిపోదల్చుకోలేదు. అంబులెన్స్ కింస్ హాస్పిటల్  ముందు ఆగింది. ఈ సీ జీ..షుగర్..బీపీ..ఒకటేంటి అన్నిపరీక్షలు శరవేగంతో జరుగుతున్నాయి. నా ప్రమేయం లేకుండా ఎన్నో టెస్టులు. ఎమ్మార్ ఐ టెష్టులు.. ఎక్సె రే లు ..ఆఖరికి నా చిన్న మెదడులో చాలాచోట్ల రక్తం క్లాట్ అయ్యిందని తేల్చారు. ఇంతకుముందే నాలుగు రోజులక్రితమే ఇదే హాస్పిటల్లో గుండెనెప్పి వచ్చి రకరకాల టెస్టులతరువాత అయ్ సీ యూలో నా గుండెలో రెండు వాల్స్ బ్లాక్ అయ్యాయని డాక్టర్లు తేల్చారు.అయ్ సీ యూ లోనే ట్రీట్మెంట్ జరిగింది. అబ్జర్వేషన్ కోసం డిస్చార్జ్ అయ్యి ఇంటికి వెళ్లగానే .. రెండు రోజుల తరువాత ఇది రెండో ఉపద్రవం. హార్ట్ స్ట్రోక్..వెంటనే బ్రెయిన్ స్ట్రోక్.. అందుకే డాక్టర్లు సీరియస్ బ్రతకటం కస్టం అని తేల్చేసారు.  బిక్క ముఖాలేసుకోని చూస్తున్న నాభార్య..పిల్లల..పరిస్థితి అదే. ఎందుకో నాకు వాళ్లని చూస్తే జాలివేసింది.నన్ను ఎమర్జెన్సీ నించి అయ్ సీ యు కి తరలించే ప్రక్రియ ప్రారంభమయ్యింది. డాక్టర్లు ఎప్పుడయినా ఇలాంటి పరిస్థితుల్లో సగమే చెబుతారు.మిగతా సగాన్ని మనం మాత్రమే అర్ధం చేసుకోవాలి.నాకు ఆ సగమేంటో అర్ధంఅవుతున్నది.నా వాళ్లకు కూడా అర్ధమయ్యింది.అందుకే నా పిల్లలు ..ఝాన్సీ స్ట్రెచ్చర్ వెనుకే చాలా దీనంగా నడుస్తున్నారు. నేను ఝాన్సీని చూసి నవ్వాను.నేను నవ్వటం చూసి  అడిగింది.."ఎంటి నవ్వుతున్నారు?""అయ్ సీ యూ చాలా బాగుంటుంది..అక్కడున్న ప్రతిమనిషీ క్షీర సాగర మర్దనంలో లాగ ఒకపక్క డాక్టర్లు..మరోపక్క మృత్యు  దేవత...యుద్ధం చెయ్యటం తెలిస్తే మరణంతో పోరాడటం అనేది భలే విచిత్రంగా ఉంటుంది"  ఇప్పుడు నాలో రెండు ట్ర్రాక్స్ పని చేస్తున్నాయి.. ఒకటి మామూలు మనిషి..మామూలు మనిషి ట్రాక్..మరొకటి రచయితగా నేను.. చుట్టూ ఉన్న ప్రపంఛాన్ని చూసే ట్రాక్.. ఈ రెండు ట్రాక్ లు ఒకేసారి దేని పని అదే చేస్తున్నది. మళ్ళీ నవ్వాను ఝాన్సి వైపు చూస్తూ.. మళ్ళీ ఆమె అడిగింది.."ఎంటి మళ్ళీ నవ్వుతున్నారు""నీకు చెప్పకుండా నేను ఒకళ్లను ప్రేమించాను.ఎందుకో నాకు ఇప్పుడు నీకు చెప్పాలనిపించింది"క్షణంలో వెయ్యో వంతు కాలంలో ఆమె కళ్ళల్లో కనిపించిన భావాలని నేను మాటల్లోకి మార్చి చెప్పలేను.అలాంటి పరిస్థితుల్లో కూడ నేను చెప్పిన మాటలకు అమె దిగ్భ్రమగా చూసింది.నమ్మలేనీ నిజాలను విన్నప్పుడు మాత్రమే అలాంటి భావాలు ముఖంలో ప్రతిబింబిస్తాయి. నా మాటల దాడినుంచి కొద్దిగా తేరుకున్నాక..తనను తాను సంబాళించుకుంటూ అడిగింది"ఎవరిని..ప్రేమించారు..? "ఇదిగో.... ప్రేమిస్తున్నాను.మృత్యువును ప్రేమించటానికి వెళుతున్నాను".  నేను ఏం మాట్లాడుతున్నానో ఆమెకు అర్ధం కాలేదు.అలాంటి పరిస్థితుల్లో కూడా నేను అలా ఎలా మాట్లాడుతున్నానో ఆమెకు అర్ధం కాలేదు.అయినా ఏదో అర్ధమయినట్టు నవ్వింది. అయ్ సీ యూ..తలుపు తెరుచుకుంది . చల్లటిగాలి నా మీదుగా వెళుతోంది.అయ్ సీ యు..డ్యూటీ డాక్టర్..వచ్చి నా కేస్ షీట్ ని పరిశీలిస్తున్నాడు. మళ్ళీ ఇక్కడ అన్నీ కట్ షాట్స్.. నా చెయ్యిపట్టుకోని ఆమె..ఆమె భుజం పట్టుకోని కొడుకు..ఆ వెనుక మరొకడు..ఎవరికయినా అక్కడివరకే అనుమతి.  అయ్ సీ యూ లోకి ఎవరినీ అనుమతించరు కదా.. నేను తలపైకెత్తి డాక్టర్ వైపు చూస్తూ "ఎమయ్యింది" అడిగాను.'ఆఖరి మాటలు మాట్లాడుకోండి 'అన్నట్టు నిర్వేదంగా ఎలాంటి భావాలు లేకుండా చూస్తున్నాడు. మళ్ళీ ఝాన్సీ వైపు చూసాను.ఆమె సినిమా భార్యలా ఏడుస్తున్నది. నాకు కొంచెం ఇబ్బంది అనిపించింది.ఇలాంటి సంఘటనలెన్నో చూసిన డాక్టర్ చాలా నిర్లిప్తతతగా నా వైపు ఝాన్సి వైపు చూపులు మార్చి మార్చి చూస్తున్నాడు అయన .  " ఇంత సీన్ అవసరమా..డాక్టర్.. అయె సీ యూ నించి రెండే దారులు.ఒక దారి మార్చురీకి..మరో దారి ఇంటికి.వెళ్తే ఇంటికి వెళతాను.లేదంటే మార్చురీకి వెళతాను.. ఐ డోంట్ కేర్..ఎటయినా ఓకే..లోపలికి పదండి".. నా.. స్ట్రెచ్చర్ లోపలికి  రాగానే అయ్ సీ యూ తలుపు మూసుకుపోయింది. "నాకు తెలుసు..ఎంతటి భయంకరమైన పరిస్థితుల్లో అయినా నేను చచ్చిపోను అని..నేను రాయాల్సింది ఇంకా చాలా ఉన్నది.. నేను బ్రతుకుతాను. నేను ఖచ్చితంగా బ్రతుకుతాను.."  నిద్ర ..నిద్ర ..నిద్ర ..ఒళ్లుమరిచి నిద్ర పోవాలనిపిస్తున్నది.ఒకపక్క చుట్టూ పరిశీలన చేస్తూనే నిద్ర రాకుండా చూసుకుంటున్నాను. స్ట్రెచ్చర్ ఒక బెడ్ ముందు ఆగింది."నాకు ఈ బెడ్ వద్దు..ఆబెడ్ మీద పడుకోబెట్టండి" అంటూ కిటికీ దెగ్గిర ఉన్న బెడ్ చూబెట్టాను అటెండెంట్స్ తో.. దాదాపు పది అడుగుల వన్ వే సీత్రూ అన్ బ్రెకబుల్ గ్లాసు కిటికీ పక్కనే నా బెడ్. ఆ బెడ్ మీదకు నా అచేతనమయిన శరీరాన్ని పడేశారు. ట్రీట్మెంట్ ప్రారంభమయ్యింది..దూరంగా కనిపిస్తున్న నెక్లెస్ రోడ్డు..హుస్సేన్ సాగర్..ఎంత అద్భుతమైన  దృశ్యం ..అది?  అవునూ..నా మొదటి ప్రియురాలు ఎక్కడున్నదో.. నేను ఆమెని   పెట్టుకున్న తొలి ముద్దు ఇంకా నాకు గుర్తున్నది..ఆమెకి గుర్తున్నదో లేదో.. నా బాల్యం నించి ఇప్పటివరకు జరిగిన సంఘటనలన్నీ గుర్తుకుతెచ్చుకుంటూ నిద్ర బోకుండా నన్ను నేను కాపాడుకుంటున్నాను. రాత్రి యేడు గంటలకు ఇడ్లీ వచ్చింది.చేతులకు కొంచెం స్పర్శ వచ్చింది.స్పర్శ తెలుస్తున్నది. అతి కస్టం మీద ఇడ్లీ నోట్లో పెట్టుకున్నాను .విషంలా ఉన్నది.. అవును..నేను బ్రతకాలి..నేను బ్రతకాలి.. ఇంకా రాయాల్సింది చాలా ఉన్నది. నేను బ్రతకాలి..నేను బ్రతకాలి.. దాదాపు రెండు గంటలు కస్టపడి మూడు ఇడ్లీలు తిన్నాను.. నా ఆలోచనలన్నీటి అంతిమలక్ష్యం..ఒక్కటే నేను రాయాల్సింది చాలా ఉన్నది. నేను బ్రతకాలి..నేను బ్రతకాలి..నేను బ్రతకాలి.. అప్పుడే నేను చచ్చిపోకూడదు.. ..................... నేనున్నది ఏ ప్రదేశంలోనో చెప్పలేను.చుట్టూ కనుచూపుమేర అంతా దేదీప్యమానమయిన వెలుతు మనుషులంతా ఆకాశంలో ఎగురుతున్నారు పక్షుల్లా..నేను అక్కడే దూరంగా  తలమీద తెల్లటివస్త్రం కప్పుకున్న మనిషి దెగ్గిరకు వెళ్ళి అడిగాను.."నేనెక్కడున్నాను? ఆ మనిషి తలమీది వస్త్రాన్ని తీసి పలకరింపుగా నవ్వాడు.ఆయన మానాన్న.  చుట్టూ కనిపించే మనుషులంతా తెల్లటి వస్త్రాలే ధరించి ఉన్నారు.అక్కడ మరే రంగు అన్నది కనిపించటం లేదు. అలాంటి తెల్లటి వస్త్రాల గుంపు మధ్య నుంచి వడివడిగా నా దెగ్గిరకు వచ్చి..నా వైపే ప్రేమగా చూస్తూ అడిగింది మా అమ్మ .."ఎలా ఉన్నావు నాయనా? అంతులేని జీవకళ ..రక్తం ముఖంలోకి ఎగజిమ్ముతున్నట్టు ఆమె ముఖంలో ఎంతటి కళో చెప్పలేను. నాతో పాటు జిల్లా పరిషత్ హై స్కూల్ వల్లభి లో చదివిన నా స్నేహితులు కూడా ఉన్నారు.  నేను ఏదో అనబోయేంతలో ..నా చుట్టూ అందరూ ఓ గుంపుగా తయారయ్యారు..ఎప్పుడో చనిపోయిన నా పెదనాన్నలు నా చిన్నాన్నలు..కొనకంచి వంశంలో ఉన్న నాకు పరిచయం ఉన్నవాళ్లు పరిచయం లేని నాముందుతరాలవాళ్ళు.. ఎందరో వచ్చి నన్ను పరామర్శిస్తూ నా చుట్టూ గుమిగూడుతున్నారు. ఆ ఎప్పుడూ చూడని పరిచయంలేని ఆ సమూహాన్ని చూసి..నాకు నోటమాటరాలేదు. నాకు ఒకపక్క ఓక సమూహం..మరోపక్క మరో సమూహం..వాళ్లంతా ఎవరో నాకు అర్ధ కాలేదు " వీళ్ళంతా ఏవరు అమ్మా.." "అర్ధంకాలేదా..?నవ్వేసింది. వీళ్ళంతా నీకు ముందు ఈ భూమి మీద పుట్టినవాళ్లు.నీకు ముందు తరాల పెద్దలు..నువ్వు కాల గమనంలో పుట్టావు..."వాళ్ళంతా నా పూర్వీకులు.నిజమా? ..నాముందుతరాల పెద్దలు ఇంత మందా? నిజమా? .అందులో నాకు పరిచయమున్నది మా నాన్న తాత మాత్రమే.. నాకు తెలియకుండానే నా కళ్ళు ధారాపాతంగా వర్షిస్తున్నాయి..అందరికి..నా ముందుతరాల నా పూర్వీకులకు ముకుళిత హస్తాలతో నీళ్ళునిండిన కళ్లతో నమస్కరించాను.ఇప్పుడు నాకు మరో పక్కన ఉన్న సమూహాన్ని చూసి ఉలిక్కిపడ్డాను.. అక్కడ నేను కూడా ఉన్నాను.అక్కడ కనిపించే నా భార్య పిల్లలతో పాటు..నా కోడళ్ళు మనుమళ్ళతో పాటు నాకు పరిచయమంటూలేని లెక్కలేని సమూహం. "ఎవరమ్మావీళ్ళు.."అడిగాను మా అమ్మని  "వీళ్ళంతా.. నువ్వు...నీ తరువాతి నీ భవిష్యత్తరాలవాళ్ళు..రేపు నీతరువాత నీ వారసత్వాన్ని తీసుకోని నీ ఇంటిపేరు మోస్తూ భవిష్యత్తులో రాబోయే నీ ముందు తరాలవాళ్ళు ..." నాకెందుకో ఏడుపు తన్నుకొచ్చింది..భోరుమని ఏడుస్తూ కూలబడ్డాను.  "ఇంతకూ నేను ఎవరిని అమ్మా.."అడిగాను ఈ మహా  సృష్టిలో  నువ్వు ఎవరివీ కాదు..ఓ చిన్న బిందువులో లక్షో వంతువి కూడా కాదు.."  మా అమ్మ నాకు చెప్పిన మాటలని విని కొయ్యబారిపోయాను..మేము చాలా గొప్పవాళ్లం ..మేము మేధావులం..మేము సర్వజ్ఞులం మేమే గొప్ప అనే విర్రవీగుతూ సాటిమనుషులని అవమానపరుస్తూ హింసిస్తూ చంపేసే రకరకాల మనుషులకి ఈ సత్యం ఎందుకు అర్ధం కాదో..  హటాత్తుగా నావైపు చూసుకున్నాను.నా ఒంటిమీద నూలుపోగు కూడా లేదు నగ్నంగా ఉన్నాను.మా అమ్మ నవ్వింది.."నామనసులోని భావాన్ని పసికట్టినట్లు అన్నది.ఇక్కడికి ఎంతటి గొప్పోడు అయినా నూలుపోగుకూడా లేకుండా నగ్నంగా రావాలసిందే.." నేను ఆబగా ఆత్రంగా సంపాయించిన వేమీ నాతో రావా...అయ్యో... అయ్యో ఎంత బాధాకరం. హటాత్తుగా నా శరీరం మంచంలో ఎగిరి పడింది.శరీరంలో అటూ ఇటూ కాళ్లజెర్రులు పరుగెడుతున్నట్టయ్యింది. అతి కస్టం మీద కళ్ళు తెరిచి చూశాను.నలుగురు డాక్టర్లు నావైపే ఆదుర్ద్గాగా చూస్తున్నారు.నా శరీరానికి తగిలించి ఉన్న హార్ట్ బీట్ మిషన్ శబ్దం వినిపిస్తున్నది మళ్ళీ .మళ్ళీ కళ్ళు మూతలు పడిపోయాయి.. "సెకండ్ స్ట్రోక్..హీ ఈజ్ అవుట్ ఆఫ్ డేంజర్..బయట ఉన్న పేషంట్ వాళ్ళకు చెప్పండి.  డాక్టర్లు మాట్లాడుతున్న మాటలన్నీ నాకు వినవస్తున్నాయి. ఏ మనిషికయినా మూడు స్టేజులు ఉంటాయి..కాన్షస్..సబ్కాన్షస్.. అన్ కాన్షస్.. ఇంతకుముందు నేను చూసిందంతా ఎక్కడ ? అమ్మ.. నాన్న.. చుట్టాలు.. స్నేహితులు..నాకంటే ముందు చనిపోయిన వాళ్ళంతా ఎందుకు కనిపింఛారు.. నిజంగా నేను చనిపోలేదా?ఇంకా నేను బ్రతికేఉన్నానా? నేను చచ్చిపోకూడదు..నేను ఆస్సలు చచ్చిపోకూడదు.  నేను బ్రతకాలి ..నేను బ్రతకాలి నేను. ఇంకా రాయాల్సింది చాలా ఉన్నది.  .....  నేను కళ్ళుతెరవటం చూసి అయ్ సీ యూ డ్యూటీ డాక్టర్  వచ్చాడు. నా కళ్లల్లోకి లైటువేసి కనుపాపలని పరిశీలించాడు..అన్ని పరీక్షలు చేశాక నా పరిస్థితి సంత్రుప్తికరంగా అనిపింఛాక నన్ను వార్డ్ కి షిఫ్ట్ చేయమని సిస్టర్స్ కి చెప్పాడు. ........  ప్రాణాపాయంలోంచి బయటపడ్దాక..నేను కళ్ళు తెరవగానే నేను అనుకున్న మొదటి మాటలు.."ఈ ప్రపంచాన్ని మరికొన్నన్నాళ్ళు ప్రేమించటానికి భగవంతుడు నాకు మరో..రెండో అవకాశాన్నిచ్చాడు. నన్ను చూడటానికి ఝాన్సి పిల్లలు లోపలికి వచ్చారు. "ఎలా ఉన్నది..?"అడిగింది ఝాన్సి.. "ఫరవాలేదు...." మళ్ళీ స్ట్రోక్ వచ్చిందట రాత్రి..తెలుసా.." తల ఊపాను నిజమే అన్నట్లు."నాకు తెలీయకుండా స్ట్రోక్ ఎలా వస్తుంది?" అరగంట తరువాత నన్ను వార్డ్ రూంలోకి షిఫ్ట్ చేసారు. ఫరవాలేదు నేను బ్రతికానన్న మాట.. నేను చనిపోలేదన్న మాట.. నాకు బాత్ రూంకి పోవాలనిపించి ఝాన్సిని పిలిచాను.ఆమె బాయ్ అనిపిలిచేంతలో నేను లేచి కూచున్నాను మంచమ్మీద .. నేను లేచికూచోవటాన్ని చూసి ఝాన్సి దిగ్భ్రమగా నమ్మలేనట్లు చూసింది .."నువ్వే నన్ను బాత్రూంకి తీసుకుపో.."అంటూ బాత్రూం వరకు ఆమెభుజం మీద చెయ్యివేసి ఒక్కొక్క అడుగే నడిచాను ఏడాది పసిబాలుడు నడవటం ఎలా నేర్చుకుంటాడో నేను కూడా అంతే.. ఆమె సహాయంతో ఒక్కొక్క అడుగే వేస్తూ బాత్రూంకి వెళ్ళి వచ్చాను.. ఇది నా మొదటి విజయం.. నేను మళ్ళీ నడవగలుగుతున్నాను చాలా వేగంగా రికవరీ..తల..మెడ కింది భాగమంతా చచ్చుబడ్డట్టయ్యి..మెడ కింద ఏ భాగమూపని చెయ్యకుండాపోయినటువంటివాడిని..నలభయ్ గంటల తరువాత ఒక్కొక్క అడుగే వేయగలగటం మామూలు విషయం ఎలా అవుతుంది?  సాయంత్రం వచ్చిన డాక్టర్ కి నేను ఆరోజు మూడు సార్లు బాత్ రూంకి నా భార్య సహయంతో నడిచి వెళ్ళివచ్చాను అని చెప్పగానే నమ్మలేనట్లుగా చూశాడు."గుడ్ ప్రొగ్రెస్స్..రికవరీ అవుతున్నారు స్లోగా" మళ్ళీ రొటీన్ చెకప్ లు అయ్యాక మరో మూడు రోజులతరువాత లక్ష నలభయ్ వేల బిల్లు కట్టి ఇంటికి వచ్చాము. ........    వృద్దాప్యానికి సొంత వ్యక్తిత్వం అంటూ ఉండదు.వ్యక్తిత్వం ఉన్నవాళ్ళకి కూడా వ్యక్తిత్వాన్ని ఏమాత్రం మిగల్చని దశ వృద్దాప్యం  ఏ వ్యక్తిత్వం అంటూలేని దౌర్భాగ్య నిర్భాగ్య దశ వృద్దాప్యం.  తనకు ఇస్టమైందేదీ తనకు దొరకదు.తనకు కస్టమైనదేదీ తనను వదలకుండా వదలదు.ఎవరో వండిపెట్టాలి.ఎవరో తెచ్చిపెట్టాలి. ఈ దశలో మనిషి పరాధీనమైపొతాడు.  ......  దాచుకోవటానికంటూ..నాకంటూ ఏమీ లేదు.. చెప్పుకోవటానికంటూ.. నాకంటూ ఏమీ లేవు..కొనకంచి అనే మానవాకారం పేరు తప్ప ఇప్పుడేమీ లేవు నా దగ్గిర. జస్ట్.. నాలుగు రోజుల్లో నేను ఏమీ లేని బికారి గా మారిపోయాను.  అకస్మాత్తుగా నేను ఒంటైవాడినయిన ఫీలింగ్..నాచుట్టూ ఉన్న మనుషులందరూ ఎవరిపనులు వాళ్లు చేసుకుంటూ అందంగానూ ఆనందంగానూ హాయిగా బ్రతుకుతున్నారు.. కాని నేను మాత్రం.. కానీ నేను మాత్రం.. అకస్మాత్తుగా ఇలా అన్ని అంగాలున్నా కూడా అంగవికలమయినట్టు..ఏ పని చేసుకోలేకపోవటం..మంచానికే పరిమితమయిపోవటం.. చుట్టూ ఉన్న ఆరోగ్యవంతమైన మహా ఐశ్వర్యంతో విర్రవీగుతున్న మనుషుల మధ్య అనారోగ్యపు కటిక బీదరికంతో బ్రతకటం కన్నా ఇంకేం దౌర్భాగ్యం కావాలి ఏ మనిషికయినా..? గెలవాలి..గెలవాలి.. రాయాలి రాయాలి.   ఓ వారం రోజులయ్యాక నేను లాప్ టాప్ని తెరిచాను.. కొద్దిసేపు చూస్తే చాలు తలలో హోరు మొదలయ్యింది.అలా కొద్దిసేపు చూస్తే వాంతి వచ్చినట్టనిపించి కంప్యూటర్ ని మూసేశాను. అన్నం తినలేను ..తిన్న అన్నం జీర్ణం చేసుకోలేను.. చెకప్ కి వెళ్ళిన ప్రతిసారీ ఇంకా నువ్వు బ్రతికే ఉన్నావా అన్నట్టు చూసేవాడు డాక్టర్..ఇవే కాక అనేక రకాల కాప్లికేషన్స్ బయట పడ్డాయి.. అయినా నేను ఏమీ భయపడలేదు.పదిరోజులయ్యాక హాస్పిటల్ లో డాక్టర్ చూపెట్టిన ఫిజియో థెరపీ ఎక్సర్సయిజులుచెయ్యటం మొదలు పెట్టాను.మొదటి రోజు ఇరవయ్ డుగులు వేసే సరికి ఆయాసం వచ్చి కూలబడేవాణ్ణి.  రోడ్డు మీదకు వెళదామంటే ఎక్కడ పడిపోతానో అనే భయం..రెండునెలలు గడిచాక మంగపేట వెళ్ళాను .అక్కడ నాకు అసలు పరీక్షని నేనే విధించుకున్నాను. మంగపేట పల్లెటూరు కాబట్టి నేను అందరికీ తెలుసు .ఎక్కడన్నా పడిపోయినా అందరూ నన్ను గుర్తు పడతారు. అక్కడ రోజూ ప్రాణాలుగ్గ బట్టుకోని  నడవటం పారంభించాను..  నన్ను నాలోపలి కవి..రచయిత అస్సలు నిద్రబోనివ్వటల్లేదు. నాకు తెలియని కాలిబాటల్లో నడవటం నేర్చుకున్నాను.ఒక్కొక్క దారిలో నడుస్తున్నప్పుడు ఒక్కొక్క అనుభూతి.  ......  కాలానికి ఎదురొడ్ది నిలుచున్న మనిషి రాసే ఆత్మ..పరాత్మకత్వమే కవిత్వం.. కాల ఖడ్గానికి ఎదురొడ్డి నిలుచున్న మనిషి అంతర్గత సముద్రఘోష అక్షరాల రూపంలో..  ప్రపంచం కోసం ఉప్పెనలా ఉప్పొంగి రావటమే కవిత్వం.. ........................................................... ఇవి నేను రాసిన మొదటి మాటలు ఆరునెలల తరువాత. .................................................................. ఆరు నెలలు గడిచినా కూడా నేను మళ్ళీ మామూలు మనిషిని కాలేదు ఇకముందు కాను అనికూడా అన్నది నాకు అర్ధమయ్యింది.. ఎటొచ్చీ రోజులని లాక్కు రావాలి.నాకవిత్వాన్ని అభిమానించే వ్యక్తులకోసమన్నా నేను మళ్లీ రాయాలి. కొద్దిసేపు ఆలోచించి రెండు వాక్యాలు రాసాక తప్పని సరి అయిపోయి రాయటం మానేసివాడిని . మళ్ళీ రెండు గంటలతరువాత మళ్ళీ రాసేందుకు ప్రయత్నించటం.. ఇలా మరో వారం రోజుల  తరువాత నేను మొట్ట మొదటిసారి కొత్త కవితని ఒక్క రోజులో పూర్తిచేయగలిగాను.. .ఆరు నెలలతరువాత మొట్ట మొదటి కవిత రాయగలిగాను. నా ఆనందాన్ని ఆ క్షణంలో చెప్పుకోవటానికి..ఈ భూమి మీద ఒక్క మనిషంటూలేడు .ఉన్నవాళ్ళు నా ఎమోషన్ని పంచుకోలేరు.నేను కూడామనసు విప్పి వాళ్లకి చెప్పుకోలేను. "ఈ ప్రపంచంలో ఎవరూ ఒంటరివాడు కాదు కాని రచయితని మించిన ఒంటరివాడు ఎవరూ ఉండరు." ఓ అరగంట తరువాత వెనక్కు వచ్చి కంప్యూటర్ ముందు కూర్చున్నాను.. నేను మొట్టమొదటి సారి రాసిన కవిత 1977 లో వరంగల్ నించి వచ్చిన "జనధర్మ" అనే పత్రికలో అచ్చయ్యింది.అప్పుడు నేను మహా ఆనందం పొంది ఉంటాను.రెండోసారి జ్యోతి మాసపత్రిక లో1980లో రివెంజ్ అనే కథ ప్రచురించబడ్డప్పుడు ఆనందపడి ఉంటాను. ..ఆతరువాత ఎన్ని కథలు రాసినా, కవితలు రాసినా కూడా రాయటం అనేది మామూలు వ్యాపకం అయిపోయింది.రాయటం అనేది ఒక అలవాటు గా మారిపోయింది.అంతే.  మళ్లీ ఆనందపడ్డ క్షణమంటూ ఉంటే నా మొట్టమొదటి నవల "యజ్ఞం"పల్లకి వారపత్రికలో సీరియల్ గా వచ్చి..నవలగా మారినప్పుడు సంతోష పడి ఉంటాను.  ఇరవై సంవచ్చరాల సుదీర్ఘ విరామం తరువాత రాసిన "మంత్రలిపి..నేనేమీ మాట్లాడను" ఇవి అన్నీ నన్ను ఆనందపరిచినాకూడా..అవి ఏవీ ఇప్పుడు నేను రాసిన కొత్త కవిత ఇచ్చిన ఆనందానికేమీ సరిపోలవు.  నేను ఈ కింద రాసిన కవితని రాసాక పడ్డ ఆనందాన్ని కొలవటానికి ఖచ్చితంగా ఏ కొలమానమూ సరిపోదు.  ............................................ ఇక వేగంగా రాయటం ప్రారంభించాను వేగం కూడా కాదు అది.కవిత్వాన్ని రాయటంలో అతి వేగం అనొచ్చు.. నేను హాస్పిటల్ లో పడ్దది.. 9-12-2016..హార్ట్ స్ట్రొక్ తో.. బ్రైన్ స్ట్రోక్ 16-12-2016...  జూన్ 2017 వరకూ నేను సరిగ్గా రాయలేకపోయాను.ఆతరువాత రాయటం ప్రారంభించాను. చాలా వేగంగా రాయటం అనే పదాన్ని నేనెందుకంటున్నానంటే..నేను ఎన్నాళ్ళు బ్రతుకుతానో నాకే తెలీయదు కాబట్టి యేడాదిలో జూన్ 2017 నించి ఆగస్ట్ 2018 వరకల్లా దాదాపు వెయ్యి పేజీల కవిత్వాన్ని రాసాను. ఇప్పుడు ఆ కవిత్వాన్నంతా పుస్తకరూపంలోకి తీసుకొస్తున్నాను."ధ్వంసధ్వని"..మొదటి సంపుటి.. "పునర్ముఖం" రెండో సంపుటి. "మీరొకప్పుడు బ్రతికుండే వారు" మూడోది... ఇక వరసగా వస్తాయి.. ఇదంతా నేను ఎందుకు రాస్తున్నానంటే నేను చేసిన పోరాటాన్ని గ్రంధస్థం చేయాలనుకోవటంతో పాటు.. హాస్పిటల్ లోఉన్న నా చావు వార్త కోసం ఎదురుచూసిన వాళ్ళున్నారు మహాకవులు..పర్వర్టెడ్ మేధావులు. కవులను  ప్రోత్సహిస్తానని  చెప్పుకునే మేధావి గారొకాయన నేను పోయానని తెలిసిన మరుక్షణం ఓ స్మారక అవార్డ్ కూడా పెట్టి చందాలు పోగుచేసుకోని సామాజిక సేవచేసేందుకు ..నా చావు మీద కూడా యాపారం చేసుకునేందుకు సన్నాహాలు చేసుకున్నాడు. మరి అలాంటప్పుడు ఇవన్నీ తెలిసాక నా మానసిక స్థితి ఎలా ఉంటుందో మీ ఊహకే వదిలేస్తున్నాను.. అందువల్లే..ఈ కారణాలవల్లే ..మరింత కసిగా యేడాదిలో వెయ్యిపేజీల కవిత్వాన్ని రాయటం జరిగింది. ఇది విజయమో..అపజయమోకాని..నేను నా పుస్తకం "నేనేమీ మాట్లాడను"రాసాక తెలుగు కవిత్వంలో ఉన్న మాఫియా నగ్న స్వరూపం..రోగిస్టిమారులైన కవుల విక్రుతత్వాన్ని చాలా చూశాను. అవేంటో సవిస్తరంగా వచ్చేపుస్తకం లో రాస్తాను. నాకూ ఇలా మళ్ళీ మీ ముందుకు వచ్చే అవకాశాన్ని ఇచ్చిన ఆ దేవదేవుడికి..సరస్వతీ దేవికి..ఈ దేశానికి..నమస్కరిస్తున్నాను. నా కవిత్వాన్ని అభిమానించే మీ అందరికీ కృతజ్ఞతలు  చెప్పుకుంటున్నాను. భారత దేశం వర్ధిల్లాలి......
  • దివంగత నేత కరుణా నిధి. గొప్ప రచయిత . దాదాపు 75 సినిమాలకు  కథ,మాటలు  రాశారు . అయితే  ఎపుడూ ఊహించని సన్నివేశం నిజ జీవితంలో ఆయనకు ఎదురైంది .ఒక రచయితగా కూడా అలాంటి సన్నివేశం ఆయన రాసి ఉండరు. ఒక తండ్రిగా అసలు ఊహించే ఉండరు.  రాజకీయ ప్రస్థానంలో కరుణానిధి ఢక్కా మొక్కీలు  తిన్నారు .  ఎన్నో చేదు అనుభవాలనూ ఎదుర్కొన్నారు. ఎన్నో సార్లు జైలుకి వెళ్లారు .  తను జైలుకు వెళ్లడం ఒక ఎత్తు అయితే, ఆయన కూతురు జైలుకు వెళ్లడం కరుణ జీవితంలో అత్యంత విషాదకరమైన అంకం. 2జీ స్కామ్‌లో కరుణ కూతురు  కనిమొళి జైలు పాలు అయిన సమయంలో ఆయన ముఖ్యమంత్రిగా ఉండి కూడా అశక్తుడయ్యాడు. తీహార్ జైల్లో తన కూతురును  కనీస సౌకర్యాలు అందుబాటులోలేని  ఖైదీగా  చూసి ఆయన బరస్ట్ అయ్యాడు. పరామర్శకు వెళ్లిన కరుణ తండ్రి హృద‌యం తట్టుకోలేకపోయింది. కన్నీళ్ల పర్యంతమయ్యారు. అప్పటికి ఆయన వయసు 87 సంవత్సరాలు.  జైలు నుంచి  హోటల్ కి తిరిగి వచ్చిన  కరుణ మౌనంగా ఉండిపోయారు. కూతురు పరిస్థితి చూసి తండ్రి గా ఆయన డిస్టర్బ్ అయ్యాడని కాంగ్రెస్ నేతలకు సమాచారం అందింది. వెంటనే అప్పటి హోమ్ మినిస్టర్ చిదంబరం హుటాహుటిన కరుణ ను వచ్చి  కలిసారు. 2011 లొ ఇది జరిగింది .   దాదాపు అరగంట పాటు అక్కడే  ఉండి పెద్దాయనను బుజ్జగించారట. చిదంబరాన్ని చూసి కరుణ తొలుత మండిపడ్డారట .  తమాషా ఏమిటంటే కొంచెం అటు ఇటుగా చిదంబరం అదే పరిస్థితిని ఎదుర్కొన్నారు. ...
  • గోబెల్స్ ప్రచారం!    ఈ మాట తరచుగా రాజకీయాల్లో మనకు వినబడుతుంటుంది. అసత్యాలు చెప్పడం,లేని దాన్ని ఉన్నదానిగా చూపించడం గోబెల్స్ ప్రచారం అంటారు .  హిట్లర్ అనే నియంతను దేవుడిగా ప్రచారం చేయడానికి గోబెల్స్  ఎలాంటి ప్రచారం చేశాడో  కానీ.. ఉన్నవీ లేనివీ కల్పించి, అభూత కల్పనలను జోడించి... పాలకులు మహానుభావులంటూ వక్ర ప్రకటనలతో ప్రజల మెదళ్లకు తుప్పు ఎక్కించే ప్రచార ప్రయత్నాలకు ‘గోబెల్స్ ప్రచారం’ అనే పేరు మాత్రం స్థిరపడిపోయింది. ఒక వాదనని సృష్టించడంలోనూ,దానిని ప్రచారం చేయడం లోను దానికి  ఒక గొప్పదనం  కల్పించడంలో గోబెల్స్ ప్రతిభా వంతుడు.నలుపుని తెలుపని చెప్పగలడు. మేకను గొర్రెగా...  గొర్రెను  గోవుగా తన ప్రచారంతో మార్చేయగలడు.  తన ప్రచార విధానాలతో నమ్మించ గలడు . ''ఒక చిన్న అబద్ధాని  కంటే పెద్ద అబద్ధానికి విశ్వసనీయత ఉంటుంది ''అన్న హిట్లర్ సూక్తిని గోబెల్స్ విస్తృత పరచి ' మనం రాజ నీతిజ్ఞుడిగా నైనా బతికి చావాలి,లేదా ఓ దుర్మార్గుడిగా నైనా చచ్చి బతకాలి.కానీ చరిత్ర మనల్ని మరచి పోకూడదు '' అని గోబెల్స్ అన్నట్టుగా చరిత్ర చెబుతోంది.  ఇంతకీ ఏవరీ గోబెల్స్  ??  వివరాల్లోకెళ్లి  చూస్తే ...   పౌల్ జోసెఫ్ గోబెల్స్ 1897లో జర్మనీలోని బెర్లిన్ లో జన్మించాడు.బాల్యంలో పోలియో వచ్చింది . మనిషి సన్నగా పొట్టిగా ఉండే వాడు.అంగ వైకల్యంతో ఆత్మ న్యూనతా భావంతో ద్వేషం పెంచు కున్నాడు. అయితే చదువులో మాత్రం ముందుండేవాడు . హేడెల్ బర్గ్ నుంచి ఫిలాసఫీ లో పట్టా పట్టా పుచ్చుకున్నాడు.  తన నెగటివ్ ఆలోచనలతో  ఎదుటి వారిని క్రమంగా ప్రభావితం చేయడంలో దిట్ట. మొదటి ప్రపంచ యుద్ధంలో చేరడానికి వెళ్తే సైనిక అధికారులు అతగాడిని ఎగతాళి  చేశారు.తనలో అంతర్లీనంగా ఉన్న కసి,నేతకు నచ్చినదే రాయడం తో పై అధికారులకు దగ్గరయ్యాడు.ఉత్తర జర్మనీ పార్క్ ఉన్నత నాయకుడు గ్రెగర్ స్ట్రాసార్ కింద కోశాధికారిగా పని చేసి మన్నలను పొందాడు.తరువాత హిట్లరు వద్దకు చేరి ఆయన అభిమానాన్ని సంపాదించాడు . పార్టీని బలోపేతం చేయడంలో హిట్లరుకు మద్దతు కూడగట్టటంలో విజయం సాధించాడు. గోబెల్స్  ప్రతిభను గమనించిన  హిట్లర్ మొత్తం జర్మనీకి ప్రచార వ్యవ హారాలు చూసే భాద్యత అప్పగించాడు. గోబెల్స్ నాజీల పార్టీలకు చెందిన పత్రికలకు సంపాదకుడిగా పని చేశాడు.హిట్లర్ ఒక్కడే వామ పక్షాల వాదుల నుండి,యూదుల నుండి సమస్యల నుండి గట్టెక్కించగల అవతార పురుషుడన్నాడు.1933లో ప్రచార శాఖకు గోబెల్స్ ను  మంత్రిగా చేశాడు.గోబెల్స్ తన ఆధీనంలోకి వచ్చిన పత్రికలు,రేడియో,నాటక రంగం,సినిమాలు,సాహిత్యం,సంగీతం,లలిత కళలు అన్నిమాధ్యమాలను గరిష్ట స్థాయిలో ఆడుకుని  అసత్య ప్రచారంతో హిట్లరును అవతార పురుషునిగా చేశాడు.సోవియట్ సైన్యాలు జర్మనీలోకి చొచ్చుకొని వచ్చే వరకు తన వాగాడంబరతతో మోసగించి ప్రజల్ని పక్కదోవ పట్టించాడు.చివరికి 1945 ఏప్రిల్ 20న తన ఆరుగురు పిల్లలకు విషమిచ్చి చంపేశాడు తరువాత భార్య భర్తలు పరస్పరం కాల్చుకుని మరణించారు. మొత్తానికి   గోబెల్స్ తాను అనుకున్నట్టుగానే చరిత్ర కెక్కాడు.  ఇపుడు ఆ గోబెల్స్ ను ఆదర్శంగా తీసుకుని పలు పత్రికలు , వ్యక్తులు  గిట్టని వారిపై  వ్యతిరేక ప్రచారం చేస్తున్నారు. ...
  • (Susri Ram )   ఇంగ్లీషువాడు సప్తసముద్రాలు దాటి వచ్చేశాడు. ముందు వ్యాపారం చేయడానికి... తరువాత అధికారం చెలాయించడానికి.... వాడి భాష మనకి రాదు... వాడు "గాడ్ ఈజ్ గుడ్" అనేవాడు. మనకి అది "గాడిదగుడ్డు" గా అర్థమైంది. మనం "రాజమహేంద్రి" అన్నాం... వాడికి "రాజమండ్రి"లా వినిపించింది. మన మాట వాడికి అర్ధమయ్యేది కాదు... వాడి భాష మనకి బోధపడేది కాదు. వ్యాపారం, పరిపాలన వాళ్ల అవసరం కనుక తెల్ల అధికారులు ఒక్కొక్కరూ తెలుగు పదాలను పట్టుకున్నారు. డిక్షనరీలు తయారు చేశారు. 1818లో విలియం బ్రౌన్ తొలి తెలుగు - ఇంగ్లీషు డిక్షనరీ తయారుచేశాడు. 1821లో క్యాంప్ బెల్ ఇలాంటిదే ఇంకో నిఘంటువు తయారుచేశాడు. మన మాటలు వాడికి అర్థమయ్యాయి. కానీ వాడి మాటలు మనకి అర్ధం కావాలి కదా. అవసరం వాడిది. అందుకే జాన్ కార్నిక్ మారిస్ అనే వాడు ఇంగ్లీషు తెలుగు డిక్షనరీ తయారు చేశాడు. ఆ తరువాత సీ.పీ. బ్రౌన్ దొర ఇంకో డిక్షనరీ 1852 లో (ప్రథమ స్వాతంత్ర్య సంగ్రామానికి సరిగ్గా అయిదేళ్ల ముందు) తయారు చేశాడు. చాలా మంది తెల్ల అధికారులు దుబాషీలను పెట్టుకున్నారు. దుబాషీలంటే ద్విభాషీలు. అటుది ఇటు ఇటుది అటు వివరించి చెప్పగలవారు వీరు. కానీ అందరికీ అంత దృశ్యం ఉండేది కాదు. వీళ్లు ముక్కస్యముక్కానువాదం చేసేవారు. గుడిమెట్ల బంగారయ్య అంటే ..... Temple steps golden father అని.. పత్తికొండ నాగప్ప అంటే cotton mountain cobra father అని  తోటకూర అంటే Garden to come అనీ చిత్ర విచిత్రంగా అను"వధించే" వారు. అలాంటి సమయంలో తెల్లోడి భాషను తెల్లోడి కన్నా తేటతెల్లంగా నేర్చుకుని, ధారాళంగా మాట్లాడేయడం అంటే మాటలు కాదు. ఇంకా ఇంగ్లండుకు పోయి ఉన్నత విద్య నేర్చుకోవడం వంటివి అలవాటు కాలేదు. అలాంటి రోజుల్లో తెల్లోడే తెల్లబోయేలా ఇంగ్లీషు మాట్లాడే వాడికి బోలెడంత డిమాండ్ ఉండేది. అలాంటి వాడే మన నాయకుడు. ఆయన పేరు పావులూరి శంకరనారాయణ శ్రేష్ఠి. సొంతూరు నెల్లూరు. కానీ మద్రాసులో స్థిరపడ్డారు. తండ్రి రామానుజం చెట్టి నుంచి ఇంగ్లీషు నేర్చుకున్నారు. తండ్రిలాగానే దుబాషీ అయ్యారు. తండ్రి గంజాంలో రస్సెల్ అనే తెల్లదొరకు దుబాషీగా పనిచేసేవాడు. ఈయన విజయనగరం మహారాజా, జయపురం మహారాజా, పిఠాపురం, కొచ్చి, నూజివీడు జమీందారీ కుటుంబాల పిల్లలకు ఇంగ్లీషు చదువులు చెప్పారు. ఆ తరువాత మద్రాసు ప్రెసిడెన్సీ కాలేజీలో లెక్కల మేస్టారుగా పనిచేశారు. మద్రాసు విశ్వవిద్యాలయంలో పరీక్షాధికారిగా కూడా పనిచేశారు. అంటే తన జీవిత కాలంలో ఆయన తమిళనాడు రాజధాని మద్రాసు, ఒరిస్సాలోని గంజాం, జయపురం, మన రాష్ట్రంలోని విజయనగరం, పిఠాపురం, నూజివీడు, నెల్లూరు, కేరళలోని కొచ్చి లను సందర్శించాడన్న మాట. ఆ రోజుల్లోనే ఆయన ఉద్యోగాల కోసం ఊరు వదలిన మహాసాహసి అంటే అడ్వెంచరర్ అన్న మాట. రాచబిడ్డలకు చదువులు చెబుతున్నప్పుడే ఆయన వారి సౌలభ్యం కోసం ఇంగ్లీషు పదాలు, వాటి తెలుగు అర్థాల జాబితాను తయారు చేశారు. తరువాత దాన్నే వ్యవస్థీకరించి తెలుగువాడు తయారు చేసిన తొలి ఇంగ్లీషు తెలుగు డిక్షనరీని తయారు చేశారు. అంతే కాదు ... ఆయన తమిళ - ఇంగ్లీషు, ఇంగ్లీషు - తమిళ డిక్షనరీలను కూడా తయారు చేశారు. 1900 ప్రాంతంలో తెలుగు - ఇంగ్లీషు డిక్షనరీ కూడా తయారు చేశారు. తన అవసరం కోసం ఇంగ్లీషు వాడు తయారు చేసినవి కాకుండా మన అవసరం కోసం మనవాడు తయారుచేసిన మొట్టమొదటి డిక్షనరీలు ఇవేనేమో! ఆయన తయారుచేసిన తెలుగు డిక్షనరీ 1897లో ప్రచురితమైంది. దాని పేరే శంకరనారాయణ డిక్షనరీ. అప్పటి నుంచీ ఇంగ్లీషు నేర్చుకోవాలనుకున్న వారందరికీ శంకరనారాయణ డిక్షనరీయే ఆధారమైంది. అందరికీ ఆధునిక వేదమైంది. ఆయన బతికుండగానే అయిదు ముద్రణలకు నోచుకుంది. ప్రతి ముద్రణకీ కొత్త పదాలు జోడయ్యాయి. ఆయన 1924-25 ప్రాంతంలో చనిపోయారు. ఆ తరువాత 1927 లో గిడుగు సీతాపతి గారు, 1951 లో చిలుకూరి నారాయణ రావు గారు, తరువాత వేదం లక్ష్మీనారాయణ గారు కొత్తకొత్త పదాలను జోడించారు. 1953 లో నారాయణ అయ్యర్ దీనిని పరిష్కరించారు. ఇలా 1897 నుంచి 1953 వరకూ పదకొండు సార్లు పునర్ముద్రణ పొందింది ఈ డిక్షనరీ. కోస్తా జిల్లాల్లో ఇప్పటికీ ఈ డిక్షనరీయే ప్రామాణికం. తరతరాల విద్యార్థులకు ఇది హస్త భూషణంగా నిలిచింది. అనుమానం వస్తే చాలు ఆ పుస్తకం తీస్తారు. అంత ప్రజాదరణ ఉంది ఈ డిక్షనరీకి. 2004 అక్టోబర్లో విజయవాడకు చెందిన విక్టరీ పబ్లిషర్స్ దీన్ని మళ్లీ ముద్రించారు. ఆగస్టు 2005 నాటికి మలి ముద్రణ అవసరమైంది. మళ్లీ 2006, 2007లలో పునర్ముద్రించాల్సి వచ్చింది. ఈ నిఘంటువు ప్రజాదరణకు ఇదే నిదర్శనం. కోస్తా, తమిళనాడుల్లో ఆంగ్ల భాష నేర్చుకోవడంలో ఆయన పాత్ర అనన్యసామాన్యం. ఆయన పేరుతోనే ఆయన వ్రాసిన డిక్షనరీ పేరొందింది. ఇప్పటికీ శంకరనారాయణ డిక్షనరీ అంటే ప్రామాణికమే. పావులూరి శంకరనారాయణ శ్రేష్ఠి ఇప్పుడు లేరు. ఆయన పోయి దాదాపు తొంభై ఏళ్లు దాటింది. కానీ లక్షలాది మంది విద్యార్థులు ఆంగ్ల పదం విషయంలో అనుమానం రాగానే "శంకరనారాయణను తీసి చూడు" అనుకుంటూ అప్రయత్నంగానే ఆయనను తలచుకుంటూనే ఉంటారు....
  • తెలుగు చిత్ర పరిశ్రమలో సాటిలేని మేటి నటుడు ఎస్వీ రంగారావు అంటే అతి శయోక్తి ఏమాత్రం కాదు.  ఆయన డైలాగ్‌లు పలికే విధానం, సంభాషణల ఉచ్చారణ, మాటల విరుపు, హావభావాలు మరెవరి తరంకావు. ఎంతటి మహా నటుడినైనా డామినేట్‌ చేయగల సత్తా, సామర్థ్యం ఆయన సొంతం. సావిత్రి, భానుమతి తప్ప ఆయనతో నటించాలంటే అలనాటి అగ్ర నటీనటులు భయపడేవారట. ఎన్టీరామారావు వంటి అగ్ర నటుడు సైతం ఎస్వీఆర్ తో నటించే సన్నివేశాల్లో జాగ్రత్త పడేవారట.  భయానకం, వీరం, రౌద్రం, కరుణ, శృంగారం, హాస్యం, శాంతం, బీభత్సం, అద్భుతం వంటి నవరసాలను అవలీలగా పలికించి అందరి మన్ననలు పొందిన మహానటుడు ఎస్వీ రంగారావు. ఏ పాత్ర అయినా ఛాలెంజ్ గా తీసుకుని  అందరి మెప్పు పొందిన నటసార్వభౌముడు ఆయన.  ఆయన అసలు పేరు సామర్ల వెంకట రంగారావు .   మూడు దశాబ్దాలపాటు మూడొందలకు పైగా చిత్రాలలో నటించి ఆయా పాత్రలలో మమేకమై జీవించిన  ఎస్వీ రంగారావు కృష్ణ జిల్లా నూజివీడులో కోటేశ్వరనాయుడు, లక్ష్మీ నరసాయమ్మ దంపతులకు 1918 జులై 3న జన్మించారు. తండ్రి ఎక్సైజ్ ఇన్‌స్పెక్టర్ కావడం వల్ల అనేక ప్రాంతాలకు వెళ్ళాల్సి వచ్చేది. దీంతో రంగారావు మద్రాసులో నాన్నమ్మ వద్దనే పెరిగారు.  ప్రాథమిక విద్యాభ్యాసం అక్కడే  పూర్తి చేసిన రంగారావు తొలిసారిగా మద్రాసు హిందూ హైస్కూల్‌లో తన పదిహేనో ఏట ముఖానికి రంగేసుకున్నారు. ఆ తరువాత నటనమీద ఉండే ఇంట్రెస్టుతో ఎక్కడ ఏ నాటక ప్రదర్శన జరిగినా అక్కడ వాలిపోయేవారు. నాన్నమ్మ ఏలూరుకు మకాం మార్చటంతో ఆమెతో పాటు వెళ్ళిన ఎస్వీఆర్ విశాఖలో ఇంటర్, కాకినాడలలో బీఎస్సీ పూర్తి చేశారు. ఆ తరువాత ఫైర్ ఆఫీసర్‌గా బందరు, విజయనగరం తదితర ప్రాంతాల్లో పనిచేశారు.  ఉద్యోగం చేస్తున్నా ఎస్వీఆర్‌కి నటనలో ఆసక్తి తగ్గలేదు. అడపాదడపా నాటకాలు వేస్తూనే వచ్చారు. ఆ తరం నటీనటులు అధికులతో ఎస్‌.వి.ఆర్‌.కి కళాశాల స్థాయిలోనే పరిచయాలున్నాయి.  ఈ క్రమంలో ఆయన బంధువొకరు తీస్తున్న "వరూధిని" చిత్రంలో నటించారు. ఆయన ఇందులో బాగానే నటించినా, చిత్రం విజయం సాధించకపోవటంతో అవకాశాలన్నీ వచ్చినట్లే వచ్చి వెళ్ళిపోయాయి. ఈలోపు మేనమామ కుమార్తె లీలావతితో ఆయనకు వివాహం అయ్యింది. ఆ తరువాత "మనదేశం, తిరుగుబాటు" లాంటి చిత్రాలలో చిన్నా చితక వేషాలు వేసినా... విజయా సంస్థ తొలి చిత్రం "షావుకారు"లో సున్నపు రంగడు పాత్ర ఆయన సినీ జీవితాన్ని మలుపుతిప్పింది. వెంటనే "పాతాళ భైరవి"లో మహా మాంత్రికుడి పాత్ర వెతుక్కుంటూ వచ్చింది. ఆ పాత్ర ఎప్పటికి  అజరామరమే.   'జై.. పాతాళభైరవి..', 'సాహసం సేయరా ఢింబక.. రాజకుమారి లభిస్తుంది.. వంటి డైలాగులతో ఆయన  ప్రేక్షకుల  మదిలో నిలిచి పోయారు.  ఆయన గంభీర స్వరం, మాటల్లోని ఈజ్, మాట విరవడంలో, అభినయంలో ఆయనకు ఆయనే సాటి. పౌరాణిక పాత్రలకు సరిపోయే ఆహార్యం, రాజసం, ఠీవి, దర్పం ఆయన సొంతం. ఏ పాత్రలోనైనా ఇట్టే  ఒదిగిపోయే  స్వభావంతో ఉండటం తో   మేటి నటుడిగా ఎదిగారు.  మాయాబజార్ లో " హై హై నాయకా " అంటూ ఘటోత్కచుడిగా అలరించారు .  "డోంగ్రే, గూట్లే.. మాట తప్పావ్, పచ్చి నెత్తురు తాగుతా" అంటూ కర్కశమైన రౌడీగా  కూడా ప్రేక్షకులను ఆకట్టుకున్నారు. ఇంకా  నరకాసురుడు, కంసుడు, రావణుడు, కీచకుడు, హిరణ్యకశిపుడు గా తనదైన శైలిలో నటించి  మెప్పించిన ఖ్యాతి ఆయనది.  ఆయనకు విశ్వనటచక్రవర్తి, నటసార్వభౌమ . నటసింహ అనే బిరుదులూ ఉన్నాయి. ఎస్వీ రంగారావు దర్శకత్వం వహించిన మొదటిచిత్రం 'చదరంగం' ద్వితీయ ఉత్తమ చిత్రంగా నంది అవార్డును, రెండవ చిత్రం 'బాంధవ్యాలు' తొలి ఉత్తమ చిత్రంగా నంది అవార్డును గెలుచుకున్నాయి. నర్తనశాల చిత్రంలో నటనకు ఇండోనేషియా ఫిలిం ఫెస్టివల్లో ఉత్తమ నటుడి అవార్డు, అదే పాత్రకు రాష్ట్రపతి అవార్డు అందుకున్నారు.   2013 లో భారత సినీ పరిశ్రమ వందేళ్ళ సందర్భంగా విడుదలయిన తపాళాబిళ్ళలలో ఒకటి ఎస్వీ రంగారావు మీద విడుదలయింది. ఎందరికో అవార్డులు ఇచ్చిన కేంద్ర ప్రభుత్వం  ఎస్వీ రంగారావు వంటి మహా నటుడికి ‘పద్మశ్రీ’ అవార్డుకూడా ఇవ్వకపోవడం శోచనీయం .  ఇదిలా  ఉంటే  ఎస్వీఆర్  శత జయంతి సందర్భంగా 12.5 అడుగుల ఎత్తు కాంస్య విగ్రహాన్ని ఏలూరు లో జులై 3న  ముఖ్యమంత్రి చంద్రబాబు ఆవిష్కరించనున్నారు.  తూర్పుగోదావరి జిల్లా కొత్తపేటకు చెందిన అంతర్జాతీయ శిల్పి, రాష్ట్ర ప్రభుత్వ ఆస్థాన శిల్పి డి.రాజ్‌కుమార్‌ వుడయార్‌  ఈ విగ్రహాన్ని రూపొందించారు. ...
  • (సుశ్రీ ) ......  ఈ ఫొటోలో కనిపించే ఆమె గురించి  ఈ  తరం లో కొద్దిమందికే  తెలిసి ఉండొచ్చు అంటే ఆశ్చర్య పోనవసరం లేదు.  క్లుప్తంగా  ఆమె ఫ్లాష్ బ్యాక్ గురించి తెలుసుకుని తర్వాత అసలు కథలోకి వెళ్దాం. అతను సాంప్రదాయ కన్నడ భ్రాహ్మణ కుటుంబం లో జన్మించాడు. కుటుంబ ఆచారం ప్రకారం గుడిలో పూజారి గా స్థిరపడటాన్ని వ్యతిరేకించాడు.  మెజీషియన్ గా అవతరించాడు.  భుక్తి కోసం ఒక సర్కస్ కంపెనీ లో జంతువుల ట్రైనర్ గా, మెజీషియన్ గా వివిద పనులు చేసేవాడు. ఉయ్యాల నుండి గాలిలో పల్టీలు కొట్టి మరో ఉయ్యాల పట్టుకునే విన్యాసాలు చేసేవాడు. (Trapeze) 1929 నంవంబరు 4 వ తేదీ ఒక చక్కటి ఆడపిల్లకి తండ్రి అయ్యాడు.  తనతో పాటే సర్కస్ లో తిరుగుతుండే చిన్నారికి మూడేళ్ళ వయసులో ప్లేయింగ్ కార్డ్స్ తో ఒక చిన్న మాజిక్ నేర్పే టానికి ప్రయత్నించినప్పుడు తన కూతురికి అంకెలని అద్భుతంగా జ్నాపకం పెట్టుకునే శక్తి ఉందని గ్రహించాడు. అతను సర్కస్ లో పని మానేశాడు. అనేక చోట్ల కుమార్తె తో కలిసి మేజిక్ లెక్కలతో కలిపి ప్రదర్శనలు ఇచ్చేవాడు. కుమార్తె కి ఉన్న శక్తి ని పరిపూర్ణంగా ప్రోత్చహించాడు.  ఆమె తన గణన శక్తి ని యూనివర్శిటీ ఆఫ్ మైసూర్ లో ప్రదర్శించింది. అప్పటికి ఆ బుడ్డ దాని వయసు నిండా ఆరేళ్లు!!.  తన పేరు శకుంతలా దేవి. అది ప్రారంభం. 1944 లో ఆమెకి పదిహేనేళ్ళ వయసప్పుడు తండ్రి తో కలిసి లండన్ చేరింది.  ఆమె తన అర్ధమేటిక్ జ్ణానాన్ని అనేక చోట్ల ప్రదర్శనలు ఇస్తూ యూరప్, న్యూ యార్క్ లు పర్యటిస్తూ ఉండేది.  Arthur Jensen, అనే సైకాలజీ ప్రోఫ్ఫెసర్ (University of California, Berkeley ) ఆమెను అనేక సమస్యలకి సమాధానాలు రాబట్టాడు. అతని అసిస్టెంట్స్ ఆయన ఆడిగిన సమస్యని వ్రాసేలోగా ఆమె సమాదానం తో సిద్దం గా ఉండేది.  61,629,875 కి క్యూబ్ రూట్, 170,859,375 కి సెవెన్త్ రూట్ ఆయన నోట్ బుక్ లో వ్రాసేలోగా 395, 15 అని సమాదానం చెప్పింది. 1990 లో Intelligence అనే పత్రిక లో వీటిని ప్రొఫెసర్ పొందుపరిచారు.  1977 లో Southern Methodist University, లో జరిగిన ఒక ప్రదర్శనలో 201 అంకెల సంఖ్యకి 23వ క్యూబ్ రూట్ ఆమె 50 సెకండ్ల లో చెప్పేసింది. అప్పట్లో అత్యంత వేగమయిన UNIVAC 1101 కంప్యూటర్ లో ప్రత్యేక ప్రోగ్రాం వ్రాసి , సమాదానాన్ని నిర్ధారించుకోవలసి వచ్చింది.  1980 లో Imperial College London. వారు నిర్వహించిన ఒక కార్యక్రమం లో రెండు పదమూడు అంకెల లబ్దాన్ని 28 సెకండ్ల లో చెప్పి ఆందరి ని ఆశ్చర్యపరిచింది. 1982 గిన్నీస్ బుక్ ఆఫ్ వరల్డ్ రికార్డ్స్ లో ఇది నమోదయ్యింది.  (7,686,369,774,870 × 2,465,099,745,779=18,947,668,177,995,426,462,773,730) ఫిగరింగ్, ది జాయ్ ఒఫ్ కౌంటింగ్ అనే ఆమె వ్రాసిన పుస్తకాలలో అనేకి కీలక విషయాలు ప్రపంచానికి తెలియపరిచింది.  1960 ప్రాంతాలలో ఇండియా తిరిగి వచ్చిన ఆవిడ ఒక ఇండియన్ అడ్మిస్ట్రేటివ్ ఆఫీసర్ ని వివాహం చేసుకుని. 1979 లో 50 ఏళ్ల వయసులో విడాకులు తీసుకుంది.  తమాషా ఏమిటంటే 1977 లో ‘హోమో సెక్సువాలిటీ’ మీద ఆమె తన తొలి రచన చేసింది. దీనికి కారణం ఒక చీకటి కోణం.  1980 లో ఇండిపెండెంట్ అబ్యర్ధిగా ఇందిరా గాంధీ మీద పోటీ చేసింది. (ఇందిర నుండి మెదక్ ప్రజలని ని కాపాడటానికి అని ఇంటర్వ్యూ లలో చెప్పింది. :p  చివరి రోజుల్లో ఆమె ఆస్ట్రాలజీ లో కూడా ప్రావీణ్యం ఉందని నిరూపించుకున్నారు.  21-04-2013 న బెంగుళూరు లో కుమార్తె అనుపమ కేర్ టేకింగ్ లో శ్వాసకోశ ఇబ్బందులతో 83 ఏండ్ల గణిత మేధావి తన జ్ణాపకం గా అనేక గ్రంధాలు మిగిల్చి బౌతికంగా ‘సైపర్’ (cypher) ఆయిపోయారు.  4, నవంబర్ 2013 న గూగుల్ ఆమె 84 పుట్టిన రోజు సందర్భంగా ఒక చిత్రాన్ని ప్రదర్శించింది.  ఆమె వ్రాసిన కొన్న పుస్తకాలు: • Astrology for You (New Delhi: Orient, 2005). ISBN 978-81-222-0067-6 • Book of Numbers (New Delhi: Orient, 2006). ISBN 978-81-222-0006-5 • Figuring: The Joy of Numbers (New York: Harper & Row, 1977), ISBN 978-0-06-011069-7, OCLC 4228589 • In the Wonderland of Numbers (New Delhi: Orient, 2006). ISBN 978-81-222-0399-8 • Mathability: Awaken the Math Genius in Your Child (New Delhi: Orient, 2005). ISBN 978-81-222-0316-5 • More Puzzles to Puzzle You (New Delhi: Orient, 2006). ISBN 978-81-222-0048-5 • Perfect Murder (New Delhi: Orient, 1976), OCLC 3432320 • Puzzles to Puzzle You (New Delhi: Orient, 2005). ISBN 978-81-222-0014-0 • Super Memory: It Can Be Yours (New Delhi: Orient, 2011). ISBN 978-81-222-0507-7; (Sydney: New Holland, 2012). ISBN 978-1-74257-240-6, OCLC 781171515 • The World of Homosexuals (Vikas Publishing House, 1977), ISBN 978-0706904789[11][21]...
  • ( సుశ్రీ ) .................................. నా పేరు అమృత. ఆ రోజు నాకింకా గుర్తుంది. 1919 ఏప్రిల్ 13 వ తేదీ మర్నాడు. రోజు లాగే అన్న స్కూల్ కి ఉదయాన్నే వెళ్ళాడు. అతను స్కూల్ కి వెళ్లలేదని మర్నాడు తెల్సింది.  అతడు ఇంటికి వచ్చేసరికి బాగా ఆలస్యం అయింది. ఇంట్లో అందరూ దిగాలు పడి ఉన్నారు. అన్న ముఖం వేలాడేసుని వచ్చాడు. బోలెడు దుఖం తో అతను నిలువునా మునిగి ఉన్నాడు.  అన్న కి చిన్న చెల్లెలు ని నేను. నేనంటే అన్న ఎంతో ప్రేమగా ఉండేవాడు.  “అన్నా ఎందుకింత ఆలస్యం అయింది.? ఎక్కడికెల్లావు ?” అని నేను ఆందోళనగా అడిగాను.  “ఏమి తెచ్చానో చూడు” చేతి లో జేబులోంచి తీసిన ఎర్ర సీసాని చూపించాడు.  అందులో మట్టి ఉంది. మట్టి రంగు ఎరుపుగా ఉంది. తడిగా ఉంది. “ఏమిటిది?” నేను భయంగా అడిగాను.  “ఇందులో ఉన్నది 360 మంది భారతీయుల రక్తం తో తడిచిన మట్టి ఉంది. రోలర్ చట్టానికి శాంతియుత నిరసన తెలపటం కోసం సమావేశమయిన వేలాది ప్రజలమీద కి, నిన్న జనరల్ డయ్యర్ మరఫిరంగులతో కాల్పులు జరిపాడు. ఎందరో చనిపోయారు. ఆ వీరుల రక్తం తో తడిచిన జలియన్ వాలా బాగ్ మట్టి ఈ సీసా లో ఉంది.” అన్న దుఖం తో ఒక్కో మాట చెప్పాడు.  అక్కడ ఏమి చూశాడో, ఏమి విన్నాడో తడబడుతు చెప్పాడు.  ఈ రోజు అన్న ఆహారం ముట్టలేదు. తోటలో నుండి చాలా పూలు తెచ్చి ఆ సీసాని అలంకరించాడు. దానికి మోకరిల్లాడు. తనలో తానే ఏవేవే మాట్లాడుకున్నాడు. బహుశా మనసులోనే ఏవో స్థిరంగా నిశ్చయించుకుని ఉంటాడు.  ఆ మహావీరుల రక్తం తో ఆయనకి సన్నిహిత సంభందం ఏర్పడింది. అందుకే తను గూడా విప్లవ కారులకు నాయకుడై ఆత్మ బలిదానం చేశాడు.  మీ కింతకి మా అన్న పేరు చెప్పలేదు కదూ... ఆయన్ని మీరు ఎరుగుదురు . ఆయన పేరు భగత్ సింగ్....
  • (Sheik Sadiq Ali)...........       రాస్తున్నది కాకతీయుల చరిత్రే అయినా .....దాని మూలాల్లోకి వెళ్ళటం అవసరం అని భావించి ఈ వ్యాసాన్నివ్యాస విరచిత మహాభారతం తో ప్రారంభిస్తున్నాను. మహాభారతంలో చర్చించిన పలు గిరిజన తెగలలో ప్రధానమైనవి రెండు . ఒకటి అపరాంతకులు....వీళ్ళు రాజస్తాన్ లోని పర్వత ప్రాంతాల్లో నివసించేవారు. వీరి ప్రస్తావన వాత్సాయన కామ సూత్రాలలోనూ ఉంది.(వీరి గురించి మరో వ్యాసం రాస్తాను) మరొకటి నిశాదులు. ఏకలవ్యుడి సంతతిగా ప్రఖ్యాతి గాంచిన వారు. వీరు ప్రస్తుత ఉత్తరాఖండ్ ప్రాంతానికి చెందిన వారు. ఈ వ్యాసం వారి గురించే కాబట్టి కాస్త విపులంగా చర్చిద్దాం. మహాభారత సంగ్రామం,కృష్ణ నిర్యాణం తదనంతర కాలంలో ఈ రెండు తెగలూ నర్మదా నదిని దాటి దండకారణ్యంలోకి ప్రవేశించాయి. అయితే ,అపరాంతకుల కన్నా చాలా ముందుగానే నిషాదులు వలస వచ్చారు. ఈ నిశాదులనే కిరాతులు కూడా అంటారు. వీరి జీవన విధానం గురించి వ్యాస మహాభారతంలో వివరించారు. వీళ్ళు ఉభయ చరులు. అంటే ,అటు అడవులలోనూ ,ఇటు వాటికి ఆనుకొని ఉన్న మైదాన ప్రాంతాల్లోనూ జీవించగలరు. విలు విద్య,బాణాలు,ఇనుము,ఉక్కుతో ఆయుధాలు,ఇతర సామాగ్రి తయారు చేయటంలో వీరు నేర్పరులు. ఉత్తరాఖండ్ లోని పలు క్షేత్రాలలో దర్శనం ఇచ్చే భారీ త్రిశూలాల తయారీలో ఈ నిషాదుల పాత్రే కీలకం . శారీరకంగా బలంగా ఉండటం, ఉక్కు మీద పట్టు ఉన్న వీరు దక్షిణ భారత దేశపు అడవుల్లోకి ప్రవేశించిన తర్వాత నుంచి అసలు కథ మొదలయ్యింది.  ప్రస్థానం..(కాకతీయులు పార్ట్ - 1) ఏకలవ్యుడు మహాభారతం లోని ఒక పాత్రే అయినప్పటికీ అతను ఒక జాతికి ప్రతీక. ఆ జాతి వీరత్వం ,ధీరత్వం,వ్యక్తిత్వం , డీ ఎన్ ఏ లకు చిరునామా. ఆ జాతి వారైన నిషాదులు దక్షిణ భారత దేశం లోకి ప్రవేశించిన తర్వాత అంచెలంచెలుగా తెలంగాణా,ఆంధ్రప్రదేశ్,కర్నాటక,తమిళనాడు,చివరిగా శ్రీలంక వరకూ చేరుకున్నారు. ఏడాదిలో కేవలం నాలుగైదు నెలలు మాత్రమే ఉపాధి అవకాశాలు ఉన్న ఉత్తరాఖండ్ నుంచి ఏడాది పొడవునా ఉపాధి లభించే దక్షిణాపధం నే తమ కర్మ భూమిగా చేసుకున్నారు. ఉక్కు తమ ప్రధాన జీవనాధారం అవటంతో ఉక్కు ఖనిజం పుష్కలంగా లభించే ప్రాంతాల చేరువలో తమ నివాసాలనుఎర్పర్చుకున్నారు. ఆ క్రమంలో తెలంగాణా లోని ఆదిలాబాద్,కరీంనగర్ వరంగల్, ఆంధ్రప్రదేశ్ లోని విశాఖ ,ఒరిస్సా సరిహద్దు ప్రాంతాలు,కర్నాటక లోని బెల్గాం,బళ్ళారి ప్రాంతాలు,తమిళనాడులోని కొడుమనాల్, కేరళ లోని మలబార్ ,శ్రీలంకలోని సమనల వేవ,తిప్పమహారామ ,అనురాదాపురం ప్రాంతాల్లో స్థిరపడ్డారు.(వీరిలో మరో వర్గం నల్లమల అటవీ ప్రాంతపు సరిహద్దుల్లో ఉన్న మహబూబ్ నగర్,కర్నూలు,గుంటూరు,ఒంగోలు,కడప ప్రాంతాల్లో స్థిరపడ్డారు. వీటి వివరాలు మున్ముందు అధ్యాయాల్లో చర్చిద్దాం.) ఉక్కు,ఆయుధాల తయారీ ప్రధాన ఆదాయ వనరుగా ఉన్న వీరు సహజంగానే అక్కడ రాజ్యాలు ఏలుతున్న రాజులకు,రాజ వంశీయులకు సన్నిహితులు అయ్యారు.ఆయుధాల సరఫరాతో పాటు, దేహ దారుడ్యం,ఆయుధాల ప్రయోగంలో నైపుణ్యం ఉండటంతో రాజుల సైనిక బలగాల్లో వివిధ హోదాల్లో కొలువులు కూడా చేసేవారు. ఇదంతా క్రీస్తుపూర్వం ఐదో శతాబ్దం నుంచీ జరుగుతూ వచ్చింది.అలాగే అరేబియా సముద్ర తీరం నుంచీ ,హిందూ మహాసముద్రం నుంచీ కూడా విదేశాలకు ఖడ్గాలు,సముద్రంలో ప్రయాణించే ఓడలకు అవసరమైన లంగర్లు,శుద్ధి చేసి,పోతపోసిన ఉక్కు దిమ్మెలు కూడా ఎగుమతి చేసేవారు.అరబ్బుల మధ్యవర్తిత్వంతో సిరియా,లెబనాన్,అక్కడి నుంచి ఐరోపా దేశాలకు ఎగుమతులు జరిగేవి. ఈ ఉక్కు దిమ్మెలతోనే తదనంతర కాలంలో డమాస్కస్ లో ఖడ్గాల తయారీ పరిశ్రమలు నెలకొని ప్రపంచ ప్రసిద్ధి చెందాయి. ఇంతకు ముందు చెప్పుకున్నట్లుగా ఈ నిషాదులు ఆయా రాజ వంశీకులకు చేరువైన క్రమంలో తమిళనాడులో ఆరో శతాబ్దానికి చెందిన చేర రాజ వంశీయులకు ,ఇక్కడ రాష్ట్ర కూటులకు తదనంతరం కళ్యాణీ చాళుక్యులకు సన్నిహితులు అయ్యారు.ఇక్కడి నుంచి నేరుగా మన కాకతీయుల చారిత్రిక నేపధ్యంలోకి వెళ్దాం.  (తరువాయి  రెండో భాగం లో) ...
  • ఈ ఫొటోలో కనిపించే అరుణ్ కృష్ణన్ వయసు 67 సంవత్సరాలు . ఈ వయసులోనూ సాహాసాలు చేస్తుంటారు.  మలి వయసులోనూ అథ్లెటిక్ పోటీల్లో పాల్గొని విజయాన్ని సొంతం చేసుకుని యువ అథ్లెట్స్‌కు సవాల్ విసిరిన ఖ్యాతి  ఆయనది.  ఇండియన్ ఓల్డెస్ట్ ఐరన్‌మ్యాన్‌గా తన పేరు నమోదు చేసుకున్న అరుణ్ కృష్ణన్ ఆ మధ్య  ఆస్ట్రేలియాలో జరిగిన ట్రియథ్లాన్ (స్విమ్మింగ్, సైక్లింగ్, రన్నింగ్‌లో విజేతగా నిలిచారు.ఈ తరం ఆటగాళ్లు అరుణ్ కృష్ణన్ ను నేర్చుకోవాల్సింది చాలా ఉంది. బలమైన సంకల్పం ... పరిశ్రమ అరుణ్ ను ముందుకు నడిపిస్తున్నాయి. తనకు వయసు వచ్చేసిందని ఆలోచన ఆయనకేమాత్రం లేదు. దూసుకుపోవడమే కృష్ణన్ కి తెలిసింది.   చెన్నైకి చెందిన అరుణ్ కృష్ణన్‌ ఇంజనీర్. బిజినెస్ కూడా చేశారు.  కాలేజీలో చదువుకునే రోజుల్లో స్విమ్మింగ్ టీమ్‌కు కెప్టెన్‌గా వ్యవహరించారు. పరుగు ఆయనకు ప్రాణం. 1987 నుంచి ఎన్నో మారథాన్‌లో పాల్గొన్నారు. దేశ, విదేశాలలో జరిగే మారథాన్ పోటీల్లో పాల్గొంటారు. సింగపూర్, పారిస్, చికాగో, బెర్లిన్, టోక్యో మారథాన్‌లలో పాల్గొన్నారు. ఆసియా ఫిసిఫిక్ చాంపియన్ షిప్ సాధించి  హీరోగా నిలిచారంటే అతిశయోక్తి కాదు. వ్యాపార బాధ్యతలు వేరొకరికి అప్పగించి  ఇపుడు తన కలలను సాకారం చేసుకోవటానికి  బీచ్‌లో పరుగుపెడుతూ ప్రాక్టీస్ చేస్తూంటారు దీక్షగా.  ఆస్ట్రేలియాలో నిర్వహించిన పోటీల్లో పాల్గొన్న అరుణ్  అలలు అంతెత్తున ఎగిసిపడుతున్నా ఏమాత్రం భయం లేకుండా 3.8 కిలోమీటర్లు ఈదారు. 180 కిలోమీటర్లు సైక్లింగ్ చేశారు. 42 కిలోమీటర్లు పరుగు పెట్టి యువ అథ్లెటిక్స్ సవాల్ విసిరారు. ఇవన్నీ కూడా నిర్ణీత సమయాని కంటే రెండు నిమిషాల 25 సెకెండ్ల ముందే పూర్తిచేయటం విశేషం. ఈయన  ప్రతిభ చూసి వచ్చినవారంతా చప్పట్లతో  ఆయనను హుషారెత్తించారు. కృష్ణన్ గురించి  ఆ దేశ ఛానళ్లలో కథనాలు ప్రసారమయ్యాయి. అరుణ్ కృష్ణన్ ఎన్నో మారథాన్‌లలో పాల్గొనగా.. ఈ పోటీని ఆయన సవాల్‌గా తీసుకున్నారు. ‘ఈ 67 ఏళ్ల వయసులో ఈ విజయం సాధిస్తానని నమ్మలేదు. కాని మనసు శరీరం మీద ప్రభావం చూపిస్తుందనుకుంటా. మానసిక బలంతో పాటు 24 వారాల శిక్షణ ఈ విజయానికి దోహదం చేసింది’ అని  చెప్పుకొచ్చారు.  ‘ఇండియన్ ఒల్డెస్ట్ ఐరన్ మ్యాన్‌గా జీవితాంతం ఉండాలని భావిస్తున్నాను. ప్రపంచ మారథానర్‌గా పేరొందిన ఫౌజాసింగ్, 70 ఏళ్ల వయసులో మారథాన్‌లలో పాల్గొన్న వైట్లాక్ నాకు స్ఫూర్తినిస్తారు" అంటారు అరుణ్ కృష్ణన్. ...
  • (SIVA RACHARLA)  .............  ఆయన ఒక "నిర్వచనం",ఆయనొక "నిర్మాత",ఆయనొక "ఉదాహరణ",ఆయన భారత రాజకీయ వ్యవస్థకు నిలువుటద్దం... ఆయన "Marxist in practice"... అందరు ప్రధానుల ...  మన రాష్ట్ర ముఖ్యమంత్రుల పేర్లు తడుముకోకుండ ఎంత మంది చెప్పగలరు? జీవితాంతం ప్రతిపక్షంలో వున్నా "ఆ"నాయకుడి" పేరు అధికారంలో ఏపార్టి వున్నా స్మరించటానికి కారణం ఏమిటి? అసెంబ్లీల్లో అధికార...  ప్రతిపక్షాలు గొడవపడ్డ ప్రతిసారి "ఆ"నాయకుడు" ప్రాతినిధ్యం వహించిన సభలో ఇలా గొడవ జరగటం బాధాకరం అనటం వింటుంటాము. ఆమనిషి,ఆనాయకుడు "పుచ్చలపల్లి సుందరయ్య" aka కామ్రేడ్ "P.S" నిన్న మొన్న గోరంట్ల బుచ్చయ్య చౌదరిగారికి మంత్రి పదవి రాని సందర్భంలో కూడ నాకు సుందరయ్య స్పూర్తి, రాజకీయల్లో ఎప్పుడు అక్రమపద్దతులు పాటించలేదు అని చెప్పుకున్నారు. కమ్యునిస్ట్ పార్టీలతొ పరిచయం వున్న వారికి పార్టి "నిర్మాణం" అన్నమాట పరిచయం వుంటుంది. రాజకీయ పార్టీల బాషలో "నిర్మాణం" అంటే సిద్దాంతము, రాజకీయ కార్యక్రమము ఒకేలాగ వుండటం.ఇప్పటిలా అధికారం కోసం కప్పలతక్కెడలు,గోడదూకటాలు నిర్మాణాత్మక రాజకీయాలు కాదు. సుందరయ్య స్వతంత్ర భారత పార్లమెంటులో తొలి ప్రతిపక్ష నేత. ప్రధాని నెహ్రు.. మంత్రులకు అనేక అంశాలలో సుందరయ్య ప్రసంగాలు దారిచూపాయి.సుందరయ్య మాట్లాడుతున్నప్పుడు నెహ్రు స్వయంగా నోట్సు రాసుకునేవారు. ప్రతిపక్ష నేతకు "మంత్రి" హోదా వుంటుంది(ఇప్పటికి కూడ). పార్లమెంటు ప్రతిపక్షనేతగా వుండి కూడ అన్ని సదుపాయాలను వదులుకోని బస్సులొ లేదా స్వయంగా సైకిల్ తొక్కుకుంటునో పార్లమెంటుకు వెళ్లేవారు. సైకిల్ మీద వెళ్ళటం గొప్పతనానికి సంబంధించిన లక్షణం కాదు, వ్యక్తిత్వం. సుందరయ్యగారి ఈవ్యక్తిత్వమే ప్రజలకు దగ్గర చేసింది. ఈవ్యక్తిత్వమే ఎదుటివారు చెప్పే విషయన్ని ఓపిగ్గా వినే లక్షణం తద్వారా వాటి పరిష్కారం కోసం పనిచేసే పద్దతి సుందరయ్య గారి సొంతం అయ్యింది. సుందరయ్య ఓకసారి MPగా, మూడుసార్లు MLAగా పనిచేశారు. అయితే సుందరయ్య చేపట్టిన ఈపదవుల కన్నా ఆయన చేసిన  ప్రతిపాదనలు,చేపట్టిన పనులవలనే చనిపోయిన 32 సంవత్సరాల తరువాత కూడ ప్రజలు స్మరించుకుంటున్నారు. దేశానికి స్వతంత్రం వచ్చిన తరువాత చేపట్టవలసిన పనుల గురించి అనేక రచనలు చేశారు. ఇప్పుడు చెప్పుకుంటున్న నదుల అనుసంధానం గురించి 50వ దశకంలోనే సుందరయ్యగారు ప్రతిపాదించారు. "ఆంధ్రప్రదేశులొ సమగ్ర నీటిపారుదల" అన్న పుస్తకంతో అనేక ప్రాజెక్టులు, నదుల అనుసంధానం గురించి రాశారు. సాయుద తెలంగాణా రైతాంగ పోరాట నిర్మాత సుందరయ్య.4,5 సంవత్సరాల పాటు అజ్ఞాతంలో ఉండి  దళాలకు మార్గదర్శకత్వం చేశాడు. తెలంగాణా సాయుధపోరాటం తరువాత ఆఉద్యమ అనుభవాలను "వీర తెలంగాణ విప్లవ పోరా టం గుణపాఠాల" పేరుతో పుస్తకం  రాశారు. సుందరయ్యగారి ఎంత వాస్తవికమో ఇలాంటి పుస్తకాలు తెలియచేస్తాయి. తెలంగాణ సాయుధపోరాటంలో కాని,ఎమర్జెన్సి రోజుల్లో కాని కామ్రేడ్స్, వారి కుటుంబల పట్ల సుందరయ్య చాల జాగర్తలు తీసుకునేవారు. కొండపల్లి కోటేశ్వరమ్మగారు(సీతారామయ్యగారి భార్య) రాసిన "నిర్జన వారధి" పుస్తకంలొ సుందరయ్యది ఎంత ఉన్నతమైన వ్యక్తిత్వమో తెలియచేసే సంఘటనలు వివరించారు. అజ్ఞాతంలో వున్న దళాలను,వారి కుటుంబ సభ్యులను సుందరయ్య గారు కలిసినప్పుడు...తను ముందుగా భోజనం చెయ్యకుండ గర్భిణిలు,పిల్లలకు భోజనం పెట్టి చివరలొ తను తినేవారు.కారణం నేను వచ్చానని ఈరోజు మంచి భోజనం వండివుంటారు,మీకు రోజు ఇలాంటి భోజనం దొరకదు కదా?ముందు మీరు తినండి అని వారికి భోజనం పెట్టేవారంట సుందరయ్యగారు.దళాలన్ని  ఒకచోట వుండటం వలన ఎదో ఒక భోజనం దొరికేది,నిత్య సంచారి అయిన సుందరయ్యలాంటి నాయకులకు గ్యారెంటి భోజనాలు తక్కువ.అది కామ్రేడ్స్ పట్ల సుందరయ్యగారి ప్రేమ,నాయకుడే త్యాగం చెయ్యాలనే  లక్షణం. 60,70 దశకాలలో  కమ్యునిస్ట్ పార్టీలలోకి డాక్టర్లు,లాయర్లు ప్రవాహంలాగ చేరారు.సుందరయ్యగారు డాక్టర్లను పార్టి full timersగా కాకుండ గ్రామాల్లో వైద్య సేవలు చెయ్యాలని ప్రోత్సహించారు. 1964లొ CPI నుంచి CPM విడిపొయినప్పుడు సుందరయ్యగారు CPM జాతీయ ప్రధానకార్యదర్శిగా ఎన్నికయ్యారు. సుందరయ్యగారి నాయకత్వంలొ CPM "Party Program" documentలొ పార్టి కార్యక్రమాన్ని వివరించారు,ఆ డాక్యుమెంట్ CPM రాజ్యాంగం. భారత దేశంలొ party programను రాసుకున్న ఏకైక పార్టి CPM.. దాన్ని ప్రారంభించి  సుందరయ్యగారు  నేతృత్వం  వహించారు.. సుందరయ్యగారి పోరాటం  ఆయన సొంత ఊరు నెల్లూరు జిల్లా "అలగానిపాడు" నుంచే మొదలయ్యాయి. సుందరయ్య గారి వ్యక్తిగత జీవితం త్యాగాల నిలయం.చిన్న వయసులోనే కులాన్ని వదులుకున్నారు.తన చెల్లెళ్లను  ,ఇతర పిల్లలను హరిజనవాడలో వున్న స్కూల్లొ చదివించారు. అలగానిపాడులొని అంటరానితనాన్ని నిర్మూలించటానికి హరిజనవాడ బావిలోని నీటిని ఊర్లోని అన్ని బావులలో కలిపాడు. ఆయన హాబిల్లొ చదవటం రాయటం ముఖ్యమైనవి. అలగానిపాడులో మొదటి గ్రంధాలయన్ని ఏర్పాటు చేశారు. ఇప్పుడు వారి ఇల్లు కూడ స్మారక చిహ్నం అయ్యింది. ఆస్తి పంపకాల్లొ వచ్చిన తన వాటా మొత్తాన్ని పార్టికి ఇచ్చేసి,పార్టి ఇచ్చిన అలవెన్సుతో బతికారు.   మాజీ ఎంపీ ,ఎమ్మెల్యేలకు  ఇచ్చే పెన్షన్ కూడ పార్టికి ఇచ్చారు. తన జీవితం మొత్తం ప్రజలకోసం,పార్టీ కోసం పనిచేయా లన్న లక్ష్యంతొ పెళ్ళి చేసుకోకూడదనుకున్నారు.అయితే కామ్రేడ్. లీలాగారు పట్టుదలతో ఆమెను వివాహం చేసుకోవటానికి అంగీకరించారు. సుందరయ్యగారు & లీలాగారు మాట్లాడుకోని పిల్లలు పుట్టకుండ సుందరయ్యగారు ఆపరేషన్ చేయించు కున్నారు. సుందరయ్య & లీలమ్మ ఇద్దరు త్యాగజీవులు. సుందరయ్య ,లీల గార్లకు పిల్లలు లేకుంటే ఏమి?నాలాంటి అనేక మంది వారసులు ... సుందరయ్య త్యాగం,సుందరయ్య దార్శనికత మనకు తెలియకుండనే ఎదో ఒకరూపంలొ మన జీవితం మీద ప్రభావం చూపుతుంది. సుందరయ్యగారి తమ్ముడు డాక్టర్.రామచంద్రారెడ్డి గారు కూడ జీవితాన్ని ప్రజల కోసం అంకితం చేశారు. డాక్టర్.రాం గారు నేతాజితో పనిచేశారు.నేతాజి డాక్టర్.రాముకు రాసిన ఉత్తరాలు నెల్లూరు జిల్లా ఆఫీసులొ 2001లో చదివాను. CPM డాక్టర్.రాం పేరుతో "రామచంద్రారెడ్డి ప్రజావైద్యశాల"ను నెల్లూరులో నడుపుతున్నారు. సుందరయ్యగారు 19-May-1985న విజయవాడలొ చనిపోయారు. సుందరయ్యగారు మేడే రోజున అంటే 01-May-1913న పుట్టారు. సుందరయ్య "Marxist in practice"...Marxism is not a dogma but a theory to be applied in practice,a guide to action సుందరయ్యను "కమ్యునిస్ట్ గాంధి" అనటం సమంజసం కాదు,అది కొందరు అత్యుత్సాహంతో రాసిన వాడుక.సుందరయ్య,గాంధి రెండు విభిన్న మార్గాలు.ఎవరి మార్గాల్లో వారు గొప్పవారు. సుందరయ్య కమ్యునిష్ట్ కాకుంటే ఏమి అయ్యుండేవారని అడిగిన ప్రశ్నకు "ఈరోజు కాకుంటే రేపో,మరో రోజో సుందరయ్య కమ్యునిష్ట్ అయ్యి వుండేవాడు" అంతేకాని కొందరు  రాసినట్లు కాంగ్రేస్ పార్టి ప్రధానకార్యదర్శో ,మంత్రో అయ్యేవాడు కాదు అని సుందరయ్యగారు సమాధానం ఇచ్చారు. అనేక సినిమల్లో ఉదా త్త రాజకీయనాయకుడి పాత్రకు "సుందరయ్య" అని వుండటం గమనించివుంటారు.నాకు ముఠామేస్త్రిలోని సోమయాజుల పాత్ర గుర్తుంది ,ఈమధ్య కూడ ఎదో సినిమాలో కూడ సుందరయ్య పేరు వాడారు. మాఇంట్లో వుండే ఏకైక రాజకీయ నాయకుడి ఫోటో "సుందరయ్య" గారిది.నాకు తొలి పాఠాలు చెప్పిన పుల్లయ్యగారు,Dr.శాస్త్రిగారు నాకు గురువులు.అందుకే నేను మిత్రులకు చెప్తుంటాను I am from Dr.Sastry school....
  •  (Sheik Sadiq Ali )......................   అదే స్వరం ముప్ఫై ఎనిమిది ఏళ్ళుగా వెంటాడుతోంది. విరహమైనా ,విషాదమైనా, ముంచెత్తే మొహమైనా అది వెంటే ఉంటూ వస్తోంది. ఆరుబయట వెన్నెల్లో నులకమంచం మీద పడుకున్నా, ఏసీ కార్ లో లాంగ్ డ్రైవ్ కి వెళ్ళినా అదే స్వరం .ఇంతకూ ఆ స్వరం ఎవరిది? ఎవర్ గ్రీన్ ..ఆల్ టైం గ్రేట్ లెజెండ్రీ వాయిస్ కిషోర్ కుమార్ ది. దశాబ్దాలుగా దేశ ప్రజల్ని ఉర్రూత లూగిస్తున్న స్వరం. మనిషి మరణించినా అజరామరమైన స్వరం. అతని గొంతులో అంతటి శక్తి ఎలా వచ్చింది? ఎంత ప్రేమను,ఎంత విషాదాన్ని, విరహాన్ని అనుభవిస్తే ఆ శక్తి వస్తుంది? నాలుగు పెళ్ళిళ్ళు చేసుకున్న కిషోర్ ప్రేమికుడా?ప్లేబాయా ?పురుష అహంకారా?మదోన్మత్తుడా?విలాస పురుషుడా? అతన్ని ఎలా చూడాలి? యావత్ దేశం మోహించి పలవరించిన అద్భుత అందగత్తె మధుబాల , కళ్ళముందు తటాలున మెరిసే విద్యుల్లత లీనా చందావర్కర్ , మత్తు కళ్ళ యోగితాబాలి, అలనాటి బెంగాలీ సుందరి రూమా ఘోష్ ఆ నలుగురూ అతని భార్యలే.వివిధ దశల్లో అతని జీవితాన్ని ప్రభావితం చేసిన వాళ్ళే. అతని స్వరంలోని విషాదానికీ,విరహానికీ,మోహానికీ కారకులు వాళ్ళే. నాలుగు పెళ్ళిళ్ళు చేసుకున్న వాడి గురించి ఇంత గొప్పగా రాయాలా సాదిక్? అని అడిగితె నా దగ్గర సమాధానం లేదు. కానీ, సౌందర్యాన్ని ఆరాధించి,అందిన అందాన్ని అర్ధం చేసుకోలేక వ్యర్ధం చేసుకున్న ఒక అద్భుత గాయకుడి జీవితపు చీకటి కోణాలను స్పృశించాలనే ప్రయత్నమే ఈ వ్యాసం. గాయకుడు,నటుడు,దర్శకుడు,నిర్మాత,రచయిత,సంగీత దర్శకుడు,హీరో,కమెడియన్ ఇలా బహుముఖ ప్రజ్ఞాశాలి అయిన కిషోర్ కు అసంఖ్యాకమైన అభిమానులు ఉన్నారు.మహమ్మద్ రఫీ,ముఖేష్ ల కన్నా కిషోర్ ని అభిమానించే వాళ్ళ సంఖ్య చాలా ఎక్కువ.హిందీ మాత్రమె కాకుండా మరాఠి,గుజరాతి,కన్నడ ,బెంగాలి భాషల్లో అతను అసంఖ్యాక పాటలు పాడాడు.బాలీవుడ్ లో తన సమకాలీకులందరూ ఈర్ష్య పడేంత రొమాంటిక్ జీవితాన్ని అతను అనుభవించాడు. చూడ్డానికి ప్లే బాయ్ లా కన్పించినా,నిత్యం చిరునవ్వుతో ,సినిమాల్లో నవ్వుతూ ,నవ్విస్తూ ఉన్నా లోలోపల దహించి వేసే బాదే అతనితో విషాద గీతాలు పాడించింది.సౌందర్యం పట్ల ఆరాధన గొప్ప రొమాంటిక్ పాటలని పాడించింది.విషాదాన్ని దాచుకునే ప్రయత్నంలో కామెడీ పాటలు పాడాడు. కిషోర్ కుమార్ మొదటి భార్య రూమా ఘోష్. అందం,చలాకీతనం,అభినయం కలగలిసిన అమ్మాయి.విఖ్యాత దర్శకుడు సత్యజిత్ రే మేనకోడలు. నటి,గాయకురాలు. 1951 లో వాళ్లకు పెళ్ళయ్యింది. ఏడాదికే కొడుకు అమిత్ కుమార్ (సింగర్) పుట్టాడు. అతనికి ఆరేళ్ళ వయసులో దంపతులిద్దరికీ గొడవలయ్యాయి.గృహిణిగా ఉండి ఇంటినీ, కొడుకునీ చూసుకోమంటాడు అతను. నా ప్రతిభను,సామర్ధ్యాన్ని నాలుగు గోడలకు పరిమితం చేయలేను అంటుంది ఆమె. ఫలితంగా ఇద్దరూ విడిపోయారు. ఆ తర్వాత ఆమె ఆరూప్ గుహా ను పెళ్ళాడి రూమా గుహ అయ్యింది. ఓపిక ఉన్నంత వరకూ నటిస్తూనే ఉంది. 2006 లో విడుదలైన బాలీవుడ్ చిత్రం నేమ్ సేక్ ఆవిడ నటించిన ఆఖరి చిత్రం. రెండో భార్య మధుబాల. ఇండియన్ మార్లిన్ మన్రో గా ప్రసిద్ధి చెందిన నటి.అపురూప సౌందర్య రాశి. ఇప్పటికీ అందానికి ప్రతిరూపంగా కవులు,రచయితలూ ఆమె నే ఉదహరిస్తారు. దిలీప్ కుమార్ తో గాఢమైన ప్రేమలో మునిగి,తేలి విఫలమైన మధుబాల కిషోర్ రెండో భార్య అయ్యింది. ఒక పేద ముస్లిం కుటుంబంలో 11 మంది సంతానంలో ఒకరిగా జన్మించిన ముంతాజ్ తన అందం,అభినయంతో సూపర్ స్టార్ మధుబాల అయ్యింది. ఆమె కంటి చూపు కోసం మహామహులు వెంపర్లాడే వారు. అలాంటి అమ్మాయి దిలీప్ తో ప్రేమ విఫలమై కిషోర్ కి రెండో భార్యగా మారింది. ఆమెను పెళ్ళాడటానికి కిషోర్ అష్ట కష్టాలు పడ్డాడు. ఆఖరికి మతం మార్చుకొని కరీం అబ్దుల్ కూడా అయ్యాడు. వారి వైవాహిక జీవితం తొమ్మిది ఏళ్ళపాటు సాగింది. వారికి సంతానం కూడా కలుగ లేదు. హృదయంలో చిల్లుపడి అనారోగ్యంతో మంచం పాలై విషాదకర పరిస్థితుల్లో మధుబాల మరణించింది. ఆ తొమ్మిదేళ్ళ కాలంలో ఆమె నటించలేదు. వైద్యం కోసం లండన్ వెళ్లాలని అనుకున్న ఆమెను కిషోర్ అందుకు అనుమతించ లేదనీ ,వైద్యం అందకే ఆమె మరణించింది అనీ అతనిపై ఆరోపణలు కూడా ఉన్నాయి. మూడో భార్య పేరు యోగితాబాలి. షమ్మి కపూర్ మొదటి భార్య,అలనాటి హీరోయిన్ గీతాబాలి మేనకోడలు ఈ అమ్మాయి. అప్పట్లో పలు సినిమాల్లో హీరోయిన్ గా నటించింది. వీళ్ళ బంధం రెండేళ్ళ కన్నా ఎక్కువ కాలం కొనసాగలేదు. వివాహం తర్వాత కూడా నటన కొనసాగించిన యోగితా అప్పుడప్పుడే స్టార్ డం సంపాదించుకుంటున్న మిథున్ చక్రవర్తితో ప్రేమలో పడింది. కిషోర్ కి విడాకులు ఇచ్చి మిథున్ ను పెళ్లి చేసుకొని వెళ్ళిపోయింది. ఆ తర్వాత మిథున్ మన శ్రీదేవి తో ప్రేమలో పడి పెళ్లి కూడా చేసుకోవాలని అనుకున్నాడు కానీ ,అది కుదరలేదు. అది వేరే కథ. నాలుగో ,ఆఖరి భార్య లీనా చందావర్కర్ . మెరుపు తీగలాంటి సౌందర్యం. ఒక ఆర్మీ అధికారి కూతురు. ప్రముఖ హీరోయిన్ .అపురూపమైన అందం ఆమె సొంతం. ప్రముఖ రాజకీయ కుటుంబానికి చెందిన సిద్ధార్ధ అనే యువకుడు ఆమెను ఇష్టపడి పెళ్లి చేసుకున్నాడు. పెళ్లి అయిన కొద్దికాలానికే ప్రమాదవశాత్తూ తుపాకీ పేలి మరణించాడు. 25 ఏళ్ళ వయసుకే ఆమెకు వైధవ్యం వచ్చింది. ఆమె సౌందర్యానికి ముగ్దుడై ఆమెతో ప్రేమలో పడ్డాడు కిషోర్. ఇద్దరి మధ్య వయసు తేడా 21 సంవత్సరాలు.ఇద్దరూ ప్రేమలో పడ్డారు.పెళ్లి కూడా చేసుకోవాలనుకున్నారు. దానికి లీనా తండ్రి ఒప్పుకోలేదు. ఇప్పటికె మూడు పెళ్ళిళ్ళు పెటాకులయ్యాయి. దాదాపు నీ అంత వయసు ఉన్న కొడుకు ఉన్నాడు. చచ్చినా కోశోర్ కి ఇచి పెళ్లి చేసే ప్రసక్తి లేదు అన్నాడాయన. ఎలాగైనా పెళ్లి చేసుకోవాలనుకున్న కిషోర్ నానా ప్రయత్నాలు చేశాడు. ఆఖరికి ఆమె ఇంటి ముందు ధర్నా కు దిగాడు. అప్పట్లో కిషోర్ తను పాడగా పాపులర్ అయిన 'నఫ్రత్ కరనే వాలో కె దిల్ మే ప్యార్ భర్ దూ' పాటను ఆ ఇంటి ముందు పాడుతూ కూర్చున్నాడు. చివరికి లీనా తండ్రి పెళ్ళికి అంగీకరించాడు. అదే కిషోర్ ఆఖరి పెళ్లి. 1980 లో వాళ్లకు పెళ్లి అయ్యింది. 1987 లో మరణించే వరకు కిషోర్ ఆమెతోనే కలిసి జీవించాడు.37 ఏళ్ళ వయసులో ఆమెకు మరోసారి వైధవ్యం ప్రాప్తించింది. ఆ తర్వాత ఆమె వేరేవ్వరినీ పెళ్లాడ లేదు. స్వతహాగా గాయని కూడా అయిన లీనా భర్త మరణం తర్వాత అతని సంగీతాన్ని,పాటల్ని,జ్ఞాపకాలను సజీవంగా ఉంచటానికే కృషి చేస్తోంది. ఆమెతో కిషోర్ కు సుమిత్ అనే కొడుకు కూడా ఉన్నాడు. ఇప్పుడు,లీనా,సుమిత్,అమిత్,అతని భార్య, కిషోర్ మొదటి భార్య,అమిత్ తల్లి రూమ గుహ అందరూ కలిసి ఒకే ఇంట్లో ఉంటున్నారు. అందరికీ కిషోర్ అంటే అమితమైన ప్రేమ,భక్తీ. ఇదీ కిషోర్ వైవాహిక,ప్రేమ జీవితం. అతను తప్పో,ఒప్పో నిర్ణయించే శక్తి నాకు లేదు. కానీ, ప్రేమలో,జేవితంలో అతను ఎదుర్కొన్న అనేకానేక సంఘటనలే అతని స్వరానికి అంతటి మహత్తర శక్తిని ఇచ్చాయని విశ్వసిస్తాను....
  • రెండు తరాలకు ముందు కొంచెం పొలం పుట్రా ఉండి, ఆర్ధిక స్థోమత మెరుగ్గా  ఉన్న వారి ఇళ్లల్లో భోషాణం పెట్టెలు ఉండేవి. విలువైన సామాన్లు,  బంగారం, వెండి వస్తువులు , నగదు అందులోనే దాచే వారు. ఇందులో అరలుంటాయి. వీటిలో రకరకాల సైజులు ఉండేవి. పెద్ద వాటిని భోషాణం అంటారు .  చాలా చిన్న వాటిని  కావిడి పెట్టి, రంగం పెట్టి, రంగూన్ పెట్టి అనేవాళ్ళు. పాత కాలంలో ఆడపిల్ల అత్తవారి ఇంటికి వెడుతూంటే ఆమె వస్తువులు బట్టలు అన్నీ ఇందులో పెట్టుకుని  పట్టుకెళ్ళేది. దీనిని కావడిలో వేసి పట్టుకెళ్ళేవారు సారితో సహా.  ఈ పెట్టెలను స్థోమతను బట్టి మామూలు టేకుతోను, రంగూన్ టేకుతోను చేయించుకునే వారు. కాలక్రమం లో భోషాణాలు పోయి బీరువాలు వచ్చాయి. ఈ తరం లో చాలామందికి భోషాణం పెట్టె గురించి అసలు తెలియదు.  ఇక అసలు కథలోకి వెళ్తే ఆంధ్రుల అభిమాన నటుడు ఎన్టీ రామారావు దగ్గర కూడా ఒక పెద్ద సైజు భోషాణం పెట్టె ఉండేది.  అది వారసత్వంగా వచ్చిందట. దాన్ని ఎన్టీఆర్ అపురూపంగా చూసుకునే వారు. ఆ భోషాణం కోసం ప్రత్యేకంగా ఒక గది కేటాయించారు. దానికెపుడూ తాళం వేసి ఉండేదట. లోపల భోషాణానికి ఒక తాళం వేసేవారట. తాళంచెవులను  పొరపాటున కూడా ఎవరికి ఇచ్చేవారు కాదట.  వాటిని  మొలతాడుకి చుట్టుకునే వారట. ఇంతకూ ఆ భోషాణంలో ఏమి ఉండేవంటే డబ్బు ,దస్కం ,నగలు ,నట్రా ఉంచేవారు. ఎన్టీ ఆర్ కి ఒక్కరికే పరిమితమైన వస్తువులన్నీ అందులో ఉంచేవారట. సినిమా తాలూకు పారితోషకం కానీ ఇతరత్రా  ఆయనకు వచ్చే నగదు కానీ అన్ని భోషాణం లోనే దాచేవారట.  వంద నోట్ల కట్టలు ఎక్కువుగా దాచేవారట.ఎన్టీఆర్ కి కొత్త నోట్లు అంటే చాలా ఇష్టమట. అందులో దాస్తే మళ్ళీ బాటకు తీసే వారు కాదట. పాత నోట్లు ఎప్పటికపుడు వాడేసే వారట. అయితే ఎన్టీఆర్ మంచాన పడి కొంచెం కోలుకున్నాక  అబిడ్స్ ఇంటి నుంచి బంజారా హిల్స్ ఇంటికి మారారు . అది చిన్న ఇల్లు కావడం తో  దగ్గరలోనే మరో  స్థలంలో బిల్డింగ్ కట్టించి అందులోకి  ఈ పెద్ద భోషాణం పెట్టెను తరలించారు. అందులోని నగ నట్రా , నగదు  ఇంట్లో ఉన్న బీరువాల్లోకి మార్చేశారు. ఎన్టీఆర్ మరణించిన రాత్రి  ఆ బీరువాల్లోని  నోట్లకట్టలే  సూటు కేసులు ద్వారా బయటకు తరలి వెళ్లాయి . అలా బయటికెళ్లిన సొమ్ములో కొంత మొత్తమే వెనక్కి వచ్చింది. ప్రస్తుతం ఎన్టీఆర్ మ్యూజియం పేరిట ఉన్న భవనంలో ఆ పాత భోషాణం పెట్టె, ఎన్టీఆర్ ఎన్నికల ప్రచారానికి వాడిన చైతన్య రధం, ఇంకా సినిమాల్లో వాడిన కిరీటాలు, గదలు, ఇతర వస్తువులు  భద్రంగా ఉన్నాయి. అది ఎన్టీఆర్ భోషాణం పెట్టె కథ.  inputs by  Tipparaaju Ramesh Babu  ...
  • ఈరోజుల్లో చిన్న కార్పొరేటర్ అయితే చాలు ఎపుడు ఏ ప్రాజెక్ట్ కోసం పైరవీ చేద్దామా అని ఆలోచన చేస్తాడు . అదే ఎమ్మెల్యే అయితే  ఇక చెప్పనక్కర్లేదు. కానీ ప్రజలకోసం ఆలోచించే వాళ్ళు బహు తక్కువ. అలాంటి వారిలో మంగళగిరి ఎమ్మెల్యే ఆళ్ల రామకృష్ణారెడ్డి  ఒకరు. అయన చాలా సాధారణ వ్యక్తిగా నియోజకవర్గంలో పర్యటిస్తుంటారు. రోడ్డు పక్కనే చిన్నచిన్న టిఫిన్ సెంటర్‌లోఏదో ఒకటి తినేస్తుంటారు.అక్కడే నిలబడి ప్రజలతో మాట్లాడుతుంటారు.ప్రజలకోసం ఏ అధికారి నైనా కలుస్తారు. భేషజాలకు పోరు.  ఏదైనా అన్యాయం జరుగుతుంటే  మాత్రం  ధైర్యంగా పోరాటం చేసేందుకు ముందుకొస్తారు. ఓటుకు నోటు కేసు లో చంద్రబాబు తో పోరాటం సామాన్యమైన విషయం కాదు.  బాబు ఆడియో టేపులను ఫోరెన్సికల్ ల్యాబ్‌కు పంపి అవి నిజమైనవేనని తేల్చుకుని వాటి  ఆధారంగా ఏసీబీ కోర్టు నుంచి సుప్రీం కోర్టు వరకు ఓటుకు నోటు కేసులో చంద్రబాబుకు వ్యతిరేకంగా పోరాడుతున్నారు. ఆ విషయం అందరికి తెల్సిందే.  ఇప్పుడు ఎమ్మెల్యే ఆర్కే మరో కొత్త యోచన  చేస్తున్నారు.  పేదలకు  తక్కువ ధరలోనే భోజనం అందించేందుకు ప్రయత్నిస్తున్నారు. ఈ నేపథ్యంలో ఎమ్మెల్యే ఆర్కే హైదరాబాద్  జీహెచ్‌ఎంసీలో అమలవుతున్న ఐదు రూపాయల భోజన పథకాన్ని పరిశీలించారు. హరే కృష్ణ సంస్థ ఆధ్వర్యంలో నడుస్తున్న భోజన కేంద్రానికి వెళ్లి క్యూలో నిలబడి అందరిలాగే భోజనం చేశారు ఆర్కే. ఈ సందర్భంగా రూ. 5 భోజనం కోసం రావడం వెనుక కారణమేమిటని ఆరా తీయగా.. ఎమ్మెల్యే ఆర్కే తన మనసులో మాట బయటపెట్టారు.  హరే కృష్ణ పౌండేషన్‌ ఆధ్వర్యంలో నడుస్తున్న రూ. 5భోజన పథకం పనితీరు బాగుందన్నారు. తాను కూడా తన నియోజకవర్గంలోని పేదల కోసం ఇలాంటి పథకాన్నే సొంత డబ్బుతో ఏర్పాటు చేయబోతున్నట్టు చెప్పారు. అందులో భాగంగా ఈ పథకం పనితీరును పరిశీలించేందుకు హైదరాబాద్ వచ్చినట్టు చెప్పారు. రూ. 5 కే మంగళగిరిలోని పేదలకు భోజనం అందించే కార్యక్రమానికి త్వరలోనే శ్రీకారం చుడుతున్నట్టు చెప్పారు. తమాషా ఏమిటంటే ఏపీ సీఎం చంద్రబాబు గతంలో అన్నాక్యాంటీన్లు పెడుతామని  హామీ ఇచ్చారు కానీ మర్చి పోయారు. ఇపుడు ప్రతిపక్ష ఎమ్మెల్యే ఇలాంటి పధకాన్ని ప్రారంభించాలనుకోవడం నిజంగా గొప్పే కదా !...
  • ( Vasireddy Venugopal )..........  ఉత్తరప్రదేశ్ ముఖ్యమంత్రి యోగి ఆదిత్యనాధ్ తీసుకున్న నిర్ణయాలు.. భారతదేశానికి నిశ్చయంగా ప్రయోజనం చేకూర్చుతాయి. ఆదర్శంగా నిలుస్తాయి. ప్రభుత్వ ఉద్యోగులు తమ పిల్లలను విధిగా ప్రభుత్వ పాఠశాలల్లోనే చదివించాలి. ప్రభుత్వ ఉద్యోగులు, వారి కుటుంబ సభ్యులు విధిగా ప్రభుత్వ ఆస్పత్రుల్లోనే జాయిన్ కావాలి.. అనేది.. దేశ ప్రజల చిరకాల ఆకాంక్ష. ఆ విధంగా నడుచుకోకపోతే.. ఇంక్రిమెంట్లలో కోత విధించడం, ఇతర ఆర్ధిక ప్రయోజనాల్లో కోత విధించడం.. యోగి తీసుకున్న సాహసోపేత నిర్ణయం. నా మటుకు నేను చాలా కాలంగా... ఇలాంటి విధానం వుండాలని ప్రతిపాదించిన వాడిని. change.org ద్వారా ఆన్ లైన్ పిటిషన్ కూడా వేసి వున్నాను. ఇలాంటి విధానం వుండాలని కోరుతూ సుప్రీంకోర్టులో కూడా ఒక పిటిషన్ విచారణలో వున్నట్టు గుర్తు. యోగి ఆదిత్యనాధ్ తీసుకున్న నిర్ణయం సమర్ధవంతంగా అమలుకావాలని, దేశవ్యాప్తంగా ఆచరించవలసిన విధానంగా, పాలసీగా రూపొందాలని నేను ఆకాంక్షిస్తున్నాను. దీనివల్ల కలిగే ప్రయోజనాలు అనేకం. 1. ప్రభుత్వ ఉద్యోగులకు కేంద్ర, రాష్ట్ర స్థాయిల్లో ప్రభుత్వ పరంగా వైద్య సదుపాయాలు వున్నాయి. కానీ వాటిని ఉపయోగించుకోవడం లేదు. అనేక సంవత్సరాలుగా వాళ్లు యూనియన్ల శక్తితో పోరాటం చేసి, నేరుగా కార్పొరేట్ వైద్య సదుపాయాలకు అర్హత పొందారు. 2. ప్రభుత్వ ఉద్యోగులు విధిగా ప్రభుత్వ ఆస్పత్రిలోనే చేరాలనే నిబంధన వల్ల, సామాన్య ప్రజానీకానికి ఎనలేని ప్రయోజనం చేకూరుతుంది. ఉదాహరణకు.. హైదరాబాద్ లో ఒక గాంధీ, ఒక ఉస్మానియా ఆస్పత్రిలో విధిగా చేరడం అనివార్యమైనప్పుడు.. అక్కడ మెరుగైన సౌకర్యాలకోసం ప్రభుత్వ ఉద్యోగ సంఘాలు ప్రభుత్వంపై ఒత్తిడి పెడతాయి. ఇలాంటి ఆస్పత్రులను అత్యాధునికంగా రూపొందించడం ప్రభుత్వానికి అనివార్యం అవుతుంది. దానివల్ల 100మంది ప్రభుత్వ ఉద్యోగులకు ప్రయోజనంతో పాటు, 10000 మంది సామాన్య జనం కార్పొరేట్ ఖరీదు వైద్యం బారినుంచి బయటపడతారు. 3. విద్యారంగంలోనూ ఇలాంటి ప్రయోజనాలే సామాన్యులకు అందుబాటులోకి వస్తాయి. జిల్లాకో కేంద్రీయ విద్యాలయ, మండలానికో నవోదయ.. ఇలా అనేక మెరుగైన విద్యా సదుపాయాలు ప్రభుత్వ ఉద్యోగులకే కాకుండా సామాన్యులకూ అందుబాటులోకి వస్తాయి. 4. ప్రైవేటు విద్య, ప్రైవేటు వైద్యం పొందడానికి ప్రైవేటు వాళ్లకు వుండే అవకాశం, ప్రభుత్వం వాళ్లకు ఎందుకు వుండరాదు? అని ప్రభుత్వ ఉద్యోగులు అమాయకంగా ప్రశ్నించవచ్చు. ప్రభుత్వ ఉద్యోగుల వేతనాలు ప్రజలు చెల్లించే పన్నులనుంచి చెల్లిస్తున్న వేతనాలు. ప్రభుత్వ ఉద్యోగులు ఆరోగ్యంగా వుండి, మెరుగైన సేవలు అందించడంకోసం మెడికల్ అలవెన్సులను కూడా సమాజం చెల్లిస్తున్నది. వారి పిల్లాపాపల విద్య, వైద్యారోగ్యాలకోసం కూడా సమాజం చెల్లిస్తున్నది. ఈ విషయాన్ని ప్రభుత్వ ఉద్యోగులు విధిగా గుర్తుంచుకొని తీరాలి. కేవలం తమ వేతనాల పెంపుదలకోసమే కాకుండా, తమ మెరుగైన భవిష్యత్తుకోసమే కాకుండా, సమాజం ఉప్పు తింటున్నందుకు గాను ఉద్యోగ సంఘాలు సమాజంకోసం కూడా ఆలోచించాల్సి వుంటుంది. ఆ బాధ్యతనుంచి తప్పించుకోవడం ఎల్లకాలం సాధ్యం కాదు....
  • సరిగ్గా 14 ఏళ్ళ క్రిందట వైఎస్ రాజశేఖర రెడ్డి చేపట్టిన పాదయాత్ర ఆయన జీవిత గమనాన్ని మార్చివేసింది. పాదయాత్ర తర్వాత ఆయన ఇమేజ్ ఒక్కసారిగా పెరిగింది. రాజకీయంగా దశ,దిశ మారాయి. అప్పటి పరిస్థితుల్లోప్రజలకు వైఎస్ ఒక్కరే  తిరుగులేని ప్రత్యామ్నాయంగా కనిపించారు. పార్టీ లో కూడా వైఎస్ అంటే గిట్టని కొందరు సైలెంట్ అయి పోయారు.ఇక మన ఆటలు సాగవని గ్రహించేశారు. వైఎస్ తో రాజీకొచ్చేశారు. అందుకే 2004 లో టిక్కెట్ల పంపిణీ లో ఎలాంటి గందరగోళాలు లేవు.అసలు ఈ పాదయాత్ర ఆలోచన వైఎస్ కి ఎవరిచ్చారు ? అది ఆయన సొంత ఆలోచనే. ముందుగా కాంగ్రెస్ అధినేత్రి సోనియాకు వివరించారు.ఆమె  రిస్క్ కదా అంటే ఇదొక ఛాలెంజ్ అన్నారట. ఆమె ఒకే అనడం వెంటనే ఏర్పాట్లు జరిగిపోయాయి. కాంగ్రెస్ కు ఏపీలో బలం అంతంతమాత్రంగా ఉన్న వేళ.. వైఎస్  పాదయాత్రను  తెరవెనుక ఉండి  విజయపధంలో నడిపించింది  కేవీపీయే. ఈ పాద యాత్ర  కాంగ్రెస్ కు బలమైన పునాది ఏర్పాటు చేసి ... పదేళ్లు అధికారంలో ఉండేలా చేసిందని చెప్పుకోవాలి. పాదయాత్రలో వైఎస్ రిస్క్ ఎదుర్కొన్నారు. దాని ఫలితమే  2004 ఎన్నికల్లో కాంగ్రెస్ పార్టీ  ఘనవిజయం.వైఎస్ సీఎం అయ్యారు. నాడు పాదయాత్ర యోచన వైఎస్ కి రాకపోయినట్లయితే 2004 నాటి పరిస్థితులు ఎలాఉండేవో ?? ఇక నాటి పాదయాత్రలో ఎన్నోప్రజా  సమస్యలను వైఎస్ అవగతం చేసుకున్నారు. నేతలకు ,ప్రజలకు మరింత సన్నిహితమైనారు. రంగారెడ్డి జిల్లా చేవెళ్ల నుంచి ప్రారంభించి.. 11 జిల్లాల్లో 56 నియోజకవర్గాల మీదుగా 68 రోజులపాటు నిప్పుల కురిసే ఎండలో వైఎస్ నడిచారు. 1470 కిమీల మేర సాగిన ఈ ప్రజాప్రస్థాన పాదయాత్ర శ్రీకాకుళం జిల్లా ఇచ్ఛాపురంలో ముగిసింది. తెలుగువారి చరిత్రలో మరుపురాని ఘట్టంగా ఈ పాదయాత్ర మిగిలిపోయింది. ప్రజలు తండోపతండాలుగా తరలివచ్చి ఆయనకు నీరాజనం పలికారు. మొదటి రోజు నుంచి మొదలుపెడితే చివరి అడుగు వరకు లక్ష్యాన్ని చేరుకోవడంలో చెక్కుచెదరని విశ్వాసమే వైఎస్ ను ముందుకు నడిపించింది. తెలంగాణలోని రంగారెడ్డి, మెదక్, నిజామాబాద్, కరీంనగర్, వరంగల్, ఖమ్మం జిల్లాల్లో ఆయన పాదయాత్ర అత్యధిక భాగం పీపుల్స్‌వార్‌తోపాటు వివిధ నక్సలైట్‌ గ్రూపులకు కంచుకోటలుగా నిలిచిన గ్రామాల గుండా సాగింది. ప్రజాప్రతినిధులు కొన్ని దశాబ్దాలుగా అడుగుపెట్టని గ్రామాలకు వెళ్లడమే కాదు.. రాత్రుళ్లు అక్కడే గుడారాలు వేసుకుని బస చేశారు. మీడియా కూడా వైఎస్ పాదయాత్ర కు మంచి ప్రచారాన్ని ఇచ్చింది. వైఎస్ ను వ్యతిరేకించే ఆంద్ర జ్యోతి  ప్రత్యేకంగా ఒక కాలం పెట్టి యాత్ర కవరేజ్ ఇచ్చింది. ఈనాడు కూడా బాగానే పాదయాత్రను కవర్ చేసింది. అలాగే వార్త కూడా. జాతీయ ఎలక్ట్రానిక్ మీడియా మధ్యలో అందుకుని మంచి కథనాలను ప్రసారం చేసాయి. ఏదైనా అప్పట్లో అదొక రికార్డు.    ..... KNMURTHY...
  • రాజకీయాల్లో అపుడపుడు  తమాషాలు జరుగుతుంటాయి. 1982 లోతెలుగు దేశం పార్టీ పెట్టి  కేవలం 9 నెలల కాలంలో పగలనక రేయి అనక అవిశ్రాంతంగా  ప్రచారం చేసి అద్భుతమైన విజయం సాధించిన దివంగత నేత నందమూరి తారకరామారావు  1989 లో కల్వకుర్తి  లో పోటీ చేసి ఓడిపోయారు. ఎవరూ ఊహించని ఓటమి అది. ఎన్టీఆర్ కూడా అక్కడ  ఓటమి ఎదురవుతుందని అనుకుని ఉండరు. ఎన్టీఆర్ కి రాజకీయాల్లో అదొక మరువలేని షాక్. అంతే కాదు అప్పటి ఎన్నికల్లో తెలుగు దేశం అధికారం కోల్పోయి 71 స్థానాలతో ప్రతి పక్షం లో కూర్చోవాల్సి వచ్చింది. ఈ పరిణామాలతో  ఎన్టీఆర్ ఖిన్నుడయ్యారు. అసెంబ్లీ కంటే లోకసభ ఎన్నికల తీర్పు మరీ ఘోరంగా ఉంది. తెలుగు దేశం కేవలం రెండు స్థానాల్లో నే గెలిచింది. ఇక ఎన్టీఆర్ ను కల్వకుర్తి లో పోటీ చేయమని అప్పటి జనతాదళ్ నేత  జైపాల్ రెడ్డి సూచించారు.1969....  1983 లో జైపాల్ రెడ్డి ఇక్కడ నుంచి గెలిచారు. అయితే అక్కడి భౌగోళిక పరిస్థితులు, ఓటర్ల తీరు తెన్నులు, ప్రజల సమస్యలు , ప్రభుత్వ పధకాల అమలు తీరు...  తదితర  అంశాలపై టీడీపీ సరిగ్గా స్టడీ చేయలేదు. కొంతమంది అక్కడ పోటీ చేయ వద్దని చెప్పినా ఎన్టీఆర్ వినలేదు. హిందూ పూర్ ,కల్వకుర్తి రెండు చోట్ల పోటీకి దిగారు.కల్వకుర్తి లో  బంజారాల ఓట్లు 25 వేలకు పైగా ఉన్నాయి. వారంతా   కాంగ్రెస్ అనుకూల వైఖరితో ఉన్నారు. అధికారంలో కొచ్చిన తర్వాత ఎన్టీఆర్ ఆ ప్రాంతంలో అసలు పర్యటించలేదు. అక్కడ ప్రచారం పెద్దగా జరగకపోవడం. ఎన్టీఆర్ కూడా ప్రచారం చివరి రోజు 3 గంటలపాటు ప్రచారానికొచ్చారు.  స్థానిక సమస్యల పట్ల ప్రభుత్వ ఉదాసీనత,టీడీపీ ప్రచారం కోసం ఎవరికి డబ్బులు ఇవ్వకపోవడం వంటి అంశాలు ఆయన ఓటమికి దారి తీశాయి. కాగా  అంతకుముందు 31మంది మంత్రులను బర్తరఫ్ చేయడం, న్యాయస్థానాల్లో ప్రభుత్వ వ్యతిరేక తీర్పులు,  ప్రజల్లో గూడు కట్టుకున్నఅసంతృప్తి వంటి అంశాలు ఓటమి కి దోహద పడ్డాయి .వీటన్నిటితో పాటు పార్లమెంట్ ,అసెంబ్లీ కి కలిపి ఒకేసారి ఎన్నికలు జరగడం కూడా ఎన్టీఆర్ కి మైనస్ అయింది . ఎన్టీఆర్ పై పోటీ చేసిన చిత్తరంజన్ దాస్ కేవలం 3568 ఓట్ల ఆధిక్యత తో గెలుపొందారు. ఎన్టీఆర్ కి 50786 ఓట్లు రాగా చిత్తరంజన్ దాస్ కి 54354 ఓట్లు వచ్చాయి. మరో నలుగురు ఇండిపెండెంట్లు బరిలో ఉన్నారు కానీ వాళ్ళు పెద్దగా ఓట్లు చీల్చలేదు. ఫలితాలకు ముందే ఇంటెలిజెన్స్ అధికారులు ఎన్టీఆర్ గెలవడం కష్టం అని చెప్పారు.. కానీ ఎన్టీఆర్ ప్రజలపై గట్టి నమ్మకం ఉంచారు. అయితే ఆయన అంచనాలు  తారుమారు అయ్యాయి. ఇక హిందూ పూర్ లో మాత్రం గెలిచారు. ఈ చిత్తరంజనుదాస్ 85 లో కూడా కల్వకుర్తి నుంచి గెలుపొందారు.94 లో మాత్రం ఎడ్మ కృష్ణారెడ్డి ఇండిపెండెంట్గా  పోటీ చేయగా ఆయన చేతిలో ఓడిపోయాడు. అది కూడా నాలుగో స్థానం లో నిలిచాడు.  ఎన్టీఆర్ పై గెలిచినప్పుడు మాత్రం మంత్రి గా చెన్నారెడ్డి క్యాబినెట్ లోకి తీసుకున్నారు.తర్వాత నియోజకవర్గంపై పట్టు పెంచుకోలేక పోయారు. అదే సమయంలో మహబూబ్ నగర్  నుంచి లోకసభకు పోటీ చేసిన జైపాల్ రెడ్డి కూడా ఓడిపోయారు.  .... KNMURTHY...
  • శివా రాచర్ల అంటే  అందరికి రాజకీయాలు,ఎన్నికలు, నీటి ప్రాజెక్టులు గుర్తొస్తాయి . శివా కు చరిత్ర , ప్రకృతి, దేవాలయాలు వంటి అంశాలపై కూడా గట్టి పట్టు ఉంది. ఎన్నో స్టోరీస్  వాటిపై రాశారు. తాజాగా శివా రాసిన ఆర్టికల్ ఇది .  కాకతీయ" సామ్రాజ్యం ఒక్క ఓటమితో రాత్రికి రాత్రే ఏలా అంతరించింది? వెరీ ఇంటరెస్టింగ్ సబ్జెక్టు ... చదవండి మరి.   (శివా రాచర్ల ) .....     దక్షిణ భారత చక్రవర్తులు మొత్తం ఆంద్రప్రదేశ్ ప్రాంతాన్ని పాలించిన ఏకైక తెలుగు వంశం "కాకతీయ" సామ్రాజ్యం ఒక్క ఓటమితో రాత్రికి రాత్రే ఏలా అంతరించింది? ఇది స్పష్టమైన సమాధానం లేని ప్రశ్న. అసలు ప్రతాపరుద్రుని మరణంతో కాకతీయ వంశం అంతరించిందా?   ఛతీస్ ఘడ్ కి  ప్రతాపరుద్రుని కుటుంబం వలస వెళ్ళిందా?ఇది కూడ పూర్తి ఆధారాలు లేని ఆలోచన,అదే సంధర్భంలో కొట్టిపారేయటానికి అవకాశంలేని అంశం కూడా ! 2014లొ "ఖ్లిల్లా మైసమ్మ" గుడి యాత్రలో పరిచయమైన సాధిక్ అన్న 2015 ఫిబ్రవరిలో వరంగల్ చుట్టుపక్కల చూడదగిన ప్రాంతాలు చెప్పమని అడగటంతో ఏటూర్ నాగారం అడవి ప్రాంతంలో గోదావరి తీరంలో వున్న "మల్లూరు" నరసింహ స్వామి గుడి గురించి చెప్పాను.ఆగుడిలో విగ్రహం మానవ శరీరంలాగ మెత్తగా వుంటుందంట,వెంట్రుకలు కూడ పెరుగుతాయని నమ్ముతారు.వీటన్నింటిని మించి మల్లూరుకు చారిత్రక ప్రాముఖ్యత వుంది.సాధిక్ అన్న గత వారం రెండవసారి మల్లూరుకు వెళ్ళారు. చరిత్ర కోణంలో అక్కడి విషయాలను పరిశీలించి నిన్న "సమాధులు పిలుస్తున్నాయి" అని పోస్టు పెట్టారు.... నా ప్రశ్న "చతీష్ ఘడ్కు ప్రతాపరుద్రుని కుటుంబం వలస వెళ్ళిందా?"కు సమాధానం "నిజం" అయితే ప్రతాపరుద్రుని కుటుంబం మల్లూరు ద్వారానే వలస వెళ్ళివుంటారనటానికి ఎక్కువ అవకాశాలు వున్నాయి. కొంచం చరిత్రలోకి వెళితే ప్రతాపరుద్రుడు 1290 సంవత్సరంలొ చక్రవర్తి అయ్యారు.1296లో రుద్రమ చనిపోయేంత వరకు ఆవిడ సహాయంతో పాలన కొనసాగించాడు.1300 సంవత్సరం నాటికి ఉత్తరభారతం మొత్తం మహ్మదీయ పాలనలోకి(ఖిల్జి వంశం) వచ్చింది.దక్షిణాదిని కూడ ఆక్రమించాలి అని మాలిక్ కాఫర్ ఆధ్వర్యంలో సేనలను పంపించారు. మాలిక్ కాఫర్ మొదట "దేవగిరి"ని(ఇదే దౌలతాబాద్ పేరుతో తుగ్లక్ పాలనలో దేశ రాజధాని అయ్యింది) గెలిచి ఓరుగల్లు వైపు సైన్యాన్ని నడిపించారు.1303లో ఓరుగల్లు మీద మాలిక్ కాఫర్ నాయకత్వంలో మొదటి దండయాత్ర జరిగింది.ఈ యుద్దంలో డిల్లి సుల్తాన్ సేనలు పూర్తిగా పరాజయం చెంది పారిపోయాయి. ఓటమికి ప్రతీకారం తీర్చుకోవాలని డిల్లి సేనలు మాలిక్ కాఫర్ నాయకత్వంలో 1309లో రెండవసారి ఓరుగల్లు మీద దాడిచేశాయి.యుద్దం నాలుగు నెలల పాటుసాగంది,గెలుపు ఓటములు తేలలేదు కాని కోటలోపల వున్న ప్రతాపరుద్రుని సైన్యానికి తగినంత తిండి దొరకని పరిస్థితి ఏర్పడింది,ప్రజలు ఇబ్బంది పడ్డారు.దీనితో ప్రతాపరుద్రుడు మాలిక్ కాఫర్తో సంధి చేసుకోని డిల్లి సుల్తానుకు కప్పం కట్టటానికి అంగీకరించాడు.ఈ సంధర్భంలోనే కోహినూర్ వజ్రాన్ని ప్రతాపరుద్రుడు డిల్లి సుల్తానుకు బహుమతిగా ఇచ్చారంటారు. డిల్లి సుల్తాన్ అల్లావుద్దీన్ ఖిల్జి సేనలు మాలిక్ కాఫర్ నాయకత్వంలో దక్షిణంగా ప్రయాణినించి పాండ్యులను ఓడించారు,ఈయుద్దంలో ప్రతాపరుద్ర సేనలు డిల్లి సుల్తాన్ తరుపున యుద్దంలో పాల్గొన్నాయి. 1316లొ డిల్లి సుల్తాన్ అల్లావుద్దీన్ ఖిల్జిని మాలిక్ కాఫర్ కుట్రతో చంపటం,ఇది జరిగిన కొన్ని నెలలకే మాలిక్ కాఫరును సొంత సైనికులు చంపటంతో ఖిల్జి వంశం క్షీణించి చివరికి 1320లో ఘియాసుద్దీన్ నాయకత్వంలో "తుగ్లక్" వంశ పాలన మొదలైంది. ఖిల్జి చివరి సుల్తాన్ 1318లో కూడ ఓరుగల్లు మీద దాడిచేశారు.యుద్దం ఎక్కువ రోజులు జరగలేదు, ప్రతాపరుద్రుడు సంధి చేసుకున్నాడు. డిల్లి పీఠంలో వచ్చిన అధికార మార్పులతో ప్రతాపరుద్రుడు మరోసారి కప్పం కట్టటం మానేసి స్వతంత్రుడిగా ప్రకటించుకున్నాడు.దీనితో సుల్తాన్ తన కొడుకు ఉలుగ్ ఖాన్(ఇతనే వాసికెక్కిన మహమద్ బీన్ "తుగ్లక్") నాయకత్వంలో 1323లో ఓరుగల్లు మీదికి దాడికి పంపించాడు. వరుస దాడులతో ఆర్ధికంగా నష్టపోయి వుండటం,సైన్యం కూడ పూర్తిగా కోలుకోక పోవటంతో డిల్లి సేనలు సులభంగా ఓరుగల్లు కోట వరకు రాగలిగాయి. ఓరుగల్లులో ఒకదాని లొపల ఒకటి మొత్తం 7 కోటలు వుంటాయి,అంటే ప్రత్యర్ధులు ప్రతాపరుద్రుని బంధించాలంటే 7 కోటలను జయించాలి. ఆరు నెలలకు పైగా యుద్దం జరిగింది.ఒక్కో కోటను దాటటానికి కొన్ని వారాల సమయం పట్టింది.ఎంతకాలానికి కాక్తీయ సైన్యం లొగకపోవటం, యుద్దం ముగింపుకు రాకపోవటంతో డిల్లిసేనలు గ్రామాల మీద దాడి చేసి దోచుకోని గ్రామాలను తగలపెట్టాయి. చివరికి ప్రతాపరుద్రుడు లొంగక తప్పలేదు. డిల్లి సేనలు ప్రతాపరుద్రుని బంధించి డిల్లికి తీసుకు వెళుతుండగా ఆయన నర్మద నదిలో దూకి ఆత్మత్యాగం చేసుకున్నాడు. అయితే ప్రతాపరుద్రుని కుటుంబం,మిగిలిన కాకతీయ వశస్తులు ఏమయ్యారు అన్నదాని మీద స్పష్టతలేదు. ప్రతాపరుద్రుని కొడుకు "కృష్ణుడు" హరిహర & బుక్కరాయల తరుపున విజయనగర స్థాపనలొ పాలుపంచుకున్నాడని కొందరు చరిత్రకారులు రాశారు.చాలా మంది కాకతీయ వంశస్తులు చత్తీష్ ఘడ్కు వలస వెళ్ళారని మరికొందరు రాశారు. కాకతీయ వంశస్తులు ఓరుగల్లు నుంచి చత్తీష్ ఘడ్కు ఏలా వెళ్ళి వుంటారు అన్న ప్రశ్నకు "మల్లూరు" ద్వారా వెళ్ళి వుంటారని అనిపిస్తుంది. ఓరుగల్లు కోటలో రహస్య మార్గాలు,సొరంగాలు వుండి వుంటాయి అన్నదాంట్లొ అతిశయోక్తి లేదు.ఇలాంటి సొరంగ మార్గంలో కోట నుంచి బయటపడిన కాకతీయ వంశస్తులు అడవి మార్గం ద్వార మల్లూరు కోటకు చేరివుండవచ్చు. మల్లూరు గుట్టల మీద కోట గోడ ఇప్పటికి వుంది.ఇక్కడి నుంచి గోదావరి నదిని దాటి అటు వైపు వున్న చర్ల కోట లేక ప్రతాపరుద్రుని మరో కోటలోనో తాత్కాలిక విరామం తీసుకోని "తాలిపేరు" నది మార్గంలో చత్తీష్ ఘడ్కు వెళ్ళివుంటారని నా అభిప్రాయం. సాధిక్ అన్న మల్లూరు గుట్టల మీద వందల కొద్ది "సమాధు"లను చూశారు.ఇవి డొల్మైనలలాగ కనిపిస్తున్నాయి.మల్లూరు గుట్టల మీద కనిపించిన గుట్టల కొద్ది కంకర కలిసిన చిన్న రాళ్ళ గుట్టలు "చరిత్ర"లొ బయటపడని రహస్యానికి సాక్షంగా వున్నాయి. అప్పట్లో సున్నం,నల్ల బెల్లం,కోడి గుడ్డు సొనను కలిపి కాంక్రీట్ మిశ్రమంలాగ తయారుచేసి నిర్మాణాలకు వాడేవారు. ఇప్పుడు మల్లూరు గుట్టల మీద కఅనిపిస్తున్న చిన్న చిన్న రాళ్ళు ఇవే అయ్యుండటానికి అవకాశం వుంది. కాకతీయుల వంశం అంతరించి వుండవచ్చు కాని ప్రతాపరుద్రుడు మరణించిన 10-13 సంవత్సరాలకేే ఓరుగల్లు కాకతీయుల మాజి సామమంతులైన "ముసునూరి" నాయకుల పాలనలోకి వచ్చింది. 1323లో ప్రతాపరుద్రుడు మరణించిన తరువాత తుగ్లక్ సేనలు దక్షిణానికి వెళ్ళి కర్నాటక,తమిళనాడు ప్రాంతాలను అక్కడి నుంచి ఉత్తరానికి ఒరిస్సా వరకు మొత్తం ప్రాంతాని జయించారు.వీరు స్థిర నివాసం ఏర్పరుచుకోని పాలన చెయ్యకుండ ప్రతినిధులను ఏర్పాటు చెశారు. వీరి పాలనలో దోపిడి,పన్నులు ఎక్కువ కావటంతో కాకతీయుల మాజి సామంతులు, అప్పటి సైన్యాధక్షులు అయిన ముసునురు ప్రోలయ నాయకుడు, అద్దంకి ప్రోలయ వేమారెడ్డి,రేచర్ల సింగమ నాయకుడు లాంటి 70 మందికి పైగా ఏకమై మొదట కొస్తా ప్రాంతాన్ని డిల్లి సుల్తాన్ నుంచి విముక్తి చేశారు. చివరిగా 1336లో ఓరుగల్లును జయించి డిల్లి సుల్తాన్ పాలనను అంతమొందించారు. ఆవిధంగా ప్రతాపరుద్రుడు మరణించిన 13 సంవత్సరాలకే ఓరుగల్లు తిరిగి వారి అనుచరులకు సొంతమైంది. అయితే ఇది చివరి యుద్దం కాదు.డిల్లి సుల్తాన్ తరువాత దాడులు చేశారు కాని ఎవరి పాలన ఎక్కువ రోజులు కొనసాగలేదు. విజయనగర సామ్రాజ్యం ఏర్పడిన తరువాత మహ్మదీయులకు వారితో యుద్దాలు ఎక్కువ జరిగాయి. నేను రాసిన ఈచరిత్రకు అనేక పుస్తకాలు ఆధారం,అందులో ఏటుకూరి బలరామ మూర్తి గారు రాసిన "ఆంధ్రుల సంక్షిప్త చరిత్ర" ముఖ్యమైనది....
  • ( SUSRI ) .......  మనలో చాలామందిమి అనుకుంటాం " నేను అతడికి సహాయం చేస్తే నాకేమిటి ప్రయోజనం ?"  అతడు అనుకున్నాడు " నేను సహాయ పడకపోతే వాళ్ళకి ఎవరు సహాయ పడతారు ? అని  స్టాన్ ఫోర్డ్ యూనివర్సిటీ లో 1892 లో జరిగిన వాస్తవంగా జరిగిన కధ !. 18 సంవత్సరాల ఆ యువకుడు ఫీజులు కట్టలేక ఏమి చెయ్యాలో తెలీని స్థితిలో ఉన్నాడు . అతడు తల్లి తండ్రులు లేని అనాధ !  అతడూ అతడి స్నేహితుడూ కలిసి ఒక పధకం ఆలోచించారు . వాళ్ళ యూనివర్సిటీ లో ఒక సంగీత కచేరీ ఏర్పాటు చేద్దామనీ , అందులో ఖర్చులు పోను మిగీన దానితో తమ ఫీజులు కట్టెయ్యవచ్చు అనీ నిర్ణయించుకున్నారు .  అప్పట్లో గొప్ప పియానో వాద్య కారుడు Iఇగ్నాస్ జె పథేర్స్కి  వద్దకు వెళ్ళారు . ఆయన మేనేజరు ఫీజు రూపం లో 2000 డాలర్లు కనీస మొత్తం గా ఇవ్వాలనీ , ఆ పైన ఇతర ఖర్చులు అనీ  ఒప్పందం చేసుకున్నారు. వీళ్ళు అంగీకరించారు. టికెట్లు అమ్మడం సాగించారు. అనుకున్న రోజు వచ్చింది . ప్రోగ్రాం అద్భుతం గా జరిగింది . అయితే వీళ్ళు అనుకున్నట్టు వసూళ్లు రాలేదు . మొత్తం 1600 డాలర్లు మాత్రమే వచ్చింది .  వాళ్ళు పథేర్స్కి దగ్గరకు వెళ్ళారు. వసూలు అయిన మొత్తమూ , 400 డాలర్లకు చెక్కూ పట్టుకు వెళ్లి జరిగిన మొత్తం విషయం చెప్పారు.సాధ్యమయినంత త్వరలో ఆ మిగిలిన సొమ్ము చెల్లిస్తాము అనీ , క్షమించమనీ అన్నారు .  వాళ్ళ గురించి పథేర్స్కి కి తెలీదు. ఆయన వాళ్ళని అతకు ముందు చూడలేదు.ఆయన ఆ చెక్కును చింపేశాడు. 1600 డాలర్లూ వాళ్ళ చేతిలో పెడుతూ వాళ్ళతో ఆయన ఇలా అన్నాడు " మీకు అయిన ఖర్చులు ఎంతో లెక్క పెట్టుకోండి . మీ ఫీజులకు ఎంత అవుతోందో అది కూడా ఇందులో నుండి మినహాయించుకోండి . ఏమైనా మిగిలితే ఆ మిగిలిన సొమ్ము నాకు ఇవ్వండి "  ఈ సంఘటన  పథేర్స్కిమానవతను చాటి చెబుతుంది . తనకు తెలీని, తనకు ఏమీకాని, వారి వలన ఎటువంటి ప్రయోజనమూ ఆశించకుండా తన శ్రమనూ,తన ఆదాయాన్నీ ఇవ్వడం పథేర్స్కిహృదయం గురించి చెబుతోంది కదూ !  మనలో చాలామందిమి అనుకుంటాం " నేను అతడికి సహాయం చేస్తే నాకేమిటి ప్రయోజనం ?"  అతడు అనుకున్నాడు " నేను సహాయ పడకపోతే వాళ్ళకి ఎవరు సహాయ పడతారు ? అని  అదే ఉత్తములకీ మనకీ తేడా !  ఇది ఇక్కడితో ఆగిపోలేదు  పథేర్స్కి తర్వాత కాలం లో పోలాండ్ ప్రధాని అయ్యారు .  రెండో ప్రపంచ యుద్ధం లో పోలాండ్ సర్వ నాశనం అయిపొయింది . 15 లక్షల మంది ఆకలితో అలమటించే స్థితికి చేరారు .  పథేర్స్కి కి ఏమి చెయ్యాలో తోచలేదు . ఎవరిని అడగాలో తోచలేదు . చివరికి అమెరికా  ఆహార , పునరావాస విభాగాన్ని సంప్రదించాడు . దానికి అధిపతి హెర్బర్ట్ హూవర్.  ఇతడే తర్వాత అమెరికా అధ్యక్షుడు కూడా అయ్యాడు. అతడు వెంటనే ప్రతిస్పందించాడు.టన్నులకొద్దీ ఆహార పదార్ధాలు పోలాండ్ కు సరపరా జరిగింది.  పోలాండ్ లో ఆహార సంక్షోభం నివారించబడింది.    హెర్బర్ట్ హూవర్ చేసిన సహాయానికి కృతజ్ఞతలు చెప్పడానికి పథేర్స్కి అమెరికా వెళ్లి హూవర్ ను కలిశాడు . కృతజ్ఞతలు చెబుతూ ఉండగా హూవర్ అన్నాడు  " కొన్నిసంవత్సరాల క్రితం మీరు కాలేజీ ఫీజు కట్టలేని ఇద్దరు యువకులకు సహాయం చేశారు. వారిలో నేను ఒకడిని " అన్నాడు.   ఈ ప్రపంచం ఒక అద్భుతమైన ప్రదేశం . నీవు ఏది ఇస్తావో అది నీవు అనేక రెట్లు పొందుతావు అనే గీతాసారం ఇది ....