Latest News
సమ్‌థింగ్ స్పెష‌ల్‌
  • (VASIREDDY VENUGOPAL)    అయ్యప్ప ఆలయంపై రాజకీయాలు ఈనాటివి కావు. భారతదేశానికి స్వాతంత్ర్యం వచ్చిన కొత్తలోనే.. 1950లో శబరిమల అయ్యప్ప ఆలయాన్ని క్రైస్తవులు పూర్తిగా నేలమట్టం చేశారు. దీని నేపథ్యాన్ని గురించి కొద్దిగా తెలుసుకుందాం. భారత రాజ్యాంగం 238 అధికరణం క్లాజ్ 10, సబ్ క్లాజ్ 2 ప్రకారం ట్రావెంకోర్ ప్రభుత్వం హిందూ దేవాలయాల నిర్వహణ నిమిత్తం ఏటా 51లక్షల రూపాయలను చెల్లించవలసి వుంది. ఈ క్లాజును క్రైస్తవులు, ముఖ్యంగా కాథలిక్కులు తీవ్రంగా వ్యతిరేకించి ఆందోళనకు దిగారు. నిజానికి ఆ రాజ్యాంగ నిబంధన లేకపోతే అన్ని హిందూ దేవాలయాలు, వాటి ఆస్తులు దిక్కూదివానం లేకుండా పోయేవి. దేవాలయాలు నేలమట్టం, ఆస్తులు పరాధీనం అయ్యేవి. ఈ నేపథ్యంలో అప్పటి కాంగ్రెస్ ముఖ్యమంత్రి నారాయణ పిళ్లైపై కాథలిక్కులు చాలా వత్తిడి తెచ్చారు. ఆలయాలను సాధారణ నియంత్రణకు తీసుకొస్తూ బిల్లును ప్రవేశపెట్టాలని, క్రైస్తవ ఎమ్మెల్యేలు అందరి మద్దతు మీకు వుంటుందని భరోసా ఇచ్చారు. కాంగ్రెస్ పార్టీకే చెందిన నాయకులు ఎం.పద్మనాభన్, ఆర్.శంకర్ ఈ బిల్లుకు వ్యతిరేకంగా, హిందూ దేవాదాయ వ్యవహారాల్లో క్రైస్తవుల జోక్యాన్ని నిరసిస్తూ రాష్ట్రవ్యాప్త ఉద్యమం చేపట్టారు. శాసనసభలో ఈ బిల్లు వీగిపోయింది. పార్టీ విప్ ని ధిక్కరిస్తూ 14మంది హిందూ ఎమ్మెల్యేలు బిల్లుకు వ్యతిరేకంగా ఓటు వేశారు. ఆ 14మంది ఎమ్మెల్యేలను కాంగ్రెస్ పార్టీ 1950 జూన్ 16న పార్టీనుంచి బహిష్కరించింది. సరిగ్గా ఈ సమయంలోనే ఎం.పద్మనాభ పిళ్లయ్.. తన కులానికి సంకేతమైన పిళ్లయిని తొలగించుకుని.. చెల్లాచెదురు అయిన హిందూ సమాజ ఐక్యతకోసం నిలిచారు. పద్మనాభన్, శంకర్ లు ట్రావెంకోర్ లో రెండు వేర్వేరు ప్రధాన కులాలకు చెందినవారు. వీరిద్దరూ చేతులు కలపడాన్ని హిందూ సమాజం ఘనంగా స్వాగతించింది. ఆ తర్వాత కేరళ హిందూ సమాజంలోని అనేక ఉపకులాలు ఏకతాటిపైకి వచ్చాయి. ఇదే సమయంలో కేరళ ముఖ్యమంత్రి నారాయణ పిళ్లయ్.. కమ్యూనిస్టులను అమానుషంగా ఊచకోత కోయడం మొదలెట్టాడు. సరిగ్గా అదే సమయంలో కేరళలో హిందూ దేవాలయాల విధ్వంసం పెద్ద ఎత్తున సాగింది. 1950లో శబరిమల ఆలయాన్ని పూర్తిగా నేలమట్టం చేశారు. ఈ సంఘటనపై సీనియర్ పోలీసు అధికారి కేశవ మీనన్ కమిషన్ నివేదిక ఇలా చెబుతోంది.. ‘‘క్రైస్తవులు, ముఖ్యంగా చదువుకోని, నిరక్షర రోమన్ క్యాథలిక్కులు కొన్ని కారణాలవల్ల ఈ పురాతన ఆలయాన్ని ధ్వంసం చేశారు’’ 1953 మార్చిలో క్రైస్తవ నాయకుడు, నాటి హోంమంత్రి టి.ఎం.వర్ఘీస్.. శబరిమల సంఘటన తర్వాత రాష్ట్రంలో 105 ఆలయాలు ధ్వంసం అయ్యాయని అసెంబ్లీలో ఒప్పుకున్నారు. ఈ సంఘటనలు, రాజకీయ, మత పరిణామాల నేపథ్యంలో తమ దేవతలను, ముఖ్యంగా శబరిమల అయ్యప్పను ఘనంగా పూజించుకోవాలనే భావన హిందువుల్లో బలంగా వేళ్లూనుకుంది.  ...
  • రావణుని వారసులమని చెబుతున్న ఒక తెగ మధ్యభారతంలోఉంది.  దేశంలో రెండో అతి పెద్ద తెగైన గోండులకు రావణుడు రాజు, దేవుడు. పశుపక్ష్యాదులను పూజించే ఆ అడవి బిడ్డలకు అతడు ప్రకృతి దైవం. పదో ధర్మగురువుగా రావణున్ని  గోండులు కొలుస్తారు. రావణుడు వారి పూర్వ వీరుడు, ఆది దేవుడు అయిన కుపార్‌ లింగో వారసత్వాన్ని ముందుకు తీసుకెళ్లినందుకు గుర్తుగా రావణ మహోత్సవాన్ని ప్రతి ఏటా నిర్వహిస్తున్నారు.  చూస్తుంటే ... రామాయణంలోని రావణుడికి ఈ రావణుడి కి సంబంధం లేదు అనిపిస్తుంది. వీరి కథలోని రావణుడి వ్యక్తిత్వానికి రావాణాసురుడికి పోలికలేదు. తీరు వేరుగా ఉంది.వీరి కథలో, జానపదాల్లో ఆయనో మహావీరుడు. వారి పూర్వ రాజు. అతడి పుట్టుక శ్రీలంకలో కాదు మధ్యప్రదేశ్‌లోని అమర్‌ కంఠక్‌ వద్ద. ఈ రావణుడు బ్రాహ్మణుడు కూడా కాదు. గోండుల వంశీకుడు. వీరి  జానపదాల్లో రావణుడిది ఆదర్శ వ్యక్తిత్వం. 18 సంగీత పరికరాల్ని సాధన చేయగల దిట్ట. పోరాట యోధుడు. ధర్మగురువు. గోండులకు దసరా అంటే ఆయుధాల్ని పూజించే పండగ. వన దేవతగా వీరు  రావణున్నికొలుస్తారు.మహారాష్ట్రలోని గడ్చిరోలి, అమరావతి, మధ్యప్రదేశ్‌లోని విదిశా, మందసార్‌లతో పాటు గోండుల జనాభా ఎక్కువగా ఉన్న గోండియా, చందర్‌పూర్‌, భండారలోను జరుగుతుంది.  30 లక్షల మంది గోండి తెగ వారు ఉన్నా వారికి లిపి లేదు. అందుకే వారి చరిత్ర అక్షరీకరించబడలేదు. కొన్నేళ్ల వరకు ఈ పూజను ఇళ్లల్లోనే చేసుకునేవారు.  తమ చరిత్ర, సంస్కృతిని సంరక్షించుకునేందుకు ఓ సంఘంగా ఏర్పడి సంబరాల్ని నిర్వహించుకుంటున్నారు.   గోండులు రావణుడి కోసం ఏటా  ప్రత్యేక సంబరం నిర్వహిస్తారు.  గడ్చిరోలిలోని పరస్వాది గ్రామంలోని వేడుక కూడా ప్రత్యేకంగా ఉంటుంది. పసుపు పచ్చటి దేహంతో ఉండే  రావణుడి రెండున్నర అడుగుల ప్రతిరూపాన్ని రూపొందిస్తారు. ఆ విగ్రహానికి వారి సంప్రదాయ సేల అనే శాలువా తో  అలంకరిస్తారు. గోండుల నమ్మకం ప్రకారం పసుపు రంగు సృష్టి-వినాశనాలకు సంకేతం. ఎంతో ముచ్చటగా ముస్తాబు చేసిన ఈ రావణ ప్రతిరూపాన్ని ఏనుగు వాహనంపై ఊరేగింపుగా  తీసుకెళతారు. వాహనాన్ని గడ్డి, బంకమట్టితో నిర్మించి రంగులతో అలంకరిస్తారు. ఇనుప చక్రాల మీద వాహనాన్ని ఊరిలోని ప్రధాన వీధుల్లో తిప్పుతూ ఊరేగిస్తారు.  గ్రామ ప్రజల ఇళ్ల మధ్యలోకి వచ్చి దీవెనలిచ్చాక పంట భూముల వరకు ఊరేగింపు సాగుతుంది. ఆ తర్వాత విగ్రహాన్ని తిరిగి పూజా మండపాలకు తీసుకెళతారు. ఎక్కడి వరకు ఊరేగింపు సాగిందో అక్కడ ఒక ఇంద్రధనస్సు జెండాను స్థాపిస్తారు. భూమ అనే పూజారి ధాన్యపు గింజల్ని ఊరంతా చల్లుతూ అంతా శుభం కలగాలని దీవిస్తాడు. పది రోజుల పాటు నిర్వహించే ఉత్సవంలో పసుపు రంగే కీలకం. గోండులు నమ్మే ప్రతీకల్లో ముఖ్యమైన ఎద్దు కొమ్ములతో చేసిన చిహ్నాన్ని కూడా ప్రదర్శిస్తారు.  మణి రావణ దుగా అనే ఉపాధ్యాయుడు గోండుల ఆచార వ్యవహారాల్ని పరిరక్షించే ఉద్యమాన్ని చేపట్టారు. ఈ రావణ మహోత్సవం కూడా అందులో భాగమే.తమ పూర్వీకుడు, పెద్ద అయిన రావణుడి కథ, తమ చరిత్ర వక్రీకరణకు గురైందనే గోండులు అంటారు .  ఇక్కడ పూజింపబడుతోంది ఆదర్శ వ్యక్తిత్వం, విలువలు, వీరత్వం ఉన్న రావణుడు. ఇతరులు పేర్కొన్న దుష్ట లక్షణాలున్న రావణుడికి వీరి ధర్మగురువుకి సంబంధం లేదని వారంటారు. ...
  • ( Vasireddy Venugopal )   దాదాపు పదిహేనేళ్ల క్రితం ఆంగ్లంలో ఒక కథ చదివాను. దానిని ప్రింటవుట్ కూడా తీసుకుని అనేక ఏళ్లు భద్రపరచుకున్నాను. ఎప్పటికయినా దానిని తెలుగీకరించాలని ఒక ఆశ వుండేది. ఆంగ్లమూ, తెలుగూ రెండూ రాని కారణంగా అప్పట్లో ఆ సాహసం చేయలేదు. ఇప్పుడు కొంచెం ధైర్యం వచ్చినా.. మూల ప్రతి దొరకడంలేదు. సర్దార్ వల్లభాయ్ పటేల్ భారీ విగ్రహం, డాక్టర్ అంబేద్కర్ భారీ విగ్రహం, రామానుజాచార్యుల భారీ విగ్రహం.. ఇలాంటి నేపథ్యాలలో ఆ కథను పరిచయం చేద్దాం అనుకున్నా కానీ.. అందుబాటులో లేదు. గుర్తున్నంతలో చెబుతాను. ఒక ఆదిమ తెగ వుంటుంది. ఒక విగ్రహం ఏర్పాటు చేసుకుంటుంది. ఆ తెగ విస్తరించి కొత్త కులపెద్ద వస్తాడు. విగ్రహం నమూనా మార్చి పెద్దది కట్టిస్తాడు. అది రాజ్యంగా మారుతుంది. మళ్లీ మార్చి ఇంకా పెద్దది కట్టిస్తారు. సామ్రాజ్యంగా మారుతుంది. ఇంతకు ముందు ఇనపది వున్నది కాస్తా బంగారు విగ్రహంగా కూడా మారుతుంది. అసలు ఆ విగ్రహం ఆకాశంలోంచి చూసినా కనిపించేంత పెద్దది అవుతుంది. పాత.. చిన్న తెగలో వున్న ఒక గణం.. కాలక్రమేణా బలం పుంజుకుంటుంది. సామ్రాజ్యంపై దండయాత్ర చేస్తుంది. ముందుగా సామ్రాజ్యానికి చిహ్నంగా వున్న విగ్రహాన్ని ధ్వంసం చేస్తుంది. బాహుబలి సినిమాలో ఇలాంటి దృశ్యాన్ని చూడవచ్చు. కమ్యూనిస్టులు రాజ్యాధికారంలోకి వచ్చారనడానికి, సైనిక తిరుగుబాట్లు జరిగి అధికారంలోకి వచ్చారనడానికి సంకేతంగా.. ముందుగా రేడియో స్టేషన్లను స్వాధీనం చేసుకోవడాన్ని కూడా చరిత్రలో చూడవచ్చు. నక్సలైట్లు కూడా ఎక్కువగా టెలిఫోన్ టవర్స్ పేల్చివేత లక్ష్యంగా పనిచేశారని మనం మరువరాదు. సమాచార విస్తరణను నిరోధించడం వారి ప్రధాన ఉద్దేశం కావొచ్చు. రష్యా, చైనాలలో ప్రభుత్వాధినేతలు చనిపోయి వారం పదిరోజులు అయినా, పీనుగలు కుళ్లి కంపుకొడుతున్నా.. ఆ సమాచారం బాహ్యప్రపంచానికి తెలియకపోవడం కూడా మనకు అనుభవమే.  ఇక పోతే.. విగ్రహాలు ఎల్లకాలం స్థాపిత సమయంనాటి విలువను, స్థాపిత సమాజంనాటి గౌరవాన్ని కలిగివుండవు. చాలా మంది విగ్రహాలు జయంతి, వర్ధంతి రోజుల్లో బతికున్న నాయకులు వేసే దండల ఫోటోలకే తప్ప.. మిగతా రోజుల్లో కపోతాలు, కాకుల రెట్టలకు వేదికగా వుండడం చేదు వాస్తవం. దారిన పోయే ఏ దానయ్యా ఆ విగ్రహాల మొహం కూడా చూడడు. ఇంద్రవెల్లి స్థూపానికే సందర్శకుల దిక్కులేదు.. ఇక ఊరూరా అమరులయిన కామ్రేడ్ల స్థూపాల గురించి చెప్పనక్కర్లేదు. విగ్రహాల పట్ల కాలానుగుణంగా ప్రజల్లో వచ్చే ఆలోచనల్లో మార్పులకు పరాకాష్ట.. రష్యాలో లెనిన్ విగ్రహాన్ని కూల్చడం, ఇరాక్ లో సద్దాం హుస్సేన్ విగ్రహాన్ని కూల్చడం. తెలంగాణ ప్రత్యేక రాష్ట్ర ఉద్యమ సమయంలోనూ ట్యాంకుబండుపై విగ్రహాల కూల్చివేత జరిగింది. ఈ కూల్చివేతలో ప్రధాన భాగస్వాములు అతివాద కమ్యూనిస్టులే తప్ప ఉద్యమానికి సారధ్యం వహించిన తెలంగాణ రాష్ట్ర సమితి కాకపోవడం గమనార్హం. ఈ సందర్భంగా ఒక జోక్ చెప్పి ముగిస్తాను. లెనిన్ గ్రాడ్ లో యుఎస్ఎస్ఆర్ కమ్యూనిస్టు పార్టీ పొలిట్ బ్యూరో మీటింగ్ జరుగుతోంది. అర్ధరాత్రి అయినా చర్చలు తెగట్లేదు. కృశ్చేవ్ గారు చుట్టముట్టించుకోవడానికి బయటికి వచ్చారు. అక్కడ సోవియట్ పోరాటయోధుడు జెర్జనిస్కీ విగ్రహం వుంది. గుర్రంమీద ఠీవిగా కూర్చుని వుండే విగ్రహం. కృశ్చేవ్ ని చూడగానే... ఏంటి కృశ్చేవ్.. నా గురించి పట్టించుకోరా? ఈ గుర్రం చూడు ఎంత ముసలిదైపోయిందో.. కొత్త గుర్రం ఇవ్వొచ్చుగా అంటాడు జర్జనిస్కీ. కృశ్చేవ్ బిత్తరపోతాడు. ఒక విగ్రహం మాట్లాడడం ఏమిటి? ఏమిటీ వింత? అనుకుంటూ చుట్ట అవతల పారేసి పొలిట్ బ్యూరో మీటింగ్ హాలులోకి వెళతాడు. పక్కనే వున్న బ్రెజ్నేవ్ కి జరిగిన సంగతి యావత్తూ పూసగుచ్చినట్టు చెప్పి.. కావాలంటే నువ్వే చూద్దువుగాని రా అని విగ్రహం దగ్గరకు తీసుకెళతాడు. అప్పుడు కృశ్చేవ్ ని ఉద్దేశించి జర్జినిస్కీ ఏమంటాడంటే.. ఏంటి కృశ్చేవ్? నేను గుర్రాన్ని అడిగితే.. ఈ గాడిదను తెచ్చావు! అని అంటాడు.....
  • వివాహ బంధం దంపతుల మధ్య ముళ్ల బంధంగా మారుతోంది . మూడు ముళ్ళు.... ఏడు అడుగులకు అర్ధాలే మారుతున్నాయి .   నూరేళ్ళు కలసి మెలసి పిల్లాపాపలతో జీవితాన్ని గడపాల్సిన దంపతులు కొంత కాలానికే పోలీసు స్టేషన్ల గుమ్మాలు తొక్కుతున్నారు. అనుమానంతో కొంతమంది, వివాహేతర సంబంధాలు, ఆర్థిక పరిస్థితులు సరిగ్గా లేక అదనపు కట్నాల వేధింపుల నేపథ్యంలో  భార్య భర్తలు రోడ్డెక్కుతున్నారు.  ప్రతీ చిన్నవిషయానికి ఘర్షణలు పడుతూ దూరమవుతున్నారు. తల్లిదండ్రులకు తీరని క్షోభను మిగులుస్తున్నారు. ఇటీవలి కాలంలో  పోలీసుస్టేషన్‌ల్లో భార్యాభర్తల మధ్య ఫిర్యాదులు పెరిగిపోతున్నాయి. భార్యాభర్తలతో పాటు ఇరువైపుల పెద్దలను పిలిపించి కౌన్సిలింగ్‌ ఇచ్చే పనిలో పోలీసులు నిమగ్నమయ్యారు.  ఏ పోలీస్టేషన్‌లో చూసినా భార్యాభర్తల మధ్య విభేదాలు , ఒకరిపై ఒకరు పెట్టుకుంటున్న కేసులే ఎక్కువయ్యాయి.  భార్య, భర్త లేదా అత్తమామలపై అనుమానిస్తున్నారని, కట్నం తేవాలని, మద్యం తాగి కొడుతున్నాడని ఇలా పలు రకాలుగా ఫిర్యాదులు చేస్తున్నారు .  పోలీసు స్టేషన్‌ల గుమ్మాలు ఎక్కిన కేసులు కొన్ని మాత్రమే. ఇవి కాక  గ్రామ పెద్దలు, కుటుంబ పెద్దల వద్ద నలిగే గొడవలు చాలా ఉంటాయి. భార్య, భర్తల మధ్య విభేదాలు, అనుమానాలతో కాపురాలు కూలిపోతున్నాయి.   అర్ధాంతరంగా ఎన్నో కుటుంబాలు రోడ్డున పడుతున్నాయి. ఇరువురు  పంతాలకు పోతుండటంతో  తల్లిదండ్రుల చాటున బతికిన వారి పిల్లల భవిష్యత్‌ ప్రశ్నార్థకంగా మారుతోంది. బాధిత భార్య,భర్తలు, ఇరు వర్గాల తల్లిదండ్రులు స్టేషన్‌ల చుట్టూ తిరగాల్సిన పరిస్థితి నెలకొంది. ఈ క్రమంలో చివరికి భార్యో, భర్తో ఎవరో ఒకరు అన్యాయం కాక తప్పడం లేదు.  ఇదివరలో  భర్త నుండి కానీ, భర్త వైపు వారినుండి కాని ఎటువంటి ఇబ్బందులు వచ్చినా భరిస్తూ కాపురం చేసేవారు, ఒకవేళ తల్లి తండ్రులకు చెప్పినా ఏదోవిధంగా సర్దుకుపొమ్మని సలహా ఇచ్చేవారు లేదా ఏదో రకంగా ఇరువురికి ఇబ్బంది కలుగ కుండా, పరువు రోడ్డున పడకుండా పరిష్కారం చేసేవారు. అప్పటి సామాజిక పరిస్థితుల్లో విడాకులు, భార్య భర్తలు విడి విడిగా ఉండటం అంటే ఎంతో అవమానకరంగా, పరువు తక్కువగా భావించేవారు. తల్లి తండ్రులు, మధ్యవర్తులు  ఏదో రకంగా సర్ది చెప్పి విడాకుల వరకు వెళ్ళకుండా   పరిష్కరించే వారు. స్త్రీ ఆర్ధికంగా బలహీనురాలు కావటం, సమాజంలో విడాకులు తీసుకున్న స్త్రీ పట్ల చిన్న చూపు ఉండటం వలన కూడా ఎన్ని కష్టాలు, ఇబ్బందులు పడినా ఒక రకంగా స్త్రీలే సర్దుకు పోయేవారు. అయితే కాలక్రమేణా సమాజంలో వచ్చిన మార్పులకు అనుగుణంగా స్త్రీలకు రాజ్యాంగంలో కొన్ని ప్రత్యెక హక్కులు, అధికారాలు కల్పించబడ్డాయి. తండ్రి ఆస్తిలో పురుషులతో సమానంగా స్త్రీలకు ఆస్తి హక్కు కల్పించారు, ఇదే సమయంలో 'ఉమ్మడి కుటుంబ' వ్యవస్థ విచ్చిన్నమై  వేరు కాపురాల వ్యవస్థ ఏర్పడింది. కొత్త పెళ్ళైన భార్యా భర్తలకు మంచి చెడు చెప్పే వారు, చిన్న చిన్న తగాదాలు తీర్చే వారే కరువయ్యారు. ఉద్యోగ రీత్యా తమ తల్లి తండ్రులకు దూరంగా ఉండే కుటుంబాలకు ఈ సమస్య మరీ ఎక్కువగా ఉంది.  ఈ మధ్య కాలంలో పురుషులలో 'పురుషాధిక్య' ధోరణి తగ్గి ఉద్యోగం, వ్యాపకాల మీద, కెరీర్ మీద ఎక్కువగా దృష్టి పెడ్తున్నారు, కానీ ఉద్యోగం చేసే కొంత మంది స్త్రీలలో 'స్త్రీవాద'ధోరణి ఎక్కువైంది. అలాగని ఉద్యోగం చేయని వాళ్ళేమీ తక్కువ తినలేదు, కొంతమంది స్త్రీలు తమ కోరికలు తీర్చుకోవటానికి భర్తలను రాచి రంపాన పెడుతున్నారు.  గతంలో కాపురాల్లో వచ్చే గొడవల్లో ఎక్కువగా స్త్రీలే భాదితులుగా ఉండేవారు,ఇపుడు  'భార్యా భాదితులే' కూడా ఉన్నారు.  దంపతుల మధ్య ఏర్పడిన చిన్న చిన్న కలహాలు కూడా విడాకుల వరకు దారి తీస్తున్నాయి. పురుషులు శారీరకంగా బలవంతులైనా కాని స్త్రీలు మానసికంగా పురుషుల కంటే ఎంతో బలవంతులు. చాలా సందర్భాల్లో భర్తలే సర్దుకుపోటానికి సిద్ధపడుతున్నా భార్యలు మాత్రం అందుకు ససేమిరా ఒప్పుకోవటం లేదు, వాళ్ళ కోరికలు నెరవేర్చుకొనే వరకు, పంతం తీర్చుకోటానికి ఎంతవరకైనా వెళ్తున్నారు.  దంపతులు  పంతం, పగ, ప్రతీకారం తీర్చుకోటానికి  ఎంతకైనా తెగిస్తున్నారు, కాపురాలను నాశనం చేసుకుంటున్నారు.  రెండు చేతులు కలిస్తేనే చప్పట్లు, కాపురంలో ఏర్పడే కలహాల్లో భార్య, భర్తల ఇద్దరి పాత్ర ఉంటుంది, కాకపొతే ఒకరిది ఎక్కువ, ఇంకొకరిది తక్కువ. తప్పెవరిదైనా భార్య, భర్తలిద్దరూ సర్దుకుపోతే చాలా మంచిది, లేదా ఒకరు సర్దుకున్నా కాని సమస్య జటిలం కాకుండా ఉంటుంది. భార్య, భర్తల మధ్య సమస్య పరిష్కారం కానప్పుడు మొదటగా ఇరువురి తల్లి తండ్రుల సమక్షంలో తీర్చుకోవటం మంచిది. అలా కాకుండా పోలీస్ స్టేషన్స్ కు వెళుతున్నారు. కేసులు పెట్టుకుని కోర్టులు చుట్టూ తిరుగుతున్నారు. ఇంకొందరు ఉన్మాదంలో హత్యలకు కూడా దిగుతున్నారు.  కుటుంబ న్యాయస్థానం, ఫ్యామిలీ కౌన్సిలర్స్ పరిశీలన ప్రకారం  అహం , పంతాలు, పట్టింపుల వంటి చిన్న చిన్న కారణాల వల్లనే ఎక్కువమంది విడాకులు తీసుకుంటున్నారు. పిల్లున్న వారి కేసుల్లో తప్పు ఎవరిదైనా చివరకు పిల్లల భవితవ్యం బలి అవుతోంది. ...
  • ఆమె పేరుకే రాజు కుమార్తె. కానీ స్వేచ్ఛ లేదు . బయట ప్రపంచాన్ని ఎపుడూ చూడలేదు. గాలి వెలుతురు లేని చీకటి గదిలో మూడేళ్ల పాటు బంధించి చిత్రహింసలు పెట్టారు . ఇదంతా కన్న తండ్రే  చేశారని అంటారు.  ఆ కన్న తండ్రి మరెవరో కాదు  దుబాయ్‌ రాజు షేక్‌ మహమ్మద్‌ బిన్‌ రషీద్‌ అల్‌ మకతూమ్‌.  ఆరుగురు భార్యలున్న ఈ  దుబాయ్‌ రాజు కి పుట్టిన  30 మంది సంతానంలో లతీఫా ఒకరు.  ఆమె పూర్తి పేరు  షికా లతీఫా. వయసు 33 ఏళ్ళు . తాను తిరుగుబాటు చేయడంతోనే మూడేళ్లపాటు  నిర్బంధించి, వైద్యుల సాయంతో డ్రగ్స్ ఎక్కించారని ఆరోపిస్తూ లతిఫా బ్రిటన్‌కు చెందిన ఓ సంస్థ సాయంతో ఓ వీడియోను అంతర్జాలంలో పెట్టింది. తండ్రే కూతురిని నిర్బందించడానికి కారణాలు ఏమిటో తెలియడం లేదు. కానీ తండ్రి తీరుతో విసిగి వేసారిన లతీఫా పారిపోయేందుకు ప్రయత్నించింది.   ఆమ్నెస్టీ హక్కుల సంస్థ చెబుతున్న వివరాల ప్రకారం తండ్రి నుంచి గత కొన్నేళ్లుగా తీవ్ర వేధింపులు ఎదుర్కొంటున్న షికా లతీఫా ఎలాగైనా దేశం విడిచి పారిపోవాలని ప్రణాళికలు సిద్ధం చేసుకుంది . అమెరికాలో కొత్త జీవితం ప్రారంభించాలని కలలు కన్నది. ఫిన్‌ల్యాండ్‌కు చెందిన తన ప్రాణస్నేహితురాలు తినా జౌహానియన్, ఫ్రాన్స్‌కు చెందిన కెప్టెన్‌ హెర్వ్‌ జాబెర్ట్‌ , మరోముగ్గురు సిబ్బందితో కలిసి ఒక మరపడవలో గత ఫిబ్రవరిలో దుబాయ్‌ అధికారుల కళ్లుగప్పి పారిపోయారు. వారు ప్రయాణిస్తున్న  పడవ మార్చి 14న భారత్‌లోని గోవా జలాల్లో ప్రవేశించింది. అప్పడు గోవాలోని భారత్‌ తీర ప్రాంత రక్షక దళం బలవంతంగా ఆ పడవలోకి ఎక్కి తుపాకులు చూపించి అందరినీ బెదిరించారు. కెప్టెన్‌ జౌబెర్ట్‌ని  కొట్టడంతో అతను స్పృహ తప్పిపోయాడు. అంతటి ఆగకుండా  పడవని ధ్వంసం చేశారు. యువరాణి షికా లతీఫా తాను ఆశ్రయం కోరి వచ్చానని అరుస్తున్నా వినిపించుకోకుండా ఆమెని బంధించి, అప్పుడే  హెలికాప్టర్‌లో వచ్చిన యూఏఈ అధికారులకు వాళ్లందరినీ అప్పగించారట. మార్చి 20న జౌబెర్ట్, మిగిలినవారిని దుబాయ్‌ అధికారులు విడిచిపెట్టారు. ఆ తర్వాత రెండు రోజులకే యువరాణి స్నేహితురాల్ని కూడా విడిచిపెట్టడంతో ఆమె ఫిన్‌లాండ్‌కు వెళ్లిపోయింది. భారత్‌ తీర ప్రాంత రక్షణ దళం దయా దాక్షిణ్యాలు లేకుండా తాము ప్రతిఘటించకపోయినా తీవ్రంగా కొట్టి దుబాయ్‌ అధికారులకు అప్పగించారని వాళ్లంతా ఆరోపించారు. దుబాయ్‌లో ఎలాంటి న్యాయవిచారణ లేకుండానే గుర్తు తెలియని ప్రదేశంలో ఒక జైలులో తమను బంధించి ఉంచారని వారు వెల్లడించారు. అప్పట్నుంచి  షికా లతీఫా ఆచూకీ కనిపించడం లేదు. ఆమె క్షేమ సమాచారాలపై సర్వత్రా ఆందోళన వ్యక్తమవుతోంది. ఆమ్నెస్టీ ఈ మొత్తం వ్యవహారంలో భారత్‌ తీర ప్రాంత రక్షక దళం వ్యవహార శైలిని తప్పు పడుతోంది. ఆశ్రయంకోరి వచ్చిన వారిని ఏకపక్షంగా బంధించి, శారీరకంగా హింసించడం ఏమిటని ప్రశ్నిస్తోంది. దీనిపై సమగ్ర విచారణ జరిపించాలని కేంద్రప్రభుత్వాన్ని కోరింది. మరోవైపు షికా లతీఫా ఎక్కడుందో బయట పెట్టి, ఆమె స్వేచ్ఛగా జీవించేలా చర్యలు తీసుకోవాలంటూ యూఏఈని డిమాండ్‌ చేస్తోంది.  ఇదిలా వుంటే  లతీఫా ఇంకా బందీ గా రహస్య ప్రదేశంలో ఉందనే ఆరోపణలు వినవస్తున్నాయి.   షికా లతీఫా దేశం విడిచి పారిపోవడానికి ముందు ఇదంతా ఊహించిందో ఏమో ఒక వీడియోని రికార్డు చేసింది. " తన తండ్రి వేధింపులు భరించలేక పారిపోతున్నానని ఆమె ఆ వీడియోలో చెప్పారు. ‘నాకు స్వేచ్ఛ లేదు. సంకెళ్ల మధ్య జీవితాన్ని గడుపుతున్నాను. నేను ఎక్కడికి వెళ్లినా నా వెంట ఒకరు ఉంటారు. నా కదలికల్ని అనుక్షణం గమనిస్తూ ఉంటారు. 2002లో కూడా ఒకసారి పారిపోవడానికి ప్రయత్నించా. సరిహద్దుల్లోనే నన్ను పట్టుకున్నారు. మూడేళ్ల పాటు నన్ను గాలి వెలుతురు లేని  జైలులో పడేశారు." అని లతీఫా చెప్పింది.  ఆరు నెలల క్రితం లతీఫా కిడ్నాప్‌ అయిందన్న వార్తల నేపథ్యంలో ఈ వీడియోని బ్రిటన్‌లో ఒక మీడియా సంస్థ బయటపెట్టింది. ఆమ్నెస్టీ హక్కుల సంస్థ జోక్యం చేసుకున్న నేపథ్యంలో అయినా లతీఫా ఆచూకీ  ఏమైనా తెలుస్తుందో లేదో చూడాలి . లతీఫా  వీడియో చూడండి .  ...
  • అప్పుడపుడు కొన్ని తమాషాలు జరుగుతుంటాయి. అలాగే  కొన్ని ఘటన ల వెనుక  మర్మమేమిటో? మాయ ఏమిటో ? ఎంత ఆలోచించినా  అర్ధంకాదు. ఆ ఘటనలు ఎలా జరిగాయో అర్ధం చేసుకోలేం. సందేహాలకు సమాధానాలు దొరకవు.  తొమ్మిదేళ్ల క్రితం పసిఫిక్‌ మహాసముద్రంలో అదృశ్యమైన ఓ భారీ ఓడ. గతవారం హిందూ మహాసముద్రంలో కన్పించడం ఆశ్చర్యానికి గురిచేస్తోంది. ‘దెయ్యం ఓడ’గా పిలుచుకుంటున్న సామ్‌ రత్లుంగి పీబీ 1600 అనే నౌక వేల టన్నుల సరుకులతో ఇండోనేషియా జెండాతో బయలుదేరింది. ఈ నౌక చివరిసారిగా 2009లో తైవాన్‌ సముద్ర జలాల్లో కనిపించింది. తర్వాత అది కనిపించకుండా పోయింది. పలు దేశాలకు చెందిన అధికారులు పెద్ద ఎత్తున గాలింపు జరిపినా ఆ ఓడ ను కనిపెట్టలేకపోయారు. ఎంత వెతికినా ఓడ  ఆచూకీ లభ్యం కాకపోవడంతో అది పసిఫిక్‌ మహాసముద్రంలో ఎక్కడో మునిగిపోయి ఉంటుందని అంతా అనుకున్నారు. కానీ తీరా  అయిదు రోజుల క్రితం ఆగస్టు 30వ తేదీన ఆ నౌకను మయన్మార్‌ తీరానికి 11 కిలోమీటర్ల దూరంలో ఆ దేశ మత్స్యకారులు గుర్తించారు. అందులోకి వెళ్లి చూడగా అందులో ఎవరూ కనబడలేదు. అందులో ఎటువంటి సరకులు కూడా లేవు. దీంతో వారు తీరప్రాంత పోలీసులకు సమాచారం చేరవేశారు.  పోలీసులు కూడా దానిని పరిశీలించారు. అయిన కూడా ఆ నౌక ఎక్కడి నుంచి వస్తుందో తెలుసుకోలేకపోయారు. 9 ఏళ్ల తరువాత ఆ ఓడ వెలుగులోకి రావడంపై రకరకాలు కథనాలు వినిపిస్తున్నప్పటికీ.. ఆ నౌక ఇంతకాలం ఎక్కడ ఉంది, అందులోని సరుకులు, సిబ్బంది  ఏమయ్యారు అనే ప్రశ్నలకు జవాబులు లేవు. అంతా మిస్టరీగానే ఉంది .   2001లో  177.35 మీటర్ల పొడవు, 27.91 మీటర్ల వెడల్పుతో  ఈ ఓడను నిర్మించారు....
  • ఈ ఫొటోలో కనిపించే పాప పేరు ఆరాధన. వయసు ఐదేళ్లు. తండ్రి శివ కార్తికేయన్ తో కలసి  అద్భుతంగా పాట పాడి అందరిని అబ్బుర పరిచింది. "కానా "తమిళ  సినిమా కోసం ఆరాధన ఈ పాట పాడింది.  ఇక శివ కార్తికేయన్ గురించి చెప్పుకోవాలంటే  తమిళ నటుడు , గాయకుడు , నిర్మాత , పాటల రచయిత. ఈయన గురించి  తెలుగు వారికి అంతగా పరిచయం ఉండకపోవచ్చు. వ్యాఖ్యాతగా కెరీర్ ప్రారంభించి రియల్ షోస్ లో  మంచి పేరు సంపాదించాడు.  తర్వాత నటుడిగా కూడా తన సత్తా చాటుకున్నారు. మెరీనా చిత్రం ద్వారా ఆయనకు మంచి పేరు వచ్చింది.  పాప పాట పాడుతున్న వీడియో మీరు చూడండి....
  • ఒంటరితనం భయంకరమైనది! దానికి మరీ దగ్గరగా వెళితే భయం అంటే ఏమిటో తెలుస్తుంది . అందుకే చాలామంది దాని వద్దకు వెళ్ళడానికి సుముఖత చూపరు. ఒకవేళ ప్రమాదవశాత్తూ వెళ్ళినా తొందరగా పారిపోయి వచ్చేస్తారు . ఒంటరితనం నుంచి పారిపోవడానికీ, దాన్ని కప్పిపుచ్చడానికీ ఏమైనా చేస్తుంటారు.  ఒంటరితనాన్ని తప్పించుకోవడం, జయించడం - రెండూ అవసరమే.లేదంటే చాలా చిక్కుల్లో పడతాం.  ప్రపంచవ్యాప్తంగా ఎందరో ఒంటరి జీవితాన్ని గడుపుతుంటారు. వారి ఆరోగ్యంకూడా అంతంతమాత్రంగానే ఉంటుంది.  ఒంటరిగా ఉండేవారు కేవలం మానసికంగానేకాకుండా శారీరకంగాకూడా బాధపడుతుంటారు. ఇది వారి మస్తిష్కంపైకూడా తీవ్రమైన ప్రభావం చూపిస్తుంది.  ఒంటరిగా ఉండటంవలన మస్తిష్కంపై ఒత్తిడి అధికంగావుంటుంది. ఒంటరితనం వలన మనిషిలో కోరికలు నశిస్తాయి . దీంతో వారికి జీవితంపై విరక్తి కలుగుతుంది. ఒంటరి తనం ఎంత ప్రమాదమో తెలిపే  ఈ హారర్ షార్ట్ ఫిలిం  అద్విక చూడండి. ...
  • పుణ్య క్షేత్రమైన యాదాద్రిలో  ట్రాఫికర్స్  ముఠాల  అకృత్యాలు వెలుగు చూస్తున్నాయి . అన్నెం  పున్నెం ఎరుగని  పసి బిడ్డలతో వ్యభిచారం చేయిస్తున్న కేడీ గాళ్ళ బాగోతం బయటపడింది .  చాలా కాలంగా ఇది జరుగుతున్నప్పటికీ   అధికారులు  చోద్యం చూస్తూ కూర్చున్నారనే విమర్శలు లేకపోలేదు .  ఒకప్పుడు వ్యభిచారాన్నే వృత్తిగా పెట్టుకున్న ఒక వెనుకబడిన సామాజిక  వర్గానికి చెందిన  వ్యక్తులు  ఇప్పుడు తమ పిల్లల్ని పక్కనపెట్టి ఎక్కడెక్కడి నుంచో పసిపిల్లల్ని ఎత్తుకొచ్చి, పెంచి పెద్దచేసి, వారితో వ్యభిచారం నిర్వహిస్తున్నారు. వీరిలో కొందరు ట్రాఫికర్స్ గా కొత్త అవతారమెత్తారు.  యాదగిరిగుట్టలో  110 కుటుంబాలు వ్యభిచారమే వృత్తిగా బతుకుతున్నాయి. వ్యభిచారం నిర్వహించేందుకు వీరు పసిపిల్లల్ని తీసుకొచ్చి రొంపిలోకి దింపుతున్నారు. పిల్లల్ని సేకరించే ముఠాలు ప్రత్యేకంగా ఉన్నాయి. తండాల్లో తిరుగుతూ పేదరికంతో మగ్గే కుటుంబాల నుంచి పిల్లల్ని కొనుగోలు చేస్తారు.  మారుమూల ప్రాంతాల్లో ఇంటి ముందు ఆడుకుంటున్న పిల్లలకి చాక్లెట్ల ఆశ చూపి ఎత్తుకొస్తారు. ఇటు తెలంగాణా, అటు ఆంధ్రా లో  అదృశ్యమవుతున్న పిల్లల్లో కొందరు  ఇలాంటి వ్యభిచార కూపాల్లో ప్రత్యక్షమవుతున్నారు.  ఈ నరక కూపంలో మగ్గుతున్న కొందరు అమ్మాయిలను వృత్తి నుంచి బయటకు వచ్చేందుకు సిద్ధంగా ఉన్నప్పటికీ..తండ్రులు గా తల్లులు గా   చెప్పుకుంటున్న దళారులు అడ్డుకుంటారు . ఎప్పుడైనా పోలీసులు దాడులు నిర్వహించినపుడు  పిల్లలను దాచేందుకు  ఇళ్లలోనే ప్రత్యేక అరలు ఏర్పాటు చేసుకున్నారు. ఎనిమిదేళ్ల వయసు నుంచి పిల్లలు  శారీరకంగా ఎదిగేందుకు  హార్మోన్‌ ఇంజెక్షన్లు ఇప్పిస్తున్నారు.  12 ఏళ్లకే పడుపు వృత్తిలోకి దించుతున్నారు. యువతులను రెండు మూడు నెలలకు ఒకసారి ఒక ఊరి నుంచి మరో ఊరికి మార్చుతుంటారు. ఎక్కువకాలం ఒకే ప్రాంతంలో ఉంటే తరచుగా వచ్చే విటులతో పరిచయం పెంచుకొని పారిపోతారనే భయం, ఎప్పుడూ ఒకరే ఉంటే విటులు ఆసక్తి చూపరన్న ఆలోచనతోనే ఇలా మార్చుతుంటారు.  ఇదంతా చాలా వ్యవస్థీకృతంగా కొన్ని దశాబ్దాలుగా నడుస్తున్న వ్యవహారం. పోలీసులు తలచుకుంటే తెలంగాణలోని ఇతర ప్రాంతాల్లో కూడా  నడుస్తున్న వ్యభిచార కేంద్రాలను మూసి వేయగలరు.  ...
  • వాట్స్అప్ లో ‘బ్రహ్మం గారు చెప్పినట్లే జరిగింది. పంది కడుపున మనిషి జన్మించాడు.’ అనే నకిలీ వార్త  పెద్ద ఎత్తున  షేర్‌ అవుతోంది. దీన్ని మరల ఫేస్ బుక్ లో షేర్ చేస్తున్నారు . పంది కడుపున శిశువు జన్మించినట్లు చూపుతున్న ఫొటోలు పోస్టుకు జత చేసి నెటిజన్లు షేర్‌ చేసుకుంటున్నారు. అయితే అది తప్పుడు కథనం అని తేలిపోయింది.   ఇటలీ కి చెందిన   లైరా అనే ఆర్టిస్ట్ సిలికాన్‌తో బొమ్మలను తయారు చేస్తుంటుంది. లైరా పంది రూపంలో ఉన్న మానవ  శిశువు బొమ్మను తయారు చేశారు. ఆ శిశువును తయారు చేసిన ఆమె దాన్ని తన సొంత ఆన్‌లైన్‌ స్టోర్‌ ఎస్టీ.కామ్‌ లో  అమ్మకానికి పెట్టారు. రకరకాలుగా దాన్ని ఫొటోలు తీసి, అందంగా ఉంచేందుకు ప్రయత్నాలు చేశారు. ప్రస్తుతం ఆ ఫొటోలే నకిలీ వార్తగా మారి, బ్రహ్మంగారు చెప్పినదే జరిగిందనే భ్రమలో ప్రజలను పడేసింది. ముఖ్యంగా ఈ వార్త  సోషల్ మీడియాలో  చక్కర్లు కొట్టింది.. ఇలాంటి నకిలీ వార్తల ప్రభావంతో ఈ మధ్యకాలంలోనే వాట్సాప్‌ కొత్త అప్‌డేట్‌ను ప్రవేశపెట్టింది. అంతేకాకుండా పత్రికల్లో ప్రకటన ఇస్తూ సైతం నకిలీ వార్తలను నమ్మొద్దని ఏ విషయాన్నైనా రెండు, మూడు సార్లు తరచి చూసిన తర్వాతే షేర్‌ చేయండని ప్రజలను కోరింది. మొత్తం మీద ఆర్టిస్ట్  లైరా అందరిని కంగారు పెట్టింది. బహుశా బ్రహ్మం గారి గురించి ఆమెకు తెలిసి ఉండక పోవచ్చు. ...
  • అంతరిక్షంలో ఇవాళ రాత్రి ఒక మహాద్భుతం జరగనుంది . ఈ శతాబ్దంలోనే అత్యంత సుదీర్ఘమైన చంద్రగ్రహణం ఈ  రాత్రి ఏర్పడనుంది. సుమారు 3.55 గంటల గ్రహణ కాలంగా ఉంటుంది . అతి సుదీర్ఘ కాలంగా సంభవించే గ్రహణం ఈ శతాబ్దిలో ఇదే. భూగ్రహ ఛాయలు అదృశ్యం కాకుండా, పరావర్తనం చెందిన సూర్య కిరణాల వల్ల పూర్తిగా అరుణ వర్ణంలో చంద్రుడు కనువిందు చేయనున్నాడు. ఎర్రటి రంగులో కనిపిస్తున్నందు వల్ల చంద్రుడ్ని బ్లడ్‌ మూన్‌ అని పిలుస్తున్నారు. చంద్ర గ్రహణం సందర్భంగా శ్రీశైలం, మహానంది, అహోబిళం, యాగంటి తదితర ప్రధాన క్షేత్రాలతోపాటు చిన్న చిన్న ఆలయాలను కూడా మూసి వేస్తున్నారు. గ్రహాణానంతరం ఆలయాల సంప్రోక్షణ  తర్వాత శనివారం వేకువ జామునే తిరిగి తెరుస్తారు. ఇవాళ ఆషాఢ పూర్ణిమ...  కేతుగ్రస్త చంద్రగ్రహణం  రాత్రి 11.50 గంటలకు ఏర్పడనుంది. గ్రహణం మధ్యకాలం రాత్రి 1.52 గంటలు కాగా, విడిచే సమయం 2.43 గంటలకు మొదలవుతుంది. శనివారం ఉదయం 3.49 గంటలకు పూర్తిగా గ్రహణం ముగుస్తుంది. మొత్తం 3.55 గంటలు ఈ చంద్రగ్రహణ కాలమని అంటున్నారు.  కేతుగ్రస్త చంద్ర గ్రహణం ఉత్తరాషాఢ శ్రవణ నక్షత్రంలో మకర రాశిలో సంభవిస్తోంది. అందువల్ల మకరరాశి వారు ఈ గ్రహణాన్ని దర్శించకూడదని జ్యోతిష్య పండితులు చెబుతున్నారు. అలాగే మేషం, వృశ్చికం, సింహం, రాశుల వారికి పరిస్థితులు అనుకూలంగా ఉంటాయని అంటున్నారు. చంద్ర గ్రహణ ప్రభావం వృషభం, కర్కాటకం, కన్య, ధనస్సు రాశుల వారికి మధ్య ఫలితాలు, మిథునం, కుంభం, తుల, మకర రాశుల వారికి అథమ ఫలితాలు ఇస్తాయని పంచాంగకర్తలు విశ్లేషిస్తున్నారు.   గురు పౌర్ణిమ రోజే ఈ గ్రహణం సంభవించడం విశేషం. చంద్రుడు జలాధిపతి. అందువల్ల ఈ గ్రహణ ప్రభావంతో  రానున్న రోజుల్లో మంచి వర్షాలు కురుస్తాయి   ఇక ఈ శతాబ్దపు ఖగోళ అద్భుతంగా నిలిచే చంద్ర గ్రహణాన్ని అందరూ వీక్షించాలని శాస్త్రవేత్తలు చెబుతున్నారు.  గ్రహణాన్ని చూసి ఖగోళ విజ్ఞానం పొందాలని ,  చంద్రగ్రహణంపై అపోహలు పెట్టుకోనవసరం లేదని చెబుతున్నారు . గ్రహణం చూడడం వల్ల పుట్టబోయే పిల్లలకు గ్రహణ మొర్రి సోకుతుందని, గ్రహణ సమయంలో ఆహారం, నీరు విషంగా మారుతాయనే మూఢాచారాలను నమ్మవద్దని  అంటున్నారు....
  • (Su Sri Ram )   ఈ కధ ముప్పై అయిదేళ్ళ క్రితం 12 మార్చి 1982 న  ఉత్తర ప్రదేశ్ లోని గౌండ జిల్లాలో మాదాపూర్ అనే గ్రామం లో మొదలయ్యింది. క్రిమినల్స్ గురించి సమాచారం రావటం తో తన  సబార్డినేట్స్ తో కలిసి DSP ఎస్.పి. సింగ్ రాత్రి వేళ హుటాహుటిన అక్కడికి వెళ్ళాడు.  అతని శరీరం మర్నాడు ఉదయం ప్రభుత్వ అసుపత్రి కి చేరింది. మరో 12 మంది దుండగులతో కలిసి అతను బాంబు దాడిలో చనిపోయినట్లు బార్య విభా సింగ్ కి సమాచారం పంపారు. నిజానికి DSP సింగ్ కి అతని  సబార్డినేట్స్ కి మధ్య ఉన్న వైరం అతన్ని పొట్టన పెట్టుకుంది. అతని  సబార్డినేట్స్ అతఃడిని  ఒక నకిలీ ఎన్కౌంటర్ లో చంపేశారు. “దయచేసి నన్ను కాల్చొద్దు. నాకు ఇద్దరు పసిపిల్లలు ఉన్నారు” అనేది ఆయన చివరి మాట. సింగ్ భార్య 'విభా సింగ్' హై కోర్టుని ఆశ్రయించింది. సిబిఐ కి కేసు బదలాయించారు. తోటి ఉద్యోగులు క్రిమినల్స్ తో కలసి ఈ దారుణానికి పాల్పడినట్లు సిబిఐ చార్జ్ షీట్ ఫైల్ చేసింది. సుదీర్గమయిన కోర్టు ప్రక్రియ మొదలయింది. ** DSP సింగ్ హత్య జరిగినప్పటికి, అతనికి బార్య విభా సింగ్ కి కింజాల్ అనే ఆర్నెల్ల  పాప, ఇంకా లోకం చూడని (ప్రింజాల్ సింగ్) బిడ్డ ఉన్నారు. తల్లి కి వారణాసి ట్రెజరీ లో ఓక చిన్న ఉద్యోగం ఇచ్చి ప్రభుత్వం చేతులు దులుపుకుంది. భర్త  మరణాన్ని ప్రశ్నిస్తూ న్యాయం కోసం భార్య చేసిన పోరాటం నీరు కారి పోయింది. భర్త తో పాటు పని చేస్తున్న ఉద్యోగులు ఆమెకి ఎవరు సహకరించలేదు. ఆమె ఉద్యోగం లో జాయిన్ అయింది. రెండో బిడ్డ భూమి మీదకి వచ్చింది.  ఇద్దరు పిల్లలని ఆమె చదివించడం మొదలెట్టింది. కొద్ది ఆదాయం, తండ్రి లేని ఒంటరి కుటుంబం . అన్ని రకాల గడ్డు సమస్యలని ఎదుర్కొంది.   పిల్లలిద్దరూ వారి చదువుల కోసం అనేక త్యాగాలు చేసారు. తండ్రి ఫోటో ని చూస్తూ.. అతన్నే ఇన్స్పిరేషన్ గా తీసుకుని  ఇష్టపడి చదువు సాగించారు. పెద్దమ్మాయి కింజాల్ డిల్లీ లోని అత్యున్నతమయిన “లేడి శ్రీరాం కాలేజ్” లో సీటు సంపాదించింది. కింజాల్ డిగ్రీ మొదటి సంవత్సరం లో ఉన్నప్పుడు తల్లి కి కాన్సర్ అని తెలుసుకుంది. ఆమె ఎక్కువ కాలం జీవించే అవకాశం లేదని తెలిసిన రెండు రోజుల కి వ్రాసిన పరీక్షలలో  ఆమె యునివర్సిటీ టాపర్ గా నిలిచి గోల్డ్ మెడల్ సాధించింది. మరణ శయ్య పై ఉన్న తల్లికి  ఇద్దరు అత్యున్నత ఉద్యోగాలను సాధిస్తామని  మాట ఇచ్చారు ** 2004 లో తల్లి మరణానంతరం అక్క చేల్లెల్లిద్దరు డిల్లీ చేరారు. ముఖర్జీ నగర్ లో ఒక సాదారణ గది లో నివాసం ఉంటూ UPSC కి చదవటం మొదలెట్టారు.  మిత్రుల వద్ద అరువు తెచ్చుకున్న పుస్తకాలతో వాళ్ళు యజ్ఞం మొదలెట్టారు. స్వగ్రామం మరిచి పోయారు.  బందువులు లేరు. ఒక పండగ లేదు ఒక సరదా లేదు. ఒక విరామం లేదు. వాళ్లిద్దరు ఒకరి కొకరు ప్రేరణ. వాళ్లిద్దరికి  తల్లి తండ్రి ప్రేరణ. 2007 లో కింజాల్ సింగ్ IAS, ప్రింజాల్ సింగ్ IRS ని సాధించారు. వారిద్దరి పట్టుదల విజయగాధ జ్యుడిషిల్ వ్యవస్థని తాకింది.  తండ్రి ని చంపిన 31 ఏళ్ల తర్వాత, చార్జ్ షీట్ చేసిన 27 ఏండ్ల తర్వాత ఎనిమిది మంది పోలిస్ అధికారులని నిందితులుగా నిర్ధారించింది.  ఎస్ పి సింగ్ నిజాయితీ ని, తల్లి ఆరోపణలని నిజమని ప్రపంచానికి కోర్టు రుజువు చేసింది. తీర్పు చెప్పినప్పుడు అప్పటి 'లక్ష్మి పుర ఖేరి' జిల్లా కలెక్టర్ & మేజిస్ట్రేట్ గా ఉన్న కింజాల్ సింగ్ దుఖం దాచుకోలేక పోయింది. కన్నీటి పర్యంతం అయింది.  ** ఆడపిల్లలని తక్కువ గా చేసి చూసే/మాట్లాడే వాళ్లకి కింజాల్ సింగ్, ప్రింజాల్ సింగ్ ఒక సమాధానం.  దేశం గర్వించదగ్గ ఈ సోదరీమణులు ఇద్దరు నేటి అనేక మంది పిల్లలకి ఆదర్శం....
  • రైలు ఏమిటి మాయం అవడం ఏమిటి ? అనుకుంటున్నారా ? ఔను నిజమే.  ప్రయాణీకులతో వెళ్తున్న ఆ రైలు సడన్ గా మాయమైంది.   ఆ మిస్టరీ ఏమిటో ఇప్పటివరకు తేలలేదు. దీనికి ఘోస్ట్ ట్రైన్ పేరు కూడా ఉందట.  మాయమైన ఆ రైలు ఆచూకీ ఈనాటికీ లభ్యం కాలేదు. వివరాల్లోకి వెళితే... 1911లో  ఆ రైలు  అత్యంత అనుమానాస్పద స్థితిలో మాయమైంది. ‘జనెతి’ పేరుతో పిలిచే ఈ ట్రైన్ ఇటాలియన్ ప్రయాణికులను తీసుకుని రోమ్ నుంచి లోంబాయి  వెళుతోంది. అది సొరంగ మార్గంలోకి ప్రవేశించి ఉన్నట్టుండి  మాయమై పోయింది. ఆ రైలులోని ప్రయాణికులకు కూడా తాము ఎటు పోతున్నామో అర్థం కాలేదు. మూడు బోగీలున్న ఈ ట్రైన్‌లో 106 మంది ప్రయాణీకులున్నట్టు సమాచారం.  వీరిలో ఇద్దరు మాత్రం బతికి బట్టకట్టారు అట . వీరిద్దరూ చెప్పిన వివరాల ప్రకారం ఈ రైలు సొరంగ మార్గానికి చేరుకున్నంతలోదాని నుంచి పొగలు వచ్చేయట.  తరువాత ముందు ఏముందో కనిపించలేదు. దీంతో చాలా భయమేసి, దానిలో నుంచి వారు బయటకు దూకేశారు. అయితే రైలు ఆ సొరంగం లోకి వెళ్లిన తరువాత  మరి కనిపించలేదు. అనంతరం  ఆ రైలు లో  ప్రయాణించిన వారి ఆచూకీ గురించి పోలీసులు గాలించారు.  అయినా ఎటువంటి ఫలితం లేకపోయింది. ఒక కిలోమీటరు పొడవున్న ఈ సొరంగంలో రైలు ఏ మూలకు పోయిందో ఇంతవరకూ ఆచూకీ దొరకకపోవడం విశేషం.   ఆ తర్వాత  ఆ సొరంగ మార్గాన్ని ప్రభుత్వం మూసి వేసింది . ఇంకా ఆసక్తికరమైన వివరాల కోసం  వీడియో చూడండి....
  • చరిత్రలో  900 మందికి పైగా  ఒకేసారి ఆత్మహత్య చేసుకున్న సంఘటన నలభై ఏళ్ళ కిందట జరిగింది. ఈ ఘటన గురించి వింటే ఒళ్ళు గగుర్పొడుస్తుంది.  సామూహిక ఆత్మహత్యల ఘటనగా అది చరిత్రలో మిగిలిపోయింది.  చరిత్రలోనే భారీ విషాదాంతంగా మిగిలిన జోన్స్‌టౌన్‌ నరమేధం గురించి తెలిసిన వాళ్లు చాలా తక్కువే అని చెప్పుకోవాలి.  వెనిజులా-సురీనామ్‌ మధ్య ఉన్న తీరప్రాంతం గుయానాలోని జోన్స్‌టౌన్‌లో నాలుగు దశాబ్దాల క్రితం ఈ ఘటన  చోటుచేసుకుంది.  అమెరికా మతగురువు, పీపుల్స్‌ టెంపుల్‌ వ్యవస్థాపకుడు జిమ్‌ జోన్స్‌ను వేలాది మంది అనుచరులు గుడ్డిగా నమ్మేవారు. నవంబర్‌ 19, 1978న భారీ సంఖ్యలో అనుచర గణాన్ని ఒక్కచోట చేర్చారు. వారందరు  విషం కలిపిన పానీయాన్ని స్వీకరించి ఆత్మహత్యకు పాల్పడ్డారు. మృతుల్లో ఎక్కువమంది  చిన్నారులు ఉండటం బాధాకరం. ఆ చిన్నారులకు  సిరంజీల ద్వారా  వారి తల్లిదండ్రులు విషం ఎక్కించారని అమెరికా దర్యాప్తు సంస్థ ఎఫ్‌బీఐ దర్యాప్తు అనంతరం ప్రకటించింది.  ఘటన తర్వాత జిమ్‌ జోన్స్‌ తుపాకీతో కాల్చుకుని ఆత్మహత్యకు పాల్పడ్డాడు. అప్పట్లో జోన్స్‌టౌన్‌లో పరిస్థితులు బాగా లేవని, పూర్తిగా అక్రమాలు సాగుతున్నాయని అమెరికాకు ఒక నివేదిక అందింది.  జోన్స్‌టౌన్‌పై వైమానిక దాడులు జరిగేయి . అప్పటికే పీపుల్స్‌ టెంపుల్‌ సభ్యులు కొందరినీ అమెరికా సైన్యం కాల్చి చంపింది. దీంతో కలత చెందిన జిమ్స్‌ జోన్స్‌ పెద్ద ఎత్తున అనుచరులను సమీకరించి.. ఈ నరమేధానికి కారకుడయ్యాడు. అయితే ఆ ఘటన నుంచి  కొందరు జోన్స్‌టౌన్‌ ప్రజలు మాత్రం తప్పించుకున్నారు.  ఢిల్లీ బురారీలో ఒకే కుటుంబానికి చెందిన 11 మంది సామూహిక ఆత్మహత్యకు పాల్పడిన నేపథ్యంలో ఈ  సామూహిక ఆత్మహత్యల ఘటన  ఇప్పుడు మరోసారి వెలుగులోకి వచ్చింది.  వీడియో చూడండి. ...
  • పెంపుడు కుక్కల కోసం కట్టుకున్న మొగుడిని  కూడా వదిలేసిందామె . కుక్కలంటే అంత ఇష్టం ఆమెకి . ఇంతకీ ఎవరామె అనుకుంటున్నారా ? ఆమె ఇండియన్ కాదు.  ఆమె ఓ బ్రిటిష్  మహిళ.   బ్రిటన్‌లోని సఫోక్‌ కౌంటీకి చెందిన నలభై అయిదేళ్ల లిజ్‌ గ్రూ... యాభై మూడేళ్ళ  మైక్‌ అస్లామ్‌ భార్యాభర్తలు.  వీరికి 21 ఏళ్ల కుమారుడు కూడా ఉన్నాడు. లిజ్‌ గ్రూకు చిన్నప్పటి నుంచి కుక్కలంటే పిచ్చి  ప్రేమ. అందుకే పెళ్లైన తర్వాత కూడా ఇంటిని మొత్తం కుక్కలతో తో నింపేసింది. మొదట్లో ఏదో సర్దుకుపోయినా ... తర్వాత తర్వాత భార్య వైఖరి మారకపోవడం .. ఇంటిని మొత్తం  కుక్కలు ఆక్రమించేయడంతో భర్త మైక్‌కు కోపం వచ్చింది. ఈ విషయమై ఇద్దరికి  తరచూ గొడవలు మొదలయ్యాయి . చాలా కాలం ఓపిక పట్టిన  భర్త ఇక తట్టుకోలేక  కుక్కలను ఇంటి నుంచి బయటకు పంపమని  భార్యకు చెప్పాడు . అందుకు ఆమె  ససేమిరా అంది . దీంతో  మైక్‌ కోపం నషాళానికి తాకింది.  కుక్కలు కావాలో తాను కావాలో నిర్ణయించుకోమని తేల్చిచెప్పాడు. లిజ్‌ మాత్రం 25 ఏళ్ల దాంపత్య జీవితం కంటే పెంపుడు కుక్కలే ముఖ్యమని చెప్పి ... ఇంటి నుంచి బయటకు వచ్చేసింది.  ఇప్పుడామె వద్ద మొత్తం 30 కుక్కలు ఉన్నాయి. వాటిలో కొన్నింటి ఆరోగ్యం బాగాలేదట . మరికొన్ని హుషారుగా ఉన్నాయి .  తన తండ్రికి జంతువుల ఆహారం తయారుచేసే వ్యాపారం ఉండేదని, చిన్నప్పటి నుంచి కుక్కల మధ్యే ఎక్కువగా తన జీవితాన్ని గడిపానని  లిజ్‌ గ్రూ అంటోంది. ఈ మధ్యే కుక్కల సంరక్షణ కోసం ‘‘బెడ్‌ఫర్‌ బుల్లీస్‌’’ అనే స్వచ్ఛంద సంస్ధను ఈమె  స్థాపించింది . భర్త తన పనిలో బిజీ ఉండటం వల్ల ఒంటరిగా ఉన్న తాను కుక్కల సంరక్షణను  చేపట్టానని  అది తన  భర్త కి ఇష్టం లేదని వాపోయింది.  కుక్కల పెంపకం అన్నది టైం పాస్‌ కోసం చేసే పని కాదని, అంకిత భావంతో.. ప్రేమతో వాటిని చూసుకోవాలని గ్రూ అంటోంది. ...
  • "సెకండ్‌ షో సినిమా చూసిన ఆ ఇద్దరు ఫ్రెండ్స్‌ అర్ధరాత్రి 12 తరువాత తాపీగా నడుచుకుని వెళ్తున్నారు. వీధిలైట్ల వెలుగులు దాటి కొంచెం ముందుకు వెళ్లగా  ఓ తెల్లటి ఆకారం ఎదురొచ్చింది. ఒక్క ఉదుటున తెల్లటి ఆకారం ఆ ఇద్దరిపైకి దూకింది. అదిరిపడ్డ ఆ ఫ్రెండ్స్‌ గుండెలదిరేలా కేకలు పెడుతూ చెరో  దిక్కుకు పారిపోయారు. ఇంతలో ఎదురుగా వస్తున్న కారు ఢీ కొట్టడంతో  ఒకరి కాలు విరిగింది. మరొకతను గుంటలో పడి గాయపడ్డాడు.   చిమ్మచీకట్లో ఓ ఆడమనిషి ముఖం కనిపించ కుండా జుత్తు విరబోసుకుని ఫ్లై ఓవర్‌ కింద కూర్చుని ఏడుస్తోంది.  అటుగా వెళ్తున్న ఇద్దరు పాదచారులు ఆమెను గమనించారు. వారిలో ఒకరు ఆమెవైపు అడుగు వేయబోగా, మరొకరు  వెనక్కు తగ్గారు.  ధైర్యంగా ముందు కెళ్లిన మొదటి వ్యక్తి ఆ ఆకారాన్ని తట్టాడు, ఆమె తల పైకెత్తింది. అంతే.. సగానికి పైగా ముఖం కాలిపోయిన ఆమె వికృత వికటాట్టహాసంతో పైకి లేచి నిలబడింది. అంతే గుండెలు అవిసేలా కేక వేసారు. అంతలో  ఆ స్ర్తీ ఇద్దరినీ పట్టుకోబోగా, ప్రాణభయంతో వారు పరుగు లంఘించారు.  ఒక కాలేజీ స్టూడెంట్  రాత్రి వేళ ఒంటరిగా నడుచుకుంటూ ఇంటికి వస్తోంది. చీకటిగా ఉండే ఆ సందులో  సడన్ గా రోడ్డు మీద ఓ తెల్లని ఆకారం ఎదురు పడింది. అంతే  ఆ పిల్ల గుండె ఆగినంత పనయ్యింది. అంతలో ఆ ఆకారం వికృతం గా అరుస్తూ ఆమె మీదకు దూకేందుకు ప్రయత్నించింది. ఆమె భయపడిపోయి కేకలు వేస్తూ పారిపోయింది.  ఈ  సన్నివేశాలు  వీడియోలో లేదా సినిమాలో లేదా సీరియల్స్ లో చూడ్డానికి , సరదాగా నవ్వుకోవడానికి బాగానే ఉంటాయి. "  అదే నిజ జీవితంలో మనకు ఎదురైతే హడలి పోతాం. ఇలా భయపెడుతూ తీసే  ఘోస్ట్‌ ప్రాంక్‌ వీడియోస్‌ తో మనుష్యులను భయపెట్టే  అలవాటు  ఇదివరలో  విదేశాల్లో మాత్రమే ఉండేది. ఇపుడు అది ఇండియా లోకి ప్రవేశించింది. కొంతమంది ఔత్సాహికులు ఈ రకమైన వీడియోస్ తీసేందుకు ఉత్సాహం కనపరుస్తున్నారు . అయితే  ఈ వీడియోస్ తీసే క్రమంలో అనవసరమైన చిక్కుల్లో పడుతున్నారు. అర్ధరాత్రి ఇలాంటి ఫిలిమ్స్ తీస్తూ అమాయకులను భయభ్రాంతులకు గురి చేస్తున్నారు.  ఇందులో దెయ్యాలను చూసి పారిపోయే వారు కూడా నటులే అయినప్పటికీ తగు జాగ్రత్తలు తీసుకోకపోవడంతో గాయాలపాలవుతున్నారు .  అంతర్జాలంలో ఇలాంటి ఫిలిమ్స్ మనకు ఎన్నో కనబడతాయి . మనిషికున్న భయాన్ని కూడా వినోదాత్మకంగా చూపించే ప్రయత్నమే ఈ ఘోస్ట్‌ ప్రాంక్‌ వీడియోస్‌ ఉద్దేశం. కానీ.. వాటి చిత్రీకరణలోముందు జాగ్రత్తలు తీసుకోకపోవడం వల్ల ప్రమాదాలు ఎదురవుతున్నాయి. కానీ, ఈ విషయాన్ని లఘు చిత్ర దర్శకులు పసిగట్టలేకపోతున్నారు. ఈ సమస్య ఇటీవల విజయవాడ కుర్రకారునూ తాకింది. బర్త్‌డే పార్టీలో సరదాగా చేసిన ప్రయోగం పోలీస్‌స్టేషన్‌కు వెళ్లేలా చేసింది. ప్రజలను భయభ్రాంతులను చేసే ప్రయత్నంలో పోలీసుల అనుమతి లెక్కచేయకపోగా, ప్రాణాలతో చెలగాటమాడారన్న కారణంగా పోలీసులు కౌన్సెలింగ్‌ ఇచ్చారు. షార్ట్‌ ఫిల్మ్స్‌ చిత్రీకరణల్లో జాగ్రత్తలు పాటించకుంటే  తిప్పలు తప్పవని హెచ్చరిస్తున్నారు. ...
  • దెయ్యాలు ఉన్నాయి సుమా... అని భయపడేవారు కొందరు. దెయ్యాలు లేనే లేవు... అంటూనే భయపడేవారు కొందరు. రాత్రయినా సరే, పగలయినా సరే ‘దెయ్యాలున్నాయి’ అని భయపడే వారు మరికొందరు. పగలంతా ‘దెయ్యాలు లేవు’ అని గట్టిగా వాదించి రాత్రయితే చాలు ప్లేటు ఫిరాయించి కిటికీల వంక భయంగా చూసేవాళ్లు కొందరు... మొత్తానికైతే దెయ్యాల గురించి మాట్లాడకుండా ఉండలేం. దెయ్యాలను నమ్మడం మూఢ నమ్మకమని, వెనుకబడిన దేశాలలో, వెనకబడిన ప్రాంతాలలో, నిరక్షరాస్యత ఉండేచోట ‘దెయ్యాల మీద నమ్మకం’ ఎక్కువగా ఉంటుందనేది సాధారణ అభిప్రాయం.  ఒక సంస్థ  ఇటీవల నిర్వహించిన కొన్ని సర్వేలలో మాత్రం పాశ్చాత్యదేశాల్లో, అభివృద్ధి చెందిన దేశాల్లోనూ దెయ్యాలను నమ్మేవారి సంఖ్య తక్కువేమీ లేదనే విషయం బయటపడింది. దెయ్యాలను నమ్మేవారు అమెరికాలో 42 శాతం మంది ఉన్నారు. బ్రిటన్‌లో 52 శాతం మంది ఉన్నారు. గమనించాల్సిన విషయం ఏమిటంటే ‘దెయ్యాలు ఉన్నాయి’ అని బల్లగుద్ది వాదించే వాళ్లలో విద్యావేత్తలు, వైద్యులు, శాస్త్రవేత్తలు కూడా ఉన్నారు. కొందరైతే ఏకంగా తమ స్మార్ట్ ఫోన్‌లో నిక్షిప్తం చేసుకున్న కొన్ని వింత ఫోటోలను చూపిస్తూ ‘‘ఇంతకంటే రుజువు అవసరమా?’’ అని కూడా అంటున్నారు. సర్వేలో భాగంగా దెయ్యాలు తిరుగాడే ప్రాంతాల గురించి అడిగినప్పుడు రకరకాల దేశాల్లో రకరకాల పేర్లు వినిపించాయి. ఈ దెబ్బతో ‘పారానార్మల్ టూరిజం’ పెరిగిపోయింది. ఒకానొక ప్రాంతంలో ఎలాంటి చూడదగిన ప్రదేశమూ లేకపోయినా ‘అక్కడ దెయ్యం ఉంది’ అనే నమ్మకంతో వచ్చే పర్యాటకుల సంఖ్య పెరిగిపోయింది. అలా పర్యటించిన వారికి దెయ్యాలు కనిపించాయో లేదోగానీ- ‘నేను ..  ఆ దెయ్యం’లాంటి హాట్ హాట్ యాత్రాకథనాలు రాయడం మొదలు పెట్టారట. అలాగే హాంటెడ్ ప్రదేశాల జాబితాలు కూడా  ఇస్తున్నారు. ...
  • నైతిక విలువలు మాయమై పోతున్నాయి. వరుసకు అక్కతో సహజీవనం చేస్తూ ఆమెను అనుమానించి, దూరమవుతోందని భావించి  ఆమెతోపాటు ఆమె ఏడేళ్ల  కొడుకును  కిరాతకంగా హత్య చేశాడు ఒక దుర్మార్గుడు.  భర్త చనిపోయి ఇద్దరు పిల్లలతో ఒంటరిగా ఉన్న ఆమెకు అండగా ఉండాల్సిన వాడే ఈ దారుణానికి ఒడిగట్టడం కలకలం సృష్టించింది. తల్లి, కొడుకును హత్య చేసిన అనంతరం అతను కూడా ఉరివేసుకుని ఆత్మహత్య చేసుకున్నాడు.  వివరాల్లోకి వెళితే ఇలా ఉన్నాయి.  చిత్తూరు జిల్లాకు చెందిన  అనిత కు (30)కి  12 ఏళ్ల క్రితం పెళ్లి అయింది. ఈమెకి   కుమార్తె, కుమారుడు  ఉన్నారు. కుటుంబంలో ఏర్పడిన కలహాల కారణంగా నాలుగేళ్ల క్రితం భర్త  ఉరివేసుకుని ఆత్మహత్య చేసుకున్నాడు. ఆ తర్వాత అనిత వరుసకు తమ్ముడైన రాజు తో వివాహేతర సంబంధం ఏర్పరుచుకుంది. కొన్నాళ్లుగా ఇద్దరూ సహజీవనం చేస్తున్నారు.  ఇటీవల  వీరి మధ్య దూరం పెరిగింది. అంతేగాక  అనిత  ఎక్కువగా పుట్టినింట్లో గడుపుతోంది.  అప్పుడప్పుడు మాత్రమే ఉంటున్న ఊరికి వస్తోంది. దీంతో ఆమె ప్రవర్తనపై రాజుకు అనుమానం కలిగింది. ఈ నేపథ్యంలోనే రాజు  మనస్తాపం చెంది  మద్యం మత్తులో అనితను హత్యచేయడంతో పాటు అక్కడే  ఉన్న కుమారుడిని  కూడా కత్తితో విచక్షణా రహితంగా నరికి ఉండవచ్చునని పోలీసులు భావిస్తున్నారు. అనంతరం తాను కూడా ఆ పూరి గుడిసెలోనే ఉరి వేసుకుని ఆత్మహత్య చేసుకున్నాడు.  ఆరోజు  ఉదయం 6 గంటల సమయంలో అనిత  మామ  ఆ ఇంటి వద్దకు వచ్చాడు. ఎంతకూ తలుపులు తీయకపోవడంతో బలవంతంగా తెరిచాడు. లోపల కోడలు, మనవడు నిర్జీవులై పడివుండడాన్ని చూసి నిశ్చేష్టుడయ్యాడు. ఆయన అరుపులు, కేకలు విని స్థానికులు అక్కడికి చేరుకున్నారు. కాలనీకి చెందిన రాజు  కూడా ఉరివేసుకుని ఉండడాన్ని గమనించారు. పోలీసులకు సమాచారం అందించారు.  ఫోన్‌ సంభాషణలను ఆరా తీయగా ఇద్దరూ చాలా సేపు మాట్లాడినట్లు పోలీసులు గుర్తించారు. మొత్తం మీద ఇద్దరి మధ్య ఏర్పడిన అనుమానాలు ,  కలహాలు ముగ్గురి ప్రాణాలను బలిగొన్నాయి. (పేర్లు మార్చాం)  ...
  • ( Kala Sagar Reddy Vintha ) హడావుడిగా ఆఫీసుకి బయల్దేరుతున్న రూపేష్  "ఏమోయ్  టిఫిన్ రెడీనా ?"అంటూ కేకేసాడు . "ఒక్క ఐదు నిమిషాలు అండీ "అంటూ వంటగదిలోకెళ్ళిన భువన హడావుడిగా బాండీ పొయ్యి మీద పెట్టి కొంచెం వేరుశనగ నూనె పోసి వేడెక్కాక కాసిని వేరుశనగ గుళ్ళు , పచ్చి మిర్చి , ఉప్పు వేసి వేపి చట్నీ చేసింది . తర్వాత పెనం పై కొంచెం వేరుశనగ నూనె చల్లి పెసర పిండి ఓ గంటె వేసి దోసె పోసి పైన వేరుశనగ బద్దలు , జీడీ పలుకులు వేసిన ఉప్మా పరిచి మరి కొంచెం వేరుశనగ నూనె పైన చల్లి ఎర్రగా కాలగానే దోసె మడతెసి ప్లేట్ లో తీసుకొని రూపేష్ రెడీ అయ్యేలోపు డైనింగ్ టేబుల్ పై ఉంచి భర్త వైపు చూసింది . వచ్చి కూర్చొని తాపీగా దోసె  తుంచి  ఓ ముక్క నోట్లో పెట్టుకొని రుచి చూసి 'సూపర్ 'అంటూ భార్య బుగ్గపై చిటికేశాడు . పాపం అప్పటిదాకా పడ్డ కష్టాన్ని మర్చిపోయిన భువన బుగ్గలు సిగ్గుతో కెంపులయ్యాయి . ...... ఇంక అక్కడితో మీ ఊహాలు ఆపండి . పై పేరాలో ఒక ఉప్మా పెసర దోస వేయటానికి వేరుశనగ నూనె కానీ గింజలు కానీ ఎన్నిసార్లు ప్రస్తావనకొచ్చాయో గమనించారా. 5సార్లు.  మన రోజువారీ ఆహారంలో కనీసం పదిసార్లు వాడే ఈ వేరుశనగ పంట గురించి పండే ప్రాంతం గురించి , పండించే రైతు లాభనష్టాలు , కష్ట సుఖాలు గురించి తెలుసుకొందాం . వేరుశనగ అనగానే వ్యవసాయం గురించి కొంచెం తెలిసిన వాళ్ళకైనా ఠక్కున గుర్తొచ్చే పేరు రాయలసీమ , ప్రత్యేకంగా అనంతపురం . సీమలోని కొన్ని ప్రాంతాల్లో , అనంతపురంలో ఎక్కువమంది పండించే పంట వేరుశనగ . అక్కడి వర్షాభావాన్ని తట్టుకొని అంతో ఇంతో దిగుబడి నమ్మకంగా వచ్చే పంట . నీటిపారుదల వసతి ఉన్న వారు ఇతర పంటల వైపు మొగ్గుచూపుతారు . 120 రోజుల పంట కాలంలో నాలుగైదు వర్షాలు పడితే చాలు 12 నుండి 15 మూటలు దిగుబడి ఇస్తుంది . మూట 42 కేజీలు . ఈ పంటకయ్యే ఖర్చు , వస్తోన్న ఆదాయం ఏ ధర ఉంటే గిట్టుబాటు అవుతుందో చూద్దాం . #వేరుశనగ సాగు ఒక ఎకరాకు అయ్యే ఖర్చు .  దుక్కి పనులు = 2000 విత్తనం కొనుగోలు , ఎద = 7000 ఎరువులు , కూలి. = 2500 కలుపు తీత = 2000 దంతులు లాగే దానికి. = 300 పురుగుమందులు,కూలి=1500 గోతాలు ఖర్చు = 750 కట్టె పీకుడు,కాయ వేరుచేసి గోతాలకు  ఎత్తి ఇంటికి చేర్చే పని. = 4000 భూమి కవులు. =4000 మొత్తం ఖర్చు = 24050 రూపాయలు దిగుబడి బస్తా 42 కేజీల చొప్పున 12 నుండి 18 బస్తాలు . అది నాలుగైదు వర్షాలు ఆ నాలుగు నెలల కాలంలో పడితేనే . ప్రస్తుత ధర నాణ్యతని బట్టి బస్తా 1500 ₹ నుండి 1800 ₹ వరకు రాబడి సగటు పంట 15బస్తాలు×ప్రస్తుత సగటు రేటు 1650 = 24750 రాబడి 24750 , ఖర్చు 24050 =ఆదాయం 700 ఎకరాకు . సొంత భూమి పదెకరాలు ఉన్న రైతు అయితే కవులు పదెకరాలకి 40000 వేలు కూడా మిగుల్తుంది కాబట్టి 47000 . ఓ పదెకరాల కవులు రైతు ఆరు నెలల కష్టఫలం 47000 అయితే ఎలా బతుకుతాడు ఏమి తిని ఏమి తాగి బతుకుతాడు . అప్పులు తిని బతికి తీర్చలేక ఆస్తులమ్ముకు తిని అప్పటికి తీరకపోతే మిగిలిన పురుగు మందు తాగి కాటికి పోతున్నాడు . ఆ మందు కూడా ఖర్చు అనుకొన్న వాడు . వంటి మీద లుంగీ చేలో చెట్టుకు కట్టి మెడకు ఉరిమాల వేసుకొంటున్నాడు . సరైన గిట్టుబాటు ధర కల్పిస్తే ఈ పరిస్థితి వస్తోందా . గిట్టుబాటు ధర అంటే ఏంటి అంటారా . గత కాంగ్రెస్ ప్రభుత్వం ఏర్పాటు చేసిన స్వామినాథన్ కమిషన్ సూచించినట్టు  100 శాతం వ్యయానికి 50 శాతం లాభం కల్పించి ధర ఏర్పాటు చేయాలని చేసిన సిఫార్స్ గిట్టుబాటు ధరకు ప్రామాణికంగా తీసుకొందాం . అన్నట్టు ఘనత వహించిన మన మోడీ గారి 2014 హామీల్లో స్వామినాథన్ కమిటీ సిఫార్స్ అమలు చేస్తామనే హామీ కూడా ఒకటి.  ఆదాయం . స్వామినాథన్ కమిటీ సిఫార్స్ ప్రకారం చూస్తే  పెట్టుబడి 24050 × సిఫార్స్ 50 శాతం 12025 = 36075 ₹ అయితే కనీసపు గిట్టుబాటు అవుతుంది .  36075÷15 బస్తాలు = 2405 ఒక బస్తా గిట్టుబాటు ధర మరి రైతే రాజు , రైతే దేవుడు రైతు అన్నదాత వారికోసమే మేము పనిచేసేది అని చెబుతున్న పాలకులు ఈ దిశగా చేస్తోన్న ప్రయత్నాలు ఏమన్నా ఉన్నాయా అంటే ప్రకటనలు తప్ప పనులు నామమాత్రంగా కూడా లేవు . సబ్సిడీ విత్తనాలు అంటారు అదనుకి ఇవ్వరు . ఇచ్చినా ఆరాకొరా కొద్దీ మందికే అందుతాయి . అది కూడా అధికార పార్టీ దళారులకు అంది అధిక ధరలకే రైతులకు చేరతాయి . గిట్టుబాటు ధర కల్పిస్తారా అంటే ఆ దిశగా ఆలోచనలు కూడా చేయరు . మరి రోజూ పేపర్లో ఎదో ఒక మూలన అనంత రైతు ఆత్మహత్య , రైతు బలవన్మరణం అనే వార్త చూస్తూనే ఉంటాం ఇలాంటి పాలకులు ఉన్నంత కాలం , రైతులు సంఘటితమై ఉద్యమించనంత కాలం . జనం రైతు గురించి ఆలోచించనంత కాలం . ఒక చోట యాక్సిడెంట్ అయ్యి నలుగురు చనిపోతే సోషల్ మీడియాలో కొవ్వొత్తులు వెలిగించి rip పోస్ట్లు పెట్టే మీరు రోజుకొక రైతు బలవంతంగా ప్రాణం తీసుకొంటుంటే ఏ మాత్రం స్పందిస్తున్నారు . అసలు ఆ దిశగా ఆలోచిస్తున్నారా ?  అనేదే అసలు ప్రశ్న !! ...